1. Ano ang nadula nanday Adan kag Eva, kag ano ang resulta?

SIN-O ang dapat nga maghimo sang mga talaksan sang maayo kag malain? Sang ginkaon nanday Adan kag Eva ang bunga sang kahoy sang pagkilala sang maayo kag malain, ginpakita nila nga wala sila nagasalig kay Jehova kag sa iya mga talaksan. Naghimo sila sang ila kaugalingon nga mga talaksan sang maayo kag malain. (Gen. 3:22) Hunahunaa kon ano ang ila nadula. Nadula nila ang ila pagpakig-abyan kay Jehova. Nadula man nila ang kahigayunan nga mabuhi sing wala sing katapusan, kag ginpapanubli nila ang sala kag kamatayon sa ila mga kaanakan. (Roma 5:12) Malain gid ang resulta sang ginhimo nanday Adan kag Eva.

2-3. (a) Ano ang ginhimo sang Etiopianhon nga eunuco sang ginpanaksihan sia ni Felipe? (b) Ano nga mga pagpakamaayo ang mabaton naton kon magpabawtismo kita, kag ano nga mga pamangkot ang binagbinagon naton?

² Ipaanggid ang ginhimo nanday Adan kag Eva sa ginhimo sang Etiopianhon nga eunuco sang ginpanaksihan sia ni Felipe. Gin-apresyar gid sang eunuco ang ginhimo ni Jehova kag ni Jesus para sa iya amo nga nagpabawtismo sia gilayon. (Binu. 8:34-38) Sang nagdedikar kita sa Dios kag nagpabawtismo pareho sa ginhimo sang eunuco, ginpakita naton nga ginaapresyar naton ang ginhimo ni Jehova kag ni Jesus para sa aton. Ginpakita man naton nga nagasalig kita kay Jehova kag ginakilala naton nga sia lang ang dapat nga maghimo sang talaksan sang maayo kag malain.

³ Madamo gid nga pagpakamaayo ang mabaton naton kon mag-alagad kita kay Jehova. Ang isa sa sini amo nga ihatag ni Jehova ang tanan nga nadula nanday Adan kag Eva, lakip  ang kabuhi nga wala sing katapusan. Bangod nagatuo kita kay Jesucristo, patawaron kita ni Jehova sa aton mga sala kag hatagan niya kita sang matinlo nga konsiensia. (Mat. 20:28; Binu. 10:43) Mangin bahin man kita sang pamilya ni Jehova upod ang matutom niya nga mga alagad nga may matahom nga paglaum sa palaabuton. (Juan 10:14-16; Roma 8:20, 21) Pero bisan pa sa sini nga mga pagpakamaayo, ang pila nga nakatuon na parte kay Jehova nagaduhaduha gihapon sa pagsunod sa halimbawa sang Etiopianhon nga eunuco. Ano ang nagapugong sa ila sa pagpabawtismo? Kag paano nila maatubang ini nga mga kabudlayan?

4-5. Ano nga mga kabudlayan ang naeksperiensiahan sang mga pamatan-on nga si Avery kag si Hannah?

⁴ Kakulang sing kompiansa. Mga Saksi ni Jehova ang mga ginikanan ni Avery. Maayo gid ang reputasyon sang iya amay bilang isa ka mapinalanggaon nga amay kag masaligan nga gulang. Pero nagaduhaduha si Avery sa pagpabawtismo. Ngaa? “Sa banta ko indi ako mangin maayo nga tawo pareho sa akon amay,” siling niya. Naghunahuna man sia nga indi niya matungdan ang mga responsibilidad nga ihatag sa iya sa ulihi. “Nakulbaan ako mangamuyo kon madamo sing tawo, magpamulongpulong, ukon manguna sa grupo sa pag-alagad sa latagon.”

⁵ Si Hannah, nga 18 anyos, nabudlayan gid bangod sa kakulang sing kompiansa. Ginpadaku sia sang iya mga ginikanan nga nagaalagad kay Jehova. Pero nagaduhaduha sia kon bala masunod niya ang mga talaksan ni Jehova. Ngaa? Kulang gid ang iya kompiansa sa iya kaugalingon. May mga tion nga nagakadepres sia amo nga ginasakit niya ang iya kaugalingon, kag nagalala pa gid ang iya kahimtangan. “Wala gid sing may nakabalo sang akon ginahimo, bisan pa ang akon mga ginikanan,” siling niya, “kag para sa akon indi gusto ni Jehova nga mangin alagad niya ako bangod sang akon ginahimo.”

