1. Adammi tsî Evas tsîra tae-e ge ǂoaǃnâ tsî ǀamǂoasa ge tae-i?

HAM-E tae-i a tsû tsî tae-i ǃgâis ǁgaraga nî ǂnûiǂgā ti du ra ǂâi? Adammi tsî Evas tsîra ge hais ǃgâib tsî ǂkhabab tsîkha ǂans disa xu a ǂû o, o ra ge ǃgāsase ge mî: ǁÎra ge Jehovab tsî ǁîb ǁgaragu tsîn ǃnâ ǂgomǃgâ tama hâ ti. ǁÎra ge ǁgaraga aitsama ge ǂnûiǂgābasen tae-i a tsû tsî ǃgâis diga. (Gen. 3:22) Xawe kō re tae-e ra ge ǂoaǃnâsa. ǁÎra ge ǁîra ǀhōsagusisa Jehovab ǀkha ge ǂoaǃnâ. ǁÎra ge ǃâubasens ǀamose ûis dis tsîna ge ǂoaǃnâ tsî ǁoreb tsî ǁōb tsîna ǁîra ǀgôana ge mā. (Rom. 5:12) Adammi tsî Evas tsîra di mîǁguigu ge ǃgomsiba ge ǃaroma.

2-3. (a) Etiopiaǁî khoeba mati ge tanisen Filipub ge aoǁnâbabi o? (b) Mâ ǀkhaega du ra hō ǁāǁnâhe du ga o tsî mâ dîde da nî ǃhoaǃgao?

² Adammi tsî Evas tsîra ge tanisen ǀgaub tsî ǁuiǃkhōmâi-aob tsîn ǁaegu hâ ǃkharagagusiba ǃoa kō re. Nē Etiopiaǁî khoeb ge Jehovab tsî Jesub tsîkha ge dība bi xūna gere ǃgôaǃgâ tsî gere ǁāǁnâ kaisen. (ǃNaeǃkhaidi 8:34-38) Eloba ǃoa du ga mâǁnâsen tsî nē Etiopiaǁî khoeb khami ǁāǁnâ kaisen o, o du ge ǃgāsa haisi-amsa ra mā. O du ge ra mî Jehovab tsî Jesub tsîkha ge dība du xūna du ra ǃgôaǃgâ di. Tsî du ge ra ǁgau Jehovaba du ra ǂgomǃgâsa tsîb ǁîba tae-i a ǂhanu tsî tsūs ǁgaraga nî māsa.

³ Jehovaba du ga ǃoaba o du ra hō ǀkhaegu xa ǂâi re. ǀGui xū-e mîsa Adammi tsî Evas tsîra ge ǂoaǃnâ xūna du ge nî hō-oa ǀamo ûib tsîna ǃkhōǂgā hâse. Sadu  ǂgoms hîna du Jesub ǃnâ ūhâs ǃnâ-ūb ge Jehovaba sadu ǁorena ǀûba tsî ǃgâiǂâisa ra mā du. (Mat. 20:28; ǃNaeǃkhaidi 10:43) Tsî du ge ra Jehovab di omaris khoen di ǃâ kai hîna ǃgâi hānîǁaeba mîmâibahe hâna. (Johaneb 10:14-16; Rom. 8:20, 21) Nē ǃgāsa ǀkhaegan ra mû hînan ge ǂgui khoena Etiopiaǁî khoeb aiǁgausa saosa ra ǃao. Tae-e a ǁkhae du ǁkhā ǁāǁnâ kaisensa? Tsî nē ǃgomsina du mati ǀamsa a hōba ǁkhā?

4-5. Mâ ǃgomsina ra ge ǂkhamkhoeb hîna Avery di ǀon hâb tsî ǂkhamkhoes Hannas di ǀon hâs tsîra gere hōǃâ?

