1. Anni i nawawan da Adan anni Eva, anna anni i resultana?

SINNI i ammum nga mawag nga mamadday tu estandarte nu anni i mapia anna nu anni i marake? Tagga ta kinnan da Adan anni Eva i vunga na kayu nga pakannammuan ta mapia anna marake, manawag i kayà kagian na kingnguada: Awan tu pattaloda kani Jehova anna ta estandartena ira. Namadday lagapa ira tu sarilida nga estandarte na mapia anna na marake. (Gen. 3:22) Ngem fugurammu i nawawadda. Nawawadda i pakikkofudda kani Jehova. I resultana, nawawan gapa i tiansada nga mattolay tu mannanayun, anna nepasa i liwa anna patay ta gaka-gakada. (Roma 5:12) Miserable i nattuppalan da Adan anni Eva megafu ta pinilida.

2-3. (a) Anni i kingngua na ofisial nga Etiope turi ta nilayyagayyan yayya ni Felipe? (b) Anni ira nga bendision i malawà tam nu mappabawtiso ittam, anna anni ira nga pakkiavu i ikonsidera tam?

² Ikumpara i kingngua ni Adan anni Eva ta ofisial nga Etiope turi ta nilayyagayyan yayya ni Felipe. Kuruga tinagibalor na ofisial i kingngua ni Jehova anna ni Jesus yari tu insigida yayya nappabawtiso. (King. 8:34-38) Nu idedika tam gapa i baggi tam ta Dios anna mappabawtiso, kagitta natun nga ofisial, manawag i kayà tam nga ipasingan. Ipasa-pasingattam i appabalo tam ta kingngua ni Jehova anna ni Jesus para nittam. Mepasingattam paga i pattalo tam kani Jehova anna rekunnisian nga yayya laman i mawag nga mamadday tu estandarte na mapia anna na marake.

³ Nonopan i bendision ira nga malawà tam nu masserbi ittam kani Jehova! Angngariganna, egga i tiansa tam nga malawà i ngamin nga nawawan da Adan anni Eva, nelagum ngana i tiansa  nga mattolay tu mannanayun. Megafu ta pangurug tam kani Jesu-Cristo, pakoman ittam ni Jehova ta liwi-liwa tam anna marenu i konsensia tam. (Mat. 20:28; King. 10:43) Mebilang ittam gapa nga parte na familia nga finaboran nga aripan ni Jehova nga makasta i pappangetadda. (Juan 10:14-16; Roma 8:20, 21) Maski paga taw nga mananawag ira nga benefisio, egga lagapa karuan nga nakannammuadda si Jehova ngem magalangan ira nga parigan i ofisial nga Etiope. Anni i mangifugag nira nga mappabawtiso? Kunnasida malsa danatun?

4-5. Anni ira nga problema i neparubang ta kabataan nga da Jacob anni Hannah?

⁴ Kawan tu komfiansa. Saksi ni Jehova i magana ni Jacob. * Kilala i yamana nga minangngiddu nga yama anna makasta nga ehemplo nga elder. Ngem magalangan si Jacob nga mappabawtiso. Ngatta? “Baka kakku maparigan i kalalaki ni Papà,” kunna. Awan paga tu komfiansana nga mangiyabaga ta responsibilidad ira nga puede nga meyawa nisa ta mappange. “Mannerbios ngà nu mekiddaw nga makimallo ta publiko, mappalappa, onu mangirollu tu grupo ta tana na serbisiu.”

⁵ Grabe gapa i kawan tu komfiansa ni Hannah nga magedad tu 18. Ziminakal yayya nga parehu tu Saksi ni Jehova i maganana. Maski kunna, madduda yayya nu matuttulna i estandarte ira ni Jehova. Ngatta? Tagibadditan ni Hannah i baggina. Egga ira i tiempo nga grabe i kadismayana yatutta sadya nga takitanna ta pisikal i baggina, nga mas namarrake ta situasionna. “Awan tu maski sinni nga pinakkagianakku, maski i magana ku,” kunna, “anna matageno ku nga manakinà ni Jehova nga masserbi sa megafu ta kukukuakku ta baggì.”

