ITA hotu hakarak ema seluk atu hanoin katak ita ema diʼak. Maibé, la fasil atu hatudu hahalok diʼak ohin loron. Ema barak “la hadomi buat neʼebé diʼak”. (2 Tim 3:3) Karik sira halo tuir deʼit sira-nia hanoin kona-ba buat neʼebé diʼak no aat, neʼe hanesan sira dehan: “Buat diʼak mak aat no buat aat mak diʼak.” (Isa 5:20) No ita la perfeitu no mós ita hotu luta hasoru toman uluk nian. Tan neʼe, karik ita sente hanesan Anne, * neʼebé serbí Jeová ba tinan barak ona. Nia dehan: “Susar tebes ba haʼu atu fiar katak haʼu bele sai ema diʼak.”

Maibé, ita hotu bele haburas hahalok diʼak! Neʼe mak hahalok neʼebé mai husi Maromak nia espíritu santu, no ninia espíritu iha forsa boot liu fali mundu nia influénsia, ema neʼebé haleʼu ita ka ita rasik nia fraku sira. Mai ita aprende kona-ba hahalok diʼak no oinsá ita bele hatudu liután hahalok neʼe.

Hahalok diʼak katak iha morál diʼak, la iha buat aat ka foʼer ida. Ema neʼebé diʼak sempre buka dalan atu ajuda ema seluk no halo buat diʼak ba sira.

Ema balu prontu atu halo buat diʼak ba sira-nia família no kolega, maibé neʼe la dehan katak sira mak ema diʼak tuir Jeová nia haree. Tuir loloos, susar atu hatudu hahalok neʼe, tanba Bíblia dehan katak “la iha ema laran-loos ida iha rai neʼebé sempre halo deʼit buat diʼak no nunka halo sala”. (Ecle 7:20) Apóstolu Paulo rekoñese kona-ba neʼe, hodi dehan: “Haʼu hatene katak haʼu mak ema deʼit, no la iha buat diʼak ida mak iha haʼu-nia isin.” (Rom 7:18) Tan neʼe se ita hakarak haburas hahalok diʼak, ita tenke aprende husi Jeová.

Jeová mak deside kona-ba buat neʼebé diʼak. Bíblia dehan: “Ita mak diʼak no buat neʼebé Ita halo mak diʼak. Favór ida, hanorin haʼu Ita-nia ukun-fuan sira.” (Sal 119:68) Mai ita hanoin kona-ba pontu rua husi Jeová nia hahalok diʼak neʼebé temi iha versíkulu neʼe.

Jeová mak diʼak. Ninia hahalok hotu liga ho ninia hahalok diʼak. Hanoin toʼok saida mak akontese bainhira Jeová dehan ba Moisés “haʼu sei halo ó haree haʼu-nia hahalok diʼak hotu”. Kuandu Jeová hatudu sai ninia glória, inklui ninia hahalok diʼak, Moisés rona lian neʼebé dehan: “Jeová, Jeová, Maromak neʼebé laran-sadiʼa no laran-diʼak, la hirus lalais no nakonu ho domin neʼebé laran-metin no lia-loos, Maromak neʼebé hatudu domin neʼebé laran-metin ba ema rihun ba rihun, fó perdua ba sala sira no ba hahalok kontra lei no hahalok aat, maibé nia sei fó duni kastigu ba ema neʼebé halo sala.” (Éx 33:19; 34:6, 7) Neʼe hatudu ho klaru katak Jeová mak diʼak iha buat hotu. Maski Jesus mak diʼak liu hotu, maibé nia dehan: “La iha ema ida mak diʼak, só Maromak mesak deʼit mak diʼak.”—Lc 18:19.

