1. ¿Tiʼ tzaj tuʼnju kubʼ t-ximen Adán ex Eva?

¿ALKYETZULO at toklen tuʼn ttzaj tqʼamaʼn alkye bʼaʼn ex alkye nya bʼaʼn? Tej t-xi tloʼn Adán ex Eva twitzju tzeʼ tuʼn tel nikʼbʼaj tiʼj bʼaʼn ex tiʼj nya bʼaʼn, kubʼ kyyekʼin qa mintiʼ ok qeʼ kykʼuʼj tiʼj Jehová ex kyiʼj tkawbʼil. Aʼyex e kubʼ ximente alkye bʼaʼn ex alkye nya bʼaʼn (Gén. 3:22). Noqtzun tuʼnj, ¿tiʼ tzaj tuʼn jlu? Xi kynajsaʼn kyamiwbʼil tukʼil Jehová ex aju ambʼil otoq tzaj qʼoʼn kye tuʼn kyanqʼin te jumajx. Ax ikx, kyaj kyqʼoʼn il ex kamik, moqa kyimen, kyibʼaj kyyajil (Rom. 5:12). O tzaj nim kʼixkʼoj tuʼnju jaw kyjyoʼn.

2, 3. a) ¿Tiʼ bʼant tuʼn xjal te Etiopía tej tpakbʼan Felipe te? b) ¿Tiʼ kʼiwlabʼil in tzaj qkʼamoʼn aj tjaw aʼ qwiʼ? c) ¿Alkyeqe xjel kxel qqʼoʼn tzaqʼwebʼil kyiʼj toj xnaqʼtzbʼil lu?

² Junxitl aju bʼant tuʼn Adán ex Eva, twitzju bʼant tuʼn xjal te Etiopía tej tpakbʼan Felipe te. Ok tqʼoʼn xjal lu toklen aju bʼant tuʼn Jehová ex tuʼn Jesús tiʼj, tuʼntzunju jaw naj aʼ twiʼ (Hech. 8:34-38). Aj t-xi qtziyen tuʼn qajbʼen te Jehová ex aj tjaw aʼ qwiʼ, ik tzeʼn bʼant tuʼn xjal te Etiopía, in kubʼ qyekʼin qa in nok qqʼoʼn toklen aju o bʼant tuʼn Jehová ex tuʼn Jesús qiʼj. Ax ikx, in kubʼ qyekʼin qa in nok qeʼ qkʼuʼj tiʼj Jehová ex qa oʼkx te at toklen tuʼn ttzaj tqʼamaʼn alkye bʼaʼn ex alkye nya bʼaʼn.

³ Ximana kyiʼj kʼiwlabʼil in tzaj qkʼamoʼn aj qajbʼen te Jehová. Qʼuqli qkʼuʼj tiʼj qa jaku tzaj tqʼoʼn qe tkyaqilju xi tnajsaʼn Adán ex Eva, ik tzeʼn tuʼn qanqʼin te jumajx. Tuʼn qʼuqbʼil qkʼuʼj tiʼj Jesucristo, in kubʼ tnajsaʼn Jehová  qil ex in ten jun tbʼanel qnabʼil twitz (Mat. 20:28; Hech. 10:43). Ax ikx, atoʼ kyxol qe tmajen in che ajbʼen te, aʼyeju kʼiwlaʼn tuʼn ex in che ayon tiʼj jun tbʼanel kyanqʼibʼil toj ambʼil tzul (Juan 10:14-16; Rom. 8:20, 21). Maske in nok qqʼoʼn qwitz kyiʼj kykyaqil kʼiwlabʼil lu, ateʼ junjun o tzʼok kyojtzqiʼn Jehová in jawje kykʼuʼj tuʼn tel kykanoʼn techel kyaj tqʼoʼn xjal te Etiopía. ¿Tiquʼn mintiʼ in jaw aʼ kywiʼ? Ex ¿tzeʼn jaku kubʼ kyiʼj junjun tiʼ kyuʼn?

