ATETA itandai kalak min kita kalak si mehuli. Tapi gundari la menukah jadi kalak si mehuli. Salah sada alasenna eme perban nterem jelma “la atena ngena si mehuli.” (2 Tim. 3:3) Ate kalak e itentukenna sendiri kai si benar ras si salah. Banci ikataken, ianggapna ‘kejahaten e mehuli janah si mehuli e jahat.’ (Jes. 5:20) Alasen si deban ngkai maka mesera siakap ngelakoken si mehuli eme perban kita la sempurna. Entah pe banci saja terpengaruh kita perban kai si terjadi bas geluhta mbarenda. Emaka, banci saja seri penggejapenta ras sekalak turang seninata si nggo puluhen tahun ngelayani Jahwe. Nina, “Kuakap labo aku banci jadi kalak si mehuli.”

Tapi situhuna, kerina kita banci jadi kalak si mehuli! Sipat mehuli e ihasilken kesah si badia Dibata. Kesah e ndauh gegehen asangken pengaruh si la mehuli arah kalak si deban bage pe kelemahenta sendiri. Emaka mari sipelajari kai kin sipat mehuli e janah uga kita banci mpebelin sipat enda.

Intina, mehuli ertina bebas arah kejahaten ras kai si la mehuli. Kalak si mehuli e tuhu-tuhu mehuli kel perbahanenna janah bujur jelmana, ntah pe la lit si man pandangen bas ia. Kalak si mehuli lalap idaramina cara guna nampati kalak si deban, janah mehuli lalap perbahanenna man kalak e.

Banci saja pernah idahndu kalak si mehuli man keluarga ras teman-temanna saja ngenca. Tapi, labo bias bage saja. Memang, labo lit kalak si banci lalap erban mehuli man kerina jelma. Nina Pustaka, “I bas pertibi enda labo lit kalak serta, si katawari pe mehuli perbahanenna dingen la pernah ersalah.” (Peng. 7:20) Rasul Paulus pe alu terus terang ngataken, “Kuteh maka i bas aku, eme i bas dagingku, la lit si mehuli.” (Rom. 7:18) Emaka adi ateta jadi kalak si mehuli, perlu kita erlajar arah Jahwe, Sumber kerina si mehuli.

Dibata Jahwe ngenca si banci ncidahken sipat mehuli alu sempurna. Nina Pustaka kerna Jahwe, “Andiko mehuli kel Kam, mehuli kel perbahanenNdu! Ajarken man bangku aturen-aturenNdu.” (Msm. 119:68, Terjemahan Dunia Baru [NW]) Bas ayat e ikataken maka Jahwe e mehuli janah perbahanenNa pe mehuli. Mari sibahas.

Jahwe e mehuli. Sipat mehuli la kel terpesirang arah sipat-sipat Jahwe. Kerina sipatNa si deban lit hubungenna ras sipat mehuli. Cuba ukuri kisah enda. Pernah ikataken Jahwe man Musa, “Kerina kiniulinKu banci Kupementas arah lebendu.” Sanga idah Musa kemulian Jahwe termasuk kiniulinNa, ibegi Musa sora si ngataken, “Aku kap [Jahwe]. Aku kap Dibata si dem alu lias ate ras perkuah ate. Aku la sukah merawa, janah Kucidahken keleng ateKu si mbelin ras kesetianKu si tetap. Kusehken padanKu man meribu-ribu kesusuren janah Kualemi kejahaten ras dosa; tapi la banci la Kuukum [“kalak jahat,” NW].” (Kel. 33:19; 34:6, 7) Kata-kata e mbuktiken maka Jahwe tuhu-tuhu mehuli bas kerinana. Sanga Jesus i doni, ia me manusia si seh kel ulina,  tapi nina, “La lit ise pe si mehuli selain Dibata.”​—Luk. 18:19.

