1. Uandanta je náki jindeski ma ambe engachi tsitijka na enga jásïka Jesusi.

MA AMBE engachi tsitijka na enga jásïka Jesusi, jindesti eskajtsïni úsïnga kurhanguchini engachi uandanhiatechani ambe jatsiajka jimbokachi no perfektueska. Enga Echerirhu japka, tsipispti imecha jingoni engaksï tsipienga ka ueraspti imecha jingoni engaksï uerenga (Rom. 12:15). Por ejemplu, engaksï imeri 70 chúxapaticha tsipiparini kʼuanhatsintapka jimboka sési nikuaspka aianhpikuarhu, “Jesusi meru tsipini pʼikuarheraspti Espiritu Santuni jimbo” (Luk. 10:17-21). Peru Jesusi “kánikua no sési pʼikuarheraspti ka ístu uandanhiani” enga exeapka imechani engaksï xénchenga Lasaruni kómu pʼikuarherani jarhani imeri uarhikua jimbo (Juanu 11:33).

2. ¿Andisï Jesusi kurhangukueni kʼuiripuni?

² Nájkiruka Jesusi perfektuepka, no jirejiresï xukaasïrendi kuiripuechani, sino pʼamojkuasïrendi. ¿Ambe jarhuataspi para inde jásï kʼuiripu máeni? Uékperakua. Eskachi na exekia máteru artikulurhu, meru xénchaasïrendi kʼuiripuechani (Prov. 8:31). Inde ambe jarhuataspti para sánderu mítini na engaksï eratsijka kʼuiripuecha. Apostuli Juanu uandasïndi: “Ima mítisp[tia] ambe enga eratsienga ma kʼuiripu” (Juanu 2:25). Jesusi pʼamojkuasïrendi kʼuiripuechani ka uánikua ima kʼuiripu pʼikuarheraspti na enga xáni xénchauenga, jimboksïsï jiókuarhipti Reinueri ambe. Engachi sánderu ísï úska eska Jesusi, sánderujtsïni sési nicheati aianhpikuarhu (2 Tim. 4:5).

3, 4. a) ¿Andichisï aianguajki kʼuiripuechani Tata Diosïri ambe? b) ¿Ambechi exea ini artikulurhu?

³ Apostuli Pablu mítispti eska jatsispka para aianhpini, ka juchajtuchi ísï (1 Kor. 9:16). Peru engachi kurhangukuajka na engaksï pʼikuarherajka kʼuiripuecha, aianguasïngachi Tata Diosïri ambe no solu jimbokachi jatsiska para ísï úni, sino jimbokachi  uandanhiasïnga imaecha jimbo ka uékasïngachi jarhuataani. Mítiskachi eska “sánderu sésis[ka] intsïmpini, ka eska intsïmbinhani” (Uku. 20:35). Ini ambe miáparini, sánderuchi tsípikua jingoni aianhpiaka.

⁴ Ini artikulu jimbochi exeaka néna kurhangukuani kʼuiripuechani aianhpikuarhu. Orhetachi exeaka na enga exeauenga Jesusi kʼuiripuechani ka ambe engajtsïni jorhendajka inde ambe. Tátsekuachi exeaka tʼámu ambe engajtsïni jarhuataaka májkueni úni eska Jesusi (1 Ped. 2:21).

5, 6. a) ¿Néchani kurhangukuaspi Jesusi? b) Eska na uandakata japkia Isaías 61:1, 2 jimbo, ¿andisï Jesusi pʼamojkuapi imani kʼuiripuechani enga predikarikuapka?

