1. Cosa ya perde con kanda Adan y Eva y cosa el resulta?

PARA contigo, quien debe determina si cosa el bueno y si cosa el malo? Cuando ya come kanda Adan y Eva con el fruta del pono de saber del bueno y malo, ya dale sila mira que gendeh sila ta confia con Jehova y na de suyu maga principio. Sila mismo ya decidi si cosa el bueno y malo para kanila. (Gen. 3:22) Pero pensa si cosa kanila ya perde. Ya perde el diila buen amistad con Jehova. Ya perde tambien el diila oportunidad vivi hasta para cuando y ya hace sila pasa pecado y muerte na diila maga anak. (Rom. 5:12) El decicion de Adan y Eva ya resulta na sufrimiento.

2-3. (a) Cosa ya hace el eunuco de Etiopia cuando ya predica con ele si Felipe? (b) Cosa maga bendicion kita ricibi si bautiza kita y cosa maga pregunta kita hay considera?

² Bien diferente el reaccion del eunuco de Etiopia cuando ya predica con ele si Felipe. Por causa na apreciacion del eunuco na cosa ya hace si Jehova y Jesus para con ele, ya bautiza le dayun. (Act. 8:34-38) Igual con ese eunuco, si dedica kita diaton vida con Dios y bautiza, ta dale kita mira que ta aprecia kita con el cosa ya hace si Jehova y si Jesus para kanaton. Ta dale tambien kita mira que ta confia kita con Jehova y ta conoce kita que ele lang el quien debe determina si cosa el bueno y malo.

³ Pensa con el maga bendicion que ricibi kita si sirvi kita con Jehova! Un bendicion amo que hay dale kanaton otravez si Jehova el todo cosa que ya hace perde kanda Adan y Eva incluido ya el oportunidad vivi hasta para cuando.  Por causa na diaton fe con Jesucristo, perdona si Jehova con el diaton maga kamali y dale le kanaton un limpio conciencia. (Mat. 20:28; Act. 10:43) Queda tambien kita parte del maga aprobao siervo de Jehova que ricibi bendicion na futuro. (Juan 10:14-16; Rom. 8:20, 21) Maskin pa na este maga beneficio, tiene cuanto quien ya aprende acerca con Jehova el tan alang-alang sigui con el ejemplo del eunuco de Etiopia. Cosa posible ta sangga kanila para bautiza? Y paquemodo sila puede enfrenta con ese maga dificultad?

4-5. Cosa dificultad ya enfrenta el dos jovenes, kanda Avery y Hannah?

⁴ Falta confianza. Testigo de Jehova el maga mayores de Avery. Conocido con el de suyu tata como un amable tata y buen anciano. Pero, tan alang-alang si Avery bautiza. Porque? “Ta pensa yo que gendeh yo queda igual de bueno con el de mio tata,” ya habla le. Ta pensa tambien si Avery que gendeh le puede cumpli con el maga responsibilidad que posible dale con ele na futuro. “Tan lingasa yo acerca si manda conmigo reza na publico, dale discurso o guia con el grupo na predicacion.”

⁵ Si Hannah que 18 año el edad, falta tambien confianza na cuerpo. Maga siervo de Jehova el de suyu mayores. Pero maskin pa ansina, tan duda le si puede ba le vivi asegun na maga principio de Jehova. Porque? Tiene bajo mirada si Hannah con el de suyu mismo cuerpo. Tiene vez, por causa na emocional dolor que ta sinti le, intencional le ta hace sinti duele con el de suyu mismo cuerpo. Y mas ya hace se grabe con el situacion. “Nuay yo con quien ya habla acerca na cosa yo ya hace, maskin na de mio mayores,” ya habla le, “y ta pensa yo que gendeh gayot quierre si Jehova que queda yo de suyu siervo por causa na cosa yo ta hace na de mio cuerpo.”

6. Cosa ya sangga con Vanessa para bautiza?

⁶ Influencia del maga amigo. Si Vanessa que 22 año el edad ya habla, “Tiene yo un amiga que conoce ya yo cerca diez año.” Pero, el amiga de Vanessa nuay interes na cosa le ta creé y nuay con ele suporta na de suyu goal bautiza. Ya sinti duele si Vanessa y ya habla, “Dificil para conmigo busca amiga y tan lingasa yo que si gendeh ya kame amiga, gendeh mas yo puede incuntra otro.”

7. Na cosa tiene miedo si Makayla y porque?

⁷ Miedo man kamali. Cinco año si Makayla cuando yan disfellow el de suyu mayor hermano. Mientras ta engranda le, ya mira le si paquemodo de triste el de suyu mayores por causa na cosa ya sucede. “Tiene yo miedo que si bautizao ya yo,” ya habla si Makayla,  “puede yo hace kamali y despues hay man disfellow conmigo y dale este mas tristeza na de mio mayores.”

