1. Unsay giwala ni Adan ug Eva, ug unsay resulta?

PARA nimo, kinsay angayng magtakda ug sukdanan sa maayo ug daotan? Dihang mikaon si Adan ug Eva sa bunga sa kahoy sa kahibalo sa maayo ug sa daotan, kini ang klaro nilang gipakita: Wala sila mosalig kang Jehova ug sa iyang sukdanan. Gipili nilang maghimog kaugalingong sukdanan sa maayo ug daotan. (Gen. 3:22) Pero hunahunaa kon unsay nawala nila. Nawala ang ilang maayong relasyon kang Jehova. Nawala sab ang kahigayonan nga mabuhi sa walay kataposan, ug gipasa nila sa ilang mga anak ang sala ug kamatayon. (Roma 5:12) Ang desisyon ni Adan ug Eva miresultag kagul-anan.

2-3. (a) Unsay gihimo sa Etiopianhong eunuko dihang gisangyawan siya ni Felipe? (b) Unsang mga panalangin ang atong madawat dihang magpabawtismo ta, ug unsang mga pangutana ang atong konsiderahon?

² Itandi ang panghunahuna ni Adan ug Eva nianang sa Etiopianhong eunuko nga gisangyawan ni Felipe. Gipabilhan pag-ayo sa eunuko ang gihimo ni Jehova ug Jesus para kaniya nga nagpabawtismo dayon siya. (Buh. 8:34-38) Dihang gidedikar nato ang kaugalingon sa Diyos ug, sama sa eunuko, nagpabawtismo, kini ang klaro natong gipakita: Mapasalamaton ta sa gihimo ni Jehova ug Jesus para kanato. Gipakita sab nato nga misalig ta kang Jehova ug giila nato nga siya ang angayng magtakda kon unsay maayo ug daotan.

³ Hunahunaa ang mga panalangin nga atong nadawat dihang mialagad ta kang Jehova! Usa niana ang paglaom nga mapahimuslan ang tanan nga giwala ni Adan ug Eva, apil ang kahigayonan nga mabuhi hangtod sa hangtod. Tungod sa atong pagtuo  kang Jesu-Kristo, gipasaylo ni Jehova ang atong kasaypanan ug gihatagan tag hinlo nga konsensiya. (Mat. 20:28; Buh. 10:43) Nahimo sab tang bahin sa pamilya ni Jehova, nga iyang giuyonan ug may nindot nga kaugmaon. (Juan 10:14-16; Roma 8:20, 21) Pero bisan pa niining klarong mga kaayohan, ang pipila nagduhaduha sa pagsundog sa Etiopianhong eunuko. Unsa kahay nakapugong sa uban sa pagpabawtismo? Ug unsay ilang buhaton aron dili mapugngan sa mga babag?

4-5. Unsang mga babag ang giatubang sa batan-ong lalaki nga si Avery ug sa batan-ong babaye nga si Hannah?

⁴ Kakulag kompiyansa. Saksi ni Jehova ang ginikanan ni Avery. Ang iyang papa nailhan ingong mahigugmaong amahan ug maayong ansiyano. Pero, nagduhaduha si Avery sa pagpabawtismo. Ngano? Siya miingon: “Nagtuo ko nga dili ko mahimong parehas ka maayo kang Papa.” Naghunahuna sab si Avery nga dili niya makayang dumalahon ang mga responsibilidad nga posibleng madawat niya sa umaabot. “Mahadlok kong paampoon diha sa publiko, magpakigpulong, o manguna sa grupo sa pagsangyaw.”

⁵ Si Hannah, nga 18 anyos, wala gyoy kompiyansa sa kaugalingon. Gipadako siya sa Saksi nga ginikanan. Bisan pa niana, nagduhaduha siya kon masunod ba niya ang sukdanan ni Jehova. Ngano? Si Hannah ubos ug pagtan-aw sa kaugalingon. Usahay, tungod sa iyang gibati, samaran niya ang iyang kaugalingon, nga nakapasamot na hinuon sa iyang kahimtang. “Wala gyod koy gisultihan sa akong gihimo, bisan ang akong ginikanan,” siya miingon, “ug naghunahuna ko nga dili gyod gusto ni Jehova nga mahimo kong alagad niya tungod sa akong ginahimo.”

