1. Sonaha do ujungni pilihan na ibahen si Adam pakon si Hawa?

PANGAHAPMU, ise do na boi mambahen aturan pasal na madear ampa na masambor? Sanggah ipangan si Adam pakon si Hawa buah humbani hayu pambotohan na madear ampa na masambor, taridah ma sonaha pangahap ni sidea bani aturan ni Jahowa. Lang porsaya sidea hu Bani ampa aturan-Ni. Sidea sihol manontuhon sandiri pasal na madear ampa na masambor. (1 Mus. 3:22) Tapi ujungni lang boi be sidea marhasoman pakon Jahowa anjaha lang boi manggoluh sadokah ni dokahni. Ginomparni pe gabe dihut mardousa janah matei. (Rom 5:12) Tangkas ma sambor do ujungni pilihan na ibahen sidea ai.

2-3. (a) Aha do na ibahen pagawai hun Etiopia dobkonsi si Pilippus marbarita hu bani? (b) Pasu-pasu aha do na dapot hita anggo ra ididi, janah sungkun-sungkun aha ma na laho iulas hita?

² Tapi legan do na ibahen pagawai istana hun Etiopia pakon na ibahen si Adam ampa si Hawa. Sanggah si Pilippus marbarita hubani pagawai ai, ihargai ia do pambahenan ni Jahowa ampa Jesus. Halani ai mintor ididi do ia bani ari ai. (Lah. 8:34-38) Songon pagawai ai, anggo hita mangondoskon diri hubani Naibata, on patuduhkon anggo hita mangkargai pambahenan ni Jahowa pakon Jesus. Anjaha porsaya do hita pitah Jahowa do na talup manontuhon na madear ampa na sambor.

³ Pingkirhon ma pasu-pasu na dapot hita anggo ra hita mangidangi Jahowa. Aha na dob magou ibahen si Adam pakon si Hawa hinan, bereon ni Jahowa do ai use hubanta. Umpamani, hita boi manggoluh sadokah ni dokahni. Marhitei tobusan, dousanta boi isasap anjaha gabe borsih ma panggora ni uhurta. (Mat. 20:28; Lah. 10:43) Hita  pe boi gabe bagian humbani kaluarga ni Naibata anjaha mandapot pasu-pasu bani ari simagira. (Joh. 10:14-16; Rom 8:20, 21) Hassi pe sonai tong do adong na mabiar mangondoskon diri bani Naibata. Aha do na mambahen sidea mabiar? Anjaha aha do na mangurupi sidea ase ulang mabiar?

4-5. Aha do na iahapkon si Avery pakon si Hannah?

⁴ Lang porsaya diri. Saksi Jahowa do bapa ni si Avery. Sada sintua na parholong janah bujur do bapani ai. Hassi pe sonai, mabiar do si Avery ididi. Mase? “Huahap lang boi songon bapangku ahu”, nini si Avery. Pangahapni lang boi ia mandalankon tanggung jawab na ibere kuria hu bani. “Mabiar do ahu anggo isuruh mambobahon tonggo, marambilan, atap pe mambobahon partumpuan laho marbarita.”

⁵ Dong homa si Hannah na marumur 18 tahun. Saksi Jahowa do homa namatorasni. Hassi pe sonai gati do ia lang porsaya bani dirini. Pangahapni lang tarbahensi laho mandalankon aturan ni Naibata. Mase sonai? Pangahapni lang maharga dirini. Sipata halani pusok uhurni, sangaja do ia mambahayahon dirini. Nini do, “Lang ongga hupatugah ai bani ise pe, tarmasuk namatorasku.” Nini use, “Huahap lang holong Jahowa hubangku halani sonon pambahenanku.”

6. Aha do na manlanglangi si Vanessa ididi?

⁶ Pangaruh ni hasoman. Si Vanessa na marumur 22 tahun mangkatahon, “Dong sada hasomanku na bujur tumang janah domma dokah hanami marhasoman.” Tapi hasomanni ai lang marosuh anggo ia ididi gabe Saksi Jahowa. On ma na mambahen sunsah si Vanessa. Nini do, “Ahu lang urah marhasoman pakon na legan. Anggo lang huhasomani be ia, lang dong be holi hasomanku.”

7. Aha do na ihabiari si Makayla, janah mase?

⁷ Mabiar holi mambahen hasalahan. Sanggah marumur lima tahun si Makayla, ipecat ma abangni. Ididah si Makayla pusok tumang do namatorasni halani pambahenan ni abangni ai. Nini si Makayla ma, ‘Mabiar do ahu ididi. Porini lepak pambahenanku, gabe ipecat ma ahu. Lambin pusok ma holi uhur ni namatorasku.’

8. Aha do na ihabiari si Miles?

⁸ Mabiar igilai kaluarga. Domma marsirang bapa pakon inang ni si Miles.  Anggo bapani Saksi Jahowa do, tapi inangni lang. Nini do, ‘Rap pakon inang do ahu tading sadokah 18 tahun. Tapi mabiar ahu patugahkon bani inang anggo ahu sihol ididi. Hinan sogam do uhurni mangidah bapa halani gabe Saksi Jahowa. Halani ai mabiar ma ahu igilai inang anggo ididi ahu.’

