1. Mukhalelo xeeni wootepa okuxa murima wa Yesu? Mutthokiherye.

MUKHALELO wootepa okuxa murima wa Yesu, owerya orina awe wa osuwela mixankiho sinaaphwanya apinaatamu oohimalela. Okathi aari awe valaponi, Yesu aaniwerya ‘otteliwa murima vamosa n’ale antteeliwa murima; [ni] wunla vamosa n’ale aninla’. (aRom. 12:15, Waataana wa Naanaano) Mwa ntakiheryo, nuumala okhumela saana muteko woolaleerya, awiixutti awe 70 yaahihokolowa atteeliwe ene murima, nto okathi ene yoowo “Yesu ahitteliwa murima” mwa munepa wootteela. (Luka 10:17-21) Masi okathi aawenhe awe wira atthu anceene yamphenta Laazaro yaahiriipiwa murima mwaha wa okhwa wawe, Yesu “ahiripiwa murima ni winiwa”.​—Yoh. 11:33.

2. Exeeni yaamukhaliherya Yesu owoonela othunku atthu?

² Nnaamwi Yesu aari mutthu oomalela, owo aanaathokorerya apinaatamu oohimalela moomoriwa ikharari ni moothunku. Exeeni yaamukhaliherya opaka eyo? Etthu yuulupale yaamukhaliherya Yesu, waari waaphenta atthu. Ntoko niwenhe ahu mwaha ovinre, Yesu aanisiveliwa “okhala vamosá n’atthu”. (Mir. 8:31) Waaphenta wawe atthu, waahimukhaliherya osuwela saana muupuwelo ni soophavela sa apinaatamu. Murummwa Yohani ohimmye wira: Yesu “anisuwela mmansawe murima wa khula mutthu”. (Yoh. 2:25) Yesu aaniwoonela othunku atthu. Atthu anceene yaanoona wira yaaniphentiwa ni Yesu, nto eyo yaanaakhaliherya owiriyana muhupi wa Omwene. Akhala wira nnoowoonela othunku atthu, nnoowerya omaleliha saana muteko ahu woolaleerya.​—2 Tim. 4:5.

3-4. (a) Akhala wira ninniwoonela othunku atthu, ninrowa woonelaka sai muteko woolaleerya? (b) Mwaha ola, ninrowa othokorerya exeeni?

³ Murummwa Paulo aanisuwela wira aahikhalana muritti woolaleerya, nave hiyo noosuwela wira olaleerya muritti  ahu. (1 aKor. 9:16) Masi, akhala wira ninnaathokorerya atthu nnimoonaka wira khahiyo nnookhanyereriwa ovara muteko woolaleerya. Nave nnimooniherya wira ninnaaphenta atthu ni nimphavela waakhaliherya. Hiyo noosuwela wira “mulipa-òvaha onoreriwa [ohakalala] onvikana mulipa-òvahiwa”. (Mit. 20:35) Akhala wira ninlaleerya mwaha woowi nimphavela waakhaliherya atthu, nnoosiveliwaka vanceene ovara muteko owo woolaleerya.

⁴ Mwaha ola, ninrowa woona moota nikhanle ahu oowoonela othunku atthu nnaalaleerya ahu. Wanipacerya, ninrowa wiixutta moota Yesu aawoonela awe othunku atthu. Nuumala-vo, ninrowa othokorerya inamuna nikhanle ahu ootthara ntakiheryo na Yesu.​—1 Ped. 2:21.

5-6. (a) Tani Yesu aawoonela awe othunku? (b) Ntoko vaahimmwale aya vahinatthi Yesaya 61:1, 2, xeeni Yesu aawoonela awe othunku atthu aalaleerya awe?

⁵ Nrowe niwehe ntakiheryo nimosa nnooniherya wira Yesu aari mutthu oothunku. Okathi omosa, awiixutti awe yaahikhulumuwa vanceene mwaha woowi yaahilaleerya okathi munceene ahiphumunrye. Awo khiyaarina “nnákhala okathi w’olya”. Nto Yesu aahaaroiha awiixutti awe “wiphini nipuro” nahaavira-viriwa wira ‘yamumule vakhani’. Masi muttitthi ole waanimutthara Yesu ni arummwa awe opuro yaarowa aya. Nuumala Yesu waaweha atthu ale, oonenle sai? Biibiliya onihimya wira Yesu “ahòna muttitthi ule mulupale w’atthu, khwamorela ikharari, * okhala wira yari ntoko ipwittipwitthi sihina makampusi. Vano ahipajerya owixuttiha itthu sinjene”.​—Mar. 6:30-34.

