1. Ki lika mañi zeneezahezi bo Adama ni Eva hane balobile mulao wa Mulimu, mi taba yeo neitahisizeñi?

KI MAÑI yemunahana kuli ki yena yanani tukelo ya kulutaluseza lika zende zeluswanela kueza ni lika zemaswe zeluswanela kutokolomoha? Bo Adama ni Eva hane bacile muselo wa kota ya kuziba bunde ni bumaswe, nebabonisize hande kuli nebasika sepa Jehova ni likuka zahae. Ka kuca kwa muselo wo, nebabonisize kuli nebabata kuiketelanga zebaswanela kueza ni zebasa swaneli kueza. (Gen. 3:22) Kono munahane feela zeneezahezi kabakala muhato one baangile. Silikani sabona ni Jehova nesisinyehile. Taba yeo neitahisize kuli basike bapila kuya kuile ni kuhozisa bana babona sibi ni lifu. (Maro. 5:12) Katulo yene baezize bo Adama ni Eva itahisize manyando amañata.

2-3. (a) Nduna wa Muetopia naaezize cwañi, Filipi hanaakutalize ku yena? (b) Ki limbuyoti mañi zeluka ikola haiba lukolobezwa, mi ki lipuzo mañi zeluka nyakisisa?

² Mulemuhe shutano yeliteñi mwahalaa zene baezize bo Adama ni Eva ni zanaaezize nduna wa Muetopia, Filipi hanaakutalize ku yena. Nduna yo naaitebuhile hahulu lika zanaa muezelize Jehova ni Jesu kuli mane aikatulela kukolobezwa honafo feela. (Lik. 8:34-38) Haluineela ku Mulimu ni kukolobezwa sina mwanaaezelize nduna wa Muetopia yo, lubonisa moluikutwela ka za Jehova ni Jesu. Lubonisa kuli lwaitebuha zeba luezelize. Hape lubonisa kuli lusepile Jehova ni kuli lwalemuha kuli ki yena yanani tukelo ya kulutaluseza lika zende zeluswanela kueza ni lika zemaswe zeluswanela kutokolomoha.

³ Munahane feela limbuyoti zeñata zeluikola kabakala kusebeleza Jehova! Lunani sepo ya kuto fiwa lika kaufela zene balatehezwi  ki zona bo Adama ni Eva, kukopanyeleza cwalo ni kolo ya kuto pila kuya kuile. Jehova waswalelanga libi zaluna ni kulufa lizwalo lelikenile kabakala kuli lubonisa tumelo ku Jesu Kreste. (Mat. 20:28; Lik. 10:43) Hape halukolobezwa, luba mwa lubasi lwa Jehova lwa batanga bahae babalumelelwa ki yena, ili babanani sepo ya kuto ikola limbuyoti zende kwapili. (Joa. 10:14-16; Maro. 8:20, 21) Kono kusina taba ni lika zende zeo zeluikola kabakala kusebeleza Mulimu, batu babañwi babazibile niti ka za Jehova bazina-zinanga kulatelela mutala wa nduna wa Muetopia. Ki lika mañi zebapaleliswa kukolobezwa? Ki lika mañi zekona kubatusa kutula butata bo?

4-5. Ki butata mañi bwanaatalimani ni bona mutangana wa libizo la Avery ni musizana wa libizo la Hannah?

⁴ Kusaisepa. Bashemi ba mutangana yabizwa Avery ki Lipaki za Jehova. Bo ndatahe bazibahala kuba bashemi babanani lilato, mi ki baana-bahulu babaitingwa mwa puteho. Nihakulicwalo, Avery naazina-zinanga kuunga muhato wa kukolobezwa. Kabakalañi? Ubulela kuli: “Neniikutwa kuli hanina kukona kulikanyisa mutala omunde wa bo ndate.” Hape Avery naasina buikolwiso bwa kuli naakakona kupeta misebezi yanaaka fiwa mwa puteho kwapili. Uekeza kubulela kuli: “Neniikalelwanga hahulu kuli hanika kolobezwa, nikakupiwanga kulapela fapilaa batu, kufa lingambolo, kamba kuzamaisa mukopano wa kuzwela mwa simu.”

