1. ნამ რე იესოშ ართ-ართ განსაკუთრებულ თვისება? გენწყით.

იესოშ ართ-ართ განსაკუთრებულ თვისება თინა რე, ნამდა არჩქილე თი კათაშ, მით არასრულყოფილებაშ გურშენ შხვადოშხვა სირთულეეფს შეხვადუ. დედამიწას რდუნ თი დროს, იესო ხარენდჷ შხვეფიშ ჯგირობუათ დო ოწყინუდ შხვეფიშ გაჭირება (რომ. 12:15). მაგალთო, „იესოქ მანგარ ხიოლ იგინ წმინდა შურით“, მუჟამსით 70 მოწაფექ წარმატებულ მსახურებაშ უკულ გახარებულქ დირთჷ (ლუკ. 10:17—21). მარა შხვა შემთხვევას, იესოქ „შურ გეშეკაჩ დო ეფორიაქ“, მუჟამსით ქოძირ, მუჭო წუხენდეს ლაზარეშ ღურათ თიშ ხოლოშიანეფ (იოან. 11:33).

2. მუ ოხვარუდ იესოს გურშა მიღკო შხვეფიშ გაჭირება?

² მუ ოხვარუდ იესოს, მუჭოთ სრულყოფილ პიროვნებას, გურშა მეუღალუდკო ცოდამ კათაშ გაჭირება? პირველ რიგის თის ჸოროფა ოხვარუდ. მუჭოთ წოხოლენ სტატიას მიფშინეთ, იესოს ადამიანეფ განსაკუთრებულო უჸორდჷ (იგავ. 8:31). ჸოროფა ოხვარუდ თის, უმოსო ქინანჭუკო თინეფიშ აზროვნებას. მოციქულ იოანექ თქუ, ნამდა იესო ჯგირო იჩინენდჷ ადამიანეფს (იოან. 2:25). თის გურშა მეუღუდ შხვეფიშ გაჭირება. ხალხ გინაფლენდჷ თიშ ჸოროფას დო ირჩქილუაფუდ სახიოლო ამბეს. მუთ უმოსო გიმიფრჩქინანთ ხალხწკუმა ყურადღებიანობას, თით უმოს შედეგიან იჸუაფ ჩქინ მსახურება (2 ტიმ. 4:5).

3, 4. ა) მუს მიმეხვარებნა მსახურებას ყურადღებიანობაშ გიმორჩქინა? ბ) მუს გუვარჩიენთ თე სტატიას?

³ პავლე მოციქულცალო ჩქი ხოლო მესმებნა, ნამდა მოვალნა სახიოლო ამბეშ გაცხადება (1 კორ. 9:16). მარა, მუჟამსით ყურადღებიანობას გეგმიფრჩქინანთ, ქობძირუნთ, ნამდა  ჩქინ მსახურება უმოს მეტ რე, ვინემ მოვალეობა. თე თვისებაშ გიმორჩქინა მოხვარნა, იფქადაგათ, მუშენდა ბზრუნენთ ადამიანეფშო დო მოკონა მივეხვარათ თინეფს. თეს გეძინელ, მიჩქნა, ნამდა „შხვაშა ჯგირიშ კეთებას უმოს ბედნერობა მოუღ, ვინემ მეღებას“ (საქ. 20:35). მუჟამსით ქადაგებაშ დროს ჩქინ მიზან შხვეფიშ მოხვარა იჸუაფ, მსახურება უმოს ხიოლს მომღანა.

⁴ თე სტატიაშე ქიგებგენთ, მუჭო გიმიფრჩქინათ ყურადღებიანობა მსახურებას. დიო ქობძირუნთ მუშ გურაფა შემლებნა იესოშე, ნამუთ მიშეშ ადამიანეფიშ მდგომარეობაშა. თეშ უკულ გუვარჩიენთ ოთხ მხარეს, სოდეთ შემლებნა მივაჸუნათ თიშ მაგალითის (1 პეტ. 2:21).

5, 6. ა) მუნერ კათაშ გაჭირება მეუღუდ იესოს გურშა? ბ) მუჭოთ ესაიაშ 61:1, 2-ს რე ნაწინასწარმეტყველებ, მუშენ ოცოდუდ იესოს თი კათა, მისით უქადაგუდ?

