FEFU ita, tatu omasi na lawaʼö wa yaʼita niha si sökhi. Hizaʼi iadaʼa, tenga saoha na tobali niha si sökhi. Sambua mbörönia yaʼia daʼö börö me ato niha ”si lö mangomasiʼö si sökhi”. (2 Tim. 3:3) Tola manö abölö omasi ira na yaʼira samösa zotatugöi hezo zatulö ba si lö atulö. Tola tamane wa ba dödöra ”si sökhi si lö sökhi” ba ”si lö sökhi si sökhi”. (Yes. 5:20) Tanö böʼönia wa abua khöda wamalua si sökhi börö me niha si lö moʼahonoa ita. Mazui, tedönisi lala wangera-ngerada börö zalua khöda ba zilalö. Tola manö tarasoi simane nirasoi dalifusöda ira alawe sotöi Anne, * si no mangai halöwö khö Yehowa ba zi hauga wulu fakhe. Imane, ”Te basaki tobali niha si sökhi ndraʼo.”

Hizaʼi, sindruhunia fefu ita tola tadouʼö ba wamalua si sökhi! Faʼasökhi no bua-bua geheha Lowalangi. Abölö geheha andrö moroi ba wondrönisi si lö sökhi nifalua niha böʼö mazui soʼamböta yaʼita. Datafaigi hadia geluahania faʼasökhi andrö ba hewisa wondrouʼöda yaʼia.

Faʼasökhi eluahania fandröndröu moroi ba waʼalösökhi hegöi si lö atulö. Niha si sökhi iʼokhögö gamuata si lö raʼiö ba sadölö tödö. Niha si sökhi hasambalö iʼalui lala ba wanolo niha böʼö, ba lö aetu ifalua zi sökhi.

Tola manö no irai öʼila niha samalua si sökhi ha ba nösi nomonia mazui ha khö nawönia. Hizaʼi sindruhunia tenga ha ba daʼö tafalua zi sökhi. Sindruhu sa, lö hadöi niha si tola mamalua faʼasökhi ero na falukha ia ba niha böʼö. Imane Sura Niʼamoniʼö, ”Löʼö sa niha satulö ba gulidanö solau si sökhi lö olalöwa.” (Zango. 7:20) Ifaduhuʼö samösa sinenge sotöi Faulo, ”Noa sa uʼila wa niha si lö moʼahonoa ndraʼo, lö manö si sökhi ba khögu.” (Rom. 7:18) Tobali na omasi ita tobali niha si sökhi, moguna tafomaha ita khö Yehowa, Umbu waʼasökhi.

Ha Lowalangi Yehowa zi tola moʼahonoa ba wangoromaʼö faʼasökhi. Imane Sura Niʼamoniʼö sanandrösa khö Yehowa, ”Si sökhi tödö ndraʼugö ba soböwö, fahaʼö ndraʼo ba gamakhoitamö andrö.” (Zin. 119:68) Datatutunö dombua ngawalö waʼasökhi Yehowa simane nitutunö ba ayati andrö.

Sökhi Yehowa. Tebai aheta moroi khö Yehowa waʼasökhi andrö. Fefu mbua-bua Yehowa moʼamakhaita ia ba waʼasökhinia. Angeragö hadia zalua me imane Yehowa khö Moze, ”Faʼasökhigu fefu ba ufatörö fönau.” Me iʼila Moze lakhömi Yehowa simane faʼasökhi, irongo Moze sangumaʼö, ”Yehowa, Lowalangi sahakhö tödö Yehowa ba si no ebua tödö, ba sebolo tödö ba si no fahöna faʼoböwö, awö wa lö faröi ia, sebua tödö ba ngahönö ngaʼötö ba sameʼe aefa sala ba olalöwa ba horö, ba löʼö sa tawaʼö, löʼö manö fotu.” (2 Moz. 33:19; 34:6, 7) Moroi ba daʼa taʼila wa sindruhu-ndruhu sökhi Yehowa. Me so Yesu ba gulidanö, yaʼia niha sabölö sökhi, hizaʼi imane, ”Lö si sökhi baero Lowalangi.”​—Luk. 18:19.