⁵ Musizana wa libizo la Hannah yanani lilimo ze 18, neli mutu yasaisepi. Bashemi bahae neli Lipaki za Jehova. Nihakulicwalo, naaikalezwi kuli naasike akona kupila ka kuya ka likuka za Jehova. Ki kabakalañi hanaaikutwa cwalo? Hannah naaikutwanga kuli haki wa butokwa. Fokuñwi naalembwalanga hahulu kuli mane naaikolofazanga ka bomu, ili kuekeza feela kwa butuku bwanaautwa. Utalusa kuli: “Hakuna mutu yene nibulelezi ka za lika zene niezize, mane nihaiba bashemi baka, mi neniikutwa kuli Jehova naasike abata kuli nimusebeleze kabakala lika zene niezanga.”

6. Ki sika mañi sene sipaleliswa bo Vanessa kuunga muhato wa kukolobezwa?

⁶ Kukuezo yezwa kwa balikani. Bo Vanessa babanani lilimo ze 22, batalusa kuli: “Neninani mulikani yene niutwana hahulu ni yena, mi nelubile balikani ka nako yetelele.” Niteñi, mulikanaa bo Vanessa yo, naasa basusuezangi kupeta sikonkwani sene baitomezi sa kukolobezwa. Taba yeo neiutwisize hahulu butuku bo Vanessa, mi batalusa kuli: “Kunibelanga hahulu taata kufumana balikani, mi neniikalezwi kuli haiba nifelisa silikani saka ni yena, nenisike nafumana mulikani yene nikautwana hahulu ni yena cwalo.”

7. Musizana yabizwa Makayla naasabañi, mi ki kabakalañi?

 ⁷ Kusaba kueza mafosisa amatuna. Musizana yabizwa Makayla naanani feela lilimo zeketalizoho kaizelaa hae hazwisiwa mwa puteho. Hanaanzaa hula, naalemuhile kuli zanaaezize kaizelaa hae neliutwisize hahulu butuku bashemi bahae. Makayla utalusa kuli: “Nenisaba kuli hamulaho wa kukolobezwa, mwendi nenika eza mafosisa amañwi anaaka tahisa kuli nizwisiwe mwa puteho, mi bashemi baka nebaka utwa hahulu butuku nikufita.”

8. Mutangana wa libizo la Miles, naasabañi?

⁸ Kusaba kulwaniswa. Bo ndatahe Miles ni bo mahe babanyezwi cwale ku bo ndatahe ki Lipaki za Jehova, kono bo mahe baba mupepa bona haki Lipaki za Jehova. Miles utalusa kuli: “Nenipilile ni bo ma ka lilimo ze 18, mi nenisaba kubataluseza kuli nenibata kukolobezwa. Neniboni zene baezize bo ma, bo ndate hane babile Lipaki za Jehova. Kacwalo, nenisaba kuli hane nika bataluseza za teñi, nebaka nilwanisa hahulu.”

9. Kuziba kuli Jehova unani pilu-telele ni lilato, kuka mitusa cwañi?

⁹ Bo Adama ni Eva nebaketile kufulalela Jehova kabakala kuli nebatuhelezi lilato labona ku yena kufola. Niteñi, Jehova naabatuhelezi kupila nako yetelele kuli babe ni bana mi baitomele milao yeneka baetelela habanze bahulisa bana babona. Zeneezahezi hasamulaho libonisa hande kuli katulo yene baezize bo Adama ni Eva ya kuikauhanya ku Jehova neli yemaswe hahulu. Mwanaa bona wa mweli naabulaile munyanaa hae yanaasina mulatu, mi hamulaho wa nako, batu nebakalile kuba ni mifilifili ni buitati. (Gen. 4:8; 6:11-13) Nihakulicwalo, Jehova naalukisize nzila ya kutusa ka yona bana kaufela ba Adama ni Eva bane babata kumusebeleza. (Joa. 6:38-40, 57, 58) Hamunze muituta zeñata ka za pilu-telele ni lilato la Jehova, muka mulata hahulu. Hamuna kuba sina bo Adama ni Eva bane bahanile kuetelelwa ki Jehova, kono mina mukaiketela kumusebeleza ka kuineela ku yena.