⁵ Ju je exeni na enga ma xanhari Jesusi kurhangukuapka kʼuiripuechani. Ima ka imeri chúxapatichaksï méntku no sáni anhaxurhispti aianhpini. Niksï jamberi tiempu jatsipi para tʼireni. Ísï jimbo, Jesusi paaspti “jima enga no nema” irekapka paraksï sáni mintsikuarhini. Peru uánikua kʼuiripuechaksï uiriapaspti chúxapaani jima engaksï imecha nirani japka. ¿Ambe úspi Jesusi enga niárapka ka exeni iámu imani kʼuiripuni? ‘Uéki jimbo pʼamojkuaspti’ * “jimbokaksï ísï jámasïrenga eska karichicha engaksï nómbe karichi erangutini jatsijka. Ka seguirispti mámaru ambe jorhendaani” (Mar. 6:30-34).

⁶ ¿Andisï Jesusi pʼamojpepi? Jimboka exespka eskaksï ima kʼuiripuecha “ísï jámasïrenga eska karichicha engaksï nómbe karichi erangutini jatsijka”. Jamberi kuenta íntskukuarhipti eskaksï máru ima kʼuiripuecha no jatsikuarhirispka ka jatsinksï para chúskutani ánchikuarhini paraksï úni tʼirekua jatsini. Jamberiksï máru uarhiranchapti nemani. Jesusi ini ambe jimbo úpti sési kurhangukuani na engaksï pʼikuarherani japka ima kʼuiripuecha, jamberi ménisï ima mismu nitamanchapti indeni ambe, ísï eskachi na exekia máteru artikulurhu. Ka jimboka pendienti pásïrenga máteruecha jimbo, imani ambe aianguaspti enga sési pʼikuastantauenga (arhinta je Isaías 61:1, 2).

7. ¿Nénachi úa májkueni úni eska Jesusi?

 ⁷ ¿Nénachi úa májkueni úni eska Jesusi? Iásï, ístuksï kʼuiripuecha ísï jámasïndi “eska karichicha engaksï nómbe karichi erangutini jatsijka” ka uánikua problemecha jingoni. Peruchi jucha mítiska imani ambe engaksï imecha uétarhinchajka: Tata Diosïri Reinueri ambe (Jaŋ. 14:6). Ísï jimbo, májkuenchi úsïnga eska juchari Jorhentpiri ka aianguasïngachi ambakiti ambe, jimbokachi pʼamojkusïnga “imani enga kaxumbitika ka pobrini” (Sal. 72:13). Pʼamojkusïngachi kʼuiripuni ka uékasïngachi úni ambe ma para jarhuatani.

8. ¿Ambejtsïni jarhuataa kurhangukuni kʼuiripuni aianhpikuarhu? Jatsiku je ejemplu ma.

⁸ Parachi úni kurhangukuani imechani engachi predikarikuajka, jatsiskachi para eranhaskani ambe engaksï imecha eratsijka ka pʼikuarherani, ka ísï kaani eskachi na uékapiringa eskachi kánhapiringa * (Mat. 7:12). Ju je exeni tʼámu ambe engajtsïni jarhuataaka ísï úni. Uénani jámani, ju je eratsini ambe enga mándani kʼuiripu uétarhinchajka. Engachi nirajka aianhpini, úakachi ísïni eska doktori ma. Ambakiti doktori ma exesïndi ambe enga uétarhinchajka mándani pʼamenchati. Kurhamarhisïndi ka jingontku kurhajchasïndi kʼuiripuni enga aianguni jarhajka ambe enga pʼikuarherajka. Doktori no sóntku íntskusïndi imani ambe enga orhetku eratsijka, sino mámaru ambe úsïndi para exeni ambe enga pʼamenchani jaka kʼuiripu para úni imani ambe íntskuni enga sési úkuaka. Májkuenisti, juchajtuchi no iáminduechani májkueni ambe aianguasïnga engachi predikarijka, sinochi jánguarhintasïnga aianhpini ambe enga mándani kʼuiripu uétarhinchajka ka ambe enga eratsijka.

9. a) ¿Ambechi no jatsiska para eratsini kʼuiripuecheri ambe? b) ¿Ambe sánderu sésiski úni?

