1. Иисуслэн кыӵе сямыз милемыз тужгес но буйгатэ? Валэктэ.

 ИИСУС туж умой вала, кыӵе шуг-секытъёсын пумиськоно луэ милемлы, тырбыдэстэм адямиослы. Со милемыз туж буйгатэ. Куке Иисус музъем вылын вал, со шумпотӥсьёсын ӵош шумпотӥз но бӧрдӥсьёсын ӵош бӧрдӥз (Рим. 12:15). Кылсярысь, куке 70 дышетскисьёсыз тодытон уже пайдаё пыриськемзы бере шумпотыса берытскизы, со шумпотӥз (Лука 10:17—21). Нош куке Иисус адӟиз, макем вӧсь кариз Лазарьлэн кулэмез соослы, кинлы со дуно вал, со «ӝоже усиз» (Иоанн 11:33).

2. Мар юрттӥз Иисуслы адямиосты гажаны-жаляны?

² Иисус тырбыдэс адями вал ке но, тырбыдэстэм адямиослы со гажам-жалямзэ возьматъяз. Мар солы юрттэ вал? Нырысь ик, адямиосты яратон. Кызьы гожтэмын кылем статьяын, солэн шумпотонэз адямиосын герӟаськемын вал (Мад. 8:31). Со адямиосты яратӥз но валаны тыршиз, кызьы соос малпасько. Апостол Иоанн валэктӥз: Иисус «тодэ вал мар вань адямилэн пушказ» (Иоанн 2:25). Адямиосты со туж гажаз-жаляз. Тае адӟыса, соос Эксэйлык сярысь иворез кылзӥзы. Макем тросгес ми Иисуслэсь адӟем кариськомы, адямиослы гажам-жаляммес возьматыса, сокем азинлыкогес ужан-тыршонмы луоз (2 Тим. 4:5).

3, 4. а) Кызьы ми ужан-тыршон шоры учкомы, гажан-жалянмес возьматӥськомы ке? б) Мае ми эскеромы таяз статьяын?

³ Апостол Павел валаз, солы тодытыны кулэ шуыса (1 Кор. 9:16). Милемлы но тодытыны кулэ. Но ми адямиосты гажаськомы-жаляськомы ке, соку тодытон ужез кулэ ужен гинэ ум лыдъялэ. Ми тодытомы, малы ке шуоно адямиос сярысь сюлмаськиськомы но милям соослы  юрттэммы потэ. Ми тодӥськомы, «басьтон сярысь, сётыны умойгес» шуыса (Ап. уж. 20:35). Ми со сярысь ум ке вунэтӥське, тодытон уж милемлы тросгес шумпотон ваёз.

⁴ Таяз статьяын ми эскеромы, кызьы гажан-жалянэз ужан-тыршонын возьматоно. Нырысь ми тодомы, малы милемыз дышетэ Иисуслэн примерез, нош собере эскеромы ньыль визь-кенешъёсты, кудъёсыз юрттозы милемлы солэсь адӟем карыны (1 Пётр 2:21).

5, 6. а) Кызьы Иисус гажам-жалямзэ возьматӥз дышетскисьёсызлы но мукетъёслы? б) Малы Иисус гажаз-жаляз адямиосты, кудъёсызлы тодытӥз, кызьы гожтэмын Исаиялэн 61:1, 2?

⁵ Малпаськомы со сярысь, кызьы Иисус гажам-жалямзэ возьматъяз. Одӥг пол со но солэн дышетскисьёсыз туж жадизы, малы ке шуоно соос кема дыр ӵоже ӟеч иворез веразы,— «соослы сиськыны но маза уг луы вал». Соин ик Иисус ӵектӥз соослы, «калыктэм интые мыныса», соин ӵош ӧжытак шутэтскыны. Нош куке соос отчы вуизы, соосты трос калык возьма вал ини. Кызьы Иисус со шоры учкиз? «Солы соос жаль b потӥзы, возьмаськисьтэк кылем ыжъёс кадесь соос вал уго», но со «соосты трос дышетыса улӥз» (Марк 6:30—34).

