1. Adam gi Hawa nolalo ang’o, to mano nokelo ang’o?

IPARO ni en ng’a monego onyiswa gik mabeyo monego watim kod gik maricho ma ok onego watim? Ka ne Adam gi Hawa ochamo olemo ma nokwergi, ne ginyiso ayanga ni ne ok gihero Jehova kod chikene. Ne giyiero mondo gin giwegi e ma gipog ber gi rach. (Cha. 3:22) To koro parie gik ma ne gilalo: Osiep ma ne ni e kindgi gi Jehova nokethore; thuolo ma ne gin-go mar dak nyaka chieng’ be nolal alala kamano; kendo ne girwako kothgi duto e richo kod tho. (Rumi 5:12) Kuom adier, yiero ma Adam gi Hawa notimo nokelo mana chandruok lilo.

2-3. (a) Ja-Ethiopia ma Filipo noyalone wach maber nokawo okang’ mane? (b) Gin gueth mage ma wayudo ka obatiswa, to gin penjo mage ma wadwa nono?

² Pim ane yiero ma Adam gi Hawa notimono kod yiero ma Ja-Ethiopia moro notimo ka ne Filipo oyalone wach maber. Ja-Ethiopiano nokawo mapek ahinya gima Jehova gi Yesu nosetimone mi nokawo okang’ mar batiso mana gi kanyono. (Tich 8:34-38) Mana kaka Ja-Ethiopiano, wan be sama wasingore ne Jehova ni wabiro timo dwache mi obatiswa, wanyiso ayanga ni wakawo mapek gik ma Jehova gi Yesu osetimonwa. Bende, wanyiso ni wahero Jehova kendo wan gadier ni en e ma en gi ratiro mar ketonwa chike ma konyowa pogo ber gi rach.

³ Par ane gueth ma wayudo sama watiyo ne Jehova. Mokwongo, wan gi geno mar yudo gik ma Adam gi Hawa nolalo, moriwo nyaka thuolo mar dak nyaka chieng’. Mar  ariyo, nikech wayie kuom Yesu Kristo, Jehova weyonwa richowa kendo omiyo watiyone gi chuny maler. (Mat. 20:28; Tich 10:43) Mar adek, wabedo e riwruok mar jotich Jehova ma oyiego kendo ma ong’eyo maber, sama pod warito kinde ma ibiro ketwae thuolo chuth. (Joh. 10:14-16; Rumi 8:20, 21) Gimiwuoro en ni nitie joma oseng’eyo Jehova kaachiel gi guethgo duto, to e ma pod gidigni kawo okang’ ma Ja-Ethiopiacha nokawo. Gin pek mage ma nyalo bedo ni monogi kawo okang’ ma kamano? To ere kaka ginyalo loyo pekgo?

4-5. Gin pek mage ma Avery kod Hannah ne nigo?

⁴ Paro ni gin joma nono. Jonyuol wuoyi moro ma nyinge Avery gin Joneno mag Jehova. Wuon-gi en jaduong’-kanyakla ma jakinda ahinya kendo ong’ere kaka wuoro maber. To e ma Avery pod ne luor dhi e batiso. Nikech ang’o? Owacho kama: “Ne ok apar ni an be nanyalo bedo Jakristo maber kaka babawa.” E wi mano, noluor ni kobatise, ne inyalo miye migepe moko ma samoro ok nonyal timo. Owacho kama: “Naluor ni ne inyalo nyisa ni alem e nyim ji, agol twege, kata ata romo mag dhi lendo.”

⁵ Hannah ma jahigni 18 bende ne nigi luoro mang’eny. Chakre tinne, jonyuolne ne gin Joneno. Kata kamano, pod ne en gi kiawa ka be nonyalo luwo chike Jehova. Nikech ang’o? En nikech nochayore ahinya e chunye. Nitie kata seche ma nowinjoga marach mi ohiny dende goyiem, to mano ne medo mana ketho weche. Owacho niya: “Ne ok anyiso ng’ato ang’ata gik ma ne atimo. Kata mana jonyuolna ne ok anyiso. Naparo ni Jehova ne ok nyal dwaro ni abed jatichne nikech gik ma ne atimogo.”

