1. Adama leh Evi chuan eng nge an hloh va, chu chuan eng nge a rah chhuah?

A CHHIA leh a ṭha chungchânga tehkhâwng siamtu tûr chu tu nge nia i rin? Adama leh Evi’n a chhia leh a ṭha hriatna thing rah an ei khân, Jehova leh a tehkhâwngte chu an ring lo tih chiang takin an lantîr a. A chhia leh a ṭha chungchângah mahnia tehkhâwng siam chu an thlang ta a ni. (Gen. 3:22) Chu mi avânga an thil hloh tâkte chu han ngaihtuah teh. Anni chuan Jehova nêna an inṭhianna chu an hloh va. Chatuana nun theihna hun remchâng an hloh bâkah, an fate hnênah sual leh thihna an rochuntîr a. (Rom 5:12) Adama leh Evi duhthlanna chuan lungngaihna nasa tak a thlen a ni.

2-3. (a) Philipa’n Ethiopia mi tilreh hnêna thu a hrilh khân, ani chuan engtin nge a chhân lêt? (b) Baptisma kan chan avângin eng malsâwmnate nge kan dawn a, eng zawhnate nge kan sawiho vang?

² Adama leh Evi thiltih dân chu Philipa’n Ethiopia mi tilreh hnêna thu a hrilh laia a chhân lêt dân nên khaikhin rawh. Mi tilreh chuan Jehova leh Isua’n a tâna an thiltihte chu a hlut hle a, baptisma a chang ta nghâl a ni. (Tirh. 8:34-38) Mi tilreh anga Pathian hnêna kan inpumpêk a, baptisma kan chan hian chiang taka kan târ lang pakhat a awm a. Chu chu Jehova leh Isua’n kan tâna an thiltihte avânga kan lâwmzia kan lantîrna a ni. Chu bâkah, Jehova chu kan rinchhan a, ani chu a chhia leh a ṭha chungchânga tehkhâwngte siamtu a ni tih kan pawm a ni.

³ Jehova rawng kan bâwl avânga malsâwmna kan dawnte hi han ngaihtuah teh! Pakhatnaah, chatuana nun theihna hun remchâng pawh telin, Adama leh Evi hloh tâk  zawng zawng neih leh theihna kan nei a. Isua Krista kan rin avângin Jehova’n kan sualte min ngaidamin, chhia leh ṭha hriatna thiang min pe a ni. (Mt. 20:28; Tirh. 10:43) Nakina lo awm tûr malsâwmna beiseitu, Jehova chhiahhlawh chhûngkaw zînga mi kan lo ni bawk. (Joh. 10:14-16; Rom 8:20, 21) Chûng malsâwmnate chu chiang hle mah se, Jehova hretu mi ṭhenkhat chuan Ethiopia mi tilreh entawn tûr siam chu zui an hreh a. Anni chu baptisma chang tûrin engin nge dâl mai thei? A nih leh, chûng harsatnate chu engtin nge an hneh theih?

4-5. Ṭhalai Avery-a leh Hannah-i te chuan eng harsatnate nge an neih?

⁴ Inrintâwkna tlâkchhamna. Avery-a nu leh pa chu Jehova Thuhretute an ni a. A pa chuan mi ngaihsakna nei tak leh kohhran upa ṭha tak niin hming ṭha a nei a. Mahse, Avery-a chuan baptisma chan chu a hreh a ni. Engvângin nge? Ani chuan: “Ka pa hming ṭhatna thlâwp zâwngin ka nun theih ka ring lo,” tiin a sawi. Nakin huna a neih mai theih mawhphurhnate chelh thei tûrin inrintâwkna a tlachham bawk. “Mipui hmaa ṭawngṭai te, thusawi te, thlawhhma rawngbâwlnaa kaihruaite chu ka hlau a ni,” tiin a sawi.

⁵ Kum 18 mi, Hannah-i chuan inrintâwkna a tlâkchham êm avângin hrehawm a ti a. Ani chu Jehova rawngbâwltu nu leh pate enkawl seilen a ni a. Chuti chung pawhin, Jehova tehna mila a nun theih a inring lo. Engvângin nge? Mahni insitna a neih vâng a ni. A rilru a hrehawm êm avângin mahnia intihnat châng pawh a nei a, chu chuan thil ṭha lo a thlen zâwk a. “Ka thiltihte chu tumah ka hrilh ngai lo va, ka nu leh pate pawh ka hrilh lo, mahnia ka intihnat ṭhin avângin Jehova’n a chhiahhlawh ni tûrin min duh ka ring lo,” tiin a sawi.

