ບົດຄວາມສຶກສາທີ 10
ມີສິ່ງໃດບໍທີ່ຂັດຂວາງຂ້ອຍບໍ່ໃຫ້ຮັບບັບເຕມາ?
“ເຂົາທັງສອງໄດ້ລົງໄປໃນນ້ຳທັງທ່ານຟີລິບແລະທັງທ່ານຜູ້ເປັນມອງ [ຂ້າລາຊະການ] ແລະທ່ານຟີລິບໄດ້ໃຫ້ທ່ານຮັບສິນບັບເຕມາ.”—ກິດ. 8:38
ເພງ 52 ການອຸທິດຕົວຂອງຄລິດສະຕຽນ
ໃຈຄວາມສຳຄັນ *
1. ອາດາມແລະເອວາສູນເສຍຫຍັງແດ່ ແລະຜົນທີ່ຕາມມາເປັນແນວໃດ?
ເຈົ້າຄິດວ່າໃຜທີ່ຄວນຕັ້ງມາດຕະຖານເລື່ອງອັນໃດຖືກອັນໃດຜິດ? ເມື່ອອາດາມແລະເອວາກິນໝາກໄມ້ຈາກຕົ້ນໄມ້ແຫ່ງຄວາມຮູ້ການດີແລະຊົ່ວ ເຂົາເຈົ້າກໍສະແດງຢ່າງຈະແຈ້ງວ່າ ເຂົາເຈົ້າບໍ່ໄດ້ໄວ້ວາງໃຈພະເຢໂຫວາແລະມາດຕະຖານຂອງພະອົງ. ເຂົາເຈົ້າເລືອກເອງວ່າຈະຕັ້ງມາດຕະຖານເລື່ອງການດີແລະຊົ່ວ. (ຕົ້ນ. 3:22) ຂໍໃຫ້ຄິດເບິ່ງສິ່ງທີ່ເຂົາເຈົ້າເຮັດເສຍໄປ. ເຂົາເຈົ້າສູນເສຍຄວາມເປັນໝູ່ກັບພະເຢໂຫວາ ສູນເສຍໂອກາດທີ່ຈະມີຊີວິດຕະຫຼອດໄປ ແລະຍັງຖ່າຍທອດບາບແລະຄວາມຕາຍໃຫ້ລູກຫຼານ. (ໂລມ 5:12) ການເລືອກຂອງອາດາມແລະເອວາເຮັດໃຫ້ຊີວິດຕ້ອງທຸກກາຍທຸກໃຈ.
ຫຼັງຈາກທີ່ຂ້າລາຊະການຊາວເອທິໂອປີເຊື່ອໃນພະເຍຊູ ລາວຢາກຮັບບັບເຕມາທັນທີ (ເບິ່ງຂໍ້ 2-3)
2-3. (ກ) ຂ້າລາຊະການຊາວເອທິໂອປີໄດ້ເຮັດຫຍັງຕອນທີ່ຟີລິບປະກາດກັບລາວ? (ຂ) ເຮົາຈະໄດ້ຮັບພອນຫຍັງແດ່ຖ້າເຮົາຮັບບັບເຕມາ ແລະເຮົາຈະພິຈາລະນາຄຳຖາມຫຍັງ?
2 ຂໍໃຫ້ສົມທຽບລະຫວ່າງສິ່ງທີ່ອາດາມແລະເອວາເຮັດກັບສິ່ງທີ່ຂ້າລາຊະການຊາວເອທິໂອປີເຮັດຕອນທີ່ຟີລິບປະກາດກັບລາວ. ຂ້າລາຊະການຄົນນີ້ເຫັນຄຸນຄ່າຕໍ່ສິ່ງທີ່ພະເຢໂຫວາແລະພະເຍຊູເຮັດເພື່ອລາວຫຼາຍຈົນຕັດສິນໃຈຮັບບັບເຕມາທັນທີ. (ກິດ. 8:34-38) ເມື່ອເຮົາອຸທິດຕົວໃຫ້ພະເຈົ້າແລະຮັບບັບເຕມາຄືກັບຂ້າລາຊະການຊາວເອທິໂອປີ ເຮົາກໍສະແດງໃຫ້ເຫັນຢ່າງຈະແຈ້ງວ່າ ເຮົາເຫັນຄຸນຄ່າຕໍ່ສິ່ງທີ່ພະເຢໂຫວາແລະພະເຍຊູເຮັດເພື່ອເຮົາ. ເຮົາຍັງສະແດງວ່າເຮົາໄວ້ວາງໃຈພະເຢໂຫວາແລະຍອມຮັບວ່າພະອົງເທົ່ານັ້ນທີ່ມີສິດຕັ້ງມາດຕະຖານໃນເລື່ອງອັນໃດຖືກອັນໃດຜິດ.