4, 5. ¿Alkyeqe nya bʼaʼn ok weʼ Avery ex Hannah twitz?

⁴ Mintiʼ in nok qeʼ kykʼuʼj kyiʼj. Testigo de Jehová qe tman jun kuʼxun Avery tbʼi. Ojtzqiʼn kyuʼn txqantl qa jun tbʼanel mambʼaj ex jun tbʼanel ansyan. Maske ikju, kukx kubʼ tyoʼn Avery ambʼil tuʼn tjaw aʼ twiʼ. In tzaj tqʼamaʼn jlu: «Kubʼ nximane qa mlayxtoq chin oke in tzeʼn te nmane». Ax ikx kubʼ t-ximen kuʼxun lu qa mlayx che japun oklenj jaku tzaj qʼoʼn te yajxitl. El tnikʼ tiʼj jlu: «In tzaj xobʼe tuʼn ttzaj qanin weye tuʼn nnaʼne Dios kywitz nim xjal, tuʼn tex nqʼoʼne jun chikʼbʼabʼil ex tuʼn kyex wiʼne erman toj pakbʼabʼil».

⁵ Qʼiʼn 18 abʼqʼi tuʼn Hannah, tej tzmatoq txin mintiʼ ok qeʼ tkʼuʼj tiʼj. Maske jaw chʼiy toj jun ja xjal in najbʼen te Jehová, mintiʼ ok tqʼoʼn toklen ex kubʼ t-ximen qa mlayx che japun tkawbʼil Jehová tuʼn. At maj kubʼ tnaʼn nim nya bʼaʼn ex ok tkʼixbʼisan tibʼ ex tuʼn jlu tzaj mas nya bʼaʼn tiʼj. Tqʼama jlu: «Mintiʼ xi nqʼamaʼne kye txqantl aju bʼant wuʼne, nix kye ntate. Kubʼ nximane qa mlay chinx kʼamoʼne tuʼn Jehová tuʼnju ok nbʼinchaʼne wiʼje».

6. ¿Tiquʼn kwest jaw aʼ twiʼ Vanessa?

⁶ Qe kyamiw. Qʼiʼn 22 abʼqʼi tuʼn Vanessa ex in tzaj tnaʼn jlu: «Attoq jun tbʼanel wamiwe ex otoq tzʼel lajaj abʼqʼi toklen wojtzqiʼne twitz». Noqtzun tuʼnj, nyatoq taj txin lu tuʼn tok tojtzqiʼn aju nimen tuʼn ex mintiʼ onin tiʼj tuʼn tjaw aʼ twiʼ, tuʼntzunju tzaj nim tbʼis Vanessa. In tzaj tchikʼbʼaʼn Vanessa jlu: «Kwesttoq tuʼn kykanet wamiwe ex in tzaj xobʼe tuʼn tnaj wamiwbʼile tukʼilju txin, tuʼnju mlaytoq kanet juntl wamiwe ik tzeʼn te».

7. ¿Tiquʼn tzaj xobʼ Makayla?

⁷ In che tzaj xobʼ tuʼnju jaku kubʼ kybʼinchaʼn jun il. Qʼiʼntoq jweʼ abʼqʼi tuʼn Makayla tej tex lajoʼn terman toj ttnam Jehová. Tej tikʼ ambʼil, ok tqʼoʼn  twitz tiʼj tkyaqilju bʼis tzaj kyiʼj ttat tuʼnju kubʼ tbʼinchaʼn terman. Tqʼama jlu: «In tzaj xobʼe tuʼn nbʼyane, tuʼnju jakulo kubʼ nbʼinchaʼne il, jakutoq chin ex lajoʼne toj ttnam Jehová ex jakutoq tzaj wiʼne nim nya bʼaʼn kyiʼj ntate».

8. ¿Tiʼ tzaj xobʼ Miles tiʼj?

