არძას მოკონა, ჯგირ პიროვნებეფო მიჩინენდან. მარა ამდღარ ქვეყნიერებას რთულ რე სიჯგირაშ გიმორჩქინა, მუშენდა ხალხიშ უმენტაშის ჯგირ ჯოგჷ (2 ტიმ. 3:3). თეცალ კათას მუნეფიშ თვალსაზრის უღნა ჯგირ დო ფურშე. თინეფს გლახა ჯგირო მიორჩქუნა დო ჯგირ — გლახათ (ეს. 5:20). თეს გეძინელ, ულირ ცხოვრება დო არასრულყოფილება ხოლო გლახათ მოქმედენს ჩქინწკუმა. ათეშენ შილებე დუდ ართ და, ანაცალო * იბგინათ, მით წანეფ რე იეჰოვას ომსახურ. თინა იჩიებ: „მანგარო მიჭირს თიშ დაჯერა, ნამდა შემლებ ჯგირ პიროვნება ვორდე“.

საბედნეროთ არძას შემლებნა სიჯგირაშ გავითარება. თე თვისება წმინდა შურიშ ნაყოფ რე დო მოხვარნა გივორჯგინათ ირნერ დაბრკოლებას, ნამდგას ქვეყნიერებაშე ვარდა ჩქინ არასრულყოფილებაშ გურშენ შეფხვადუთ. მორთ, დეტალურო გუვარჩუათ, მუ რე სიჯგირა დო ქიგებგათ, მუჭო შემლებნა თე თვისებაშ სრულაშე გიმორჩქინა.

მარტივო ქოფთქუათინ, სიჯგირა ჯგირიშ თვისება რე. თიშა მიშურს მაღალზნეობრიობა დო გამორიცხენს გლახას დო ურგებელს. ჯგირ პიროვნება ირიათო ოცად შხვეფს ქიმეხვარას დო ჯგირ უკეთას თინეფს.

ნამთინე მზათ რე ჯგირ უკეთას ოჯახიშ წევრეფს დო მეგობრეფს, მარა სიჯგირაშ გიმორჩქინაშა ხოლო უმოს მიშურს. მუშო ოკო რაგად, ნამთინს ვეშემლებნა თე თვისებაშ სრულყოფილო გიმორჩქინა, მუშენდა ბიბლიას ჭარჷ: „ვა არსებენს დედამიწას მართალ კოჩ, ნამუთ ირიათო ჯგირს ორთუდას დო დღას ვა ცოდენდას“ (ეკლ. 7:20). მოციქულ პავლექ ალალას თქუ: „მიჩქჷ, ნამდა ჩქიმწკუმა, ანუ, ჩქიმ ხორცის ჯგირ მუთუნ ვა რე“ (რომ. 7:18). თაშ ნამდა, არგამა რე, თე თვისებაშ გავითარებელო საჭირო რე დიბგურუათ იეჰოვაშე, მიშეთ მოურს თე თვისება.

იეჰოვა ღორონთ ადგინენს მუ რე ჯგირ დო ფურ. ბიბლიას იეჰოვაშ გურშენ ბკითხულენთ: „ჯგირ რექ დო ჯგირს ორთუქ. ქუდმოგურე სქან წესეფ“ (ფსალმ. 119:68). მორთ, გუვარჩუათ იეჰოვაშ სიჯგირაშ ჟირ მხარე, ნამუთ თე მუხლის რე მოშინაფილ.

