1. Kii Adam bo Éva ba bi nimis, ni bimbe bikuu?

WE U nhoñol le njee a nlama kal bés kii i yé loñge ni kii i yé béba? Ngéda Adam bo Éva ba bi je litam li e i yi loñge ni béba, ba bi unda le, ba bé bôdôl bé Yéhôva ñem, to matiñ mé. Ba bi yoñ makidik i pohol inyu yap bomede kii i yé loñge ni béba. (Bibôdle 3:22) Ndi hoñol ki mam ba bi nimis. Pog, ba bi nimis maada malam ni Yéhôva. Iba, ba bi nimis pôla i niñ i boga ni boga, ba lôôs ki bon bap béba ni nyemb. (Rôma 5:12) Makidik ma Adam bo Éva ma bi lona bikuu.

2-3. (a) Kii nwak Étiôpia u boñ ngéda Filipô a bi tééne nye likalô? (b) Bimbe bisai di nkôs ngéda di nsôblana, mambe mambadga di ga wan?

² Di béñge maselna ma yé ipôla maboñok ma Adam bo Éva ni i jam nwak Étiôpia u boñ ngéda Filipô a bi tééne nye likalô. Mam Yéhôva bo Yésu ba bi boñ inyu nwak Étiôpia, ma bi lôôha tihba nye kayéle a bat sôble kunda yada. (Minson mi baôma 8:34-38) Ngéda di nti bésbomede nkikip yak Djob kiki nwak Étiôpia, ndi di sôblana, di ñunda le di nti Yéhôva bo Yésu mayéga inyu mam ba bi bôñôl bés. Di ñunda ki ni i njel i le, di mbôdôl Yéhôva ñem, di neebege ki le nyen a nlama niiga bés kii i yé loñge ni béba.

³ Hoñol ki bisai di nkôs ngéda di ngwélél Yéhôva! Jam li bisu li yé le, di mbot ñem le di ga kôhna bisai gwobisôna Adam bo Éva ba bi nimis, yak niñ boga mu  nsoñgi u. Kiki di nhémle Yésu Kristô, Yéhôva a nwéhél mahôha més, a nti ki bés kiññem i mpôp. (Matéô 20:28; Minson mi baôma 10:43) Di gwé yak nsima i jôp lihaa li Yéhôva, li li ga bana bisai bikeñi dilo di nlo. (Yôhanes 10:14-16; Rôma 8:20, 21) Tolakii di gwé bisai bi gwobisôna, i yé i pam le ngim bôt i i nigil i yi Yéhôva i kon woñi i noñ ndémbél i nwak Étiôpia. Kii i yé le i kéñ bo i bat sôble? Ni lelaa ba nla yémbél mam ma nkéñ bo?

4-5. Mambe mandutu Avré bo Hannah ba bi boma?

⁴ Ba nhoñol le ba kôli bé. Bagwal ba Avré ba yé Mbôgi Yéhôva. Isañ a bé yiba kiki loñge isañ mbai i i ntôñ lihaa jé, ni loñge mañ u likoda. Ndi Avré a bé kon woñi i sôblana. Inyuki? A nkal le: “I bé nene me wee, me bé bé le me noñ mabal ma pua yem.” Avré a bé hoñol le a’ la bé yônôs minson b’a ti nye dilo di nlo. Jon a nkônde le: “Me bé kon woñi le b’a tiga bat me le me soohe inyu likoda, le me lôôs minkwel, tole me éga likoda li likalô.”

⁵ Yak hingonda hiada le Hannah, hi hi gwé 18 nwii, hi bé hoñol le hi kôli bé. Bagwal bé ba bé Mbôgi Yéhôva. Ndi to hala, a bé bé nkwoog nkaa le a yé le a niñ inoñnaga ni matiñ ma Yéhôva. Inyuki? Hannah a bé yan libak jé. Ngim mangéda, i bé i pam le mahoñol ma, ma tééñga nye ngandak kayéle a nôgha nyuu yé njôghe. A nkal le: “Me m’a kal bé mut nye ki nye jam me bé boñ, to bagwal bem, me bé hoñol le Yéhôva a ta bé le a neebe le me gwélél nye inyu ndutu me bé nôgha nyuu yem.”