⁵ გუვარჩუათ ართ მაგალით, მუჟამსით იესოქ შხვეფიშ გაჭირება გურშა მიღჷ. ართშა იესო დო მუშ მოწაფეეფ მსახურებაშე დორთელს, მანგარ შულადირეფ რდეს. თინეფს ჭკუმუაშა ხოლო ვა ჩოდდეს. ათეშენ, იესოქ მუშ მოწაფეეფწკუმა ართო ნავით მიდართჷ მასვანჯეფშა. მარა, მუჟამსით ხალხიქ თენა ქიგეგ, თინეფშე უმოს ადრე ქიმერთეს თი ადგილშა. მუ რეაქცია უღუდ იესოს, მუჟამსით აკოშაყარელ ხალხ ქოძირ? თის „გურქ ქელაჭვჷ * თინეფიშ გურშენ, მუშენდა უჭყიშო შხურეფცალო რდეს დო ბრელ მუდგარენს ოგურუანდჷ თინეფს“ (მარ. 6:30—34).

⁶ დეფიქრით, მუშენ ელაჭვჷ იესოს გურქ ხალხიშ გურშენ. თიქ თქუ, ნამდა „უჭყიშო შხურეფცალო რდეს“. შილებე იესო ორწყედკო, ნამდა ნამთინე ღარიბ რდუ დო მძიმეთ მუშენდჷ ოჯახიშ ეიოჯუმალარო. თიცალეფ ხოლო რდეს, მიდგას საჸოროფო კათა აფდეს ღურელ დო ათეშენ გურ აფდეს ელაჭვილ. იესოს არჩქილედ თეცალ კათაშ გაჭირება დო მიშეშ თინეფიშ მდგომარეობაშა. მუჭოთ წოხოლენ სტატიას მიფშინეთ, შილებე იესოქ ხოლო გიმოცადკო მუშ დუდშა ნამთინე თე პრობლემა. იესოს  აწუხენდჷ შხვეფიშ მდგომარეობა დო ოკოდ გურშა ელუკინკო თინეფს (წეკითხით ესაია 61:1, 2).

7. მუჭო შემლებნა მივაჸუნათ იესოშ მაგალითის?

⁷ მუშ გურაფა შემლებნა იესოშ მაგალითშე? იესოცალო ჩქი ხოლო მიხვადნა თიცალ კათაწკუმა ცხოვრება, მიდგას ბრელ პრობლემა უღჷ დო „უჭყიშო შხურეფცალ რენა“. ჩქი მიჩქნა სახიოლო ამბე, ნამუშ მორჩქილაფა თინეფს მანგარო ოსაჭირნა (გამოცხ. 14:6). ჩქი მეპჸუნთ ჩქინ ბატონიშ, იესოშ მაგალითის დო ფქადაგენთ სახიოლო ამბეს, მუშენდა გურშა მემღუნა შხვეფიშ გაჭირება დო მოკონა ირნერო მივეხვარათ თინეფს (ფსალმ. 72:13).

8. ნამ რე პირველ საშვალება, ნამუთ მიმეხვარებნა მსახურებას ყურადღებიანობაშ გიმორჩქინას? ქიმიჸონით მაგალით.

⁸ მუჭო შემლებნა ყურადღებიანეფ ვორდათ თინეფწკუმა, მიდგას ვუქადაგუთ? ჩქი მოკონა მიშებლათ თინეფიშ მდგომარეობაშა, მიდგას მსახურებას შეფხვადუთ დო მივექცუათ თეშ, მუჭოთ ჩქი მოკონა მიმექცუან შხვეფქ * (მათ. 7:12). მორთ, ქობძირათ ოთხ საშვალება, ნამუთ თეშ კეთებას მიმეხვარებნა. პირველ, ქიფიქრით თითოულ პიროვნებაშ პირად საჭიროებეფშე. ჩქინ ქადაგება შემლებნა შევადარათ ექიმს, ნამუთ თითოულ პაციენტიშ მდგომარეობას ითვალისწინენს. თინა კითხვეფს უსვენს პაციენტის დო შურ დო გურით ურჩქილე. წამალიშ გიშაჭარუაშახ, ექიმ ოკვირ პაციენტიშ მდგომარეობას დო უკულ უდგინენს მკურნალობაშ მეთოდის. თეგვარო, მსახურებას ჩიებაშ დაჭყაფალო, ჩქი ხოლო თეცალ მეთოდ ოკო გიმიბრინუათ. საჭირო რე, ქიგებგათ, მუ სიტუაციას რენა დო მიშებლათ თინეფიშ მდგომარეობაშა.

9. მუ დასკვნეფ ოკო ვა ვაკეთათ ჩქინით?

