1. Ihi ya zange Adá ni Eva? Ihi ya bhiti?

MU DYÉ, nanyi wa tokala kusola o itumu ya lungu ni ima yambote ni ima yayibha? Kyoso Adá ni Eva kyadi o kibundu kya lungu ni kyambote ni kya yibha, ene a londekesa bhu kaxi ka ibhangelu yâ kwila, ka dyelele mu itumu ya Jihova. Ene a solo itumu yâ ya lungu ni ima yambote ni yayibha. (Dim. 3:22) Maji, xinganeka mu ima ya dibotesa. Ene a zange o ukamba wâ ni Jihova. A dibotesa we o ujitu wa kukala ni mwenyu wa kalela-ku, a sambukisa o kituxi ni kalunga ku twana twâ. (Loma 5:12) O kima kya solo Adá ni Eva, kya tu bhekela phaxi ni dilamba!

2-3. (a) Ihi ya bhange o ngolambole mukwa Etiyopya kyoso Filipe kya mu tudila o njimbu yambote? (b) Se a tu batizala, mabesá ebhi u twa-nda tambula? Ibhwidisu yebhi ya-nda tambwijila o milongi yiyi?

² Sokesa ngó o ukexilu wa Adá ni Eva, ni ukexilu wa ngolambole ya Etiyopya kyoso Filipe kya mu bokela. O ngolambole wa sakidila kyavulu o mbote ya mu bhangela Jihova ni Jezú; o mbote yiyi, ya mu bhangesa ku di batizala se kulaleka. (Ika. 8:34-38) Kyoso ki tu dibhakula kwa Nzambi, kala kya bhangele o ngolambole yoyó, twa mu londekesa kwila tu sakidila o mbote yene mu tu bhangela Jihova ni Jezú. Tu londekesa we kwila, twa dyelela kwa Jihova, twa xikina kuma, mwene ngó wa tokala kubhana o itumu ya lungu ni ima yambote ni ima yayibha.

³ Xinganeka mu mabesá u tu tambula kyoso ki tu sidivila Jihova! Dibesá dimoxi, o kwijiya kwila Jihova wa-nda tu bhana o ima yoso ya dibotesa Adá ni Eva katé mwene o ujitu wa kukala ni mwenyu wa kalela-ku. Mukonda dya kixikanu kyetu  kwa Jezú Kidistu, Jihova u loloka o ituxi yetu, u tu kwatekesa kukala ni kitongolwelu kya zele. (Mat. 20:28; Ika. 10:43) Etu we tu bhanga mbandu ku mwiji wa jiselevende a a xikina kwala Jihova, twa dyelela kutambula mabesá ku hádya. (Nzwá 10:14-16; Loma 8:20, 21) Sumbala ni mabesá a di monekena kyambote yá, amoxi eza mu kwijiya Jihova, a laleka kukayela o phangu ya ngolambole mukwa Etiyopya. Ihi yene mu a fudisa ku di batizala? Kyebhi kya tena kutolola o ibhidi yiyi?

4-5. Ibhidi yebhi ya di bhana na-yu o minzangala Avelí ni Ana?

⁴ Kukamba ku di dyelela mba kukamba ku di bhana valolo. O jitata ja Avelí Jimbangi ja Jihova. Tat’ê wala ni fuma ya kukala tata ni kafunga ka henda. Maji né kiki, Avelí hanji wa mu laleka ku di batizala. Mukonda dyahi? Mwene wambe: “Ki ngexile mu xinganeka kwila, ngeji kala muthu wambote kala tat’etu.” Avelí wa banze we kwila k’eji tena kubhanga o ikalakalu kyeji tambula ku hádya. “Eme ngexile ni wôma wa kusamba bhwezala o mundu, kubhanga madiskulusu, mba kwendesa o kibuka mu sidivisu ya kuboka.”

⁵ Ana, wala ni 18 a mivu, wa tale hadi mukonda ka kexile mu di bhana valolo. A mu sase ku jitata exile mu sidivila Jihova. Né kiki, mwene wexile ni phata se weji tena mwene kukumbidila o itumu ya Jihova. Mukonda dyahi? Ana kexile mu di bhana valolo. Sayi ithangana wa kexile mu divwa kyayibha. Mukonda dya kiki, mwene wexile ni kifwa kya ku di kwama mu lwelu. Kubhanga kiki kwexile ngó mu bandekesa dingi o maka. Mwene wambe: “O ima i nga kexile mu bhanga, ki ngexile mu i tangela muthu, né mwene o jitata jami. Nga banzele kwila, Jihova nuka weji ngi mesena kala selevende yê mukonda dya kifwa kyami kya ku di kwama mu lwelu.”

