1. Адам ла Ева нени јылыйткан, мынаҥ улам не болгон?

СЛЕРДИҤ санаагарла болзо, јакшыныҥ ла јаманныҥ нормаларын кем тургузар учурлу? Адам ла Ева јакшыны ла јаманды билетен агаштыҥ јиилегин јип ийгениле, Иеговага иженбегенин ле оныҥ нормаларын јектегенин кӧргӱскен. Олор јакшыныҥ ла јаманныҥ нормаларын бойлоры тургузарга сананган (Баш. 3:22). Је мынаҥ улам не болгонын сананып ийектер. Олор Иеговала најылыгын ла ӱргӱлјиге јӱретен аргазын јылыйтып, бала-барказына кинчек ле ӧлӱм экелген (Рим. 5:12). Анайып, кыйын-шыралу јӱрӱм башталган.

2, 3. а) Эфиоп јериниҥ евнух кижизи Филипптиҥ јарын угуп, нени эткен? б) Бис сууга чӧҥӱрилзеес, кандый алкыштар аладыс? Кандый сурактар шӱӱп кӧрӧрис?

² Эмди, Эфиоп јериниҥ евнух кижизи Филипптиҥ јарын угуп, нени эткенин сананып ийектер. Ол Иегова ла Иисустыҥ ого эткенине јаан быйанду болуп, тургуза ла чӧҥӱрилген (Ап. ижи 8:34—38). Бис Иеговага учурланып, сууга чӧҥӱрилгенисле нени кӧргӱзип јадыс? Анайып Иегова ла Иисуска биске эткени учун быйанысты, анайда ок Иеговага иженип, јакшыныҥ ла јаманныҥ нормаларын тургузар јаҥына багынып турганысты кӧргӱзедис.

³ Је эмди, Иеговага иштеп баштазаас, кандый алкыштар алып турганысты сананып кӧрӧктӧр. Ол биске Адам ла Еваныҥ јылыйтып салганыныҥ ончозын, ол тоодо ӱргӱлјиге јӱретен арганы, кайра бурылтарга сӧзин берет. Иисус Христоско  бӱткенис Иеговага бистиҥ јаманысты таштап, ару уйат сыйлайтан тӧзӧлгӧ болот (Матф. 20:28; Ап. ижи 10:43). Анайда ок бис Иегованыҥ билезине кирип јадыс. Оныҥ билезине кирип турган улуста келер јӱрӱмге сӱрекей јакшы ижемји бар (Иоанн 10:14—16; Рим. 8:20, 21). Иеговага иштеери бир де калас эмес, је тӱҥей ле Иегованы билип алган улустыҥ кезиги эфиоп эр кижинеҥ тем аларынаҥ алаҥзып јат. Олорды не буудактап јат? Бу буудактарды ӧдӧргӧ нени эдер керек?

4, 5. Эйвери ле Ханнада кандый буудактар болгон?

⁴ Бойына алаҥзып турары. Эйвери деп карындаш Иегованыҥ Керечилериниҥ билезинде ӧскӧн. Оныҥ адазын ончо улус јалакай кижи ле јакшы аксагал деп билер болгон. Андый да болзо, Эйвери чӧҥӱрилерге тӱргедебеген. Ол айдат: «Мен адам чылап болалбазым» — деп санангам. Анайда ок ого качан бирде молјулар берилзе, бӱдӱрип болбос деп бодогон. Ол айдат: «Мени мӱргӱп ийзин, куучын-эрмек айтсын эмезе јарлаар иштиҥ туштажузын ӧткӱрзин деп сураарынаҥ коркыгам».

⁵ 18 јашту Ханна сыйын бойына ӧйинеҥ ӧткӱре алаҥзып турган кижи болгон. Оныҥ ада-энези Иегованыҥ Керечилери де болзо, ол Кудайдыҥ нормаларыла јӱрӱп болбос деп бодогон. Нениҥ учун дезе Ханна бойын чек јабыс кӧрӧтӧн. Кезикте ол коркышту тыҥ кунугып, бойыныҥ эди-канына каршу јетиретен, је мынаҥ ого оноҥ кӱч болгон. Ол айдат: «Мен бу керегинде кемге де, керек дезе ада-энемге де айтпайтам. Иеговага мендий ишчи керек јок деп санангам».

6. Ванессаны чӧҥӱрилерге не буудактаган?