⁴ Aitsama ǃgôaǁnâsens. Averib ǁgûra ge a ǀHûǀguitimî-aon di ǀgui. ǁÎb ǁgûb ge ǃgâi aiǁgausa ūhâ ǃgâi ǁgûb tsî ǀhaohâb ǃûi-aob ase. Xaweb ge Averiba ǁāǁnâ kaisen ǂgao tama hâ. Tae-i ǃaroma? ǁÎb ge ge mî “ǁîb ǁgûb di ǃgâi aiǁgausab a sao ǁoa ti” Averib ge ge ǂgomǃgâsen tama hâ i tsî ge mî ǃereamdi hînab nî hōdeb a ǀū tani hōb nîsa. “Tita ge gere ǃao ǀhaohâba ǀgorebasa tsî ǃhoade ǀhaodi tawa māsa tamas ka io aoǁnâ sîsenni di ǀhaosa ǂgaeǂguisa.”

⁵ Hannas hîna a 18 kurixas ge kai ǃgomsiba ǂgomǃgâsens ǀkha ge ūhâ i. ǁÎs ge Jehovaba ra ǃoaba ǁgûra xa ge kaikaihe. Xawes ge ge ǂgom tama hâ i Jehovab ǁgaragu ǃoagus nî ûisa. Tae-i ǃaroma? Hannas ge ge ǂgomǃgâsen tama hâ i. ǀNî ǁaegu ais ge aitsama gere tsûtsûsen tsî nēs ge xūn ǀguina gere ǃgomǃgom. “Tita ge nē xūn hîna ta gere dīna khoe-e ge mîba tama hâ i ti ǁgûra tsîn ose” dis ge ra mî “tsî ta ge gere ǂâi Jehovab ǂgao te tide di nē xūn hîna ta gere dīn ǃaroma.”

6. Tae-e Vanessasa ǁāǁnâhesa xu gere ǃkhō-oa?

⁶ ǁGâiba ǀhōsana xu. Vanessas hîna a 22 kurixas ge ra mî, “kaise ǃgâi ǀhōsasa ta ge ǂgui kurina ge ūhâ i.” Xawe Vanessas ǀhōsas ge ǁîsa ǁîs di mîǁguib ǁāǁnâhes dib ǀkha ge ǂkhâǃnâ tama hâ i. Nēs ge Vanessasa ge ǂkhîoǃnâ kai tsîs ge ra mî: “Kaise i ge ge ǃgomba te i ǀhōsana kurusa tsî ta ge gere ǂâi sim ǀhōsagusisa ta ga ǀam kai o, o ta ǀnî hâ ǀhōsana hō tide di.”

7. Makayla di ǀon hâ ǂkhamkhoesa tae-i ǃaoba ge ūhâ i tsî tae-i ǃaroma?

⁷ Tsū xū-e dīs ǃaob. Makaylas ge ge koro kurixa i ǁîs kai ǃgâsab ge ǂnûiǂuihe o. Kai khâis gere khamis ge ǁîs ǃgâb di ǂnûiǂuihes ge ǁîs ǁgûra ai ūhâ i sîsenǂuiba gere mû. “Tita ge gere ǃao ǁāǁnâhesa” tis ge Makaylasa ra mî “tsū xū-e dī  tsî ta nî ǂnûiǂui-e ǃkhais ǃgao tsîs nēsa ti ǁgûra noxoba kai tsûaǂgaoba nî hauba amaga.”

8. Milsa tae-e gere ǃao?

⁸ Mâǃoa-es ǃaob. Milsi ǁgûb tsî ǁîb di ôaǃgâǁgûs tsîra ge Jehovaba gere ǃoaba xawe ǁîb ǂhunuma ǁgûs ose. “Ti ǁgûs ǀkha ta ge 18 kurixa ta ges kōse ge hâ” dib ge Milsa ra mî “tsî ta ge kaise gere ǃao mîba sisa ǁāǁnâhe ǂgao ta ra ǃkhaisa. Mû ta ge ge matis ge ti ǁgûsa gere tanisensa ti ǁgûb ge ǁāǁnâhe o. Tsî ta ge gere ǃao ti ǁgûs ǃgomsiba nî mātesa ǁāǁnâhe ta ga o.”