6. Ihi ya fudisa Vanesa ku di batizala?

⁶ Kifunyisu kya makamba. Vanesa wala ni 22 a mivu wambe: “Nga kexile ni dikamba nga mwijidile mu mivu yavulu.” Maji, o dikamba dya Vanesa ka kexile mu mu swinisa ku di batizala. Kiki kya kwama Vanesa, mwene wambe: “Eme ki ngexile ni uhete wa kubhanga ukamba, mu kiki ngexile ni wôma wa kubatula o ukamba u ngexile nawu kyá, nga fikile kwila, ki ngeji tena kusanga dingi dikamba dyéngi.”

7. Wôma wahi wa kexile nawu o munzangala Makayla, ni mukonda dyahi?

⁷ Wôma wa kuta kituxi. Kyoso Makayla kyexile ni mivu itanu, kota dyê a mu tele kamukonde mu kilunga. Kyoso kyayi ni kukula, mwene wa mono o ndolo ni kuluwala kwa bhekela kota dyê ku jitata jê. Makayla  wambe: “Nga kexile ni wôma wa kwila, se ngi di batizala, ngeji ta kituxi, eji ngi ta we kamukonde, ngeji bhekesa dingi ndolo ku jitata jami.”

8. Wôma wahi wa kexile na-u o munzangala Mingu?

⁸ Wôma wa izukutisu. Mingu wala ni 22 a mivu, tat’ê ni muhatu wa tat’ê a mu sidivila Jihova, maji manyâ ki Mbangi ya Jihova. Mingu wambe: “Mam’etu mwene wa ngi sase katé ki nga tenesa 18 dya mivu. Nga kexile ni wôma wa ku mu tangela kwila, nga mesenene ku di batizala. Nga mono kyebhi kya divu kyoso tat’etu kya kituka Mbangi ya Jihova. Nga kexile ni wôma, nga fikile kwila weji ngi zukutisa.”

9. Nange ihi i bhita kyoso ki u di longa o henda ni mwanyu wa Jihova?

⁹ Adá ni Eva ka solo kusidivila Jihova mukonda ene ka mu zolele kya soko. Né kiki, Jihova wa a ehela kukala ku mwenyu mu kithangana kya soko, phala kuvwala ana ni kusola mudya o itumu ya tokalele phala ku a sasa. O ima ya bhiti mukonda dya Adá ni Eva kudituna ku a tumina kwa Jihova, ya londekesa o wowa wâ. O mon’ê wa phande kumbi wa jibha ndenge’yê se kikuma, ku pholo dya kwenda, o ujibhangânga ni lwimbi lwa dibandekesa bhu kaxi ka athu. (Dim. 4:8; 6:11-13) Maji Jihova wa soto ndunge phala kubhulula o ana oso a Adá ni Eva a mesenene ku mu sidivila. (Nzwá 6:38-40, 57, 58) Kyoso ki uya ni kudilonga ya lungu ni mwanyu ni henda ya Jihova, o henda yé kwa mwene ya-nda di bandekesa. Eye wa-nda dituna o njila ya solo Adá ni Eva, wa-nda sola kubhakula o mwenyu wé kwa Jihova.

10. Kyebhi o kuxinganeka mu Jisálamu 19:7, ku kukwatekesa kusidivila Jihova?

¹⁰ Suluka ni kudilonga ya lungu ni Jihova. Kyoso ki uya ni kudilonga ya lungu ni Jihova, eye u dyelela dingi kwila, u tena kuditunda kyambote mu ku mu sidivila. Avelí, a mu tange kudima wambe: “Nga mateka ku di dyelela mu kutanga ni ku xinganeka mu kikanenu ki tu sanga mu Jisálamu 19:7.” (Tanga.) Kyoso Avelí kya mono kyebhi Jihova kya kumbidila o kikanenu kyokyo, o henda yê kwa Nzambi ya kolo dingi. Kuzola Nzambi ki ku tu kwatekesa ngó kudyelela kwila, tu tena ku mu sidivila, ku  tu kwatekesa we kudituna kubhanga ima i mu luwalesa ni ku tu bhana nguzu phala ku mu sidivila. Ana a mu tange ku dimatekenu, wambe: “Bhu kaxi ka kutanga o Bibidya ni kudilonga ubheka, nga mono kwila, kyoso ki ngexile mu dikwama ngexile mu kwama we Jihova.” (1 Phe. 5:7) Ana wa kituka ‘mubhangi a Mak’a Nzambi.’ Kifwa wa kexile mu kumbidila ya kexile mu dilonga. (Tiya. 1:22) Ihi ya bhiti? Mwene wambe: “Kyoso ki nga mono o mbote ijila mu kubelesela Jihova, o henda yami kwa mwene ya kolo dingi. Lelu ngi dyelela kwila, Jihova wa-nda ngendesa ithangana yoso, ki ngi bhindamena o kikwatekesu kyê.” Ana wa tena kutolola o hânji yê yayibha ya ku di kwama mu lwelu. Mwene wa dibhakula kwa Jihova, yu wa di batizala.