⁶ Најылардыҥ јаман салтары. 22 јашту Ванесса айдат: «Менде јуук ӱрее бар болгон, бис оныла 10 јыл кире најылашканыс». Је Ванесса чӧҥӱрилерге кӱӱнзеерде, ӱреези оныҥ амадузын јаратпаган. Мынаҥ улам Ванессага тыҥ ачу болгон. Ол куучындайт: «Меге улусла таныжарга кӱч болот, оныҥ учун ӱреемле најылашпай барзам, база качан да андый ӱрее таап болбозым деп санангам».

7. Макейла недеҥ коркыган, нениҥ учун?

⁷ Јастырып ийеринеҥ коркыыры. Макейла сыйынга беш јаш болордо, оныҥ аказын јууннаҥ чыгарып салган. Ол аказыныҥ кылык-јаҥы ада-энезине кандый ачу экелип турганын кӧрӱп туратан. Макейла айдат: «Сууга чӧҥӱрилип, кинчек эдип ийзем, мени база јууннаҥ чыгарып салза, ада-энемге оноҥ ачу болор деп коркыгам».

8. Майлз недеҥ коркыган?

⁸ Удурлажунаҥ коркыыры. Майлз карындаштыҥ адазы ла ӧй энези Иегованыҥ Керечилери болгон, а бойыныҥ энези  Керечил эмес. Ол айдат: «Мен энемле кожо 18 јыл јаткам. Сууга чӧҥӱрилерге турганымды айдарга коркып туратам, не дезе, адам Иегованыҥ Керечили болорго јадарда, энемниҥ нени эткени санаамга кирип туратан. Оныҥ учун ол меге де удурлажар деп бодогом».

9. Иегованыҥ сӱӱжи ле чыдамкайы керегинде билгирлер слерди неге кӱӱнзедер болор?

⁹ Адам ла Ева Иегованы тыҥ сӱӱбеген, оныҥ учун оноҥ јана болгон. Андый да болзо, Иегова олорго балдарлу болуп, канча да кире ӧйгӧ олорды бойыныҥ кӧрӱмиле чыдадатан арга берген. Соондо Адам ла Еваныҥ Кудай јогынаҥ јӱрерге шӱӱп алганы јастыра болгон деп, јарт кӧрӱне берген. Олордыҥ јаан уулы бойыныҥ буру јок карындажын ӧлтӱрип салган. Анайда ок улустыҥ јаҥыс бойын сананары ла калју болоры там тыҥыган (Баш. 4:8; 6:11—13). Је Иегова Адам ла Еваныҥ Кудайга иштеерге кӱӱнзей беретен бастыра калдыгына аргаданар арга берген (Иоанн 6:38—40, 57, 58). Иегованыҥ сӱӱжи ле чыдамкайы керегинде канча ла кире кӧпти билип алзаар, оны ончо ло кире тыҥ сӱӱригер. Анайып Адам ла Еваныҥ талдаган јолын артыргызып, јӱрӱмигерди Иеговага учурлаарга кӱӱнзееригер.

10. Сарын 19:7-ни шӱӱп сананганы Иеговага иштееринеҥ коркыбаска канайып болужар аргалу?

¹⁰ Иегова керегинде билгиреерди кӧптӧдип турыгар. Иегованы канча ла кире јакшы билзегер, ого иштейтен бӱдӱмјигер ончо ло кире тыҥ болор. Ӧрӧги айдылган Эйвери карындаш айдат: «Сарын 19:7-ни шӱӱп сананып турала, коркыбай баргам». (Кычырыгар *.) Анайып Эйвери, Иегова берген сӧзин бӱдӱрип јат деп оҥдоп, оны оноҥ тыҥ сӱӱй берген. Кудайды сӱӱгени јӱк ле бӱдӱмјилӱ болорго эмес, је озо ло баштап оны ла оныҥ табын бӱдӱрери керегинде сананарга болужат. Ханна сыйын дезе, мынайып айдат: «Агару Бичикти кычырып, таҥынаҥ ӱренип тура, эди-канымга каршу эткенимле Иеговага ачу эдип јадым деп оҥдоп ийгем» (1 Петр 5:7). Мынайып Ханна Кудайдыҥ  Сӧзинеҥ билип алганын тузаланып баштаган (Иак. 1:22). Једимдери керегинде ол мынайып айдат: «Иегованыҥ табын бӱдӱргенимнеҥ тузазын кӧрӧлӧ, ого сӱӱжим тыҥыган. Эмди, нени эдерин билбей турзам, Иегова мени чын јолго ууландырар деп, алаҥзыбай јадым». Ханна бойыныҥ эди-канына каршу јетирбей барган. Мыныҥ кийнинде Иеговага јӱрӱмин учурлап, сууга чӧҥӱрилген.

