GAJKHUN má rí xúgiáanʼ nandulú rí xa̱bu̱ mbuyulú rí ni̱ndxu̱lú mbáa xa̱bu̱ májánʼ a̱jkiu̱u̱n ga̱jma̱a̱ bi̱ naʼni rí jmbu. Mu matani rígi̱ rí mbiʼi xúgi̱, nindxu̱u̱ mingíjyúuʼ. Mbaʼin xa̱bu̱ tseni “rí májánʼ” (2 Tim. 3:3). Ikhiin kuwa runi dí nakumu̱ún rí nindxu̱u̱ májánʼ ga̱jma̱a̱ dí ra̱májánʼ, mu ikhiin nduyáá “rí májánʼ nindxu̱u̱ ra̱májánʼ ga̱jma̱a̱ dí ra̱májánʼ nindxu̱u̱ májánʼ” (Is. 5:20). Ga̱jma̱a̱ xúgiáanʼ nuʼni míjna ga̱jma̱a̱ rí xóo nikuwáanʼ nákha ginii ma̱ngaa rí ni̱ndxu̱lú xa̱bu̱ aʼkhá. Mbáa rígi̱ ma̱ndoo maʼni rí makumulúʼ xóo mbáa ndxájulú bi̱ mbayuuʼ tsiguʼ má xtáa raʼni ñajuunʼ Jeobá, ikhaa naʼthí: “Naʼniuʼ mingíjyúuʼ manimbo̱ʼ rí ma̱ndoo mani̱ndxu̱ʼ mbáa xa̱bu̱ májaanʼ”.

Rí phú májánʼ nindxu̱u̱, rí ma̱ndoo maguaʼdáá cualidad rígi̱ rí manindxu̱lúʼ mbáa xa̱bu̱ májánʼ a̱jkiu̱u̱n. Cualidad rígi̱ nindxu̱u̱ mbá rí na̱ʼkha̱ náa xi̱ʼ kaʼwu ndrígóo Dios, gíʼdoo itháán tsiakii ki xóo rí narikulú mu xúʼni̱. Mbuyáá ndiéjunʼ eyoo gáthu̱u̱n rí ma̱nindxa̱a̱ʼ mbáa xa̱bu̱ májánʼ a̱jkiu̱u̱n ga̱jma̱a̱ xóo gúʼni mu musngajmá rí ni̱ndxu̱lú mbáa xa̱bu̱ májánʼ a̱jkiu̱u̱n.

I̱ndó xa̱bu̱ míjiinʼ nusngajma rí guáʼdáá mbá a̱jkiu̱ún májánʼ, ga̱jma̱a̱ ikhiin tséni dí ra̱májánʼ nunimíjna̱ muni rí jmbu. Ga̱jma̱a̱ xa̱bu̱ bi̱ nindxu̱u̱ xúgi̱ kaʼnii ndayáʼ má xúʼko̱ rí mambáñún eʼwíínʼ.

Mbáa ikháanʼ nuniʼniúún tikhun xa̱bu̱ bi̱ nuni rí májánʼ má xúʼko̱ ga̱jma̱a̱ numún bi̱ kúwi̱i̱n náa guʼwún ga̱jma̱a̱ bi̱ nambáxu̱u̱n gajmiún. Mú, xa̱bu̱ bi̱ nindxu̱u̱ májaanʼ náa inuu Dios ikhaa tséniñuuʼ raʼni rí májánʼ. Gajkhun má rí xáʼngulú gúʼni xó má gíʼmaa, numuu rí náa Biblia má naʼthí rí “numuu rí nda̱wa̱a̱ náa tsu̱du̱u̱ ku̱ba̱ʼ xa̱bu̱ jmbii bi̱ maʼni má xúʼko̱ rí májánʼ ga̱jma̱a̱ xakiéʼkúun” (Ecl. 7:20). Apóstol Pablo ma̱ngaa niʼthí: “Numuu rí nda̱yo̱o̱ rí náa ikhúúnʼ, xóo muʼthá, náa xuyuuʼ, na̱nguá rígá rí májánʼ” (Rom. 7:18). Á mu nandulú maguaʼdáá cualidad rígi̱, ginii mbaʼyóoʼ mbuʼyáá xkri̱da ndrígóo Jeobá, náa na̱ʼkha̱ cualidad rígi̱.