⁶ Висъялэ саклыктэс, малы Иисус адямиосты жаляз. Со адӟиз, соос «возьмаськисьтэк кылем ыжъёс кадесь» вал шуыса. Иисус адӟиз, дыр, куд-огъёсыз соос пӧлысь куанересь вал но соослы, семьязэс сюдон понна, секыт ужано вал шуыса. Мукетъёсыз, матысь адямиоссы кулэмен, куректо вал, вылды. Иисус соосты умой валаз, луоз. Кызьы гожтэмын кылем статьяын, со ачиз но со выллем югдуръёсын пумиськиз, дыр. Иисус адямиос сярысь  сюлмаськиз но соосты буйгатыны тыршиз. (Лыдӟе Исаиялэсь 61:1, 2.)

7. Кызьы ми Иисуслэсь адӟем карыны быгатӥськомы?

⁷ Малы дышетэ милемыз Иисуслэн примерез? Туннэ но адямиос «возьмаськисьтэк кылем ыжъёс кадесь». Соослэн трос шуг-секытъёссы. Нош милям вань со, мар соослы юрттыны быгатоз,— Эксэйлык сярысь ивор (Усьт. 14:6). Соин ик ми, Иисус сямен, ӟеч иворез тодытӥськомы, малы ке шуоно «кураськисез, начар муртэз» жаляськомы (Пс. 71:13). Ми адямиосты жаляськомы, но милям соослы юрттэммы потэ.

8. Кыӵе визь-кенеш юрттоз милемлы тодытыкумы гажан-жалянмес возьматыны? Вералэ пример.

⁸ Мар юрттоз милемлы гажан-жалянмес возьматыны адямиослы, кудъёсызлы тодытӥськомы? Милемлы асьмемыз соос интые пуктоно но асьмеды соосын возёно озьы, кызьы асьмеос соослэсь лэсьтэмзэс кулэ кариськомы (Матф. 7:12) c. Ойдолэ эскеромы ньыль визь-кенешъёсты, кудъёсыз милемлы пайда ваёзы. Нырысетӥез, котькуд адямилэсь кулэяськонъёссэ лыдэ басьтэ. Куке ми ӟеч иворез тодытӥськомы, милемыз эмъясен ӵошатыны луэ. Умой эмъясь котькуд висисьлэсь кулэяськонъёссэ лыдэ басьтэ. Висисьлы со юанъёс сётъя но сак кылзэ, куке соиз вера, маиз солэн висе. Эмъясь уг дырты висисьлы вераны, кыӵе эмъюмъёс юоно. Нырысь со солэсь тазалыксэ эскере но собере гинэ вера, кызьы эмъяськоно. Милемлы но тодытыкумы вань адямиосын одӥг амалэн вераськоно ӧвӧл. Милемлы котькуд адямилэсь югдуръёссэ но малпанъёссэ лыдэ басьтоно.

9. Кыӵе малпанлэсь милемлы палэнсконо? Мар лэсьтыны умойгес луысал?

⁹ Ужан-тыршонын адямиен вераськыку, малпано ӧвӧл, ми тодӥськомы шуыса, кыӵе солэн югдурез, кыӵе солэн осконэз но малы со солы оске (Мад. 18:13). Умойгес луысал солы лякытэн юанъёс сётыны (Мад. 20:5). Милям улосамы озьы лэсьто ке, сое юаны луэ ужез, семьяез, азьвыл улонэз но учконъёсыз сярысь. Озьы ми валаломы, кызьы адямилы ӟеч ивор юрттоз. Нош сое валаса, ми быгатомы гажан-жалянмес возьматыны но вераны сое, мар адямилэсь сюлэмзэ вырӟытоз,— ӵапак озьы Иисус лэсьтэ вал. (Ӵошатэ 1 Коринфъёслы 9:19—23.)

10, 11. Мар эшшо юрттоз на милемлы тодытыкумы гажан-жалянмес возьматыны, кызьы адӟиське 2 Коринфъёслы 4:7, 8? Вералэ одӥг учырез.

¹⁰ Кыкетӥез, син азяды пуктыны тырше,  кызьы адями улэ. Куд-ог учыръёсы ми сое валаны быгатомы. Малы ке шуоно милемлы тодмо шуг-секытъёс, кудъёсыныз вань тырбыдэстэм адямиос пумисько (1 Кор. 10:13). Та дуннеын улон туж секыт луылэ, но сое, Инмарлэн юрттэменыз гинэ, чиданы луэ. (Лыдӟе 2 Коринфъёслы 4:7, 8.) Но малпаське, макем секыт соослы, кинъёс Иеговаез уг тодо. Иисус сямен, ми соослы гажан-жалянмес возьматӥськомы но шумпотон ивор сярысь вераны тыршиськомы (Ис. 52:7).