11. Ванесса јакшы најыларды канайып таап алган, бис мынаҥ неге ӱренедис?

¹¹ Најыларды чын талдагар. Ӧрӧги айдылган Ванесса ӱреезиле јуук најылашканы Иеговага јӱрӱмин учурлаарга буудактап јат деп оҥдоп алган. Оныҥ учун ӱреезиле најылажарын токтодып, најыларды јуунда бедиреерге албаданган. Оныҥ айтканыла, ого Нойдыҥ ла оныҥ билезиниҥ теми болушкан. «Олор Иегованы сӱӱбей турган улустыҥ ортозында јаткан, је јӱк ле бой-бойыла јуук куучындашкан» — деп, Ванесса айдат. Соондо ол сууга чӧҥӱрилип, пионер болуп баштаган. «Эмди мен сӱрекей јакшы најыларды јаҥыс ла бойымныҥ јуунымнаҥ эмес, је ӧскӧ дӧ јуундардаҥ таап алдым» — деп куучындайт. Айдарда, Иегованыҥ ижине кӧп туружып турзагар, слерде де јакшы најылар табылар (Матф. 24:14).

12. Адам ла Ева кемнеҥ айабаган, учы-тӱбинде бу неге экелген?

¹² Кудайдаҥ айап турарга ӱренигер. Коркып турганыс кезикте тузалу болот. Темдектезе, бис Иегованы ачындырарынаҥ айап турар учурлу (Сар. 111:10). Адам ла Ева Кудайдаҥ айап турган болзо, оноҥ качан да јана болбос эди. Олор Кудайга удура тӱймеен кӧдӱрерде, олордыҥ кӧзи ачыла берген: олор кинчектӱ болуп калганын оҥдоп ийген. Мынаҥ улам олор бала-барказына јӱк ле кинчек ле ӧлӱм берер аргалу болгон. Мыны оҥдоп ийеле, јылаҥаш болгонынаҥ уйалып, јалбырактарды тизеле, курчанып алган (Баш. 3:7, 21).

13, 14. а) 1 Петр 3:21-ле болзо, биске нениҥ учун ӧлӱмнеҥ ӧйинеҥ ӧткӱре коркыбас керек? б) Бисте Иегованы сӱӱйтен кандый шылтактар бар?

¹³ Иегованы ачындырып ийердеҥ айап та турзаас, је ӧлӱмнеҥ ӧйинеҥ ӧткӱре коркыбай јадыс. Нениҥ учун дезе Иегова биске ӱргӱлјиге јӱретен арга берген. Бис кинчек эдип  ийеле, акту јӱрегистеҥ јаманысты алынзаас, Иегова јаманысты таштап салар. Нениҥ учун дезе бис Иисустыҥ толынты тайылгазына бӱдӱп јадыс. Мындый бӱдӱмји јӱрӱмисти Иеговага учурлаганыстаҥ ла сууга чӧҥӱрилгенистеҥ кӧрӱнет. (1 Петр 3:21 кычырыгар.)

¹⁴ Иегованы сӱӱйтен шылтактар бисте сӱреен кӧп. Ол кажы ла кӱн бисти сӱӱндирип турган алкыштар берет, анайда ок бойы керегинде ле бойыныҥ амадулары керегинде чындыкты ачат (Иоанн 8:31, 32). Ол христиан јуун ажыра бистиҥ кӱӱнисти кӧдӱрип, ӱредип јат. Уур-кӱчтерди ӧдӧргӧ болужат, анайда ок райда ӱргӱлјиге јӱретен сӱреен јакшы ижемји берет (Сар. 68:19; Ачыл. 21:3, 4). Иегова биске сӱӱжин кӧргӱзерге, кӧп алкыштар берет. Мыны шӱӱп сананзаас, Кудайды сӱӱбес аргабыс јок болот. А Кудайды сӱӱп турганыс, оноҥ айап турарга болужат. Ӧскӧртӧ айтса, Кудайды тыҥ сӱӱп турганыстаҥ улам, оны ачындырып ийеринеҥ коркып јадыс.