იეჰოვა ჯგირ რე. სიჯგირა იეჰოვაშ პიროვნებაშ უგმურთუ ნაწილ რე. ქიგიფშინათ, მუქ მოხვად, მუჟამსით ღორონთიქ მოსეს თეცალ სიტყვეფ უწუ: „სქან წოხოლე მიკიბლენქ დო ქოძირუნქ ჩქიმ სიდიადეს“. იეჰოვაქ მოსეს ქაძირუ მუშ სიდიადე, თეწკუმა ართო სიჯგირა დო ქიგეგონ ხონარ: „იეჰოვა, იეჰოვა მოჭყოლოფე, შხვეფიშ გაჭირებაშ გურშა მიმაღალარ დო ითვინენსინ ფერ ღორონთ რე, ხვეიანო გიმირჩქინანს სიჯგირას დო ირიათო ასრულენს მუშ სიტყვას; ანთასეფშო გიმირჩქინანს სიჯგირას, პატიენს დაშებულს, უდუჯერებუობას დო ცოდას, მარა დუმაშებელს ვეტენს უდუსაჯებუო“ (გამ. 33:19; 34:6, 7). თავრეშე არგამათ იძირე, ნამდა ღორონთ სრულყოფილო გიმირჩქინანს სიჯგირას. თიშ უმკუჯინუო, ნამდა იესო ხოლო სრულყოფილო გიმირჩქინანდჷ თე თვისებას, თიქ თქუ: „მითინ ვა რე ჯგირ, ართიშ, ღორონთიშ მეტ“ (ლუკ. 18:19).

იეჰოვა ჯგირს ორთჷ. იეჰოვაშ არძა საქმეშე იძირე, ნამდა თინა ჯგირ რე. ბიბლიას ჭარჷ: „ჯგირ რე  იეჰოვა არძაშო დო თიშ ჭყოლოფა მუშ არძა საქმეს გიმიხანტუ“ (ფსალმ. 145:9). თინა თე თვისებას უგშუკერძაფუო გიმირჩქინანს. იეჰოვა არძა ადამიანს არზენს სიცოცხლეს დო ირფელს, მუთ თიშო რე აუცილებერ (საქ. 14:17). თინა სიჯგირას თიმწკუმა ხოლო გიმირჩქინანს, მუჟამსით მაპატიენა. ფსალმუნმაბირექ ჭარჷ: „ჯგირ რექ, იეჰოვა, დო მზათ რექ პატიებაშო“ (ფსალმ. 86:5). ათეშენ შემლებნა დარწმუნებულ ვორდათ, ნამდა „იეჰოვა ჯგირს ვა უფულუნს თინეფს, მით ართგურეფ რენა“ (ფსალმ. 84:11).

ჩქი ღორონთიშ ამნახანტო ვორეთ გოჭყაფილ, ათეშენ არძას შემლებნა ვორდათ ჯგირეფ დო ვაკეთათ ჯგირ (დაბ. 1:27). მარა თეშ უმკუჯინუო, ბიბლია მომწოდენა: „ქიდიგურეთ ჯგირიშ კეთება“ (ეს. 1:17). მუჭო შემლებნა თეშ კეთება? მორთ, გუვარჩუათ სუმ საშვალება, ნამუთ მიმეხვარებნა თეშ კეთებას.

პირველ, შემლებნა ქოფთხუათ ღორონც წმინდა შურ, ნამუთ ოხვარ ქრისტიანეფს სიჯგირაშ გავითარებას (გალ. 5:22). წმინდა შურს შეულებ მიმეხვარან, ქიპჸოროფუათ თინა მუთ ჯგირ რე დო გიბჯოგუათ გლახა (რომ. 12:9). ბიბლიას ჭარჷ, ნამდა იეჰოვას შეულებ გუმამანგარან „ირ ჯგირ საქმეს დო სიტყვას“ (2 თეს. 2:16, 17).

მაჟია, ოკო წეპკითხათ ღორონთიშ სიტყვა, ბიბლია. იეჰოვა მუშ სიტყვაშ საშვალებათ მოგურუანა თის, „მუთ ჯგირ რე“ დო მამზადენა „ირნერ ჯგირ საქმეშო“ (იგავ. 2:9; 2 ტიმ. 3:17). მუჟამსით წეპკითხენთ ბიბლიას დო დეფიფქრებუთ ნაკითხერშე, ჩქინ გურ ეიფშაფუ ღორონთიშ დო თიშ ნებაშ გურშენ ჯგირ აზრეფით. თეგვარო, ჩქინ საგანძურს ევოფშანთ იეჰოვაშ რჩქინათ, ნამუთ უმოს გვიანო გეგმოდირთუნა (ლუკ. 6:45; ეფეს. 5:9).