9. Tae-e a ī ǁkhā Jehovab di ǀnammi tsî ǃnūǃnâxasib tsîn xa da ga ǁkhāǁkhāsen o?

⁹ Adammi tsî Evas tsîra ge ge ǁhûi Jehovaba ǃoaba tama isa ǁîra ge ǀgaisa ǀnamma ǁîb ǃoagu omkhâi tama hâ i amaga. Xaweb ge Jehovaba ge mā-am ra gaxuse ûisa tsî ǀgôana hōsa ǁîra ǁgaragu ǃoagu ra nî kaikaina. Adammi tsî Evas tsîra di mîǁguib aitsama ǂgaeǂguisens dib ge kaise ǃhaese ǃgâi tama ǀamǂoasa ge ūhâ i. ǁÎra di ǂguro ǀgôab ge ǁîb di ǂkham ǃgâsaba ge ǃgam tsî i ge ǂhanuoǃnâsib tsî ǁîǂâibasenxasib tsîna khoena ge gaoǂam. (Gen. 4:8; 6:11-13) Nē ǁaeb hoabab ge Jehovaba ǀape-e ge ūhâ i Adammi tsî Evas tsîra ǀgôan ǁîba ra ǃoaba ǂgaona huis diba. (Johaneb 6:38-40, 57, 58) Jehovab di ǀnammi tsî ǃnūǃnâxasib tsîn xa du ga ǁkhāǁkhāsen o, o du ge ǁîba du ūba hâ ǀnamma nî ǀgaiǀgai. Adammi tsî Evas tsîra ge ǃgû daoba da ge ǃgû ǂgao tama hâ xawe sada ûiga Jehovaba ǃoa ra mā ǂgao.

10. Matis Psalmdi 19:7 sa ǂâiǃgâsa nî hui du Jehovaba ǃoabas ǃnâ?

¹⁰ Aiǃgû re Jehovab xa ǁkhāǁkhāsensa. Jehovab xa ǁkhāǁkhāsens ǀkha du ga aiǃgû o, o du ge ǁîba hoaǁae nî ǃoaba ǀgara. Averib hîna da goro ǃhoaǃgaob ge ra mî: “ǂGomǃgâsiba ta ge Psalmdi 19:7 ǃnâ hâ mîde khomais tsî ǂâiǃgâsa xu ge hō.” (Khomai re.) Averib ge mûǂan o matib Jehovaba nē mîde ra dīǀoaǀoasa  ob ge ǁîb ǀnamma Elob ǃoa-ai ge ǀgai. ǀNammi ge ǂgomǃgâsib ǀguiba omkhâi tama hâ xawe ra hui da i da sada ǂâisa Jehovab tsî ǁîb ǂhâba hâ xūn ai ǂnûi. Hannas hîna da goro ǃhoaǃgaos ge ra mî: “Ti Elobmîs ôaǃnâs ǃnâ-ū ta ge ge mûǂan aitsama ta ga tsûtsûsen o, o ta Jehovab tsîna nēs ǃnâ-ū ra tsûtsûsa.” (1Pet. 5:7) Hannas ge ge ‘Elobmîs di dī-ao kai.’ (Jak. 1:22) Mâ sîsenǂuigu ǀkha? ǁÎs ge ra mî: “Jehovaba ǁnâuǀnams mati ra hui te sa ta ge ǂanǂûi o, o ta ge ǀgaisa ǀnamma ge omkhâibabi. Nēsi ta ge ra mûǂan Jehovab hoaǁae ni hui te sa ǁîb huiba ta ga ǂhâba o.” Hannas ge aitsama tsûtsûsens ǃgomsiba ǀamsa ge hōba. ǁÎs ge Jehovab ǃoa-ai māǁnâsen tsî ge ǁāǁnâhe.

