1. Yumanyi yajimbesheliwu aAdama naEva, nawa chumanyi chafuminimu?

HINYI imunakutoñojoka nenu diyi watela kushaku nshimbi yakwiluka nachu yayiwahi niyatama? Chelili aAdama naEva adi mukabu wakumutondu wakwiluka nachu yuma yayiwahi niyatama, amwekesheli nawu: Hiyamukuhweleleli Yehova ninshimbi jindiku. Afuukwilihu kudituñila aweni nshimbi hayuma yayiwahi niyatama. (Kutach. 3:22) Ilaña talenu yuma yajimbesheliwu. Ajimbesheli wubwambu wawu naYehova, kukooleka kwakushakama haya nyaaka nawa asambwishili anyanawu nshidi nikufwa. (Rom. 5:12) Chuma chafuukwiliwu aAdama naEva chaleta yihuñu.

2-3. (a) Ntuñu wakuEtiyopiya welili ñahi chelili amushimwini kudi Fwilipu? (b) Nkiswinyi yitwatambwilaña neyi tupapatishewa, nawa malwihwinyi itukuhanjekahu?

² Adama naEva elili chuma chambukaku nachuma cheliliyi ntuñu wakuEtiyopiya chamushimwininiwu kudi Fwilipu. Iwu ntuñu walemesheli chuma chamwililiwu kudi Yehova niYesu chakwila washikeneni kupapatishewa. (Yil. 8:34-38) Neyi tudihana kudi Nzambi nikupapatishewa neyi cheliliyi ona ntuñu, tukumwekesha hatooka netu twasakililaña hayuma yatwililayi Yehova niYesu. Twamwekeshaña cheñi netu twamukuhwelela Yehova nawa tweluka netu diyi watela kushaku nshimbi hayuma yayiwahi niyatama.

³ Toñojokenu hankisu yitwatambwilaña neyi tunakumukalakela Yehova. Twekalaña nakuchiñeja kwakutambwila yuma yejima yajimbesheliwu aAdama naEva kushilahu nikukooleka  kwakushakama haya nyaaka. Yehova watwanakenaña nikutwinka chinleji chitooka muloña wakwila twamukuhwelela Yesu Kristu. (Mat. 20:28; Yil. 10:43) Twekalaña cheñi muchisaka chaYehova mwekala ambuñindi akakiswilayi kumbidi. (Yow. 10:14-16; Rom. 8:20, 21) Hela chakwila amakwawu amwiluka Yehova nawa eluka nawu kumbidi akatukiswila, ashintajalaña kumwimbujola ntuñu wakuEtiyopiya. Yumanyi yinateli kuyikañesha kupapatishewa? Nawa anateli kumanisha ñahi iku kukala?

4-5. Kukalanyi kwamweneñayi kansi weyala Avery nikansi wamumbanda Hannah?

⁴ Kudijinoka. Anvwali jaAvery hiyaYinsahu jaYehova. Atata yindi akamenaña chiwahi chisaka chawu nawa hiyakulumpi adikita. Ilaña Avery wachinineña kupapatishewa. Muloñadi? Wahosheli nindi: “Natoñojokeleña nami nukutwesha wanyi kwikala neyi chekalawu atata.” Avery wajinokeleña cheñi nindi wakatwesha wanyi kukalakala neyi chakwila amwinka nyidimu kumbidi. Wahosheli nindi: “Natiyileña woma neyi chakwila akañila nawu nilombi mudi antu amavulu, kuhana jimpanji hela kulombola izanvu mumudimu wakushimwina.”

⁵ Hannah wudi nayaaka 18 niyena wadiña nakudijinoka chikupu. Amukulishili kudi anvwali amukalakelaña Yehova. Hela chochu, wajinokeleña nindi wukutwesha wanyi kulondela nshimbi jaYehova. Muloñadi? Hannah watachikili kuditiya kutama. Mpinji yikwawu watiyileña kutama chakwila wadikatishileña yomweni, chumichi chaletesheleña yuma kusweja kutaminaku. Wahosheli nindi: “Kwosi muntu niwumu inalejeli yuma yinelileñaku, kushilahu tuhu nianvwali jami. Hela chochu, natachikili kutoñojoka nami Yehova kwila yañiteja kwikala kambuñindi nehi.”

