1. Ania ti napukaw da Adan ken Eva, ken ania ti resultana?

PANAGKUNAM, asino ti rumbeng a mangaramid iti pagalagadan no ania ti naimbag ken dakes? Idi kinnan da Adan ken Eva ti bunga ti kayo a pakaammuan iti naimbag ken dakes, impakitada a saanda a nagtalek ken Jehova ken kadagiti pagalagadanna. Nangaramidda iti bukodda a pagalagadan no ania ti naimbag ken dakes. (Gen. 3:22) Ngem panunotem ti napukawda—ti pannakigayyemda ken Jehova ken ti gundawayda nga agbiag nga agnanayon. Impatawidda pay ti basol ken patay kadagiti annakda. (Roma 5:12) Nakaladladingit ti resulta ti desision da Adan ken Eva.

2-3. (a) Ania ti reaksion ti Etiope a eunuko idi kinasabaan ni Felipe? (b) Ania dagiti bendisiontayo no agpabautisartayo, ken ania dagiti saludsod nga usigentayo?

² Ikomparam ti inaramid da Adan ken Eva iti kababalin ti Etiope a eunuko. Idi kinasabaan ni Felipe, inapresiarna unay ti inaramid ni Jehova ken ni Jesus para kenkuana isu a dagus a nagpabautisar. (Ara. 8:34-38) Idi nagdedikartayo iti Dios sa nagpabautisartayo a kas iti eunuko, impakitatayo nga ap-apresiarentayo ti inaramid ni Jehova ken ni Jesus para kadatayo. Impakitatayo met nga agtaltalektayo ken Jehova ken bigbigbigentayo nga isuna ti makinkalintegan a mangaramid iti pagalagadan iti naimbag ken dakes.

³ Panunotem met dagiti bendision nga awatentayo no agserbitayo ken Jehova! Mabalin a maisublinto kadatayo ti amin a napukaw da Adan ken Eva, agraman ti gundaway nga agbiag nga agnanayon. Gapu iti pammatitayo ken  Jesu-Kristo, pakawanennatayo ni Jehova ken maaddaantayo iti nadalus a konsiensia. (Mat. 20:28; Ara. 10:43) Agbalintayo met a paset ti pamilia ni Jehova a buklen dagiti inanamonganna, nga addaan iti nagsayaat a masakbayan. (Juan 10:14-16; Roma 8:20, 21) Iti laksid dagitoy a bendision, adda dagiti makaam-ammo ken Jehova a maamak a mangtulad iti ehemplo ti Etiope a eunuko. Ania ti mabalin a makalapped iti panagpabautisarda? Ken kasano a mapagballigianda dagita?

4-5. Ania dagiti karit a nakaipasanguan dagiti agtutubo a da Avery ken Hannah?

⁴ Kinaawan kompiansa. Saksi ni Jehova dagiti nagannak ti agtutubo a lalaki a ni Avery. Nasayaat ti reputasion ni tatangna kas naayat nga ama ken nasayaat a panglakayen. Ngem dina pay kayat ti agpabautisar. Apay? “Kasla diak matulad ti kinasayaat ni Tatang,” kinunana. Ken ipapanna a dinanto kaya dagiti responsabilidad a maited kenkuana. “Baka ibagada a siak ti mangidaulo iti kararag, agpalawag, wenno mangidaulo iti panangasaba.”

⁵ Ni Hannah, agtawen iti 18, ket sobra ti kinaawan kompiansana. Agserserbi ken Jehova dagiti nagannakna. Nupay kasta, nagduadua no kabaelanna a suroten dagiti pagalagadan ni Jehova. Apay? Nababa ti panagkita ni Hannah iti bagina. No dadduma, nakaro ti lidayna nga uray la saktanna ti bagina, a mangpakaro laeng iti kasasaadna. “Awan nangibagbagaak iti ar-aramidek, uray kadagiti nagannakko,” kinunana, “ket pinanunotko a saannak a pulos kayat ni Jehova gapu iti ar-aramidek iti bagik.”

