«WAYUU anashi nia jee lotusü nukuwaʼipa», anasü wamüin müle pütchi wachiki. Kapüleepejeʼe süpüla müinjatüin sukuwaʼipa wayuu maaʼulu süka wainmain wayuu «eekai nayouktüin tü anasükat» (2 Tim. 3:3). Eesü naaʼinrüle tü anakat saaʼin namüin, eeshii «na anasü makana sümüin tü kasa mojusükat otta mojusü makana sümüin tü kasa anasükat» (Is. 5:20). Kapüleeshii waya süka eejiraain waya sümaa tü kasa mojusü waaʼinrapuʼukat otta süka waleʼeruʼuin tü kaainjalaakat. Eesüjaʼa süpüla müin wanüiki maʼaka saaʼin wanee wawala: «Nnojotsü wayuuin anasü taya saaʼin tamüin», müsü sünüiki mayaainjeʼe kakaliairüin shia sünain aʼyatawaa nümüin Jeʼwaa.

Eepejeʼe süpüla waaʼinrüin kasa anasü sümüin wayuu. Tia, shia wanee akuwaʼipaa eeka nutuma chi naaʼinkai Maleiwa. Alanaʼaleesia tia suulialeʼeya tü kasa mojusü naainjireekat waya na waneinnua jee suulia tü wakuwaʼipapuʼukat. Wekirajaa sünain tü naainjakat chi wayuu aaʼinrakai kasa anasü otta tü waainjainjatkat süpüla waaʼinrüin kasa anasü.

Nnojoishi mojulaain nia jee wulesü nukuwaʼipa. Nüchajaain sukuwaʼipa süpüla nükaalinjain wayuu otta naaʼinrüin kasa anasü süpüleerua.

Eeshi weʼraajüle wayuu eekai naaʼinrüin kasa anasü süpüleerua nüpüshi jee naʼaleewainyuu. Nnojoipejeʼe wayuuin anashi nia noʼuluʼu Jeʼwaa sünainjee neʼe naaʼinrüin tia. Saashin tü Wiwüliakat «nnojoishi eeichin wanee wayuu lotokai akuwaʼipa yaa mmapaʼa, aaʼinrakai kasa anasü sümaa maainjalain nia» (Ecl. 7:20). Anuu nünüiki Pablo süchiki tia: «¿Jamüsü taaʼinrakaʼa tü mojusü nnojotkat tacheküin taaʼinreein je nnojolüin taaʼinrüin tü anasükat? Shia süka taleʼeruʼuin tü kaainjalaakat» (Roma 7:17, 18). Waainjeere kasa anasü süpüleerua wayuu, wekirajaainjatü anain nukuwaʼipa Jeʼwaa, chi shikiishikai aaʼinraa kasa anasü.

Nia neʼe Jeʼwaa atüjaaka saaʼu kasain tü anakat süpüla saaʼinrüin wayuu. Anuu sünüiki tü Wiwüliakat nüchiki Jeʼwaa: «Anamia pia jee aaʼinrüshi pia kasa anasü. Pikiraja taya sünain tü puluwataakalü anain» (Sal. 119:68). Wekirajaa sünain piamasü kasa aküjünaka süchiki nukuwaʼipa Maleiwa suluʼu wetsiikulokot tüü.

Anamia Jeʼwaa. Anamia Jeʼwaa waneepia. Anuu tü nümakat soʼu naashajaain nümüin Moisés: «Alatapünaajeechi taya püʼütpünaa, paapeechi achiki taya sünain anamiain maʼin taya». Anuu tü naapakat Moisés soʼu nüpülajaain Maleiwa nümüin: «Jeʼwaa, Jeʼwaa, amüliajüi nia, anamia maʼin nia, nnojoishi aashichijaamaatüin, aisü maʼin wayuu nüpüla otta aküjashi nia tü shiimainkat, ayatüsia alin wainma wayuu nüpüla, nülatirüin sooʼopünaa naaʼin tü kasa mojusü aainjünakat, tü eʼraakat wayumüin otta tü kaainjalaakat. Kasalajaneetpejeʼe namüin naainjala na wayuu aainjakana kasa mojusü» (Éx. 33:19; 34:6, 7). Watüjaaitpa aaʼu kamaneein maʼin Jeʼwaa sünainjee müin nukuwaʼipa. Mayaainjeʼe anamiain maʼin Jesuu, müshi nia nüchiki Maleiwa: «¿Jamüshi ‹pia anamiakai› pümakalaka tamüin? Waneeshia Maleiwa niain anamiain» (Luc. 18:19).

