1. Ida liña lidin lun Adán tuma Ewa ladüga le hadügübei?

LIDAN bisaminan, ka lunbei lariñaguni ka lan buídubei lumoun le wuribabei? Dan le léiginbei Adán tuma Ewa lídangiñe tin tídibu wewe to lánina lasubudirúniwa le buídubei lumoun le wuribabei, aba harufuduni furangu mafiñerun hamá luagu Heowá ni luagu lilurudun. Aba hanúadirun hagía houngua ka lan buídubei lumoun ka lan wuribabei (Agu. 3:22). Kati heferidirubei lau hadügüni lira? Aba heferidiruni hamadagua luma Heowá luma chansi lun hawinwandun lun súnwandan. Aba giñe hásügüragüdüni figóu luma óunweni houn hadügawagun (Rom. 5:12). Adügati le hadügübei lun ñein lan asufuriruni.

2, 3. a) Ka ladügübei wügüri etiopíana dan le lapurichihanbei Felipe lun? b) Ka burí abiniruni wibihibei dan le wabadiseirun? c) Kaba burí álügüdahani wóunaba?

² Arihatiwa amu lan le ladügübei Adán tuma Ewa lumoun le ladügübei wügüri etiopíana le unbei lapurichiha Felipe. Wéiriti meha leteingiruni wügüri ligía le ladügübei Heowá luma Hesusu luagu, darí lun labadiseirun ouraméme ligía (Adü. 8:34-38). Dan le wederegeragun woungua lun Bungiu ani aba wabadiseirun, ítara kei ladügüni wügüri etiopíana, arufuda wamuti furangu teinki wamani Heowá luma Hesusu luagu le hadügübei wawagu. Arufudatiwa giñe afiñe wamá luagu Heowá ani anha wamá lun ligíarügüñein lan garicha lun lariñaguni ka lan buídubei lumoun le wuribabei.

³ Saminabá luagun burí abiniruni le wibihibei dan le weseriwidun lun Heowá. Aban lídangiñe, emenigini luagu líchugubei lan sun le leferidirubei Adán tuma Ewa woun, kéiburi chansi lun wawinwandun lun súnwandan. Ladüga wafiñen luagu Hesukrístu,  feruduna lumuti Bungiu wafigoun ani ruti aban saminaü darangilati woun (Mat. 20:28; Adü. 10:43). Ani aba hádangiñehadiwa lan lubúeingu Heowá ha áubaña lagundaara ani agurabatiwa aban lubuidun dan ámuñegü (Huan 10:14-16; Rom. 8:20, 21). Lau sun yebe menefán lan buiti le lanügübei weseriwidun lun Heowá, añahein gürigia ha subudi hamaali Heowá ásuhatiña lun hadügüni lememe ladügübei wügüri etiopíana. Ka burí lénrengunga eredehabaliña luéi habadiseirun? Ani ida luba háfuridun lídangiñe lénrengunga burí le?

4, 5. Ka lénrengunga úmabei lagagibudagua Avery tuma Hannah?

⁴ Machouruni. Gefentiña luagu Heowá lagübürigu aban nibureinti gíriti Avery. Aban wügüri inebewati lúguchi keisi úguchili luma keisi wéiyaali lidan afiñeni. Íbini ítara, ladarasahañein meha Avery labadiseirun. Ariñagati: “Mafiñentina meha gayaraabei lan buidu nan ítara kei núguchi”. Ani saminati meha Avery siñabei lan letenirun lun burí buligasion le másiñati lichugúba lan meha lun lárigiñe labadiseirun. Ariñagayati: “Nidiheritina meha luéi hamuriahan numa lun nafurieidun hadan gürigia, níchugun yanu o nasagaruni sétanu lubá apurichihani”.

⁵ Aban meha nibureintu to machourunti tasandiragun tungua Hannah, to 18 irumu tau. Íbini gefén hamá luagu Heowá tiduheñu, hanarimeti meha lanarime machourun lan tasandiragun tungua darí lun tasaminarun siñabei lan tawinwandun úara luma lilurudun Heowá. Anihein meha dan, hanarimeti meha luriban tasandiragun tungua darí lun tabuleseiragun tungua ani adügati meha katei le lúntima wuriba lan tasandiragun tungua. Ariñagatu: “Mabahüdahan numuti houn ni aban luagu le meha nadügübei, ni houn nagübürigu. Saminatina meha mabusenrunbei lan Heowá lun lubúein nan ladüga le meha nadügübei”.