⁸ In che tzaj xobʼ tuʼnju jaku che el ikʼun. Qo xnaqʼtzan tiʼjju bʼaj tiʼj jun qʼa Miles tbʼi. In najbʼen tman ex tkabʼ ttxuʼ te Jehová, atzun ttxuʼ Miles mintiʼ. In tzaj tchikʼbʼaʼn Miles jlu: «In tene 18 abʼqʼi tukʼil ntxuʼye. Mintiʼ ten wipune tuʼn t-xi nqʼamaʼne te qa wajtoqe tuʼn tjaw aʼ nwiʼye. Tzaj nnaʼne tiʼ tmod kubʼ tyekʼin tej tok ntate te testigo de Jehová. In tzaj xobʼe tuʼn tok tbʼinchaʼn nim nya bʼaʼn wiʼje».

9. ¿Tiʼ jaku bʼaj aj tel tnikʼa tiʼj tpasens Jehová ex tiʼj tkʼujlabʼil?

⁹ Tuʼnju mintiʼ ten nim tkʼujlabʼil Adán ex Eva tiʼj Jehová, kubʼ kyximen tuʼn miʼn kyajbʼen te. Maske bʼaj jlu, xi tqʼoʼn Jehová ambʼil kye tuʼn kyanqʼin, tuʼn kyten kykʼwaʼl ex tuʼn kyximen tiʼj tzeʼn tuʼn kyxi kykawin. Tej tikʼ chʼin ambʼil el nikʼbʼaj tiʼj qa mintiʼ ten kynabʼil tuʼnju el kypan kyibʼ tiʼj Jehová. Kubʼ tbʼyoʼn tnejel kykʼwaʼl aju titzʼin ex tej tikʼ ambʼil e ok xjal te bʼiyel ex oʼkx e ximen kyiʼjx (Gén. 4:8; 6:11-13). Noqtzun tuʼnj, otoq kanet juntl tumel tuʼn Jehová tuʼn kyklet tyajil Adán ex Eva, aqeju kyajtoq tuʼn kyajbʼen te (Juan 6:38-40, 57, 58). Tuʼn jlu in nel qnikʼ tiʼj qa at nim tpasens Jehová ex at nim tkʼujlabʼil. Aj tel mas tnikʼa tiʼj, oklo kʼonil tiʼja tuʼn tchʼiy tkʼujlabʼila tiʼj. Nyalo taja tuʼn tkubʼ tbʼinchaʼna aju bʼant tuʼn Adán ex Eva, sino taja tuʼn t-xi ttziyena tuʼn tajbʼena te Jehová.

10. ¿Tiquʼn jaku tzʼonin tiʼja tuʼn tajbʼena te Jehová qa ma ximana tiʼj Salmo 19:7?

¹⁰ Kukx tzʼel tnikʼa tiʼj Jehová. Qa ma tzʼokxix tojtzqiʼna Jehová, mas kʼokel qeʼ tkʼuʼja tiʼj qa jaku tzʼajbʼena te. In tzaj tqʼamaʼn Avery qa nim onin tiʼj tej tjyon  tqanil tiʼj Salmo 19:7 (uʼjinktza) ex tej t-ximen tiʼj. Tej tok tkeʼyin tzeʼn onin qe yol lu tiʼj, chʼiy mas tkʼujlabʼil tiʼj Jehová. Nya oʼkx in chʼiy qʼuqbʼil qkʼuʼj tuʼn kʼujlabʼil lu, sino in nonin qiʼj tuʼn qximen oʼkx tiʼj Jehová ex tiʼjju tajbʼil tuʼn tbʼant quʼn. In tzaj tchikʼbʼaʼn Hannah jlu: «Noq tuʼnju in uʼjine ex in xnaqʼtzane njunalxe tiʼj Tyol Dios, el nnikʼe tiʼj qa aj tok nbʼinchaʼne nya bʼaʼn wiʼje, ax ikx ok nbʼinchaʼne tiʼj Jehová» (1 Ped. 5:7). Ok tilil tuʼn Hannah tuʼn tkubʼ tbʼinchaʼn aju in tzaj tqʼamaʼn Xjan Uʼj (Sant. 1:22). ¿Tiʼ tzaj tuʼn jlu? Ax in tzaj qʼamante: «Tej tel nnikʼe kyiʼj kʼiwlabʼil in che tzaj tuʼnju xi nnimane Jehová, mas chʼiy nkʼujlabʼile tiʼj. Atzun jaʼlo qʼuqli nkʼuʼje tiʼj qa kukx tzul tyekʼin nbʼeye aj t-xi nqanine onbʼil te». Ya mintiʼ in nok tkʼixbʼisan tibʼ Hannah, o txi ttziyen tuʼn tajbʼen te Jehová ex o jaw aʼ twiʼ.

