1. Likhalelo muni nyo samadzise a gu nalo Jesu? Tshamuseya.

LIMWEDO nya makhalelo nyo samadzise ya Jesu kheli nyo pwisise sigaradzo sathu kha nga vathu nya mba vbeleya. Tepo a nga ba ari mafuni, Jesu a di gu ‘nengela ni vale va nengelago’ ni gu “lila ni vale va lilago.” (Rom. 12:15) Khu giyeyedzo, tepo vapizane vaye nya 70 va nga bweleya na va tsakide hwane nyo ba va dugelede thumoni gwawe nyo tshumayele, “liphuvbo nya Guage li di tadza Jesu khu litsako.” (Luka 10:17-21) Vbavbandze nya isoso, tepo a nga wona wuvi wa valongo ni dzipari dza Lazaro khu kotani nya gufa gwaye, Jesu “a dipwa gisiro nya gikhongolo ni gugaradzega monyoni.” — Joh. 11:33.

2. Ginani gi phasidego Jesu gu yeyedza gukhathala khu vathu?

² Ambari olu Jesu a nga ba ari muthu nyo vbeleye, a di gu yeyedza wuhindzi ni gukhathala khu vathu nya mba vbeleya. Ginani gi mu phasidego gu gira isoso? Nya gikhongolo ga satsahvbo khu gu, Jesu a di gu haladza vathu. Kha nga hi si khumbugidego ga ndrima yi vbindridego, uye a di gu “tsakiswa [ngudzu] khu vathu.” (Mav. 8:31) Lihaladzo laye khu vathu li mu phaside gu pwisisa gwadi edzi vathu va pimisago khidzo. Mupostoli Johane tshamusede gu khuye: “Uye mune a di gu yiti myonyo yawe.” (Joh. 2:25) Jesu a di gu pweya wusiwana vambe. Vathu va di gu si wona gu khavo Jesu a ngu va haladza, isoso si di gu va gira va engiseya mahungu nya Mufumo. Ha gu khathala ngudzu khu vathu, hi na dugeleya ngudzu tepo hi va tshumayelago. — 2 Thim. 4:5.

3-4. a) Ha gu ba hi khathala khu vathu, hi na wu wona kharini thumo wathu nyo tshumayele? b) Ginani hi na gi wonago avba nya ndrima yeyi?

³ Mupostoli Pawulo a di gu dziti gu khuye a di yede gu tshumayela, nigu anethu hi ngu dziti gu khethu hi yede gu tshumayela. (1 Kor. 9:16) Ambari ulolo, ho khathala khu vambe, kha hi na nga wona thumo nyo tshumayele kha nga thumo nya gibhalo. Hi  na vbweta gu yeyedza gukhathala gwathu khu vambe ni edzi hi tsakeyago khidzo gu va phasa. Hi ngu dziti gu khethu “kategide ngudzu oyu a ningago guvbindra oyu a hakhago.” (Mith. 20:35) Ha gu wona thumo wathu nyo tshumayele khu ndziya yoyo, hi na wu gola ngudzu.

⁴ Avba nya ndrima yeyi, hi na hevbula edzi hi nga yeyedzago khidzo gukhathala khu vathu thumoni gwathu nyo tshumayele. Nyo pheye, hi na wona esi hi nga si hevbulago khedzi Jesu a nga dzipwa khidzo khu vathu. Khu gulandreya, hi na wona 4 dzindziya edzi hi nga pimedzeyago khidzo giyeyedzo gyaye. — 1 Ped. 2:21.

5-6. a) Jesu yeyedzide gu theya kota khu vamani? b) Kha nga si profetidwego ga Isaya 61:1, 2, khu ginani Jesu a pwedego wusiwana vathu a nga ba a va tshumayela?

