BURI omwe ahariitwe naaba naayenda ngu abandi bamureebe nk’omuntu murungi. Kwonka, okugira omutwarize ogw’oburungi tikyorobi obunaku obu. Ahabw’okuba abantu baingi ‘nibanga ebirungi.’ (2 Tim. 3:3) Nibabaasa kuba nibakuratira emiteekateekyere yaabo erikukwata aha kibi n’ekirungi, reero beete ‘ekibi ekirungi, n’ekirungi baakyete ekibi.’ (Isa. 5:20) Kandi twena nikitugumira kugira omutwarize gw’oburungi ahabw’ebi twarabiremu n’obutahikiirira bwaitu. N’ahabw’ekyo, nitubaasa kwehurira nka Anne, * n’obu araabe amazire emyaka mingi naaheereza Yehova, naagira ati: “Nikiingumira kwikiriza ngu nimbaasa kuba omuntu murungi.”

Ekirungi, twena nitubaasa kugira omutwarize gw’oburungi! Omwoyo gurikwera nigutuhwera kugira omutwarize ogu n’okusingura buri mbeera yoona egumire. Ka tushwijume eki oburungi kirikumanyisa, kandi tureebe n’oku turikubaasa kwongyera kworeka ngu twine omutwarize ogu.

Oburungi n’omutwarize ogurikutwariramu emicwe ehikire nari entwaza nungi, etarimu obubi nari obujunde. Omuntu murungi naateeraho kuhwera abandi, kandi naabakorera ebirikubagasira.

Noobaasa kuba oreebire ngu abantu abamwe nibakorera ebirungi ab’omu maka gaabo nari abanywani, kwonka shi oburungi nibugarukira aho? Amazima gari ngu, twine obugarukiro omu kworeka omutwarize ogu, ahakuba Baibuli neegira ngu “tihariho ohikiriire omu nsi okora gye atashiishe na kakye.” (Mub. 7:20) Entumwa Paulo akagira ati: “Nimmanya ngu omuriinye omu buntu bwangye tihabamu karungi koona.” (Rom. 7:18) N’ahabw’ekyo nikiba kiri eky’obwengye kwegyera ahari Yehova obukomooko bw’oburungi twaba nitwenda kugira omutwarize ogu.

Yehova Ruhanga naatuteeraho emitindo y’ekihikire. Baibuli neegira eti: “Ori murungi, kandi okora ebirungi; onyegyese ebiragiro ebi waataireho.” (Zab. 119:68) Ka tushwijume ebintu bibiri ebirikworeka oburungi bwa Yehova ebirikugambwaho omu runyiriri orwo.

Yehova ni murungi. Oburungi bwine akakwate n’emitwarize ya Yehova endiijo emikuru. Yetegyereze ekyabaireho obu Yehova yaagambira Musa ati: “Niinyija kurabya oburungi bwangye bwona omu maisho gaawe.” Yehova ku yaabaire naayoreka ekitiinisa kye, ekirikutwariramu oburungi bwe, Musa akahurira ebigambo ebirikugira ngu, Yehova, Yehova “Ruhanga ow’okusaasira n’embabazi, otarahuka kugira ekiniga, oijwire embabazi n’amazima, ogirira abantu embabazi enkumi n’enkumi, osaasira okutahikiirira n’okushiisha n’ekibi; otasingisiriza na kakye abaine orubanja.” (Kur. 33:19; 34:6, 7) Buzima eki nikyoreka butunu ngu Yehova ni murungi omu mitwarize ye yoona. N’obu Yesu araabe yaabaire ari eky’okureeberaho ky’oburungi ekirikukirayo, kwonka akagira ati: “Tihariho murungi, kureka omwe wenka, niwe Ruhanga.”​—Luk. 18:19.

