1. Isiyani Atamu ni Hawa ihalenlyaaya, ni isiyani ikhumelenle nlattu woolya nhokorokho waakhottihiyaaya?

TIPANI woonela winyu, nlamuliya uhimya isiyani ikhanle itthu yomaana awula yoohiloka? Atamu ni Hawa yahohiya ukhuluvela ikano ca Yehova ni yaathanlale upanka ikano caya. Ayo yahothoonyera iyo itthwiiyo ukati waalilyaaya nhokorokho wo mwiri wo ankhili omaana ni oohinamaana. (Upha. 3:22) Masi muupuwele itthu ihalenlyaaya: upatthani ni Yehova ni hataa ukumi woohimala. Nlattu wo iyo, ahaahiyera asaanaaya otheene matampi ni ukhwa. (Aroo. 5:12) Itthu yaathanlilyaaya Atamu ni Hawa iwaanale uhuva paasi.

2-3. a) Isiyani nanteko a apwiyamwene o Etiyopiya yaapankilyaawe ukati waalalyeeriyaawe ni Filipe? b) Citthuni comaana cinaakheleehu napattisiyaka, ni makohoni anhaleehu woopela mwaha?

² Vano moone mananna nanteko a apwiyamwene o Etiyopiya caavirikannyaawe ni Atamu ni Hawa. Ukati waalalyeeriyaawe ni Filipe, uyo ahosukhuru cinene nlattu wo citthu cotheene caapankeliyaawe ni Yehova ni Yesu, mpaka aholakela upattisiya woohipica. (Mite. 8:34-38) Hiiva neevahereraka wa Yehova, toko nanteko a apwiyamwene o Etiyopiya, ninaathoonyera wiira ninansukhuru Yehova ni Yesu nlattu wo citthu cotheene cinipankenlyaaya. Ciicammo ninaathoonyera ukhuluvela wiira Yehova veekhaawe phinlamuliya uhimya isiyani ikhanle itthu yomaana awula yoohinamaana.

³ Muupuwele citthu comaana cinaakheleehu napattisiyaka! Ninaahala waakhela citthu cotheene Atamu ni Hawa cihalenlyaaya, mpaka ciicammo ukumi woohimala. Uhiya commo, nlattu woomwaanini Yesu Kristu, Yehova naanilevelela matampiihu  ni naanivaha nrima wootaphuwa. (Mat. 20:28; Mite. 10:43) Ciicammo ninaapanka mphantte ikhurupu yaamuci a Yehova ni ninaakhalana niweherero nomaana noohoolo. (Joau 10:14-16; Aroo. 8:20, 21) Hataa coonannyaaka nnyo iparakhannyo, ahaavo atthu anoncuwela Yehova anoova upanka ile yaapankalyaawe nanteko a apwiyamwene o Etiyopiya. Isiyani inaarikihela upattisiya ayo atthwaayo? Anhala umaliha cani woova waya? Ninaahala ucuwela nhina ula mwahoola.

4-5. Marikarikoni Avery ni Hannah yaarinaaya?

⁴ Woova uhikhitiri. Muupuwele yankhumelenle mmirawo mmoca neehaniya Avery. Athumwaane ni anumwaane Masaahiti a Yehova, ni athumwaane ancuweliya ukhala nnyari oofenta ni humu owanlokoni omaana. Hataa ukhalaka commo, Avery aanawoova upattisiya. Nlattuni? Uyo neera: “Mi koopuwela wiira akaahala ukhitiri ukhala ntthu omaana toko apaapa.” Avery ciicammo aanawoova uhihala ukhitiri uvara miteko cowanlokoni caahalaawe uvahiya. “Kaakhala ni masukhuli koopuwelaka wiira kaanaahala ulepeliya ulompa waatthuni, utaphulela myaha awula uhoolela ikhurupu yowuulalyeerani.”

⁵ Hannah, mwanthiyana o myaakha 20, ahotepa woova uhikhitiri. Athumwaane ni anumwaane Masaahiti a Yehova. Masi Hannah ooniha wiira khaahala ukhitiri unswalela Nluku. Nlattuni? Uyo kheecoona ukhalana ifayita. Imaara cikina, khaakhalaka ratta mpaka aanawiirakalihaka imweeni. Masi apankaka commo, aanawiitepiha paahi. Uyo neera: “Khaavo ntthu anhimyeraaka itthu yaapankesaaka, nanka apaapa ni amaama. Koopuwela wiira Yehova khaahala ukitthuna wiira kinswalele nlattu wo itthu yaapankaaka.”

