1. Mbube nzi bumwi ibukkomanisya kapati mbwajisi Jesu? Amupandulule.

BUBE bumwi ibukkomanisya kapati mbwajisi Jesu mbwakuti ulaamvwisya mapenzi ngotujana nkaambo tatulondokede. Naakali anyika, Jesu wakali ‘kukondwa abaabo bakondwa’ alimwi ‘akulila abaabo balila.’ (Rom. 12:15) Mucikozyanyo, ciindi basikwiiya bakwe ibali 70 nobakapiluka kabakkomene kapati akaambo kakuzwidilila mumulimo wabo wakukambauka, Jesu “wakakondwa kapati mumuuya uusalala.” (Lk. 10:17-21) Kulubazu lumwi, ciindi naakabona lufwu lwa Lazaro mbolwakabapa kuusa aabo ibakali kumuyanda, Jesu “wakanyongana kapati mumoyo alimwi wakapenga.”—Joh. 11:33.

2. Ncinzi icakamugwasya Jesu kutondezya lweetelelo kubantu?

² Nokuba kuti Jesu wakalilondokede, wakalaaluse alimwi aluzyalo kubantu batalondokede. Ino ncinzi icakamugwasya kuba muntu uuli boobu? Cintu cipati icakamugwasya Jesu ncakuti, wakali kubayanda bantu. Kweelana ambotwakaiya mucibalo cainda, Jesu wakali ‘kubayanda kapati bana babantu.’ (Tus. 8:31) Luyando oolo ndwaakajisi kubantu lwakamupa kuti azyibe kabotu-kabotu kujatikizya mbobayeeya. Mwaapostolo Johane wakaamba kuti: “Wakalizyi cakali mumoyo wamuntu.” (Joh. 2:25) Jesu wakali aaluzyalo kapati kubantu. Bantu bakali kubona kuti ulabayanda alimwi bakali kuswiilila mulumbe wa Bwami. Kuti twazumanana kuba aluzyalo kubantu mbubwenya mbuli Jesu, tuyoocikonzya kuzwidilila mumulimo wesu wakukambauka.—2Tim. 4:5.

3-4. (a) Ikuti katujisi lweetelelo, mbuti mbotuya kuubona mulimo wesu wakukambauka? (b) Ncinzi ncotutiilange-lange mucibalo eeci?

³ Mwaapostolo Paulo wakalizyi kuti wakajisi mukuli wakukambauka, alimwi andiswe tulizyi kuti tujisi mukuli wakukambauka. (1Kor. 9:16) Nokuba boobo, ikuti katujisi lweetelelo, mulimo wesu  wakukambauka tatukauboni kuba wakwiinzya buyo mulawo. Tuyootondezya kuti tulababikkila maano bantu alimwi tulayandisisya kubagwasya. Tulizyi kuti “kupa kulakkomanisya kapati kwiinda kupegwa.” (Mil. 20:35) Ciindi notukambauka akaambo kakuti tuyanda kugwasya bantu, tuyookkomana kapati amulimo wesu.

⁴ Mucibalo eeci, tulaiya mbotukonzya kutondezya lweetelelo mumulimo wesu wakukambauka. Cakusaanguna, tulabona ncotukonzya kwiiya kuli Jesu kujatikizya mbwaakali kubabona bantu. Mpoonya tulalanga-langa nzila zyone mbotukonzya kwiiya cikozyanyo cakwe.—1Pet. 2:21.

5-6. (a) Ino mbaani Jesu mbaakeetelela? (b) Kweelana ambokwakasinsimwa kulugwalo lwa Isaya 61:1, 2, nkaambo nzi Jesu ncaakali kubeetelela bantu mbaakali kukambaukila?