Emirimo ya Yehova ni mirungi. Byona ebi Ruhanga arikukora ni birungi. Yehova “ni murungi ahari boona, kandi agira embabazi nyingi ahari byona ebi yaahangire.” (Zab. 145:9) Ahakuba Yehova  tarikushoroora omu kuha ebirungi, naaha abantu boona ebintu ebikuru kubaasa kuguma bahuriire. (Byak. 14:17) Kandi naayoreka oburungi bwe arikutusaasira. Omuhandiiki wa zaaburi akagira ati: “Ahabw’okuba Iwe [Yehova] ori murungi, orahuka kusaasira.” (Zab. 86:5) Nitubaasa kugira obuhame ngu Yehova ‘taine kirungi kyona eki arikwima abarikugyendera omu mazima.’​—Zab. 84:11.

Tukahangwa omu kishushani kya Ruhanga, n’ahabw’ekyo nitubaasa kuba barungi, kandi tukore ebirungi. (Kut. 1:27) Kwonka, Ekigambo kya Ruhanga nikihiga abaheereza be ‘kwega kukora kurungi.’ (Isa. 1:17) Kwonka nitubaasa kwega tuta kugira omutwarize ogu? Yetegyereze emiringo eshatu ei turikubaasa kukikoramu.

Ogw’okubanza, nitubaasa kushaba omwoyo gurikwera ahakuba niguhwera Abakristaayo kugira omutwarize gw’oburungi. (Gal. 5:22) Eego, omwoyo gurikwera nigutuhwera kukunda ekirungi tukanga ekibi. (Rom. 12:9) Nangwa, Baibuli neeyoreka ngu Yehova naabaasa kutugumya “omu mirimo yoona emirungi n’ebigambo byona ebirungi.”​—2 Tes. 2:16, 17.

Ogwa kabiri, twine kushoma Ekigambo kya Ruhanga. Twakishoma Yehova naatubaasisa kumanya “buri muhanda gwona omurungi,” ‘n’omurimo gwona omurungi.’ (Enf. 2:9; 2 Tim. 3:17) Twashoma Baibuli kandi tukateekateeka aha bi twashoma, nitwija kwijuza emitima yaitu ebintu birungi ebirikukwata ahari Ruhanga n’ekigyendererwa kye. Omu muringo ogwo nituba nitwongyera omu ibiikiro yaitu ery’ebintu ebirikwija kutuhwera bwanyima.​—Luk. 6:45; Efe. 5:9.

Ogwa kashatu, nituteeraho nk’oku turikubaasa ‘kutooreza abarikukora ebirungi.’ (3 Yoh. 11) Baibuli neegamba ahari bamwe abu turikubaasa kutooreza. Buzima, Yehova na Yesu nibo barikututeeraho eky’okureeberaho ekirikukirayo. Kwonka nitubaasa n’okutooreza abandi abaabaire nibamanywa ahabw’oburungi bwabo. Nitubaasa kuteekateeka ahari Tabisa na Barunaba. (Byak. 9:36; 11:22-24) Noobaasa kugasirwa waashwijuma gye ebirikubakwataho okeegyera aha miringo ei baahwerairemu abandi. Teekateeka n’aha ki orikubaasa kukora kuhwera bamwe abari omu ka yaawe nari omu kibiina. Kandi yetegyereze oku Tabisa na Barunaba baagasiirwe ahabw’okukorera abandi ebintu ebirungi. Niiwe noobaasa kugasirwa waatwaza nkabo.

Nitubaasa n’okuteekateeka aha bantu abarikukorera abandi ebirungi obunaku obu. Nk’eky’okureeberaho, teekateeka aha bareeberezi abeeziriki  omu kibiina, ‘abarikukunda oburungi.’ Kandi titurikwenda kwebwa na banyaanyazi-itwe abeesigwa abari eky’okureeberaho omu kugamba n’omu kukora kandi ‘abarikwegyesa ebirungi.’ (Tit. 1:8; 2:3) Munyaanyazi-itwe Roslyn naagira ati: “Munywani wangye naayefeerereza kuhwera abandi omu kibiina n’okubagumya. Naateekateeka aha mbeera ezi barimu kandi abaha ebiconco, nari abahwera omu miringo erikureebwa butunu. Ninteekateeka ngu buzima n’omutu murungi.”

Yehova naahiga abantu be ‘kusherura ebirungi.’ (Amo. 5:14) Twakora ekyo, titurikwija kukunda emitindo ye kyonka, beitu nitwija kugira n’ekihika ky’okukora ebirungi.

