1. Nama utai ti dilenyauka Adam enggau Hawa? Nama penyadi udah nya?

SAPA patut netapka standard pasal utai ti manah enggau utai ti jai? Lebuh Adam enggau Hawa makai buah ari kayu penemu ti tau ngasuh nemu semua utai, seduai iya enggau terang madahka diri enda arapka Jehovah sereta standard Iya. Seduai iya netapka standard ke diri empu. (P-kal. 3:22) Tang pikirka utai ti dilenyauka Adam enggau Hawa. Seduai iya lenyau kaul enggau Jehovah sereta peluang idup belama iya. Lalu dosa enggau pemati ngelekai ngagai bala anak seduai iya. (Rom. 5:12) Tu nunjukka pemutus ke digaga Adam enggau Hawa ngujungka pemerinsa.

2-3. (a) Nama digaga pemesai ari Etiopia lebuh Philip nginjil ngagai iya? (b) Nama berekat ke diulih kitai enti udah dibaptisa? (c) Nama sekeda tanya ke deka dipejuraika kitai?

² Enda baka Adam enggau Hawa, pemesai ari Etiopia nerima utai ti dipadah Philip. Pemesai nya beterima kasih ke utai ti udah digaga Jehovah enggau Jesus. Iya lalu tekala nya dibaptisa. (SKR. 8:34-38) Pia mega, lebuh kitai nyerahka diri ngagai Jehovah lalu dibaptisa, kitai nunjukka diri beterima kasih ke utai ti udah digaga Jehovah enggau Jesus. Kitai mega nunjukka diri arapka Jehovah lalu ngaku semina Iya aja ke ulih netapka standard pasal utai ti manah enggau utai ti jai.

³ Pikirka pasal berekat ke diulih kitai lebuh nyembah Jehovah! Kitai bisi peluang bulih semua utai ti udah dilenyauka Adam enggau Hawa suba, nyengkaum pengidup ti  meruan belama iya. Ketegal arapka Jesus, Jehovah ngampun penyalah kitai lalu meri kitai ati ti beresi. (Mat. 20:28; SKR. 10:43) Kitai mega ulih enggau ruang bilik Jehovah sereta bulih berekat ke bukai jemah ila. (Jhn. 10:14-16; Rom. 8:20, 21) Taja pan bisi berekat ke baka tu, tang sekeda orang ke ngelala Jehovah berasai kakang ati deka dibaptisa. Nama nagang sida ari dibaptisa? Baka ni sida ulih mutarka penanggul nya?

4-5. Nama penanggul ke ditapi Avery enggau Hannah?

⁴ Enda tentu andalka diri empu. Peratika seiku lelaki ke biak ke benama Avery. Apai indai iya Saksi-Saksi Jehovah. Apai iya orang ti dipebasa ketegal nyadi apai ti manah sereta tuai gempuru ti landik. Tang, Avery kakang ati deka dibaptisa. Nama kebuah? Ku iya madahka: “Aku enda landik baka apai.” Avery mega ngasaika diri enda ulih bejalaika tanggung pengawa ke deka diberi ngagai iya dudi hari. Ku iya agi: “Aku irau enti diasuh besampi ba mua orang mayuh, meri cheramah, tauka diasuh ngiring raban ke nginjil.”

⁵ Hannah, seiku indu ke beumur 18 taun, kelalu enda andalka diri empu. Apai indai iya Saksi-Saksi Jehovah. Taja pia, Hannah ngasaika diri enda tetitihka standard Jehovah. Nama kebuah? Iya ngumbai diri enda beguna sereta enda ulih dikearapka. Kadang-kadang, lebuh ati iya balat tusah, iya ngemediska diri empu. Tu nambahka penanggul iya. Ku iya madahka: “Aku nadai kala madah ngagai sapa-sapa pasal tu. Indah apai indai pan enda nemu. Lalu aku ngumbai Jehovah enggai nerima aku nyadi nembiak Iya ketegal utai ke dikereja aku.”