9. Aha do gunani anggo irimangi hanima holong ampa hasabaron ni Jahowa?

⁹ Si Adam pakon si Hawa lang ra mangidangi Jahowa halani sidea lang mangkaholongi-Si. Hassi pe sonai, ipaturut Jahowa do sidea marginompari janah pagodangkon niombahni mangihutkon carani sidea sandiri. Tapi mintor taridah ma na oto do sidea janah sambor do ujungni halani lang ra mangihutkon Jahowa. Ibunuh anakni na sikahanan ma anggini anjaha lambin bahat do hajahaton ampa na margijang ni uhur. (1 Mus. 4:8; 6:11-13) Hassi pe sonai, sihol do Jahowa paluahkon ginompar ni si Adam na ra mangidangi-Si. (Joh. 6:38-40, 57, 58) Anggo irimangi hanima sonaha banggalni holong ampa hasabaron ni Jahowa, lambin holong ma hanima hu Bani. Anjaha lang ra hanima mangihutkon si Adam pakon si Hawa. Gabe sihol ma hanima mangondoskon diri bani Jahowa.

10. Domu bani Psalmen 19:8 aha do na mangurupi hanima ase tongtong mangidangi Jahowa?

¹⁰ Totap marlajar pasal Jahowa. Lambin bahat na iparlajari hanima pasal Jahowa, lambin pos ma uhurnima anggo hanima boi tongtong mangidangi-Si. Si Avery na ipatugah nongkan ai mangkatahon, “Gabe porsaya diri ma ahu dob hubasa janah hurimangi janji ni Jahowa na isurat bani Psalmen 19:8.” (Basa.) Sanggah iahapkon si Avery sonaha Jahowa pasaudkon janji-Ni, lambin holong ma uhurni hu Bani. Holong sisonai do homa na mangurupi hita ase lang mangkorjahon aha pe na mambahen borit uhur-Ni. Si Hannah na ipatugah nongkan ai pe mangkatahon, “Dobkonsi lambin  bagas huparlajari Bibel, gabe huarusi ma anggo huhorjahon na mambahayahon diringku, dos do ai na mambahen borit uhur ni Jahowa.” (1 Ptr. 5:7) Jadi marusaha ma si Hannah mandalankon hata ni Naibata. (Jak. 1:22) Sonaha hasilni? Nini do, “Dob huahapkon sandiri gunani manangihon Jahowa, lambin holong ma uhurhu hu Bani. Pos do uhurhu sai tongtong do iurupi Ia ahu.” Ujungni lang be ia mambahen na mambahayahon dirini. Mangondoskon diri ma ia bani Jahowa anjaha ididi.

11. Sonaha si Vanessa boi mandapot bahat hasoman, janah aha do parlajaranni hubanta?

¹¹ Maruhur mamilih hasoman. Si Vanessa na ipatugah nongkan ai ujungni mambotoh anggo hasomanni ai marusaha manlanglangi ia ase lang mangidangi Jahowa. Jadi lang marhasoman be ia pakonsi. Sobali ai marusaha homa ia mangindahi lambin bahat hasoman ibagas kuria. Tarojur do si Vanessa mangusihi si Noak pakon kaluargani. Nini do, “Bani masa ni si Noak bahat do halak na lang mangkaholongi Jahowa. Tapi marsiojuran do si Noak pakon kaluargani.” Dobkonsi ididi, gabe parintis ma si Vanessa. Ia mangkatahon, “Halani marintis, lambin bahat ma hasomanku. Lang pitah hun kuriaku tapi dong do homa hun kuria na legan.” Hanima pe boi do lambin bahat hasomannima anggo ringgas mangidangi Jahowa.​—Mat. 24:14.

12. Biar na sonaha do na lang dong bani si Adam pakon si Hawa, janah sonaha ujungni?

¹² Biar mangidah Jahowa. Sipata dear do anggo adong biar ibagas uhurta. Umpamani, dear do anggo mabiar hita mambahen borit uhur ni Jahowa. (Ps. 111:10) Porini dong biar sisonai bani si Adam pakon si Hawa, tontu lang ra sidea manlawan Naibata. Tapi ilanggar sidea do titah ni Naibata. Dobkonsi ai, gabe buha ma mata ni sidea. Janah ibotoh sidea ma talanjang do sidea. Gabe maila ma sidea janah ibuat ma bulung-bulung laho manutup angkulani. Ibahen sidea sonai halani ibotoh domma mardousa sidea. Ujungni gabe dihut  ma ginomparni mardousa janah matei.​—1 Mus. 3:7, 21.

13-14. (a) Domu bani 1 Petrus 3:21, mase lang pala mabiar hita bani hamatean? (b) Aha do alasanta laho mangkaholongi Jahowa?