 Aaʼinrüshi Jeʼwaa kasa anasü. Weʼrüin tia sünain süpüshuaʼa tü kasa nukumajalakat. Anuu sünüiki tü Wiwüliakat nüchiki: «Anamia Jeʼwaa sümüin wayuu süpüshuaʼa otta nümüliajüin süpüshuaʼa tü kasa nukumajalakat» (Sal. 145:9). Nnojotsü koʼuin nukuwaʼipa Jeʼwaa sümüin wayuu süka naaʼinrüin kasa anasü sümüin. Nia aapakaʼaya kataa oʼu sümüin wayuu otta süpüshuaʼa tü kasa shipijaainjatkalü aaʼu (Aluw. 14:17). Anamia nia saaʼu motuin naaʼin saainjala wayuu. Anuu nünüiki chi salmistakai: «Anamia maʼin pia Jeʼwaa otta motusü paaʼin naainjala wanee wayuu» (Sal. 86:5). Watüjaa aaʼu «nnojoleerüin naʼalijirüin Jeʼwaa noulia na lotokana akuwaʼipa kasa eekai anain» (Sal. 84:11).

Wounteerü waaʼinrüin kasa anasü jee anamiain waya süka müin wakuwaʼipa maʼaka saaʼin nukuwaʼipa Jeʼwaa (Gén. 1:27). Anuu sünüiki tü Wiwüliakat namüin na aʼyataashiikana nümüin Maleiwa: «Jaaʼinra kasa anasü» (Is. 1:17). Wekirajaa sünain apünüinsü kasa waainjainjatka süpüla waaʼinrüin kasa anasü.

Tü palajatkat kasa shia wachuntuinjachin chi naaʼinkai Maleiwa süpüla anain wakuwaʼipa noʼuluʼu (Gal. 5:22). Nükaalinjeena waya chi naaʼinkai Maleiwa süpüla waaʼinrüin kasa anasü otta wayoutuin kasa mojusü (Roma 12:9). Saashin tü Wiwüliakat, katsüinjeerü waaʼin sünain aaʼinraa tü anasükat jee sünain waküjain tü shiimainkat (2 Tes. 2:16, 17).

Tü piamakat kasa shia waashajeʼerüinjatüin tü Wiwüliakat. Müle shia watuma, nuʼunireena waya Jeʼwaa süpüla waaʼinrüin kasa anasü otta wounteerü waaʼinrüin tü talatakalü atuma naaʼin (Prov. 2:9; 2 Tim. 3:17). Waashajeʼerapa tü Wiwüliakat jee wasakireʼerapa waaʼin sünain tü sümakat, eejeerü suluʼu waaʼin kasa anasü nüchiki Maleiwa jee süchiki tü nüchekakat wapüleerua. Sükaalinjeena waya tia soʼunnaa sülatüin kasa wamüin (Luc. 6:45; Éf. 5:9).

Tü apünüinkat kasa shia washatüinjatüin «tü kasa anasü saaʼinrakat wayuu» (3 Juan 11, 12). Ashajünüsü suluʼu tü Wiwüliakat nachiki na wayuu anakana süpüla washatüin akuwaʼipa. Na anaʼleekana süpüla washatüin akuwaʼipa nia Jeʼwaa nümaa Jesuu. Eepejeʼe waneinnua wayuu anakana süpüla washatüin akuwaʼipa maʼaka saaʼin Tabita nümaa Bernabé (Aluw. 9:36; 11:22-24). Wekirajaa sünain tü sümakat tü Wiwüliakat nachiki otta jülüja waaʼin tü kasa naaʼinrakat süpüla nakaalinjain wayuu. Jülüja waaʼin tü waaʼinrüinjatkat süpüla wakaalinjain na wapüshikana jee na wawalayuukana. Jülüja waaʼin tü kasa anasü neʼrakat naya wayuukana sünainjee naaʼinrüin kasa anasü. Eʼreena waya kasa anasü müle wakuwaʼipa.

 Eesü süpüla washatüin nakuwaʼipa na aainjakana kasa anasü maaʼulu maʼaka naaʼin na laülaashiikana. Aʼyataalii maʼin naya jee naaʼinrüin tü kasa anasükat. Akaʼaya na wawalayuu jieyuukana, eesü süpüla washatüin nakuwaʼipa süka anain nanüiki jee naaʼinrüin kasa anasü napüleerua na waneinnua (Tito 1:8; 2:3, 4). Anuu sünüiki wanee wawala Roslyn sünülia: «Eesü wanee taʼaleewain aʼyataapuʼusü maʼin sünain akaalinjaa jee atütüleʼeraa naaʼin na wawalayuukana. Jülüjasü saaʼin tü alatakat namüin, asülajawaisü shia kasa namüin jee sükaalinjain naya sünain waneirua kasa. Wayuu anasü shia».