6. Ania ti nakalapped ken Vanessa nga agpabautisar?

⁶ Impluensia ti gagayyem. Imbaga ni Vanessa, nga agtawen iti 22, “Adda nasinged a gayyemko iti dandanin maysa a dekada.” Ngem, saanna a sinuportaran ti plano ni Vanessa nga agpabautisar. Nasaktan ni Vanessa, ket kinunana, “Marigatanak a makigayyem, isu a madanaganak a no putdek ti panaggayyemmi, baka diakon makabirok iti sabali.”

7. Ania ti pagbutbutngan ti agtutubo a ni Makayla, ken apay?

⁷ Buteng a makabasol. Lima ti tawen ni Makayla idi nailaksid ni manongna. Bayat a dumakdakkel, nakitana ti epekto dayta kadagiti nagannakna. “Mabutengak nga agpabautisar,” kuna ni Makayla, “baka makabasolakto met laeng, mailaksidak, ket lalo a malidayan dagiti nagannakko.”

8. Ania ti pagbutbutngan ti agtutubo a lalaki a ni Miles?

 ⁸ Buteng a mabusbusor. Saksi ni Jehova ti tatang ni Miles ken ti agsiuman kenkuana, ngem saan a Saksi ti agpayso a nanangna. “Nagyanak ken nanangko iti 18 a tawen,” kuna ni Miles, “ket mabutengak a mangibaga a kayatko ti agpabautisar. Nakitakon ti reaksionna idi nagbalin a Saksi ni tatangko. Mabutengak iti mabalin nga aramidenna kaniak.”

9. Anianto ti mabalin a mapasamak no maammuam ti kinamanagayat ken kinaanus ni Jehova?

⁹ Saan a pinili da Adan ken Eva ti agserbi ken Jehova ta saanda a napatanor ti nauneg a panagayat kenkuana. Uray kasta, impalubos ni Jehova nga agtultuloyda nga agbiag, maaddaan iti annak, ken agaramid iti bukodda a pagalagadan iti panangpadakkel iti annakda. Idi agangay, dagiti resulta ti desision da Adan ken Eva a sumina ken Jehova ti nalawag a mangipakita iti kinamaagda. Pinatay ti inauna nga anakda ti kabsatna, ket idi agangay, nagsaknap ti kinaranggas ken kinamanagimbubukodan iti sangatauan. (Gen. 4:8; 6:11-13) Ngem nangaramid ni Jehova iti pamay-an tapno maisalakanna dagiti annak da Adan ken Eva a mayat nga agserbi kenkuana. (Juan 6:38-40, 57, 58) Bayat a maam-ammuam ti kinaanus ken kinamanagayat ni Jehova, mabalin nga umun-uneg met ti ayatmo kenkuana. Saanmonto a kayat a suroten ti desision da Adan ken Eva no di ket idedikarmo ti bagim ken Jehova.

10. Apay a makatulong iti panagserbim ken Jehova ti panangutobmo iti Salmo 19:7?

¹⁰ Itultuloymo ti agsursuro maipapan ken Jehova. Bayat nga ad-adu ti masursurom maipapan ken Jehova, dakdakkel met ti kompiansam a kabaelam ti agserbi kenkuana. Kuna ni Avery, a nadakamat itay: “Naaddaanak iti kompiansa idi mabasa ken mautobko ti kari ti Salmo 19:7.” (Basaen.) Idi nakita ni Avery no kasano a tinungpal ni Jehova dayta a karina, immuneg ti panagayatna iti Dios. Ti ayat ket saan laeng a mangted iti kompiansa; tulongannatayo  met nga agpokus ken Jehova ken mangaramid iti kayatna. Kuna ni Hannah, a nadakamat itay: “Babaen ti personal a panagadalko ken panagbasak iti Biblia, natarusak a no saksaktak ti bagik, saksaktak met ni Jehova.” (1 Ped. 5:7) Nagbalin ni Hannah a ‘managtungpal iti sao ti Dios.’ (Sant. 1:22) Ania ti resultana? Kunana: “Idi nakitak ti gunggona iti panagtulnogko ken Jehova, immuneg ti ayatko kenkuana. Siguradoak itan a kanayon nga iwanwannak ni Jehova no kasapulak ti tulongna.” Saanen a saksaktan ni Hannah ti bagina. Nagdedikar ken Jehova sa nagpabautisar.