11. Ihi ya bhange Vanesa phala kubhanga makamba ambote? Ihi i tu di longa ku phangu yê?

¹¹ Sola o makamba mé ni unjimu. Vanesa, a mu tumbula ku dimatekenu, wa xikina kwila kamba dyê wa kexile mu mu fidisa kusidivila Jihova. Mu kiki mwene wa batula o ukamba. Maji ki kyene ngó, Vanesa wa bhange dingi kima. Mwene wa bhange yoso ni yoso phala kukala ni makamba mu kilunga. Mwene wambe kwila, o phangu ya xisa Nowé ni mwiji wê ya mu kwatekesa. Mwene wambe: “Ene a a kondolokele ku athu ka zolele Jihova, maji né kiki o mwiji wa kexile ni ukamba wambote mudya.” Kyoso kya mu batizala, Vanesa wa kituka muboki wa thembu yoso. Mwene wambe: “O kikalakalu kiki, kya ngi kwatekesa kubhanga makamba ambote, ki kale mu kilunga mu nga tokala kixi mu ilunga yéngi.” Eye we u tena kubhanga makamba ambote mu kubhanga yoso i u tena mu kikalakalu kya tu bhana Jihova phala kubhanga.—Mat. 24:14.

12. Wôma webhi wa kambe kulondekesa Adá ni Eva? Ihi ya bhiti?

¹² Tula o wôma mu kididi kya tokala. Sayi ithangana kima kyambote kukala ni wôma. Mu kifika, twa bhingi kukala ni wôma wa dikota wa kuluwalesa Jihova. (Jisá. 111:10) Se Adá ni Eva akexile ni wôma yú, ene keji bhukumukina Jihova. Maji ene a bhukumuka. Kyoso kya bhukumuka, o mesu mâ ma jikuka; a tongolola kyambote kwila, akexile kyá akwa ituxi. Ene a lundwisa kyá ngó o kituxi ni kalunga ku twana twâ. Kuma ene a tendela  kyambote kwila a xibhakele o kijila kya Nzambi, sonyi ja a kwata.—Dim. 3:7, 21.

13-14. (a) Kala ki londekesa 1 Phetele 3:21, mukonda dyahi ki tu bhingi kukala ni wôma wa kufwa? (b) Ima yebhi i tu bhangesa kuzola Jihova?

¹³ Se tu kala ni wôma wa kuluwalesa Jihova, ki twa-nda kala ni wôma wa kufwa. Jihova wa sange ndunge i tu kwatekesa kukala ni mwenyu wa kalela-ku. Se tu ta kituxi, anga tu dyela ni muxima woso, Jihova wa-nda loloka o itondalu yetu. Mwene wa-nda tu loloka mukonda dya kixikanu kyetu mu sata ya bhakula Mon’ê. O ukexilu wa beta o kota u tu londekesa o kixikanu ku sata yiyi, o kubhakula o mwenyu wetu kwa Nzambi ni ku di batizala.—Tanga 1 Phetele 3:21.

¹⁴ Twala ni ima yavulu i tu bhangesa kuzola Jihova. Ki mukonda ngó dya ima i tu sangulukisa yene mu tu bhana mu kizuwa ni kizuwa, maji u tu longa we yebhi o vondadi yê. (Nzwá 8:31, 32) Mwene wa tu bhana o kilunga kya Ukidistá ki twendesa, ki tu kwatekesa. Lelu, mwene u tu kwatekesa kukolokota mu kithangana kya ibhidi; u tu bhana kidyelelu kya kukala ni mwenyu wa yuka, wa kalela-ku ku hádya. (Jisá. 68:19; Dij. 21:3, 4) Kyoso ki tu xinganeka mu yoso yene mu bhanga Jihova phala kulondekesa kwila, wa tu zolo, o henda yetu kwa mwene i kola dingi. Se tu zola Jihova, twa-nda dilonga kukala ni wôma wa tokala. Twa-nda kala ni wôma wa kukwama mba kuluwalesa Yó u twa zolo kyavulu.