10. Ki kabakalañi kunahanisisa manzwi afumaneha kwa liñolo la Samu 19:7, hakukona kumitusa kusebeleza Jehova?

 ¹⁰ Muzwelepili kuituta ka za Jehova. Haiba muzwelapili kuituta ka za Jehova, mukaba ni buikolwiso bwa kuli mukazwelapili kumusebeleza ka busepahali. Avery yabulezwi kwa makalelo, utalusa kuli: “Sabo yaka ya kukolobezwa neifelile hane nibalile ni kunahanisisa manzwi afumaneha kwa liñolo la Samu 19:7.” (Mubale.) Avery hanaalemuhile mwanaa mutuselize Jehova sina feela mokuboniselizwe kwa liñolo leo, lilato lahae ku Mulimu latiya. Haiba lulata Jehova, haluna kusaba kumusebeleza mi haluna kueza lika zesa mutabisi. Hannah yabulezwi kwa makalelo, utalusa kuli: “Kubala Bibele ni kueza tuto ya ka butu, kunitusize kulemuha kuli Jehova ni yena wautwanga butuku haniikutwisa butuku.” (1 Pit. 5:7) Hamulaho wa nako, Hannah aba ‘muezi wa linzwi.’ (Jak. 1:22) Kueza cwalo kumutusize cwañi? Utalusa kuli: “Hane nilemuhile kuli kuutwa Jehova neku nitusize, lilato laka ku yena latiya hahulu. Cwale ninani buikolwiso bwa kuli Jehova uka nietelela nako kaufela hanitokwa tuso yahae.” Hannah naatulile butata bwanaanani bona bwa kuikolofazanga. Naaineezi ku Jehova ni kukolobezwa.

11. Ki lika mañi zenetusize bo Vanessa kuba ni balikani babande, mi taba yeo ilulutañi?

¹¹ Mukete hande balikani bamina. Hamulaho wa nako, bo Vanessa bababulezwi kwa makalelo, balemuha kuli bo mulikanaa bona neba bapaleliswa kusebeleza Jehova. Kabakaleo, bafelisa silikani sabona ni bo mulikanaa bona bao. Kono hape kunani lika zeñwi zene baezize. Nebaezize ka taata kuli bafumane balikani babanca mwa puteho. Nebabulezi kuli nebatusizwe ki mutala wa Nuwe ni lubasi lwahae. Batalusa kuli: “Nuwe ni lubasi lwahae nebapila mwahalaa batu bane basalati Jehova; kabakaleo, nebaswalisananga feela ni batu ba mwa lubasi lwabona.” Bo Vanessa hase bakolobelizwe, basebeza sina mapaina. Cwale batalusa kuli: “Kuba paina kunitusize kuba ni balikani babande, isiñi feela mwa puteho yaluna kono ni mwa liputeho zeñwi.” Ni mina mwakona kuba ni balikani babande haiba mupateha hahulu mwa musebezi wa kukutaza walufile Jehova.—Mat. 24:14.

12. Ki sabo yecwañi yene basina yona bo Adama ni Eva, mi zene baezize nelitahisizeñi?

 ¹² Mube ni sabo yeswanela. Kunani sabo yeñwi yeswanela. Ka mutala, luswanela kusaba kueza lika zesatabisi Jehova. (Samu 111:10) Kambe bo Adama ni Eva nebanani sabo yecwalo, nebasike bakwenuhela Jehova. Kono neba mukwenuhezi. Hase baezize cwalo, meeto abona atona, mi balemuha kuli nebaezize sibi. Nebahozisize bana babona sibi sesitahisize lifu. Bakeñisa kuli nebautwisisize kuli batulile mulao wa Mulimu, balemuha kuli nebali mapunu mi baikezeza liapalo za kutina.—Gen. 3:7, 21.

13-14. (a) Ka kuya ka liñolo la 1 Pitrosi 3:21, ki kabakalañi halusa swaneli kusaba hahulu lifu? (b) Ki kabakalañi haluswanela kulata Jehova?

¹³ Nihaike kuli lutokwa kusaba kueza lika zesatabisi Jehova, kunani sabo yeñwi yelusa swaneli kuba ni yona, ili sabo ya kusaba hahulu lifu. Jehova ulukisize nzila ya kulutusa ka yona kuli luto fumana bupilo bobusa feli. Haiba lueza sibi ni kubaka habuniti, Jehova uka luswalela. Uka luswalela kabakala tumelo yaluna mwa sitabelo sa Mwanaa hae sesi luliulula kwa sibi ni lifu. Nzila yeñwi yelubonisa ka yona kuli lunani tumelo ki ka kuineela ku Mulimu ni kukolobezwa.—Mubale 1 Pitrosi 3:21.

¹⁴ Jehova uluezelize lika zeñata, mi lwaswanela kumulata. Haalufangi feela lika zende zeluikola zazi ni zazi, kono hape ulutusa kumuziba hande ni kuziba milelo yahae. (Joa. 8:31, 32) Ulufile puteho ya Sikreste kuli ikone kuluetelela ni kulutusa. Ulutusanga kutiyela miinelo yetaata yelukopana ni yona cwale, mi hape ulufile sepo ya kuto pila kuya kuile inze lupetahalile. (Samu 68:19; Sin. 21:3, 4) Kunahanisisa lika zeñata zaluezelize Jehova, ili zebonisa kuli walulata, kulutusa kuli ni luna lumulate. Mi kulata Jehova, kulutusa kuba ni sabo yeswanela. Lukasaba kumufoseza kakuli lumulata hahulu.