⁵ Nga dundrugeya khu giyeyedzo gegi gya Jesu nya edzi a khathadego khidzo khu vathu. Litshigu limwedo, Jesu ni vapizane vaye va di garade ngudzu kholu va tshumayedego mahungu nya yadi nya mba hefemula. Ni “gikhati mwendro tepo nya guhodze” kha va tshaledwa khiyo. Khu kharato Jesu a di dzega vapizane vaye a hongola navo “giwulani” va ya “hefemula vbadugwana.” Ambari ulolo, gidzemo gi di va landra. Ginani a giridego Jesu tepo a nga vboha, ganiolu a wona vathu vale va mu landridego? A di “va pwela wuhindzi *, kholu va di khala nga dzinvuta nyambana muhavisi. A di phela gu va hevbudza silo nya singi.” — Marko 6:30-34.

⁶ Khu ginani Jesu a nga pweya wusiwa, mwendro gu khathala khu vathu vovo? A di wona gu khuye va di gu fana ni “dzinvuta nyambana muhavisi.” Adzina Jesu wonide gu khuye vambe gwawe va diri sisiwana nigu va di gu thuma ngudzu gasi gu sayisa dzingamo dzawe. Vambe adzina va di gu emisana ni wuvi nyo fedwe khu muthu nyo khaguri va mu haladzo. Abari kharato, si nga gira Jesu na dzi vegide wulangani gwawe. Kha nga hi ganedego khiso ga ndrima yi vbindridego, Jesu adzina tshanganide ni sigaradzo nya nga isoso. Jesu a di gu khathala  khu vambe, nigu a di kutsega gu va thaveleya. — Leri Isaya 61:1, 2.

7. Hi nga pimedzeya kharini giyeyedzo gya Jesu?

⁷ Ginani hi gi havbulago ga giyeyedzo gya Jesu? Kha nga Jesu, anethu hi randredwe khu vathu va fanago ni “dzinvuta nyambana muhavisi.” Va ngu tshangana ni sigaradzo nya singi. Ethu hi na ni egi va gi vbwetago — mahungu nya Mufumo. (Gutu. 14:6) Khu kharato, hi ngu pimedzeya Pfhumu yathu hi tshumayela mahungu nya yadi, kholu anethu hi ngu ‘pwela gisiro vale va vbedego tshivba.’ (Ndzi. 72:13) Hi ngu pweya wusiwana vathu, nigu ha gu vbweta gu gira gilogyo gasi hi va phasa.

8. Khu yevbini ndziya nyo pheye hi nga yeyedzago khiyo gukhathala khu vambe thumoni gwathu nyo tshumayele? Ninga giyeyedzo.

⁸ Ginani gi na hi phasago gu yeyedza gukhathala khu vale hi va tshumayelago? Gu vbwetega hi dzi vega wulangani wa ava hi va manago thumoni nya gutshumayele, hi bwe hi va phara edzi hi tsakeyago gu pharwa khidzo nethu. * (Mat. 7:12) Hongoleni hi bhula khu 4 dzindziya hi nga girago khidzo isoso. Nyo pheye, dundrugeya khesi si vbwetegago ga moyo ni moyo wawe. Gu tshumayela mahungu nya yadi, khidzo saye ni thumo wu girwago khu dhogodheya. Dhogodheya nya wadi a ngu dundrugeya khesi si vbwetegago ga mudwali ni mudwali. A gu mu wudzisa a bwe a engiseya gwadi tepo mudwali a ganeyago esi a si pwago. Walangani nyo mu ninge mirendre yi dzegeyago gu wuya mapimoni, uye a gu pheya khu gu gevisisa gwadi esi mudwali a si pwago, khavbovbo a mu ninga mirendre yi yelanago ni madwali yaye. Khu ndziya nyo fane, gu vbwetega hi si thumisi mabelelo nyo fane ga vatshavbo vathu hi va manago thumoni nya gutshumayele. Ganiolu, hi yede gu pwisisa giemo ni mawonelo nya muthu ni muthu.