3 ຂໍໃຫ້ຄິດເຖິງພອນທີ່ເຮົາໄດ້ຮັບເມື່ອຮັບໃຊ້ພະເຢໂຫວາ! ພອນຢ່າງໜຶ່ງຄື ເຮົາມີໂອກາດທີ່ຈະໄດ້ຮັບທຸກສິ່ງທຸກຢ່າງທີ່ອາດາມແລະເອວາເຮັດສູນເສຍໄປ ເຊິ່ງລວມເຖິງຊີວິດຕະຫຼອດໄປ. ຍ້ອນເຮົາມີຄວາມເຊື່ອໃນພະເຍຊູຄລິດ ພະເຢໂຫວາຈຶ່ງໃຫ້ອະໄພໃນຄວາມຜິດພາດຂອງເຮົາແລະເຮັດໃຫ້ເຮົາມີສະຕິຮູ້ສຶກຜິດຊອບທີ່ສະອາດ. (ມັດ. 20:28; ກິດ. 10:43) ນອກຈາກນັ້ນ ເຮົາຍັງໄດ້ມາເປັນສ່ວນໜຶ່ງຂອງຄອບຄົວພະເຢໂຫວາແລະມີອະນາຄົດທີ່ດີເລີດລໍຖ້າເຮົາຢູ່. (ໂຢ. 10:14-16; ໂລມ 8:20, 21) ເຖິງວ່າຈະມີພອນຫຼາຍຢ່າງ ແຕ່ບາງຄົນທີ່ຮູ້ຈັກພະເຢໂຫວາກໍລັງເລໃຈທີ່ຈະເຮັດຄືກັບຂ້າລາຊະການຊາວເອທິໂອປີ. ສິ່ງໃດທີ່ອາດຂັດຂວາງເຂົາເຈົ້າບໍ່ໃຫ້ຮັບບັບເຕມາ? ແລະເຂົາເຈົ້າຈະເອົາຊະນະໄດ້ແນວໃດ?
ອຸປະສັກທີ່ຂັດຂວາງບາງຄົນບໍ່ໃຫ້ຮັບບັບເຕມາ
ອຸປະສັກຕ່າງໆທີ່ບາງຄົນເຈິກ່ອນຈະເລືອກຮັບບັບເຕມາ
ຂາດຄວາມໝັ້ນໃຈ (ເບິ່ງຂໍ້ 4-5) *
4-5. ສິ່ງໃດຂັດຂວາງເອເວີຣີແລະຮັນນາບໍ່ໃຫ້ຢາກຮັບບັບເຕມາ?
4 ຂາດຄວາມໝັ້ນໃຈ. ຜູ້ຊາຍຄົນໜຶ່ງຊື່ເອເວີຣີອາຍຸ 19 ປີ ພໍ່ແມ່ຂອງລາວເປັນພະຍານພະເຢໂຫວາ. ພໍ່ຂອງລາວມີຊື່ສຽງວ່າເປັນພໍ່ທີ່ດີຫຼາຍແລະເປັນຜູ້ເຖົ້າແກ່ທີ່ເຮັດວຽກເກັ່ງ. ແຕ່ເອເວີຣີກໍຍັງລັງເລທີ່ຈະຮັບບັບເຕມາ. ຍ້ອນຫຍັງ? ລາວບອກວ່າ: “ຂ້ອຍຄິດວ່າຂ້ອຍຄືຊິເຮັດບໍ່ໄດ້ດີເທົ່າກັບພໍ່.” ນອກຈາກນັ້ນ ລາວຍັງບໍ່ໝັ້ນໃຈວ່າຈະຮັບຜິດຊອບວຽກຕ່າງໆທີ່ອາດຈະໄດ້ຮັບໃນອະນາຄົດໄດ້ບໍ່. ລາວບອກວ່າ: “ຂ້ອຍຢ້ານຖືກຂໍໃຫ້ອະທິດຖານຕໍ່ໜ້າຄົນອື່ນ ບັນລະຍາຍ ຫຼືນຳກຸ່ມການປະກາດ.”
5 ຜູ້ຍິງຄົນໜຶ່ງຊື່ຮັນນາອາຍຸ 18 ປີ ເປັນຄົນທີ່ບໍ່ມີຄວາມໝັ້ນໃຈໃນຕົວເອງຫຼາຍ. ເຖິງວ່າພໍ່ແມ່ຂອງລາວເປັນພະຍານພະເຢໂຫວາ ແຕ່ລາວກໍຍັງສົງໄສວ່າລາວຈະໃຊ້ຊີວິດຕາມມາດຕະຖານຂອງພະເຢໂຫວາໄດ້ບໍ່. ຍ້ອນຫຍັງ? ຮັນນາເບິ່ງຕົວເອງຕ່ຳໂພດ. ບາງເທື່ອ ລາວຮູ້ສຶກບໍ່ດີຫຼາຍຈົນທຳຮ້າຍຕົວເອງ ເຊິ່ງມີແຕ່ຈະເຮັດໃຫ້ສະພາບການແຮ່ງຮ້າຍກວ່າເກົ່າ. ລາວບອກວ່າ: “ຂ້ອຍບໍ່ເຄີຍບອກໃຜໃນສິ່ງທີ່ຂ້ອຍເຮັດ ແມ່ນແຕ່ກັບພໍ່ແມ່ ແລະຂ້ອຍຮູ້ສຶກວ່າພະເຢໂຫວາບໍ່ຕ້ອງການຂ້ອຍ ຍ້ອນສິ່ງທີ່ຂ້ອຍເຮັດກັບຕົວເອງ.”