I̱ndó Jeobá nindxu̱u̱ bi̱ ma̱ndoo maʼthí ndiéjunʼ rí nindxu̱u̱ májánʼ. Mbáa bi̱ niʼnirámáʼ salmo niʼthí: “Ikháán nindxa̱a̱ʼ májaanʼ ga̱jma̱a̱ natani rí májánʼ. Arasngóʼ xtángoo ndrígaaʼ” (Sal. 119:68). Guʼyáá a̱jma̱ rí naʼthí náa versículo rígi̱ rí Dios nindxu̱u̱ májaanʼ.

Jeobá nindxu̱u̱ májaanʼ. Mbá rí xóo nindxu̱u̱ Jeobá rí ikhaa nindxu̱u̱ májaanʼ wéñuʼ. Guʼyáá rí nirígá índo̱ ikhaa niʼthúu̱n Moisés: ‹Ikhúún mínuʼ gáni rí xúgíʼ rí májánʼ xóo ni̱ndxu̱ʼ manújngoo náa inaaʼ›. Índo̱ xtáa ranújngoo tsiakii ndrígóo Dios, Moisés niʼdxuun ajngáa rígi̱: “Jeobá, Jeobá, mbáa Dios bi̱ naʼni mba̱a̱ a̱jkiu̱u̱n, ga̱jma̱a̱ nagáwiinʼ a̱jkiu̱u̱n, na̱nguá kiʼnáa nacha̱ ga̱jma̱a̱ ra̱ʼkhá tháán eyoo kaʼyulúʼ ga̱jma̱a̱ gajkuwiin, bi̱ nasngájma dí ra̱ʼkhá tháán eyoo kaʼñún mbaʼin wéñuʼ xa̱bu̱, naʼni mba̱a̱ a̱jkiu̱u̱n índo̱ nakiéʼkhun ga̱jma̱a̱ índo̱ tsenimbánii mbá xtángoo ga̱jma̱a̱ nuxuda̱mi̱jna̱ aʼkhá, mú maxnúu castigo bi̱ gíʼdoo aʼkhúun” (Éx. 33:19; 34:6, 7). Rígi̱ naʼni mbuʼyáá rí xúgíʼ xóo nindxu̱u̱ Jeobá nindxu̱u̱ májaanʼ wéñuʼ. Índo̱ Jesús nixtáa náa tsu̱du̱u̱ Ku̱ba̱ʼ xóo mbáa xa̱bu̱ numbaaʼ, ikhaa ma̱ngaa ninindxu̱u̱ májaanʼ. Maski ajndu xúʼko̱,  ikhaa niʼthí: ‹Nimbáa na̱nguá nindxu̱u̱ májaanʼ i̱ndó Dios› (Luc. 18:19).

Jeobá naʼni rí májánʼ. Rí májánʼ a̱jkiu̱u̱n Dios nakujmaa náa xúgíʼ rí naʼni. Náa Biblia naʼthí: “Jeobá nindxu̱u̱ májaanʼ gajmii xúgínʼ, ga̱jma̱a̱ rí nagáwiinʼ a̱jkiu̱u̱n nakujmaa náa xúgíʼ rí niʼni” (Sal. 145:9). Mbá, náa nasngájma rí Jeobá nindxu̱u̱ májaanʼ índo̱ ikhaa tsiraʼwíin xa̱bu̱ ga̱jma̱a̱ xúgínʼ naxnún rí ndañúunʼ mu ma̱ndoo makuwá (Hech. 14:17). Ma̱ngaa nasngájma rí ikhaa nindxu̱u̱ májaanʼ índo̱ naʼni mba̱a̱ a̱jkiu̱u̱n kaʼyulú. Bi̱ niʼnirámáʼ salmo niʼthí: “Numuu rí ikháánʼ Jeobá, májánʼ a̱jkia̱nʼ ga̱jma̱a̱ xtaa xawii mu matani mba̱a̱ a̱jkia̱nʼ” (Sal. 86:5). Ma̱ndoo makuwáanʼ gajkhun rí “Jeobá xariya kaʼñúnʼ rí májánʼ bi̱ nuni rí jmbu” (Sal. 84:11).

