1. Gini sino sa dagba gu wene asino yo duti Yesu nazio ngbadurani yo? Oni sakingo rogoyo.

SINO sa dagba gu wene asino yo duti Yesu nga ko na rengba ka rugatiko na agu akpakarapai kpakpa aboro agbiatiyo na ni. Ho Yesu adu ni auru kpotosende, rago ‘anaangba tiko na agu yo rago anaangba ti yo’ na ko kini ‘kpari na agu yo nanaakpara.’ (Rom. 12:15) Ni kpiapai, ho gu ga Yesu abawiriki naadu 70 akaragatiyo ni na ngbarago fuo nyasa yo sunge tungusapai, ko “angi rogo Ziazia Toro,” yo. (Rk. 10:17-21) Ono ho Yesu abi agu aboro ni naakpinyemu Razaro na gberãrago mbikopa kpiko, “nunga ki zi ko toroko yo, ko ki nirungo a.”—Yo. 11:33.

2. Ginihe naundo Yesu ko yugu nunga fu aboro?

² Wa vura duhe nga Yesu angia rengberengbe kumba, ko adu na inaapai gbiati nunga koyo du kpakpa aboro ni. Ginipai naundoko ko du wa gure? Gu nyanyakipa pai naundo Yesu angia, ko aima kpinyemu aboro. A wa i agumbaha rogo gu kekeapai nasusi, ‘rago angba tiko mbiko awiri aboro.’ (Snz. 8:31) Gu nyemuse tipa aboro re du nasako ko asadi ka ino wai wenengai wiri aboro aberã. Gu mokedi nangia Yoane aya: “Ko aini gu pai aina nadu kpotoboro yo ni tiko.” (Yo. 2:25) Yesu adu na bakere nunga aboro tiko. Aboro aima ino pa gako nyemuse koyo du yo ni na i ki degetuyo kuti gu pangbanga nga ga Kindo. Ka ani aayugo nunga fu aboro, si nika undo rani ani du na diabese rogo gaani sunge tungusapai yo.—2 Tim. 4:5.

3-4. (a) Ka ani du na nunga aboro tirani, ani bi gaani sunge tungusapai wai? (b) Ginipai ani nika sakapai tipaha rogo gi kekeapai re?

³ Gu mokedi nangia Pauro aima ino gupai nga ko na tindiro riko nga ga tungusapai, na kinawo du ani areme a. (1 Kor. 9:16) Ono tie, ka ani du na nunga aboro tirani, ani bingo sunge tungusapai gbua wa tindiro te. Ani idi ka yugo gupai nga ani naberãpa aboro aberã na ani na nyemu ka undo yo. Ani ima ino gupai  nga “fu he ngba ti dia ha,” watadu gu ngbarago boro agbiaha ho ní agamahe ni, si kii kisusi gu ní agbiaha ho boro afu he ni funi. (Amo. 20:35) Ani nagbia ngbarago ni bakerehe ti gaani sunge tungusapai ho ani atungusapai ni mbiko gupai nga ani naida ka undo aboro.

⁴ Rogo gi kekeapai re, ani nika wirikapai tipa wai rengbe ani ka yugo nunga rogo gaani sunge tungusapai yo. Ni bambatapai, ani nika bi gupai rengbe ani ka wirikaha ti gu gene Yesu anaaberãpa aboro ngbaha. Na fuo gure, ani ki sakipai tipa agene biama nga gu rengbe ani ka wirika ga Yesu kpiapai ngbaha.—1 Pet. 2:21.

5-6. (a) Ada Yesu ayugu nunga fuyo? (b) A wa i agumbaha rogo Yesaya 61:1, 2, tipagine nunga agu aboro Yesu aatungusapai fuyo aziko ti ni?