6. Anni i mangifugag kani Vanessa ta pappabawtiso?

⁶ Influwensia na kokkofun. Kunni Vanessa nga 22 anios, “Egga i bestfriend ku nga babay ta maggi tanga-dekada.” Ngem, yatun nga kofun ni Vanessa ay ari interesadu ta pangurugna yari tu arianna yayya suportan ta planona nga mappabawtiso. Natakitan si Vanessa, anna kunna, “Marigatan ngà makikofun, anna mavurung ngà nga nu iyemmakku i pakkofummi, kakku ngana makaleg uli tu bestfriend.”

7. Anni i ikassing na kabataan nga si Makayla, anna ngatta?

⁷ Assing nga baka makaliwa tu madammo. Lima i dagun ni Makayla turi ta nadisfellowship i manungna. Ta paddakalna, matagenona i daddam na maganana ta kingngua na manungna. “Maganassing ngà nga nu mappabawtiso ngà,” kunni Makayla, “baka  makaliwa ngà, tapus madisfellowship ngà, anna gafu tatun mas maparraddam ku i magana ku.”

8. Anni i ikassing na kabataan nga si Benjamin?

⁸ Assing ta pangokkontra. Parehu nga Saksi i yama ni Benjamin * anna i stepmother-na, ngem ari tu Saksi i kurug nga yenana. “Disi-ocho ragun ngà naddian kani yenà,” kunni Benjamin, “yayya nga maganassing ngà kagian nisa nga kayà ku i mappabawtiso. Nasingakku nu kunnasi napporay si yenà turi ta nabbalin tu Saksi i yamà. Maganassing ngà nga baka kontrannà.”

9. Anni i siguradu nga efekto nikaw durante nga magigiammum nu kunnasi kapasensia anna minangngiddu si Jehova?

⁹ Pinili da Adan anni Eva nga ari passerbian si Jehova megafu ta ariadda nakultiba i masikan nga ayada nisa. Maski kunna, nipamavulun ni Jehova nga mabbayag i pattoleda tapenu makapaggaka ira anna mapilida nu kunnasida padakallan i ánada. Manawag nga nepasingan na resulta ira na desision da Adan anni Eva nga ari ira masirib gafu ta ariadda sinuttul si Jehova. Pinatay na kaka nga anada i inosente nga wagina, adde ta nawwara ngana i kinavayolente anna i pabbalin tu makasarili ta ngamin nga totolay. (Gen. 4:8; 6:11-13) Ngem, uray ni Jehova nga ipaliag danuri gaka-gaka da Adan anni Eva nga maya nga masserbi nisa. (Juan 6:38-40, 57, 58) Durante nga magigiammum nu kunnasi kapasensia anna minangngiddu si Jehova, mas dumakal i aya mu nisa. Mas nga pammanakitammu i dalan nga pinili da Adan anni Eva anna kayà mu nga idedika i baggim kani Jehova.

10. Kunnasi makoffun i pannono tu mapia ta Salmo 19:7 tapenu makapasserbi kani Jehova?

¹⁰ Itulu-tuloy nga gigiammuan i meyannung kani Jehova. Nu mas aru i ammum meyannung kani Jehova, mas makapakkomfiansa ka nga mavviktoria ka ta passerbi sa. Kunni Jacob nga nakagi ta gafu: “Mas nakkomfiansa ngà megafu ta pabbibbig anna pannono tu mapia ta promesa nga malegan ta Salmo 19:7.” (Bibbigan.) Turi ta nemammatan ni Jacob nu kunnasi sinuppal yatun ni Jehova,  mas nassikan i ayana ta Dios. Ari laman nga mamakkomfiansa i aya, nu ari, makoffun yatun tapenu makapaffokus ittam kani Jehova anna ta passerbi sa. Kunni Hannah nga nakagi ta gafu: “Gukaban na personal nga pabbibbig anna paggigiammu tu Biblia, nalippawa ku nga nu takitakku i baggì, matakitakku gapa si Jehova.” (1 Ped. 5:7) ‘Pinarulo’ ni Hannah i uvovug na Dios. (Sant. 1:22) Anni i resultana? Kunna: “Turi ta nasingakku nu kunnasi ngà nabenefisiowan ta panuttul kani Jehova, mas nassikan i aya ku nisa. Siguradu ngà ngana nga igiyanà kanayun ni Jehova nu mawag ku i uffun.” Nalabanan gabbalaman ni Hannah i tendensia nga takitan i baggina. Nidedikana kani Jehova i baggina anna nappabawtiso.