15. Kyebhi Makayla kya tolola o wôma wê?

¹⁵ Makayla, a mu tumbula kudimatekenu, wa tolola o wôma, kyoso kya tendela kwila, Jihova muloloki wa dikota. “Eme nga mono kwila, etwenyoso tu akwa ituxi, twa-nda tondala. Maji nga tendela we kwila, Jihova wa tu zolo wa-nda tu loloka bhu kaxi ka sata ya kukula.” O henda yê kwa Jihova, ya mu bhangesa kudibhakula kwa mwene ni ku di batizala.

16. Kyebhi Mingu kya mu kwatekesa kutolola o wôma wa ku mu zukutisa?

¹⁶ Mingu, wa kexile ni wôma wa ku mu zukutisa kwa manyâ mukonda dya kusola ku di batizala, wa bhingi kikwatekesu ku kafunga ka ilunga. Mwene wambe: “Ku jitata ja kafunga ketu ka ilunga muthu umoxi we ngó wexile mbangi ya Jihova kyoso kya mu sase. Mwene wa ngi kwatekesa kuxinganeka mu maka u ngeji tangela mam’etu, phala ku mu kwatekesa kutendela kwila, ki papá wa ngi jijidika, éme nga solo mu dyami ku di batizala.” Manyâ Mingu ka sanguluka ni kima kya solo kubhanga mon’ê. Kwa bhingi kuxisa o dibhata dya manyâ, maji wa di kwatenena mu kima kya solo. Mwene wambe: “O milongi i nga dilongo ya lungu ni ima yambote yene mu ngi bhangela Jihova, ya ngi tula ku muxima. Kyoso ki ngi xinganeka kyambote mu sata ya kukula kwa Jezú, ngi mona kwila, Jihova wa ngi zolo kyavulu. O kixinganeku kiki, kya ngi bhangesa ku di bhakula kwa Jihova ni ku di batizala.”

17. Ujitu webhi u twala na-u etwenyoso?

¹⁷ Kyoso Eva kyadi o kibundu kya muxi yó ku Edene, mwene wa ditunu Tat’ê. Kyoso Adá kya di bundu mu kima kya yibha kya bhangele muhatu’ê, mwene wa londekesa kukamba kisakidilu ku ima yoso ya mu bhanene Jihova. Etu enyoso tu tena kulondekesa kwila ki tu difu ni Adá ni Eva. Tu sakidila yoso yene mu tu bhangela Jihova. Mu ku di batizala, tu londekesa kwa Jihova kuma, tu xikina kwila, mwéne wala ni ungana wa kusola o itumu ya lungu ni ima yambote ni ima ya yibha phala etu. Tu londekesa we kwila twa zolo Tata yetu anga twa mu dyelela.

18. Kyebhi ki u tena kuditunda kyambote mu sidivisu ya Jihova?

¹⁸ Kyoso ki tu di batizala, twa bhingi kusuluka ni kubhanga o ima ya mesena Jihova kizuwa ni kizuwa, mu veji dya kubhanga o jivondadi jetu. Mazunda a jiselevende ja Nzambi a mu kwambata o mwenyu mu ukexilu yú. Eye u tena kubhanga we yene mu bhanga ene, se u suluka ni kubandekesa o kwijiya kwé kwa Mak’â Nzambi, o Bibidya; kukala ni jiphange jé ithangana yoso ni mu kubokela akwenu ni kuswina kwoso o ima i wene mu dilonga ya lungu ni Tat’é. (Jihe. 10:24, 25) Kyoso ki u sola o ima, ivwa, xikina o itendelesu i ku bhana Jihova bhu kaxi ka Maka mê ni kilunga kyê. (Iza. 30:21) Mu kiki, yoso i u bhanga ya-nda di tunda kyambote.—Jisa. 16:3, 20.

19. Ihi i wa tokala kusuluka ni kulembalala ni mukonda dyahi?

¹⁹ Se u suluka ni kuxikina kwila, wene mu katula mbote mu ku kwendesa kwa Jihova, o henda yé kwa mwene ya-nda di bandekesa. Mu kiki se-ku kima ki ku londekesa Satanaji, kya-nda kufidisa kusidivila Jihova. Xinganeka kindala, kyebhi kya-nda kala o mwenyu wé mu midi ya mivu. Wa-nda lembalala ku batizu yé kala o kima kya beta kota ki wa solo ku mwenyu wé woso!