SÚNGUBEI wagía busentiwa lun hariñagun gürigia wawagu gürigia lan buítiña wagía. Gama lumoun, hénrenguti katei le uguñe weyu. Saragu gürigia ‘mínsiñehabutiña’ lun le buídubei (2 Tim. 3:3). Másiñati hagía guánarügü lan adundehabalin habagari luagu le buídubei lumoun le wuribabei ani ariñagatiña ‘le lan buídubei wuriba lan ani le lan wuribabei buiti lan’ (Isa. 5:20). Ani sun wagía ageindaguatiwa luma wafigoun guánarügü luma giñe katei wuribati le winwan wamaalibei. Ligía gayara lubéi wasandiragun woungua kei tasandiragun aban íbiri tungua, to eseriwiduboun lun Heowá luagu saragu irumu, to ariñaguboun: “Hénrenguti nun lun nafiñerun gayara lan aban nan gürigia to buitu”.

Íbini ítara, sun wagía gayaraati gagaburi wamani igaburi le lánina areiduni. Ligía aban lídangiñe igaburi le líchugubei lani Bungiu sífiri sandu, le gabafutimabei luéi furumiñeguarügü turobuli le úmabei wagagibudagua, kéiburi óuchawaguni le lúmagiñeti ubóu, le hámagiñeti gürigia ha geyegubaña wau luma waturobulin guánarügü. Akutiha waméi katei lan areidunibei ani ariha waméi ídatima luba lan warufuduni lidan wabagari.

Lidan murusun dimurei, areiduni ligía igaburi le larufudubei gürigia le buídubei igaburi, gürigia le maribanbei ani harumati lóuserun. Gürigia le areidabei súnwandan láluahan líderaguniña amu luma lun ladügün katei buiti hawagu.

Chóuruti subudi wamá fiu gürigia ha aransetiña lun hadügün katei buiti hawagu haduheñu luma hawagu hamadagu. Gama lumoun, gürigia ha buítiña ligibugiñe Bungiu mámarügüñein le hadüga. Inarüni ua lan ni aban lun gagaburi lani igaburi le machararunga, lugundun ariñagatu Bíbülia: “Úati ni aban gürigia úaraguati ubouagu le adügüti buiti súnwandan lun mafigouhanbei lan” (Apur. 7:20). Ariñagati apostolu Pábulu: “Subudi numuti luagu ua lan ni kata buiti nidan keisi wügüri” (Rom. 7:18). Ligíati, anhein busén wabéi gagaburi wamani igaburi le, buídubei lun wakutihani lani Heowá hénpulu, le úmagiñebei liabin areiduni.

Heowá íchugubalin lúrudu luagu le buídubei. Ariñagati aban hádangiñe abürühatiña sálumu: “Buítibu ani adüga bumuti giñe buiti; arufudahabei bilurudun nun!” (Sal. 119:68). Akutiha waméi bián katei luáguti areida lan Bungiu, le iridúbei lidan bérusu le.

Buiti Heowá. Areiduni ligía aban lídangiñe ligaburi Heowá le súdinitimabei. Ariha waméi le asuseredubei dan le lariñagubei lun Moisesi: “Násügüragüdaali sun nareini bigibugiñe”. Lidan lásügürüña lan sun luéirigun Bungiu, íbini areiduni laganagua, aba laganbuni Moisesi dimurei burí le: “Au Haburemebei! Au Búngiubei lun súnwandan! Gudemehabutina, gaguraasuntina, wéiritina lidan ínsiñeni luma inarüni! Deregüdaguati nínsiñehabu súnwandan, feruduna numuti wuribani, maganbadi luma figóu; gama lumoun mígirun numuti le gadurunbei mabeichúnga” (Afu. 33:19; 34:6, 7). Ligíati, furanguti larufuduni katei le buidu lan sun ligaburi Heowá. Dan le lawinwandunbei Hesusu Ubouagu, ligía meha hénpulu wéiritimabei lidan larufudún areiduni. Íbini ítara, ariñagati: “Ábanrügüñein buiti, Bungiu” (Luk. 18:19).