Perbahanen Jahwe e mehuli. Kerina perbahanen Jahwe mbuktiken Ia mehuli. “Man ise pe mehuli [Jahwe] janah keleng ateNa man kerina tinepaNa.” (Msm. 145:9) Perban Jahwe mehuli janah la ibeda-bedakenNa kalak, iberekenNa kegeluhen bage pe kerina si iperluken manusia gelah kalak e tetap nggeluh. (Perb. 14:17) Sipat Jahwe si mehuli pe teridah sanga iampuniNa kita. Nina penulis Masmur man Jahwe, “Mehuli kap Kam man kami dingen nggit ngalemi.” (Msm. 86:5) Tek kita maka ‘la itahan Jahwe mereken si mehuli man kalak si ngelakoken si ngena ateNa.’​—Msm. 84:12.

Iciptaken Jahwe kita mirip bagi Ia emaka banci siusih Ia. Banci kita jadi kalak si mehuli janah ngelakoken kai si mehuli. (Kej. 1:27) Tapi si e labo terjadi bage saja. Ikataken Jahwe maka arus kita ‘erlajar erban si bujur,’ ntah pe si mehuli. (Jes. 1:17) Uga carana? Mari sibahas telu cara.

Si pertama, banci kita ertoto mindo kesah si badia. Kesah e banci nampati kalak Kristen jadi kalak si mehuli i lebe-lebe Dibata. (Gal. 5:22) Jelas me, kesah si badia Dibata banci nampati kita gelah sikelengi kai si mehuli janah situlak kai si la mehuli. (Rom. 12:9) Selain si e, nina Pustaka banci iban Jahwe kita “paguh i bas kerina perbahanen ras kata-kata si mehuli.”​—2 Tes. 2:16, 17.

Si peduaken, arus sibaca Kata Dibata eme Pustaka. Sanga sibaca Pustaka, iajari Jahwe kita “kerina dalan si mehuli” janah ilengkapiNa kita guna ngelakoken “kerina perbahanen si mehuli.” (Kua. 2:9, NW; 2 Tim. 3:17) Adi sibaca Pustaka janah siukuri alu mbages, siisi me pusuhta alu kai si mehuli kerna Jahwe ras peratenNa. Kerina si mehuli si nggo sitama bas pusuhta enda pasti lit gunana pagi.​—Luk. 6:45; Ep. 5:9.

Si peteluken, perlu siusahaken guna ‘ngusih kai si mehuli.’ (3 Joh. 11) Bas Pustaka lit contoh-contoh si man usihenta. Contoh si mehulina eme Jahwe ras Jesus. Tapi banci ka siusih kalak bas Pustaka si mehuli perbahanenna. Banci saja si lit bas ukurta eme Tabita ras Barnabas. (Perb. 9:36; 11:22-24) Pelajarilah contoh kalak e bas Pustaka gelah itehndu kai saja si ilakokenna guna nampati kalak si deban. Ukurilah kai si banci ilakokenndu guna nampati keluargandu ntah pe turang senina bas runggunndu. Selain si e, ukuri kai gunana man Tabita ras Barnabas perban mehuli perbahanen kalak e. Bagi kalak e, kam pe banci ndatken gunana.

Banci ka kita erlajar arah contoh turang seninata si gundari si ngelakoken kai si mehuli.  Misalna, ukurilah pertua-pertua bas runggun si kerja keras janah “ngena atena si mehuli.” Ukuri ka turang seninata si diberu si setia si “jadi guru i bas si mehuli” arah kata-kata ras perbahanen kalak e. (Tit. 1:8; 2:3) Sekalak turang seninata si gelarna Roslyn ngataken, “Lit temanku si erusaha kel nampati ras mpegegehi turang senina bas runggun. Iukurina keadan kalak e janah rusur iberekenna hadiah si kitik ntah pe isampatina kalak e. Menurutku, ia tuhu-tuhu kalak si mehuli.”