6. Vanessa-i chu baptisma chang tûrin engin nge dâl?

⁶ Ṭhiante thununna. Kum 22 mi Vanessa-i chuan: “Kum sâwm tel ka lo hriat tawh ṭhian ṭha tak ka nei,” tiin a sawi. Mahse, a ṭhiannu chuan baptisma chang tûra a thiltum chu a thlâwp lo va. Chu chuan a rilru a tina a, Vanessa-i chuan: “Ṭhian siam hi a har tih ka hria, kan inṭhian ṭhatna ka tihtâwp chuan ṭhian dang ka neih tawh loh ka hlau,” tiin a sawi a ni.

7. Ṭhalai Makayla-i chuan eng tih nge a hlauh va, engvângin nge?

⁷ Hlawhchham hlauhna. Makayla-i chu kum nga mi a nihin a pianpui unaupa chu hnawhchhuah a ni a. A rawn puitlin chhoh chuan a unaupa thiltihin a nu leh pate chunga a nghawng dân chu a hmu a ni.  “Baptisma ka chan chuan, a hnuah thil ka tisualin, hnawhchhuah ka ni ang a, chu chuan ka nu leh pate chu a tihrehawm lehzual ang tih ka hlau,” tiin a sawi a ni.

8. Ṭhalai Miles-a chuan eng nge a hlauh?

⁸ Dodâl hlauhna. Miles-a pa leh a nu hrawn chu Jehova rawngbâwltute an ni a; mahse, a nu tak erawh Thuhretu a ni lo. “Ka nu hnênah kum 18 chhûng ka awm a, baptisma chan ka duh thu ka hrilh ngam lo va. Ka pa Thuhretu a nih ṭan laia ka nu chhân lêt dân chu ka hmu a. Kei pawh min tihbuai ve ka hlau a ni,” tiin a sawi.

9. Jehova hmangaihna neihzia leh dawhtheihzia kan hriat chuan eng nge kan tih mai theih?

⁹ Adama leh Evi chuan tih tak zeta Jehova an hmangaih loh avângin a rawngbâwl chu an thlang lo va. Chuti chung pawhin, Jehova chuan anni chu fate nei a, mahnia tehkhâwngte siam a, fate enkawl seilian tûrin hun rei tak a damtîr a ni. Jehova laka inla hrang tûra Adama leh Evi thu tlûkna siam sawhkhâwkte chuan an âtzia chiang takin a tilang ta thuai a. An fapa upa ber chuan pawisawi lo a unaupa chu a that a, a hnuah, inpâwngnêkna leh mahni hmasialnain mihring chhûngkuaah hmun a luah ta a ni. (Gen. 4:8; 6:11-13) Mahse, Jehova chuan a rawngbâwl duhtu Adama leh Evi thlahte chhandam nân ruahmanna a siam a. (Joh. 6:38-40, 57, 58) Jehova dawhtheihna leh hmangaihna chungchâng i hriat tam poh leh, amah i hmangaihna a pung lehzual ang a. Adama leh Evi te thlan nun kawng chu hnâwlin Jehova hnêna inpumpêk chu i duh ngei ang.

10. Engvângin nge Sâm 19:7-na chhût ngunna chuan Jehova rawngbâwl tûra min ṭanpui theih?

¹⁰ Jehova chanchin zir zawm zêl rawh. Jehova chanchin i zir tam poh leh, hlawhtling takin a rawng i bâwl thei tih i inring lehzual ang. Kan sawi tâk Avery-i chuan: “Sâm 19:7-a ka hmuh thutiamte chhiar a, chhût ngunna aṭangin inrintâwkna ka nei a ni,” tiin a sawi. (Chhiar rawh.) Jehova’n chu tiamkamna a hlen dân Avery-i’n a hmuh chuan Pathian a hmangaih lehzual a ni. Hmangaihna  chuan inrintâwkna chauh ni lovin, Jehova leh a duh zâwngte ngaihven tlat tûrin min ṭanpui a. Kan sawi tâk Hannah-i chuan: “Mahnia ka intihnat hian Jehova pawh ka tina tih ka mi mal Bible chhiarna leh zirna aṭangin ka hria,” tiin a sawi. (1 Pet. 5:7) Hannah-i chu ‘Pathian Thu zâwmtu,’ a lo ni ta a. (Jak. 1:22) Eng nge a rah chhuah? Ani chuan: “Jehova thuâwih chu ka hlâwkpui tih ka hmuh chuan, ani chu ka hmangaih lehzual a. Tûnah chuan, a ṭanpuina ka mamawh hunah Jehova’n min kaihruai reng ang tih ka chiang a ni,” tiin a sawi. Hannah-i chuan mahni intihnat duhna chu a hneh thei ta a. Jehova hnênah inpumpêkin baptisma a chang ta a ni.