11. Anni i kingngua ni Vanessa tapenu makaleg tu mapia ira nga kofun, anna anni i magigiammu tam taw?

¹¹ Pilian tu mapia i kokkofummu. Nalippawa gabbalaman ni Vanessa nga nakagi ta gafu nga fugu-fugaddan yayya na kofunna ta passerbi kani Jehova. Yari tu niyemmanna i pakkofudda. Ngem egga paga i kingngua ni Vanessa. Nappursigi yayya tapenu makaleg tu bagu nga kokkofun ta unag na kongregasion. Kinagina nga nakoffun nisa i ehemplo da Noe tuange ta familiana. “Napalevutan ira na totolay nga ari mangiddu kani Jehova,” kunna, “ngem makasta lagapa i pakkaravuluda bilang familia.” Kabalin nga nabawtisowan si Vanessa, nappayunir yayya. Kunna sangawe, “Nakoffun nio yaw tapenu mapeggan tu mapia ira nga kofun ari laman ta kakongregasiokku, nu ari, ta tanakuan paga nga kongregasion.” Makaleg ka gapa tu mapia ira nga kofun gukaban na pabbalin tu okupadu ta ministerio.​—Mat. 24:14.

12. Anni nga klase na paganassing i awan kada Adan anni Eva, anna anni i resultana?

¹² Mapeggan tu fustu nga paganassing. Makasta i efekto nittam na karuan nga klase na paganassing. Angngariganna, mawag tu mepangngo nga ikakua tam si Jehova onu ikassittam nga mapalussaw yayya. (Sal. 111:10) Nu egga nakuan kada Adan anni Eva yatun nga klase na paganassing, ari nakuan ira narrebelde kani Jehova. Ngem narrebelde ira. Tagga ta kingnguada yatun, navukatan i matada nga kayàna kagian narekunnisida nga nakaliwa ira. Liwa anna patay laman i  awayyada nga meparensia ta ánada. Megafu ta nalippawada i situasiodda, nipasiradda nga awan tu sissinnudda yayya nga sinakkabbadda i baggida.​—Gen. 3:7, 21.

13-14. (a) Mekunnay ta 1 Pedro 3:21, ngatta ariattam nakuan sobra nga ikassing i matay? (b) Anni ira i rasottam nga ayatan si Jehova?

¹³ Fustu nga ikassittam nga ari mapagayayya si Jehova, ngem ariattam mawag nga sobra nga ikassing i matay. Nangngua si Jehova tu dalan para nittam tapenu mapeggan tu mannanayun nga inango. Nu makangngua ittam tu liwa ngem napafutuan nga mabbabawi, pakoman ittam ni Jehova. Pakomanna ittam megafu ta pangurug tam ta sakrifisio nga tavvu na Anana. Tadday ta pinaka-importante nga makua tam tapenu ipasingan i pangurug ay gukaban na paddedika ta inango tam ta Dios anna pappabawtiso.​—Bibbigan i 1 Pedro 3:21.

¹⁴ Aru i rasottam nga ayatan si Jehova. Fuera paga ta pangiyawana ta mapia ira nga gannug kadaggaw, tuttudduanna paga ittam tu kinakurug meyannung nisa anna ta gakkagna ira. (Juan 8:31, 32) Niyawana nittam i Cristiano nga kongregasion tapenu igiya anna suportan ittam. Uffunanna ittam ta problema tam ira, anna iddanna ittam tu iddanama nga mattolay tu mannanayun ta perfekto nga paddia-paddian ta mappange. (Sal. 68:19; Nep. 21:3, 4) Nu monag nga nonopattam i napakaru ngana nga kingngua ni Jehova tapenu ipasingan nga ayatanna ittam, mapaguyu ittam nga ayatan yayya. Nu ayatattam si Jehova, egga nittam i fustu nga paganassing. Maganassing ittam nga pallussawan i Dios nga kuruga mangiddu nittam.

