1. Gin ango ma Adam ki Kawa gurwenyo, dok man okelo adwogi ango?

ANGA ma itamo ni omyero oket rwom me gin maber ki gin marac? I kare ma Adam ki Kawa gucamo nyig yat me ngeyo gin maber ki gin marac, gunyutu ka maleng ni: Pe gigeno Jehovah ki rwom me kwo ma en oketo. Guyero me moko pigi kengi gin maber ki gin marac. (Acak. 3:22) Ento kong itam i kom gin ma gurwenyo. Gurwenyo watgi ki Jehovah. Gurwenyo bene mot me kwo pi naka, dok gukobo bal kacel ki to i kom lutinogi. (Rom. 5:12) Tam ma Adam ki Kawa gumoko-ni okelo can madit.

2-3. (a) Laco ma Laetiopia-ni otimo ngo i kare ma Pilipo otito kwena bote? (b) Mot ango ma tye piwa ka wanongo batija, dok wabinyamo lapeny ango?

² Por kong gin ma Adam ki Kawa gutimo ki kit ma laco ma Laetiopia odok kwede i kare ma Pilipo otito kwena bote. Laetiopia-ni obedo ki pwoc madit adada pi jami ma Jehovah otimo pire mumiyo en onongo batija cutcut. (Tic 8:34-38) Ka wadyero kwowa bot Lubanga dok wanongo batija kit macalo laco ma Laetiopia-ni otimo, ci wanyuto ka maleng ni: Watye ki pwoc madit pi gin ma Jehovah gin ki Yecu gutimo piwa. Wanyuto bene ni wageno Jehovah dok waniang ni en aye ma tye ki twero me moko gin maber ki gin marac.

³ Tam kong i kom mot ducu ma wanongo ka watiyo pi Jehovah! Me acel, watye ki gen me nongo jami ducu ma Adam ki Kawa gurwenyo, kadi wa mot me  kwo ma pe tum. Pi niyewa i kom Yecu Kricito, Jehovah timiwa kica pi balwa dok weko wabedo ma cwinywa pe pidowa. (Mat. 20:28; Tic 10:43) Wadoko bene jo me ot pa Jehovah ma gitye ki cwakke dok gitye ki gen pi anyim ma mwonya. (Jon 10:14-16; Rom. 8:20, 21) Kadi bed ni mot magi nen ka maleng, jo mogo ma gingeyo Jehovah pud gigale ki lubo lanen pa laco ma Laetiopia-ni. Ariya ango ma gengogi ki nongo batija? Dok gitwero loyo ariya magi nining?

4-5. Ariya ango ma awobi ma nyinge Avery ki anyaka na nyinge Hannah gukemme kwede?

⁴ Bedo labongo gen i komi kekeni. Lunyodo pa Avery gubedo Lucaden pa Jehovah. Wonne obedo wego ma lamar dok laelda maber adada. Kadi bed kit meno, Avery obedo ka galle ki nongo batija. Pingo? En owaco ni: “Abedo ki lworo ni pe abibedo ki kero me lubo lanen maber ma babana oweko.” Avery onongo bene pe ki gen ni eromo cobo tic me kacokke ma twero bino i wiye i anyim. “Abedo ka lworo ni kibipenya me lega i dye lwak, miyo pwony pi lwak, nyo bene ni atel wi gurup ma cito woko ka tito kwena.”

⁵ Hannah, ma tye ki mwaka 18, onongo pe ki gen i kome kekene. Lunyodone gubedo Lucaden pa Jehovah. Kadi bed kit meno, en onongo tye ki gung cwiny ka etwero kwo ma lubbe ki cik pa Jehovah. Pingo? Hannah onongo winyo ni konye pe. I kine mukene en onongo winyo marac adada ma weko en keto awano i kome kekene dok man onongo medo pekone ameda. En owaco ni: “Pe atito ki ngat mo keken gin ma onongo atimo, kadi wa lunyodona, dok onongo atamo ni Jehovah pe mito ni abed laticce pi awano ma abedo ka keto i koma kekena.”

6. Gin ango ma obedo ka gengo Vanessa ki nongo batija?

⁶ Lurem maraco. Vanessa, lamego ma tye ki mwaka 22, owaco ni, “Onongo atye ki larema mo macok ma wangene kwede pi cok mwaki apar kulu.” Kadi bed kit meno, larem Venessa-ni onongo pe cuko cwiny Venessa me cobo yubbe me nongo batija. Meno ocwero cwiny Venessa, dok en owacci, “Anongo tek adada me mako lurem, dok abedo ki par ni ka agiko lirem meno, ci dong pe abibedo ki lirem mo macok kumeno.”

7. Gin ango ma anyaka mo ma kilwongo ni Makayla obedo ka lworone, dok pingo?

⁷ Lworo ni ibitimo bal. Makayla onongo tye ki mwaka abic i kare ma kiryemo omine madit ki i kacokke. I kare ma en  woto ki dongo, oneno cwer cwiny ma lunyodone gubedo kwede pi tim pa omine. Makayla owaco ni: “Onongo atye ki lworo ni ka anongo batija, abitimo bal ci kibiryema woko dok meno bimedo cwero cwiny pa lunyodona ameda.”