⁵ Amubone cikozyanyo ca Jesu cijatikizya mbwaakatondezya lweetelelo. Aciindi cimwi, Jesu alimwi abasikwiiya bakwe bakalikatede kapati akaambo kakuti bakali kukambauka makani mabotu kakunyina kulyookezya. Tiibakajana “aciindi cakupumuna kuti balye.” Aboobo Jesu wakabweza basikwiiya bakwe “akuunka kubusena bunyina bantu kutegwa bakabe buyo balikke” alimwi ‘akulyookezya aniini.’ Nokuba boobo, nkamu mpati yabantu njiyakasaanguna kusika kubusena ooko Jesu alimwi abasikwiiya bakwe nkobakali kuya. Ino Jesu wakacita buti ciindi naakasika kubusena ooko akubona bantu? “Wakabeetelela * nkaambo bakali mbuli mbelele zitakwe mweembezi. Mpoonya wakatalika kubayiisya zintu zinji.”—Mk. 6:30-34.

⁶ Nkaambo nzi Jesu ncaakabeetelela bantu aaba? Wakabona kuti bantu “bakali mbuli mbelele zitakwe mweembezi.” Ambweni Jesu wakabona kuti bamwi bakali bacete alimwi bakali kubeleka mawoola manji kutegwa bajanine mikwasyi yabo zintu nzyoyakali kuyandika. Andiza bamwi bakaluuside kapati akaambo kakufwidwa muyandwa wabo. Ikuti naa mbocakabede oobo, kweelede kuti Jesu wakabumvwisya bukkale bwabo. Kweelana ambotwakaiya mucibalo  cainda, kweelede kuti Jesu wakapenga mbubwenya mbobakali kupenga bamwi. Jesu wakali kubabikkila maano bamwi, alimwi wakali kuyanda kubaumbulizya.—Amubale Isaya 61:1, 2.

7. Mbuti mbotukonzya kwiiya cikozyanyo ca Jesu?

⁷ Ncinzi ncotwiiya kucikozyanyo ca Jesu? Mbubwenya mbuli Jesu, tulizingulikidwe abantu ibali “mbuli mbelele zitakwe mweembezi.” Balijisi mapenzi manji kapati. Tulijisi cintu ncobayandika, nkokuti mulumbe wa Bwami. (Ciy. 14:6) Aboobo kwiinda mukwiiya Simaleleesu, tulakambauka makani mabotu akaambo kakuti tulabafwida lubomba bantu bapengede alimwi abacete. (Int. 72:13) Tulabafwida lubomba bantu, alimwi tuyanda kucita kufwumbwa ncotukonzya kutegwa tubagwasye.

8. Ino ninzila nzi imwi mbotukonzya kutondezya lweetelelo mumulimo wakukambauka? Amupe cikozyanyo.

⁸ Ino ncinzi cikonzya kutugwasya kutondezya lweetelelo kuli baabo mbotukambaukila? Tweelede kweezyeezya kujatikizya mbobayeeya alimwi ambobalimvwa bantu mbotujana, alimwi akubeendelezya munzila njotunga twayanda kuti tweendelezyegwe andiswe ikuti naa katuli mubukkale bwabo. * (Mt. 7:12) Atubandike nzila zigaminide zyone mbotunga twacita boobo. Yakusaanguna, amuyeeye nzyayandika umwi aumwi. Ciindi notukambauka makani mabotu, mulimo wesu ulikozyenye amulimo ngwajisi dokota. Dokota uuli kabotu ulabikkila maano nzyayandika mulwazi umwi aumwi. Ulabuzya mibuzyo alimwi akuswiilila cakubikkila maano ciindi mulwazi napandulula mbwalimvwide. Muciindi cakwiile kumupa buyo musamu uuli woonse, dokota ulamulanga-langa mulwazi mpoonya akumupa busilisi bweelede. Mbubwenya buyo, tatweelede kubelesya nzila yomwe buyo kumuntu uuli woonse ngotujana mumulimo wesu wakukambauka. Muciindi caboobo, tweelede kubikkila maano kubukkale bugaminide alimwi ambwayeeya muntu umwi aumwi kumugama.