ອິດທິພົນຈາກໝູ່ (ເບິ່ງຂໍ້ 6) *
6. ອັນໃດເຮັດໃຫ້ວາເນດຊາຍັງບໍ່ຢາກຮັບບັບເຕມາ?
6 ອິດທິພົນຈາກໝູ່. ຜູ້ຍິງຄົນໜຶ່ງຊື່ວາເນດຊາອາຍຸ 22 ປີບອກວ່າ: “ຂ້ອຍມີໝູ່ທີ່ດີຫຼາຍ ພວກເຮົາເປັນໝູ່ກັນມາເກືອບສິບປີ.” ແຕ່ໝູ່ຂອງວາເນດຊາບໍ່ໄດ້ສະໜັບສະໜູນລາວໃຫ້ຮັບບັບເຕມາ. ລາວຮູ້ສຶກເສຍໃຈຫຼາຍ ລາວບອກວ່າ: “ການຫາໝູ່ເປັນເລື່ອງຍາກຫຼາຍສຳລັບຂ້ອຍ ແລະຂ້ອຍຢ້ານວ່າຖ້າຂ້ອຍເຊົາເປັນໝູ່ກັບລາວ ຂ້ອຍຈະບໍ່ມີໝູ່ສະໜິດອີກ.”
ຢ້ານເຮັດຜິດຮ້າຍແຮງ (ເບິ່ງຂໍ້ 7) *
7. ມະເຄລາຢ້ານຫຍັງ ແລະເປັນຫຍັງລາວຈຶ່ງຢ້ານ?
7 ຢ້ານເຮັດຜິດຮ້າຍແຮງ. ຜູ້ຍິງຄົນໜຶ່ງຊື່ມະເຄລາ ຕອນທີ່ລາວອາຍຸ 5 ປີ ອ້າຍຂອງລາວໄດ້ຖືກຕັດສຳພັນ. ເມື່ອລາວໃຫຍ່ຂຶ້ນ ລາວກໍເຫັນວ່າສິ່ງທີ່ອ້າຍເຮັດນັ້ນໄດ້ເຮັດໃຫ້ພໍ່ແມ່ເສຍໃຈຫຼາຍແທ້ໆ. ລາວບອກວ່າ: “ຂ້ອຍຢ້ານວ່າຖ້າຂ້ອຍຮັບບັບເຕມາແລ້ວເຮັດຜິດ ຂ້ອຍກໍຈະຖືກຕັດສຳພັນເຊິ່ງຈະເຮັດໃຫ້ພໍ່ແມ່ເສຍໃຈຫຼາຍກວ່າເກົ່າອີກ.”
ຢ້ານຖືກຕໍ່ຕ້ານ (ເບິ່ງຂໍ້ 8) *
8. ໄມຢ້ານຫຍັງ?
8 ຢ້ານຖືກຕໍ່ຕ້ານ. ຜູ້ຊາຍຄົນໜຶ່ງຊື່ໄມ ພໍ່ແທ້ໆແລະແມ່ນ້າຂອງລາວເປັນພະຍານພະເຢໂຫວາ. ແຕ່ແມ່ແທ້ໆຂອງລາວບໍ່ໄດ້ເປັນພະຍານພະເຢໂຫວາ. ລາວບອກວ່າ: “ຂ້ອຍຢູ່ກັບແມ່ມາ 18 ປີ. ຂ້ອຍຢ້ານທີ່ຈະບອກແມ່ວ່າຂ້ອຍຢາກຮັບບັບເຕມາ. ຂ້ອຍເຄີຍເຫັນສິ່ງທີ່ແມ່ເຮັດກັບພໍ່ຕອນທີ່ພໍ່ເຂົ້າມາເປັນພະຍານພະເຢໂຫວາ. ຂ້ອຍກໍເລີຍຢ້ານວ່າແມ່ຈະເຮັດໃຫ້ຂ້ອຍລຳບາກ.”
ເຈົ້າຈະເອົາຊະນະອຸປະສັກໄດ້ແນວໃດ?
9. ເຈົ້າຄົງຢາກເຮັດຫຍັງເມື່ອໄດ້ຮຽນຮູ້ວ່າພະເຢໂຫວາຮັກແລະອົດທົນຫຼາຍສ່ຳໃດ?