 Adüga lumuti Heowá le buídubei. Arihúati areida lan Bungiu lidan sun le ladügübei. Ariñagatu Bíbülia: “Buiti Aburemei hama sun gürigia, ani góunigi lumuti giñe le ladügübei lau areiduni” (Sal. 145:9). Arufuda lumuti Heowá areida lan lau ua lan himei lan aban gürigia luéi amu, lau líchugun ibagari houn gürigia luma sun le hemegeirubei lun hawinwandun (Adü. 14:17). Arufuda lumuti giñe lau feruduna lani wafigoun. Ariñagati ábanya abürühati sálumu: “Ladüga, buguya Nabureme, buítibu ani gíchigadi buguya ferudun” (Sal. 86:5). Gayaraatiti wachoururuni “hínsiñetiña [lan] ha harumabaña abagaridun lun Aburemei, rulei le buídubei houn” (Sal. 84:11).

Kei le adüga lubaliwa Heowá lenege guánarügü, gayaraati buidu wamá adüga wameime le buídubei (Agu. 1:27). Gama lumoun, ariñagatu Bíbülia houn lubúeingu Bungiu: “Furendei huméi ladügǘn buiti” (Isa. 1:17). Ariha wamá ǘrüwa katei le gayaraabei wadügüni lun wafurendeirun adügei le buídubei.

Furumiñe, furíei wamá lun wamuriahan sífiri sandu, le gayaraabei líderaguniwa lun buidu wamá ligibugiñe Bungiu (Gál. 5:22). Anha, íderagua lumutiwa lani Bungiu sífiri lun hínsiñe lan le buídubei woun luma lun wamahadun lun le wuribabei (Rom. 12:9). Ani ariñagatu Bíbülia gayara lan ladügün Heowá lun derebugu wamá lun wariñaguni luma lun wadügüni sun le buídubei (2 Tesa. 2:16, 17).

Libiaman, mosu waliihanu Lererun Bungiu. Dan le wadügüni, arufudahati Heowá woun lun wetenirun lun sun katei le buídubei ani aranse lumutiwa lun “sun luwuyeri wadagimanu buiti” (Ari. 2:9; 2 Tim. 3:17). Lau waliihanu Lererun ani samina wagía luagun le waliihabei, aba wabuinchagüdünu wanigi lau katei buiti luagu Bungiu luma luagu lugundan. Ábati ítara lan katei le kei aban irisini, le lunbei líderaguniwa danme le wemegeiruni (Luk. 6:45; Efe. 5:9).

Lǘrüwan, lunti wáfaagun lun wáyeihani “le buídubei” (3 Huan 11). Daritiwa sügǘ burí tidan Bíbülia le gayaraabei wáyeihani, hawagu ha arufudubaña areiduni. Heowátima luma Hesusu arufudubalin igaburi le buidu. Gama lumoun, añahein giñe amu ha arufudubalin lubuidun igaburi le. Másiñati wasaminarun tuagu Tabita luma Berünawé (Adü. 9:36; 11:22-24). Lahuuduba woun waturiahani le tariñagubei Bíbülia hawagu ani teni wagíame lun le hadügübei lun gayara lan wíderaguniña amu. Samina wamá luagu le gayaraabei wadügüni lun wíderagun somu hádangiñe waduheñu o somu lílana damuriguaü. Ariha waméi abiniruni le teresibirubei Tabita luma Berünawé luagu hadügüni le buídubei. Gayaraati giñe lasuseredun ligiaméme woun.

Gayaraati giñe wasaminarun hawagun ha adügübalin buiti houn amu uguñe weyu. Kéiburi wéiyaaña lidan afiñeni, benefatiña wügüriña ha ani hínsiñeti le buídubei houn. Ani mabulieidaguntiwa hawéi  wíbirigu würiña ha úaraguabaña, ha íchugubaña “hénpulu buiti lau habagaridun luma hererun” (Titu 1:8; 2:3). Ariñagatu aban íbiri gíritu Roslyn: “Anuhein aban numada to hínsiñebei tun tíderaguniña íbirigu ani rutu gurasu houn. Saminatu ka lan gádanbaliña ani héchutu adüga lirahüñü idewesei houn o tíderaguniña lidan amu burí igaburi. Ariha numutu kei aban gürigia to buiti tigaburi”.