Numuu rí Jeobá niʼniáanʼ xó má kaʼnii ikhaa, ikha jngó ma̱ndoo manindxu̱lúʼ mbáa xa̱bu̱ májánʼ a̱jkiu̱u̱n ga̱jma̱a̱ muʼni rí májánʼ (Gén. 1:27). Ma̱ngaa náa Biblia naʼthúlúʼ rí: ‹Gajmañala muni rí májánʼ› (Is. 1:17). Guʼyáá ajtsú enii rí xóo kaʼnii ma̱ndoo muʼni mu manindxu̱lúʼ mbáa xa̱bu̱ májaanʼ.

Timbá, guʼtájkáan mu munda̱ʼa̱a̱ xi̱ʼ kaʼwu, rígi̱ ma̱ndoo mambáyulúʼ mu manindxu̱lúʼ mbáa xa̱bu̱ májánʼ náa iduu Dios (Gál. 5:22). Numuu rí xi̱ʼ ndrígóo Dios maʼni rí maʼndulú kuʼyáá rí májánʼ ga̱jma̱a̱ maguiyulúʼ kuʼyáá dí ra̱májánʼ (Rom. 12:9). Ma̱ngaa náa Biblia naʼthúlúʼ rí Jeobá maʼni ‹maguajún jmbu náa xúgíʼ rí májánʼ rí nuʼni ga̱jma̱a̱ rí nuʼthá› (2 Tes. 2:16, 17).

Rí maʼni a̱jma̱, gíʼmaa muraxnuu Ajngá rawuunʼ ikhaa. Índo̱ nuʼni, Jeobá naʼsngúlú ‹xú kaʼnii nindxu̱u̱ xúgíʼ rí májánʼ› ga̱jma̱a̱ naʼni ratáánʼ mu muʼni “xúgíʼ enii rí májánʼ” (Prov. 2:9; 2 Tim. 3:17). Índo̱ nuraxnuu Ajngáa rawuunʼ ga̱jma̱a̱ nundxa̱ʼwa̱míjna̱ rí naʼthí ikhí, nuʼni majtíí náa a̱jkiu̱lú xúgíʼ rí gíʼdoo numuu rí na̱ʼkha̱ náa Dios. Rígi̱ na̱jkha̱nú nanindxu̱u̱ mbá rí gíʼdoo wéñuʼ numuu rí ma̱ndoo mambáyulúʼ índo̱ gáʼyóoʼ (Luc. 6:45; Efes. 5:9).

Rí maʼni ajtsú, gíʼmaa mbuʼyaridáá “rí májánʼ” (3 Juan 11). Náa Biblia, nuxkamaa xkri̱da ndrígu̱ún xa̱bu̱ bi̱ májánʼ a̱jkiu̱ún rí ma̱ndoo mbuʼyaridáá. Gajkhun má rí xkri̱da ndrígóo Jeobá ga̱jma̱a̱ Jesús nindxu̱u̱ itháan májánʼ. Mú, ma̱ngaa rígá xkri̱da rí nagájnuriyooʼ. Mbá rí ikhaa nindxu̱u̱ ndrígóo Tabita ga̱jma̱a̱ Bernabé (Hech. 9:36; 11:22-24). Ikha jngó májánʼ gaʼni rí mbuʼyáá rí naʼthí náa Biblia ga̱jma̱a̱ numún ikhiin mu xúʼko̱ mangáán mbuʼyáá xóo gumbáʼñúún eʼwíínʼ, xóo bi̱ kúwi̱i̱n náa guʼwúlú ga̱jma̱a̱ náa guʼwá nagimbáanʼ. Ga̱jma̱a̱ numuu rí májánʼ dí nini a̱jmi̱i̱n cristianos bugi̱ niguma tsajkuramíinʼ wéñuʼ. Mangáán ma̱ndoo maguaʼníí xúʼko̱ kaʼnii.