 Sökhi nifalua Yehowa. Oroma waʼasökhi Yehowa ba ngawalö nifaluania. ”Idozigö niha wangebua tödönia khöra, ba irugi niwöwöinia fefu faʼahakhö dödönia andrö.” (Zin. 145:9) Börö me sökhi Yehowa ba lö khönia waʼebua dödö zambuana, ibeʼe waʼauri ba niha fefu hegöi ba ngawalö hadia ia enaʼö tola auri ira. (Hal. 14:17) Oroma göi waʼasökhi Yehowa ba ginötö iʼefaʼö zalada. Imane samösa zanura sinunö, ”Me no si sökhi tödö ndraʼugö, ba me sebolo tödö.” (Zin. 86:5) Tola faduhu dödöda wa ”lö zi lö ibeʼe zi sökhi ba zanörö lala satulö”.​—Zin. 84:12.

Tola taʼoʼö duma-duma Yehowa börö me ifazökhi ita si fakhili-khili khönia. Daʼö mbörö wa tola tobali ita niha si sökhi ba tafalua ngawalö zi sökhi. (1 Moz. 1:27) Hizaʼi, moguna khöda wangodödögö ba wamalua daʼö. Andrö imane Yehowa, ”mifomaha ami ba wolau si sökhi”. (Yes. 1:17) Hewisa wamalua yaʼia? Datatutunö tölu ngawalö zi tola manolo yaʼita.

Si oföna, taʼandrö geheha niʼamoniʼö. Eheha niʼamoniʼö andrö tola itolo niha Keriso tobali niha si sökhi föna Lowalangi. (Gal. 5:22) Tola itolo ita eheha Lowalangi ba wangomasiʼö si sökhi ba tatimbagö zi lö sökhi. (Rom. 12:9) Baero daʼö iwaʼö Sura Niʼamoniʼö wa tola itolo ita Yehowa enaʼö lö mangiwa ita ’irege sökhi mbua-buada hegöi fehededa’.​—2 Tes. 2:16, 17.

Si dua, moguna tabaso Daromali Lowalangi. Ba ginötö tabaso Zura Niʼamoniʼö, ifahaʼö ita Yehowa ”awö fefu zinörö si sökhi” ba ifaʼanö ita ba ”halöwö si sökhi”. (Gamd. 2:9; 2 Tim. 3:17) Na tabaso Zura Niʼamoniʼö ba taʼangerönusi, no tafoʼösi ba dödöda ngawalö zi sökhi sanandrösa khö Yehowa hegöi somasi ia. So dania gunania khöda ngawalö zi sökhi si no tefaʼanö ba dödöda.​—Luk. 6:45; Ef. 5:9.

Si tölu, moguna khöda wamorege enaʼö ’taʼoʼö zi sökhi’. (3 Yoh. 11) Ba Zura Niʼamoniʼö so duma-duma si tola taʼoʼö. Tatu manö, duma-duma Yehowa hegöi Yesu zabölö sökhi. Hizaʼi tola göi taʼoʼö duma-duma niha si sökhi si so ba Zura Niʼamoniʼö. So darua niha si tola taʼangeragö yaʼia daʼö Tabita hegöi Baranaba. (Hal. 9:36; 11:22-24) Tandraigö fahaʼö ndraʼugö moroi ba duma-dumara si so ba Zura Niʼamoniʼö. Alui hadia manö zi no lafalua ba wanolo niha böʼö. Angeragö hadia manö zi tola öfalua ba wanolo ösi nomou mazui ira talifusö ba gangowuloa. Aefa daʼö, nehegö hadia mbua nitema Tabita hegöi Baranaba börö me no lafalua zi sökhi ba niha böʼö. Tola göi ötema mbua simane daʼö.

 Tola göi tafahaʼö ita ba duma-duma ndra talifusöda samalua si sökhi iadaʼa. Duma-dumania, angeragö ndra satua sokubaloi si no mangodödögö ba wohalöwö hegöi ”samahaʼö si sökhi”. (Tit. 1:8; 2:3) Imane samösa talifusöda sotöi Roslyn, ”Iʼodödögö awögu ba wanolo hegöi ba wangabölöʼö ira talifusöda ba gangowuloa. Iʼangeragö zalua khöra ba asese ibeʼe mbuala side-ide mazui ifalua zi tola möi fanolo khöra. Sindruhu-ndruhu niha si sökhi ia ba dödögu.”

Iʼandrö Yehowa khö nono mbanuania enaʼö ’laʼalui zi sökhi’. (Gamo. 5:14) Na tafalua daʼö, tola taʼomasiʼö hadia zi sökhi moloʼö Yehowa. Ba itugu terou dödöda ba wamalua hadia zi sökhi.