6. Unsay nakapugong kang Vanessa sa pagpabawtismo?

⁶ Impluwensiya sa mga higala. Si Vanessa, nga 22 anyos, miingon, “May suod kaayo kong amiga nga dugay na nakong kaila.” Pero, ang iyang amiga wala mosuportar niya sa iyang tumong nga magpabawtismo. Nasakitan pag-ayo si Vanessa, ug siya miingon: “Malisdan ko pagpangitag higala, ug nabalaka ko nga kon dili na ko makig-amiga niya, dili na ko makakitag suod nga amiga.”

7. Unsay gikabalak-an sa batan-ong si Makayla, ug ngano?

⁷ Kahadlok nga makasala. Si Makayla singko anyos dihang na-disfellow ang iyang kuya. Samtang nagdako, nakita niya ang epekto niana sa iyang ginikanan. Miingon si Makayla: “Nahadlok ko nga kon magpabawtismo ko, basig makasala ko, ma-disfellow, ug makadugang sa kaguol sa akong ginikanan.”

8. Unsay gikabalak-an sa batan-ong lalaki nga si Miles?

 ⁸ Kahadlok nga lutoson. Ang amahan ug inaina ni Miles alagad ni Jehova, pero ang iyang mama dili Saksi. Si Miles miingon: “Nagpuyo ko uban ni Mama sa 18 ka tuig, ug nahadlok kong sultihan siya nga magpabawtismo ko. Nakita nako ang iyang reaksiyon dihang nag-Saksi si Papa. Nahadlok ko basig lutoson ko niya.”

9. Unsay lagmit mahitabo kon imong mahibaloan kon unsa ka mahigugmaon ug mapailobon si Jehova?

⁹ Si Adan ug Eva midesisyon nga dili alagaran si Jehova kay wala nila maugmad ang dakong gugma kaniya. Bisan pa niana, gitugotan sila ni Jehova nga mabuhig taastaas nga panahon aron makabatog mga anak ug maghimog kaugalingong sukdanan sa pagpadako sa mga bata. Ang resulta sa ilang desisyon nga magmaindependente nagpakita nga sayop gyod sila. Gipatay sa ilang kamagulangang anak ang inosenteng igsoon niini, ug wala madugay ang yuta napuno sa kapintasan ug kahakog. (Gen. 4:8; 6:11-13) Pero may paagi si Jehova aron maluwas ang tanang kaliwat ni Adan ug Eva nga gustong moalagad niya. (Juan 6:38-40, 57, 58) Dihang imong mahibaloan kon unsa ka mahigugmaon ug mapailobon si Jehova, lagmit modako ang imong gugma kaniya. Dili nimo sundogon ang gihimo ni Adan ug Eva, ug gusto nimong idedikar ang kaugalingon kang Jehova.

10. Nganong ang pagpamalandong sa Salmo 19:7 makatabang nimo sa pag-alagad kang Jehova?

¹⁰ Padayon sa pagkat-on bahin kang Jehova. Kon mas mailhan nimo si Jehova, mas modako ang imong pagsalig nga molampos ka sa pag-alagad niya. Si Avery, nga gihisgotan ganina, miingon: “Nakabaton kog kompiyansa sa kaugalingon pinaagi sa pagbasa ug pagpamalandong sa saad diha sa Salmo 19:7.” (Basaha.) Dihang nakita ni Avery kon giunsa pagtuman ni Jehova ang maong saad, midako ang iyang gugma sa Diyos. Ang gugma dili lang makatabang nato nga makabatog kompiyansa sa kaugalingon, kondili makatabang sab ni nato sa pagpokus kang Jehova ug sa iyang gusto. Si Hannah, nga gihisgotan ganina,  miingon: “Pinaagi sa pagbasa ug pagtuon sa Bibliya, nasabtan nako nga kon akong pasakitan ang kaugalingon, gipasakitan sab nako si Jehova.” (1 Ped. 5:7) Si Hannah nahimong “magtutuman sa pulong” sa Diyos. (Sant. 1:22) Unsay resulta? Siya miingon: “Dihang nakita nako ang kaayohan sa pagsunod kang Jehova, midako ang akong gugma kaniya. Karon, segurado ko nga pirme ko niyang giyahan kon magkinahanglan ko sa iyang tabang.” Wala na samari ni Hannah ang iyang kaugalingon. Siya nagpahinungod kang Jehova ug nagpabawtismo.