6. Ka eredehabarun Vanessa luéi tabadiseirun?

⁶ Habafu umadagu. Ariñagatu Vanessa, aban nibureintu to 22 irumu tau: “Buiti meha numadagua tuma aban nibureintu to meha nasubudiruboun luagu kéiburi 10 irumu”. Lau sun lira, mebereseguntu meha tumada Vanessa lau tafiñen Vanessa ani míderagun tumutu meha nibureintu tugía Vanessa lun tabadiseirun ani gáriti meha katei le tun Vanessa. Ariñagatu: “Hénrenguti meha nun lun nadügün umadagu ani hanufudetina meha ánhana lan meha adüraaguei numadagua tuma, madaribadina lan meha amu umadaü kei tuguya”.

7. Ka meha uéi tanufudeda Makayla ani ka uagu?

⁷ Anufudei luéi badügün somu figóu wéiriti. Seingü meha irumu tau Makayla dan le labugúnbei tati lídangiñe damuriguaü. Lau lásügürün dan, aba tarihini ida liña lan meha ladügün  le ladügübei tati lun wuriba lan hasandiragun tagübürigu houngua. Ariñagatu: “Wéiriti meha nanufude luéi nadügün aban figóu wéiriti, nabugún lídangiñe damuriguaü ani lun nadügün lun laganwoundun hasufurirun nagübürigu”.

8. Ka meha uéi lanufudeda Miles?

⁸ Anufudei hawéi ha mánharunbaña lun beseriwidun lun Heowá. Gefenti luagu Heowá lúguchi Miles tuma lani lúguchi weiriou, ánheinti lúguchu mama Gefentu. Ariñagati Miles: “Wínwantina tuma núguchu 18 irumu. Ani hanufudetina meha nariñagun tun busén nan nabadiseirun. Ariha numuti ligaburi tóunabun dan le ladügagunbei núguchi lungua Gefentime. Hanufudetina meha luéi giñe tíchugun turobuli nun”.

9. Háfuga kaba asusereda éibume bafurendeirun luagu lanarime luguraasun luma línsiñehabu Heowá?

⁹ Anúadirati Adán tuma Ewa lun meseriwidun hamá lun Heowá ladüga maweirinti meha ínsiñeni le hasandirubei luagu. Lau sun lira, ígirati Bungiu lun hawinwandun sun dan le mégeiwabei lun meha gasaanigu hamá luma lun hanúadiruni hagía houngua ida luba lan meha hagüriaruniña hasaanigu. Fureseti larufuduni le lanügübei ladireirun Adán tuma Ewa luéi Heowá ibidiougua lan meha hau lau hadügüni lira. Aba láfaruni hasaani le ibugañaü lamulen hilagubei ani lau lásügürün dan, aba hanarime hamá gürigia ubouagu ani hawouguounrügüñein meha hasaminara (Agu. 4:8; 6:11-13). Lau sun lira, anihein meha aban aransehani luma Heowá lun lesefuruniña sun ladügawagun Adán tuma Ewa ha busenbaña heseriwidun lun (Huan 6:38-40, 57, 58). Ma hanarimeti luguraasun luma línsiñehabu Heowá? Éibume bafurendeirun luagu burí igaburi le, másiñati ábame lanme línsiñeduntima bun. Mabuserunbadibu badügüni ligiaméme charati libe le ladügübei Adán tuma Ewa, lubaragiñe lira, busenbadibu bederegeruni bibagari lun Heowá.

10. Ka uagu gayara lubéi líderagunibu bararamagun asaminara luagun Sálumu 19:7 lun beseriwidun lun Heowá?

¹⁰ Sigiba afurendeira luagu Heowá. Éibutima bafuredeirun luagu Heowá, ábametima bachoururuni gayara lan beseriwidun lun. Ariñagati Avery ruti lan saragu ichouruni lun láluahan ariñahani luagu le lariñagubei Sálumu 19:7 (aliihabéi) luma lararamagun asaminara luagu le lafurendeirubei. Dan le larihinbalin  Avery ida liña lan lagunfulirun dimurei ligía lidan libagari, aba lederebugudun ínsiñeni le lasandirubei luagu Heowá. Mámarügü adügati ínsiñeni le lun laganwoundun ichouruni le wasandirubei wawougua, ídehati giñe lun wetenirun lun weseriwidun lun Heowá luma lun le labusenrunbei. Ariñagatu Hannah libügürü katei le: “Íderagua lumutina naliihanu Bíbülia luma naturiahanu nábuguarügü lun gunfuranda nani dan le nabuleseiragun nungua, nadügüña giñe lun lasandiragun Heowá lungua wuriba” (1 Fe. 5:7). Áfaaguatu lun tadügüni le tariñagubei Lererun Bungiu (Sant. 1:22). Ida liñati lidin tun Hannah? Tuguyaméme ariñaguboun: “Dan le narihinbalin buiti le lanügübei gaganbadi lun Heowá, aba lederebugudun nínsiñehabu luagu. Guenlé, chouru naali ladundehabadina lan súnwandan danme le nemegeiruni lídehan”. Aba tígiruni Hannah techun lánina tabuleseiragun tungua, aba tederegeruni tibagari lun Heowá ani aba tabadiseirun.