15. Ki lika mañi zenetusize Makayla kufelisa sabo yanaanani yona?

¹⁵ Musizana yabizwa Makayla yabulezwi kwa makalelo, naafelisize sabo yanaanani yona hanaautwisisize kuli Jehova ki Mulimu yalata kuswalela. Utalusa kuli: “Nenilemuhile kuli kaufelaa luna halusika petahala, mi luezanga mafosisa. Mi hape neniutwisisize kuli Jehova walulata mi halubakela mafosisa aluna, uka luswalela kabakala sitabelo sa tiululo.” Bakeñisa kuli Makayla naalata hahulu Jehova, aikatulela kuneela bupilo bwahae ku yena ni kukolobezwa.

16. Ki lika mañi zenetusize Miles kufelisa sabo yanaanani yona ya kulwaniswa?

¹⁶ Miles yanaasaba kuli bo mahe nebaka lwanisa katulo yahae ya kubata kukolobezwa, naakupile tuso ku muokameli wa mupotoloho. Miles utalusa kuli: “Bo mahe muzwale yo ni bona nesi Lipaki za Jehova. Muzwale yo naanitusize kuziba litaba zene nikona kubulela kuli nikolwise bo ma kuli haki bo ndate bane banihapeleza kukolobezwa kono neli na muñi yanaaikatulela kueza cwalo.” Bo mahe Miles nebasika tabiswa ki katulo yanaaezize. Hamulaho wa nako, naatutile fa ndu ya bo mahe, mi azwelapili kuba ni sikonkwani sa kukolobezwa. Utalusa kuli: “Kuituta lika zende zaniezelize Jehova  neku nitusize hahulu. Hane ninahanisisize ka butungi ka za sitabelo sa Jesu sa tiululo, nenilemuhile kuli Jehova unilata hahulu. Taba yeo nei nisusuelize kuineela ku Jehova ni kukolobezwa.”

17. Ki kolo mañi yelunani yona?

¹⁷ Eva hanaacile muselo wa kota ya mwa simu ya Edeni, naakwenuhezi Ndatahe. Adama ni yena hanaacile kwa muselo wo, naabonisize kuli naasika itebuha lika kaufela zanaa muezelize Jehova. Kaufelaa luna lunani kolo ya kubonisa kuli lwaitebuha lika zaluezelize Jehova, ili kushutana ni bo Adama ni Eva. Halukolobezwa, lubonisa Jehova kuli ki yena yanani tukelo ya kulutaluseza lika zende zeluswanela kueza ni lika zemaswe zeluswanela kutokolomoha. Hape, lubonisa kuli lwalata Ndataa luna mi lumusepile.

18. Ki lika mañi zeka mitusa kuzwelapili kusebeleza Jehova ka busepahali?

¹⁸ Hase lukolobelizwe, lutokwa kuzwelapili kupila ka likuka za Jehova, isiñi kueza feela lika zelutabela luna bañi. Batanga ba Jehova babañata-ñata basweli kueza cwalo kacenu. Ni mina mwakona kuba sina bona haiba muzwelapili kuituta Linzwi la Mulimu, yona Bibele, kuswalisana kamita ni mizwale ni likaizeli bamina, ni kutaluseza babañwi lika zemuitutile ka za Ndataa mina yalilato. (Maheb. 10:24, 25) Hamueza likatulo, mulatelelange kelezo yamifa Jehova ka kuitusisa Linzwi lahae ni kopano yahae. (Isa. 30:21) Hamuka eza cwalo, lika kaufela zemueza likakonda.—Liprov. 16:3, 20.

19. Ki nto mañi yemuswanela kuzwelapili kulemuha, mi ki kabakalañi?

¹⁹ Haiba muzwelapili kulemuha kuli kulatelela ketelelo ya Jehova kwatusa, muka mulata hahulu ni kulata likuka zahae. Mi hakuna nto ifi kamba ifi yaka mifa Satani yeka mipaleliswa kuzwelapili kusebeleza Jehova. Munahane feela momuka ikutwela lilimo ze 1,000 kuzwa cwale. Ka nako yeo, mukaitebuha hahulu kuli nemuikatulezi kukolobezwa, mi mukaikutwa kuli katulo yeo neli yona katulo ya butokwa hahulu mwa bupilo bwamina!