Ariñagati Heowá houn lubúeingu: “Áluaha huméi buiti” (Amos. 5:14). Ánhawa adügei, mama hínsiñerügübei lilurudun Heowá woun, wáfaaguba giñe lúntima busén wamá wadügüni le buídubei ligibugiñe.

Masaminara wamá lun lan warufudun areiduni lunti lan wadügün katei le hanarimeguti. Samina wamá luagu aban katei. Lun gayara lan laweiridun aban nadü, máturagun wamuti lau saragu duna aban wéiyaasu, mosu wáturaguni sagü dan lau murusun duna. Ítarameme, gayaraati warufudun areiduni lau wadügün saragu lirahüñü katei hawagu amu.

Ariñagatu Bíbülia lunti lan aranseñu wamá lun wadügüni le buídubei (2 Tim. 2:21; Titu 3:1). Anhein teni wabéi lun le asuseredubei houn gürigia wáledigu, chóuruti wadariruba lan chansi lun wíderaguniña lau le buídubei houn (Rom. 15:2). Háfuga mosu lan wíchugun lídangiñe katei le wámabei houn (Ari. 3:27). Másiñati gayara lan wagunbirahan somu íbirigu wábiñoun lun hásügürün dan wama o lun weigin somu katei úara. Subuditi san somu gürigia le sándibei woun? Anhein ítara liña lubéi, gayaraati wóunahan aban tiraüraü gárada o somu abürüdǘni luéigiñe gágamuru lun, woudin bisidei o wagúarun lun. Súnwandan anihein lan chansi lun wariñagun somu katei buiti “le íderagutiña ha híbiri [...], abiniruni ligíame houn ha [aganbubalin]” (Efe. 4:29).

Ítara kei Heowá, áfaaguatiwa lun wadügün buiti houn sun gürigia. Ligía ua lubéi himei wamá ni aban. Wanügüni uganu buiti luáguti Larúeihan Bungiu houn gürigia ligía aban lubuidun igaburi lun wadügüni lira. Kei lariñaguni Hesusu, áfaaguatiwa wadügüni le buídubei íbini houn ha iyereegutiwa houn (Luk. 6:27). Buiti lun hínsiñehabu wamá ani óusera wagíame buidu hama amu lugundun “úaraguati burí igaburi le luma furumiñeguarügü lúrudu” (Gal. 5:22, 23). Ánhawa adügei le buídubei, meberesenga ánhawa ouserúa wuriba o lénrengunga, gayaraabei wídehan lun hayarafadun gürigia lun inarüni ani ru wagíame uéiriguni lun Bungiu (1 Fe. 3:16, 17).

Ariñagatu Bíbülia ha lan “buídubaña hafayeirúaba luagu le hadügübei” (Ari. 14:14). Kaba burí afayeiruahaü heresibira? Gayaraabei hóuseruniwa gürigia buidu (Ari. 14:22). Ani íbini anhein madügün hamá, lau wasigirun arufuda areiduni gayaraabei ladügün lun darangilu hamá luma lun tañuludagun hanigi (Rom. 12:20, TNM).

Gayaraati habahüdagun saragu ida liña lan lahuudun houn hígiruni wuribani lun hadügüni le buídubei. Ariha waméi tikesin Nancy. Abahüdaguatu: “Aban meha gürigia meberesentun luagu ni kata nuguya, wíyeti meha nibagari ani menebenehabutina meha giñe. Gama lumoun, dan le nafurendeirubalin lilurudun Bungiu luagu le buídubei ani aba nadügüni, aba nagumeserun asandira ugundani. Ani guenlé, inebeguatina nungua ani hínsiñeguatina giñe nungua”.

Wéiriti lisudinin gagaburi wamani areiduni ladüga gúndaagüda wamuti Heowá. Ariha lumuti le wadügübei íbini marihin hamani saragu gürigia. Ani téniti lun sun buiti le wasaminarubei luma le wadügübei (Efe. 6:7, 8). Kábati wibiha ánhawa arufudei igaburi le? “Gúndaati Bungiu hau gürigia ha buídubaña” (Ari. 12:2). Ligíati, sigí wamá áfaagua lun gagaburi wamani igaburi lánina areiduni. Füramaseti Heowá “líchuguba [lan] uéiriguni, inebesei, luma darangilaü” houn sun ha adügübalin le buídubei (Rom. 2:10).