11. a) Ida liña tibihin Vanessa tadügün umadagu buítiña? b) Ka larufudahabei sügǘ le woun?

¹¹ Anúadirabaña bumadagu buidu. Lau lásügürün dan, aba tíchugun Vanessa fe anuhán lan meha tumada eberesehoun luéi teseriwidun lun Heowá. Ábati tadüraaguni umadaguaü ligía. Ani mámarügüñein ligía tadüga Vanessa. Aba giñe táfaagun lun tadügün umadagu lidan damuriguaü. Ariñagati íderagua lanu le ladügübei Noé hama liduheñu: “Kei geyegu haña lan meha hau gürigia ha meseriwidunbaña lun Heowá, madügüntiña umadaguaü hama amu luéidigia hámagua”. Lárigiñe tabadiseirun, aba tagumeserun eseriwida kei prekursora. Guentó, ariñagatu: “Íderagua láadina katei le lun nadügün umadaguaü buítiña, mámarügü lidan damuriguaü le ñein nubéi, gamadaguatina giñe hama amu lidan amu damuriguaü”. Gayaraati giñe badügün umadaguaü buítiña ánhabu áfaagua lun bídehan lau sun biyaraati lidan wadagimanu le ru laalibei Heowá woun lun wadügüni (Mat. 24:14)..

12. Ka meha luwuyeri anufudei masandirun lubéi Adán tuma Ewa ani ida liña lidin houn ladüga katei le?

¹² Ageindaguabá luma banufude ani inebe lan Bungiu bun. Anihein anufudei maribanti. Kéiburi, maribanti lun hanufude wamá wadügün somu katei le mínsiñeti lun Heowá (Sal. 111:10). Lun hamuga meha sandí lani Adán tuma Ewa anufudei le, mebedaagunbaña yebe lun Heowá. Gama lumoun, dan le hebedaagunbei, aba “léfegechun hagu”, lidan amu dimurei, aba gunfuranda hamani furangu afigouhaaña  lan. Hásügüragüdübei meha hafigoun luma óunweni hawagun hadügawagun. Kei aba lan harihini o gunfuranda hamani le gádanbaliña, aba habusigaridun luagu surusu haña lan ani aba hadouragun houngua (Agu. 3:7, 21).

13, 14. a) Según 1 Féduru 3:21, ka uagu moun lumuti lubéi wanufudedun saragu luéi óunweni? b) Ka resun wámabei lun hínsiñe lan Heowá woun?

¹³ Buiti lun wasandirun anufudei luéi wadügün somu katei le mínsiñeti lun Heowá. Le mabuidunbei, wasandirun saragu anufudei luéi óunweni. Ka uagu? Lugundun adügaali Heowá aransehani lun gayara lan wawinwandun lun súnwandan. Ánhawa adüga somu figóu wéiriti ani aba wasakürihan tídangiñe sun wanigi, feruduna lubadiwa ladüga wafiñen luagu lani Liráü sákürifisiu. Aban lídangiñe igaburi lun warufuduni afiñeni ligía lau wederegeruni wabagari lun Heowá ani badisei wagíame (aliihabéi 1 Féduru 3:21).

¹⁴ Anihein saragu resun wama lun hínsiñe lan Heowá woun. Amu luéi katei buiti le líchugubei woun sagü weyu, arufudaha lumuti inarüni woun luagu luma luagu lisuuni (Huan 8:31, 32). Ru laali damuriguaü kristiánu woun lun ladundehaniwa luma lun líderaguniwa. Íderagua lumutiwa lau turobuli le úmabei wagagibudagua sagü weyu ani ruti emenigini woun lun wawinwandun lun súnwandan mafigounga (Sal. 68:19; Aruf. 21:3, 4). Dan le wasaminarun luagu sun le ladügübei Heowá lun larufuduni línsiñehabu woun, aba línsiñedun woun saragu darí lun hanufude wamá luéi wadügün lun lasandiragun lungua wuriba. Anihán anufudei le lunbei wasandiruni.