6. Chumanyi chamukañesheleña Vanessa kupapatishewa?

⁶ Ikakeja dawamabwambu. Vanessa wudi nayaaka 22 wahosheli nindi: “Nadiña nebwambu wamuwahi inadilukili nindi hadi yaaka kwakwihi na 10.” Hela chochu, ibwambu dindi wamukwashileña wanyi kushikahu kulonda yapapatishewi. Chumichi chamutiyishileña Vanessa kutama nawa wahosheli nindi: “Chankalilileña kwikala nawamabwambu amakwawu nawa natoñojokeleña nami neyi nimuleka ona ibwambu dami hinakamonahu cheñi ibwambu wakudikunda nindiku.”

7. Chumanyi chamutiyishileña Makayla woma, nawa muloñadi?

⁷ Kuchiina kuluwañesha. Makayla wadiña nayaaka yitanu, hamuhañiliwu yayindi  muchipompelu. Chakulileñayi wamweneña anvwali jindi chaneñeleñawu muloña wayilwilu yamanakwindi. Wahosheli nindi: “Natiyileña woma nami neyi nipapatishewa hadaha nakaluwañesha, akanhaña muchipompelu nawa anvwali jami akaneña chikupu.”

8. Chumanyi chamutiyishileña Miles woma?

⁸ Kuchiina ikañesha. Atata yaMiles niamama yindi akuwanamu hiyaYinsahu jaYehova ilaña amama yindi amuvwala nehi. Wahosheli nindi: “Nashakamini nawamama hadi yaaka 18, dichi nachinineña kuyileja nami inakukeña kupapatishewa. Namweneña chayilileñawu atata mpinji yekaliliwu aChinsahu. Natiyileña woma nami akunkabishaña.”

9. Chumanyi chinateli kufumamu neyi mudiza hakukeña nikudiwunjika kukwetiyi Yehova?

⁹ Adama naEva atondelihu kubula kumukalakela Yehova muloña akañenyi kumukeña Yehova chikupu. Hela chochu, Yehova wayitejeli kushakama yaaka yayivulu kulonda avwali anyana nikufuukulahu awenawu chinateli kukulishawu anyanawu. Yuma yafuminimu chelili aAdama naEva abuli kumwovwahila Yehova yamwekesheli nawu afuukwili mwaluwa. Wedi wawu wajahili mwanyikindi chakadi muloña nawa chimwahitili mpinji, heseki hawaninini madombu niyilwilu kudikeña. (Kutach. 4:8; 6:11-13) Hela chochu, Yehova waloñesheli njila yakupulwishilamu anyana kaAdama naEva akeñeleña kumukalakela. (Yow. 6:38-40, 57, 58) Chimukudizaña hakudiwunjika nikukeña kukwetiyi Yehova, mukusweja kumukeña chikupu. Mukukaana kwila yuma yeliliwu aAdama naEva nawa mukudihana kudi Yehova.

10. Kutoñojoka chikupu hansona ya Masamu 19:7 kunateli kuyikwasha ñahi kumukalakela Yehova?

¹⁰ Twalekenuhu kudiza kulonda mumwiluki Yehova. Neyi mudizaña chikupu hadi Yehova, mukutiyaña wanyi woma wakumukalakela. Avery itwashimuna hakusambila wahosheli nindi: “Nalekeli kutiya woma chinatachikili kutaña nikutoñojoka chikupu hachikaninu chekala ha Masamu 19:7.” (Tañenu.) Chelili Avery yamoni chamukwashiliwu  kudi Yehova, waswejeli kumukeña Nzambi. Kukeña kwatukwashaña kwikala ahamuka, kwatukwashaña cheñi kutwalekahu kumukalakela Yehova nikwila yuma yakeñañayi. Hannah itwashimuna hakusambila washimwini nindi: “Kutaña nikudiza Bayibolu nkawami kwankwashili kwiluka nami neyi nidikatisha ami aweni dikwila nawu namuneñeshi Yehova.” (1 Pet. 5:7) Hannah wekalili ‘mukwakwila mwaya Izu daNzambi.’ (Yak. 1:22) Yumanyi yafuminimu? Wahosheli nindi: “Chinamweni yuma yayiwahi yafumini mukumwovwahila Yehova, naswejeli kumukeña nankashi. Ichi neluka chikupu nami Yehova wukunlombolaña mpinji yejima yinnakukeña wukwashu.” Hannah wazatileña nañovu kulonda yatweshi kushinda yitoñojoka yakukeña kudikatisha. Wadihanini kudi Yehova nawa wapapatisheweli.