6. Ano ang nagapugong kay Vanessa sa pagpabawtismo?

⁶ Impluwensia sang mga abyan. Si Vanessa, nga 22 anyos, nagsiling, “May maayo ako nga abyan nga madugay ko na nga kilala.” Pero ang abyan ni Vanessa wala nagapalig-on sa iya nga magpabawtismo. Nasubuan gid si Vanessa kag nagsiling sia, “Nabudlayan ako makig-abyan, kag nakulbaan ako nga kon untaton ko ang pagpakig-abyan sa iya, indi na ako makakita liwat sang maayo nga abyan.”

7. Ano ang ginakahadlukan nga matabo sang pamatan-on nga si Makayla, kag ngaa?

⁷ Kahadlok nga makahimo sang serioso nga sala. Lima ka tuig ang edad ni Makayla sang gin-disfellowship ang iya magulang nga lalaki. Pagdaku niya, nakita niya nga nasubuan  gid ang iya mga ginikanan sa ginhimo sang iya magulang. “Nahadlok ako magpabawtismo,” siling ni Makayla, “kay basi makahimo ako sang serioso nga sala kag ma-disfellowship, kag masubuan pa gid ang akon mga ginikanan.”

8. Sa ano nahadlok ang pamatan-on nga si Miles?

⁸ Kahadlok nga pamatukan. Ang amay kag manding ni Miles mga Saksi ni Jehova, pero ang iya matuod nga iloy indi. “Sa kay Nanay ako nagaistar sa sulod sang 18 ka tuig,” siling ni Miles, “kag nahadlok ako maghambal sa iya nga gusto ko na magpabawtismo. Naakig sia sang nangin Saksi si Tatay. Nahadlok ako nga basi maakig man sia sa akon.”

9. Ano ang resulta kon ginatun-an mo kon daw ano ka mapinasensiahon kag mahigugmaon si Jehova?

⁹ Ginpili nanday Adan kag Eva nga indi pag-alagaron si Jehova bangod wala nila ginpabakod ang ila gugma sa iya. Pero gintugutan ni Jehova nga mabuhi sila para magpanganak kag maghimo sang ila talaksan sa pagpadaku sang ila kabataan. Ang mga resulta sang indi pagtuman nanday Adan kag Eva kay Jehova nagapakita nga indi gid maayo ang ila ginhimo. Ginpatay sang ila kamagulangan nga anak ang iya utod bisan wala ini sing ginhimo nga malain sa iya, kag sang ulihi nangin masingki kag maiyaiyahon ang mga tawo sa duta. (Gen. 4:8; 6:11-13) Pero, naghimo sing paagi si Jehova para luwason ang tanan nga kaanakan nanday Adan kag Eva nga gusto mag-alagad sa iya. (Juan 6:38-40, 57, 58) Samtang ginatun-an mo kon daw ano ka mapinasensiahon kag mahigugmaon si Jehova, mas higugmaon mo pa gid sia. Indi mo gid gusto ilugon sanday Adan kag Eva. Sa baylo, gusto mo nga magdedikar kay Jehova.

10. Paano ang pagpamalandong sa Salmo 19:7 makabulig sa imo nga maalagad si Jehova?

¹⁰ Padayon nga magtuon parte kay Jehova. Kon padayon mo nga ginatun-an ang parte kay Jehova, madugangan ang imo kompiansa nga mangin madinalag-on ka sa pag-alagad sa iya. Si Avery, nga ginsambit kaina, nagsiling: “Nagdugang ang akon kompiansa paagi sa pagbasa kag pagpamalandong sang promisa sa Salmo 19:7.” (Basaha.) Sang nakita ni Avery kon paano gintuman ni Jehova ini nga promisa, nagdugang pa gid ang iya gugma sa Dios. Ang  gugma nagabulig sa aton nga madugangan ang aton kompiansa sa pag-alagad kay Jehova, kag nagabulig sa aton nga tumanon sia. Si Hannah, nga ginsambit kaina, nagsiling: “Paagi sa pagbasa kag pagtuon sa Biblia, natun-an ko nga kon ginasakit ko ang akon kaugalingon, daw pareho lang nga ginasakit ko si Jehova.” (1 Ped. 5:7) Si Hannah nangin ‘manugtuman sang pulong sang Dios.’ (Sant. 1:22) Ano ang epekto sini sa iya? Nagsiling sia: “Sang nakita ko ang benepisyo sang pagtuman kay Jehova, mas ginhigugma ko pa gid sia. Sigurado gid ako nga buligan ako ni Jehova.” Wala na ginasakit ni Hannah ang iya kaugalingon. Gindedikar niya ang iya kabuhi kay Jehova kag nagpabawtismo.