6. Ang’o ma ne mono Vanessa dhi e batiso?

⁶ Bedo gi osiepe ma ok owinjore. Vanessa ma jahigni 22 wacho niya: “Nitie nyako moro ma ne en osiepna ahinya kuom higni ma dhi apar.” Kata kamano, osiepneno ne ok jiwe mondo ochop gombone mar batiso. Wachno ne litnega Vanessa. Owacho kama: “Ok amakga osiep gi ji piyo, omiyo, naneno ni ka ne anyalo wera kode, ne ok adhi yudo osiep machielo.”

7. Ang’o ma Makayla ne oluoro, to nikech ang’o?

⁷ Luor ni ginyalo donjo e richo. Makayla ne jahigni abich ka ne ogol owadgi e kanyakla. Kaka nomedo dongo, nonenoga kaka jonyuolne ne winjoga malit nikech timbe owadgino. Makayla wacho kama: “Naluor ni nanyalo timo richo  bang’ kosebatisa mi gola e kanyakla, to mano ne dhi medo ne jonyuolna kuyo.”

8. Wuoyi moro miluongo ni Miles noluoro ang’o?

⁸ Luoro akwede. Jonyuol Miles noketho kend margi chuth. Wuon Miles en Janeno, to min-gi ok en Janeno. Miles wacho niya: “Nadak gi minwa kuom higni 18 kendo naluorga nyise ni ne agombo ni obatisa. Pod nanyalo paro gik maricho ma notimo ka ne baba okawo okang’ mar bedo Janeno. Naluor ni an bende ne odhi kweda.”

9. Sama imedo puonjori kaka Jehova hore kod kaka ohero ji, ang’o ma biro timore?

⁹ Adam gi Hawa ne ok odhi nyime tiyo ne Jehova nikech ne ok gitimo kinda mondo gihere matut. Kata kamano, Jehova pod noyienegi mondo gidag aming’a, ginyuol nyithindo, kendo giyier giwegi chike ma gidwaro tiyogo e pidho nyithindgi. Mapiyo nono, nonenore maler ni yiero ma Adam gi Hawa notimo ne en aena fuwo lilo. Wuodgi makayo nonego owadgi, kendo mosmos timbe mahundu nokwako oganda dhano duto, mi koro ji nochako timo mana gik ma konyogi giwegi ma ok gidewo jomamoko. (Cha. 4:8; 6:11-13) Kata kamano, Jehova noketo chenro mar reso nyithind Adam gi Hawa duto ma ne dwaro tiyone. (Joh. 6:38-40, 57, 58) Sama imedo puonjori kaka Jehova hore kod kaka ohero ji, mano biro miyo imed here. Hera ma kamano biro miyo kik itim gima Adam gi Hawa notimo, to kar mano ichiw ngimani ne Jehova.

10. Ang’o momiyo paro matut kuom Zaburi 19:7 nyalo konyi mondo iti ne Jehova?

¹⁰ Dhi nyime puonjori e wi Jehova. Kaka imedo puonjori e wi Jehova, e kaka ibiro medo bedo gadier ni ok in ng’ama nono kendo inyalo tiyone e yo maber. Avery ma ne wasewuoyo kuome motelo wacho kama: “Nachako bedo gi paro mowinjore ka ne asomo Zaburi 19:7 kendo paro matut kuome.” (Som.) Ka ne Avery oneno kaka weche ma ni e ndikono nochako timore e ngimane, hera moherogo Jehova nomedo bedo motegno.  Ka wahero Jehova, mano miyo waketo pachwa kuome kaachiel gi gik modwaro ni watim. Hannah ma bende ne wasewuoyo kuome wacho niya: “Puonjruok kendo somo Muma pile nomiyo afwenyo ni sama ahinyo denda kendo winjo lit, Jehova bende winjo malit.” (1 Pet. 5:7) Hannah nochako “timo kaka wach Nyasaye dwaro.” (Jak. 1:22) Mano nokonye nade? Owacho kama: “Ka naneno kaka timo gik ma Jehova dwaro kelona ber, nachako here sidang’. Sani koro an gadier chuth ni Jehova biro taya pile kendo konya.” Gikone, Hannah noweyo tim mar hinyo dende goyiem. Nochiwo ngimane ne Jehova mi obatise.