⁹ მსახურებაშ დროს თქვანით ვაკეთათ დასკვნეფ, მუ მდგომარეობა უღჷ პიროვნებას, მუ წანსჷ ვარდა მუშენ წანსჷ (იგავ. 18:13). თეშ გინაწონს, ქუდუსვით ტაქტიან კითხვეფ დო ქიგეგით, მუ წანსჷ თის (იგავ. 20:5). თქვან კულტურას მეღებულ ქორენ-და, ქუდუსვით კითხვეფ სამუშაშ, ოჯახიშ, ულირ საქმიანობეფიშ დო შეხედულებეფიშ გურშენ. კითხვეფიშ დასმებათ საშვალებას ვარზენთ შხვეფს, ქომწუან მუშენ ოსაჭირნა სახიოლო ამბეშ მორჩქილაფა. თეგვარო იესოცალო ჩქი ხოლო შემალებენა ზუსტას თი საკითხეფს ქიმვეხვარათ, ნამდგას არძაშ უმოსო ოსაჭირნა მოხვარა (1 კორ. 9:19—23).

10, 11. 2 კორინთელეფიშ 4:7, 8-ს ინოჭარილ სიტყვეფიშ თანახმათ, ნამ რე თი მაჟია საშვალება, ნამუთ მიმეხვარებნა მსახურებას ყურადღება გეგმიფრჩქინათ? ქიმიჸონით მაგალით.

¹⁰ მაჟია, ქეცადით წერმიდგინათ, მუნერ ცხოვრება უღნა თინეფს. ნამთინ ვა ვორეთ თხილერ თი პრობლემეფშე, მუდგას არასრულყოფილ კათა შეხვადუნა, ათეშენ შემლებნა გემშაფრთათ შხვეფიშ მდგომარეობაშა  (1 კორ. 10:13). მიჩქნა, ნამდა თე ქიანას ცხოვრება მანგარ რთულ რე, ათეშენ ხვალე იეჰოვაშ მოხვარათ შემალებენა გავურზათ პრობლემეფს დო მიფთვინათ (წეკითხით 2 კორინთელები 4:7, 8). მარა დეფიქრით, მუნერ რთულ იჸუაფ ამდღა პრობლემეფწკუმა ბრძოლა თინეფშო, მიდგას იეჰოვაწკუმა ხოლოშიან ურთიერთობა ვა უღჷ. იესოცალო, ჩქი ხოლო მოცოდნა თეცალ კათა დო მოკონა გეგნოფჩათ სახიოლო ამბე (ეს. 52:7).

¹¹ ქობძირათ ჯიმა სერგეიშ მაგალით. ჭეშმარიტებაშ გაგებაშახ თინა მანგარ მორდებუან რდუ დო უჭირდჷ შხვეფწკუმა რაგად. მარა დრო ხანიშ უკულ ბიბლიაშ გურაფა ქიდიჭყჷ. თინა იჩიებ: „ბიბლიაშ გურაფა ქიდიბჭყინ, ქიგებგჷ, ნამდა ქრისტიანეფს მეთხიებდეს, მუნეფიშ რწმენაშ გურშენ შხვეფს ქეჩისკო. თიცალ წარმოდგენა მიღუდ, ნამდა თენა დღას ვეშმალებედ“. მარა თინა ფიქრენდჷ თინეფშე, მიდგას დღას ვაფუდ მორჩქილაფირ სახიოლო ამბე დო წერმიდგინენდჷ, მუნერ იჸუაფუდ თინეფიშ ცხოვრება იეჰოვაშ უმშო. სერგეი იჩიებ: „ბიბლიაშე ნაგურეფუს ხიოლ დო შინაგან სიმშვიდე მოუღუდ ჩქიმო. მიჩქუდ, ნამდა შხვეფს ხოლო ოსაჭირუდ სახიოლო ამბეშ გაგება“. შხვეფიშ მდგომარეობაშე დაფიქრებაქ მეხვარ სერგეის, უმოს გაბედულო უქადაგუკო შხვეფს. თინა აგრძელენს: „მიკვენს, მარა ქადაგებაქ ჩქიმ დუდშა უმოსო დუმარწმუნ. თეს გეძინელ, ბიბლიურ გურაფეფიშ რწმენაქ ხოლო გემემანგარ“. *

12, 13. მუშენ მოსაჭირნა მოთვინებაშ გიმორჩქინა თინეფწკუმა, მიდგას ვოგურუანთ? ქიმიჸონით მაგალით.