6. Nama utai ke ngasuh Vanessa kakang ati deka dibaptisa?

⁶ Alah laban bala bakih. Vanessa, ke beumur 22 taun, madahka: “Aku bisi seiku bakih ti rapat enggau aku. Kami duai nyauka 10 taun bebakih.” Taja pia, bakih Vanessa ke ukai Saksi nya, enda nyukung juluk ati Vanessa ke deka dibaptisa. Tu ngasuh Vanessa tusah ati. Ku iya madahka: “Aku tusah deka bebakih enggau orang bukai. Lalu aku irau enti aku enda agi bebakih enggau iya, aku tusah deka ngiga bakih baru.”

7. Nama utai ti ngirauka ati Makayla? Nama kebuah iya berasai baka nya?

⁷ Irauka diri enda mujur. Seiku nembiak indu ke benama Makayla, beumur 5 taun, lebuh menyadi lelaki iya dibuai ari eklisia. Iya ulih beratika penusah ati apai indai  ketegal utai ke dikereja menyadi lelaki iya. Iya madahka: “Aku irau enti aku udah dibaptisa lalu bisi ngereja penyalah, aku engka dibuai ari eklisia. Tu ulih ngenusahka ati apai indai.”

8. Nama utai ke ngasuh seiku nembiak lelaki ke benama Miles takut?

⁸ Takut disakal. Apai Miles enggau indai tiri iya nyembah Petara Jehovah. Tang, indai ke ngadaka iya enda nyembah Jehovah. Miles madahka: “Aku udah 18 taun diau enggau indai. Aku takut madahka diri deka dibaptisa laban aku udah meda iya nyakal apai ke deka nyembah Jehovah suba. Aku irau enggaika indai nganu aku.”

9. Nama deka nyadi enti nuan belajar mayuh agi pasal pengeliat ati enggau pengerindu Jehovah?

⁹ Adam enggau Hawa milih enggai nyembah Jehovah ketegal enda ngemansangka pengerindu ngagai Iya. Taja pia, Jehovah agi ngemendarka seduai iya idup lama ngambika bulih anak sereta bisi peluang netapka standard diri empu kena ngemesaika anak seduai iya. Pemutus seduai iya ke nulak standard Jehovah ngujungka mayuh penanggul. Anak tuai seduai iya munuh menyadi iya empu. Berengkah ari nya, penyai enggau ulah ti berundingka diri empu majak nyadi ba ruang bilik. (P-kal. 4:8; 6:11-13) Taja pia, Jehovah bisi chara dikena nyelamatka semua bala anak Adam enggau Hawa ke deka nyembah Iya. (Jhn. 6:38-40, 57, 58) Seraya nuan belajar mayuh agi pasal pengeliat ati enggau pengerindu Jehovah, pengerindu nuan ngagai Iya deka nambah. Nuan tentu enggai nitihka pengawa Adam enggau Hawa. Tang deka nyerahka diri empu ngagai Jehovah.

