WEJIMA wetu twakeñaña kutuleja nawu twekala chiwahi. Ilaña chekala chakala kwikala muntu wamuwahi mukanu kaayi. Chikuma chimu chidi chakwila nawu antu amavulu hiyantu “abulaña kukeña yuma yayiwahi.” (2 Tim. 3:3) Akaanaña kulondela nshimbi jaYehova. Yuma yashimunayi nindi yayiwahi wena elaña nawu “yatama” nawa yuma yashimunayi nindi yatama, wena elaña nawu “yayiwahi.” (Isa. 5:20) Cheñi chatukalilaña kwikala chiwahi muloña wayuma yatumwekeneni kunyima nikwikala antu abula wanyi. Kufwana muhela Anne, * wunamukalakeli Yehova hadi yaaka yayivulu wahosheli nindi “chankalilaña kwiteja nami nateli kwikala muntu wamuwahi.”

Chuma chinasweji kuwaha chidi chakwila nawu wejima wetu tunateli kwikala antu amawahi. Chilwilu chakuwaha chafumaña kuspiritu yajila yaNzambi nawa spiritu yindi yabadika chuma chidi chejima chatunyeñumuka, chinateli kutukañesha kwikala nanichi chilwilu. Tudizenu kuwaha chikwekala nichitunateli kukumwekesha.

Kuwaha hichilwilu chakwikala chiwahi. Mwabombela kwikala nayilwilu yayiwahi, kubula kwikala nayilwilu yatama hela yatoka. Kuwaha kwamwekenaña muyuma yayiwahi yitwayililaña antu amakwawu. Muntu wamuwahi mpinji yejima wakwashaña akwawu.

Kwikala muntu wamuwahi hikwatalisha hohu mukwilila chisaka chenu hela amabwambu jenu yuma yayiwahiku. Hela chochu, bayi neyi twekalaña antu amawahi mpinji yejimaku, muloña Bayibolu yahosha nawu “hamaseki hihekala muntu waloña welaña chachiwahi, wabulaña kuvulumunaku.” (Mukwa. 7:20) Kapostolu Pawulu washimwini hatooka nindi: “Neluka nami mudi ami, dikwila nawu, mumujimba wami, mwekala chuma chachiwahi wanyi.” (Rom. 7:18) Chumichi chinamwekeshi hatooka nawu, hakwila nawu twikali nachilwilu chakuwaha twatela kudizila kudi Yehova, wukweti ichi chilwilu.

Yehova washaku nshimbi hayuma yayiwahi. Bayibolu yahosha kutalisha hadi yena nawu: “Eyi wumuwahi, welaña chachiwahi; nleji yidika yeyi.” (Mas. 119:68) Tuhanjekenu hayuma yiyedi yinashimuniwu muniyi vasi yinakumwekesha kuwaha kwaYehova.

Yehova himuwahi. Kuwaha hichilwilu chaYehova, dichi kwila yakañanya kwila yuma yayiwahi nehi. Talenu chuma chamwekeni mpinji yamulejeliwu Mosi kudi Yehova nindi: “Kuwaha kwami kwejima nukukuhitisha kumesu eyi.” Kulema kwaYehova nikuwaha kwindi chikwahitileña, Mosi watiyili awa mazu: “Yehova, Yehova Nzambi, wenzala nawushona, watoñaña antu, hazuwaña swayuku, wasweja niluwi, wavulisha ninsañu yalala; wahembaña luwi lwindi lwamakombakaji awantu, wayanakenaña nikuluwa, ninyiloña, ninshidi; hayiñishaña mukwakutanya nihantuku.” (Kwid. 33:19; 34:6, 7) Chumichi chinakumwekesha hatooka nawu Yehova himuwahi muyuma yejima. Hela chakwila Yesu wadiña muntu wamuwahi neyi chatela kwikala muntu wejima, wahosheli nindi “Kwosi muntu muwahiku, chiña Nzambi hohu.”—Luka 18:19.