9. Ncinzi ncotuteelede kuyeeya ciindi notujana muntu mumulimo wakukambauka? Amupandulule.

⁹ Ciindi nomujana muntu mumulimo wakukambauka, tamweelede kuyeeya kuti mulibuzyi bukkale bwakwe naa nzyasyoma alimwi akaambo ncazyisyomena. (Tus. 18:13) Muciindi caboobo, cabupampu amumubuzye mibuzyo kutegwa muzyibe cintu cimwi kujatikizya muntu ooyo alimwi anzyasyoma. (Tus. 20:5) Ikuti kaceelela kubusena nkomukkala, amumubuzye kujatikizya mulimo ngwabeleka, mukwasyi wakwe, mbwaakakomena alimwi ambwazibona zintu. Ciindi notubuzya mibuzyo, tulazyiba nzyobayandika. Ciindi notwazyiba, tulakonzya kubeetelela alimwi akugwasya, mbubwenya mbwaakacita Jesu.—Amweezyanisye 1 Bakorinto 9:19-23.

10-11. Kweelana alugwalo lwa 2 Bakorinto 4:7, 8, ninzila nzi yabili motukonzya kubeetelela bamwi? Amupe cikozyanyo.

¹⁰ Yabili, amusoleke kweezyeezya kujatikizya mbobubede buumi bwabo. Munzila imwi,  tulakonzya kubumvwisya bukkale bwabo. Kayi tatulondokede aboobo andiswe tulijisi mapenzi. (1Kor. 10:13) Tulizyi kuti buumi mubweende obuno bulakonzya kuyuma kapati. Tulaliyumya kwiinda mulugwasyo lwa Jehova. (Amubale 2 Bakorinto 4:7, 8.) Pele amuyeeye buyo kujatikizya baabo ibatajisi cilongwe a Jehova. Kweelede kuti nciyumu kapati kulimbabo ikupona munyika eeyi kakunyina lugwasyo lwakwe. Mbubwenya mbuli Jesu, tulabafwida luzyalo, alimwi tulakulwaizyigwa kubaambila “makani mabotu aacintu ciinda kubota.”—Is. 52:7.

¹¹ Amubone cikozyanyo camukwesu wazina lya Sergey. Kabatanaiya kasimpe, ba Sergey bakali aansoni alimwi baumuzi. Cakali kubayumina kubandika abamwi. Mukuya kwaciindi, bakazumina kwiiya Bbaibbele. Ba Sergey bakaamba kuti: “Ciindi nondakali kwiiya Bbaibbele, ndakaiya kuti Banakristo balijisi mukuli wakwaambila bamwi nzyobasyoma. Kwaamba masimpe, ndakali kuyeeya kuti kunyina nondikonzya kucita cintu cili boobo.” Pele bakali kubayeeya aabo ibatanaiya kasimpe, alimwi bakalizyi kuti buumi mbobapona bweelede kuti bulakatazya kapati akaambo kakuti tabamuzyi Jehova. Bakazumanana kwaamba kuti, “Zintu zipya nzyondakali kwiiya zyakandipa kukkomana kapati alimwi akuba aluumuno lwamumizeezo. Ndakalizyi kuti abamwi bayandika kuziiya zintu eezyi.” Ciindi ba Sergey nobakatalika kubeetelela kapati bantu, bakaba abusicamba bwakukambauka. Ba Sergey bakayungizya kwaamba kuti: “Ndakagambwa kubona kuti kubandika zyamu Bbaibbele abantu bamwi kwakandipa kuba sicamba. Alimwi kubandika abamwi kujatikizya nzyondisyoma kwakayumya lusyomo lwangu.” *

12-13. Nkaambo nzi ncotweelede kubakazikkila moyo aabo mbotuyiisya mumulimo wakukambauka? Amupe cikozyanyo.