11. a) ¿Tiʼ bʼant tuʼn Vanessa tuʼn kyten tbʼanel tamiw? b) ¿Tiʼ in tzaj t-xnaqʼtzaʼn techel lu qe?

¹¹ Jyoʼnktza qe tbʼanel tamiwa. Tej tel ambʼil el tnikʼ Vanessa tiʼj qa mintiʼ onin aju txin tiʼj tuʼn tajbʼen te Jehová. Tuʼntzunju, ya mintiʼ ok tamiwen tibʼ tukʼil. Nya oʼkx jlu bʼant tuʼn, ax ikx ok tilil tuʼn tuʼn kykanet tamiw toj kʼloj okslal. In tzaj tqʼamaʼn Vanessa qa onin techel kyaj tqʼoʼn Noé kyukʼil toj tja tiʼj: «E anqʼin kyxol xjal mintiʼ e ajbʼen te Jehová, noqtzun tuʼnj, tzalaj Noé tej tten kyukʼil toj tja». Tej otoqxi jaw aʼ twiʼ, ok te precursora. In tzaj tqʼamaʼn jaʼlo: «O tzʼonin jlu wiʼje tuʼn kykanet tbʼanel wamiwe, nya oʼkx jatumel in nok nchmon wibʼe ax ikx kyoj junjuntl kʼloj okslal». Ax ikx teya jaku che kanet tbʼanel tamiwa qa ma tzʼok tilil tuʼna tuʼn tonina tiʼj aqʼuntl o tzaj tqʼoʼn Jehová qe (Mat. 24:14).

12. ¿Tiʼ mintiʼ bʼant tuʼn Adán ex Eva, ex tiʼ tzaj tuʼn jlu?

¹² Qʼonka tilil tuʼn miʼn ttzaj xobʼa ex nimana te Jehová. Nya tkyaqilju in qo tzaj xobʼ tuʼn in nok te nya bʼaʼn. Jun techel, bʼaʼn tuʼn qxobʼ tuʼn miʼn tkubʼ qbʼinchaʼn jun nya bʼaʼn twitz Jehová  (Sal. 111:10). Noqwit xobʼ Adán ex Eva twitz Jehová, mintiʼwtlo el kyikʼen. Tej tbʼant jlu kyuʼn «jaqettzun kynabʼl», toj juntl yol, el kynikʼ tiʼj qa aj il qe. Kyaj kyqʼoʼn il ex kamik kyibʼaj kyyajil. Tuʼnju el kynikʼ tiʼj tzeʼntoq ateʼ, tzaj kychʼixwi tuʼnju mintiʼtoq kyxbʼalun tok ex ok kyqʼoʼn jun tiʼ kyiʼj (Gén. 3:7, 21).

13, 14. a) Ik tzeʼn in tzaj tyekʼin 1 Pedro 3:21, ¿tiquʼn mintiʼ tuʼn qtzaj xobʼ twitz kamik? b) ¿Tiquʼn kʼokel qkʼujlaʼn Jehová?