Enaʼö tobali ita niha si sökhi, lö moguna tafalua zi möi faʼahöli-höli dödö ba niha böʼö mazui ba wameʼe buala sebua böli. Angeragö duma-duma daʼa: Moloʼö yaʼugö, ba ginötö lafazökhi gambara, hadia moguna ba niha samazökhi gambara andrö ifagule ha sakali mazui dua kali kuas sebua? Löʼö. Hizaʼi, oya ifagule kuas side-ide ba wangaʼasogö gambara si sökhi. Simane daʼö göi, oya zi sökhi si tola tafalua ba niha böʼö ba wangoromaʼö faʼasökhi.

Iwaʼö Sura Niʼamoniʼö wa moguna ’tafalua’ hadia zi sökhi. (Tit. 3:1) Na tanehegö hadia zalua ba niha böʼö, tola taʼila hadia zinangea tafalua ba wanolo yaʼira hegöi ”tafalua zi sökhi ba wamarou tödöra”. (Rom. 15:2) Sambua zi tola tafalua yaʼia daʼö ba wameʼe hadia niʼokhögöda. (Gamd. 3:27) Duma-dumania, tola takaoni samösa niha ba wefao khöda manga mazui faoma tafarou dödö nawöda. Na taʼila so samösa niha sofökhö, tola tabeʼe khönia kartu ucapan, möi tafaigi ia, mazui tatelefo ia. Tola taʼalui lala ba wameʼe ’fehede si sökhi si möi famarou dödö na moguna, enaʼö ohahau dödö zamondrongo’.​—Ef. 4:29.

Simane Yehowa omasi tafalua zi sökhi ba niha fefu. Andrö böi so khöda waʼebua dödö zambuana. Lala sabölö sökhi ba woloʼö Yehowa yaʼia daʼö na taturiaigö duria si sökhi ba niha fefu. Simane niʼoroisi Yesu, omasi tafalua zi sökhi hewaʼae ba niha si fatuwu khöda. (Luk. 6:27) Lö fasala ba wamalua si sökhi mazui faʼasökhi ba niha böʼö, börö me ”lö hadöi oroisa solawa daʼö”. (Gal. 5:22, 23) Na tafalua zi sökhi hewaʼae oya gabula dödöda mazui lafalua khöda zi lö sökhi, tola manö tedönisi niha böʼö ba wamahaʼö yaʼira ba zindruhu ba lafolakhömi Lowalangi.​—1 Fet. 3:16, 17.

”Fangabuso niha si sökhi, ba bua-buania.” (Gamd. 14:14) Hadia manö mbua nitemada? Na tafalua zi sökhi ba niha böʼö, tola manö göi lafalua khöda zi sökhi. (Gamd. 14:22) Hewaʼae lö lafalua khöda zi sökhi niha böʼö, böi taböhöli ba wamalua khöra si sökhi. Buania, tola manö alulu dödöra ba itugu sökhi gamuatara khöda.​—Rom. 12:20.

Na tafalua zi sökhi ba taböhöli ba wamalua si lö sökhi, tola göi tatema mbuania. Ato ndra talifusöda si no morasoi samösa mbuania. Nehegö hadia zi no alua khö Nancy. Imane, ”Ulau-lau manö zomasi dödögu, asese ulau mohorö ba lö sökhi gamuatagu. Hizaʼi, me ufomahado ba zi sökhi moloʼö Lowalangi ba uʼoʼö ia, so khögu waʼomuso dödö. Iadaʼa lö laʼosiwawöi ndraʼo niha böʼö.”

Si oföna wa tadouʼö waʼasökhi yaʼia daʼö börö me omasi ita ba wangomusoiʼö dödö Yehowa. Hewaʼae lö ato niha sangila si sökhi si no tafalua, iʼila daʼö Yehowa. Iʼila fefu gamuatada hegöi era-erada si sökhi. (Ef. 6:7, 8) Hadia mbuania? ”Niha si sökhi tödö, ba isöndra waʼomasi Yehowa ia.” (Gamd. 12:2) Andrö wa böi taböhöli ba wondrouʼö faʼasökhi. No ifabuʼu Yehowa wa ”dozi niha samalua si sökhi, latema lakhömi, sumange ba faʼohahau dödö”.​—Rom. 2:10.