6. Kii bé kéñ Vanessa i sôblana?

⁶ Woñi u mawanda més. Vanessa nu a gwé 22 nwii, a nkal le: “Me bééna liwanda li ñem nyuu jada, li me bi boma ibôdôl behee.” Ndi liwanda li Vanessa li bé ti bé nye makénd i yônôs ngôñ yé i sôblana. Hala a bé tééñga Vanessa ngandak, a nkal le: “Kiki i bé me ndutu i bot mawanda, me bé badba lelaa m’a boñ ibale me nwaa ba liwanda jé, me ga la ha bé bana liwanda li ñem nyuu lipe.”

7. Kii Makayla a bé kon woñi, inyuki?

⁷ Woñi i boñ béba keñi. Makayla a bééna nwii mintan ngéda ba bi pémés manyañ nu munlôm i ntôñ. Mu kii a bé nañ, a bi tehe ndutu bagwal bé ba bi bana inyu maboñok ma manyañ. Makayla a nkal le: “Me bé kon woñi le  ibale me nsôblana, ndi me boñ béba keñi, b’a héya me ntôñ, kayéle hala a lôôha tééñga bagwal bem.”

8. Kii i bé kônha Miles woñi?

⁸ Woñi u ngolba. Isañ Miles bo nwaa wé nu mondo ba yé Mbôgi Yéhôva, ndi nyañ nye a ta bé yo. Miles a nkal le: “Me bi tégbaha 18 nwii ni m’ma yem, me bé kon woñi i kal nye le me gwé ngôñ i sôblana. Inyule me bi tehe nye a mbep unup ngéda pua yem a bi yila Mbôgi Yéhôva. Me bé kon woñi le a ntééñga me.”

9. Kii i ga bôña ngeñ u ga nigil i pam limbe likala Yéhôva a yé gwéha, a bak ki wongut?

⁹ Adam bo Éva ba bi tjél gwélél Yéhôva inyule ba bi hôlôs bé gwéha keñi inyu yé. Ndi to hala, Yéhôva a nwas bo i niñ jôga di dilo inyu boñ le ba bana bon, ba pohol ki lelaa b’a néñés bo. Bikuu bi bi kwél Adam bo Éva bi bi unda le ba bi jôñôp i ndogbene Yéhôva. Man wap nu mañ a bi nol nu sôk mbus ngi njom, mbus ngéda, béba ni énél i mbanda bi bi yon ni nkoñ isi wonsôna. (Bibôdle 4:8; 6:11-13) Ndi, Yéhôva a bi léba njel ipe inyu tohol bon ba Adam bo Éva bobasôna ba ba bé lama bana ngôñ i gwélél nye. (Yôhanes 6:38-40, 57, 58) Kiki u nke ni bisu i nigil ipam limbe likala Yéhôva a yé gwéha a bak ki wongut, gwéha yoñ inyu yé i ga kônde hol. U ga tjél nigle ndémbél i Adam bo Éva, u ti ki wemede nkikip yak Yéhôva.

10. Inyuki i soñda kaat Tjémbi 19:8 i nla hôla we i gwélél Yéhôva?

¹⁰ Ke ni bisu i yi njee a yé Yéhôva. Kiki w’a kônde ke ni bisu i yi njee a yé Yéhôva, hala ki nyen u ga bana bôdôl le u nla gwélél nye loñge. Avré, nu di mbôk sima, a nkal le: “Bôdôl yem ipañ Djob i bi kônde let mu kii me bé soñglak, me soñdaga mbônga u nlébna i kaat Tjémbi 19:8.” (Añ.) Ngéda Avré a bi tehe lelaa Yéhôva a nyônôs mbônga u, gwéha yé inyu  Djob i bi kônde hol. U héya le gwéha i nlédés bôdôl di gwé ipañ Djob, i nhôla ki bés i bok mis més yak Yéhôva ni i jam a mbémél bés. Hannah nu di mbôk sima a nkal le: “Lisoñgol ni yigil yem i Bibel, bi bi hôla me i yimbe le ngéda me nôgha memede njôghe hala a ntééñga yak Yéhôva ngandak.” (1 Pétrô 5:7) Hala a bi boñ le Hannah a yila ‘mboñ bañga i Djob.’ (Yakôbô 1:22) Mam ma bi sôk lelaa? A nkal le: “Ngéda me ntehe nseñ me ñôt i nôgôl Yéhôva, gwéha yem ipañ yé i nkônde hol. I len ini me yé nkwoog nkaa le Yéhôva a’ hôla me ngéda me gwé ngôñ.” Hannah a bi pam i yémbél ngôñ a bééna i nôgha nyemede njôghe. A bi ti nyemede nkikip yak Yéhôva, a sôblana ki.