9 ອາດາມແລະເອວາເລືອກທີ່ຈະບໍ່ຮັບໃຊ້ພະເຢໂຫວາ ເພາະເຂົາເຈົ້າບໍ່ໄດ້ຮັກພະອົງຫຼາຍພໍ. ແຕ່ພະອົງກໍຍັງໃຫ້ເຂົາເຈົ້າມີຊີວິດຢູ່ຕໍ່ໄປຈົນມີລູກແລະໃຫ້ລ້ຽງລູກດ້ວຍມາດຕະຖານຂອງເຂົາເຈົ້າເອງ. ຜົນຈາກການຕັດສິນໃຈຂອງອາດາມແລະເອວາທີ່ຢາກເປັນອິດສະຫຼະຈາກພະເຢໂຫວາເຮັດໃຫ້ເຫັນແຈ້ງວ່າເຂົາເຈົ້າໂງ່ອີ່ຫຼີ. ລູກຊາຍກົກຂອງເຂົາເຈົ້າຂ້ານ້ອງຊາຍທີ່ບໍ່ມີຄວາມຜິດ ຕໍ່ມາຄອບຄົວມະນຸດກໍມີແຕ່ຄວາມຮຸນແຮງແລະຄວາມເຫັນແກ່ຕົວ. (ຕົ້ນ. 4:8; 6:11-13) ແຕ່ພະເຢໂຫວາໄດ້ຈັດກຽມທາງໜຶ່ງໄວ້ເພື່ອປົກປ້ອງລູກຫຼານຂອງອາດາມກັບເອວາທຸກຄົນທີ່ຢາກຮັບໃຊ້ພະອົງ. (ໂຢ. 6:38-40, 57, 58) ແຮ່ງເຈົ້າໄດ້ຮຽນເລື່ອງຄວາມຮັກແລະຄວາມອົດທົນຂອງພະເຢໂຫວາຫຼາຍເທົ່າໃດ ເຈົ້າກໍແຮ່ງຈະຮັກພະອົງຫຼາຍຂຶ້ນເທົ່ານັ້ນ. ເຈົ້າຈະບໍ່ຢາກເຮັດຄືກັບອາດາມແລະເອວາ ແຕ່ເຈົ້າຈະອຸທິດຕົວໃຫ້ພະເຢໂຫວາ.
ວິທີທີ່ເຈົ້າຈະເອົາຊະນະໄດ້
(ເບິ່ງຂໍ້ 9-10) *
10. ເປັນຫຍັງການຄິດຕຶກຕອງໃນຄຳເພງ 19:7 ຈະຊ່ວຍເຈົ້າໃຫ້ຮັບໃຊ້ພະເຢໂຫວາ?
10 ຮຽນຮູ້ກ່ຽວກັບພະເຢໂຫວາຕໍ່ໆໄປ. ແຮ່ງເຈົ້າຮຽນຮູ້ກ່ຽວກັບພະເຢໂຫວາຫຼາຍຂຶ້ນ ເຈົ້າກໍແຮ່ງໝັ້ນໃຈຫຼາຍຂຶ້ນວ່າເຈົ້າຈະສາມາດຮັບໃຊ້ພະອົງຢ່າງປະສົບຜົນສຳເລັດໄດ້. ເອເວີຣີທີ່ເວົ້າເຖິງໃນຕອນທຳອິດບອກວ່າ: “ຂ້ອຍມີຄວາມໝັ້ນໃຈຫຼາຍຂຶ້ນເມື່ອອ່ານແລະຄິດຕຶກຕອງຄຳສັນຍາໃນຄຳເພງ 19:7.” (ອ່ານ) ເມື່ອເອເວີຣີເຫັນວ່າພະເຢໂຫວາເຮັດໃຫ້ຄຳສັນຍານັ້ນເປັນຈິງ ລາວກໍຮັກພະອົງຫຼາຍຂຶ້ນ. ຄວາມຮັກບໍ່ພຽງແຕ່ຊ່ວຍເຮົາໃຫ້ມີຄວາມໝັ້ນໃຈຫຼາຍຂຶ້ນ ແຕ່ຍັງຊ່ວຍເຮົາໃຫ້ຈົດຈໍ່ທີ່ພະເຢໂຫວາແລະຄວາມຕ້ອງການຂອງພະອົງ. ຮັນນາບອກວ່າ: “ການສຶກສາສ່ວນຕົວແລະການອ່ານຄຳພີໄບເບິນເຮັດໃຫ້ຂ້ອຍຮູ້ວ່າ ຖ້າຂ້ອຍທຳຮ້າຍຕົວເອງ ຂ້ອຍກໍທຳຮ້າຍພະເຢໂຫວາຄືກັນ.” (1 ເປ. 5:7) ຮັນນາໄດ້ “ເຮັດຕາມຄຳສອນຂອງພະເຈົ້າ.” (ຢໂກ. 1:22, ລ.ມ.) ຜົນເປັນແນວໃດ? ລາວບອກວ່າ: “ເມື່ອຂ້ອຍເຫັນວ່າການເຊື່ອຟັງພະເຢໂຫວາເປັນປະໂຫຍດຫຼາຍເທົ່າໃດ ຂ້ອຍກໍແຮ່ງຮັກພະອົງຫຼາຍຂຶ້ນ. ຕອນນີ້ຂ້ອຍໝັ້ນໃຈວ່າພະອົງຈະຊີ້ນຳຂ້ອຍສະເໝີຖ້າຂ້ອຍຕ້ອງການຄວາມຊ່ວຍເຫຼືອ.” ຮັນນາສາມາດເອົາຊະນະຄວາມຮູ້ສຶກຢາກທຳຮ້າຍຕົວເອງ ແລະໃນທີ່ສຸດລາວກໍໄດ້ອຸທິດຕົວແລະຮັບບັບເຕມາ.