⁵ Oni bingo kpiapai nga ga wai Yesu ayugu nunga. Ti kura regbo sa, aYesu na gako abawiriki adu na bakere mbugo mbiko i aima tona nitungusipai zanga ongoda. Na ka regbo adunga beyo “wa ka i ri riahe ya.” Sidu, Yesu adi gako abawiriki “ku nvuo yo ni sa yo” na i ki ‘ongodi tooni.’ Ono tie, bakere rimbasa aboro aoro mbatayo ku rogo gu ba aYesu na gako abawiriki aandu ku rogoho. Wai du Yesu adu na ginipai ko amangihe ho ko ada ni yo na ki bi gi bakere rimbasa aboro re? ‘Nungayo amangi ko bambiko i adu wa agu akandoro adunga na babandara ti ra ya; ko ki tona yugo dungu apai fu yo.’—Mk. 6:30-34.

⁶ Tipagine du nunga agi aboro re amangi Yesu ti ni? Ko abi gupai nga aboro “adu wa agu akandoro adu nga na babandara ti ra ya.” Si rengbe kadu nga Yesu abi gupai nga gu kura aboro angia airarungo na kini mangisunge nyanyaki tipa kaa ngerafuo gayo aborokporo. Isoke agu akurayo adu na bakere gberãrago mbiko kpio gayo aboro. Kangia wo si adu, Yesu aima rengba ka rugatiko na gupai i adu rogoho. A wa i asakipai tipaha rogo gu kekeapai naadu mbata fu gere, Yesu aima gbiatiko na bete agi akpakarapai re. Mbiko gupai nga Yesu anaaberãpa aboro aberã, na si nasako ko ye na pangbanga wasa fuyo.—Oni gedi Yesaya 61:1, 2.

7. Wai du rengbe ani ka wirika ga Yesu kpiapai?

⁷ Ginipai ani awirikaha ti ga Yesu kpiapai? Wakina Yesu, ani naraka dagba agu aboro du  wakina “agu akandoro adu nga na babandara ti ra ya.” I nasota na badungu akpakarapai. Ani na guhe berani i aidaha—nga gu pangbanga nga ga Kindo. (Yugo. 14:6) Ani nawirika Bairarani na kini tungusi wene pangbanga, bambiko ani na ‘nunga rurungbura aboro tirani na airazingo ahe.’ (Tam. 72:13) Nunga yo namanga rani na ani kini idi ka mangapai tipa ka undo yo.

8. Gini gene sa rengbe ani ka yugo nunga ngbaha fu aboro gene tungusapai yo? Oni funga kpiapai.

⁸ Ginipai rengbe ka undo rani ani yugu nunga fu agu aboro ani atungusapai fuyo? Si naida ani moi tirani kuba agu aboro ani agbiayo gene tungusapai yo na kini mangipai na yo kina wai ka ani naaida i mangipai na ani. * (Mt. 7:12) Ani sakingo pai tipa agene biama nga gu rengbe ani ka manga gipai re ngbaha. Bambatapai nga, ka berã tipa agu azingo nga ga aboro ni basasa. Ani rengbe ka ringbisa gupai ani amangaha ho ani atungusapai ni kuti gupai munganga ninaamanga ha tipa ka undo aborokaza. Wene munganga naberãpa agu azingo nga ga aborokaza dunduko ni basasa. Ni nasana asanahe na kini degetuni wenengai ho borokaza apeka pa agu apai ni namanga ni. Kuba gupai nga ni pepa gu dawa nibasa rengbe ni ka berãpa ha, ni namanga gu kura awisigopai tipa ka ino gupai nzunzu namanga borokaza na fuani ni ki fu gu dawa fu ni rẽ tipaha. Wakina gure a, si aidanga ani mangisunge na bangisa gene tungusapai sa tipa ai gu boro ani agbia ni gene tungusapai yo te. Kuba gure, si naida ani asadi ka rugatirani na agu apai du tipa aboro ni basasa gbiati gayo abipai.