¹³ Bʼaʼn tuʼn qxobʼ tuʼn miʼn tkubʼ qbʼinchaʼn nya bʼaʼn twitz Jehová, noqtzun tuʼnj, mintiʼ tuʼn qxobʼ twitz kamik. ¿Tiquʼn? Tuʼnju o tzaj tqʼoʼn Jehová jun tumel tuʼn qanqʼin te jumajx. Qa ma kubʼ qbʼinchaʼn jun il ex qa axix tok ma tzʼajtz tiʼj qanmi, kbʼel tnajsaʼn qil tuʼnju in nok qeʼ qkʼuʼj tiʼj chojbʼil bʼant tuʼn Tkʼwaʼl. Jun tten tuʼn tkubʼ qyekʼin qa qʼuqli qkʼuʼj tiʼj, aju tuʼn t-xi qtziyen tuʼn qajbʼen te ex tuʼn tjaw aʼ qwiʼ (kjawil uʼjit 1 Pedro 3:21).

¹⁴ At nim tiquʼn tuʼn tok qkʼujlaʼn Jehová. Nya oʼkx in tzaj tqʼoʼn tbʼanel tiʼchaq qe junjun qʼij, ax ikx in tzaj t-xnaqʼtzaʼn axix tok qe tiʼj ex kyiʼj t-ximbʼetz (Juan 8:31, 32). O tzaj tqʼoʼn kʼloj okslal tuʼn ttzaj tyekʼin qbʼe ex tuʼn tonin qiʼj. In nonin qiʼj tuʼn qex kywitz nya bʼaʼn in che tzaj qiʼj jaʼlo ex in tzaj tqʼuqbʼaʼn qkʼuʼj qa qo anqʼil te jumajx toj Tbʼanel Najbʼil toj ambʼil tzul (Sal. 68:19; Apoc. 21:3, 4). Aj qximen tiʼj tkyaqilju o bʼant tuʼn Jehová tuʼn ttzaj tyekʼin tkʼujlabʼil qiʼj, in chʼiy qkʼujlabʼil tiʼj ex nya qaj tuʼn tkubʼ qbʼinchaʼn jun nya bʼaʼn. Atzun tchiylal lu il tiʼj tuʼn tten qe.

15. ¿Tiquʼn ya mintiʼ tzaj xobʼ Makayla?

¹⁵ Tej tel tnikʼ Makayla tiʼj qa in kubʼ tnajsaʼn Jehová qil aj tkubʼ qbʼinchaʼn jun il, ya mintiʼ xobʼ tuʼn jlu. Tqʼama jlu: «El nnikʼe tiʼj qa qkyaqilx aj il qoʼ ex in qo el txalpaj. Pero ax ikx el nnikʼe tiʼj qa kʼujlaʼn qoʼ tuʼn Jehová ex in kubʼ tnajsaʼn qil noq tuʼn chojbʼil bʼant tuʼn Jesús». Aju kʼujlabʼil lu onin tiʼj tuʼn t-xi ttziyen te Jehová tuʼn tajbʼen te ex tuʼn tjaw aʼ twiʼ.

16. ¿Tiʼ onin tiʼj Miles tuʼn miʼn ttzaj xobʼ twitz ikʼbʼil?