¹¹ Тани Сергей нимо агайлэн учырез. Зэмлыкез тодэмезлэсь азьло со туж возьдаськись вал но солы малпанъёсыз сярысь вераны секыт вал. Одӥг пол со соглаш кариськиз Библиен тодматскыны. «Библиез дышетыса, мон тодӥ, христианъёс мукет адямиослы осконзы сярысь вераны кулэ шуыса,— вера Сергей.— Мон зэмзэ ик малпасько вал, мынам со ноку уз пӧрмы шуыса». Но со малпаськиз адямиос сярысь, кудъёсыз Библиысь иворез ӧз кылэ на, но валаз, макем соослы секыт. «Зэмлыкъёсты тодыса, мон шудо луи но сюлмы каньыл луиз,— азьланьтэ Сергей.— Мон валасько вал, мукетъёслы но со кулэ шуыса». Адямиослы юрттэмез потыса, солэн кышкасьтэм сямыз будӥз, но со тодытыны кутскиз. «Мон ачим но пайми,— вера Сергей,— тодытыса, мон сокем ӧй возьдаськы ини. Озьы ик со осконме юнматӥз» d.

12, 13. Малы милемлы чиданмес возьматоно соослы, кинъёсыз зэмлыклы дышетӥськомы? Вералэ пример.

¹² Куинетӥез, чидандэс возьматэ соослы, кинъёсыз тӥ зэмлыклы дышетӥськоды. Эн вунэтэ, соос ноку но ӧз малпаське, дыр, Библиысь зэмлыкъёс сярысь, кудъёссэ ми туж умой тодӥськомы. Со сяна, тросэз юн герӟаськемын соин, малы соос оско. Соос малпало, дыр, религиен герӟаськем сям-йылолъёсты быдэсъяса, соос ас калыкенызы но семьяенызы  матысь кусыпъёс возё шуыса. Кызьы соослы юрттыны луэ?

¹³ Эскеромы одӥг примерез. Адями улэ вуж, сисьмем коркан. Тӥляд солы выль корка пуктэмды потэ. Мар тӥ лэсьтоды? Тӥ нырысь вуж коркаез тӥялоды но собере выль корка пуктоды-а? Уд, тӥ озьы уд лэсьтэ. Нырысь тӥ выль корка пуктоды, нош собере вужзэ тӥялоды. Озьы ик, адями солы дуно потӥсь «вуж» осконэзлэсь мед куштӥськоз шуыса, милемлы нырысь солэсь тау карон мылкыдзэ будэтоно луоз «выль» зэмлыкъёс понна — Библиысь дышетонъёс понна, кудъёсыз солы тодмо ӧй вал. Соку гинэ со дась луоз азьвыл учконъёссэ воштыны. Нош со понна кӧня ке дыр кулэ луоз, вылды (Рим. 12:2).

14, 15. Кызьы юрттоно соослы, кинъёс туж ӧжыт тодо рай музъем вылын пырак улыны оскон сярысь? Вералэ пример.

¹⁴ Ми адямиослы чиданмес возьматӥськомы ке, ми ум малпалэ, соос соку ик Библиысь зэмлыкез валалозы но соин соглаш луозы шуыса. Умойгес луоз асьмеды соос интые пуктыны но юрттыны, Библия вылэ пыкиськыса, йылпумъянъёс лэсьтыны. Кылсярысь, малпаськомы со сярысь, кызьы ми адямилы валэктыны быгатысалмы зэмлыкез, адямиос рай музъем вылын пырак дауръёс ӵоже улозы шуыса. Тросэз со сярысь туж ӧжыт тодо. Соос оско, дыр, кулон — со пум шуыса яке кулэмзы бере адямиос инме тубо шуыса. Кызьы соослы юрттоно?