15. Kunnasi nalabanan ni Makayla i anassing nga makkamali?

¹⁵ Nalabanan ni Makayla nga nakagi ta gafu i anassing nga makkamali turi ta nalippawana nu kunnasi kadakal i ammakoma ni Jehova. “Nalippawa ku nga imperfekto ittam ngamin anna makaliwa ittam. Ngem nammuakku nga iddukan ittam ni Jehova anna pakomanna ittam base ta tavvu.” Napaguyu yayya na ayana kani Jehova nga idedika i baggina anna mappabawtiso.

16. Kunnasi nga noffunan si Benjamin nga labanan i pangokkontra?

¹⁶ Si Benjamin nga maganassing nga kontran na yenana i pappabawtisona ay nappatabarang ta manangngal ta sirkito. “Ari gapa tu Saksi i yena na manangngal ta sirkito,” kunni Benjamin. “Inuffunannà nga mannono nu kunnasì kumbinsian i yenà nga desisiokku lapa i mappabawtiso anna ariannà pinilit na yamà nga kuan yatun.” Ari nga nagustuan na yena ni Benjamin yatun. Nappasa i piga nga tiempo, mawag tu manaw yayya ta balay na yenana, ngem nitaddaggan ni Benjamin i desisionna. “Natukkal i futù gafu ta masingakku i mapia ira nga gannug nga kingngua ni Jehova nio,” kunna. “Gafu ta pakanonopakku i sakrifisio nga tavvu ni Jesus, natindiakku nu kunnasi kadakal i aya ni Jehova  nio. Gafu tatun, napaguyu ngà nga idedika i baggì kani Jehova anna mappabawtiso.”

17. Anni i tiansa tam ngamin?

¹⁷ Tagga ta kiminan si Eva ta vunga na kayu ta Eden, narrebelde yayya ta Yamana. Gafu ta sinuportan yayya ni Adan, nangipasingan si Adan tu kawan tu appabalo ta ngamin nga kinapia ni Jehova nisa. Egga i tiansa tam ngamin nga ipasingan nga ari tu kagitta tam da Adan anni Eva. Mappabalo ittam ta ngamin nga kingngua ni Jehova nittam. Nu mappabawtiso ittam, ipasingattam kani Jehova nga egga i autoridadna nga mangiyawa tu estandarte nu anni i mapia anna nu anni i marake para nittam. Mapakurug tam nga ayatattam i Yama tam anna pattalakkattam yayya.

18. Kunnasi ka mavviktoria ta passerbi kani Jehova?

¹⁸ Kabalin na bawtismo, mawag tu tulu-tuloy nga kuattam i uray ni Jehova, ari tu i uray tam. Minillion nga aripan ni Jehova i mangngua tatun. Maparigammu ira nu tulu-tuloy nga ponaggammu i pakalippawa mu ta Uvovug na Dios, i Biblia; regular nga makikavulu ta wawwaragi; anna matalikarag nga ibillay ta tanakuan i nagigiammum meyannung ta meddu nga Yamam. (Heb. 10:24, 25) Nu maddesisiokka, ginnan i tabarang ni Jehova gukaban na Uvovugna anna na organisasionna. (Isa. 30:21) Nu kunnatun, ngamin nga kuammu ay mavviktoria.​—Prov. 16:3, 20.

19. Anni nakuan i kanayummu nga rekunnisian, anna ngatta?

¹⁹ Nu kanayummu nga rekunnisian i dakal nga benefisio na pappegiya kani Jehova, dumakal i aya mu nisa anna ta estandartena ira. Nu kunnatun, awan tu maski anni nga iyofer ni Satanas i mamagimmang nikaw ta passerbi kani Jehova. Imajinammu i baggim tanga-rivu nga dagun mamegafu sangawe. Manono mu noka i desisiommu nga nappabawtiso anna makagim nga yatun i kapianan nga desisiommu!