¹² Yatatu, amubakkazikile moyo aabo mbomuyiisya. Amuyeeye kuti, ambweni tabanabuzuba batumvwa twaambo tumwi twamasimpe tuli mu Bbaibbele ooto swebo ntotuzyi kabotu. Alimwi banji balaziyanda kapati nzyobasyoma. Balakonzya kulimvwa kuti bukombi bwabo ncintu cipati icibakamantanya kumikwasyi yabo,  kuzilengwa zyabo alimwi akubantu bamuzilawo mobakkala. Mbuti mbotukonzya kubagwasya?

¹³ Amuyeeye cikozyanyo eeci: Ncinzi cicitika ikuti naa bbiliji limwi lyakaindi kalitali kabotu alimwi liyandika kulimwaya? Kanji-kanji, bbiliji lipya lilatalika kuyakwa kumwi lyakaindi kalicibelesyegwa. Kufwumbwa buyo lyamana kuyakwa bbiliji lipya, lyakaindi lilakonzya kumwaigwa. Mbubwenya buyo, ikuti katuyanda kuti bantu bazileke njiisyo “zyakaindi” nzyobakkomanina kapati, cakusaanguna inga twayandika kubagwasya kuzyiba alimwi akukakkomanina kasimpe “kapya,” nkokuti njiisyo zyamu Bbaibbele eezyo nzyobatazyi ciindi notwatalika kwiiya ambabo. Lilikke buyo ikuti bakazyiba kasimpe ndendilyo nobayoozileka njiisyo zyabo zyakaindi. Cilakonzya kutola ciindi kutegwa tubagwasye bantu kucinca.—Rom. 12:2.

14-15. Ino inga twabagwasya buti aabo ibazyi buyo makani masyoonto naa ibatazyi cili coonse kujatikizya bulangizi bwabuumi butamani muparadaiso anyika? Amupe cikozyanyo.

¹⁴ Ikuti katubakkazikila moyo bantu mumulimo wakukambauka, tatukalangili kuti bayookamvwisya naa kukatambula kasimpe kamu Bbaibbele mbobayookamvwida buyo ciindi cakusaanguna. Muciindi caboobo, lweetelelo luyootukulwaizya kubagwasya kuzinzibala kuyeeya kwaciindi cili mbocibede kujatikizya ncaamba Magwalo. Mucikozyanyo, amubone mbotukonzya kumugwasya muntu umwi kumvwisya bulangizi bwabuumi butamani muparadaiso anyika. Bantu banji bazyi buyo makani masyoonto naa kunyina ncobazyi kujatikizya njiisyo eeyi. Ambweni inga kabasyoma kuti ciindi muntu afwa, ngamamanino aabuumi bwakwe. Andiza inga kabayeeya kuti bantu boonse ibali kabotu baunka kujulu. Ino inga twabagwasya buti?

¹⁵ Mboobu mukwesu umwi mbwagwasya bantu kumvwisya bulangizi bwakuyoopona kukabe kutamani anyika. Cakusaanguna, ulabala lugwalo lwa Matalikilo 1:28. Mpoonya ulamubuzya mukamwiniŋanda kujatikizya Leza nkwaakali kuyanda kuti bantu kabakkala alimwi abuumi mbwaakali kuyanda kuti kabapona. Bunji bwabantu baingula kuti, “Wakali kuyanda kuti kabapona buumi buli kabotu anyika.” Amana, mukwesu ulabala lugwalo lwa Isaya 55:11 akubuzya kuti naa makanze aa Leza akacinca. Kanji-kanji, mukamwiniŋanda wiingula kuti peepe. Mukumanizya, mukwesu ulabala lugwalo lwa Intembauzyo 37:10, 11 akubuzya kujatikizya mbobunoobede buumi bwabantu kumbele. Kwiinda mukubelesya Magwalo munzila eeyi, wagwasya bantu banji kumvwisya kuti Leza uyanda kuti bantu ibali kabotu bakapone kukabe kutamani mu Paradaiso anyika.

16-17. Kweelana alugwalo lwa Tusimpi 3:27, muunzila nzi zimwi motukonzya kutondezya kuti tulababikkila maano bantu? Amupe cikozyanyo.

