KUNGEKWEMVELO kutsi sonkhe sifune labanye basati njengebantfu labenta lokuhle. Nanobe kunjalo, kuba nebuntfu lobuhle kumatima kulesikhatsi salamuhla. Bantfu labanyenti ‘abakutsandzi lokuhle.’ (2 Thim. 3:3) Abatilandzeli timiso taJehova tekutiphatsa, ngobe “batsi lokubi kuhle, nalokuhle batsi kubi.” (Isa. 5:20) Kumatima kutsi sibe bantfu labahle ngesizatfu saloko lokwenteka ekuphileni kwetfu kanye nekutsi sinesono. Ngako singahle sitive njenga-Anne. * Ngisho nome asakhonte Jehova sikhatsi lesidze, utsi: “Ngikutfola kumatima kukholelwa kutsi ngingaba ngumuntfu lowenta lokuhle.”

Kuyajabulisa kwati kutsi sonkhe singakwenta lokuhle. Umoya longcwele usisita sibe nalobuntfu, futsi unemandla lamakhulu kunanobe ngutiphi tintfo nome bantfu labangasicindzetela. Ase sicoce ngekutsi buyini buhle, kanye nekutsi singakhombisa kanjani kutsi sibantfu labenta lokuhle.

Buhle buntfu lobusenta kutsi sente tintfo letinhle. Kufaka ekhatsi kutiphatsa lokuhle nalokuhlantekile, singenti tintfo letimbi noma letibolile. Buhle bubonakala kahle endleleni lesiphatsa ngayo labanye. Umuntfu lowenta lokuhle uhlale afuna tindlela tekusita labanye aphindze abentele tintfo letinhle.

Kute sibe bantfu labahle emehlweni aJehova akukeneli nje kutsi sentele imindeni yetfu nobe bangani tintfo letinhle. Kute umuntfu longenta tintfo letinhle ngaso sonkhe sikhatsi, kungako liBhayibheli litsi: “Kute nome munye umuntfu lolungile emhlabeni lowenta lokuhle kuphela, kubete lakonako.” (Shu. 7:20) Umphostoli Pawula watsi: “Ngiyati kutsi kimi, lokusho kutsi enyameni yami, kute lokuhle lokukhona.” (Rom. 7:18) Ngako kuyacaca kutsi kufanele sifundze kuJehova longumtfombo webuhle nangabe sifuna kuba bantfu labenta lokuhle.

Jehova Nkulunkulu usibekele timiso tekwenta lokuhle. Naku lokushiwo liBhayibheli ngaJehova: “Wena umuhle, konkhe lokwentako kuhle, ngifundzise timiso takho”. (Hla. 119:68) Ase sihlole tindlela letimbili Jehova lakhombisa ngato buhle bakhe letichazwe kulelivesi.

Jehova muhle. Jehova muhle futsi uhlale enta tintfo letinhle. Cabanga ngalokwenteka ngesikhatsi Jehova atsi kuMosi: “Ngitakwenta kutsi inkhatimulo yebuhle bami bendlule embikwakho.” Ngesikhatsi Jehova amkhombisa inkhatimulo yakhe, Mosi weva emavi latsi: “Simakadze, Simakadze, Nkulunkulu lonesihawu nemusa; uyephuta kutfukutsela andze ngemusa nangekwetsembeka, ubentela umusa labatinkhulungwane, atsetselele emaphutsa, nalokubi, netono. Kodvwa ngingeke ngihlale ngingamjezisi lonelicala.” (Eks. 33:19; 34:6, 7) Ngako kuyacaca kutsi Jehova muhle ngelizinga leliphelele. Nanobe Jesu asibekela sibonelo lesihle sekukhombisa buhle, watsi: “Kute umuntfu lomuhle ngaphandle kwaNkulunkulu.”—Luk. 18:19.