6. Isiyani yanrikihela Vanessa upattisiya?

⁶ Apatthani. Vanessa, o myaakha 20, neera: “Mi kahaana mpwanaaka ankhuluvelaaka, ni cahovira myaakha cookhalaka 10 kanthukanaka.” Masi mpatthannyaawe Vanessa khansoveriha upattisiya. Vanessa aanaacuwela wiira apheela upattisiya, ahaana uhiya unthukana mpatthannyaawe. Vanessa neera: “Mi unaakirikela waaphwanya atthu opheela waathukana. Phimaana, kaanawoova uhiya unthukana mpwanaaka ni uhimphwanya ntthu nkina oopheela unthukana.”

7. Isiyani yoovaawe Makayla, ni nlattuni?

⁷ Woova uvara matampi moolupale. Mwanthiyana mmoca neehaniya Makayla aarina myaakha 5 ukati nyeenyaawe waakumihiyaawe wanlokoni. Makayla oonuwile awoonaka asitthumwaane yacukulacaka nlattu wookumihiya nyeenyaawe wanlokoni.  Makayla neera: “Mi kaanawoova upattisiya kontha kaapankale itthu yoohiloka, kaanaahala ukumihiya wanlokoni ni utepa waahiya ni masukhuli amaama ni apaapa.”

8. Isiyani yoovaawe Miles?

⁸ Woova ulupatthiya. Athumwaane ni anumwaane oohinnyara Miles Masaahiti a Yehova, masi anumwaane onnyara khanakhala Saahiti a Yehova. Uyo naahimya: “Cahovira myaakha 18 kikhalaka ni amaama ookiyara. Mi kaanawoova waahimyera wiira kimpheela upattisiya. Kahoona inanna caaviruwalyaaya ukati apaapa waakhanlyaaya Saahiti a Yehova. Phimaana, kaanaawoova uhala ukiviruwela.”

9. Isiyani inhala ukhumelela mweetthucaka nifento ni uvilela wa Yehova?

⁹ Atamu ni Hawa khayanfenta Yehova. Phimaana, khayaathanlale unswalela Yehova. Unookhalaru commo, Yehova ahaahiya akumi wiira yaayare asaana ni ahaahiya wiira athanle mananna caahalaaya woonuwiha ayo asaanaayo. Masi woohipica, wahoonannya wiira ukhotta uhooleliya ni Yehova, unaawaana masakha. Mwaana omuulupale a Atamu ni Hawa ahomwiiva mwanhimaawe; ciicammo ikhirini ni uhitthunanaciya wahenciva ntuninyani. (Upha. 4:8; 6:11-13) Masi Yehova ahopuwela mananna oowoopola asaana otheene a Atamu ni Hawa yaahala upheela unswalela. (Joau 6:38-40, 57, 58) Unawoonannya wiira Yehova khanle Nluku oofenta ni oovilela. Ni nyuuva mweetthucaka nifento ni uvilela wa Yehova, nnaahala utepa unfenta. Iyo inaahala wuusovenrihani uhaatakiha Atamu ni Hawa, masi uvaherera ukumiinyu wa Yehova.

10. Isaalimu 19:7 inookaviherani cani wiivaherera wa Yehova?

¹⁰ Nhihiye wiitthuca myaha ca Yehova. Mweetthucaka myaha ca Yehova, nnaahala utepa ukhuluvela wiira nnaahala ukhitiri unswalela. Avery, romoliye wuupaceroni, neera: “Usoma ni wuupuwela Isaalimu 19:7, phi itthu yaakikavihenre ukhuluvela wiira kaanaahala ukhitiri.” (Nsome.) Woonalyaawe wiira Yehova naapanka itthu inkhuluvelihaawe nhina iyo isaalimwiiyo, Avery ahotepa unfenta Nluku cinene. Masi, nifento  uhiya paasi unikavihera umaliha woova, ciicammo ninaanikavihera umuupuwela cinene Yehova ni wuupuwela citthu cinwehereraawe wiira nipanke. Iyo ciicammo phi itthu yeetthucalyaawe Hannah, romoliye wuupaceroni. Uyo neera: “Usoma Ibiiblya ni uhihiya wiisomiha, wahokikavihera ucuwela wiira ukati weerakalihaaka imweeni, Yehova khaaciveliya. (1 Pet. 5:7) Hannah ahancera ‘weettela nuulumo na Nluku’, awula anaapanka ile yeetthucaawe. (Tiya. 1:22) Aamalenle cani? Uyo neera: “Woonalyaaka wiira kaanaakhala ratta kamwiiwelelaka Yehova, kahancera unfenta cinene. Nna va, kinaakupali wiira Yehova khanhala ukihiya veekha kapheelaka ukaviheriya.” Hannah ahokhitiri uhiya wiirakaliha imweeni. Uyo heevaherera wa Yehova ni hopattisiya.