 Buat neʼebé Jeová halo mak diʼak. Jeová nia serbisu hotu hatudu katak nia diʼak. “Jeová hatudu laran-diʼak ba kriatura hotu, no buat hotu neʼebé nia halo fó prova kona-ba ninia laran-sadiʼa.” (Sal 145:9) Jeová la todan ba sorin bainhira nia hatudu hahalok diʼak, nia fó moris no buat hotu neʼebé ema presiza atu kontinua moris. (Após 14:17) Nia mós hatudu hahalok diʼak hodi fó perdua ba ita. Salmo ida dehan: “Ita, oh Jeová, Ita mak diʼak no prontu atu fó perdua.” (Sal 86:5) Ita bele fiar katak “Jeová sei la hanetik buat diʼak ida ba sira neʼebé laʼo ho laran-metin”.—Sal 84:11.

Maromak kria ita tuir ninia ilas, tan neʼe ita iha kbiit atu sai ema diʼak no halo buat diʼak. (Gén 1:27) Maski nuneʼe, Maromak nia Liafuan anima ninia atan sira “aprende atu halo buat diʼak”. (Isa 1:17) Saida mak bele ajuda ita atu hatudu hahalok diʼak? Mai ita haree dalan tolu.

Primeiru, ita bele halo orasaun hodi husu espíritu santu. Espíritu neʼe bele ajuda ita atu hatudu hahalok diʼak tuir Maromak nia haree. (Gal 5:22) Sin, Maromak nia espíritu bele ajuda ita atu hadomi buat neʼebé diʼak no odi buat neʼebé aat. (Rom 12:9) Bíblia hatete katak Jeová bele ‘hametin ita atu bele koʼalia no halo buat hotu neʼebé diʼak’.—2 Tes 2:16, 17.

Segundu, ita tenke lee Maromak nia Liafuan. Bainhira ita lee, Jeová bele hanorin ita atu “komprende kona-ba buat diʼak hotu” no “sai prontu hodi halo serbisu diʼak hotu”. (Prov 2:9; 2 Tim 3:17) Kuandu ita lee no medita kona-ba Bíblia, ita rai hela buat diʼak kona-ba Maromak no ninia hakarak iha ita-nia laran, no neʼe bele ajuda ita iha futuru.—Lc 6:45; Éf 5:9.

Terseiru, ita hakaʼas an atu “halo tuir hahalok neʼebé diʼak”. (3 João 11) Ita bele halo tuir ezemplu sira husi Bíblia. Ezemplu diʼak liu hotu mak Jeová no Jesus. Maibé ita mós bele aprende husi ema seluk neʼebé hatudu hahalok diʼak. Ema naʼin-rua mak Tabita no Barnabé. (Após 9:36; 11:22-24) Ita bele hetan benefísiu hodi estuda sira-nia istória no dalan neʼebé sira ajuda ema seluk. Hanoin kona-ba oinsá Ita bele ajuda ema iha Ita-nia família ka kongregasaun. No mós hanoin kona-ba benefísiu neʼebé Tabita no Barnabé hetan tanba hatudu hahalok diʼak. Ita mós bele hetan benefísiu neʼebé hanesan.

 Ita mós bele hanoin kona-ba ema nia ezemplu ohin loron. Porezemplu, hanoin kona-ba katuas kongregasaun sira neʼebé serbisu makaʼas no “hadomi buat diʼak”. No mós hanoin kona-ba irmán laran-metin sira neʼebé “sai mestra ba buat neʼebé diʼak” liuhusi sira-nia liafuan no hahalok. (Tito 1:8; 2:3) Irmán ida naran Roslyn dehan: “Haʼu-nia belun hakaʼas an atu ajuda no anima ema seluk iha kongregasaun. Nia hanoin kona-ba sira-nia situasaun no fó prezente kiʼik ruma ka fó ajuda tuir sira-nia presiza. Haʼu hanoin nia mak ema diʼak duni.”

Jeová anima ninia povu atu “buka buat neʼebé diʼak”. (Amós 5:14) Halo nuneʼe, sei ajuda ita atu hadomi Jeová nia prinsípiu sira no mós book ita atu halo buat diʼak.

