1. Ntshinyi tshivua Adama ne Eva bajimije? Dipangadika diabu diakakebesha tshinyi?

BUEBE wewe, nnganyi udi ne bua kuela mikenji ya tshidi tshimpe ne tshidi tshibi? Pavua Adama ne Eva badie tshimuma tshia mutshi wa dimanya dia tshidi tshimpe ne tshidi tshibi, bakaleja patoke ne: kabavua beyemena Yehowa ne mikenji yende to. Bakasungula bua kudielela yabu mikenji ya tshidi tshimpe ne tshidi tshibi. (Gen. 3:22) Kadi tangila malu akajimijabu. Bakajimija bulunda buabu ne Yehowa. Bakajimija kabidi diakalenga dia kushala ne muoyo kashidi, bobu kusambulujila bana babu mpekatu ne lufu. (Lomo 5:12) Dipangadika dia Adama ne Eva diakakebesha ntatu ya bungi.

2-3. (a) Ntshinyi tshivua muntu mutungu muena Etshiopi muenze pavua Filipo mumuyishe? (b) Mmabenesha kayi atudi tupeta patudi tubatijibua? Nnkonko kayi ituandamuna?

² Fuanyikija tshivua Adama ne Eva benze ne tshivua muntu mutungu muena Etshiopi muenze yeye pavua Filipo mumuyishe. Muntu mutungu au wakanyisha bikole malu avua Yehowa ne Yezu bamuenzele, yeye kubatijibua diakamue. (Bien. 8:34-38) Patudi tudilambula kudi Nzambi ne tubatijibua anu bu muntu mutungu au, tudi tuleja patoke ne: tudi tuanyisha malu adi Yehowa ne Yezu batuenzele. Tudi tuleja kabidi mutudi tueyemena Yehowa ne tuitaba ne: anu yeye ke udi ne bua kuela mikenji ya tshidi tshimpe ne tshidi tshibi.

³ Elabi meji bua mabenesha atudi tupeta patudi tuenzela Yehowa mudimu! Tudi ne ditekemena dia kulua kupeta bionso bivua Adama ne Eva bajimije, too ne diakalenga dia kuikala ne muoyo kashidi. Bu mutudi tuitabuja Yezu Kristo, Yehowa udi  utubuikidila bilema bietu ne utupesha kondo ka muoyo kimpe. (Mat. 20:28; Bien. 10:43) Tudi kabidi tubuela mu dîku dia Yehowa dia batendeledi bende badiye wanyisha, bikale ne ditekemena dia kupeta malu mimpe kumpala eku. (Yone 10:14-16; Lomo 8:20, 21) Kadi nansha mudiku mabenesha aa nunku, kudi bantu badi bafike ku dimanya Yehowa badi belakana bua kulonda tshilejilu tshia muntu mutungu muena Etshiopi. Mmalu kayi adi mua kuikala abapangisha? Mmushindu kayi udibu mua kuatshimuna?

4-5. Mmalu kayi avua atatshisha Avery ne Hannah?

⁴ Diela meji ne: katuena bakumbane. Baledi ba Avery mBantemu ba Yehowa. Tatuende mmumanyike bimpe mudiye tatu muimpe ne mukulu muimpe. Kadi Avery uvua welakana bua kupeta batismo. Bua tshinyi? Udi wamba ne: “Mvua ngela meji ne: tshivua mua kukumbana bua kuikala muntu muimpe bu papa to.” Uvua kabidi wela meji ne: uvua mua kupanga kukumbaja midimu yonso ivuabu mua kumupesha matuku avua alua. Udi wamba ne: “Mvua ntshina ne: nebandombe bua kusambila kumpala kua bantu, bua kuenza miyuki, anyi bua kulombola kasumbu mu mudimu wa diyisha.”

⁵ Hannah, udi ne bidimu 18, kavua udimona ne mushinga nansha mukese to. Mbamukoleshe kudi baledi badi batendelela Yehowa. Nansha nanku, uvua udiebeja ni uvua mua kukumbana bua kutumikila mikenji ya Yehowa. Bua tshinyi? Hannah uvua wela meji ne: kavua mua kuenza bualu bua nsongo nansha bumue to. Kuvua misangu ivuaye udiumvua bibi menemene bimufikisha too ne ku dienzela mubidi wende bibi ku bukole. Kadi kuenza nunku kuvua kunyanga kabidi malu bikole. Udi wamba ne: “Tshitu muambile muntu nansha umue mumvua ndienzela bibi amu to, nansha baledi banyi. Mvua kabidi ngela meji ne: Yehowa kavua mua kunganyisha nansha kakese bua mumvua ndienzela bibi amu to.”