მასმა, ჩქი ირნერო ვოცადუთ მივაჸუნათ ჯგირ მაგალითის (3 იოან. 11). ბიბლიას სიჯგირაშ გიმორჩქინაშ ბრელ მაგალით რე მოჩამილ. მუშო ოკო რაგად, თე თვისებაშ გიმორჩქინაშ არძაშ უჯგუშ მაგალითის იეჰოვა დო იესო მარზენა. მარა შემლებნა თი კათაშ მაგალითის ხოლო მივაჸუნათ, მით ჯგირს ორთუდ. თეცალეფ რენა ტაბითა დო ბარნაბა (საქ. 9:36; 11:22—24). თქვა შეილებნა ბრელ მუდგარენ დიგურუათ თინეფიშ ჯგირ მაგალითშე, მუჟამსით ქიგეგენთ, მუს იჩიებ ბიბლია თინეფშე. გურაფაშ დროს ქიდეკვირით, მუჭო ოხვარდეს თინეფ შხვეფს. დეფიქრით, თქვა მუჭო შეილებნა მეხვარათ ოჯახის ვარდა კრებაშ წევრეფს. თის ხოლო ქიდეკვირით, მუ ჯგირობუა მოუღ ტაბითა დო ბარნაბას, შხვეფშა ჯგირიშ კეთებაქ. თინეფცალო, ჯგირიშ კეთება თქვა ხოლო მოიღანა ჯგირობუას.

 შეილებნა სიჯგირაშ გიმორჩქინაშ თანამედროვე მაგალითეფშე ხოლო დეფიქრათ. მაგალთო, კრებაშ უხუცესეფშო დო თინეფშო, მით ბრელს ხანდენა დო ჯგირ საქმეეფს ორთნა. თეს გეძინელ, ირიათო რშუდან ართგურ დალეფ, მით სიტყვათ დო საქმეთ ჯგირს ოგურუანა შხვეფს (ტიტ. 1:8; 2:3). მაგალთო, ართ და იჩიებ: „ჩქიმ მეგობარ ირნერო ოცად ქიმეხვარას დო გურშა ელუკინას კრებაშ წევრეფს. თინა ფიქრენს შხვეფიშ მდგომარეობაშე დო ხშირას ჭიჭე საჩუქარს არზენს ვარდა შხვადოშხვა საშვალებეფით ოხვარ. ვორწყექ, ნამდა თინა მართალო ჯგირ პიროვნება რე“.

იეჰოვა მუშ მსახურეფს ელუჩანს, ჯგირ აკეთან (ამოს. 5:14). თაშ მოქციება მიმეხვარებნა, ქიპჸოროფუათ იეჰოვა დო ვაკეთათ თინა, მუთ თიშ თოლს რე ჯგირ.

სიჯგირაშ გიმორჩქინა, შხვეფშა გასაკვირ საქმეეფიშ ვარდა ძვირიან საჩუქრეფიშ კეთებას ვა ნიშნენს. მაგალთო მახანტალქ ხანტუაშ დროს ხვალე ართ ვარდა ჟირ დიდ ფუნჯი ვარინ, შილებე ბრელ ფუნჯი გეგმირინუას. თეგვარო, ჩქინ სიჯგირა ხოლო თევრეშე იძირე, მუჟამსით ვოცადუთ ბრელ ჯგირ საქმე ვუკეთათ შხვეფს.

ბიბლია ელამჩანა, ნამდა მზათ ვორდათ ირნერ ჯგირ საქმეშო (2 ტიმ. 2:21; ტიტ. 3:1). მუჟამსით დებინტერესებუთ შხვეფიშ მდგომარეობათ, შემალებენა გეგმიბრინუათ ირნერ საშვალება, მივეხვარათ თინეფს (რომ. 15:2). მაგალთო, თეშა მიშურს თიშ კეთება მუთ ჩქინ ძალეფით რე შეიოლებერ (იგავ. 3:27). შემლებნა დუვაპეჯათ შხვეფ სადილშა ვარდა გურშა ელვუკინათ თინეფს. მუჟამსით ქიგებგენთ მიდგაინ გლახათ რენ, ჯგირ იჸუაფ წერილ ქიმებჭარათ, დურეკათ ვარდა ქიბძირუათ. მორთ, ირიათო ბგორათ შესაძლებლობეფ, ნამდა ვაკეთათ ჯგირ საქმეეფ, „ნამუთ ხეს შეუნწყუნს ჯგირობუაშო ზრუნვას, მუჭოთ თეს საჭიროება მითხინს, მუშენდა თექ მარდიქ ქიჸუას მარჩქილეეფშო“ (ეფეს. 4:29).