Atu hatudu hahalok diʼak, ita la presiza halo buat neʼebé boot ka fó prezente neʼebé karun. Hanoin toʼok ai-knanoik tuirmai: Tuir Ita-nia hanoin, se Ita kuda ai-funan, Ita la rega dala ida deʼit hodi nia sai buras, maibé tenke rega beibeik, loos ka lae? Nuneʼe mós se ita halo buat diʼak oioin hodi ajuda ema, neʼe sei hatudu katak ita ema diʼak.

Bíblia anima ita atu “prepara” no “sai prontu” atu halo hahalok diʼak. (2 Tim 2:21; Tito 3:1) Se ita tau atensaun ba ema nia situasaun, karik ita bele hatene dalan “atu fó ksolok ba ita-nia maluk tanba ninia diʼak, atu hametin nia”. (Rom 15:2) Karik neʼe inklui fó buat neʼebé ita iha. (Prov 3:27) Porezemplu, Ita bele konvida ema atu han ai-han simples hamutuk ka ransu hodi hametin malu. Se ita hatene ema ida moras, ita bele haruka karta ba nia, vizita ka telefone nia. Sin, ita bele hetan oportunidade barak atu koʼalia “buat neʼebé diʼak atu hametin ema seluk, atu bele fó benefísiu ba sira neʼebé rona”.—Éf 4:29.

Ita buka atu halo diʼak ba ema hotu hanesan Jeová. Tan neʼe ita la hatudu hahalok todan ba sorin. Dalan diʼak liu hotu mak hodi haklaken liafuan diʼak kona-ba Maromak nia Ukun ba ema hotu. Hodi tuir Jesus nia mandamentu, ita halo diʼak ba ema hotu inklui ema neʼebé odi ita. (Lc 6:27) Diʼak atu sempre hatudu laran-diʼak no hahalok diʼak ba ema seluk tanba “la iha ukun-fuan ida mak kontra buat sira-neʼe”. (Gal 5:22, 23) Se ita hatudu hahalok diʼak maski hasoru susar ka ema kontra, karik ita bele ajuda sira hatene lia-loos no fó glória ba Maromak.—1 Ped 3:16, 17.

“Ema diʼak sei simu kolen husi ninia hahalok sira.” (Prov 14:14) Saida mak kolen balu neʼebé ita simu? Bainhira ita hatudu hahalok diʼak ba ema seluk, sira mós sei hatudu hahalok diʼak ba ita. (Prov 14:22) Maski karik ema la hatudu hahalok diʼak, maibé se ita kontinua hatudu hahalok neʼe, karik sira sei troka sira-nia hahalok no haree ita ho diʼak.—Rom 12:20, nota.

Irmaun-irmán barak hetan benefísiu bainhira hatudu hahalok diʼak no la halo tan hahalok aat. Hanoin toʼok Nancy nia esperiénsia, nia dehan: “Kuandu haʼu sai boot, haʼu la kontrola an, haʼu halo hahalok neʼebé la iha morál, no la hatudu respeitu. Maibé, bainhira haʼu aprende no aplika Maromak nia matadalan kona-ba hahalok diʼak, haʼu sente kontente liu. Agora haʼu iha dignidade.”

Razaun importante liu atu hatudu hahalok diʼak mak hodi halo Jeová kontente. Maski karik ema barak la haree saida mak ita halo, maibé Jeová haree. Nia hatene ita-nia hahalok no hanoin diʼak hotu. (Éf 6:7, 8) Oinsá mak nia fó kolen ba ita? “Jeová simu ema neʼebé diʼak.” (Prov 12:2) Entaun, mai ita kontinua haburas hahalok diʼak. Jeová promete katak “ema hotu neʼebé halo buat diʼak sei hetan glória no hahiʼi no dame”.—Rom 2:10.