Kandi titushemereire kuteekateeka ngu okuba barungi twine kukorera abandi ebintu bihango nari kubaha eby’esente nyingi. Nk’eky’okureeberaho: Omuntu orikuhuuga ekishushani kirungi tarikukisiigaho erangi nyingi omurundi gumwe nari ebiri yonka. Omu mwanya gw’ekyo, naaguma naakisiiga erangi nkye emirundi mingi kuhitsya kyareebeka gye. Naitwe, omutwarize gw’oburungi nigubaasa kureebekyera omu bikorwa bikye bingi.

Baibuli neetuhiga ‘kwetebeekanisa’ nari ‘kweteekateeka’ kukora ebirungi. (2 Tim. 2:21; Tit. 3:1) Twateekateeka aha mbeera ezi abandi barimu, nitubaasa kumanya emiringo y’okubakorera ebirungi ebirikubombeka. (Rom. 15:2) Eki nikibaasa kutwariramu okubaha aha birungi ebi twine. (Enf. 3:27) Nitubaasa kutaayaayisa omuntu omu ka yaitu kurya nawe nari kugaaniira nawe. Twaba nitumanya omuntu orwaire, nitubaasa kumwoherereza kaada, kumutaayaayira nari kumuteerera esimu. Eego, nitubaasa kusherura emiringo y’okugambira abandi “ebirungi ebirikubaasa kwombeka abantu ahu bishemereire kugambirwa, bibone kuhaisa abarikubihurira omugisha.”​—Efe. 4:29.

Nka Yehova, nituteeraho kukorera abantu boona ebirungi. N’ahabw’ekyo titurikushoroora omu bantu. Omuringo mukuru ogw’okukora eki, n’okubuurira abantu boona amakuru marungi g’Obukama. Nk’oku Yesu yaaragiire nituteeraho kukorera gye n’abo abarikutwanga. (Luk 6:27) Ti kigwire kukorera abandi ebirungi n’okubagirira embabazi ahakuba “tihariho kiragiro ekirikubizibira.” (Gal. 5:22, 23) Twatwaza gye omu kuhakanisibwa nari okugyezibwa, nitubaasa kureetera abandi kukunda amazima, reero bahimbise Ruhanga.​—1 Pet. 3:16, 17.

‘Omuntu murungi naija kuhaagibwa ebyana by’ebi arikukora.’ (Enf. 14:14) Nitwija kutunga birungi ki? Twakorera gye abandi, obumwe nabo nibabaasa kututwariza gye. (Enf. 14:22) Kandi n’obu bakututwariza kubi, kwonka twagumizamu nitubakorera gye emiteekateekyere yaabo neebaasa kuhinduka batutwarize gye.​—Rom. 12:20.

Baingi nibagamba oku bagasirwe omu kukorera gye abandi, reero bakaruga omu muhanda mubi. Yetegyereze eky’okureeberaho kya Nancy. Naagira ati: “Nkakura ntarikufayo, ndikwejumba omu bikorwa by’obushambani, kandi ntarikuha abandi ekitiinisa. Kwonka ku naayegire kugyendera aha mitindo ya Ruhanga ey’oburungi, nkatandika kutunga okushemererwa. Hati nimpa abandi ekitiinisa kandi naanye niinyeha ekitiinisa.”

Enshonga enkuru erikutureetera kugira omutwarize gw’oburungi n’okugira ngu okukikora nikishemeza Yehova. N’obu abandi batarikureeba ebirungi ebi turikukora, kwonka Yehova we naabireeba. Naamanya ebikorwa byaitu ebirungi n’ebiteekateeko byaitu. (Efe. 6:7, 8) Ni migisha ei arikutuha? ‘Omuntu murungi naagira obushongore ahari’ Yehova. (Enf. 12:2) N’ahabw’ekyo ka tugumizemu nitworeka omutwarize gw’oburungi! Yehova naaraganisa ngu ‘oburungi n’ekitiinisa n’obusingye nibiija kuba aha muntu weena okora gye.’​—Rom. 2:10.