ჩქი ხოლო მოკონა მივაჸუნათ იეჰოვაშ მაგალითის დო არძას ჯგირ ვუკეთათ. ათეშენ შხვეფს უგშუკერძაფუო ოკო მივექცუათ. თეშ ართ-ართ საშვალება სამეფოშ გურშენ სახიოლო ამბეშ არძაწკუმა ქადაგება რე. იესოქ მითითება მუჩეს, ნამდა თინეფს ხოლო ჯგირ ვუკეთათ, მიდგას ბჯოგუთ (ლუკ. 6:27). ჯგირიშ კეთება გლახა დღას ვა რე, მუშენდა „მუთუნნერ კანონ ვა არსებენს თეშ წინააღმდეგ“ (გალ. 5:22, 23). თხოზინიშ დო სირთულეეფიშ უმკუჯინუო, ჩქინ ჯგირ საქციელით შილებე შხვეფ ჭეშმარიტებათ დუვაინტერესათ დო ღორონთ განვადიდათ (1 პეტ. 3:16, 17).

ბიბლიას ჭარჷ: „ჯგირ კოჩის მუშ საქმეეფიშ ნაყოფ აკმაყოფილენს“ (იგავ. 14:14). მუ ჯგირობუა მოუღ ჯგირიშ კეთებას? მუჟამსით შხვეფს ჯგირო ვოქცუთ, დიდ ალბათობა რე, ნამდა აშო ხოლო ჯგირო მიმექცუან (იგავ. 14:22). თიმწკუმა ხოლო, მუჟამსით შხვეფ გლახათ მოქცუნა, ჩქი იშენით ჯგირ ოკო ვუკეთათ თინეფს. შედეგო შილებე დოთირუან მუნეფიშ დამოკიდებულება დო უჯგუშო ქიმმექცუან (რომ. 12:20).

ბრელს შეულებ თიშ დადასტურება, ნამდა გლახა საქმეეფიშ მეტება დო ჯგირიშ კეთებას ჯგირ შედეგეფ მოჸუნს. ქობძირათ ნენსიშ მაგალით. თინა იჩიებ: „მა თეშ მიბრდჷ, ირიათო მორკუდ ჸოროფა დო მზრუნველობა. უზნეო ცხოვრებას მეპჸუნდჷ დო მუჭოთ შხვეფიშ თეშ ჩქიმ დუდიშ უპატივცემლობას გიმიფრჩქინანდჷ. მარა ღორონთიშ პრინციპეფიშ გაგებაშ დო გიმორნაფაშ უკულ, დუდ ბედნერო იბგინ. ასე ჩქიმ დუდიშ პატიცემა დო ღირსებაშ გრძნობა მიღჷ“.

ჯგირიშ კეთებათ იეჰოვას ვუხარენთ გურს. შილებე ბრელ ვარწყედას ჩქინ საქმეეფს, მარა იეჰოვა ორწყე ჩქინ ჯგირ საქმეეფს დო ფიქრეფს (ეფეს. 6:7, 8). მუჭო მაკურთხენა თინა? ბიბლია იჩიებ: „ჯგირ კოჩის იეჰოვა იწონუანს“ (იგავ. 12:2). თაშ ნამდა, გუვაგრძელათ ჯგირიშ კეთება. იეჰოვა მოპირნა, ნამდა „დიდებას, პატის დო მშვიდობას ქიმეჩანს არძას, მით ჯგირს ორთჷ“ (რომ. 2:10).