6. Ntshinyi tshivua tshipangisha Vanessa bua kubatijibua?

⁶ Balunda babi. Vanessa udi ne bidimu 22 udi wamba ne: “Mvua ne mulunda wanyi munene umvua mumanye kukavua bidimu bitue ku dikumi.” Kadi mulunda wende uvua kayi Ntemu au kavua umuambuluisha bua kukumbaja tshipatshila tshiende tshia kubatijibua to. Bivua bitonda Vanessa bikole. Udi wamba ne: “Bivua binkolele bua kudia bulunda ne bantu, ne mvua ntshina ne: meme mukose bulunda buetu abu, tshivua mua kupeta kabidi mulunda mukuabu muimpe to.”

7. Ntshinyi tshivua nsongakaji kampanda diende Makayla utshina? Bua tshinyi?

⁷ Ditshina dia kuenza tshilema tshinene. Makayla uvua ne bidimu bitanu pavuabu bipate tutuende mu tshisumbu. Pavuaye wenda  ukola, wakamona muvua bienzedi bia tutuende bibungamija baledi bende bikole. Udi wamba ne: “Mvua ntshina ne: meme mupete batismo, mvua mua kulua kuenza tshilema, bobu kungipata mu tshisumbu, ne bualu abu buvua mua kubungamija kabidi baledi banyi bibi be!”

8. Ntshinyi tshivua nsongalume mukuabu diende Miles utshina?

⁸ Ditshina buluishi. Baledi ba Miles bakavua bashipe dibaka diabu. Tatuende nNtemu, kadi mamuende yeye ki nNtemu to. Miles udi wamba ne: “Mvua musombe ne mama bidimu 18, ne mvua ntshina bua kumuambila ne: mvua musue kupeta batismo. Mvua mumone tshivuaye muenze pavua papa mulue Ntemu. Mvua ntshina ne: uvua mua kungenza bilumbu.”

9. Ntshinyi tshidi mua kuenzeka imue misangu wewe mumone mudi Yehowa ne lutulu ne dinanga?

⁹ Adama ne Eva bakabenga kuenzela Yehowa mudimu bualu kabavua bakoleshe dinanga diabu kudiye to. Nansha nanku, Yehowa wakabalekela bidimu bia bungi bua balele bana ne badisunguile muvuabu basue kubakolesha. Malu akalua kumueneka bua dipangadika diabu dia kudienzela malu kabayi ku bulombodi bua Yehowa akaleja muvuabu batshimbakane. Muanabu muanabute wakashipa muakunyende uvua kayi ne bualu, ne mu kupita kua matuku bantu ba bungi bakalua bena tshikisu ne badinangi. (Gen. 4:8; 6:11-13) Kadi Yehowa wakalongolola mushindu wa kusungila bana ba Adama ne Eva bonso badi basue kumuenzela mudimu. (Yone 6:38-40, 57, 58) Paudi wenda umona mudi Yehowa ne lutulu ne dinanga nunku, imue misangu dinanga diebe kudiye nedikole. Kuakujinga kulonda Adama ne Eva to, kadi neudilambule kudi Yehowa.

10. Bua tshinyi kuelangana meji a Misambu 19:7 kudi mua kukuambuluisha bua kuenzela Yehowa mudimu?

¹⁰ Tungunuka ne kulonga malu a Yehowa. Paudi wenda ulonga malu a Yehowa, neufike ku dimona ne: udi mua kukumbana bua kumuenzela mudimu kakuyi bualu. Avery utukadi batele udi wamba ne: “Ngakabala Misambu 19:7. (Bala.) Pamvua ngelangana meji bua dilaya dia Yehowa didi mu mvese eu, buôwa buanyi buakajika.” Pavua Avery mumone muvua Yehowa mukumbaje dilaya adi, dinanga diende kudiye diakakola. Dinanga didi diumbusha  buôwa. Didi kabidi dituambuluisha bua kutuishila mêsu etu kudi Yehowa ne ku malu adiye musue. Hannah pende udi wamba ne: “Didibadila Bible ne didilongela biakangambuluisha bua kumona ne: pamvua ngenzela mubidi wanyi bibi, mvua ngenzela kabidi Yehowa bibi.” (1 Pet. 5:7) Hannah wakalua ‘muenji wa dîyi’ dia Nzambi. (Yak. 1:22) Ntshinyi tshiakenzeka? Udi wamba ne: “Pangakamona muvua kutumikila Yehowa kungambuluisha, dinanga dianyi kudiye diakakola. Mpindieu ndi mujadike ne: Yehowa neikale anu undombola misangu yonso ingikala dijinga ne diambuluisha diende.” Hannah wakatshimuna dijinga dia kuditapa divuaye nadi. Wakadilambula kudi Yehowa, kupetaye batismo.

