1. Aha do na diulahon si Adam dohot si Hawa jala aha do hasilna?

ISE do sasintongna na ingkon manontuhon na denggan dohot na roa? Tingki diallang si Adam dohot si Hawa parbue ni hau na di porlak Eden, on patuduhon ndang porsea be nasida tu Jahowa dohot tu aturanna. Gabe nasida sandiri do na manontuhon dia na denggan dohot na roa. (1 Mus. 3:22) Aha ma hasilna? Gabe ndang marale-ale be nasida tu Jahowa. Ndang boi be nasida mangolu salelengna. Angka pinomparna pe gabe mardosa ma jala mate. (Rom 5:12) Gabe susa ma sude halak alani keputusan ni nasida.

2-3. (a) Aha do na diulahon sahalak Etiopia tingki marbarita si Pilippus tu ibana? (b) Pasu-pasu aha do na tadapot molo dung tardidi, jala sungkun-sungkun aha do na laho taulas?

² Imbar do si Adam dohot si Hawa tu sahalak Etiopia. Denggan do dijangkon halak Etiopia i tingki marbarita si Pilippus tu ibana. Mansai arga do di ibana aha naung diulahon Jahowa dohot Jesus. I do alana pintor taronjar rohana asa tardidi. (Ul. 8:34-38) Suang songon i ma nang hita, tingki tardidi jala talehon dirinta tu Jahowa, on patuduhon na taargai do aha naung diulahon Jahowa dohot Jesus tu hita. Jala on patuduhon, na porsea do hita tu Jahowa dohot aturanna taringot na denggan dohot na roa.

³ Rimangi ma pasu-pasu na boi tadapot molo manomba Jahowa! Lehonon ni Jahowa ma tu hita sude na so boi didapot si Adam dohot si Hawa, dohot ma i hangoluan salelengna. Molo porsea hita tu tobusan ni Jesus  Kristus, salpuhonon ni Jahowa ma hasalaanta jala ias ma panggora ni rohanta. (Mat. 20:28; Ul. 10:43) Gabe sada keluarga do hita sude dohot angka sisomba Jahowa di liat portibi on. Jala dilehon do tu hita pangkirimon na mansai denggan di ari na naeng ro. (Joh. 10:14-16; Rom 8:20, 21) Alai nang pe songon i, adong do piga-piga halak na gabe mabiar mangalehon dirina tu Jahowa jala tardidi. Aha do na mangambati sasahalak gabe ndang olo tardidi? Jala songon dia carana mangadopi i?

4-5. Aha do na diadopi si Avery dohot si Hannah?

⁴ Ndang marpos ni roha. Sitindangi ni Jahowa do natua-tua ni si Avery. Ditanda halak do bapakna sahalak na burju jala sintua na ringgas. Alai mabiar do si Avery tardidi. Boasa? Didok ibana, “Ninna rohangku, ndang boi hubahen songon na dibahen bapa.” Mabiar do si Avery molo dilehon tugas di parpunguan. Didok ibana muse, “Mabiar do ahu molo disuru annon martangiang di parpunguan, marjamita, manang manguluhon kelompok dinas.”

⁵ Si Hannah na marumur 18 taon, hea do mangkilala ndang mararga be dirina. Jala didok rohana ndang boi diihuthon ibana prinsip ni Bibel. Tingki lungun rohana, olo do ibana mangalukai dirina sandiri. Alani i, gabe lam susa ma dihilala ibana. Hape, Sitindangi do natua-tuana. Didok ibana, “Ndang hea hupaboa manang tu ise pe aha na huulahon, dohot ma i tu natua-tuangku. Jala didok rohangku, ndang arga be ahu di Jahowa.”

6. Aha do na mambahen si Vanessa mabiar tardidi?

⁶ Pengaruh sian dongan. Si Vanessa na marumur 22 taon mandok, “Adong donganku na mansai burju, jala nunga leleng hami mardongan.” Alai, ndang dijujui donganna i si Vanessa asa tardidi. Gabe susa ma dihilala ibana jala didok, “Maol do mangalului dongan na burju. Alani i, mabiar do ahu molo ndang mardongan be hami. Jala mabiar do ahu molo ndang adong donganku.”

7. Aha do na dihabiari si Makayla, jala boasa?

⁷ Mabiar molo mangulahon na sala. Tingki marumur 5 taon si Makayla, dipecat ma itona. Saleleng martaon-toan, diida ibana mansai lungun do roha ni natua-tuana alani itona i. Alani i gabe didok ibana ma, “Gabe mabiar ahu tardidi. Molo huulahon annon na sala,  dipecat ma ahu. Gabe lam susa ma annon natua-tuangku.”