 Imisebenti yaJehova mihle. Tonkhe tintfo Jehova latentako tinhle. “Simakadze muhle kubo bonkhe, uyayihawukela imisebenti yakhe yonkhe.” (Hla. 145:9) Ngenca yekutsi Jehova muhle futsi akakhetsi, usinikete kuphila kanye naloko lesikudzingako kute sihlale siphilile. (Imis. 14:17) Buhle bakhe sibubona kahle nakasitsetselela tono tetfu. Umhlabeleli watsi: “Wena, Nkhosi, ulungile futsi ulungele kutsetselela.” (Hla. 86:5) Siyaciniseka kutsi Jehova “angeke abagodlele lutfo loluhle labo labahamba ngebucotfo embikwakhe.”—Hla. 84:11.

Ngenca yekutsi sadalwa saba ngumfanekiso waNkulunkulu, singakhona kwenta lokuhle futsi sibe nebuntfu lobuhle. (Gen. 1:27) Nanobe kunjalo, liVi laNkulunkulu likhutsata tinceku takhe kutsi ‘tifundze kwenta lokulungile.’ (Isa. 1:17) Yini lesingayenta kute sibe nebuntfu lobuhle? Ase sihlole tindlela letintsatfu tekwenta loko.

Kwekucala, singathantaza sicele umoya longcwele longasisita sibe nebuntfu lobuhle. (Gal. 5:22) Umoya waNkulunkulu ungasisita sifundze kutsandza lokuhle futsi sitondze lokubi. (Rom. 12:9) LiBhayibheli litsi Jehova ‘angasicinisa ngayo yonkhe imisebenti nemavi lamahle.’—2 Thes. 2:16, 17.

Kwesibili, kufanele sifundze liVi laNkulunkulu leliphefumulelwe. Nangabe senta njalo, Jehova angasicondzisa kute ‘sikwati lokufanele,’ futsi sikufanele kahle “kwenta yonkhe imisebenti lemihle.” (Taga 2:9; 2 Thim. 3:17) Nangabe sifundza liBhayibheli futsi sizindla ngaloko lesikufundzako, sitabubona kancono buhle baNkulunkulu kanye nentsandvo yakhe, futsi loko kutasisita esikhatsini lesitako.—Luk. 6:45; Ef. 5:9.

Kwesitsatfu, senta konkhe lesingakwenta kute ‘silingise lokuhle.’ (3 Joh. 11) EBhayibhelini sitfola tibonelo letinhle lesingatilingisa. Jehova naJesu batibonelo letinhle kakhulu. Ase sicoce ngaletinye tibonelo tebantfu lebebanebuntfu lobuhle. Ungahle ucabange ngesibonelo saThabitha nesaBhanabasi. (Imis. 9:36; 11:22-24) Singazuza kakhulu kuletibonelo nasidadisha loko liBhayibheli lelikushoko ngabo. Nawudadisha naka kutsi loko labakwenta kungabasita njani labanye. Cabangisisa ngekutsi yini longayenta kute usite labanye emndenini wakho kanye nasebandleni lokulo. Naka netintfo letinhle letenteka kuboThabitha naBhanabasi ngenca yetintfo letinhle lebebatentela labanye. Nakuwe kungenteka lokufanako.

Singacabangisisa nangetibonelo talamuhla tebantfu labenta lokuhle. Nasi sibonelo, cabanga ngalabadzala belibandla labasebenta futsi ‘labatsandza lokuhle.’ Kufanele  singabakhohlwa nabodzadze labatsembekile ‘labafundzisa lokuhle’ ngemavi nangetento tabo. (Thit. 1:8; 2:3) Dzadze lobitwa ngekutsi ngu Roslyn utsi: “Umngani wami uyatidzela kute asite labanye ebandleni futsi abakhutsate. Uyacabangisisa ngesimo labakuso futsi uvame kubapha tipho letincane aphindze abasite ngetintfo labatidzingako. Ngicabanga kutsi ungumuntfu lokahle kakhulu.”

Jehova ukhutsata bantfu bakhe kutsi ‘bafune lokuhle.’ (Amo. 5:14) Loko kutasisita sitsandze loko Jehova latsi kuhle, siphindze sitimisele kukwenta.