8. Awobi ma nyinge Miles onongo tye ki lworo i kom gin ango?

⁸ Lworo aunauna. Won Miles gin ki nyek minne gubedo jo ma giworo Jehovah, ento minne pe obedo Lacaden. Omego Miles owaco ni: “Abedo i cing mamana pi mwaki 18, dok abedo ki lworo me wacce ni amito nongo batija. Onongo aneno aunauna ma en oketo i kom babana i kare ma babana odoko Lacaden. Abedo ki lworo ni en biketo aunauna i koma bene.”

9. Gin ango ma twero timme ka ipwonyo kit ma Jehovah nyuto kwede mar dok diyo cwinye?

⁹ Adam ki Kawa guyero pe me tic pi Jehovah pien pe gudongo mar matek pi Jehovah. Kadi bed kit meno, Jehovah oye ni gukwo pi kare mo wek gunywal lutino dok gumok kit ma gibipwonyo kwede lutinogi. Adwogi me tam ma Adam ki Kawa gumoko me kwero winyo Jehovah onyuto ka maleng minggi. Latin kayogi oneko omine ma pe otimo bal mo, dok i nge meno tim bwami onya i kin dano ducu. (Acak. 4:8; 6:11-13) Kadi bed kit meno, Jehovah onongo tye ki yo ma en oyubo me laro lutino pa Adam ki Kawa ma gimito tic pire. (Jon 6:38-40, 57, 58) Ka imedde ki pwonyo kit ma Jehovah nyuto kwede mar dok diyo cwinye, ci man biweko marri pire bene dongo. Ibibedo ki miti me kwero lubo lanen ma Adam ki Kawa guweko ci ibiyero me dyero kwoni bot Jehovah.

10. Pingo lwodo lok ma tye i Jabuli 19:7 twero konyi me tic pi Jehovah?

¹⁰ Medde ki pwonyo lok i kom Jehovah. Ka imedde ki pwonyo lok i kom Jehovah, ci genni ni itwero tic pire pi naka bijing medde ameda. Avery, ma waloko i kome con-ni owaco ni: “Cwinya ojing i kare ma abedo ka kwano ki lwodo cikke ma tye i Jabuli 19:7.”  (Kwan.) Avery oneno kit ma Jehovah ocobo kwede cikkene meno, ni en “miyo ryeko bot luming [nyo jo ma ngecgi nok].” Pi meno marre pi Lubanga odongo odoko matek. Marwa pi Jehovah pe weko wabedo ki tekcwiny keken ento bene weko wagwokke ki i timo jami ma cwero cwinye. Hannah, ma bene waloko i kome con-ni owaco ni: “Kwano Baibul pira kena okonya me niang ni ka aketo awano i koma kekena, nongo atye ka cwero cwiny Jehovah bene.” (1 Pet. 5:7) Hannah odoko ‘ngat ma keto Lok pa Lubanga i tic.’ (Yak. 1:22) Adwogine obedo ningo? En owaco ni: “Ka aneno kit ma lubo cik pa Lubanga okella adwogi maber, ci acako marre matek. I kare-ni dong atye ki gen ni Jehovah kare ducu bitira ka amito konye.” Hannah obedo ki tek cwiny me lweny ki miti me wanne kekene. En odyero kwone bot Jehovah ci onongo batija.

11. Gin ango ma Vanessa otimo me nongo lurem mabeco, dok watwero pwonyo ngo ki bote?

¹¹ Yer luremi ki diro. Vanessa, ma waloko i kome con-ni oniang ni lareme-ni onongo tye ka genge ki tic pi Jehovah. Pi meno en ojuko lirem meno woko. Vanessa otimo gin mukene ma kato meno. En otute matek me mako lurem manyen i kacokke. En owaco ni, lanen ma Nua kacel ki jo otte guweko okonye adada. “Jo ma pe maro Jehovah bene onongo orumogi dyere, ento gubedo ki lirem maber i kingi kekengi.” I nge nongo batija, Vanessa odoko painia. Dok i kare-ni en waco ni: “Man okonya me mako lurem mabeco pe ki i kacokkewa keken ento wa i kacokke mukene bene.” In bene itwero nongo lurem mabeco ka itute matek i tic ma Jehovah ominiwa me atima.​—Mat. 24:14.

12. Kit lworo ango ma Adam ki Kawa pe gubedo kwede, dok adwogi ango ma man okelo?

¹² Pwonnye me neno lworo i yo ma atir. Lworo mukene ber piwa. Me labolle, omyero walwor timo gin ma cwero cwiny Jehovah. (Jab. 111:10) Ka onongo Adam ki Kawa gudongo lworo ma kit man, kono onongo pe gujemo i kom Jehovah. Ento gujemo. I ngeye ma gutimo  meno, wanggi oyabbe, ma man tyen lokke ni guniang ni gin lubalo. Onongo dong gitwero kobo bal ki to keken i kom lutinogi. Pien onongo dong gitwero neno nyo niang ni guturo cik pa Lubanga, lewic ocako makogi pi munerogi dok man oweko gucako umo komgi woko.​—Acak. 3:7, 21.