11. Chumanyi cheliliyi Vanessa hakwila yekali nawamabwambu amawahi, nawa chumanyi chitunateli kudizilaku?

¹¹ Tondenuña chiwahi amabwambu. Vanessa itwashimuna hakusambila welukili nindi ibwambu dindi diyi wamukañesheleña kumukalakela Yehova. Dichi walekeli kudikunda nindi. Halekeli kudikunda nindi hohuku, ilaña wekalili nawamabwambu amaha amuchipompelu. Wahosheli nindi yuma yelili Nowa nichisaka chindi yamukwashili. Wahosheli nindi: “Adiña nakushakama nawantu abulili kumukeña Yehova, ilaña adiña adikeña.” Vanessa wekalili payiniya hanyima yakupapatishewa. Dichi wahosheli nindi: “Chumichi chinankwashi kwikala nawamabwambu amawahi muchipompelu chetu nimuyipompelu yikwawu.” Ninenu munateli kwikala nawamabwambu amawahi neyi muzataña nañovu mumudimu watwinkayi Yehova.—Mat. 24:14.

12. Woma wamuchidinyi wabuliliwu aAdama naEva, nawa yumanyi yafuminimu?

¹² Ikalenu nawoma watelela. Woma wukwawu wekala wawuwahi. Chakutalilahu, twatela kwikala nawoma wakubula kwila yuma yinateli kumuneñesha Yehova. (Mas. 111:10) Neyi aAdama naEva adiña nawoma wamuchidiwu kachi adikañili wanyi  naYehova. Ilaña adikañili. Chadikañiliwu naNzambi, mesu awu atoneni nawa elukili nawu tunekali dehi akwanshidi. Asambwishili anyanawu nshidi nikufwa. Chineli elukili nawu anafumpi nshimbi jaNzambi, atiyili nsonyi muloña elukili nawu adiña nzekesi nawa adibutili.—Kutach. 3:7, 21.

13-14. (a) Kwesekeja na 1 Petulu 3:21,muloñadi chitwatela kubula kuswejela kutiya woma wakufwa? (b) Yumanyi yatuleñelaña tumukeñi Yehova?

¹³ Twatela kwikala nawoma wakubula kumuneñesha Yehova, bayi tusweja kutiya woma wakufwaku. Yehova waloñesha njila yinateli kutukwasha kutambwila wumi wahaya nyaaka. Neyi tukoña nshidi nawa tubalumuka mumuchima, Yehova wukutwanakena. Wukutwanakena muloña twakuhwelela mwifutu danyiloña daMwanindi. Njila yimu yitwamwekeshelañamu chikuhwelelu, hikudihana kudi Nzambi nikupapatishewa.—Tañenu 1 Petulu 3:21.

¹⁴ Kudi yuma yayivulu yatuleñelaña tumukeñi Yehova. Watwinkaña yuma yayiwahi yitwadiluñishaña mafuku ejima nawa watudizishaña chekalayi ninkeñelu yindi. (Yow. 8:31, 32) Watwinka chipompelu chawakwaKristu kulonda chitulomboleña nikutukwasha. Watukwashaña kuumika kukala nawa watwinka kuchiñeja kwakushakama haya nyaaka nawumi wawanina kumbidi. (Mas. 68:19; Chim. 21:3, 4) Neyi tutoñojokaña chikupu hayuma yatwililayi Yehova yinakumwekesha nawu watukeña, tukusweja kumukeña. Nawa neyi tumukeña Yehova, tukutiyaña woma wakwila yuma yikumuneñesha. Twachinaña kutiyisha kutama muntu itwakeña nankashi.