11. Kii Vanessa a bi boñ inyu bana biloñge bi mawanda, kii hala a niiga bés?

¹¹ Pohol mawanda moñ ni pék. Vanessa nu di mbôk sima, a bi sôk nôgda le liwanda jé li bé gwés bé le a gwélél Yéhôva. Jon a bi mélés liwanda li. Ndi Vanessa a bi telbene bé ha. A bi sal ni ngui inyu bot mawanda ma mondo ikété likoda. A nkal le ndémbél i Nôa ni lihaa jé i bi hôla nye. A nkônde le: “Bôt ba bé gwés bé Yéhôva bon ba bé kéña bo, ndi ba bi tééda maada malam ipôla yap.” Vanessa a bi yila nsañal mbus sôble yé. I len ini a nkal le: “Hala a bi hôla ndik bé me i bot mawanda i likoda jem, ndi yak makoda mape.” Yak we u nla bana mawanda malam, ibale u mboñ kii yosôna u nla inyu yoñ ngaba nson Yéhôva a bi ti bés.​—Matéô 24:14.

12. Umbe ntén woñi Adam bo Éva ba bééna bé, kii i bi sôk pémél bo?

¹² Bana woñi u u kôli. Woñi umpe u yéne bés nseñ. Kiki hihéga, di nlama kon woñi i suñgaha Yéhôva ñem. (Tjémbi 111:10) Ibale Adam bo Éva ba bana i nya woñi i, ki ba bi ndogbene bé Yéhôva. Ndi ba bi ndogop. Mbus ndok yap, ba bi tibil nok le ba bé bikwéha bi bôt. Ba bé ndigi le ba lôôs bon bap béba ni nyemb. Kiki ba bé tehe, ba  nôgdaga libak jap ha ngéda i, ba bi bôdôl nôgda wonyuu inyu nso wap, ba yéñ tjai inyu hôba.​—Bibôdle 3:7, 21.

13-14. (a) Inoñnaga ni kaat 1 Pétrô 3:21, inyuki di nlama bé lôôha kon nyemb woñi? (b) Mambe manjom di gwé i gwés Yéhôva?

¹³ Tolakii di nlama kon woñi i boñ mam ma nhindha Yéhôva ñem, di nlama bé lôôha kon nyemb woñi. Yéhôva a bi néhne bés njel i bana niñ boga. Ibale di mboñ béba keñi, ndi di tam yo ni ñem wés wonsôna, Yéhôva a ga nwéhél bés. A ga nwéhél bés inyule di nhémle sesema i binoñ i Man wé. Njel i nlôôha ilam inyu unda i hémle i, i yé le di ti bésbomede nkikip, mbus di sôblana.​—Añ 1 Pétrô 3:21.

¹⁴ Di gwé ngandak manjom i ntinde bés i gwés Yéhôva. U héya le a nti bés mam malam hiki kel, a niiga ki bés maliga inyu yé ni inyu mimbônga nwé. (Yôhanes 8:31, 32) A bi ti bés likoda li bikristen inyu éga bés ni inyu nit bés. A nhôla bés i hônba mandutu més len, a tinak ki bés botñem i niñ i boga ni boga i het béba yo ki yo y’a ba ha bé. (Tjémbi 68:20; Masoola 21:3, 4) Ngeñ di nyoñ ngéda i hoñol mam momasôna Yéhôva a ma boñ inyu unda le a ngwés bés, hala a ntinde bés i gwés nye. Ngéda di ngwés Yéhôva, di ga pam yak i bana woñi u kôli. Hala wee woñi i unbaha i Nwet di nlôôha gwés.