15. Макейла јастырып ийеринеҥ недеҥ улам коркыбай барган?

¹⁵ Ӧрӧги айдылган Макейла сыйын, Иегова бисти сӱӱп, јаманысты таштап турган деп оҥдоп, јастырып ийеринеҥ коркыбай барган. «Бис ончобыс толо кемдӱ эмезис, оныҥ учун јастыралар эдедис. Је Иегова бисти сӱӱп турган ла бистиҥ јастыраларысты толынты тайылганаҥ улам таштап турганын оҥдоп алгам» — деп, ол айдат. Макейла Иегованы сӱӱп турганынаҥ улам бойыныҥ јӱрӱмин ого учурлап, сууга чӧҥӱрилген.

16. Майлз коркыбаска нени эткен?

¹⁶ Энезиниҥ удурлажузынаҥ коркыган Майлз, аймак кӧрӧӧчиге баштанган. «Ол аканыҥ энези база Иегованыҥ Керечизи болбогон. Оныҥ учун ол меге, мен адамга болуп эмес, је бойымныҥ кӱӱнимле чӧҥӱрилерге турганымды энемге јартаарга болушкан» — деп, Майлз куучындайт. Майлзтыҥ энези уулыныҥ чӧҥӱрилерге турганына коркышту калјуурган. Учы-тӱбинде энезинеҥ кӧчӧ берерге келишкен, је андый да болзо, оныҥ чӧҥӱрилер кӱӱни ӧчпӧгӧн. Ол мынайып айдат: «Иегованыҥ меге кӧпти эткенин оҥдоп алала, јӱрегим томулган. Иисустыҥ толынты тайылгазын тереҥ шӱӱп сананала, Иегова мени тыҥ сӱӱп турган деп кӧрӱп ийгем, оныҥ учун јӱрӱмимди Иеговага учурлап, сууга чӧҥӱрилгем».

17. Бисте ончобыста кандый арга бар?

¹⁷ Ева јакшыны ла јаманды билетен агаштыҥ јиилегин јип ийеле, теҥеридеги Адазынаҥ јана болгон. Адам дезе, ӱйиниҥ сӧзине киргениле Иегованыҥ кӧп алкыштарын бир де баалабаганын кӧргӱскен. Је бис ончобыс олор ошкош болорго кӱӱнзебей турганысты кӧргӱзер аргалу. Сууга чӧҥӱрилгенисле јӱк ле Иегова јакшыныҥ ла јаманныҥ нормаларын тургузар аргалу деп јӧпсинип јадыс. Анайып бис Адабысты сӱӱп, ого бӱдӱп јадыс деп кӧргӱзедис.

18. Иеговага једимдӱ иштеерге нени эдер керек?

¹⁸ Чӧҥӱрилген кийнинеҥ кажы ла кӱн бойыстыҥ нормаларысла эмес, је Иегованыҥ нормаларыла јӱрерге албаданар керек. Анайып Иегованыҥ миллиондор тоолу ишчилери эдет. Слер де Агару Бичикти оноҥ ло ары тереҥжиде ӱрензеер, ака-эјелерле јаантайын куучындажып турзагар, теҥеридеги сӱӱштӱ Адабыс керегинде билип алганаарды улуска кӱӱнзеп куучындап турзагар, анайып јӱрӱп болорыгар (Евр. 10:24, 25). Кандый бир тӱп-шӱӱлтеге келерге, Иегованыҥ организациязы ла Агару Бичик ажыра берген јӧптӧрин ајаруга алып турыгар (Иса. 30:21). Анайып, сӱреен јакшы једимдерге једеригер (Укаа 16:3, 20).

19. Биске нени ундыбас керек, нениҥ учун?

¹⁹ Иегованыҥ јӧптӧри кӧп алкыштар экелип турганын оҥдоп турзагар, слер Кудайды ла оныҥ нормаларын оноҥ тыҥ сӱӱригер. Ол тушта Сатана слерди Иеговага иштееринеҥ туура апарып болбос. Сананып ийзегер: бир муҥ јыл ӧдӱп калды, ӧткӧн јӱрӱмигерди сананып: «Чӧҥӱрилгеним эҥ ле јакшы алтам болгон!» — деп сӱӱнеригер.