¹³ Anggo mabiar hita mambahen borit uhur ni Jahowa tontu lang pala mabiartu hita bani hamateian. Domma ibere Naibata dalan hubanta ase boi manggoluh sadokah ni dokahni. Isasap Jahowa do dousanta anggo ra hita mambahen hamubahon janah porsaya bani tobusan. Cara na sipontingan laho patuduhkon anggo hita porsaya bani tobusan marhitei mangondoskon diri bani Naibata anjaha ididi.​—Basa 1 Petrus 3:21.

¹⁴ Bahat do alasan laho mangkaholongi Jahowa. Sedo pitah halani ibere Ia aha na ihaporluhon hita ase boi manggoluh. Tapi halani iajarhon Ia do homa hasintongan pasal diri-Ni ampa sura-sura-Ni hubanta. (Joh. 8:31, 32) Ibere do tugah-tugah marhitei kuria Kristen. Iurupi Naibata do hita ase totap martahan sanggah dong parsoalan. Anjaha ibere do pangarapan hagoluhan sadokah ni dokahni. (Ps. 68:20; Pangk. 21:3, 4) Anggo irimangi hita sonaha banggal ni holong ni Jahowa hubanta, lambin holong ma hita hu Bani. Halani mangkaholongi-Si, mabiar do hita mambahen borit uhur-Ni.

15. Aha do na mangurupi si Makayla ase lang be mabiar?

¹⁵ Si Makayla na ipatugah nongkan ai, ujungni mangarusi anggo Jahowa ra manasap dousanta. Halani ai lang be mabiar ia. Nini do, “Sasintongni mardousa do ganup jolma janah gati mambahen na lepak. Tapi huarusi ma halani Jahowa mangkaholongi hita, ra do Ia manasap dousanta marhitei tobusan.” Halani holong uhur ni si Makayla bani Jahowa gabe ra ma ia mangondoskon diri anjaha ididi.

16. Aha do na mangurupi si Miles ase ulang mabiar bani inangni?

¹⁶ Si Miles na lang ra ididi halani mabiar igilai inangni, mangindo podah humbani sintua kaliling. Si Miles mangkatahon, “Saksi Jahowa do homa bapani tapi inangni lang. Iurupi ia do ahu sonaha patorangkon bani inang ase porsaya anggo ahu sihol ididi halani haputusanku sandiri, sedo halani ipaksa bapa.” Tapi, manggila do inangni dob ihatahon ia sonai anjaha iusir ma ia hun rumah. Hassi pe sonai totap do idalankon si Miles haputusanni ai. Nini do, “Sanggah huparlajari sonaha bahatni sibere-bere ni Naibata hubangku, gabe holong tumang ma uhurhu Bani. Sanggah hurimangi pasal tobusan ni Jesus, gabe hubotoh ma holong tumang do Jahowa hubangku. On ma na mangojur ahu gabe ra mangondoskon diri hu Bani anjaha ididi.”

17. Aha do na boi ipatuduh hita bani Jahowa?

¹⁷ Sanggah ipangan si Hawa buah ai, taridah ma anggo ia manlawan Naibata. Janah sanggah dihut si Adam mangankon buah ai, taridah ma lang ihargai ia aha na ibahen Jahowa hu bani. Ganup hita boi do patuduhkon anggo hita lang songon si Adam pakon si Hawa. Ihargai hita do pambahenan ni Jahowa. Anggo ididi hita, taridah ma porsaya do hita pitah Jahowa do na talup manontuhon aturan pasal na madear ampa na masambor. Anjaha taridah ma anggo hita mangkaholongi-Si janah porsaya hu Bani.

18. Sonaha ase hanima marhasil ibagas pangidangion?

¹⁸ Dobkonsi ididi, maningon tongtong ma ihorjahon hanima harosuh ni Jahowa, sedo harosuhnima sandiri. Dong marjuta juakjuak ni Jahowa na mangkorjahon sisonai. Hanima pe boi do sonai anggo iparimbagaskon hanima isi ni Bibel, marsaor pakon sanina botou, janah ringgas marbarita. (Heb. 10:24, 25) Sanggah mambahen haputusan, ihutkon hanima ma tugah-tugah na ibere Jahowa marhitei Bibel ampa organisasi-Ni. (Jes. 30:21) Anggo sonai ibahen hanima, tontu marhasil ma goluhnima.​—Pod. 16:3, 20.

19. Aha do na maningon tongtong idingat hanima, janah mase?

¹⁹ Anggo tongtong idingat hanima aha do gunani mandalankon podah ni Naibata, tontu lambin iharosuhkon hanima ma aturan-Ni. Aha pe na ibahen Sibolis lang boi manlanglangi hanima mangidangi Jahowa. Bayangkon ma manggoluh hanima ronsi saribu tahun nari dobkonsi iputuskon hanima ididi. Bani panorang ai, tontu malas do uhurnima. Iahap hanima ma ai do haputusan na sidearan!