15. Lelaa Makayla a bi yémbél woñi i kwo i béba keñi?

¹⁵ Makayla, nu di mbôk sima, a bi yémbél woñi i boñ béba keñi ngéda a bi tibil nok le, Yéhôva a nyégi i nwéhél. A nkal le: “Me bi nok le bés bobasôna di yé bikwéha, di mboñ ki mahôha. Ndi me bi nok ki le Yéhôva a ngwés bés, a yé ki bebee i nwéhél bés ni njel binoñ.” Gwéha yé inyu Yéhôva i bi tinde i sita i, i ti nyemede nkikip ni i sôblana.

16. Lelaa Miles a bi kôhna mahôla inyu kolba ngolba?

¹⁶ Miles, nu a bé kon woñi le nyañ a’ kolba makidik mé i sôblana, a bi yéñ mahôla ipañ ngwélél makiiña. Miles a nkal le: “Yak nye a bi nañ i ndap lihaa i het ngwal wada ndigi nyen a bé Mbôgi Yéhôva. A bi hôla me i hek pék inyu yi kii me bé le me kal m’ma inyu kwés nye nkaa le pua bé nyen a bé tinde me i sôblana, le hala a bé toi makidik mem.” I yé maliga le nyañ Miles a bi kon bé maséé ni makidik ma. Sôk bi sôk, a bi pam i ndap, ndi a bi téñbe ni makidik mé. A nkal le: “I yi mam malam Yéhôva a ma bôñôl me i bi lôôha tihba me. Ngéda me nsoñda sesema i binoñ Yésu a bi ti, me nôgda ipam limbe likala Yéhôva a ngwés me. Hala  a bi tinde me i ti memede nkikip yak Yéhôva, ni i sôblana.”

17. Imbe pôla di gwé?

¹⁷ Ngéda Éva a bi je litam li e i wom Éden, a bi ndogbene Isañ. Ngéda yak Adam a bi boñ nlélém, a bi unda le a bé yi bé ti mayéga to ndék inyu mam malam momasôna Yéhôva a bi bôñôl nye. Bés bobasôna di gwé pôla i unda ipam limbe likala di ta bé maséé ni makidik ma Adam bo Éva. Ngéda di nyoñ makidik i sôblana, di ñunda Yéhôva le di neebe le nyen a gwé kunde i kal bés kii i yé loñge ni kii i yé béba. Ha ngéda i, di ñunda le di ngwés Tata wés, di bôdlak ki nye ñem.

18. Lelaa u nla pam i gwélél Yéhôva loñge?

¹⁸ I ndutu di mboma i mbus sôble yés i yé le di niñ hiki kel inoñnaga ni matiñ ma Yéhôva, he més bé. Ndi u kon bañ woñi, didun di bôt di mboñ hala hiki nwii. Yak we u nla boñ kiki bo ibale u nke ni bisu i bana njôôñ yigil i Bibel; ibale u ntôl bé makoda; ni ibale u nyoñ ngaba ni makénd i tjam mam u nigil inyu Isoñ nu gwéha. (Lôk Héber 10:24, 25) Ngeñ u nsômbôl yoñ makidik, noñ mabéhna Yéhôva a nti we ni njel Bañga yé ni ntôñ wé. (Yésaya 30:21) Sôk i nsôk, yom yosôna u ga boñ i ga too.​—Bingéngén 16:3, 20.

19. Kii u nlama bigda hiki ngéda, inyuki?

¹⁹ Ngéda u nke ni bisu i nôgda lelaa maéba ma Yéhôva ma yéne we nseñ, gwéha yoñ inyu yé ni inyu matiñ mé i ga kônde hol. Yom to yada Satan a ñunda we i ta bé le i boñ le u kôm Yéhôva mbus. Noode le hégda yom w’a ba mbus hikôô hi nwii. U ga béñge makidik u yoñ i sôblana kiki ma ma nlôôha malam ikété makidik momasôna u bi yoñ!