9. Ginipai si aidanga ani mangihe ya? Oni sakingo rogo yo.

⁹ Ho mo agbia boro ni gene tungusapai yo, si aidanga mo berẽ gupai nga mo ima ino agu apai du tipa ni watadu agu apai ni naidi kutini na ndu gupai ni naidi ti ni kutini te. (Snz. 18:13) Kuba gure, mo sana ni na asanahe ni tatamana tipa ka ino gupai du tipa ni gbiati agu apai ni naidi kutini. (Snz. 20:5) Ka si du nga si nga gupai rẽarẽ rogo gu rago du mo rogoho, mo sanahe tipa gani sunge, gani aborokporo, agu apai ni andu rogoho rogo gani raka yo, gbiati agu abipai du ni na ni. Ho ani asana asanahe ni, si nasa gupai nga ani mbugene fu aboro i gumba ndu gupai furani i aida wene pangbanga ti ni. Ho ani aino agu apai ni du tipa yo, ani ima rengba ka yugo nunga fuyo tipa gu zingo du yo na ni na ki fu gu undo fuyo i aida na ni.—Oni ringbisinga ha na 1 AKorindo 9:19-23.

10-11. Nibi gupai du rogo 2 AKorindo 4:7, 8, gini ue gene rengbe ani ka yugo nunga ngbaha fu aboro? Oni funga kpiapai.

¹⁰ Uepai nga, mo asadi ka makia pa wai du ga agu aboro re raka. Ani ima rengba ka rugatirani na gupai du yo rogoho ngba kura agene. Gu kurapai berewe nga, ani dunduko nga kpakpa aboro na ani nagbiatirani agbia a na akpakarapai. (1 Kor. 10:13) Ani ima ino gupai  nga raka ima du ni kpakarakpakaraha rogo gi sino raka re. Ani nahipai mbiko kina gu undo nga ga Yekova. (Oni gedi 2 AKorindo 4:7, 8.) Oni berẽnga pa agu aboro adunga na mbembedi pagume na Yekova ya. Si ima kpakara fuyo tipa ka raka rogo gi zegino re zanga gako undo. Wakina Yesu, nunga yo namanga rani amanga, na gipai re nafõngbaduraniyo ani gumba “wene pangbanga wene ahe” fuyo.—Yes. 52:7.

¹¹ Oni bingo gu kpiapai nga ga kura wirina sa du rimoko nga Sergey. Mbata fu Sergey wiriki rengo, ko angia boro zee na ki ngia gu boro nanaafuranga gbe ya. Si anidu ni mbumbuhe fuko kaa fura na aboro. Fuo bete regbo kusa, ko atona wisigo Ziazia Kekeapai. Sergey aya, “Wa mi aawisigo Ziazia Kekeapai, mi aye ka ino gupai nga aKristano du wa ka i aape gupai fu aboro i naidi kutini. Mi abi gupai nirengo nga ka mi mangingo gupai re te.” Ono ko aberẽpa agu aboro ata gianga rengo ya, na ko ki ye ka ino gupai nga gayo raka ima rengba kadu ni kpakarakpakaraha mbiko i ainongo Yekova te. Ko aya, “Gu vovo apai mi aawirikaha aye na bakere ngbarago fere gbiati zereda nga ga berãseyo. Mi aye ka ino gupai nga si naida gu kura aboro wiriki agi arengo re awirika a.” Wa ga Sergey nunga tipa aboro aakio kina kumbatayo, ko aye ka bi gupai nga gako wingbaduse tipa tungusapai aakio kina kumbatayo a. Sergey aya, “Kina ngbare nazere ka bi gupai nga gumba mi agu apai nga ga Ziazia Kekeapai fu aboro asa gupai nga mi du na bakere kido. Na fura fu aboro tipa gimi vovo aida ki nyakasi gimi idapase.” *

12-13. Tipagine si aida ani yugu zerangbaduse ti ni fu agu aboro ani ayugopai fuyo gene tungusapai yo? Oni funga kpiapai tipa gipai re.