«Jüchajaa süchiki kasa eekai anain», müshi Jeʼwaa namüin na aʼyataashiikana nümüin (Amós 5:14). Waaʼinrüle tü nümakat, kojuteerü wamüin tü nuluwataakalü anain otta wachajaajeerü sukuwaʼipa süpüla waaʼinrüin tü anakat noʼuluʼu.

Nnojotpejeʼe choʼujaain wainmainjatüin maʼin tü wasülajüinjatkat süpüla waaʼinrüin kasa anasü. Jamüsüjaʼa süpüla miyoʼuinjatüin wanee maata, yooluwaisü wüin oʼyotunaka saaʼu, nnojotsü oʼyotunüin wüin miyoʼuin saaʼu. Müsia neʼe tü wakuwaʼipakat, eeshii süpüla waaʼinrüin kasa anasü, jaʼitairü müin malaacheinkai saaʼin wamüin tü wasülajakat.

Saashin tü Wiwüliakat yapainjanain waya süpüla aaʼinraa kasa anasü (2 Tim. 2:21; Tito 3:1). Jülüjale waaʼin tü alatakat namüin na waneinnua, watüjaajeerü aaʼu tü waaʼinrüinjatkat «süpüla katsüinjatüin tü nanoulakat» watuma (Roma 15:1, 2). Eesüjaʼa süpüla wasülajüin kasa namüin (Prov. 3:27). Eeshii süpüla wounejaain naya sünain ekawaa wepialuʼu, jaʼitairü shiain wanee mojukuʼu müsü. Eeshii süpüla wanaʼlaain namüin jee wayamaajüin na wawalayuukana ayuuire naya. Wainma kasa eeka süpüla waküjain namüin «süka pütchi analuʼut akaaliijüinjatkat naya sünain tü anasükat» (Éf. 4:29).

Washateein nukuwaʼipa Jeʼwaa sünain aaʼinraa kasa anasü sümüin wayuu maʼleekalia. Müsüjeseʼe nnojoluinjatüin koʼuin wakuwaʼipa sümüin wayuu. Wanee sukuwaʼipa süpüla waaʼinrüin tia, shia waküjale pütchi sümüin wayuu maʼleekalia. Naashin Jesuu, aaʼinrüinjana waya kasa anasü namüin na kanainkana aaʼin waya (Luc. 6:27). Nnojoishii malain kamaneere waya jee waaʼinrüle kasa anasü, süka jamüin, nnojoluin eein wanee kasa achiaajeenaka waya suulia waaʼinrüin tia (Gal. 5:22, 23, TNM). Müleka waaʼinrüle kasa anasü jaʼitasü apüleeruaanüin waaʼin jee weʼrüin müliaa, eeshii süpüla nanoujain na wayuukana jee naʼwaajüin Maleiwa wanaa wamaa (1 Ped. 3:16, 17).

Saashin tü Wiwüliakat eejeerü kasa anasü weʼraka müleka anamiale waya (Prov. 14:14). Eeshiijaʼa kojuteenale waya sümüin wayuu (Prov. 14:22). Jaʼitakajeʼe nnojoluin naaʼinrüin tia, eesü süpüla sütanalüin naaʼin ayatüle waaʼinrüin kasa anasü (Roma 12:20).

Wainmainna na wayuu ooʼulaakana suulia naaʼinrüin tü kasa mojusükat süpüleerua tü kasa anasükat. Anuu sünüiki Nancy: «Mojutpuʼusü kasa tamüin, yarüttapuʼusü takuwaʼipa otta nnojotpuʼusü kojutuin wayuu tamüin. Tekirajaapa süchiki tü kasa anakat naashin Maleiwa jee taaʼinrapa shia, talatüsü maʼin taaʼin. Anaitpa tü jülüjakat taaʼin tachiki».

Tü waaʼinrüinjatkat maʼin atuma kasa anasü shia süka talateerüin naaʼin Jeʼwaa watuma. Niʼrüin süpüshuaʼa tü kasa waaʼinrakat, jaʼitairü nnojoluin shiʼrüin wayuu. Nütüjaa aaʼu tü kasa anasü jülüjakat waaʼin otta tü kasa waaʼinreekalü amüin (Éf. 6:7, 8). ¿Kaseetka weʼrüin sünainjee? Saashin tü Wiwüliakat, «chi eekai anamiain anashi noʼuluʼu Jeʼwaa» (Prov. 12:2). Ayataʼaya waaʼinrüin kasa anasü. Naashin Jeʼwaa kojuteena nümüin «na wayuu aaʼinrakana tü anasükat» (Roma 2:10).