⁶ Xeeni Yesu aawoonela awe othunku aahiiso waathokorerya saana atthu ale? Yesu aahoona wira atthu ale “yari ntoko ipwittipwitthi sihina makampusi”. Woonasa wene, Yesu aanisuwela wira atthu akina yaari oohaawa ni yaaniviriha okathi munceene avaraka muteko wira alyihe imusi saya. Nave, pooti wira atthu akina yaahiriipiwa murima mwaha wookhweliwa. Eyo enooniherya wira Yesu aanisuwela  mikhalelo saya. Ntoko nithokorenrye ahu mwaha ovinre, Yesu aaniphavela waalipiha ni waamaaliha atthu mwaha wa mixankiho saaphwanya. Nave, okhala wira Yesu aanaathokorerya saana, owo aanaaleela muhupi woomaaliha.​—Mmusome Yesaya 61:1, 2.

7. Ninrowa otthara sai ntakiheryo na Yesu?

⁷ Ntakiheryo na Yesu ninniixuttiha exeeni? Ntoko atthu a mahiku a Yesu, olelo-va aakhala atthu anceene ari “ntoko ipwittipwitthi sihina makampusi”. Atthu awo sinnaaphwanya mixankiho sinceene. Tthiri hiyo nookhalana etthu aniphavela aya, eyo piiyo, ihapari sooreera sa Omwene. (Wis. 14:6) Nimutakihaka Muhooleli ahu, ninnilaleya ihapari sooreera mwaha woowi ninniwoonela othunku “atthu òhawa ni òwiyeviha”. (Esal. 72:13) Owoonela wahu othunku atthu, tonniiriha ophavela waakhaliherya.

8. Enamuna xeeni emosa nikhanle ahu oowaathokorerya saana atthu nnaalaleerya ahu? Nvahe nlikanyiho.

⁸ Exeeni enrowa onikhaliherya waathokorerya saana ni owoonela othunku atthu nnaalaleerya ahu? Nihaana omananiha oweha muupuwelo ni moonelo, nuumala-vo, nihaana waathokorerya mwa enamuna naarowa ahu ophavela othokoreriwa. * (Math. 7:12) Nrowe niwehe moota nikhanle ahu oopaka eyo. Yoopacerya, musuweleke itthu sinimuxankiha khula mutthu. Muteko ahu woolaleerya onoolikana ni muteko wa meediku. Nto nalikanyiha ele nikhanle ahu oopaka naalaleeryaka ni muteko wa meediku, onoonikhaliherya okhala atthu oothunku. Meediku ooloka, onnuupuwela itthu sinimuxankiha khula muretta. Owo onnipaka makoho ni onninwiriyana moopixa murima khula muretta vaavo onitthokiherya awe itthu sininwereya. Ohiya waakuvela onvaha mirette, meediku onniviriha okathi uupuwelaka eretta eninwereya, nuumala-vo onanvaha murette onireerela. Nave hiyo, nihaana orumeela enamuna eyo okathi ninvaanela ahu ni atthu nnaaphwanya ahu naalaleeryaka. Nihaana othokorerya mikhalelo ni moonelo wa khula mutthu nimmulaleerya ahu.

9. Etthu xeeni nintthuneya ahu osyaka? Mutthokiherye.

⁹ Okathi munimphwanya anyu mutthu mwaalaleeryaka, musyakeke wuupuwela wira moosuwela itthu sotheene sa mutthu owo ntoko, mixankiho sawe, itthu onikupali awe ni ele enimwiiriha okupali itthu iyo. (Mir. 18:13) Ohiya-vo, muhaana ompaka makoho oovara murima wira musuwele itthu sinimuxankiha ni sookupali sawe. (Mir. 20:5) Akhala wira elapo anyu vannireelela, mmukoheke voohimya sa muteko awe, etthoko awe, mahuweliwo awe ni moonelo awe. Waakoha itthu sinaakhumelela, onninikhaliherya osuwela akhala wira mutthu owo onniphavela owiriyana ihapari sooreera. Nuumala osuwela mikhalelo saya, nihaana waathokorerya saana ni owoonela othunku,  owaakhula ni waakhaliherya moovarihana ni makhalelo aya ntoko Yesu iira awe.​—Mulikanyihe ni 1 aKorinto 9:19-23.

10-11. Moovarihana ni 2 aKorinto 4:7, 8, enamuna xeeni ya nenli ninrowa ahu wooniherya waathokorerya atthu akina? Nvahe ntakiheryo.