11. Ṭhian ṭhate siam tûrin Vanessa-i’n eng nge a tih a, chu mi aṭangin eng nge kan zir theih?

¹¹ Fing takin ṭhian thlang rawh. Kan sawi tâk, Vanessa-i chuan Jehova rawng a bâwlna chu a ṭhiannuin a dâl tih a hre chhuak a. Chuvângin, an inṭhianna chu a titâwp a. Mahse, Vanessa-i chuan chu aia tam a ti a ni. Kohhran chhûngah ṭhian tharte siam a tum a. Nova leh a chhûngte entawn tûr siam chuan a ṭanpui tih a sawi. “Anni chu Jehova hmangaih lotute hual vêlin awm mah se, an chhûngkuain inlaichînna ṭha tak an nei a ni,” tiin a sawi. Baptisma a chan hnu chuan pioneer a thawk a. Ani chuan: “Chu chuan ka kohhrana unaute chauh ni lovin, kohhran danga unaute pawh ṭhian ṭhaa siam tûrin min ṭanpui a ni,” tiin a sawi. Nang pawh, Jehova’n ti tûra min pêk hnaa theih tâwp chhuaha i tel chuan ṭhian ṭhate i siam thei a ni.—Mt. 24:14.

12. Eng ang hlauhna nge Adama leh Evi’n an tlâkchham a, eng nge a rah chhuah?

¹² Hlauhna chungchângah thlîr dân dik nei rawh. Hlauhna ṭhenkhat neih chu kan tân a ṭha a. Entîr nân, Jehova tihlâwm loh chu kan hlau tûr a ni. (Sâm 111:10) Adama leh Evi’n chutiang hlauhna chu nei ta se chuan, Jehova lakah an hel lo ngei ang. Mahse, an hel a. An hel hnu chuan, mi sual an ni tih inhriatna neiin an mit a lo vâr ta a ni. An fate hnênah sual leh thihna chauh an hlân chhâwng thei a. Pathian dân  an zâwm lo tih an inhriat avângin, saruaka an awm chu an zak a, an inkhuh ta a ni.—Gen. 3:7, 21.

13-14. (a) Petera thawnkhat 3:21 nêna inmilin, engvângin nge thihna chu sakei hlauhva kan hlauh loh vang? (b) Jehova hmangaih chhan tûr eng nge kan neih?

¹³ Jehova hlauhna kan neih a ṭûl laiin, thihna chu sakei hlauhva kan hlauh erawh a ngai lo. Jehova chuan chatuana nun theihna kawng min siamsak a. Thil sual kan tih a, kan inchhîr tak zet chuan Jehova’n kan sualte min ngaidam ang. A Fapa tlanna inthawinaa rinna kan lantîr avângin min ngaidam ang. Rinna kan lantîr theih dân ber chu Pathian hnêna inpumpêk a, baptisma chan hi a ni.—1 Petera 3:21 chhiar rawh.

¹⁴ Jehova hmangaih chhan tûr tam tak kan nei a. Ani chuan nî tina kan hlimpui theih thil ṭhate min pe mai ni lovin, a chungchânga thu dik leh a thiltumte pawh min zirtîr a ni. (Joh. 8:31, 32) Min kaihruai tûr leh min ṭanpui tûrin Kristian kohhran min pe bawk. Kan harsatnate chhel taka tuar chhuak thei tûrin min ṭanpui a, nakina dinhmun ṭha famkima chatuan nun beiseina pawh min pe a ni. (Sâm 68:19; Thup. 21:3, 4) Jehova’n min hmangaihzia lantîr nâna thil tam tak a tihte ngun taka kan ngaihtuah chuan amah hmangaih tûra chêttîrin kan awm ang a. Jehova kan hmangaih chuan hlauhna chungchângah thlîr dân dik tak kan nei ang. Kan hmangaih tak chu tihnat kan hlau vang.