¹⁵ Одӥг агай адямиосын тазьы малпаське. Нырысь со Улон-вылонэз 1:28 лыдӟе но адямилэсь юа: «Кытын но кыӵе югдуръёсын адямиослы улоно вал, Инмарлэн малпамезъя?» Тросэз верало: «Музъем вылын, но ваньмыз умой луыны кулэ вал». Собере агай Исаиялэсь 55:11 лыдӟе но юа, Инмарлэн малпанэз воштӥськиз-а шуыса. Ӵем дыръя адямиос верало: «Ӧз воштӥськы». Соку агай Псалтирез 36:10, 11 лыдӟе но юа, мар адямиосыз азьланяз возьма шуыса. Библиез озьы уже кутыса, со тросэзлы валаны юрттӥз: Инмарлэн азьло сямен ик потэ, умой адямиос рай музъем вылын пырак дауръёс ӵоже мед улозы шуыса.

16, 17. Кызьы ми адямиослы гажан-жалянмес возьматыны быгатӥськомы, кызьы адӟиське Мадёнъёсысь 3:27? Вералэ одӥг учырез.

¹⁶ Ньылетӥез, адямиос сярысь сюлмаськемдэс уж вылын возьматэ. Кылсярысь, тӥ адями доры тупасьтэм дыре лыктӥды ке, вераны луоз, со вожзэ медаз потты но тӥ мукет дыръя пыроды шуыса. Нош солы кыӵе ке юрттэт кулэ ке? Адями дорысьтыз уг пота ке, солы юрттэтмес ӵектыны луоз, кылсярысь, магазинэ ветлыны яке гожтэт келяны. Озьы тӥ адямилы уж вылын юрттоды. (Лыдӟе Мадёнъёсты 3:27.)

 ¹⁷ Тани одӥг сузэрлэн учырез, кудӥзлэн ӟеч ужез умой емышъёс вайиз. Гажан-жалян солэсь мылкыдзэ ӝутӥз гожтыны гожтэт семьялы, кудӥзлэн нылпизы кулӥз. Отын со гожтӥз Библиысь куд-ог буйгатӥсь кылбуръёсты. Кызьы та шоры со семья учкиз? «Толон мыным туж секыт вал,— гожтӥз туж куректӥсь анай.— Тӥляд гожтэтты милемлы туж бадӟым пайда вайиз. Мон туж бадӟым тау карисько гожтэтты понна, со туж буйгатӥз милемыз. Толон мон сое ог 20 пол лыдӟи. Мыным нокин но сыӵе ӟеч, шуныт но буйгатӥсь кылъёсты ӧз на вералля. Вань сюлмысьтымы тӥледлы туж бадӟым тау шуэммы потэ». Куке ми но асьмеды мукет адямиос интые пуктӥськомы но соослы юрттыны тыршиськомы, ми соосты буйгатыны быгатӥськомы.

18. Кызьы милемлы шонер учконо со шоры, мае ми ужан-тыршонын лэсьтыны быгатӥськомы, кызьы адӟиське 1 Коринфъёслы 3:6, 7?

¹⁸ Милемлы шонер учконо со шоры, мае ми ужан-тыршонын лэсьтыны быгатӥськомы. Ми адямиослы Инмар сярысь тодыны юрттӥськомы ке но, ми ваньзэ лэсьтыны ум быгатӥське. (Лыдӟе 1 Коринфъёслы 3:6, 7.) Адямиосты Иегова ас дораз вае (Иоанн 6:44). Кулэ кароз-а адями ӟеч иворез, уз-а, герӟаськемын соин, кыӵе солэн сюлмыз (Матф. 13:4—8). Эн вунэтэ: тросэз Иисуслэсь верамзэ ӧз кылзэ, нош со котькинлэсь быдӟым Дышетӥсь вал! Соин ик мылкыдды медаз куашка, тросэз, кинъёслы милям юрттэммы потэ, милемыз уг кылзо ке.

19. Малы ужан-тыршонын гажан-жалянэз возьматыны кулэ?

¹⁹ Тодытыкумы адямиослы гажан-жалянмес возьматӥмы ке, ми умой емышъёс басьтомы. Тодытон уж милемлы тросгес шумпотон ваёз. Ми сётонлэсь шумпотон шедьтомы. Со сяна, солы, кин пырак улон шоры шонер амалэн учке, ӟеч иворез кылзыны капчигес луоз (Ап. уж. 13:48, ВД). Соин ик, «дырмы вань на бере, ойдолэ, вань адямиослы ӟеч уж лэсьтоме» (Гал. 6:10). Соку, инмысь Атаймес данъяса, ми шумпотон басьтомы (Матф. 5:16).