Iahken Jahwe umatNa guna ‘ndarami si mehuli.’ (Amos 5:14) Adi silakoken e, sikelengi me kai si mehuli menurut Dibata. Teriahken ka kita guna ngelakoken kai si mehuli.

Guna jadi kalak si mehuli, la perlu luar biasa perbahanenta man kalak si deban ntah pe sibereken hadiah si merga kel man kalak e. Ukuri contoh enda: Gelah sinuan-sinuan banci turah, labo mis mbue lau sisiramken ku sinuan-sinuan e, tapi sitik-sitik sisiram janah mulih-ulih. Bage ka pe, amin gia la mis melala si banci silakoken man kalak, banci nge rusur sicidahken sipat si mehuli.

Nina Pustaka arus kita “nggit” ngelakoken kai si mehuli. (Tit. 3:1) Adi siperdiateken keadan kalak si deban, banci siteh kai si perlu silakoken guna nampati ia “alu kai si mehuli gelah ia ipegegehi.” (Rom. 15:2) Salah sada si banci silakoken eme sibagiken kai si lit bas kita. (Kua. 3:27) Misalna, banci siundang kalak guna man ras kita ntah pe guna mpegegehi sada ras si debanna. Adi siteh lit si sangana sakit, banci sidahi ia, sibaba luahta, ntah pe siteleponi. Jelas me, banci sidarami melala kesempaten guna ngataken “kai si mehuli guna mpegegehi paksa iperluken, gelah erguna man kalak si megikenca.”​—Ep. 4:29.

Bali bagi Jahwe, ateta erban si mehuli man kerina jelma. Emaka la sibeda-bedaken kalak. Salah sada cara si mehulina i bas ngusih Jahwe eme alu mberitaken berita si meriah kerna Kerajan Dibata man kerina jelma. Bagi si iperentahken Jesus, ateta erban si mehuli termasuk man kalak si rate segat man banta. (Luk. 6:27) Labo pernah salah adi kita mehuli ntah pe melias man kalak si deban, sebap “la lit undang-undang si erlawanen ras si e kerina.” (Gal. 5:22, 23) Adi mehuli perbahanenta aminna pe melala masalahta ntah pe la mehuli kalak man banta, banci saja dungna kalak tertarik erlajar kebenaren janah imuliakenna Dibata.​—1 Pet. 3:16, 17.

“Kalak bujur [“mehuli,” NW] pe inanamina nge bekas kebujurenna.” (Kua. 14:14) Kai saja piga-piga hasil si banci sinanami? Adi mehuli kita man kalak si deban, mbelin kemungkinenna mehuli ka kalak e man banta. (Kua. 14:22) Aminna pe la mehuli kalak man banta, arus terus mehuli perbahanenta man kalak e. Hasilna, banci saja erkusur ukurna janah reh ulina perbahanenna.​—Rom. 12:20.

Adi mehuli perbahanenta janah lanai silakoken kai si la mehuli, kita pe ndatken gunana. Enterem turang seninata si nggo nggejapkenca. Perdiateken pengalamen Nancy. Nina, “Mbarenda ate-ateku saja geluhku, rusur kulakoken perbahanen seks si salah, janah la aku sopan. Tapi sanga kupelajari kai si mehuli menurut Dibata janah kupatuhi Ia, meriah kel ukurku. Gundari nggo merga kuakap bangku.”

Alasen si pentingna sipebelin sipat mehuli eme perban meriah ateta siban ukur Jahwe. Amin gia sitik ngenca si ngidah perbahanenta, tapi Jahwe idahNa nge. IdahNa kerina perbahanen ras perukurenta si mehuli. (Ep. 6:7, 8) Kai hasilna? “Kalak bujur keleng ate [Jahwe].” (Kua. 12:2) Emaka mari terus sipebelin sipat mehuli. Erjanji Jahwe “man tiap kalak si ngelakoken kai si mehuli, ialokenna pagi kemulian, kehamaten, ras kedamen.”​—Rom. 2:10.