 Ma̱ngaa ma̱ndoo mundxaʼwamíjná náa a̱ngiu̱lú bi̱ nuniu̱nʼ rí májánʼ eʼwíínʼ. Mbá xkri̱da, a̱ngiu̱lú bi̱ nuyegun edxu̱u̱ náa guʼwá nagimbáanʼ nuñajunʼ gakhi̱i̱ ga̱jma̱a̱ numún eʼwíínʼ ma̱ngaa nanigu̱u̱nʼ muni dí májánʼ. Xúʼko̱ má a̱ngiu̱lú gu̱ʼu̱ bi̱ guájun jmbu bi̱ ‹nuni rí májánʼ› (Tito 1:8; 2:3). Mbáa ndxájulú bi̱ mbiʼyuu Roslyn naʼthí: “Gúʼdaa mbáa bi̱ nambáxuʼ ga̱jmu̱ʼ bi̱ nambáñun a̱ngiu̱lú náa guʼwáaʼ nagimbáanʼ ga̱jma̱a̱ naxnúún tsiakii. Ikhaa nandxaʼwámínaʼ xóo kúwi̱i̱n ga̱jma̱a̱ ndayáʼ xóo mambáñún. Ikhaa nindxu̱u̱ mbáa májaanʼ xa̱bu̱”.

Jeobá naʼthúún xa̱bi̱i̱ ‹guʼyáʼ rí májánʼ› (Amós 5:14). Á mu nuʼni rígi̱, raʼkháa i̱ndó maʼndulú kuʼyáá xtángoo ndrígóo, ma̱ngaa maxkaxáánʼ muʼni rí nindxu̱u̱ májánʼ náa iduu ikhaa.

Ma̱ngaa rí manindxu̱lúʼ mbáa xa̱bu̱ májánʼ a̱jkiu̱u̱n tséyóoʼ má muni rí mingíjyúuʼ wéñuʼ. Guʼgíʼ mbá xkri̱da. Índo̱ ikháán nuʼdu mbá planta raʼkháa mbá miʼtsu nuxiʼñáʼ mba̱ji̱nʼ wéñuʼ iyaʼ rí phú nuʼni nindxu̱u̱ rí chíʼgíiʼ nuxiʼñá mámbá mbiʼi xóo má eyóoʼ. Ikha má kayuʼ rí manindxu̱lúʼ mbáa xa̱bu̱ májánʼ a̱jkiu̱u̱n raʼkháa mbá miʼtsu guʼni rí májánʼ, gíʼmaa muʼni mámbá mbiʼi xóo má eʼngo̱o̱.

Náa Biblia naʼthí rí xúgiáanʼ gíʼmaa makuwáanʼ xawii mu muʼni rí májánʼ (2 Tim. 2:21; Tito 3:1). Á mu kuwáanʼ xawii mbuʼyáá rí nagíʼnuu ndxájulú, xáʼniulu mingíjyúuʼ mbuʼyáá xóo gándoo muʼni “rí mambáyúu ikhaa” (Rom. 15:2). Rígi̱ nandoo gaʼthí dí muxná rí kuaʼdáá (Prov. 3:27). Mbáa ma̱ndoo muʼthán rí mu̱ʼgua̱ gajmiúlú pasia o rí muphiʼtsu gajmiúlú. Lá nuniʼniiʼ mbáa bi̱ naʼniuu nandii ráʼ. Ma̱ndoo muxuʼmá náa inuu mbá i̱yi̱i̱ʼ o mbá mensaje, mu̱ʼgua̱ guʼyáálú o muʼtáraʼa ga̱jma̱a̱ teléfono. Xúʼko̱, rígá mbaʼa wéñuʼ enii xóo mumbaʼñún mu xúgíʼ rí gúʼni “ganindxu̱u̱ májánʼ dí mayambáá índo̱ ndayóoʼ, mu maʼniún dí májánʼ bi̱ gudxawíín” (Efes. 4:29).