¹² Biatapai nga, mo yugu zerangbaduse fu agu aboro mo ayugopai fuyo. Mo tingidi gupai nga, si ima rengba kadu nga i aaberãnga mbata kurii agu arengo nga aga Ziazia Kekeapai ani nainihe wenengai te. Na badungu aboro ima du ba bakere kido kuti agu apai i naidi kutini. I ima rengba ka berã gupai nga gayo pambori nasa gupai nga i du mbembedi na  gayo aborokporo, gayo sino mangaapai, gbiati gayo aboro ringara. Waigu rengbe ani ka undo yo?

¹³ Oni berẽnga kurii gipai re: Ginipai ninaamanga ho si nidu ni nga paga ima du ni kuruhe na si kini idi i mbakadi vovoho kubaha? Dedede, ho i naame vovoho ni, i naambu gu kuruhe re ho kindi tipa aboro nindu riihe. Ho i anyasa me vovoho ni, i kini ru ka gbataka gu kuruhe re. Wakina gure a, mbata fu ani sana aboro tipa i mbu gayo “kuru” aida, si naida ani undo yo i yugu tambuahe tipa “vovo” arengo—nga gu i aainongo pai tipaha mbata fu ani tona wisigoho Ziazia Kekeapai na yo ya. Manga ani he wo nika sa gupai nga i mbu gayo kuru aida. Si ima rengba ka dia regbo tipa ka undo aboro i mangi ngbatunga agu aˈariapai re.—Rom. 12:2.

14-15. Wai du rengbe ani ka undo agu aboro du na kina bete inohe watadu adunga na inohe tipa gu maabangirise nga ga nyenye unga auru kpotosende ya? Oni funga kpiapai.

¹⁴ Ka si du nga ani nayugo zerangbaduse fu aboro gene tungusapai yo, ani berẽnga gupai nga si naida i gi rogo agu arengo yo nga ga Ziazia Kekeapai na ki idi na ni ti kina gu bambata regbo ani nagumbaha fuyo te. Kuba gure, nunga nika sarani ani undo yo i berẽ wenengai kurii agu apai Ziazia Kekeapai agumbaha. Ni kpiapai, oni bingo wai rengbe ani ka sakapai na boro tipa gu maabangirise nga ga nyenye unga rogo paradizo auru kpotosende. Badungu aboro na kina bete inohe tipa gi yugopai re watadu agu yo ainongo kandara wiripai tipaha te. I ima rengba ka ida kuti gupai nga ho boro akpi ni, ka ni rakinga berewe te. Watadu i ima rengba ka berã gupai nga wene aboro dunduko naga ku ngbangbaturũ yo. Waigu rengbe ani ka undo yo?

¹⁵ Gene gere sa wirina ninaaundo aboro ngbaha i rugutiyo na pa gu maabangirise du tipa raka nyeanye kindi auru kpotosende. Gu bambatapai ko naamangaha nga, ko nageda Bambata Pai 1:28. Fuo gure, ko ki sana irakporo nga wari Mbori aaida aboro niraki ni na gini ngbatunga raka ko aaida i niraki he. Badungu aboro ni naakaragapai nga, “Ko aaida ani raki ane auru kpotosende na ngbarago.” Fuo gure, gu wirina re ninaageda Yesaya 55:11 na ki sanahe singia ga Mbori ringbisapai ima ariatihe. Dedede, irakporo ninaakaragapai nga oó. Ni yangaraha, gu wirina re ninaageda Atambuahe 37:10, 11 na ko ki sanahe nga ginipai du kumbatayo fu aboro. Ni mangako sunge na Ziazia Kekeapai ngba gi gene re, ko ima undo badungu aboro i rugutiyo na gupai nga Mbori naida gupai kindi nga wene aboro raki nyeanye kindi rogo Paradizo auru kpotosende.

16-17. Nibi gupai du rogo Asanza 3:27, gini wene agene duho rengbe ani ka yugo nunga ngbaha? Oni funga kpiapai.