¹² მასმა, მოთვინება გეგმირჩქინით თინეფწკუმა, მიდგას ოგურუანთ. ვაგგოჭყორდან, შილებე თინეფს დღას ვა დაფიქრებენა ნამთინე ბიბლიურ გურაფაშე, ნამუთ ჩქი ჯგირო მარჩქილენა. შილებე დიო ხოლო ჯერდან ჯვეშ გურაფეფიშ დო მანგარო რდან თიშა დამოკიდებულ. ბრელშო რელიგიურ შეხედულებეფ ოჯახწკუმა, მუშ კულტურაწკუმა ვარდა საზოგადოებაწკუმა ურთიერთობაშ ნაწილ რე. მუჭო შემლებნა თინეფიშ მოხვარა?

 ¹³ დეფიქრით თეცალ მაგალითშე: მუს ორთნა, მუჟამსით ჯვეშ ხიდიშ გიმოთირუა რე საჭირო? ხშირას ახალ ხიდიშ აშენებაშახ, ჯვეშის გიმირინუანა. ახალ ხიდი ეშენებუნ უკულ, ჯვეშ ხიდის აკარღვანა. თეგვარო, სოიშა ხალხის ვუწინდათ, მიოტუან ჯვეშ გურაფეფიშ მეჸუნა, ნამუთ მანგარ ძვირფას რე თინეფშო, საჭირო რე, ქუგვოგებაფუათ დო ქუჸოროფუათ ბიბლიურ გურაფეფ, ნამუშ გურშენ დღას ვაფდეს გუნაგებ. ხვალე თეშ უკულ იჸუაფნა მზათ, მიოტუან მუნეფიშ ჯვეშ გურაფეფ. დრო რე საჭირო თიშო, ნამდა გაკეთან თეცალ ცვლილებეფ (რომ. 12:2).

14, 15. მუჭო შემლებნა მივეხვარათ თინეფს, მიდგას ბრელ მუთუნ ვა უჩქჷ დედამიწას მარადიულ ცხოვრებაშ გურშენ? ქიმიჸონით მაგალით.

¹⁴ მოთვინებაშ გიმორჩქინა მიმეხვარებნა, ვეველდათ, ნამდა თინეფ, მიდგას ვუქადაგუთ, ხეთეშე ქიგეგენა ვარდა მიღენა ბიბლიურ ჭეშმარიტებას. თინეფიშ მდგომარეობაშა მიშულა აღბძრენა, მივეხვარათ, დეფიქრან ბიბლიურ საკითხეფშე. მაგალთო, დეფიფქრათ, მუჭო შემლებნა მივეხვარათ პიროვნებას, ქინანჭას ბიბლიურ გურაფას, ნამუთ ოხუ მარადიულ სიცოცხლეს სამოთხეთ გინორთელ დედამიწას. ხალხიშ უმენტაშის ბრელ მუთუნ ვა უჩქჷ თე გურაფაშ გურშენ. შილებე თინეფ ფიქრენდან, ითამ ღურათ ითებ ირფელ ვარდა ჯერდან, ნამდა ჯგირ კათა ზეცაშა მეურს. მუჭო შემლებნა თინეფიშ მოხვარა?

¹⁵ ქობძირათ, მუჭო ოხვარ ართ ჯიმა ხალხის, ქინანჭან ბიბლიურ გურაფას. პირველ რიგის თინა უკითხენს დაბადებაშ 1:28-ს ინოჭარილ სიტყვეფს დო უკულ ოკითხ მობინადრეს, სო დო მუნერ პირობეფს ოკოდ ღორონც იცხოვრუკო ადამიანეფქ. ხალხიშ უმენტაშ თეცალ პასუხის არზენს: „დედამიწას, ჯგირ პირობეფს“. თეშ უკულ ჯიმა ეშუკითხენს ესაიაშ 55:11-ის დო ოკითხ, ხომ ვათირე ღორონთიშ განზრახვა. ხშირას მობინადრეშ პასუხ რე: „ვარ“. ბოლოს ჯიმა კითხულენს ფსალმუნიშ 37:10 დო 11-ის დო ოკითხ, მუნერ მომავალ ელჷ კაცობრიობას. თეცალ მსჯელობათ თიქ მუსხირენ პიროვნებას მეხვარ თიშ გაგებას, ნამდა ღორონთიშ ნება რე ხალხიქ კინ იცხოვრას სამოთხეთ გინორთელ დედამიწას მარადიულო.

16, 17. იგავეფიშ 3:27-ის ინოჭარილ სიტყვეფს გეფთვალისწინენთ-და, ნამ პრაქტიკულ საშვალებეფით შემლებნა გიმიფრჩქინათ ყურადღებიანობა? გენწყით.