 Nyidimu yaYehova yayiwahi. Yuma yejima yelañayi Yehova yayiwahi. “Yehova himuwahi kudi antu ejima; wushona windi wekala kunyidimu yindi yejima.” (Mas. 145:9) Kuwaha kwaYehova hikukweti chambuku, wenkaña antu wumi niyuma yejima yakeñañawu hakwila nawu ahandi. (Yil. 14:17) Wamwekeshaña kuwaha kwindi chatwanakenañayi. Ñimbi yamasamu wasonekeli nindi: “Eyi [Yehova] wumuwahi waanakenaña.” (Mas. 86:5) Twatela kukuhwelela netu ‘Yehova hakayibonda awa endaña choloka chuma chachiwahi nichimuku.’—Mas. 84:11.

Atuleña muchinfwana chaNzambi, dichi tunateli kwikala antu amawahi nikwila yuma yayiwahi. (Kutach. 1:27) Hela chochu Izu daNzambi dakonkomwenaña ambuña aNzambi nawu “dizenu kwila chachiwahi.” (Isa. 1:17) Tunateli kudiza ñahi kwila chachiwahi? Shinshikenu njila jisatu mutunateli kudizila kwila chachiwahi.

Chatachi, twatela kulomba spiritu yajila, yinateli kukwasha akwaKristu kwikala chachiwahi kumesu aYehova. (Ñal. 5:22) Spiritu yaNzambi yinateli kutukwasha kukeña yuma yayiwahi nakuhela yatama. (Rom. 12:9) Kafwampi Bayibolu yashimuna nawu Yehova nateli “kutukolesha chikupu munyidimu yejima yayiwahi nimumazu ejima.”—2 Tesa. 2:16, 17.

Chamuchiyedi, twatela kutaña Izu daNzambi donenawu. Neyi tutañaña izu daNzambi, Yehova nateli kutudizisha “mwesekena yuma, kafwampi njila jejima jajiwahi” nawa nateli kutuloñesha “chikupu kuzata nyidimu yayiwahi yejima.” (Yish. 2:9; 2 Tim. 3:17) Nyichima yetu yidi neyi chisweku mwakusha mali. Neyi tutañaña Bayibolu nikutoñojokahu chikupu, dikwila nawu tunakusha yuma yayiwahi mumuchima wetu, chidi neyi tunakwinzesha muchisweku chamali yuma yalema yikatukwasha kumbidi.—Luka 6:45; Efwes. 5:9.

Chamuchisatu, twazataña nañovu ‘Kwimbujola yuma yayiwahi.’ (3 Yow. 11) MuBayibolu mwekala antu itwatela kwimbujola. Antu atachi itwatela kwimbujola hiYehova niYesu. Ilaña twatela cheñi kwimbujola antu amakwawu adiña nayilwilu yayiwahi. Twatela kutoñojoka hadi Tabita naBaranaba. (Yil. 9:36; 11:22-24) Munateli kudizilaku yuma yayiwahi yahoshawu muBayibolu hadi wena. Hampinji yimunakudiza, shinshikenu yuma yeliliwu hakukwasha amakwawu. Toñojokenuña yuma yimwatela kwila kulonda mukwasheña amakwawu muchisaka chenu hela muchipompelu. Nawa toñojokenu hayuma yayiwahi yayimwekeneni aTabita naBaranaba hamuloña wakwikala chiwahi nawantu amakwawu. Neyi mutañaña nikutoñojoka hayakutalilahu yamuBayibolu mukafuma yayiwahi.

Twatela cheñi kutoñojoka hadi antu amakonu  akweti yilwilu yayiwahi. Chakutalilahu, toñojokenu hadi akulumpi adikitaña chikupu muchipompelu ‘akeña yuma yayiwahi.’ Toñojokenu cheñi hadi ahela ashinshika muyuma yahoshañawu niyelañawu yayileñelaña kwikala “ antañishi ayuma yayiwahi.” (Tit. 1:8; 2:3) Muhela Roslyn wahosheli nindi: “Ibwambu dami wadinkañaku kukwasha nikukolesha antu amakwawu muchipompelu. Watoñojokaña hakukala kukwetiwu nawa kakavulu wayinkañahu yawaana hela kuyikwasha muyuma yikwawu. Himuntu wamuwahi chikupu.”