13-14. (a) Ma lubbe ki 1 Petero 3:21, pingo pe omyero wabed ki lworo mukato kare woko i kom to? (b) Tyen lok ango ma watye kwede me maro Jehovah?

¹³ Kadi bed ni omyero wabed ki lworo mupore i kom Jehovah, pe omyero walwor to. Jehovah oyabiwa yo me nongo kwo ma pe tum. Ka watimo bal ci wangut ki cwiny me ada, Jehovah biweko balwa woko. En bitimiwa kica pi niyewa i kom ginkok pa Wode. Yo acel ma pire tek ma wanyuto kwede niyewa aye ka wadyero kwowa bot Lubanga dok wanongo batija.​—Kwan 1 Petero 3:21.

¹⁴ Watye ki tyen lok mapol me maro Jehovah. Medo i kom jami mabeco ma en miyowa nino ducu, en bene pwonyowa lok ada i kome kacel ki yubbe. (Jon 8:31, 32) En ominiwa kacokke pa Lukricitayo wek otirwa dok okonywa. En konyowa me kanyo pekkiwa i kare-ni, dok miyowa gen me kwo pi naka i lobo paradic i kare me anyim. (Jab. 68:19; Yabo 21:3, 4) Ka watamo i kom jami ma Jehovah otimo me nyuto ni emarowa, ci konyowa me nyikke cok bote. Ka wamaro Jehovah, ci wapwonnye me neno lworo i yo ma atir. Wabedo ki lworo me cwero cwiny Ngat ma wamaro loyo.

15. Makayla oloyo lworo me timo bal nining?

¹⁵ Makayla, ma kiloko i kome con-ni, oloyo lworo me timo bal i kare ma oniang ni Jehovah obedo Lubanga ma timo kica. “Aniang ni wan ducu watye ki roc dok watimo bal. Aniang bene ni Jehovah marowa dok bitimowa kica kun jenge i kom ginkok.” Marre pi Jehovah otugo cwinye me dyere bote, ki nongo batija.

16. Gin ango ma okonyo Miles me bedo ki tekcwiny?

¹⁶ Miles, ma onongo lworo ni minne biketo aunauna i kome ka emoko tamme me nongo batija, openyo tam ki bot laneno me adwol. Miles owaco ni: “Laneno me adwol-li onongo bene odongo i paco ma lanyodo acel keken aye tye Lacaden. En okonya me tam i kom gin ma atwero wacone me konyo mamana me niang ni man obedo tamma me nongo batija ento pe babana aye ma tye ka diya me timone.” Min Miles cwinye pe obedo yom kulu. Man oweko Miles oa woko ki i gang pa mine, ento en omedde ki moko i kom tamme. En owaco ni: “Pwonyo jami mabeco ma Jehovah otimo pira ogudo cwinya adada. I kare ma alwodo matut lok kom ginkok pa Yecu, aniang ni  Jehovah mara adada. Lwodo lok meno okonya me dyero kwona bot Jehovah dok anongo batija.”

17. Wan ducu watye ki kare me timo gin ango?

¹⁷ I kare ma Kawa ocamo nyig yat i poto me Eden, en okwero Wonne woko. I kare ma Adam oribbe kwede i jemo meno, man onyuto ni en bene pe ki pwoc pi jami mabeco ma Jehovah otimo pire. Wan ducu watye ki kare me nyuto ni pe wacwako tam ma Adam ki Kawa gumoko. Ka wanongo batija, wanyuto ki Jehovah ni waye ni en aye ma tye ki twero me moko botwa gin maber ki gin marac. Wanyuto bene ni wamaro dok wageno Wonwa.

18. Itwero cobo ticci pi Jehovah maber nining?

¹⁸ Tic matek ma watye kwede i nge nongo batija aye me kwo nino ducu ma lubbe ki rwom me kwo ma Jehovah oketo ento pe mewa. Dano milion mapol gitye ka kwo kit meno mwaka ki mwaka. In bene itwero bedo calo gin ka imedde ki dongo ngecci i kom lok pa Lubanga, ka iribbe ki omege ki lumegini kare ki kare dok inywako ki jo mukene jami ma ipwonyo i kom Woru. (Ibru 10:24, 25) Ka itye ka moko tam, winy tira ma Jehovah miyo boti kun wok ki i Lokke ki dulle. (Ic. 30:21) Ka itimo kit meno, ci jami ducu ma itimo bicobbe kakare.​—Car. 16:3, 20.

19. Gin ango ma omyero imedde ki niang iye, dok pingo?

¹⁹ Ka imedde ki niang adwogi maber ma bino pi lubo tira pa Jehovah, ci mari pire ki pi rwom me kwo ma en oketo bidongo medde ameda. Ka itimo kit meno, ci pe tye gin mo ma Catan miyo ma twero bwoli ci weko ijuko tic pi Jehovah woko. Go kong kit ma kwoni bibedo kwede mwaka alip acel i anyim. Ibilwodo lok i kom tam ma imoko me nongo batija i kare man ni obedo tam ma pud dong ber loyo ma onongo itwero mokone!