11. Ang’o ma Vanessa notimo mondo oyud osiepe mabeyo, to mano puonjowa ang’o?

¹¹ Ti gi rieko sama iyiero osiepeni. Vanessa ma ne wasewuoyo kuome, bang’e nofwenyo ni osiepne e ma ne mone tiyo ne Jehova. Omiyo, nong’ado osiepno. To ok mana mano kende. Notimo kinda mi oyudo osiepe manyien mabeyo e i kanyakla. Owacho ni ranyisi mar Noa gi joode nokonye ahinya. Omedo wacho kama: “Kata obedo ni Noa gi joode nodak e kind joma ne ok ohero Jehova, gin to ne gihero Jehova kendo ne gijiwore e kindgi.” Ka nosebatis Vanessa, nobedo painia. Sani owacho niya: “Bedo painia osemiyo amako osiep gi ji mang’eny mabeyo ma ni e kanyaklawa kod ma ni e kanyakla mamoko.” In bende kibedo modich e tij yalo wach maber, ibiro yudo osiepe mabeyo modhuro.​—Mat. 24:14.

12. En luoro mane ma Adam gi Hawa ne ongego, to mano nokelonegi ang’o?

¹² Bed gi luoro mowinjore. Nitierega luoro maber. Kuom ranyisi, onego waluor timo gik ma nyalo chwanyo Jehova. (Zab. 111:10) Ka di ne Adam gi Hawa bed gi luoro ma kamano, di ne ok ging’anyo ne Jehova. Bang’ ng’anyo, wengegi noyepo, tiende ni, ne gifwenyo ni koro ne gin joricho. Nyithindgi bende koro nodonjo e kuong’ mar richo kod tho. Nikech Adam gi Hawa koro nong’eyo maler ni ne ok giler e wang’ Jehova, wigi nokuot gi duggi mi gibasore gi oboke.​—Cha. 3:7, 21.

13-14. (a) Ka luwore gi 1 Petro 3:21, ang’o momiyo ok onego waluor tho ahinya? (b) Gin gik mage ma miyo wahero Jehova?

 ¹³ Kata obedo ni onego waluor chwanyo Jehova, ok onego waluor tho ahinya. Jehova oseyawonwa yo mar yudo ngima mochwere. Ka po ni watimo richo to waloko chunywa gadier, Jehova biro weyonwa richowa. Obiro timonwa mano nikech yie ma wan-go kuom misango ma Wuode nochiwo. Achiel kuom yore madongo ma wanyisogo ni wan gi yie en chiwo ne Jehova ngimawa mi batiswa.​—Som 1 Petro 3:21.

¹⁴ Nitie gik mang’eny momiyo onego waher Jehova. Kuom ranyisi, omiyowa gik mabeyo ma konyowa e ngimawa ma pile, kendo opuonjowa adiera mondo wang’eye maber kaachiel gi dwache. (Joh. 8:31, 32) Bende, osemiyowa kanyakla mar Jokristo mondo otawa kendo osirwa. E wi mago, oting’o ting’wa pile kokonyowa nano e chandruok ma yudowa sani, kendo omiyowa geno mar dak maber nyaka chieng’. (Zab. 68:19; Fwe. 21:3, 4) Sama waparo matut kuom gik mang’eny ma Jehova osetimo ma nyiso kaka oherowa, mano chwalowa mondo wan be wamed here. To ka wasehero Jehova, koro wabedo gi luoro mowinjore, tiende ni, waluoro timo gik ma nyalo chwanyo Nyasaye ma wahero kamano.