¹⁶ მანთხა, დეფიქრით მუ პრაქტიკულ მხარეეფით შეილებნა გიმირჩქინათ ყურადღებიანობა. მაგალთო, ქიმეირთუმნანო მობინადრეშა, თიცალ დროს, მუჟამსით ვა ჩოდუდ? შემლებნა ბოდიშ ქოფთქუათ დო ვუწუათ, ნამდა მუშო მოხუჯურ დროს ქიმვაკითხანთ. თეს გეძინელ, შემლებნა პრაქტიკულო მივეხვარათ თინეფს, მიდგას ჭიჭე მოხვარა ოსაჭირ. ჯგირ იჸუაფ თიცალეფს ხოლო მივეხვარათ, მით ხანშა მიშულირ ვარდა დალახებულ რე (წეკითხით იგავები 3:27).

¹⁷ ართ დაშ თეცალ ჯგირ საქმეეფიშ კეთებას, ჯგირ შედეგეფქ მაჸუნ. შხვეფიშ გაჭირებაშ  გურშა მეღალაქ მეხვარ თის, წერილ ქიმუჭარუდკო ოჯახშა, ნამუსით სქუა აფუდ ღურელ. წერილს გურიშ ემაქექაფალ ბიბლიურ მუხლეფ ჭარუდ. მუჭო იმოქმედ დაშ საქციელქ თი ოჯახწკუმა? სქუაღურელ დიდაქ თე დას წერილ მეჭარ, სოდეთ იჩიებუდ: „გოღა მთელ დღას მანგარ გლახათ ვორდჷ. წარმოდგენა ვაიღ, მუჭო ემქექუეს გურშა სქან წერილქ. სიტყვეფით ვა მარაგადე, მუსხით მარდულ ვორექ სქან წერილშე, ნამუთიქ მანგარო ელამკინეს გურშა. გოღა 20-შე უმოსშა იბკითხჷ თინა. თე წერილს მანგარ თბილ დო გურიშ ემაკინალ სიტყვეფ ჭარუდ. მთელ გურით გირაგადუთ დიდ მადლობას“. მუშო ოკო რაგად, მუჟამსით ჩქინ დუც თინეფიშ ადგილს წერმიბდგინენთ, მით იტანჯებ ვარდა სირთულეეფ უღჷ დო ქიმვეხვარებუთ თინეფს, თეს ჯგირ შედეგეფ მაჸუნუ.

18. 1 კორინთელეფიშ 3:6, 7-ის ინოჭარილ სიტყვეფიშ თანახმათ, მუნერ შეხედულება ოკო მიღდან მსახურებაშე?

¹⁸ მუშო ოკო რაგად, მოკონა გაწონასწორებულ შეხედულება მიღდან ჩქინ მსახურებაშე. მართალ რე ხალხის ვოხვარუთ ქიგეგან ღორონთიშ გურშენ, მარა მთავარ საქმეს იეჰოვა ორთჷ (წეკითხით 1 კორინთელები 3:6, 7). იეჰოვა აღძრენს ადამიანეფს, დეახლოვან თის (იოან. 6:44). საბოლათ, თითოულ პიროვნებაშ გურიშ მდგომარეობაშა რე დამოკიდებულ, მიღენს დო ვარ ჭეშმარიტებას (მათ. 13:4—8). ირიათო რშუდან, ხალხიშ უმენტაშ ვა ურჩქილედ იესოს — არძაშ უმოს დიდებულ მასწავლებერს. ათეშენ, გურქ ოკო ვა გომტირხან, მუჟამსით ირნერ მონდომაშ უმკუჯინუო, ბრელ ვა ღებულენს ჭეშმარიტებას.

19. მუ შედეგეფს მომღანა მსახურებას ყურადღებიანობაშ გიმორჩქინა?

¹⁹ მუჟამსით მსახურებას ყურადღებიანობას გეგმიფრჩქინანთ, თეს ჯგირ შედეგეფ მაჸუნუ დო უმოს ხიოლ მაღვენუნა. თეს გეძინელ, ჩქინ დუდშა გეგმოფცადუნთ მუნერ ბედნერობა მოუღ შხვეფშა ჯგირიშ კეთებას. თეგვარო, უმოსო გავუადვილენთ სახიოლო ამბეშ მორჩქილაფას თინეფს, მით მარადიულ სიცოცხლეშო რე განწყობილ (საქ. 13:48). თაშ ნამდა, მორთ, „სოიშახ დრო ხეს მინწყუნა, არძას ჯგირობუა ვუკეთათ“ (გალ. 6:10). თაშ ქიმიფქციებუთ-და, მაღვენუნა ხიოლ, ნამუთ ჩქინ ზეციერ მუმაშ, იეჰოვაშ განდიდებას მოჸუნს (მათ. 5:16).