Yehova walejaña antu jindi ‘kukeñakeña yayiwahi.’ (Amosa 5:14) Neyi tukeñakeña yuma yayiwahi, chikutukwasha kukeña nshimbi yindi nikufwila kwila yuma yayiwahi.

Kwikala antu amawahi hichatalisha mukwila nawu chiña tuyililaña antu yuma yamaneni hela kuyinka yuma yasweja wuseyaku. Neyi tuyikwashaña antu mutuyuma twanyanya, chikumwekesha nawu tudi antu amawahi.

Bayibolu yatukonkomwenaña kwikala ‘adiloñesha’ kwila yuma yayiwahi. (2 Tim. 2:21; Tit. 3:1) Neyi tushaku maana kuyuma yinakuyimwekena akwetu, chinateli kutukwasha kumona mutunateli kuyikwashila “nikuyikoñela yuma yayiwahi yakuyikolesha.” (Rom. 15:2) Chumichi munabombeli kuyinkahu yuma yitukweti. (Yish. 3:27) Twatela kuyitambika kulonda tudiili nawu hamu yakuda hela kudikolesha. Neyi kudi muntu wakata ituneluki, twatela kumuhempula, kumusonekela mukanda hela kumutemeshela foni. Kudi njila jayivulu mutunateli kuhoshela mazu “amawahi anateli kutuña [akwetu] hampinji yinakukeñawu kuyikwasha kulonda atweshi kuhetesha antiyilili.”—Efwes. 4:29.

Kufwana Yehova, twakeñaña kuyilila antu ejima yuma yayiwahi. Hitwayimwekeshelaña antu chaambuku. Njila yimu mutwabulilaña kumwekeshela chaambu hikushimwina nsañu yayiwahi yaWanta kudi antu ejima. Yesu watulejeli nindi twatela kuyilila antu yuma yayiwahi ninana atuhela. (Luka 6:27) Chatama wanyi kwikala naluwi nikuyilila antu amakwawu yuma yayiwahi, muloña “kwosi lushimbi lwalekeshaña yumiyiku.” (Ñal. 5:22, 23) Neyi twilaña yuma yayiwahi hela chakwila antu anakutwila chatama hela tunakukabakana, tunateli kukokola antu amakwawu muchalala nikumulemesha Nzambi.—1 Pet. 3:16, 17.

“[Muntu] muwahi wakatiya kuwaha nayindi yomweni.” (Yish. 14:14) Yumanyi yayiwahi yakafumamu? Neyi twikala chiwahi nawantu amakwawu, niwena anateli kutwilila yuma yayiwahi. (Yish. 14:22) Hela chakwila antu amakwawu anakutwila chatama, twatela kutwalekahu kuyilila yuma yayiwahi. Chikafumamu anateli kuhimpa yilwilu yawu yatama nakutachika kwila chachiwahi.—Rom. 12:20, tth.

Amanakwetu niahela amavulu ahoshaña nawu adiluñishaña chalekeliwu kwila yuma yatama nakutachika kwila yuma yayiwahi. Talenu chakutalilahu chaNancy. Wahosheli nindi: “Chinakulileña, nadiña nayilwilu yatama nawa nadiña nakavumbi wanyi. Ilaña chinatachikili kudiza nikuzatisha nshimbi yaNzambi yahosha hayuma yayiwahi, natachikili kwikala namuzañalu. Ichi nidi nakalemesha nawa nadilemesha ami aweni.”

Muloña waweni wutwatela kwikalila nachilwilu chakuwaha wudi wakwila nawu Yehova wazañalalaña. Hela chakwila antu amavulu amonaña wanyi yuma yitwelaña, Yehova wamonaña. Weluka yuma yayiwahi yejima yitwelaña niyitwatoñojokaña. (Efwes. 6:7, 8) Yumanyi yafumañamu? “Muntu muwahi wakawana wuselewa kudi Yehova.” (Yish. 12:2) Dichi tutwalekihu kwikala nachilwilu chakuwaha. Yehova washika nindi “muntu wejima wakoñaña yuma yayiwahi wakalema, akamulemesha nawa wakekala mukuwunda.”—Rom. 2:10.