9. Ginani hi yedego gu gi potsa? Tshamuseya.

⁹ Wa gu mana muthu thumoni nya gutshumayele, u nga dzegeyi gu dzi embeya gu khuwe u ngu giti giemo gyaye, mwendro esi a si khodwago ni gighelo gi mu girago a si khodwa. (Mav. 18:13) Vbavbandze nya isoso, gira siwudziso khu wugengeyi gasi u tugula gilogyo khuye ni esi a si khodwago. (Mav. 20:5) So ba si olovelegide gipandreni gwanu, mu wudzise khu thumo waye, ndranga yaye, womi waye ni mawonelo yaye khu silo. Tepo hi va girago siwudziso, hi na tugula sighelo si va girago va vbweta mahungu nya yadi. Tepo hi tugulago isoso, gu vbwetega hi khathala khesi si va garadzago hi bwe hi va ninga giphaso va gi vbwetago, nga edzi Jesu a giridego khidzo. — Fananisa ni 1 Vakorinto 9:19-23.

10-11. Khu guya khu 2 Vakorinto 4:7, 8, khu yevbini ndziya nya wuvili hi nga yeyedzago khiyo gukhathala khu vambe? Ninga giyeyedzo.

¹⁰ Nya wuvili, zama gu dundrugeya khu  womi wawe. Dzimbe dzitepo, adzina hi nga kodza gu pwisisa sigaradzo sawe. Ganiolu, kha ha vbeleya nigu anethu hi ngu tshangana ni sigaradzo. (1 Kor. 10:13) Hi ngu dziti gwadi gu khethu womi mafuni momu wu ngu garadza ngudzu. Ha gu kodza gu timiseya basi khu gu phaswa khu Jehovha. (Leri 2 Vakorinto 4:7, 8.) Ganiolu, nga dundrugeya khava va gu mwalo wupari wa vbafuvbi ni Jehovha. Si ngu va garadzeya ngudzu gu vbanya tigoni momu nya mba giphaso gya Jehovha. Gu fana ni Jesu, hi ngu va pweya wusiwana, hi bwe hi kutsega gu va bhuleya ‘mahungu nya yadi nya silo nya sadi nya gutsakise.’ — Isa. 52:7.

¹¹ Nga dundrugeya khu giyeyedzo gya ndriyathu Sergey. Na si gu hevbuli lisine, Sergey a diri muthu nyo degule ni dzitshoni. Si di gu mu garadzeya ngudzu gu bhula ni vambe. Khu gu gimbiya nya tepo, a di dzumeya gihevbulo nya Bhibhiliya. Sergey wari khuye: “Omu nya Bhibhiliya, nyi hevbude gu kheni maKristo gu vbwetega ma bhuleya vambe esi ma si khodwago. Khu lisine, nyi di gu pimisa gu kheni gima kha nyi na nga si kodza gu gira isoso.” Khu hwane, a di dundrugeya khu vale nya gu gima va si hevbuli lisine, a bwe a dundrugeya khedzi womi wawe wu khadego khidzo kholu va gu mba muti Jehovha. Wari khuye: “Silo nya siphya nyi si hevbudego si nyi ningide gutsaka ni gurula monyoni. Nyi di wona gu kheni vambe navo gu vbwetega va hevbula lisine leli.” Kha nga olu gukhathala khu vambe ga Sergey gu nga ba gu dandra, a di engedzeya gu tiya hwambo gasi a tshumayela. Sergey wari khuye: “Egi gi nyi samadzisidego khu gu, dzitshoni ni gudegula si di gu vbeya tepo nyi nga ba nyi bhuleya vambe khesi nyi si hevbulago omu nya Bhibhiliya. Nigu isoso si di gu engedzeya gukhodwa gwangu.” *

12-13. Khu ginani hi yedego gu laphiseya monyo vathu hi va manago thumoni nyo tshumayele? Fananisa.