¹⁶ Biama pai nga, mo berẽpa gupai rengbe mo ka mangaha ka yugo gupai fu aboro nga mo naberãpa yo aberã. Ni kpiapai, ya mo ani ndu fuo irakporo ti gu regbo arẽnga fu ni ya? Ani ima rengba ka hõmbupai be ni na ki gumba gupai fu ni nga ani nika ye berewe ti gu regbo nika du ni wenehe fu ni. Ginipai rengbe ani ka manga ka si du nga irakporo naida ani undo  ni na wiri sunge? Watadu ginipai rengbe ani ka mangaha ka si du nga ani gbia irakporo nga gu ni nakaza akaza watadu sosono boro ni kini idi ani undo ni ka ngbeka ahe funi? Ho du apai ni wa ngbatunga gure, ani ima rengba ka undo gu ngbatunga boro re.—Oni gedi Asanza 3:27.

¹⁷ Gu kura wirina sa agbia wene sangbanapai fuo manga ri tooni wenepai fu boro nga gu si aangera wa paha aanyakanga te. Nunga asa ri ri ke waraga fu gu kura aborokporo sa wiriyo akpi ni kina gu uru i avunguru. Gu waraga re adu na bete averesi rogoho nga ga Ziazia Kekeapai nga gu nafu wasa. Wai du gu waraga re adu na maapai kurii agu aborokporo re? Na gu gude nakpi re akepai ki ya, “Mi adu na bakere gberãrago gba. Gu waraga mo akehe re aima undo rani ni bakerehe. Bakere tambuahe foro tipa gu waraga mo akehe re, si aima fu wasa furani ni bakerehe. Mi agedi gu waraga re gba susi bara 20. Gu waraga re aima du ni bawenehe gbe kisusi na ni pa ngarasaro. Bakere tambuahe foro.” Zanga kapa, ani ima rengba ka gbia wene sangbanapai ka ani rugutirani na pa wai kpakara raka fu agu aboro narungo na ani ki mangipai tipa ka undo yo.

18. Nibi gupai du rogo 1 AKorindo 3:6, 7, gini ruru bipai si aida ani du na ni?

¹⁸ Rengo ngaha nga, si naida ani du na ruru bipai tipa gaani bangiriba rogo sunge tungusapai yo. Gaani sunge nga ka undo aboro i wirikipai tipa Mbori, ono ani amanganga nyanyakipa papara gi sunge re te. (Oni gedi 1 AKorindo 3:6, 7.) Yekova du nagbe aboro koyo du ko ni. (Yo. 6:44) Niyangaraha, singia boro nika dia wene pangbanga kugume watadu ni adianga ha te, gure naruriipa wai du ni kpotoniyo. (Mt. 13:4-8) Oni tingidi gupai nga badungu aboro naadianga ga Yesu pangbanga kugume ya—wa si avura du vurũ nga ko angia bakere bayugupai kisusi! Nirengo, ka rago gberẽnga tirani ya, ka si du nga badungu agu aboro ani aida ka undo yo adeganga tuyo kuti gaani wene pangbanga te.

19. Gini aundo duti yugo nunga gene tungusapai yo?

¹⁹ Ani nika gbia wene asangbanapai agbia ka ani ayugo nunga fu aboro gene tungusapai yo. Ani nika gbia bakere ngbarago ti gaani sunge tungusapai. Ani nika gbia gu bakere ngbarago naye ti fuhe. Na ani nika saha taata fu agu aboro “i aima ringbisa yo sa nyenye unga” i di wene pangbanga kugume. (Amo. 13:48) Sidu, “momu nimángi rani tie, ani ki mangi gu pai amanga ngba angba fu aboro dunduko.” (Gara. 6:10) Ka ani mangihe wo, ani nika gbia gu ngbarago duti ye na taarimo fu gu Barani du ngbangbaturũ yo.—Mt. 5:16.