11. Ntshinyi tshivua Vanessa muenze bua kupeta balunda bimpe? Bualu buende budi butulongesha tshinyi?

¹¹ Manya mua kusungula balunda. Vanessa utukadi batele wakalua kumona ne: mulunda wende au uvua umupangisha bua kuenzela Yehowa mudimu. Ke yeye kukosa bulunda buabu abu. Kadi kakimanyina apu to. Wakadienzeja bikole bua kupeta balunda bapiabapia mu tshisumbu. Udi uleja muvua tshilejilu tshia Noa ne dîku diende tshimuambuluishe. Udi wamba ne: “Nansha muvuabu munkatshi mua bantu bavua kabayi banange Yehowa, bavua bobu basombe bimpe mu dîku diabu.” Pakapeta Vanessa batismo, wakalua mpanda-njila. Udi wamba mpindieu ne: “Biakangambuluisha bua kupeta balunda bimpe mu tshisumbu tshietu ne mu bisumbu bikuabu.” Wewe pebe udi mua kupeta balunda bimpe wewe udifila bikole mu mudimu udi Yehowa mutupeshe.​—Mat. 24:14.

12. Nditshina kayi divua Adama ne Eva kabayi nadi? Ntshinyi tshiakabafikila?

¹² Ikala ne ditshina dimpe. Kudi mishindu mikuabu ya ditshina idi mimpe buetu tuetu. Tshilejilu, tudi ne bua kutshina bua kubungamija Yehowa. (Mis. 111:10) Bu Adama ne Eva batshina bua kubungamija Yehowa, kabavua mua kuikala bamutombokele to. Kadi ke tshiakenzabu. Pakamutombokelabu, mêsu abu akatabala mu ngumvuilu wa ne: bakajingulula muvuabu balue bena mpekatu. Kabavua ne tshikuabu tshia kuenza, anu kusambulujila bana babu mpekatu ne lufu. Bu muvuabu bamone tshikavuabu anyi batshijingulule,  bakumvua bundu bualu bavua butaka, bobu kuvuala bintu bua kudijika.​—Gen. 3:7, 21.

13-14. (a) Bilondeshile 1 Petelo 3:21, bua tshinyi katuena ne bua kutshina lufu tuamba kusukuila ne mu bilamba? (b) Mmalu kayi adi atusaka bua kunanga Yehowa?

¹³ Nansha mutudi ne bua kutshina bua kubungamija Yehowa, katuena ne bua kutshina lufu tuamba kusukuila ne mu bilamba to. Yehowa mmulongolole mushindu wa tuetu kupeta muoyo wa kashidi. Tuetu benze mpekatu kadi banyingalale ne muoyo mujima, Yehowa neatubuikidile. Neatubuikidile bua ditabuja ditudi nadi mu mulambu wa kupikulangana nawu wa Muanende. Mushindu mutambe bunene wa kuleja ditabuja dietu nkudilambula kudi Nzambi ne kubatijibua.​—Bala 1 Petelo 3:21.

¹⁴ Kudi malu a bungi atudi ne bua kunangila Yehowa. Udi utupesha bintu bimpe bidi bitusankisha dituku dionso edi, ne udi utulongesha bulelela budi bumutangila yeye ne malu adiye mulongolole. (Yone 8:31, 32) Mmutupeshe tshisumbu tshia bena Kristo bua kutulongesha ne kutuambuluisha. Udi utuambuisha majitu etu mpindieu, ne mmutupeshe ditekemena dia kuikala ne muoyo wa kashidi mu nsombelu mimpe menemene matuku atshilualua. (Mis. 68:19; Buak. 21:3, 4) Patudi tuelangana meji bua malu onso akadi Yehowa mutuenzele bua kuleja mudiye mutunange, tudi tumvua petu mua kumunanga. Mpindieu patudi tunanga Yehowa, tudi tupeta ditshina dimpe. Tudi tutshina bua kubungamija Nzambi utudi bafike ku dinanga bikole.