⁹ Nochi jatsiska para eratsini eskachi mítiskia ambe enga nitamakuarhijka ima kʼuiripu engachi predikarikujka, ni ambe enga jakajkujka o andisï imani ambe jakajkujki (Prov. 18:13). Sánderu sésisti eskachi janhanharhikua jingoni kurhamarhiaka ambe ma parachi úni mítini indeni ambe (Prov. 20:5). Por ejemplu, enga no no sési exenhajka jimesïsï nani engachi irekaka, úakachi kurhamarhiani imecheri ánchikuarhiteri ambe, familieri, nénaksï exesïni ambe ma o máteru ambe ima kʼuiripuecheri. Engachi ini ambe úska, kʼuiripujtsïni aianguati andiksïsï uétarhinchajki mítini Reinueri ambe. Engachi na mítiakia indeni ambe, úakachi pendienti jarhani ambe engaksï uétarhinchajka ka jarhuataani, ísï eska Jesusi na úpka (terukutanta je 1 Korintu 9:19-23 jingoni).

10, 11. Exeparini ambe enga arhijka 2 Korintu 4:7, 8, ¿ambejtsïni máteru ambe jarhuataa parachi kurhangutspini? Jatsiku je ejemplu ma nemaeri enga ísï úpka.

¹⁰ Tsimani úni jámani, ju je jánguarhintani eranhaskani na enga irekani jaka ma kʼuiripu. Ísï úni, jarhuataatijtsïni imecheri lugari jimbo niárani, jimbokachi juchajtu májkueni jatsiasïnga  uandanhiatechani eska náki uéjki kʼuiripu ma (1 Kor. 10:13). Mítiskachi eska Satanasiri parhakpini jimbo irekani, kánikua úkua jukaska ka eskajtsïni solu Jeoba jarhuataaka tekantani (arhinta je 2 Korintu 4:7, 8). Peru ju je eranhaskaani na engaksï irekajka imecha engaksï no jatsika ambakiti pájperakua Jeoba jingoni ka jánguarhintanksï jarhani orhepani uérani. Májkueni eska Jesusi, pʼamojkuasïngachi ka pákuasïngachi “ambakiti eianhperakuani, enga sánderu ambakiti ambeka” (Is. 52:7).

¹¹ Ju je exeni ambe enga nitamanchapka erachi Sergey. Antesi de Jeobani mítini, kánikua úkua jukanchasïrendi uandani jimboka chésïrenga. Ísï tátsekua, uékaspti Bibliaeri ambe jorhenguarhini. Ima uandantasïndi: “Bibliarhu, jorhenguarhispka eskaksï kristianuecha jatsiska para aianguani máteruechani ambe engaksï jakajkujka. Seguru jarhaspka eskani no méni úpiringa ísï úni”. Peru Sergey méntku eratsini jarhasïrendi nénaksï irekani jápi imecha engaksï no mítika jurhimbikuani ni Jeobani. Uandasïndi: “Ambe engani jorhenguarhienga kánikuarini sési pʼikuatasïrendi ka pínandikua jatsini. Mítispka eskaksï máteru kʼuiripuechajtu uétarhinchasïrenga mítini jurhimbikuani”. Enga kuenta íntskukuarhipka iri ambe, úspti eska nóteru chépiringia aianhpini. ¿Ambe niáraspi úkuarhini? Sergey uandantasïndi: “Ískuni pakaraspka, jimboka inde ambe úspka eskani sánderu seguru pʼikuarherapiringa ka no méni mirikurhini ambe enga Biblia jorhentpijka”. *

12, 13. ¿Andichisï jatsi para tekantskua xarhatakuani imechani engachi Bibliaeri ambe jorhendaajka? Jatsiku je ejemplu ma.