15. Ere kaka Makayla noloyo luoro ma ne en-go ni nonyalo donjo e richo?

¹⁵ Makayla ma ne wasewuoyo kuome ne oloyo luoro ma ne en-go ni nonyalo donjo e richo ka nochako bedo gadier ni Jehova oikore weyo ne ji richogi. Owacho kama: “Nafwenyo ni waduto warem kendo wabiroga both kinde ka kinde. To nafwenyo bende ni Jehova oherowa ahinya kendo oikore weyonwa richowa kokalo kuom misango mar Yesu.” Nikech koro nochako hero Jehova, nochiwo ngimane mi obatise.

16. Ere kaka ne okony Miles loyo luoro ma ne en-go?

¹⁶ Miles ma ne luor ni min-gi ne dhi kwedo gombone mar batiso nogoyo mbaka gi jarit-alwora margi. Miles wacho niya: “Jarit-alworano bende nopon e ot ma janyuol achiel e ma ne tiyo ne Jehova. Nokonya gi paro moko ma nanyalo tiyogo e lero ne mamawa ni batiso en yierona awuon, kendo ni baba ok e ma ne dhir toka mondo batisa.” Wachno nowang’o i min Miles ahinya. Gikone, Miles noyiero mar wuok e od min-gi, kata kamano, nomakore motegno gi yiero ma nosetimo mar dhi e batiso. Owacho kama: “Ng’eyo gik mabeyo ma Jehova osetimona osebedo ka mulo chunya ahinya. Ka naparo matut kuom rawar ma Jehova nochiwo kokalo kuom misango mar Yesu, nafwenyo ni Jehova ohera gi hera matut. Mano nochwala ma achiwo ngimana ne Jehova mi obatisa.”

17. Waduto wan gi thuolo mar timo ang’o?

¹⁷ Ka ne Hawa ochamo olemo ma nokwergi e puodho mar Eden, nonyiso ni ne ok odwar luwo kaka Jehova ne taye. Ka ne Adam oriwore kode e ng’anyono, Adam nonyiso ayanga ni ne ok okawo mapek gik mabeyo ma Jehova nosetimone. Waduto wan gi thuolo mar nyiso ni ok wachal gi Adam gi Hawa kendo ni wamor gi gik moko duto ma Jehova osetimonwa. Sama wachiwore mondo batiswa, wanyiso Jehova ni wan gadier chuth ni en e ma en gi ratiro mar nyisowa gik mabeyo monego watim kod gik maricho ma ok onego watim. Bende, wanyiso Jehova Wuonwa ni wahere kendo wageno kuome.

18. Ka diher ni idhi maber e tiyo ne Jehova, ang’o monego itim?

¹⁸ Bang’ kosebatiswa, gima koro nyaka wakedne pile ka pile en siko ka watimo gik moko duto ka luwore gi chike Jehova, to ok dwachwa wawegi. Jotich Jehova tara gi tara timo mana kamano. In bende inyalo timo kamano ka idhi nyime medo lony ma in-go e Muma, ka iriworiga gi Jokristo weteni e chokruok, kod kitimo kinda e lando ne jomamoko weche misepuonjori e wi Jehova. (Hib. 10:24, 25) Sa asaya ma idwa timo yiero moro, winj weche ma Jehova nyisi kokalo kuom Muma kod riwruok mar ogandane. (Isa. 30:21) Kae to gik moko duto mitimo biro dhi maber.​—Nge. 16:3, 20.

19. Ang’o monego imed fwenyo, to nikech ang’o?

¹⁹ Kaka imedo fwenyo ber mathoth miyudo sama Jehova tayi, e kaka ibiro medo here kaachiel gi chikene. Kae to gimoro amora ma Satan nyalo temo goligo e tij Jehova ok bi tiyo. Tem ane paro kaka ngimani biro chalo higni 1,000 bang’e. Ibiro ng’iyo chien kimor gilala nikech ing’eyo ni yiero ma nitimo mar batiso e ma ne en yiero maber mogik!