11. Ania ti inaramid ni Vanessa tapno maaddaan iti nasayaat a gagayyem, ken ania ti masursurotayo iti daytoy?

¹¹ Piliem a naimbag dagiti gagayyemmo. Naamiris met laeng ni Vanessa, a nadakamat itay, a ti gayyemna ti makalapped nga agserbi ken Jehova. Isu a pinutedna ti panaggayyemda. Ngem adda pay inaramidna. Inkagumaanna ti mangbirok iti baro a gagayyem iti uneg ti kongregasion. Kunana a nakatulong kenkuana ti ulidan ni Noe ken ti pamiliana. “Napalawlawanda kadagiti tattao a di mangay-ayat ken Jehova,” imbagana, “ngem nasayaat ti impluensiada iti maysa ken maysa.” Idi nabautisaranen, nagpayunir ni Vanessa. Kinunana, “Nakatulong daytoy tapno maaddaanak iti nasayaat a gagayyem saan la nga iti kongregasionko no di ket iti dadduma pay a kongregasion.” Maaddaanka met iti nasayaat a gagayyem no okupadoka iti trabaho nga inted ni Jehova kadatayo.​—Mat. 24:14.

12. Ania a kita ti buteng ti awan kada Adan ken Eva, ken ania ti resultana?

¹² Maaddaan iti balanse a panangmatmat iti buteng. Adda dagiti kita ti buteng a pagsayaatantayo. Kas pagarigan, masapul a mariknatayo ti buteng a mapagura ni Jehova. (Sal. 111:10) No koma adda kastoy a panagbuteng da Adan ken Eva, saanda koma a nagrebelde ken Jehova. Idi nagrebeldeda, naluktan dagiti matada ket naamirisda a managbasolda. Ti laeng naipatawidda kadagiti annakda ket  basol ken ipapatay. Gapu ta makita wenno maawatanda ti kasasaadda, nagbainda iti kinalamolamoda ket inabbonganda ti bagbagida.​—Gen. 3:7, 21.

13-14. (a) Sigun iti 1 Pedro 3:21, apay a saan koma a nalabes ti panagbutengtayo iti ipapatay? (b) Ania dagiti rasontayo a mangayat ken Jehova?

¹³ Masapul a kabutengtayo ni Jehova ngem saan koma a nalabes ti panagbutengtayo iti ipapatay. Nangaramid ni Jehova iti pamay-an tapno maaddaantayo iti biag nga agnanayon. No makabasoltayo ngem naimpusuan nga agbabawitayo, palabsen ni Jehova dagiti kamalitayo. Pakawanennatayo gapu iti pammatitayo iti daton a subbot ti Anakna. Ti maysa kadagiti kapatgan a pamay-an a maipakitatayo ti pammati ket ti panagdedikartayo iti Dios ken panagpabautisar.​—Basaen ti 1 Pedro 3:21.

¹⁴ Adu ti rasontayo a mangayat ken Jehova. Saanna laeng nga ipapaay ti bambanag a tagtagiragsakentayo iti inaldaw no di ket isursurona pay kadatayo ti kinapudno maipapan kenkuana ken kadagiti panggepna. (Juan 8:31, 32) Intedna ti kongregasion Kristiano a mangidalan ken mangsuporta kadatayo. Tultulongannatayo a mangibtur kadagiti problematayo, ken iyaw-awisna ti namnama nga agbiagto iti agnanayon iti perpekto a kasasaad. (Sal. 68:19; Apoc. 21:3, 4) No utobentayo ti kinaadu ti naaramidanen ni Jehova tapno maipakitana ti ayatna kadatayo, matignaytayo a mangayat kenkuana. Ken no ayatentayo ni Jehova, maaddaantayo iti umiso a kita ti buteng​—ti buteng a masaktantayo Daydiay ay-ayatentayo unay.