10. Nama kebuah belematika Masmur 19:7 ulih nulung nuan nyembah Jehovah?

¹⁰ Terus belajar pasal Jehovah. Enti nuan belajar mayuh agi pasal Jehovah, nuan deka andalka diri ulih mujur nyembah Iya. Avery, ke bisi disebut tadi, madahka: “Macha  pasal utai ke dipadah ba Masmur 19:7 (Bacha.), lalu belematika ayat nya, ngasuh aku andal agi ke diri empu.” Lebuh Avery ngasaika baka ni Jehovah ngamatka semaya Iya, pengerindu Avery ngagai Jehovah majak nambah. Pengerindu ukai semina ngasuh kitai andal agi ke diri empu, tang nulung kitai betatika Jehovah sereta utai ti dikedekaka Iya. Hannah, ke mega bisi disebut tadi, madahka: “Lebuh macha sereta belajarka Bup Kudus kediri empu, aku nyau nemu, enti aku ngemediska diri empu, aku mega ngemediska Jehovah.” (1 Pet. 5:7) Hannah nitihka utai ti udah dipelajar iya. (Jas. 1:22) Nama asil iya? Ku iya agi: “Lebuh aku meda penguntung ke diulih ketegal ngasika Jehovah, pengerindu aku ngagai Iya majak nambah. Diatu aku pechaya Jehovah deka seruran ngiring aku lebuh aku begunaka tulung ari Iya.” Ketegal nya, Hannah ulih nagang diri ari ngemediska diri empu. Iya nyerahka diri empu ngagai Jehovah lalu dibaptisa.

11. Nama digaga Vanessa ngambika bulih bakih baru ti manah? Nama ulih dipelajarka kitai ari Vanessa?

¹¹ Bejimat milih bakih. Vanessa, ke bisi disebut tadi, nyau nemu bakih iya enda nyukung iya nyembah Jehovah. Nya alai, Vanessa badu bebakih enggau iya. Udah nya, Vanessa ngiga bakih ti baru, tang iya ngiga ba eklisia. Iya madahka teladan sida Noah sebilik udah nulung iya. Ku Vanessa madahka: “Sida Noah sebilik dikelingi orang ke enda rinduka Jehovah. Tang, sida sebilik bisi kaul ti manah enggau pangan diri.” Pengudah dibaptisa, Vanessa nyadi pengerintis. Ku iya: “Tu udah nulung aku ngiga bakih ti manah ba eklisia aku empu sereta ba eklisia bukai.” Nuan mega ulih ngiga bakih ti manah enti nuan enggau naka ulih ngereja pengawa ke udah diberi Jehovah ngagai kitai.—Mat. 24:14.

12. Nama utai ke enda digaga Adam enggau Hawa ngagai Jehovah? Nama penyadi udah nya?

¹² Mutarka asai ati ti takut. Enti kitai bebasaka Jehovah, kitai enggai ngereja  utai ti enda ngelantangka ati Iya. (Mas. 111:10) Adam enggau Hawa enda bebasaka Jehovah, nya alai seduai iya ngelaban Jehovah. Tang ketegal nya, mata seduai iya tebuka. Reti nya, seduai iya nemu diri udah ngereja penyalah. Seduai iya semina mai dosa enggau pemati ke bala anak seduai iya. Ketegal udah nemu diri enda ngasika Petara, seduai iya malu lebuh nemu diri telanjai lalu mampul tubuh diri.—P-kal. 3:7, 21.

13-14. (a) Nitihka 1 Peter 3:21, nama kebuah kitai tau enda ibuh kelalu takut enggau pemati? (b) Nama kebuah kitai rinduka Jehovah?

¹³ Kitai tau enda ibuh kelalu takut enggau pemati. Jehovah udah muka jalai ngambika kitai tau bulih pengidup ti meruan belama iya. Enti kitai ngereja dosa tang udah nya nesal ati, Jehovah deka ngampun kitai bepelasarka genselan tebus Jesus. Siti ari chara ti pemadu berat kitai mandangka diri arap, iya nya nyerahka pengidup diri ngagai Jehovah lalu dibaptisa.—Bacha 1 Peter 3:21.

¹⁴ Kitai bisi mayuh kebuah rinduka Jehovah. Iya nyediaka mayuh utai ti manah ngagai kitai ninting hari. Iya ngajar kitai pemendar pasal Iya enggau peneka Iya. (Jhn. 8:31, 32) Iya udah meri eklisia kena ngiring sereta nyukung kitai. Iya mega nulung kitai mutarka penanggul lalu meri peluang idup belama iya jemah ila. (Mas. 68:19; Pem. 21:3, 4) Utai ti udah digaga Jehovah, nunjukka pengerindu Iya ke kitai. Enti kitai belematika tu, kitai deka rindu agi ke Iya. Enti kitai rinduka Jehovah, kitai deka bebasaka Iya lalu enggai ngereja utai ti ngemediska ati Iya.