(ເບິ່ງຂໍ້ 11) *
11. ວາເນດຊາເຮັດແນວໃດເພື່ອຈະໄດ້ໝູ່ທີ່ດີ ແລະເຮົາໄດ້ຮຽນຮູ້ຫຍັງຈາກເລື່ອງນີ້?
11 ເລືອກໝູ່ຢ່າງສະຫຼາດ. ວາເນດຊາທີ່ເວົ້າເຖິງໃນຕອນທຳອິດ ໃນທີ່ສຸດກໍຮູ້ວ່າໝູ່ຂອງລາວຖ່ວງດຶງລາວໄວ້ບໍ່ໃຫ້ຮັບໃຊ້ພະເຢໂຫວາ ລາວຈຶ່ງເຊົາເປັນໝູ່ກັບຄົນນັ້ນ. ນອກຈາກນັ້ນ ລາວຍັງໄດ້ພະຍາຍາມຊອກຫາໝູ່ໃໝ່ໃນປະຊາຄົມ. ລາວບອກວ່າຕົວຢ່າງຂອງໂນເອກັບຄອບຄົວໄດ້ຊ່ວຍລາວ. ລາວເວົ້າວ່າ: “ເຖິງວ່າເຂົາເຈົ້າຈະຢູ່ໃນທ່າມກາງຄົນທີ່ບໍ່ໄດ້ຮັກພະເຢໂຫວາ. ແຕ່ເຂົາເຈົ້າກໍເປັນໝູ່ກັນເອງໃນຄອບຄົວເຊິ່ງເປັນການຄົບຫາທີ່ດີ.” ຫຼັງຈາກລາວຮັບບັບເຕມາແລ້ວລາວກໍເປັນໄພໂອເນຍ. ຕອນນີ້ລາວບອກວ່າ: “ການເປັນໄພໂອເນຍຊ່ວຍຂ້ອຍໃຫ້ມີໝູ່ຫຼາຍຄົນທັງໃນປະຊາຄົມຂອງຂ້ອຍແລະປະຊາຄົມອື່ນໆນຳ.” ເຈົ້າກໍຄືກັນ ເຈົ້າສາມາດຊອກຫາໝູ່ທີ່ດີໄດ້ໂດຍພະຍາຍາມເຮັດວຽກຮັບໃຊ້ພະເຢໂຫວາໃຫ້ຫຼາຍທີ່ສຸດ.—ມັດ. 24:14
(ເບິ່ງຂໍ້ 12-15) *
12. ຄວາມຢ້ານແບບໃດທີ່ອາດາມແລະເອວາບໍ່ມີ ແລະຜົນເປັນແນວໃດ?
12 ມີຄວາມຢ້ານໃນແບບທີ່ຖືກຕ້ອງ. ຄວາມຢ້ານບາງແບບກໍເປັນສິ່ງທີ່ດີ ເຊັ່ນ ຢ້ານວ່າຈະເຮັດໃຫ້ພະເຢໂຫວາບໍ່ພໍໃຈ. (ເພງ. 111:10) ຖ້າອາດາມແລະເອວາມີຄວາມຢ້ານແບບນັ້ນ ເຂົາເຈົ້າຄືຊິບໍ່ກະບົດຕໍ່ພະເຢໂຫວາ. ແຕ່ເຂົາເຈົ້າກໍກະບົດຕໍ່ພະອົງ ຫຼັງຈາກນັ້ນ ຕາຂອງເຂົາເຈົ້າກໍມືນແຈ້ງໃນແງ່ທີ່ວ່າໄດ້ຮູ້ວ່າຕົວເອງເປັນຄົນບາບ. ເຂົາເຈົ້າຖ່າຍທອດບາບແລະຄວາມຕາຍໄປສູ່ລູກຫຼານ. ເນື່ອງຈາກເຂົາເຈົ້າເຫັນແລະເຂົ້າໃຈສະພາບຂອງຕົວເອງ ເຂົາເຈົ້າຈຶ່ງອາຍທີ່ຕົວເອງປະເປືອຍຢູ່ແລະໄດ້ຊອກຫາບາງສິ່ງມາປົກປິດ.—ຕົ້ນ. 3:7, 21
13-14. (ກ) ຕາມທີ່ບອກໃນ 1 ເປໂຕ 3:21 ເປັນຫຍັງເຮົາບໍ່ຄວນຢ້ານຄວາມຕາຍຫຼາຍເກີນໄປ? (ຂ) ມີເຫດຜົນຫຍັງແດ່ທີ່ເຮັດໃຫ້ເຮົາຮັກພະເຢໂຫວາ?