¹² Nya wuraru, laphiseya monyo ava u va hevbudzago. Dundruga khu khuwe avo kha vati ne ni gimwegyo nya esi u si tigo khu Bhibhiliya. Nigu vambe va dandramede ngudzu avba nya esi va si khodwago. Adzina va gu wona wukhongeyi wawe kha nga gilo nya lisima ngudzu gi va tshanganisago kha nga ndranga, va wu  wona nari gipandre nya sihena sawe, mwendro kha nga gilo gi va tshanganisago gipandreni gwawe. Hi nga va phasa kharini?

¹³ Nga dundrugeya khu gifananiso gegi: La gu tshuka libhulaho li vbahidwego gale li garala, ginani gi giregago tepo li vbwetago gu tshikedwa? Gutala nya dzitepo, la gu vbahwa nya liphya vathu na va ngo thumisa eli la gale. Tepo eli nya liphya yi vbeyago, eli la gale la gu tshungunudwa. Khu ndziya nyo fane, na hi nga si kutsi vathu gu diga gu khodwa silo sawe sa “gale”, gu vbwetega hi pheya khu gu va phasa guti ni gu gola lisine nya “liphya” — gu gu sihevbudzo nya Bhibhiliya esi va nga ba va si siti na hi si gu pheyi gu hevbula navo lisine. Hwane nya isoso, khavbo va na kodzago gu diga esi va nga ba va si khodwa. Si nga dzega tepo gasi gu phasa vathu gu vbindrugedza. — Rom. 12:2.

14-15. Hi nga va phasa kharini ava va tigo sidugwana mwendro va gu mbati gilo khu gutumba nya womi nya pindrugedwa paradhesini mafuni? Ninga giyeyedzo.

¹⁴ Ha gu laphiseya monyo vathu thumoni nya gutshumayele, kha hi na nga vireya gu khethu va pwisisa ni gu dzumeya lisine khu litshigu nyo pheye hi bhulago navo. Vbavbandze nya isoso, gukhathala gwathu khavo gu na hi kutsa gu va phasa gu dundrugeya khesi Bhibhiliya yi si ganeyago khu tepo nyo khaguri. Khu giyeyedzo, nga dundrugeya khedzi u nga phasago khidzo muthu gu pwisisa gutumba nya womi nya pindrugedwa paradhesini mafuni. Nya vangi va guti sidugwana ambari gu mbati gilo kamo khu gihevbudzo gyogyo. Adzina va gu khodwa gu khavo muthu a gufa, kha na nga tshuka a wugide a vbanya. Mwendro va khodwa gu khavo vatshavbo vathu nya vadi va gufa va na hongola ndzadzini. Hi nga va phasa kharini?

¹⁵ Ndriyathu nyo khaguri a gu tshamuseya magirelo a ma wonidego na ma phasa. Gupheya, a gu leri Genesi 1:28. Khu hwane, a wudzisa mune ndranga gu khuye Nungungulu a di gu vbweta gu khuye vathu va vbanya hayi nigu va vbanya kharini. Gutala nya vathu va gu hlamula gu khavo: “Mafuni, na va tsakide.” Khu gulandreya, ndriyathu a leri Isaya 55:11, a vbedza a mu wudzisa gu khuye makungo ya Nungungulu ma di vbindrugedza gani. Gutala nya dzitepo, mune ndranga a gu hlamula khuye ne. Khu guhegisa, a ndriyathu a leri Ndzimo 37:10, 11, a vbedza a mu wudzisa gu khuye ginani gi na giregeyago vathu mindru wa tshigu. Khu gu thumisa Bhibhiliya khu ndziya yoyo, ndriyathu yoyu a ngu phasa vathu nya vangi gu pwisisa gu khavo Nungungulu a ngo vbweta gu khuye vathu nya vadi va vbanya kala gupindruga Paradhesini mafuni.

16-17. Khu guya khu Mavingu 3:27, khu dzevbini dzimbe dzindziya hi nga yeyedzago khidzo gukhathala khu vambe? Fananisa.