15. Baka ni Makayla mutarka asai ati irauka diri enda mujur?

¹⁵ Makayla, ke bisi disebut tadi, ulih mutarka asai ati irauka diri enda mujur lebuh iya nemu Jehovah nya, Petara ti rindu ngampun. Iya madahka: “Aku nemu semua kitai enda sempurna sereta ngereja penyalah. Tang aku mega nemu Jehovah rinduka kitai lalu ngampun kitai bepelasarka tebus Jesus.” Pengerindu ke Jehovah meransang iya nyerahka diri ngagai Jehovah lalu dibaptisa.

16. Baka ni chara Miles mutarka asai ati ti takut disakal?

¹⁶ Miles takut disakal indai iya ketegal deka dibaptisa. Nya alai, iya minta tulung ari tuai ti ngabas. Miles madahka: “Tuai ti ngabas nya mega baka aku. Indai iya enda nyembah Jehovah. Iya nulung aku berundingka utai ke patut disebut ngagai indai aku. Pemutus aku ke deka dibaptisa ukai ketegal diansak apai. Tang nya pemutus aku empu.” Indai Miles enda rinduka pemutus iya. Nyau kelama, iya enda diau enggau indai iya agi. Miles tetap enggau pemutus iya. Ku Miles agi: “Semua utai ti manah ke digaga Jehovah ke aku negu ati aku. Lebuh aku belematika genselan tebus Jesus, aku nyau nemu Jehovah  amat sayauka aku. Tu meransang aku deka nyerahka diri ngagai Iya lalu dibaptisa.”

17. Nama ulih digaga semua kitai?

¹⁷ Hawa nunjukka diri enda ngasika Jehovah lebuh iya makai buah ari kayu penemu ti ngasuh nemu semua utai. Lebuh Adam makai buah nya, iya nunjukka diri enda beterima kasih ke semua utai manah ti udah digaga Jehovah ke iya. Semua kitai ulih nunjukka diri enda baka Adam enggau Hawa. Kitai beterima kasih ke semua utai ti udah digaga Jehovah ke kitai. Nengah pengawa baptisa, kitai nunjukka diri dekaka Jehovah netapka standard pasal utai ti betul enggau utai ti salah ke kitai. Ari tu, kitai nunjukka diri rindu sereta arapka Apai kitai, Jehovah.

18. Baka ni nuan ulih mujur nyembah Jehovah?

¹⁸ Pengudah dibaptisa, kitai deka terus ngereja utai ti dikedekaka Jehovah. Bejuta-juta nembiak Petara kemayaharitu ngereja nya. Nuan ulih nyadi baka sida enti nuan terus ngenalamka penemu pasal Bup Kudus, seruran begulai enggau bala menyadi Kristian, sereta ransing bekunsika utai ti dipelajar nuan pasal Jehovah. (Heb. 10:24, 25) Lebuh ngaga pemutus, dingaka jaku lalau ke diberi Jehovah nengah Bup Kudus sereta gerempung Iya. (Isa. 30:21) Enti nuan ngereja tu, nuan deka mujur.—J-lam. 16:3, 20.

19. Nama utai ke patut terus dibelematika nuan?

¹⁹ Enti nuan enda ngetu belematika penguntung ke diulih nuan ketegal nitihka iring Jehovah, pengerindu nuan ke Iya sereta standard Iya deka majak nambah. Nuan deka milih nyembah Jehovah enda ngira nama chara ke dikena Sitan ngelimpangka nuan. Uji gambarka, nuan udah ba Paradais. Maya nya, nuan tentu ngumbai pemutus deka dibaptisa nya, pemutus ti pemadu manah ke kala digaga nuan!