15. Ida liña tagañeiruni Makayla anufudei luéi tadügün somu figóu wéiriti?

¹⁵ Gañei tumuti Makayla anufudei luéi tadügün somu figóu wéiriti dan le gunfuranda tubalin aranseñu liña lan Heowá súnwandan lun feruduna lániña afigouhatiña ha asakürihabaña. Ariñagatu: “Aba níchugun fe sun lan wagía gafigoun wamá ani chará wagía. Aba giñe gunfuranda nani hínsiñe wamá lun Heowá ani feruduna lániwa seremei lun lebegi esefuruni”. Adügati ínsiñeni le tasandirubei luagu Heowá lun tederegeruni tibagari lun luma lun tabadiseirun.

16. Ka íderagubalin Miles lun lagañeiruni anufudei hawéi ha mánharunbaña lun leseriwidun lun Heowá?

¹⁶ Aba lamuriahan Miles, le meha hanufudebei luéi tíchugun lúguchu turobuli lun danme labadiseirun, ídemuei luma aban óunigiruti sirkuitu. Ariñagati Miles: “Abahüdaguati nun ligiaméme lan meha asuseredubei lun, mama meha gefentu luagu Heowá lúguchu. Íderagua lumutina asaminara luagu dimurei le lunbei nariñaguni tun núguchu lun tafiñerun nuguya lan busenbei nabadiseirun mama lan núguchi afosurubadina”. Wuribati tóunabun lúguchu Miles. Ligía mosu lubéi meha lidin hábiñegiñe lun gayaraabei lan lagunfuliruni le labuserunbei ladügün. Ariñagati: “Hingí lumutu nanigi lau nafurendeirun luagu le adüga laalibei Heowá nuagu. Lau nasaminarun luagu sákürifisiu le ladügübei Hesusu, aba gunfuranda nani hínsiñe nan lun Heowá. Ínchaha lumutina katei le lun nederegeruni nibagari lun luma lun nabadiseirun”.

17. Ka chansi wámabei sun wagía?

¹⁷ Dan le téigibei Ewa lídangiñe tin wewe to lamidanguaboun fuluri agei Edén, tarufuduña meha mabusenrun tani Heowá kei túguchi. Dan le giñe ladügünbalin Adán ligiaméme, larufuduña meha meberesen lan lau sun le adüga laalibei Heowá luagu. Sun wagía gachansintiwa lun warufuduni magundan wamá lau le hadügübei. Dan le wabadiseirun, warufuduñein lun Heowá luagu afiñe wamá ligía lan garichabei lun lariñaguni woun ka lan buídubei luma ka lan wuribabei. Arufuda wamuti giñe hínsiñe lan woun ani afiñe wamá luagu.

18. Ka lunbei badügüni lun buidu lan lidin bun lidan beseriwidun lun Heowá?

¹⁸ Lárigiñe wabadiseirun, mosu wasigiruni lilurudun Heowá sagü weyu, mama walurudun guánarügü. Inarüni hénrengu lan ladügǘn le hínsiñebei lun Heowá, gama lumoun gúnfuli hamuti saragu míñunu gürigia lilurudun Heowá sagü irumu. Gayaraati ítara ban kei hagía. Lun bibihini, lunti gunfuranda banu Bíbülia buidu buidu, hechu buguyame ásügüra dan hama íbirigu ani ayanuha buguyame houn amu lau ubebeni luagu le bafurendeirubei luagu Búguchi le siélubei (Ebü. 10:24, 25). Danme le basaminarun luagun le lunbei badügüni, aganbabéi adundehani le líchugubei Heowá bun tídangiñe Bíbülia luma le tariñagubei lóundarun (Isa. 30:21). Ítarati, buídubei lidin bun lidan bibagari (Ari. 16:3, 20).

19. Ka lunbei baritaguni súnwandan ani ka uagu?

¹⁹ Anhein baritagua súnwandan hu lan ladundehan Heowá, laganwounduba ínsiñeni le basandirubei luagu luma le basandirubei luagu lilurudun. Ladügüba le lun madügün lan sun le láfaagunbei Satanási líchugun bun lun bígiruni beseriwidun lun Heowá. Lídanme milu irumu, danme le basaminarun luagu weyu le babadiseirunbei, ábame bariñagun: “Buiti meha le nanúadirubei!”.