11. Isiyani Vanessa yaapankalyaawe wiira aaphwanye apatthani omaana, ni isiyani iyo inniitthucihaaya?

¹¹ Mwaathanle ratta apatthaniinyu. Vanessa, romoliye wuupaceroni, ahoona wiira mpatthannyaawe aanancerewiha unswalela Yehova. Phimaana, Vanessa ahohiya unthukana. Ni ahopanka-tho itthu ikhwaawe. Aheekurumica waatotha apatthani akina o wanlokoni. Uyo neera wiira ntakihero naamuci a Nowee nahonkavihera. Vanessa neera: “Amucaawe Nowee yaakhala oorukureeriya naatthu yahanfenta Yehova, masi yaanaapatthanaca.” Vanessa hopattisiya ni hokela uvara nteko weepiyoneeru. Uyo neera: “Iyo itthu yaakikavihenre waapatthanana atthu owanlokoni waka, masi ciicammo o maloko makina.” Iyo pooti ciicammo wuukhumelelani nyuuva. Mweekurumicaka uvara nteko Yehova unirumalyaawe, nnaahala waaphwanya apatthani omaana.—Mat. 24:14.

12. Inannani yo woova Atamu ni Hawa yahoonihenryaaya, ni isiyani yaakhumelenle upanka waya commo?

¹² Moonihere woova wooloka. Ihaavo inanna yo woova innipanka ratta, toko umoova Nluku, awula woova upanka itthu yonrusa. (Isaa. 111:10) Waari wiira Atamu ni Hawa yaanawoonihera iyo inanna yowooveeyo, khayaahala unrukunuwela Yehova. Masi ayo yahonrukunuwela. Upanka waya commo, meethwaaya yahotthukuwa — ayo yahoona wiira yahokhala anamatampi. Itampi ni ukhwa phi citthu paasi caahalaaya  waahiyera asaanaaya. Ukati woonalyaaya wiira yahottheka, Atamu ni Hawa yahoona ihaaya nlattu wookhala matamata ni yaheekhunela.—Upha. 3:7, 21.

13-14. a) Toko cinhimyaaya 1 Peturu 3:21, nlattuni uhinlamuliyeehu utepa woova ukhwa? b) Citthuni cinthoonyera wiira nihaana ninfentaka Yehova?

¹³ Khweeliini, umoova Yehova unaareera. Masi khaninlamuliya utepa woova ukhwa nlattu woottarusiya. Yehova mpheela univaha ukumi woohimala, phimaana nivahalyaawe moopoli. Navaraka matampi, nittharuwaka weekhweeli ni nooniheraka waamini woopoliya wihu, Yehova naahala unilevelela. Masi ninhala uthoonyera cani waamini? Inanna imoca yo woonihera waamini, ikhanle uvaherera ukumiihu wa Nluku ni upattisiya.—Nsome 1 Peturu 3:21.

¹⁴ Khacimala citthu cinthoonyera wiira nihaana ninfentaka Yehova. Yehova naanivaha citthu comaana khula nihuku, ciicammo naaniitthuciha wiira nincuwele uyova tipani ni isiyani impheelaawe upanka. (Joau 8:31, 32) Yehova ciicammo honivaha nloko no makristau wiira aneettihere ni anikavihere. Uyo naanikavihera uvilela masankiho arineehu ilelo ni naanikhuluveliha wiira ninaahala uphwanya ukumi woohimala uhoolo. (Isaa. 68:19; Apoka. 21:3, 4) Noopuwelaka citthu cotheene Yehova cipankalyaawe cinthoonyera wiira naanifenta, hiiva ciicammo ninaahala unfenta. Nno nifentonno ninaanikavihera woonihera woova wooloka: woova upanka itthu yonrusa Nluku nonfenteehu venci.