11. Unsay gihimo ni Vanessa aron makakitag maayong mga higala, ug unsay atong makat-onan niini?

¹¹ Magmaalamon sa pagpilig mga higala. Si Vanessa, nga gihisgotan ganina, nakaamgo ra nga ang iyang amiga nakapugong niya sa pag-alagad kang Jehova. Busa, iyang gitapos ang ilang panaghigalaay. Pero dili kay kana ray iyang gihimo. Naningkamot siya nga makakitag bag-ong mga higala sulod sa kongregasyon. Miingon siya nga ang ehemplo ni Noe ug sa iyang pamilya nakatabang niya. “Gilibotan silag mga tawo nga wala mahigugma kang Jehova,” matod niya, “pero suod sila ingong pamilya.” Human mabawtismohi, nagpayunir si Vanessa. Karon siya miingon, “Nakatabang ni nako nga makakitag maayong mga higala, dili lang sa among kongregasyon kondili sa ubang kongregasyon pod.” Makakita sab kag maayong mga higala kon puliki ka sa buluhaton nga gisugo ni Jehova.​—Mat. 24:14.

12. Unsang matanga sa kahadlok ang wala mabatoni ni Adan ug Eva, ug unsay resulta?

¹² Batoni ang hustong matang sa kahadlok. Ang pipila ka matang sa kahadlok makaayo nato. Pananglitan, kinahanglang mahadlok ta nga mapasuko si Jehova. (Sal. 111:10) Kon naugmad pa ni Adan ug Eva ang maong kahadlok, wala unta sila morebelde kang Jehova. Human sa ilang pagrebelde, nabuka ang ilang mga mata sa pagkaagi nga nahibaloan nila nga sila makasasala. Ilang napasa ang sala ug kamatayon ngadto sa ilang mga anak. Kay sila nakakita, o nakasabot, sa ilang kahimtang, sila naulaw sa ilang pagkahubo ug naghimog sinina.​—Gen. 3:7, 21.

13-14. (a) Uyon sa 1 Pedro 3:21, nganong dili ta angayng mahadlok pag-ayo sa kamatayon? (b) Unsay mga rason kon nganong higugmaon nato si Jehova?

 ¹³ Bisan tuod mahadlok ta nga mapasuko si Jehova, dili ta angayng mahadlok pag-ayo sa kamatayon. Dunay gihimo si Jehova aron mabuhi ta sa walay kataposan. Kon kita makasala pero kinasingkasing nga maghinulsol, pasayloon ta ni Jehova. Pasayloon ta niya tungod sa atong pagtuo sa halad lukat sa iyang Anak. Ang usa sa pangunang paagi sa pagpakitag pagtuo mao ang pagdedikar sa atong kaugalingon ngadto sa Diyos ug pagpabawtismo.​—Basaha ang 1 Pedro 3:21.

¹⁴ Daghan tag rason nga higugmaon si Jehova. Siya wala lang magtagana nato sa maayong mga butang nga atong mapahimuslan matag adlaw kondili nagtudlo pod siya nato sa kamatuoran bahin sa iyang kaugalingon ug katuyoan. (Juan 8:31, 32) Pinaagi sa Kristohanong kongregasyon, siya naggiya ug nagtabang nato. Siya nagtabang nato nga maantos ang mga problema karon, ug siya nagtanyag nato sa paglaom nga mabuhi sa walay kataposan sa hingpit nga kahimtang. (Sal. 68:19; Pin. 21:3, 4) Dihang atong pamalandongon kon unsa ka daghan ang nahimo ni Jehova aron ipakita ang pagmahal kanato, masuod ta niya. Ug dihang higugmaon nato si Jehova, mabatonan nato ang hustong matang sa kahadlok. Mahadlok ta nga pasakitan ang Usa nga nahigugma nato pag-ayo.