13 ເຖິງວ່າເຮົາຄວນຢ້ານຈະເຮັດໃຫ້ພະເຢໂຫວາບໍ່ພໍໃຈ ແຕ່ເຮົາກໍບໍ່ຄວນຢ້ານຄວາມຕາຍຫຼາຍເກີນໄປ. ພະເຢໂຫວາໄດ້ຈັດກຽມທາງໜຶ່ງໄວ້ໃຫ້ເຮົາເພື່ອຈະມີຊີວິດຕະຫຼອດໄປ. ຖ້າເຮົາເຮັດບາບແລະກັບໃຈແທ້ໆ ພະອົງຈະໃຫ້ອະໄພຄວາມຜິດຂອງເຮົາ. ພະອົງຈະໃຫ້ອະໄພເມື່ອເຮົາເຊື່ອໃນຄ່າໄຖ່ຂອງພະເຍຊູລູກຊາຍຂອງພະອົງ. ວິທີໜຶ່ງທີ່ສຳຄັນທີ່ສຸດທີ່ຈະສະແດງຄວາມເຊື່ອຄື ອຸທິດຕົວໃຫ້ພະເຢໂຫວາແລະຮັບບັບເຕມາ.—ອ່ານ 1 ເປໂຕ 3:21
14 ເຮົາມີຫຼາຍເຫດຜົນທີ່ຈະຮັກພະເຢໂຫວາ. ບໍ່ພຽງແຕ່ວ່າພະອົງໃຫ້ສິ່ງດີໆກັບເຮົາໃນແຕ່ລະມື້ ແຕ່ພະອົງຍັງສອນເຮົາເລື່ອງຄວາມຈິງກ່ຽວກັບພະອົງແລະໃຈປະສົງຂອງພະອົງນຳ. (ໂຢ. 8:31, 32) ພະອົງໃຫ້ເຮົາມີປະຊາຄົມຄລິດສະຕຽນເພື່ອຊີ້ນຳແລະຊ່ວຍເຫຼືອເຮົາ. ພະອົງຍັງຊ່ວຍເຮົາໃຫ້ອົດທົນກັບບັນຫາໃນຕອນນີ້ແລະໃຫ້ຄວາມຫວັງເຮົາທີ່ຈະມີຊີວິດໃນສະພາບທີ່ສົມບູນແບບໃນອະນາຄົດ. (ເພງ. 68:19; ຄຳປ. 21:3, 4) ເມື່ອເຮົາຄິດຕຶກຕອງເຖິງສິ່ງຕ່າງໆທີ່ພະເຢໂຫວາໄດ້ເຮັດເພື່ອເຮົາເຊິ່ງສະແດງວ່າຮັກເຮົາຫຼາຍສ່ຳໃດ ເຮົາກໍແຮ່ງຮັກພະອົງຫຼາຍຂຶ້ນ. ເມື່ອເຮົາຮັກພະເຢໂຫວາ ເຮົາຈະມີຄວາມຢ້ານໃນແບບທີ່ຖືກຕ້ອງ. ເຮົາຢ້ານວ່າຈະເຮັດໃຫ້ຜູ້ທີ່ເຮົາຮັກຫຼາຍທີ່ສຸດເສຍໃຈ.
15. ມະເຄລາເອົາຊະນະຄວາມຢ້ານວ່າຈະເຮັດຜິດໄດ້ແນວໃດ?
15 ມະເຄລາທີ່ເວົ້າເຖິງໃນຕອນທຳອິດໄດ້ເອົາຊະນະຄວາມຢ້ານວ່າຈະເຮັດຜິດເມື່ອລາວເຂົ້າໃຈວ່າພະເຢໂຫວາເປັນພະເຈົ້າທີ່ໃຫ້ອະໄພແທ້ໆ. ລາວບອກວ່າ: “ຂ້ອຍສຳນຶກວ່າເຮົາທຸກຄົນບໍ່ສົມບູນແບບແລະເຮັດຜິດພາດ. ຂ້ອຍຍັງໄດ້ເຂົ້າໃຈວ່າພະເຢໂຫວາຮັກເຮົາແລະຈະໃຫ້ອະໄພເຮົາໂດຍທາງຄ່າໄຖ່ຂອງພະເຍຊູ.” ຄວາມຮັກທີ່ລາວມີຕໍ່ພະເຢໂຫວາກະຕຸ້ນລາວໃຫ້ອຸທິດຕົວແລະຮັບບັບເຕມາ.
(ເບິ່ງຂໍ້ 16) *
16. ສິ່ງໃດຊ່ວຍໄມໃຫ້ເອົາຊະນະການຢ້ານຖືກຕໍ່ຕ້ານ?