¹⁰ Ya nenli, mweereryeke osuwela makhalelo aya. Vanniweryaneya osuwela makhalelo a atthu nnaalaleerya ahu. Okhala wira otheene ahu na atthu oohimalela, sinniniphwanya mixankiho sinaaphwanya atthu akina. (1 aKor. 10:13) Noosuwela wira olumwenku ola wootakhala vannixankiha ovilela. Nto Yehova paahi tonnikhaliherya ovilela. (Mmusome 2 aKorinto 4:7, 8.) Vano nkahaya nwuupuwele atthu ale ahirina waataana wooloka ni Yehova. Tthiri vannaavila ovilela mixankiho sa olumwenku ola. Nimutakihaka Yesu, nihaana owoonela othunku naaleelaka “ihapari sorera” sa murettele.​—Yes. 52:7.

¹¹ Nrowe nthokorerye yowiiraneya ya munna Sergey. Ohinatthi wiixutta ekeekhai, Sergey aari mutthu oowuuliwa muri ni oomaala. Vaaninvila waaleela atthu akina itthu sawe. Nuuvira okathi, aahipacerya omusoma Biibiliya, owo onihimya so: “Okathi kaamusoma aka Biibiliya, kaahiixutta wira maKristau ahaana waaleela atthu akina sookupali saya. Masi ohimya ekeekhai, kuupuwela wira nkaawerya ovara muteko owo”. Nave aahoona wira atthu ale ahiixuntte ekeekhai, vannitepa waavila ovilela mixankiho sa olumwenku ola, okhala wira khanimusuwela Yehova. Sergey onincererya so: “Itthu kiixutta aka sookiphwanyiha ohakalala wekeekhai ni omaaleleya. Vano koosuwela wira atthu akina ahaana wiixutta ikeekhai iyo”. Okhala wira othokorerya wa Sergey waaninnuwa, eyo yaahimulipiha vanceene wira opacerye olaleerya. Owo onihimya so: “Kihoona wira waaleela atthu akina voohimya sa Biibiliya wookikhaliherya oxintta wuuliwa muru. Nave olaleerya woolipiha waamini waka”. *

12-13. Xeeni nintthuneya ahu waapixerya murima atthu nnaalaleerya ahu? Nvahe nlikanyiho.

¹² Ya neeraru, mwaapixeryeke murima atthu munaalaleerya anyu. Musuweleke wira  atthu akina khansuwela oratteene ikeekhai sa mBiibiliyani. Akina annivarexexa itthu anikupali aya. Awo anuupuwela wira sookupali sa etiini aya sinnivarihana ni emusi aya, soolema saya ni atthu a muttetthe aya. Nto ninrowa waakhaliherya sai?

¹³ Nkahaya muupuwele nlikanyiho nna: Vaareerelaka orantteliha eponti ya khalai, exeeni enipakiwa? Okhala wene, vaavo enitekiwa aya eponti esya, ele ya khalai ennivikaniha orumeeliwa. Nto yamalihiwa eponti esya, eponti ya khalai enoopwexiwa. Moolikanasa, nihinatthi waatumererya atthu akina ohiya sookupali saya sa “khalai”, wanipacerya nihaana waakhaliherya olipiha osiveliwa waya soowiixuttiha ni ikeekhai “isya” sa mBiibiliyani seiyo khalai yahaasuwela aya. Yapaka eyo, anrowa okhala oolikana ene ohiya sookupali saya sa khalai. Onnivira okathi wira atthu akina apake marukunuxo mookumini mwaya.​—aRom. 12:2.

14-15. Ninrowa waakhaliherya sai atthu ale ahinsuwela nlipelelo na okumi woohimala mparayiisu valaponi? Nvahe ntakiheryo.

¹⁴ Akhala wira ninnaapixerya murima atthu nnaalaleerya ahu, khaninrowa waakhanyereryaka weemererya ni wiiwexexa ikeekhai sa mBiibiliyani ekwaha yoopacerya aniiwa aya. Ohiya-vo, waathokorerya saana onooniiriha waakhaliherya wuupuwela oratteene ele Biibiliya onihimya awe hata oviraka okathi munceene. Mwa ntakiheryo, nkahaya muupuwele moota nikhanle ahu oomukhaliherya mutthu wiiwexexa nlipelelo na okumi woohimala mparayiisu valaponi. Atthu akina ansuwela vakhaani aahiiso khansuwela ekeekhai eyo. Pooti akupaliki wira okhwa omala wa itthu sotheene. Aahiiso anuupuwela wira atthu otheene ooreera murima anrowa wiirimu. Ninrowa waakhaliherya sai?