Xó má Jeobá, nandulú muʼniu̱u̱n rí májánʼ xúgíinʼ xa̱bu̱. Ikha jngó nandulú kuñún xúgínʼ. Mbá rí xóo nuʼni nindxu̱u̱ índo̱ na̱jkua̱ kuʼyúlú ajngáa ndrígóo Reino. Xóo má Jesús niʼthúluʼ muʼni, nuʼnimíjna̱ muʼniu̱u̱n rí májánʼ asndu bi̱ tsíñún gúyúlú (Luc. 6:27). Á mu ni̱ndxu̱lú mbáa xa̱bu̱ májánʼ xúʼni̱ dí ra̱májánʼ numuu rí “nda̱a̱ nimbá xtángoo rí mariʼkhuu rígi̱” (Gál. 5:22, 23). Á mu nuʼni rí májánʼ maski ajndu mbaʼin tsíñún gúyúlú o á mu narígá xkujndu, xa̱bu̱ maguwáʼ náa rí gajkhun ga̱jma̱a̱ muʼni mba̱a̱ Dios (1 Ped. 3:16, 17).

Náa Biblia naʼthí rí ‹xa̱bu̱ májaanʼ› magruígú xóo má ‹rí naʼni› (Prov. 14:14). Xú kaʼnii rí májánʼ mundrígú rá. Nindxu̱u̱ rí xa̱bu̱ muniulúʼ rí májánʼ (Prov. 14:22). Maski ajndu xa̱bu̱ xúni̱, mu á mu ikháánʼ ni̱ndxu̱lú xa̱bu̱ májaanʼ mbáa asndu ikhiin maʼni rí mani̱ndxu̱ún míjiinʼ (Rom. 12:20).

Mbaʼin nuthi rí nimbañúún wéñuʼ rí niniña̱a̱ʼ runi dí ra̱májánʼ. Guʼyáá rí nigiʼnuu Nancy. Ikhaa naʼthí: “Ninindxu̱ʼ mbáa xa̱bu̱ bi̱ ndaʼyoo rí nimbá na̱nguá gíʼdoo numuu, tséni̱ rí májánʼ ga̱jma̱a̱ nimbáa tséʼyamajkhuu. Mú, índo̱ niniʼnúunʼ xtángoo ndrígóo Dios ikhú ndi̱yo̱o̱ ndiéjunʼ nindxu̱u̱ rí májánʼ ga̱jma̱a̱ nigíminaʼ manimbánuu, rúʼko̱ niʼni rí maxtáá gagi. Rí xúgi̱ nani rí májánʼ ma̱ngaa rí nandoʼ kayamínaʼ”.

Rí itháán gíʼdoo numuu rí ndayóoʼ manindxu̱lúʼ mbáa xa̱bu̱ májánʼ a̱jkiu̱u̱n, numuu rí xúʼko̱ nuʼni maxtáa gagi Jeobá. Ikhaa ndaʼyoo rí nuʼni, maski ajndu mbaʼin tséyáá. Ikhaa ndaʼyoo rí nundxaʼwamíjná ga̱jma̱a̱ rí nuʼni (Efes. 6:7, 8). ‹Xa̱bu̱ bi̱ nindxu̱u̱ májánʼ Jeobá nandoo kaʼyoo› (Prov. 12:2). Ikha jngó guʼni míjna manindxu̱lúʼ mbáa xa̱bu̱ májánʼ a̱jkiu̱u̱n. Jeobá naʼthí rí ‹maguma mba̱a̱, makánáá gamajkhu ga̱jma̱a̱ tsímáá maguaʼdáá xúgínʼ bi̱ nuni rí májánʼ› (Rom. 2:10).