16 ໄມເຊິ່ງຢ້ານວ່າແມ່ຈະຕໍ່ຕ້ານທີ່ລາວຈະຕັດສິນໃຈຮັບບັບເຕມາໄດ້ຂໍຄຳແນະນຳຈາກຜູ້ດູແລໝວດ. ໄມບອກວ່າ: “ຜູ້ດູແລໝວດໃຫຍ່ມາໃນຄອບຄົວທີ່ພໍ່ແມ່ຖືຄົນລະສາສະໜາຄືກັນ. ລາວຊ່ວຍຂ້ອຍໃຫ້ຮູ້ເວົ້າກັບແມ່ໃຫ້ເຂົ້າໃຈວ່ານີ້ເປັນການຕັດສິນຂອງຂ້ອຍບໍ່ແມ່ນພໍ່ບັງຄັບ.” ແມ່ຂອງໄມຮູ້ສຶກບໍ່ພໍໃຈທີ່ລາວຕັດສິນໃຈແບບນັ້ນ. ໃນທີ່ສຸດລາວກໍຕ້ອງຍ້າຍອອກຈາກບ້ານແມ່ ແຕ່ລາວກໍບໍ່ໄດ້ປ່ຽນການຕັດສິນໃຈ. ລາວບອກວ່າ: “ຂ້ອຍຮູ້ສຶກປະທັບໃຈເມື່ອໄດ້ຮຽນຮູ້ວ່າພະເຢໂຫວາໄດ້ເຮັດສິ່ງດີໆຫຍັງແດ່ເພື່ອຂ້ອຍ. ເມື່ອຂ້ອຍຄິດຢ່າງເລິກເຊິ່ງກ່ຽວກັບຄ່າໄຖ່ຂອງພະເຍຊູ ຂ້ອຍກໍຮູ້ວ່າພະເຢໂຫວາຮັກຂ້ອຍຫຼາຍສ່ຳໃດ. ຂ້ອຍຈຶ່ງອຸທິດຕົວໃຫ້ພະເຢໂຫວາແລະຮັບບັບເຕມາ.”
ເຮັດຕາມສິ່ງທີ່ເຈົ້າໄດ້ຕັດສິນໃຈ
ເຮົາສະແດງໃຫ້ເຫັນໄດ້ວ່າເຮົາເຫັນຄຸນຄ່າສິ່ງຕ່າງໆ ທີ່ພະເຢໂຫວາເຮັດເພື່ອເຮົາ (ເບິ່ງຂໍ້ 17)
17. ເຮົາທຸກຄົນມີໂອກາດທີ່ຈະເຮັດຫຍັງ?
17 ເມື່ອເອວາກິນໝາກໄມ້ຈາກຕົ້ນນັ້ນໃນສວນເອເດນ ລາວກໍປະຕິເສດພະເຢໂຫວາ. ເມື່ອອາດາມເຂົ້າຮ່ວມກັບເອວາ ລາວກໍສະແດງໃຫ້ເຫັນວ່າລາວບໍ່ເຫັນຄ່າສິ່ງດີຕ່າງໆທີ່ພະເຢໂຫວາເຮັດເພື່ອລາວ. ເຮົາທຸກຄົນມີໂອກາດທີ່ຈະສະແດງວ່າເຮົາບໍ່ຢາກເປັນຄືກັບອາດາມແລະເອວາ. ເຮົາເຫັນຄຸນຄ່າທຸກສິ່ງທີ່ພະເຢໂຫວາເຮັດເພື່ອເຮົາ. ໂດຍການຮັບບັບເຕມາ ເຮົາກໍສະແດງໃຫ້ພະເຢໂຫວາເຫັນວ່າເຮົາເຊື່ອວ່າພະອົງມີສິດຕັ້ງມາດຕະຖານໃນເລື່ອງອັນໃດຖືກອັນໃດຜິດ. ເຮົາພິສູດໃຫ້ເຫັນວ່າເຮົາຮັກແລະໄວ້ວາງໃຈພະເຢໂຫວາພໍ່ຂອງເຮົາ.
18. ເຈົ້າຈະປະສົບຜົນສຳເລັດໃນການຮັບໃຊ້ພະເຢໂຫວາໄດ້ແນວໃດ?
18 ຂໍ້ທ້າທາຍຢ່າງໜຶ່ງຫຼັງຈາກຮັບບັບເຕມາຄືການໃຊ້ຊີວິດຕາມມາດຕະຖານຂອງພະເຢໂຫວາບໍ່ແມ່ນຂອງຕົວເອງ. ຜູ້ຮັບໃຊ້ຂອງພະເຈົ້າຫຼາຍລ້ານຄົນໃຊ້ຊີວິດແບບນັ້ນ. ເຈົ້າກໍເປັນຄືກັບເຂົາເຈົ້າໄດ້ ຖ້າເຈົ້າພະຍາຍາມເຂົ້າໃຈຄຳພີໄບເບິນພະຄຳຂອງພະເຈົ້າຢ່າງເລິກເຊິ່ງຕໍ່ໆໄປ ຄົບຫາກັບພີ່ນ້ອງຊາຍຍິງເປັນປະຈຳ ແລະຊ່ວຍຄົນອື່ນຢ່າງກະຕືລືລົ້ນໃຫ້ຮຽນຮູ້ກ່ຽວກັບພະເຢໂຫວາພໍ່ທີ່ຮັກຂອງເຮົາ. (ເຫບ. 10:24, 25) ເມື່ອເຈົ້າເຮັດການຕັດສິນໃຈ ຂໍໃຫ້ຟັງຄຳແນະນຳຂອງພະເຢໂຫວາທີ່ໃຫ້ຜ່ານທາງຄຳພີໄບເບິນແລະອົງການຂອງພະອົງ. (ເອຊາ. 30:21) ແລ້ວທຸກສິ່ງທີ່ເຈົ້າເຮັດຈະປະສົບຜົນສຳເລັດ.—ສຸພາ. 16:3, 20
19. ເຈົ້າຄວນຈື່ຫຍັງໄວ້ສະເໝີ ແລະຍ້ອນຫຍັງ?