8. Na cosa tiene miedo si Miles?

⁸ Miedo na oposicion. Siervo de Jehova el tata y madrasta de Miles, un jovencito, pero gendeh siervo de Jehova el de suyu nana. “Ta queda yo junto con el de mio nana por 18 año,” ya habla si Miles, “y tiene yo miedo habla con ele que quierre ya yo bautiza. Ya mira yo de suyu reaccion cuando ya queda Witness de mio tata. Tiene yo miedo que causa le dificultad conmigo.”

9. Cosa posible el resulta si sabe tu si paquemodo de amable y paciencioso si Jehova?

⁹ Kanda Adan y Eva ya iscuji gendeh sirvi con Jehova por causa cay nuay sila fuerte amor para con ele. Maskin pa ansina, ya permiti kanila si Jehova que vivi para tiene anak y decidi si paquemodo sila hace engranda diila maga anak. El resulta del pagka-independiente de Adan y Eva claro ya dale mira que gendeh justo el diila decicion. El diila mayor anak ya mata con el de suyu hermano y na uliji, el maga gente ya queda violente y canalla. (Gen. 4:8; 6:11-13) Pero tiene manera si Jehova para salva con el todo anak de Adan y Eva quien quierre sirvi con ele. (Juan 6:38-40, 57, 58) Mientras ta aprende tu mas acerca si paquemodo de paciencioso y amable si Jehova, mas queda hondo el de tuyu amor con ele. Manda este move contigo que gendeh sigui con el cosa ya iscuji kanda Adan y Eva sino dedica de tuyu vida con Jehova.

10. Si medita tu con el Salmo 19:7, porque este puede ayuda contigo sirvi con Jehova?

¹⁰ Continua aprende acerca con Jehova. Mientras ta aprende tu mas acerca con Jehova, mas tiene tu confianza que tiene tu buen exito si sirvi tu con ele. Si Avery, que ya menciona enante, ya habla: “Ya tiene yo confianza cuando yan research yo y ya medita con el promesa na Salmo 19:7.” (Le.) Cuando ya mira si Avery que ya cumpli si Jehova con ese promesa, mas ya queda hondo el de suyu amor para con Dios. El amor gendeh lang ta dale kanaton confianza sino ayuda tambien  este kanaton para man focus con Jehova y na cosa le quierre. Si Hannah que ya menciona enante, ya habla: “Por medio na de mio personal lehida de Biblia y estudiada, ya realiza yo que si ta hace yo sinti duele con el de mio cuerpo, ta hace tambien yo sinti duele con Jehova.” (1 Ped. 5:7) Si Hannah ya obedece con el palabra del Dios. (Sant. 1:22) Cosa el resulta? Ya habla le: “Cuando ya mira yo si paquemodo yo ya beneficia cuando ya obedece yo con Jehova, ya tiene yo hondo amor para con ele. Ahora, asigurao yo que hay guia conmigo pirmi si Jehova si necesita yo de suyu ayuda.” Nuay mas ya hace sinti duele si Hannah con el de suyu mismo cuerpo. Ya dedica le de suyu vida con Jehova y ya bautiza.

11. Cosa ya hace si Vanessa para tiene le maga buen amigo y cosa kita puede aprende aqui?

¹¹ Iscuji amigo enbuenamente. Ya realiza si Vanessa que ya menciona enante que el de suyu amiga amo el ta sangga con ele para sirvi con Jehova. Poreso, ya curta le diila amistad. Pero gendeh lang ese el ya hace si Vanessa. Ya hace le esfuerzo para tiene nuevo amiga adentro na congregacion. Ya habla le que el ejemplo de Noe y del de suyu familia amo el ya puede ayuda con ele. “Alrededor kanila el maga gente quien gendeh ta ama con Jehova,” ya habla le, “pero tiene sila buen asosacion como man familia.” Despues le bautiza, ya queda pioneer si Vanessa. Ahora ya habla le, “El pioneering ya ayuda conmigo tiene maga buen amigo gendeh lang na de mio mismo congregacion sino maskin na otro congregacion.” Puede tambien tu incuntra maga buen amigo si pirmi tu hace el trabajo que ya manda kanaton si Jehova.​—Mat. 24:14.

12. Cosa clase de miedo el nuay kanda Adan y Eva y cosa el resulta?

¹² Tiene justo mirada na miedo. Tiene cuanto clase de miedo que bueno para kanaton. Por ejemplo, necesita kita tiene miedo hace un cosa que ta hace triste con Jehova. (Sal. 111:10) Si tiene si Adan y Eva de ese clase de miedo, nuay era sila man rebelde contra con Jehova. Pero yan rebelde sila. Despues sila se hace, ya puede sila realiza que maga pecador sila. Pecado y muerte lang sila puede hace pasa na diila maga anak. Y cuando ya puede sila sabe el diila condicion, ya tiene sila  huya cay desnudo sila y ya tapa sila diila cuerpo.​—Gen. 3:7, 21.

13-14. (a) Asegun na 1 Pedro 3:21, porque kita gendeh necesita tiene por demas miedo na muerte? (b) Cosa maga razon kita tiene para ama con Jehova?