15. Makayla walekeli ñahi kutiya woma wakwila nindi nateli kuluwañesha?

¹⁵ Makayla itwashimuna hakusambila chelukiliyi nindi Yehova wanakenaña, walekeli kutiya woma wakwila nindi nateli kuluwañesha. Wahosheli nindi: “Nelukili nami wejima wetu twawanina wanyi nawa tunateli kukoña yiluwa. Nelukili cheñi nami Yehova watukeña nawa watwanakenaña kushindamena hefutu danyiloña.” Muloña wakwila wamukeñeli Yehova, Makayla wadihanini kudi yena nawa wapapatisheweli.

16. Miles amukwashili ñahi kuleka kutiya woma wekañesha?

¹⁶ Miles wachinineña nindi amama yindi akumukañesha kupapatishewa, walombeli wukwashu kudi nkoñi wañinza. Miles wahosheli nindi: “Iwu nkoñi wañinza niyena amama yindi adiña aChinsahu wanyi. Wankwashili kutoñojoka yuma yinatela kuyileja amama kulonda eluki nawu nadifuukwilili ami aweni kupapatishewa bayi neyi atata diwu ankanjikijileñaku.” Amama yaMiles atiyili kutama. Nkumininaku Miles wafumini hetala, ilaña wahimpili wanyi mwafuukwiliyi. Wahosheli nindi: “Natiyili kuwaha chinelukili yuma yayiwahi yañilililiyi Yehova. Chinatoñojokeli chikupu hefutu danyiloña daYesu,  nelukili nami Yehova wankeña nankashi. Kutoñojoka haniyi yuma kwankwashili kudihana kudi Yehova nikupapatishewa.”

17. Chumanyi chitwatela kwila wejima wetu?

¹⁷ Eva chadiiliyi mukabu wakumutondu muEdeni, wamukaanini Tata yindi. Adama niyena chadiiliyi mukabu, wamwekesheli nindi wasakililili wanyi hayuma yejima yamwilililiwu kudi Yehova. Wejima wetu tunateli kumwekesha netu mwafuukwiliwu aAdama naEva mwaluwa. Neyi tupapatishewa, twamwekeshaña netu twamukuhwelela Yehova netu diyi wukweti wuswa wakushaku nshimbi hayuma yayiwahi niyatama. Twamwekeshaña netu twamukeña nawa twamukuhwelela Tata yetu.

18. Yumanyi yinateli kuyikwasha kutwalekahu kumukalakela Yehova?

¹⁸ Neyi tunapapatishewi twatela kutwalekahu kulondela nshimbi jaYehova bayi jetuku. Ambuña aNzambi amavulu anatwalekihu kulondela nshimbi. Ninenu munateli kwikala neyi wena neyi mutwalekahu kudiza Izu daNzambi, Bayibolu; kudikunda nawamanakwetu niahela nikulejaku antu amakwawu yuma yimunadizi hadi Tata yenu wukweti kukeña. (Heb. 10:24, 25) Neyi munakukeña kufuukulahu, tiyililenu kufumba kwaYehova kwatwinkañayi Mwizu dindi nikuloñesha kwindi. (Isa. 30:21) Dichi yuma yejima yimukwilaña yikukolaña.—Yish. 16:3, 20.

19. Chumanyi chimwatela kutoñojokañahu, nawa muloñadi?

¹⁹ Neyi mutwalekahu kutoñojoka hayuma yayiwahi yinafumi mukulondela nshimbi jaYehova, mukusweja kumukeña yena ninshimbi jindi. Chikufumamu, kwosi chuma chikwilayi Satana chinateli kuyikañesha kumukalakela Yehova. Fwikijenu hanahiti dehi yaaka ikombakaji. Mukwanuka nenu mwelili chiwahi chimwafuukwilihu kupapatishewa.