11. Ano ang ginhimo ni Vanessa para makakita sang maayo nga mga abyan, kag ano ang matun-an naton sa sini?

¹¹ Pilia sing maayo ang imo mga abyan. Narealisar ni Vanessa, nga ginsambit kaina, nga ang iya abyan amo ang nagapugong sa iya nga mag-alagad kay Jehova. Gani gin-untatan niya ang pagpakig-abyan sa iya. Pero indi lang ina ang ginhimo niya. Ginpanikasugan niya nga makakita sang bag-o nga mga abyan sa sulod sang kongregasyon. Nagsiling sia nga nakabulig sa iya ang halimbawa ni Noe kag sang iya pamilya. “Napalibutan sila sang mga tawo nga wala nagaalagad kay Jehova,” siling niya, “pero maayo ang ila pagtamdanay sa isa kag isa.” Pagkatapos mabawtismuhan si Vanessa, nagpayunir sia. Sang ulihi, nagsiling sia, “Nagbulig ini sa akon nga makakita sang maayo nga mga abyan sa amon kongregasyon kag sa iban man nga kongregasyon.” Makakita ka man sang maayo nga mga abyan paagi sa pagpakigbahin sa hilikuton nga ginapahimo ni Jehova sa aton.—Mat. 24:14.

12. Ano nga kahadlok ang wala mapakita nanday Adan kag Eva, kag ano ang resulta?

¹² Ipakita ang nagakaigo nga kahadlok. May nagakaigo nga klase sang kahadlok. Halimbawa, nahadlok kita nga indi mapahamut-an si Jehova. (Sal. 111:10) Kon ginpakita nanday Adan kag Eva ini nga kahadlok, wala sila kuntani magrebelde kay Jehova. Pero nagrebelde sila. Dayon nagmuklat ang ila mga mata, ukon narealisar nila nga nakasala sila. Ginpapanubli nila ang sala kag kamatayon sa ila mga kaanakan. Bangod narealisar nila nga ginsupak nila  ang sugo sang Dios, nahuya sila bangod hublas sila amo nga nagpanabon sila.—Gen. 3:7, 21.

13-14. (a) Suno sa 1 Pedro 3:21, ngaa indi kita dapat magpaapekto sa kahadlok sa kamatayon? (b) Ngaa dapat naton higugmaon si Jehova?

¹³ Dapat kita mahadlok nga indi mapahamut-an si Jehova, pero indi kita dapat magpaapekto sa kahadlok sa kamatayon. Naghimo si Jehova sing paagi para mabaton naton ang kabuhi nga wala sing katapusan. Kon nagahinulsol gid kita sa sala nga aton nahimo, patawaron kita ni Jehova. Patawaron niya kita bangod nagatuo kita sa halad-gawad sang iya Anak. Ang panguna nga paagi nga mapakita naton nga nagatuo kita amo ang pagdedikar sang aton kabuhi sa Dios kag pagpabawtismo.—Basaha ang 1 Pedro 3:21.

¹⁴ Madamo kita sang rason nga higugmaon si Jehova. Nalipay kita sa maayo nga mga butang nga ginahatag niya adlaw-adlaw kag ginatudluan niya kita sang kamatuoran parte sa iya kag sa iya mga katuyuan. (Juan 8:31, 32) Lakip sa sini ang Cristianong kongregasyon nga nagagiya kag nagabulig sa aton. Ginabuligan niya kita nga mabatas ang mga kabudlayan subong, kag ginahatagan niya kita sang paglaum nga mabuhi sing wala sing katapusan sa palaabuton nga may perpekto nga kahimtangan. (Sal. 68:19; Bug. 21:3, 4) Kon pamalandungan naton ang daku nga gugma nga ginapakita ni Jehova sa aton, mabuligan kita sini nga higugmaon sia. Kag kon ginahigugma naton si Jehova, mapakita naton ang nagakaigo nga kahadlok. Nahadlok kita nga indi mapahamut-an ang Isa nga ginahigugma gid naton.