15. Isiyani yankavihenre Makayla uhiya woova upanka itampi yuulupale?

¹⁵ Makayla, romoliye wuupaceroni, ahokhitiri uhiya woova upanka itampi yuulupale. Itthu yankavihenre yaari wuupuwela mananna Yehova cinlevelelaawe. Uyo neera: “Mi kihoona wiira otheene cihu naatthu oopahuwa ni ninaatthekaka. Masi kihoona wiira Yehova naanifenta ni naavarela nteko woopoliya wihu wiira anilevelele.” Nifento na Yehova nahonvaha ikuru Makayla wiira eevaherere wa Yehova ni apattisiye.

16. Isiyani yankavihenre Miles umaliha woova waarinaawe?

¹⁶ Miles, mmirawo oova upattisiya nlattu waanumwaane, ahorwaa unlepela nruku mootoli osirikwiitu. Mootoli osirikwiitu ciicammo athumwaane paasi phaari Saahiti a Yehova. Miles neera: “Mootoli osirikwiitu ahokikavihera wuupuwela itthu yaahalaaka waahimyera amaama. Kahaana urwaa waahimyera wiira thi mi kaapheela upattisiya, kahi nlattu wookhanyererihiya ni apaapa.” Anumwaane yahorusiya. Wahoolo waya, Miles ahothama wapuwani waya, ni khaaturuwenle uttuli. Miles neera: “Akireere wiitthuca wiira Yehova hokipankela citthu cinci comaana, ni iyo yahokivara nrima. Ukati weemenlyaaka wiira kuupuwele woopoliya ni Yesu, kahoona mananna Yehova cinkifentaawe. Phimaana ulakenlyaaka wiivaherera wa Yehova ni upattisiya.”

17. Otheene cihu nihaana ukati woopanka isiyani?

¹⁷ Ukati Hawa waalilyaawe nhokorokho wonlava no Eeteni, ahoweesa ittuli aPaapaawe. Atamu uthanla wawe ukhala mphantte wa Hawa, ahothoonyera uhisukhuru citthu comaana cotheene caapankeliyaawe ni Yehova. Masi otheene cihu nihaana ukati woothoonyera wiira khaniri toko Atamu ni Hawa. Manannani? Napattisiyaka. Napattisiyaka ninaathoonyera ukupali wiira Yehova phinlamuliya unihimyera isiyani ikhanle itthu yooreera awula yoonanara. Upattisiya mananna oothoonyera wiira ninawaafenta ni ninawaakhuluvela aPaapeehu, Yehova.

18. Isiyani inhala wuukaviherani unswalela Yehova saana?

¹⁸ Napattisiyaka, khaninlamuliya utthara meettelweehu, masi nihaana neekurumicaka utthara ikano ca Yehova khula nihuku. Upanka iyo pooti unirikela, masi atthu enci ntuninyani anaakhitiri. Nyuuva ciicammo nnaahala ukhitiri! Wiira nkhitiri, nhihiye usoma cinene Ibiiblya ni urwaa umikutthaanoni uthukumana ni asuulupeleenyu ni asirokorinyu makristau. Ciicammo, mwaahimyere akhwiinyu myaha cotheene ciitthucaleenyu ca aPaapeenyu, Yehova. (Mabere. 10:24, 25) Mwapheelaka ulakela upanka itthu, mwiiwelele ikano ca Yehova cinnivahaawe avarelaka nteko Ibiiblya ni mphwinkwaawe. (Isai. 30:21) Ala manannaala, citthu cotheene cinhaleenyu upanka cinaahala uweettelani saana.—Miru. 16:3, 20.

19. Isiyani inlamuliyeehu uhiliyala, ni nlattuni?

¹⁹ Nhiliyale wiira mwattharaka ikano ca Yehova, thi nyuuva nnohala ukaviheriya. Wuupuwela iyo, unaahala wuukaviherani utepa unfenta Yehova ni utepa wuucivelani ikano cawe. Vano, khiivo itthu yoohala upanka Sotwani inhala ukhitiri wuuhapusihani untthara Yehova. Nnyuupuwele nkhalaka ukhuma nenna va mpaka myaakha 1000. Nyuuva nnaahala uweha uttuli ni ukupali wiira upattisiya phi itthu yuulupale ithanlaleenyu upanka muukumini winyu!