¹⁵ Munna mmosa onnihimya moota onaakhaliherya awe atthu okupali wira enookhala eparayiisu valaponi. Wanipacerya, owo onsoma yoolepa ya Maphattuwelo 1:28. Nuumala-vo, onnimukoha mwaneene etthoko opuro Muluku aaphavela awe wira apinaatamu akhaleke ni mikhalelo yaarowa aya okhalana. Nto atthu anceene animwaakhula wira: “Valaponi ni mikhalelo sooloka”. Moottharelana onnimusoma Yesaya 55:11, ni onaakoha akhala wira yoolakela ya Muluku yooturukeya. Ikwaha sinceene anaakhula wira: Nnaari. Wanikisa, onnisoma Esalimo 37: 10, 11, onaakoha makhalelo aapinaatamu muhoolo. Tthiri omurumeela Biibiliya mwa enamuna eyo, ennaakhaliherya atthu anceene woona wira Muluku oniphavela wira atthu akhaleke valaponi ni makhalelo ooloka.

16-17. Nuupuwelaka Miruku 3:27, mwa inamuna xeeni nikhanle ahu oowooniherya wira ninnaathokorerya atthu akina? Nvahe ntakiheryo.

¹⁶ Ya neexexe, mphaveleke inamuna mukhanle anyu oowooniherya atthu wira munniwoonela othunku ni waathokorerya. Mwa ntakiheryo, akhala wira mphiyale etthoko eyo okathi woohireerela, munrowa opaka exeeni? Munvekeleke muswammaha ni mweereryeke otthikela okathi mukina. Ankhi akhala wira mwaneene etthoko oniphavela okhaliheriwa miteko saamukhaani? Aahiiso onoowereiwa  wala oniphavela olepa ewarakha onaphavela okhaliheriwa? Munrowa opaka exeeni? Akhala wira ti siiso, nihaana wiimananiha omukhaliherya.​—Musome Miruku 3:27.

¹⁷ Murokora mmosa aahiphwanya mireerelo mwaha wowaakhaliherya atthu akina. Okhala wira onnaathokorerya atthu akina, owo aahilepela ewarakha emusi emosa yaawo yaakhweliwe mwanaya. Murokora ole aahihela soolepa soolipiha sa mBiibiliyani. Emusi ele yoonenle sai ewarakha ele? Amuthiyana aalempe so: “Nsana naari nihiku kahaareere aka oriipiwa murima. Tthiri ewarakha anyu yoonikhaliherya vanceene. Kinnooxukhurelani vanceene mwaha wa onlepela ewarakha, yeeyo ehireere onimaaliha. Nsana, koosoma ewarakha anyu ikwaha sinivikana 20. Tthiri moolumo anyu annooniherya oreera wanyu murima, onikhapelela ni onilipiha wanyu. Ninnooxukhurelani onilipiha ni onikurunuxa murima”. Moohaanyiherya, nnoophwanya mireerelo sooloka akhala wira ninniimananiha wiihela nipuro na atthu ale sinaaphwanya mixankiho ni omananiha waakhaliherya.

18. Moovarihana ni 1 aKorinto 3:6, 7, moonelo xeeni ninreerela ahu okhalana?

¹⁸ Tthiri nimphavela ovikaniha okhalana moonelo wooloka ni osuwela muteko ahu naalaleeryaka. Nihaana wiimananiha ovara mpantta ahu naakhaliheryaka atthu akina omusuwela Muluku, masi khaninvara mekhihu. (Mmusome 1 aKorinto 3:6, 7.) Yehova paahi toniwiitthana atthu awo. (Yoh. 6:44) Wira mutthu eemererye ekeekhai aahiiso nnaari onlipa ni mukhalelo wa murima awe. (Math. 13:4-8) Muupuweleke wira atthu anceene khiyeemererya muhupi wa Yesu, yoowo aari Mwiixuttihi muulupale! Tivonto, nihikhulumuweke akhala wira atthu anceene nneererya ahu waakhaliherya khaneemererya muhupi nnaaleela ahu.

19. Mireerelo xeeni nimphwanya ahu mwaha woowaathokorerya saana atthu nnaalaleerya ahu?

¹⁹ Nnoophwanya mireerelo sinceene akhala wira ninniwoonela othunku ni waathokorerya saana atthu nnaalaleerya ahu. Nave nnoosiveliwaka olaleerya, ni ophwanya ohakalala wekeekhai mwaha wookhala atthu oovaha. Maana, nnimwaakhaliherya atthu ale aniphavela ekumi yoohimala weemererya ihapari sooreera. (Mit. 13:48) Tivonto “okathi wothene ninweryahu, niwireleke sorera atthu othene, masi vanjenexa amus’ihu [annihu] òwamini”. (aGal. 6:10) Niira siiso, nnootthapaka mwaha woosuwela wira ninninvuwiha Tiithi ihu a wiirimu.​—Math. 5:16.