8. Aha do na dihabiari si Miles?

⁸ Mabiar molo adong na mangorai. Sitindangi Ni Jahowa do Bapak ni si Miles dohot omak tirina. Alai omak na manubuhon ibana, ndang Sitindangi. Didok si Miles, “Rap do ahu dohot omakku saleleng 18 taon. Alai tingki naeng tardidi ahu, mabiar do ahu paboahon tu omak. Alana hea do huida ibana muruk ala gabe Sitindangi bapakku. Alani i, gabe mabiar do ahu muruk annon omak tu ahu.”

9. Molo diparsiajari hamu holong dohot hasabaron ni Jahowa, on boi mangonjar rohamuna mangulahon aha?

⁹ Ala ndang marsitutu si Adam dohot si Hawa mangkaholongi Jahowa, gabe ndang dioloi nasida Debata. Nang pe songon i, diloas Jahowa dope nasida mangolu, marianakhon jala pagodang-godangkon ianakhonna. Ujungna, parohon hasusaan do keputusan na dibahen si Adam dohot si Hawa. Anak siangkangan ni nasida, mambunu anggina na so marsala. Jala gabe lam godang ma hajahaton di tano on. (1 Mus. 4:8; 6:11-13) Alai, marsangkap do Jahowa laho paluahon pinompar ni nasida na olo manomba Ibana. (Joh. 6:38-40, 57, 58) Molo lam diparsiajari hamu songon dia holong dohot hasabaron ni Jahowa, gabe lam holong ma rohamuna tu Ibana. Jala ndang olo be hamu mangulahon songon na diulahon si Adam dohot si Hawa. Gabe taronjar ma rohamuna mangalehon diri tu Jahowa.

10. Songon dia hata di Psalmen 19:8 boi mambahen pos rohamuna laho manomba Jahowa?

¹⁰ Tongtong ma marsiajar taringot Jahowa. Molo lam godang na diparsiajari hamu taringot Jahowa, gabe lam pos ma rohamu laho manomba Ibana. Si Avery songon naung dipaboa mandok, “Gabe lam pos do rohangku tingki hujaha jala hurimangi janji ni Debata di Psalmen 19:8.” (Jaha.) Ala diida si si Avery na sai digohi Jahowa do janjina,  lam holong ma rohana tu Ibana. Holong, ndang holan mambahen hita marpos ni roha, alai diurupi do hita asa mamboto aha na ingkon taulahon na mambahen las roha ni Jahowa. Si Hannah songon naung dipaboa mandok, “Marhite manjaha Bibel dohot pelajaran pribadi, gabe huboto ma, hansit do roha ni Jahowa molo hulungkai diringku sandiri.” (1 Ptr. 5:7) Diulahon si Hannah do aha na diparsiajari ibana. (Jak. 1:22) Aha ma hasilna? Didok ibana, “Ala huhilala laba ni unduk tu Jahowa, gabe lam holong do rohangku tu Ibana. Gabe pos ma rohangku sai diurupi Jahowa do ahu.” Gabe boi ma diadopi si Hannah hasusaanna. Dilehon ibana ma dirina tu Jahowa jala tardidi.

11. Aha do na diulahon si Vanessa laho mamillit dongan, jala aha parsiajaranna tu hita?

¹¹ Mamillit dongan. Songon si Vanessa, gabe diboto ibana ma, donganna i do na mangambati ibana manomba Jahowa. Alani i, ditinggalhon ma donganna i. Jala marsitutu ma ibana mangalului dongan di huria. Didok si Vanessa, sitiruon sian si Noak dohot keluargana do na mangurupi ibana mangulahon i. “Di tingki i, angka halak na so sisomba Jahowa do na adong di humaliang ni si Noak. Alai boi do si Noak dohot keluargana masipatoguan.” Tardidi ma si Vanessa jala gabe perintis. Didok ibana ma, “Saonari ndang holan di huriangku adong donganku, alai adong do di huria na asing.” Hamu pe boi do mangulahon na sarupa. Marsitutu ma mangulahon na dihalomohon roha ni Jahowa.​—Mat. 24:14.

12. Biar na songon dia do na so adong di si Adam dohot si Hawa, jala aha ma hasilna?

¹² Biar mida Jahowa. Ndang sala molo mabiar hita. Umpamana, ingkon mabiar do hita mambahen hansit roha ni Jahowa. (Ps. 111:10) Molo adong biar sisongon on di si Adam dohot si Hawa, tontu ndang dialo nasida Jahowa. Hape gabe dialo nasida do Jahowa. Alani i, gabe mardosa ma nasida tu Jahowa jala diboto nasida ma na dohot do pinomparna mardosa jala mate. Dung diboto  nasida i, gabe maila ma nasida.​—1 Mus. 3:7, 21.

13-14. (a) Hombar tu 1 Petrus 3:21, boasa ndang pola pabiarhu be hita tu hamatean? (b) Boasa tahaholongi Jahowa?