15. Ntshinyi tshivua tshiambuluishe Makayla bua kutshimuna buôwa buvuaye nabu bua kulua kuenza bilema?

¹⁵ Makayla utukadi batele, wakatshimuna buôwa buvuaye nabu bua kulua kuenza bilema pavuaye mujingulule mutu Yehowa ubuikidilangana. Udi wamba ne: “Ngakajingulula ne: tuetu bonso tudi bapange bupuangane ne tutu tuenza bilema. Kadi ngakalua kumona kabidi ne: Yehowa mmutunange ne neatubuikidile bilema ku diambuluisha dia tshia kupikulangana natshi.” Dinanga divuaye nadi kudi Yehowa diakamusaka bua kudilambula kudiye ne kubatijibua.

16. Mmunyi muvuabu bambuluishe Miles bua kutshimuna ditshina buluishi?

¹⁶ Miles uvua utshina ne: mamuende kavua mua kuitaba dipangadika diende dia kubatijibua to. Nunku wakakeba diambuluisha kudi mutangidi wabu wa tshijengu. Miles udi wamba bua mutangidi au ne: “Tatuende pende uvua Ntemu, kadi mamuende kavua Ntemu to. Wakangambuluisha bua kuela meji ku tshimvua mua kuambila mama bua kumujadikila ne: meme nkayanyi ke uvua mudiangatshile dipangadika dia kupeta batismo, ki mpapa uvua ungenzeja to.” Mamuende wa Miles kakasanka to. Miles wakafika ku diumbuka kua mamuende, kadi kakashintulula dipangadika diende to. Udi wamba ne: “Kumanya malu mimpe onso adi Yehowa mungenzele kuakandenga bikole. Pamvua ngelangana meji bikole bua mulambu wa Yezu wa kupikulangana nawu, ngakajingulula mudi Yehowa munnange bikole. Biakansaka bua kudilambula kudiye ne kubatijibua.”

17. Tuetu bonso tudi ne mushindu wa kuleja tshinyi?

¹⁷ Pavua Eva mudie tshimuma tshia mutshi uvuabu bakandike, wakabenga Tatuende. Pavua Adama mulue kudia pende, wakaleja mu mushindu mubi mutambe muvuaye mupange dianyisha bua malu mimpe onso avua Yehowa mumuenzele. Tuetu bonso tudi ne mushindu wa kuleja mutudi katuyi tuanyisha dipangadika divua Adama ne Eve bangate adi. Patudi tupeta batismo, tudi tuleja Yehowa ne: tudi tuitaba mudiye ne bukokeshi bua kutuelela mikenji ya tshidi tshimpe ne tshidi tshibi. Tudi tuleja ne: tudi banange Tatu wetu ne tudi tumueyemena.

18. Ntshinyi tshidi mua kukuambuluisha bua kutungunuka ne kuenzela Yehowa mudimu?

¹⁸ Tuetu bamane kupeta batismo, mbimpe tutungunuke ne kuenza malu adi Yehowa musue, ki ngatudi tuetu basue to. Ke tshidi batendeledi ba Nzambi miliyo ya bungi benza tshidimu tshionso etshi. Bua wewe kubafuana, tungunuka ne kuvudija dimanya diebe dia Bible, Dîyi dia Nzambi; ikala ne tshibidilu tshia kudisangisha ne bena Kristo nebe; ikala kabidi wambila bantu bakuabu malu a Tatu webe wa dinanga audi mulonge, ubambilawu ne tshisumi. (Eb. 10:24, 25) Paudi wangata mapangadika, ikala uteleja mibelu idi Yehowa ukupesha mu Dîyi diende ne ku butuangaji bua bulongolodi buende. (Yesh. 30:21) Dîba adi malu onso audi wenza neakumbane.​—Nsu. 16:3, 20.

19. Ntshinyi tshiudi ne bua kutungunuka ne kujingulula? Bua tshinyi?

¹⁹ Paudi wenda ujingulula mudi mikenji ya Yehowa ikuambuluisha, neumunange bikole ne neunange kabidi mikenji yende ayi bikole. Dîba adi tshintu nansha tshimue tshidi Satana ujinga kukupesha katshiakukupangisha bua kutungunuka ne kuenzela Yehowa mudimu to. Difuanyikija wewe muikale ne muoyo bidimu tshinunu kumpala eku. Tshikondo atshi neumone ne: dipangadika diuvua muangate bua kubatijibua ke dipangadika ditambe buimpe diutu kuyi muanji kuangata!