15. Engtin nge Makayla-i chuan thil sual tih hlauhna chu a hneh?

¹⁵ Kan sawi tâk Makayla-i chuan Jehova ngaihdam theihna a hriatthiam chuan thil sual tih hlauhna a nei tawh lo va. “Kan za hian ṭha famkim lo kan niin, thil kan tisual thei vek tih ka hria. Jehova chuan min hmangaihin, tlanna ṭanchhanin min ngaidam ang tih pawh ka hre bawk,” tiin a sawi. Jehova a hmangaihna chuan inpumpêk a, baptisma chang tûrin a chêttîr a ni.

16. Engin nge Miles-a chu dodâl a hlauhna hneh tûra ṭanpui?

¹⁶ Baptisma chang tûra a thu tlûkna siam chungchânga a nu dodâl hlautu Miles-a chuan bial kantu hnênah ṭanpuina a zawng a. Miles-a chuan: “Bial kantu pawh sakhaw thuhmun lo chhûngkuaa seilian a ni a. Baptisma chan chu ka pa min nawr luih vâng ni lovin, ka thu tlûkna siam a ni tia ka nu hriatthiam theih tûr zâwnga sawi tûrin min ṭanpui a ni,” tiin a sawi. A thu tlûkna siam chu a nuin a lâwm lo va. A tâwpah, in aṭanga a chhuah a ngai ta a; mahse, a thu tlûknaah a ding nghet tlat a ni. “Jehova’n ka tâna thil ṭha min tihsakte hriatna chuan ka thinlung a khawih tak zet a. Isua tlanna inthawina chungchâng ngun taka ka ngaihtuah hian Jehova’n min hmangaih tak zet tih ka hre chiang a. Chutianga ka ngaihtuahna chuan Jehova hnêna inpumpêk a, baptisma chang tûrin min chêttîr a ni,” tiin a sawi.

17. Eng lantîr theihna hun remchâng nge kan neih ṭheuh?

¹⁷ Eden huana thei rah Evi’n a ei khân, a Pa chu a hnâwl a. Adama’n Evi thu a zawm khân, Jehova’n a tâna thil ṭha a tihsak zawng zawng chungah lâwmna a lantîr lo a ni. Kan za hian Adama leh Evi thu tlûkna siam chu kan ṭâwmpui lohzia lantîr theihna hun remchâng kan nei ṭheuh va. Jehova chuan kan tâna thil dik leh dik lo chungchânga tehkhâwng siam tûrin thuneihna a nei tih baptisma changin kan lantîr a. Chu bâkah, kan Pa chu kan hmangaihin, kan rinchhanzia kan lantîr bawk.

18. Engtin nge Jehova rawngbâwlnaah i hlawhtlin theih?

¹⁸ Baptisma kan chan hnua kan hmachhawn chona chu mahni duh dân ni lova, Jehova tehkhâwng mila nî tina nun hi a ni. Mi maktaduai tam takte chu chutiang chuan an nung a. Pathian Thu, Bible chu hre thiam lehzual tûra hma i lâk zêl chuan an zînga mi i ni ve thei a; i unaute chu kâwm ziah la; tichuan, hmangaihna nei tak i Pa chungchâng i hriatte chu ṭhahnemngai takin puang ang che. (Heb. 10:24, 25) Thu tlûkna i siam hunah, Jehova’n a Thu leh a inawpna pâwl hmanga a pêk thurâwnte chu ngaithla la. (Is. 30:21) Chutiang a nih chuan, i thiltih apiangah i hlawhtling ang.—Thuf. 16:3, 20.

19. Eng nge i hriat reng ngai a, engvângin nge?

¹⁹ Jehova kaihhruaina i hlâwkpui nasat dânte i hriat reng chuan amah i hmangaih lehzual ang a, a tehkhâwngte chu i ngaina lehzual ang. Setana thilpêk engmahin Jehova rawngbâwl lo tûrin a dang thei lo ang che. Tûn aṭanga kum sâng khat a liam huna nung angah han inchan teh. Baptisma chang tûra i thu tlûkna siam chu, thu tlûkna i siam tawh azawnga ṭha ber niin i thlîr lêt ngei ang!