19 ເມື່ອເຈົ້າຈື່ສະເໝີວ່າເຈົ້າໄດ້ຮັບປະໂຫຍດຫຼາຍສ່ຳໃດຈາກການຊີ້ນຳຂອງພະເຢໂຫວາ ເຈົ້າກໍຈະຮັກພະອົງແລະມາດຕະຖານຂອງພະອົງຫຼາຍຂຶ້ນ. ບໍ່ວ່າຊາຕານຈະໃຊ້ສິ່ງໃດກໍບໍ່ສາມາດດຶງເຮົາອອກຈາກການຮັບໃຊ້ພະເຢໂຫວາໄດ້. ຂໍໃຫ້ນຶກພາບຈາກນີ້ໄປໜຶ່ງພັນປີ ຕອນນັ້ນເຈົ້າຈະເຫັນວ່າການທີ່ເຈົ້າໄດ້ຕັດສິນໃຈຮັບບັບເຕມາເປັນການຕັດສິນໃຈທີ່ດີທີ່ສຸດໃນຊີວິດ!
ເພງ 28 ໄດ້ເປັນເພື່ອນກັບພະເຢໂຫວາ
^ ຂໍ້ 5 ການຕັດສິນໃຈວ່າຈະຮັບບັບເຕມາຫຼືບໍ່ ແມ່ນການຕັດສິນໃຈທີ່ສຳຄັນທີ່ສຸດທີ່ເຈົ້າເຮັດໄດ້. ເປັນຫຍັງການຕັດສິນໃຈນີ້ຈຶ່ງສຳຄັນ? ບົດຄວາມນີ້ຈະຕອບຄຳຖາມນີ້ແລະຈະຊ່ວຍຄົນທີ່ຄິດຈະຮັບບັບເຕມາໃຫ້ເອົາຊະນະອຸປະສັກຕ່າງໆທີ່ຂັດຂວາງບໍ່ໃຫ້ຮັບບັບເຕມາ.
^ ຂໍ້ 56 ຄຳອະທິບາຍຮູບພາບ: ຂາດຄວາມໝັ້ນໃຈ: ໄວລຸ້ນຊາຍຄົນໜຶ່ງບໍ່ກ້າອອກຄວາມຄິດເຫັນ.
^ ຂໍ້ 58 ຄຳອະທິບາຍຮູບພາບ: ໝູ່: ໄວລຸ້ນຍິງທີ່ເປັນພະຍານພະເຢໂຫວາຄົນໜຶ່ງຄົບຫາກັບໝູ່ທີ່ບໍ່ດີ ລາວຮູ້ສຶກອັບອາຍເມື່ອເຫັນພີ່ນ້ອງ.
^ ຂໍ້ 60 ຄຳອະທິບາຍຮູບພາບ: ຢ້ານເຮັດຜິດ: ໄວລຸ້ນຍິງຄົນໜຶ່ງຢ້ານເຮັດຜິດຄືກັບອ້າຍຂອງລາວທີ່ຖືກຕັດສຳພັນແລະອອກຈາກບ້ານໄປ.
^ ຂໍ້ 62 ຄຳອະທິບາຍຮູບພາບ: ຢ້ານຖືກຕໍ່ຕ້ານ: ໄວລຸ້ນຊາຍຄົນໜຶ່ງຢ້ານທີ່ຈະອະທິດຖານຕໍ່ໜ້າແມ່.
^ ຂໍ້ 65 ຄຳອະທິບາຍຮູບພາບ: ຂາດຄວາມໝັ້ນໃຈ: ໄວລຸ້ນຊາຍຄົນໜຶ່ງຕັ້ງໃຈສຶກສາສ່ວນຕົວຫຼາຍຂຶ້ນ.
^ ຂໍ້ 67 ຄຳອະທິບາຍຮູບພາບ: ໝູ່: ໄວລຸ້ນຍິງຮຽນຮູ້ທີ່ຈະພູມໃຈທີ່ເປັນພະຍານພະເຢໂຫວາ.
^ ຂໍ້ 69 ຄຳອະທິບາຍຮູບພາບ: ຢ້ານເຮັດຜິດ: ໄວລຸ້ນຍິງຄົນໜຶ່ງ ເຮັດໃຫ້ຄວາມຈິງເປັນຂອງຕົວເອງແລ້ວຮັບບັບເຕມາ.
^ ຂໍ້ 71 ຄຳອະທິບາຍຮູບພາບ: ຢ້ານຖືກຕໍ່ຕ້ານ: ໄວລຸ້ນຊາຍຄົນໜຶ່ງອະທິບາຍຄວາມເຊື່ອກັບແມ່ຢ່າງກ້າຫານ.