¹³ Necesita kita tiene justo clase de miedo con Jehova pero gendeh kita necesita tiene por demas miedo na muerte. Ya hace manera si Jehova para obtene kita vida eterna. Si ya comete kita culpa pero deverasan kita ya arripinti, si Jehova hay perdona con el diaton culpa. Perdona le kanaton asegun na diaton fe na rescate del de suyu Anak. Uno del maga importante manera que puede kita dale mira diaton fe amo si dedica kita diaton vida con Dios y bautiza.​—Le con el 1 Pedro 3:21.

¹⁴ Manada kita razon para ama con Jehova. Gendeh lang le ta dale el diaton necesidad de cada dia sino ta enseña tambien le el verdad acerca con ele y con el de suyu proposito. (Juan 8:31, 32) Ya dale le el Cristiano congregacion para guia y suporta kanaton. Ta ayuda le kanaton enfrenta con el diaton maga problema ahora y ta dale le kanaton el esperanza que tiene perfecto vida hasta para cuando na futuro. (Sal. 68:19; Rev. 21:3, 4) Si medita kita si paquemodo ya dale mira amor si Jehova para kanaton, mas queda hondo el diaton amor para con ele. Y si ta ama kita con Jehova, hay tiene kita justo mirada na miedo. Tiene kita miedo hace sinti duele con quien kita ta ama, si Jehova.

15. Paquemodo ya puede enfrenta si Makayla con el miedo man kamali?

¹⁵ Si Makayla que ya menciona enante, ya puede enfrenta con el miedo man kamali cuando ya entende le si paquemodo si Jehova ta perdona. “Ya realiza yo que todo kita imperfecto y tan kamali. Y ya puede tambien yo entende que ta ama kanaton si Jehova y hay perdona le kanaton asegun na rescate.” El de suyu amor para con Jehova el ya manda move con ele para dedica de suyu vida con Jehova y bautiza.

16. Cosa ya puede ayuda con Miles para enfrenta con el miedo na oposicion?

¹⁶ Si Miles, quien tiene miedo que man contra con ele de suyu nana para bautiza, ya pidi ayuda con el circuit overseer. “Ya engranda tambien le na un familia que uno lang na de suyu mayores el ta sirvi con Jehova,” ya habla si Miles. “Ya ayuda le conmigo pensa acerca si cosa yo puede habla para hace entende con el de mio nana que iyo mismo el ya decidi bautiza y nuay conmigo forza de mio tata.” Gendeh alegre el nana de Miles na de suyu decicion. Na uliji, necesita le sale na casa del de suyu nana pero nuay le cambia de suyu decicion. “Cuando ya sabe yo el maga buen cosas que ya hace si Jehova para conmigo, bien alegre gayot yo,” ya habla le. “Cuando ya medita yo acerca con el rescate de Jesus, ya realiza yo si paquemodo de grande el amor de Jehova para conmigo. Ese el ya manda move conmigo para dedica de mio vida con Jehova y bautiza.”

17. Cosa oportunidad kita todo tiene?

¹⁷ Cuando ya come si Eva con el fruta na Eden, yan rebelde le con el de suyu Tata. Y cuando ya sigui si Adan na cosa ya hace si Eva, ya dale le mira que nuay le apreciacion na buen cosas que ya hace si Jehova para con ele. Todo kita tiene el oportunidad para dale mira que gendeh kita igual con Adan y Eva. Ta agradece kita el todo cosa ya hace si Jehova para kanaton. Por medio de bautismo, ta dale kita mira con Jehova que ele lang el tiene autoridad determina si cosa el justo y si cosa el malo para kanaton. Prueba este que ta ama y ta confia kita con el diaton Tata.

18. Paquemodo tu tiene buen exito na de tuyu servicio con Jehova?

¹⁸ El dificultad que ta enfrenta kita despues del diaton bautismo amo que vivi asegun na maga principio de Jehova y gendeh diaton mismo. Millones del maga gente el ta vivi na ansina manera. Puede tu queda igual kanila si continua tu hace hondo el de tuyu entendimiento na Palabra del Dios, el Biblia; pirmi man junto con el maga hermano y hermana; y habla con otro si cosa tu ya aprende acerca na de tuyu amable Tata. (Heb. 10:24, 25) Si ta hace tu maga decicion, aplica con el maga consejo de Jehova que ta dale le por medio na de suyu Palabra y na de suyu organizacion. (Isa. 30:21) Y como resulta, hay tiene buen exito el todo tu hay hace.​—Prov. 16:3, 20.

19. Cosa tu debe continua pensa y porque?

¹⁹ Si continua tu pensa si paquemodo tu ta beneficia na guia de Jehova, hay queda hondo el de tuyu amor para con ele y na de suyu maga principio. Y nuay maskin cosa que ofrece si Satanas el puede hace contigo descanza para sirvi con Jehova. Imagina con el de tuyu situacion un mil año desde ahora. Puede tu habla que el de tuyu decicion bautiza amo el de con todo buen decicion tu ya hace!