¹³ Tutu, porlu do adong di hita biar asa unang mambahen hansit roha ni Jahowa. Alai nang pe songon i, ndang porlu hita pabiarhu tu hamatean. Alana, boi do hita mangolu salelengna dibahen Jahowa. Nang pe mardosa hita, disalpuhon Jahowa do hasalaanta. Alani i, molo tapatudu haporseaon tu tobusan ni Jesus, disesa do dosanta. Alai sada cara na boi taulahon laho patuduhon haporseaon, i ma molo talehon dirinta tu Jahowa jala tardidi.​—Jaha 1 Petrus 3:21.

¹⁴ Godang do alasanta laho mangkaholongi Jahowa. Ndang holan ala na diparade Ibana na tahaporluhon ganup ari, alai diajari do muse hita taringot hasintongan. (Joh. 8:31, 32) Dilehon do muse tu hita huria Kristen na boi manogu-nogu jala mangurupi hita. Sai diurupi do hita tingki mangadopi hasusaan jala dilehon do tu hita pangkirimon laho mangolu salelengna jala tongtong marlas ni roha. (Ps. 68:20; Pgk. 21:3, 4) Molo tarimangi do balga ni holong ni Jahowa tu hita, gabe lam holong ma rohanta tu Ibana. Molo holong do rohanta tu Jahowa, gabe adong ma di hita biar mida Ibana. Jala molo tahaholongi do Jahowa, tontu ndang olo hita mambahen hansit rohana.

15. Aha do na mambahen si Makayla gabe ndang mabiar?

¹⁵ Songon si Makayla, ndang mabiar be ibana dung diboto na rade do Jahowa manalpuhon hasalaan. Didok ibana, “Huboto do, sude hita ndang sempurna jala olo do mangulahon na sala. Alai gabe huboto ma muse na holong do roha ni Jahowa tu hita jala disalpuhon do hasalaanta i marhite tobusan ni Jesus.” Alani holongna tu Jahowa, gabe taronjar ma rohana mangalehon dirina tu Jahowa jala tardidi.

16. Aha do na mangurupi si Miles gabe ndang mabiar?

¹⁶ Si Miles, na mabiar diorai omakna laho tardidi, mangido tudu-tudu sian pengawas wilayah. Didok ibana, “Omak ni pengawas wilayah on pe, ndang Sitindangi. Diurupi do ahu asa boi paposhon roha ni omakku, na ahu sandiri do mamillit laho tardidi, ndang na dipaksa bapa.” Ndang lomo roha ni omakna tu keputusanna i. Ujungna, laho ma ibana sian jabu ni omakna i jala dipillit laho tardidi. Didok ibana muse, “Mamparsiajari taringot aha naung dibahen Jahowa tu ahu, mambahen las rohangku. Jala tingki hurimangi taringot tobusan ni Jesus, gabe huboto ma balga ni holong ni  Jahowa tu ahu. On mangonjar rohangku mangalehon diri tu Jahowa jala tardidi.”

17. Aha do na boi tapatudu?

¹⁷ Tingki diallang si Hawa parbue ni hau na di porlak Eden i, on patuduhon na mangalo do ibana tu Jahowa. Tingki dohot si Adam mangallang parbue ni hau i, on patuduhon ndang diargai ibana angka na denggan na dibahen Jahowa tu ibana. Sude hita, boi do patuduhon na unduk hita tu Jahowa jala mangargai sude naung diulahon Ibana tu hita. Marhite tardidi, tapatudu do tu Jahowa na pos rohanta holan Ibana do na marhak manontuhon aha na denggan dohot na so denggan tu hita. Jala tapatudu ma na holong do rohanta jala porsea tu Ibana.

18. Dung tardidi, aha do na ingkon diulahon hamu?

¹⁸ Dung tardidi, ingkon tongtong do taulahon na dihalomohon Jahowa, ndang na tahalomohon. Nunga marjuta naposo ni Debata naung mangulahon i. Hamu pe, boi do songon nasida. Alani i, tongtong ma parsiajari Bibel, mardongan tu angka halak di huria, jala ringgas marbarita. (Heb. 10:24, 25) Tingki naeng mambahen keputusan, tangihon ma poda sian Jahowa marhite Bibel dohot organisasina. (Jes. 30:21) Molo diulahon hamu i, boi ma hamu marhasil.​—Poda 16:3, 20.

19. Aha do na ingkon tongtong diingot hamu, jala boasa?

¹⁹ Molo tongtong diingot hamu godang do laba ni tudu-tudu na sian Jahowa, gabe lam holong ma rohamu tu Ibana dohot tu aturanna. Jala aha pe na dibahen Sibolis, ndang boi i mangambati hamu manomba Jahowa. Bayangkon ma ngolumuna dung marribu taon. Tingki i, las do rohamuna ala nunga mambahen keputusan asa tardidi, jala i ma keputusan na dumenggan di ngolumuna!