¹² Tanimu úni jámani, ju je tekantskua xarhatakuani imechani engachi Bibiaeri ambe jorhendaajka. Ju je miáni eskaksï jamberi apenasi uénani jaka kurhaani ambe enga Biblia jorhentpijka, imani ambe engachi jucha sési mítikia. Ístu, uánikuaksï úkua jukachasïndi jurajkuni imani ambe engaksï jakajkujka, jimbokaksï indeni ambe jingoni eratsisïnga eskaksï iretarhu ma anapueska ka eskaksï májku kʼéri jarhasïnga familia jingoni. ¿Nénachi úa jarhuataani?

¹³ Ju je eranhaskani arini ejempluni. ¿Ambe uétarhisïni úni para mójtakuni puentini ma enga  ióntki anapuekia ka no sési jáxeni? Sáno méntkisï, kʼuiripuechaksï seguirini jarhasïndi úrani ióntki anapu puentini enga jamberi únhaaka jimbanhi ma. Engaksï kʼamarajkia jimbanhini, xerentasïndiksï ióntki anapuni. Sáno májkuenisti, ante dechi nemani arhini eska jurajkuaka ambe enga antesi jakajkuenga, jamberichi orheta jatsiaka para jarhuatani jukaparharani ambe enga Biblia jorhentpijka, enga para ima jimbanhi ambeuaka. Ini ambe úparini, uékaati jurajkuni imani ambe enga antesi jakajkuenga. Ka para ísï úni, jamberi tiempu uétarhiati (Rom. 12:2).

14, 15. Uanda je ejemplu ma jingoni, nénachi úa jarhuataani imechani engaksï no ma ambe mítika o kasi no ma ambe imani aiatsperakueri para irekani méntkisï Paraisurhu ixú Echerirhu.

¹⁴ Engachi tekantaaka kʼuiripuecha jingoni, nochi erokuarhiaka eskaksï jirejiresï kurhanguaka o jiókuarhini ambe enga Biblia jorhentpijka. Kurhangutspini, úati eskachi sánhani arhiaka jarhuatani kʼuiripuni para kurhanguni ambe enga Biblia jorhentpijka. Por ejemplu, ju je eratsini ambe enga Biblia aiatspijka para irekani méntkisï Paraisurhu ma ixú Echerirhu. Uánikuechaksï no ma ambe mítisti inderi ambe o kasi no ma ambe. Máruksï jakajkusïndi eska iámindu ambe jima kʼamakurisïnga enga ma uarhijkia. Ka máteruksï eratsisïndi eskaksï ambakiti kʼuiripuecha auandarhu nirasïnga. ¿Nénachi úa jarhuataani paraksï jiókuarhini ambe enga Biblia jorhentpijka?

¹⁵ Erachi ma uandasïndi ambe enga ima újka. Orheta, arhintasïndi Génesis 1:28 ka kurhamarpini, nani ka néna uékasïreni Tata Diosï eskaksï irekapiringa kʼuiripuecha. Sáno iáminduechaksï mokuntasïndi eska Echerirhu ka tsípikua jingoni. Tátsekua, erachi arhikuantasïndi Isaías 55:11 ka kurhamarpisïndi sini Tata Diosï seguirini jaki májkueni eratsini. Kʼuiripuechaksï uandasïndi eska jo. Últimu, arhikuantasïndi Salmo 37:10, 11 ka kurhamarpisïndi: “Eska na arhijka Biblia, ¿nénaksï irekaa kʼuiripuecha sánderu orhepani?”. Ini kurhamarhikuecha jingoni, ústi eskaksï uánikua kʼuiripuecha kurhanguaka eska Tata Diosï seguirixaka uékani eska ambakiti kʼuiripu irekaaka para méntkisï Paraisurhu ma ixú Echerirhu.

16, 17. Exeparini ambe enga arhijka Proverbios 3:27, ¿nénachi úa xarhatani eskachi kurhangutspisïnga? Jatsiku je ejemplu ma.