15. Sa unsang paagi nawala ang kahadlok ni Makayla nga basig makasala siya?

¹⁵ Si Makayla, nga gihisgotan ganina, wala na mahadlok nga basig makasala siya dihang iyang nasabtan kon unsa ka mapinasayloon si Jehova. “Nasabtan nako nga kitang tanan dili hingpit ug masayop. Pero nasabtan sab nako nga si Jehova nahigugma nato ug iya tang pasayloon pinasukad sa lukat.” Ang iyang gugma kang Jehova nagpalihok niya nga idedikar ang kaugalingon ug magpabawtismo.

16. Sa unsang paagi nawala ang kahadlok ni Miles nga lutoson?

¹⁶ Si Miles, kinsa nahadlok nga dili tugtan sa iyang mama sa pagpabawtismo, nangayog tabang sa tigdumala sa sirkito. “Nagdako sab siya nga dili parehong Saksi ang ginikanan,” miingon si Miles. “Gitabangan ko niya nga hunahunaon kon unsaon pagkombinsir si Mama nga personal nakong desisyon ang pagpabawtismo ug wala ko pugsa ni Papa.” Wala malipay ang mama ni Miles. Sa ngadtongadto, kinahanglang mohawa si Miles sa ilang balay, pero mibarog siya sa iyang desisyon. “Ang pagkahibalo sa maayong mga butang nga gibuhat ni Jehova para nako, nakatandog pag-ayo nako,” siya miingon. “Dihang akong gipamalandong ang halad lukat ni Jesus, nasabtan nako kon unsa ka dako ang gugma ni Jehova kanako. Kana nagpalihok nako sa pagdedikar sa akong kaugalingon kang Jehova ug pagpabawtismo.”

17. Unsang kahigayonan ang atong nabatonan?

¹⁷ Dihang gikaon ni Eva ang bunga sa kahoy didto sa Eden, iyang gisalikway ang iyang Amahan. Ug dihang miuban si Adan niya, gipakita ni Adan nga wala siyay apresasyon sa tanang gihimo ni Jehova para niya. Kitang tanan may kahigayonan nga ipakita kang Jehova nga dili ta sama kang Adan ug Eva. Pinaagi sa pagpabawtismo, atong gipakita nga nagtuo ta nga siya lang ang may awtoridad sa pagtakda ug sukdanan sa husto ug sayop. Gipamatud-an nato nga kita nahigugma ug nagsalig sa atong Amahan.

18. Sa unsang paagi molampos ka sa pag-alagad kang Jehova?

¹⁸ Human sa bawtismo, kinahanglan tang magsunod sa sukdanan ni Jehova, dili sa atoa. Minilyon karon ang nagkinabuhi nianang paagiha. Mahisama ka nila kon padayon nimong palalomon ang imong pagsabot sa Pulong sa Diyos, ang Bibliya; pirme kang makig-uban sa mga igsoon; ug madasigon nimong isulti ang imong nakat-onan bahin sa imong mahigugmaong Amahan. (Heb. 10:24, 25) Dihang mohimo kag desisyon, pamati sa tambag ni Jehova pinaagi sa iyang Pulong ug organisasyon. (Isa. 30:21) Ug ang tanan nimong buhaton magmalamposon.​—Prov. 16:3, 20.

19. Unsay angay nimong hunahunaon pirme, ug ngano?

¹⁹ Kon pirme nimong hunahunaon ang mga kaayohan sa pagpagiya kang Jehova, mas modako ang imong gugma kaniya ug sa iyang sukdanan. Dayon, walay tentasyon ni Satanas ang makapahunong nimo sa pag-alagad kang Jehova. Hunahunaa ang imong kaugalingon libolibo ka tuig gikan karon. Imong mahinumdoman nga ang pagpabawtismo mao ang pinakamaayong desisyon nga imong nahimo!