15. Paano naatubang ni Makayla ang kahadlok nga makahimo sang serioso nga sala?

¹⁵ Si Makayla, nga ginsambit kaina, nagmadinalag-on sa pag-atubang sang kahadlok nga makahimo sang serioso nga sala sang natun-an niya kon daw ano ka mapinatawaron si Jehova. “Natun-an ko nga tanan kita indi perpekto kag makahimo kita sang sala. Pero natun-an ko man nga palangga kita ni Jehova kag patawaron niya kita paagi sa gawad.” Ang iya gugma kay Jehova nagpalig-on sa iya nga magdedikar kag magpabawtismo.

16. Paano nabuligan si Miles nga maatubang ang iya kahadlok nga pamatukan?

¹⁶ Si Miles, nga nahadlok kay basi pamatukan sia sang iya iloy kon magpabawtismo sia, nangayo sing bulig sa manugtatap sang sirkito. “Nagdaku man sia nga si Tatay lang niya ang Saksi,” siling ni Miles. “Ginbuligan niya ako nga hunahunaon sing maayo ang akon ihambal kay Nanay para maintiendihan niya nga desisyon ko ang magpabawtismo, kag wala ako ginapilit ni Tatay.” Wala gid nalipay ang iloy ni Miles sa iya desisyon. Sang ulihi, naghalin sia sa ila balay, pero nanindugan sia sa iya desisyon nga magpabawtismo. “Sang natun-an ko ang maayo nga mga butang nga ginhimo ni Jehova para sa akon, nalipay gid ako,” siling niya. “Sang ginpamalandungan ko ang halad-gawad ni Jesus, natun-an ko nga palangga gid ako ni Jehova. Kag nagpalig-on ini sa akon nga magdedikar kay Jehova kag magpabawtismo.”

17. Ano ang mapakita sang kada isa sa aton?

¹⁷ Nagrebelde si Eva sa iya Amay sang ginkaon niya ang bunga sang kahoy sa Eden. Sang nagkaon man si Adan, ginpakita niya nga indi sia mapinasalamaton sa tanan nga maayo nga ginhimo ni Jehova para sa iya. Pero mapakita sang kada isa sa aton nga indi kita pareho kanday Adan kag Eva. Mapinasalamaton kita sa tanan nga ginhimo ni Jehova para sa aton. Paagi sa pagpabawtismo, mapakita naton nga si Jehova lamang ang may awtoridad sa paghimo sang talaksan sa kon ano ang maayo kag malain para sa aton. Mapakita naton nga ginahigugma naton ang aton Amay kag nagasalig kita sa iya.

18. Paano ka mangin madinalag-on sa pag-alagad kay Jehova?

¹⁸ Pagkatapos sang bawtismo, dapat padayon naton nga himuon kon ano ang gusto ni Jehova, kag indi ang aton. Minilyon sa mga alagad sang Dios ang naghimo sini. Mailog mo man sila kon padayon mo nga tun-an sing maayo ang Pulong sang Dios, ang Biblia; regular ka nga makig-upod sa mga kauturan; kag mangin mapisan ka sa pagsugid sa iban sang imo natun-an parte sa imo mahigugmaon nga Amay. (Heb. 10:24, 25) Kon nagahimo ka sang desisyon, pamatii ang laygay nga ginahatag ni Jehova paagi sa iya Pulong kag sa iya organisasyon. (Isa. 30:21) Dayon mangin madinalag-on ka sa tanan mo nga ginahimo.—Hulu. 16:3, 20.

19. Ano dapat ang pirme mo hunahunaon, kag ngaa?

¹⁹ Kon pirme mo hunahunaon ang benepisyo sang paggiya ni Jehova, mas higugmaon mo pa gid sia kag ang iya mga talaksan. Kag kon mabakod ang imo gugma kay Jehova, indi ka gid mag-untat sa pag-alagad sa iya bisan ano pa ang ginatanyag ni Satanas. Hunahunaa ang imo kabuhi pagligad sang isa ka libo ka tuig. Makasiling ka gid nga ang pagpabawtismo amo ang pinakamaayo nga desisyon nga ginhimo mo!