¹⁶ Últimu, ju je eratsini nénachi úa xarhatani eskachi kurhangukuasïnga kʼuiripuechani. Por ejemplu, engachi nani uamutaska ima jandora enga kʼuiripu no úaka juchantsïni jingoni uandontskuarhini, úakachi arhini eskajtsïni tekanchintaaka ka eskachi ménderu kʼuanhatsintakia. O enga kʼuiripu uétarhinchani jauaka para nema jarhuatani úni ambe ma o no úni uérani kʼumanchikuarhu ka uétarhinchani jarhani ambe ma, jamberichi úaka arhini parachi jarhuatani (arhinta je Proverbios 3:27).

¹⁷ Ju je exeni ambe enga úkuarhijka enga ma jarhuajpijka, jimboka kurhangutspisïnga. Enga pirenchi ma mítipka eska familia ma charhakuni ma uarhiranchaspka ima mismu jurhiatikua enga andajpenupka, úspti ambe ma enga ísï  xarharenga enajki sapichitu ambepi: karta ma úkuaspti nani enga karapka máru Bibliaeri tekstuechani engaksï sési pʼikuastpentajka. ¿Néna pʼikuarheraspi ima familia? Nándi enga uarhiranchapka charhakuni karakuspti pirenchini: “Uitsindikua kánikua no sési jásï ambe nitamakuarhiska. Nójtsï mítiska na engajtsïni xáni jarhuataka iámindu juchantsïni chári karta. No jánhaskasïnga náki uandakuecha jingonksïni diosmeiamukua arhini ni paraksïni aianguni na engajtsïni xáni jarhuataka. Uitsindekua, ma beinte xanharisï arhintaska kartani. Ískuni pakaraspka na engajtsïni sési kámaka, xenchani ka uinhaperantani. Mintsita jingonksïni diosmeiamukua arhisïnga”. Seguruchi jarhaska eskajtsïni juchantsïntu sési nicheaka engachi imecheri lugari jimbo niáraska engaksï kómu nitamakuarhini jarhajka ka únchi ambe ma para jarhuataani.

18. Ísï eska na arhijka 1 Korintu 3:6, 7, ¿nénachi jatsiski para exeni na engachi jarhuajpijka aianhpikuarhu?

¹⁸ Ísïsti eskachi uékasïnga jarhuajpini aianhpikuarhu, peru no jukari ambe erokuarhini. Ka nájkirukachi jarhuatajka kʼuiripuni mítini Tata Diosïni, nochi juchesïnga engachi sánderu kʼéri ambe újka (arhinta je 1 Korintu 3:6, 7). Jeobasï újti eska kʼuiripu andarhieraaka imani (Juanu 6:44). Ka últimu, mándani kʼuiripu jatsisïndi para erakuni sini jiókuarhia Tata Diosïri ambe o nómbe, seguni ambe enga jauaka imeri mintsitarhu (Mat. 13:4-8). Ju je miáni eska uánikua kʼuiripu no jiókuarhispka ambe enga Jesusi jorhentpienga ka nájkiruka ima sánderu ambakiti jorhentpiri máepka. Ísï jimbo, ju je no no sési pʼikuarherani enga uánikua kʼuiripu no uékaaka kurhaani Tata Diosïri ambe.

19. ¿Nákichi kóntperatechani jatsiaua engachi kurhangukuaska kʼuiripuechani aianhpikuarhu?

¹⁹ Uánikua kóntperatechanchi jatsiauaka engachi kurhangukuaska kʼuiripuechani aianhpikuarhu. Tsípikua jingonchi aianhpiaka, sésichi pʼikuarheraaka engachi íntspiaka ka úakachi eskaksï sánderu no úkua jukanchaaka jiókuarhini Reinueri ambe imecha engaksï erakukata jaka “para tsípikua méntkisï jatsini” (Uku. 13:48). Ísï jimbo, “iásï engachi útasï tiempu jatsika, jaue sési úkuani iáminduechani” (Gal. 6:10). Jimajkani, sésichi pʼikuarheraaka kʼéri ambe arhini juchari Táti auandarhu anapuni, Jeobani (Mat. 5:16).