¹⁶ Tej tkubʼ t-ximen Miles qa tzul tqʼoj ttxuʼ aj tjaw aʼ twiʼ, xi tqanin onbʼil te jun ansyan in bʼet kyojele Ja te Chmabʼil. Tqʼama jlu: «Otoq jaw chʼiysaʼn ermano ik tzeʼn weye, tuʼnju nya testigo de Jehová ttxuʼ. Onin ermano wiʼje tuʼn tkubʼ nximane tiʼ tuʼn t-xi nqʼamaʼne te ntxuʼye ex tuʼn tel tnikʼ tiʼj qa aʼyine otoq chin kubʼ ximente tuʼn tjaw aʼ nwiʼye ex nya tuʼnju otoq chin ok obligarine tuʼn ntate». Mintiʼ kubʼ tyekʼin ttxuʼ Miles tbʼanel tmod tukʼil. Yajxitl, ikʼ oq Miles tja tuʼn tjapun twi t-ximbʼetz tuʼn tjaw aʼ twiʼ. Ex tqʼamatl jlu: «Tzaj qʼuqbʼaʼn nkʼuʼje tej tel nnikʼe tiʼjju o bʼant tuʼn Jehová wiʼje. Tej nximane tiʼj chojbʼil bʼant tuʼn Jesús,  el nnikʼe tiʼj jniʼ kʼujlaʼn qine tuʼn Jehová. Atzun jlu onin wiʼje tuʼn t-xi ntziyene te Jehová tuʼn wajbʼene te ex tuʼn tjaw a nwiʼye».

17. ¿Tiʼ jaku bʼant quʼn qkyaqilx?

¹⁷ Tej t-xi tloʼn Eva aju twitz tzeʼ toj jardín te Edén, mintiʼ nimen te Ttat. Ex tej tbʼant jlu tuʼn Adán, kubʼ tyekʼin qa mintiʼ ok tqʼoʼn toklen tkyaqilju bʼant tuʼn Jehová tiʼj. Qkyaqilx jaku kubʼ qyekʼin qa nya bʼaʼn in nela toj qwitz aju jaw tjyoʼn Adán ex Eva. Aj tjaw aʼ qwiʼ, in xi qyekʼin te Jehová qa a at toklen tuʼn ttzaj tqʼamaʼn alkye bʼaʼn ex alkye nya bʼaʼn. Ax ikx in xi qyekʼin qa kʼujlaʼn quʼn ex qa qʼuqli qkʼuʼj tiʼj.

18. ¿Tiʼ il tiʼj tuʼn tbʼant tuʼna tuʼntzun ttzalaja toj tajbʼebʼila te Jehová?

¹⁸ Otoqxi jaw aʼ qwiʼ, il tiʼj tuʼn kukx kyjapun tkawbʼil Jehová quʼn junjun qʼij ex nya aju qe qajbʼil. Kwest tuʼn tbʼant jlu, noqtzun tuʼnj, tkyaqil abʼqʼi in che japun tkawbʼil Jehová kyuʼn nim millón xjal. Ax ikx teya jaku bʼant tuʼna. Tuʼn tbʼant tuʼna, kukx chʼiysama tojtzqibʼila tiʼj Xjan Uʼj, paʼmila ambʼil tuʼn ttena kyukʼil erman ex qʼamanxa kye txqantl tukʼil tzalajbʼil aju o tzʼel tnikʼa tiʼj tiʼj Jehová, aju Qtat at nim tkʼujlabʼil (Heb. 10:24, 25). Ex aj tkubʼ t-ximana tuʼn tbʼant junjun tiʼ tuʼna, bʼinxa qe nabʼil in tzaj tqʼamaʼn Jehová toj Tyol ex tuʼn ttnam (Is. 30:21). Iktzun tten, tbʼanel kʼelel tanqʼibʼila (Prov. 16:3, 20).

19. ¿Tiʼ il tiʼj tuʼn kukx ttzaj tnaʼna ex tiquʼn?

¹⁹ Qa kukx ma tzaj tnaʼna qe kʼiwlabʼil in che tzaj tuʼnju in xi tbʼiʼna Jehová, kchʼiyil mas tkʼujlabʼila tiʼj ex kyiʼj tkawbʼil. Iktzun tten, mlay kyaj tkolina tuʼn tajbʼena te Jehová maske kubʼ tqʼoʼn Satanás nimku nya bʼaʼn twitza. Kyoj qeju mil abʼqʼi, aj ttzaj tnaʼna ambʼil tej tjaw aʼ twiʼya, ok tqʼamaya jlu: «Atzunju mas tbʼanel kubʼ nximane toj wanqʼibʼile».