¹⁶ Yane, amuyeeye ncomukonzya kucita kutegwa mutondezye kuti mulababikkila maano bantu. Mucikozyanyo, sena kuli notwakaswaide kale muntu umwi aciindi citali kabotu? Tulakonzya kulilekelela alimwi akumwaambila kuti tuyakupilukila aciindi cili kabotu. Mbuti kuti mukamwiniŋanda uyandika kugwasyigwa kalimo kamwi? Naa mbuti kuti muntu umwi uutakonzyi  kweenda akaambo kakuciswa naa kucembaala uyandika kugwasyigwa mulimo umwi? Mubukkale buli boobu, tulakonzya kumugwasya muntu.—Amubale Tusimpi 3:27.

¹⁷ Mucizyi umwi wakakkomana kapati ciindi naakamana kucita cintu cimwi caluzyalo calo icakali kulibonya mbuli kuti tacigwasyi. Akaambo kakuti wakali kubabikkila maano, wakalemba lugwalo kumukwasyi iwakafwidwa mwana. Mulugwalo oolo mwakali atupango tumwi twamu Magwalo ituumbulizya. Ino mukwasyi ooyo wakalimvwa buti kulugwalo oolo? Banyina mwana ibakauside bakalemba kuti, “Ndakaluuside kapati jilo. Tandisyomi kuti inga mwamvwisya kujatikizya mbolwakatugwasya lugwalo lwanu. Ndilikkomene akaambo kalugwalo lwanu ilwakatuumbulizya kapati. Lugwalo lwanu ndakalubala ziindi ziinda ku 20 jilo. Ndakagambwa mbolwakalembwa munzila yalubomba, kubikkila maano alimwi akuumbulizya. Twamulumba kapati kuzwa aansi amyoyo yesu.” Cakutadooneka, tulakonzya kukkomana kapati ciindi notulibikka muciimo cabaabo ibapengede alimwi akucita kufwumbwa ncotukonzya kutegwa tubagwasye.

18. Kweelana alugwalo lwa 1 Bakorinto 3:6, 7, ncinzi ncotweelede kuyeeya kujatikizya mulimo wesu wakukambauka, alimwi ino nkaambo nzi?

¹⁸ Mubwini, tuyanda kuubona munzila yeelede mukuli wesu mumulimo wakukambauka. Tulijatikizyidwe mukugwasya bantu kwiiya kujatikizya Leza, pele tatuli ndiswe tucita cibeela cipati camulimo ooyu. (Amubale 1 Bakorinto 3:6, 7.) Jehova ngonguwe uubakwela bantu. (Joh. 6:44) Mukuya kwaciindi, aumwi uyoosala kwaazumina naa kwaakaka makani mabotu kweelana amboubede moyo wakwe. (Mt. 13:4-8) Amuyeeye kuti Jesu wakali Mwiiyi mupati kwiinda bantu boonse ibakaponede, pele banji tiibakauzumina mulumbe wakwe! Aboobo tatweelede kutyompwa ikuti naa bantu banji mbotusola kugwasya tabaswiilili kumulumbe wesu.

19. Nzilongezyo nzi nzyotujana ciindi notutondezya lweetelelo mumulimo wesu wakukambauka?

¹⁹ Tuyoojana zilongezyo ciindi notutondezya lweetelelo mumulimo wesu wakukambauka. Tuyooyungizya lukkomano mumulimo wesu. Tuyooba alukkomano luboola kwiinda mukupa. Alimwi tuyoopa kuti cibaubile aabo ‘ibalibambilide kutambula buumi butamani’ kuzumina makani mabotu. (Mil. 13:48) Aboobo “kufwumbwa leelyo notujisi coolwe, atucitile bantu boonse milimo mibotu.” (Gal. 6:10) Kuti twacita oobo, tuyookkomana nkaambo tuyoopa kuti Taateesu uuli kujulu alemekwe.—Mt. 5:16.