¹⁶ Nya wuna, dundrugeya khesi u nga girago gasi gu yeyedza gukhathala khu vathu. Khu giyeyedzo, hi di nga tshuka hi endreya muthu hi ya mu mana na sa dzi emiseya gu hi hakha? Hi nga lomba divalelo hi bwe hi mu tumbisa gu wuya khu yimbe tepo. Ahati ha gu ya mana mune ndranga na vbweta gu phaswa gu gira silo nyo khaguri? Mwendro ahati a gu ba a tandrega  ni gu khuga ndrangani khu gu dwala mwendro gu gumba? Ga siemo soso, hi ngu kodza gu mu phasa muthu yoyo. — Leri Mavingu 3:27.

¹⁷ Ndriyathu moyo nya nyamayi a yi wone mihandro nyo gire gilo nyo khaguri nya gyadi, ambari gyo wonega na gi si suruviri. Khu kotani nya gupweya gwaye wasiwana, a di loveya lidangaliya ndranga nyo khaguri yi nga ba yi fedwe khu gyanana gyayo. Omu nya lidangaliya laye, a di lovide mavhesi nyo khaguri nya Bhibhiliya nya gu va thaveleye. Yi dzipwide kharini ndranga yoyo? Mamayi wa gyanana gyogyo a di lova khuye: “Litshigu la vbonova li di gu nyi lemeleya. Edzi li hi thaveledego khidzo lidangaliya lago! Nyi mwalo ni malito nyo eneye gasi gu gu bonga, mwendro kha nyi guti ni gu kheni nyi na pheya khu hayi. Lidangaliya lago, nyi li leride guvbindra 20 dzitepo vbonova. U ngu dziti, li di gu tshamba, ni gu tiyisana, ni gu thaveleyana. Hi bongide khu gu hi vbodziseya myonyo yathu.” Nya mba kanakana, hi nga mana mihandro nya yingi nya yadi ha gu zama gu pwisisa sigaradzo va tshanganaso naso vathu, khavbovbo hi gira gilogyo gasi gu va phasa.

18. Khu guya khu 1 Vakorinto 3:6, 7, ginani hi yedego gu gi dundruga khu thumo wathu, nigu khu ginani?

¹⁸ Khu lisine, gu vbwetega hi manega ni mawonelo nyo ninganiseye khu thumo wathu nyo tshumayele. Hi ngu patega avba nyo phase vathu gu hevbula khu Nungungulu, ganiolu khandrethu hi girago thumo wakone nya litshina. (Leri 1 Vakorinto 3:6, 7.) Jehovha khuye a ndrindrago vathu gasi vata gwaye. (Joh. 6:44) Monyo nya muthu khuwo wu na yeyedzago gu tsakeya ni gu mba tsakeya mahungu nya yadi. (Mat. 13:4-8) Dundruga gu khuwe nya vangi kha va dzumeya mahungu ya Jesu, ambari olu a nga ba ari Muhevbudzi nya khongolo guvbindra vatshavbo! Khu kharato, hi nga vbeyi tshivba go tshuka vathu nya vangi hi zamago gu va phasa va si engiseyi mahungu yathu.

19. Mihandro muni hi na yi manago ha gu khathala khu vambe thumoni nyo tshumayele?

¹⁹ Hi na mana mihandro nya yingi ha gu khathala khu vambe thumoni nyo tshumayele. Hi na engedzeya gu wu gola thumo nyo tshumayele. Hi na mana gutsaka nya gukhongolo gu manwago khu gu ninga. Nigu hi na vbevbugiseya ava va dzi ‘emisedego gu hakha guvbanya nya gupindruge’ gu dzumeya mahungu nya yadi. (Mith. 13:48) Khu kharato “olu hi ngarigu ni gikhati, hongoleni hi girela esi nya sadi vathu vatshavbo, ngudzungudzu vandriyathu gukhodwani.” (Gal. 6:10) Khavbovbo, hi na tsaka khu guti gu khethu ha gu reseya wuzundzo Papayi wathu wa ndzadzini. — Mat. 5:16.