Akudzingeki kutsi size sente tintfo letinkhulu nobe siphe labanye tipho letidulile kute sibe bantfu labakahle. Ake ucabange nganangu umfanekiso: Ucabanga kutsi umdvwebi udzinga libhulashi linye yini nobe lamabili kute advwebe sitfombe lesihle? Cha, esikhundleni saloko udzinga emabhulashi lamanyenti lamancane kute sitfombe lasidvwebako sibe sihle. Ngendlela lefanako, tintfo letincane lesitentako kute sisite labanye tikhombisa kutsi sibantfu labakahle.

LiBhayibheli lisikhutsata kutsi “silungele” kwenta yonkhe imisebenti lemihle. (2 Thim. 2:21; Thit. 3:1) Nasikunaka loko lokwenteka kulabanye bantfu sitawukhona kubona tindlela tekujabulisa bomakhelwane betfu ‘ngetintfo letinhle futsi sibakhe’. (Rom. 15:2) Loko kufaka ekhatsi kupha labanye tintfo lesinato. (Taga 3:27) Singamema lotsite kutsi atodla natsi futsi sicitse sikhatsi ndzawonye. Nangabe sati kutsi kukhona logulako singaya siyomhlola, simshayele lucingo nobe simtfumelele umlayeto. Ecinisweni manyenti ematfuba lesingawatfola ekusho “loko lokulungele kwakha kuye ngesidzingo, kuze kuniketwe lokulusito kulabo labalalele.”—Ef. 4:29.

Sifuna kulingisa Jehova ngekutsi sente lokuhle kubo bonkhe bantfu. Nguleso sizatfu lesisenta siphatse bantfu ngekungakhetsi. Indlela lekahle kakhulu yekuphatsa bantfu ngekungakhetsi kutsi sishumayele tindzaba letimnandzi teMbuso kubo bonkhe bantfu. Njengobe Jehova asiyala, sifuna kwenta lokuhle ngisho nakubantfu labasenyanyako. (Luk. 6:27) Kuhlale kuyintfo lenhle kuba nemusa futsi sibentele lokuhle labanye, ngobe “kute umtsetfo lomelene” naloko. (Gal. 5:22, 23) Nasenta lokuhle ngisho nobe labanye basihlupha nobe basiphikisa, singakhona kubasita balati liciniso futsi badvumise Nkulunkulu.—1 Phet. 3:16, 17

‘Umuntfu lolungile naye wemukela umvuzo wemisebenti yakhe.’ (Taga 14:14) Ngumuphi umvuzo langawutfola ngemisebenti yakhe? Nasentela labanye tintfo letinhle, nabo batasiphatsa ngendlela lefanako. (Taga 14:22) Ngisho noma bantfu basiphatsa kabi, kufanele sichubeke sibentela lokuhle ngoba loko kungabenta bashintje futsi basiphatse kahle.—Rom. 12:20.

Siyazuza nasiyekela kwenta lokubi futsi sente lokuhle. Bazalwane kanye nabodzadze labanyenti bayavuma kutsi loko kuliciniso. Cabanga ngalokwenteka kuNancy. Utsi: “Nangikhula, bengilihlongandlebe, ngitiphatsa kabi futsi ngingahloniphi. Nobe kunjalo, ngajabula nangifundza timiso taNkulunkulu futsi ngitisebentisa. Nyalo sengiyatihlonipha.”

Sizatfu lesiyinhloko lesisenta silwele kuba bantfu labakahle kutsi sifuna kujabulisa Jehova. Jehova uyakubona lesikwentako ngisho nobe labanye bangakuboni. Utati tonkhe tintfo letinhle lesitentako nalesiticabangako. (Ef. 6:7, 8) Loko kuba namuphi umphumela? “Umuntfu lolungile uyemukeleka kuSimakadze.” (Taga 12:2) Ngako shengatsi singachubeka silwela kuba bantfu labakahle ngoba Jehova wetsembisa kutsi wonkhe “umuntfu lowenta lokuhle utawutfola inkhatimulo, ludvumo, nekuthula.”—Rom. 2:10.