15. Kasano a nalabanan ni Makayla ti buteng a makabasol?

¹⁵ Napagballigian ni Makayla, a nadakamat itay, ti butengna a makabasol idi naawatanna a manangpakawan ni Jehova. “Nabigbigko nga imperpekto ken agkamalitayo amin. Ngem naawatak met nga ay-ayatennatayo ni Jehova ken pakawanennatayo maibatay iti subbot.” Ti ayatna ken Jehova ti nangtignay kenkuana nga agdedikar ken agpabautisar.

16. Kasano a natulongan ni Miles a manglaban iti butengna a mabusor?

¹⁶ Ni Miles, a mabuteng a busoren ni nanangna ti desisionna nga agpabautisar, ket nagpabalakad iti manangaywan iti sirkito. Imbaga ni Miles: “Saan met a Saksi ni nanangna. Tinulongannak a mangpanunot no ania ti ibagak tapno maawatan ni nanangko a desisionko ti agpabautisar ken saannak a pinilit ni tatangko.” Saan a naragsakan ti nanang ni Miles iti desisionna. Di nagbayag, kasapulan a pumanaw iti balay ni nanangna, ngem tinakderanna ti desisionna. “Natukay ti pusok idi naadalko ti naimbag a bambanag nga inaramid kaniak ni Jehova,” imbagana. “Idi pinampanunotko ti daton a subbot ni Jesus, naawatak nga ay-ayatennak unay ni Jehova.  Dayta ti nakatignayak nga agdedikar ken Jehova ken agpabautisar.”

17. Ania a gundaway ti adda kadatayo?

¹⁷ Idi nangan ni Eva iti bunga daydiay a kayo idiay Eden, linaksidna ni Amana. Idi nangan met ni Adan iti dayta, impakitana ti kinaawan panagyamanna iti amin a kinaimbag nga inaramid ni Jehova kenkuana. Addaantayo amin iti gundaway a mangipakita a ditay umanamong iti desision da Adan ken Eva. No agpabautisartayo, ipakpakitatayo a patientayo a ni Jehova ti adda autoridadna a mangaramid iti pagalagadan no ania ti umiso ken dakes para kadatayo. Pampaneknekantayo nga ay-ayaten ken pagtaltalkantayo ti Amatayo.

18. Kasano nga agballigika iti panagserbim ken Jehova?

¹⁸ Kalpasan ti bautismo, masapul nga inaldaw a surotentayo dagiti pagalagadan ni Jehova, saan a ti kayattayo. Kasta ti ar-aramiden ita ti minilion nga adipen ti Dios. Matuladmo ida no itultuloymo a paunegen ti pannakaawatmo iti Sao ti Dios, ti Biblia; regular a makikaduaka kadagiti kakabsat; ken sireregta nga iranudmo dagiti naadalmo maipapan iti naayat nga Amam. (Heb. 10:24, 25) No mangaramidka kadagiti desision, surotem ti balakad ni Jehova a naggapu iti Saona ken iti organisasionna. (Isa. 30:21) Iti kasta, agballiginto ti amin nga aramidem.​—Prov. 16:3, 20.

19. Ania ti rumbeng nga itultuloymo a bigbigen, ken apay?

¹⁹ No itultuloymo a bigbigen nga adu ti nagunggonam iti panangidalan ni Jehova, umuneg ti ayatmo kenkuana ken kadagiti pagalagadanna. Ket awanto ti aniaman nga itukon ni Satanas a mangpasardeng iti panagserbim ken Jehova. Panunotem no ania ti pagbalinam sangaribu a tawen manipud ita. Malagipmonto a ti kasayaatan pay laeng a desisionmo ket ti panagpabautisarmo!