11. Vanessasa tae-e ge dī ǃgâi ǀhōsana kurus ǃaroma tsî tae-e da sada nēsa xu a ǁkhāǁkhāsen ǁkhā?

¹¹ ǃGâi ǀhōsana ǁhûi re. Vanessas hîna da goro ǃhoaǃgaos ge ge mûǂan ǁîs ǀhōsas ge ǁîsa gere ǃkhō-oasa ǁāǁnâhes ǃnâ. Os ge nē ǀhōsagusisa ge ǀamǀam. Xawes ge Vanessasa ǃnāsa-e ge dī. ǁÎs ge ǀasa ǀhōsana ǀhaohâb ǃnâ ge kuru tsoatsoa. ǁÎs ge ra mî Noaxi tsî ǁîb omaris tsîn di aiǁgaus ge ǁîsa ge hui ti. “ǁÎn ge Jehovaba ǃoaba tama hâ khoen ǁaegu ge ûi hâ i” tis ge ra mî “xawen ge ǁîn ǁaegu ǃgâi ǀhōsagusisa ge ūhâ i.” ǁĀǁnâhe toas ges khaoǃgâs ge Vanessasa ge aimâba-ao kai. ǁÎs ge nēsi ra mî, “nēs ge ge hui te ǃgâi ǀhōsana ti ǀhaohâb ǃnâs ǀguis ose xawe ǀnî hâ ǃhūgu ǃnâs tsîna kurus ǀkha.” Sadu tsîn ge ǃgâi ǀhōsana a kuru ǁkhā Jehovab ge māda sîsenni ǃnâ ǃâ-e ūhâs ǃnâ-ū.—Mat. 24:14.

12. Adammi tsî Evas tsîra tae ǃnôa ǃaoba ge ūhâ tama hâ i tsî mâ sîsenǂûib ǀkha?

¹² ǀNōsa ǃaoba ūhâ re. ǀNî ǃaob ge a ǃgâi. Aiǁgause da ge Jehovaba tsûtsû ǂgao tama is ǃaoba a ūhâ ǁkhā. (Psa. 111:10) Adammi tsî Evas tsîra ga nē ǃnôa ǃaoba ūhâ o, o ra ge Jehovab ǃoa-ai ga ǁore tama hâ. Xawe ra ge ge ǁore. Nēs khaoǃgâ di ge ǁîra mûde ge ǁkhowa-amhe tsî ra ge ge mûǂan ǁore ra kōsa.  ǁÎra ge ǁōb tsî ǁoreb tsîn ǀguina ǁîra suriba ge mā ǁkhā i. ǁÎra ge ǁîra mâsiba mû tsî gere ǁnâuǃā tsîra ge ge mûǂan ǀōǀkhā ra asa tsî ge ǃgūsen.—Gen. 3:7, 21.

13-14. (a) 1 Petrub 3:21 ǃoagu da tae-i ǃaroma ǃgam ǃaoba ǁōba ūhâba tide? (b) Tae-i ǃaromana da ūhâ Jehovaba ǀnams dina?

¹³ ǀNōsa ǃaoba du Jehovab ǃoa-ai ūhâ xawe du ge ǃgam ǃaoba ǁōb ǃoa-ai omkhâi ǂgao tama hâ. Jehovab ge ǀamo ûiba hō-oas ǀkha nî hui da. Tsūdī tsî da ga ǃhōbasen o, ob ge Jehovaba sada ǁorena nî ǀûba da. ǁÎb ge sada ǂgomǃgâsib hîna da ǁîb ǀgôab di ǁōb ǃnâ ūhâb ǃgao nî ǀûba da. ǀGui ǀgaub hîna da a ǁgau ǁkhāb nēs ǃnâ da ra ǂgomsas ge sada di ûiga Elob ǃoa-ai māsa.—Khomai re 1 Petrub 3:21.

¹⁴ ǂGui ǃaromadi Jehovaba ǀnams dide du ge ūhâ. Hoaraga ǃgâi xūn tsēkorebe da ra ǀaman ǀguinab ge mā da tama hâ xaweb ge ǁîb tsî ǁîb ǂâis di amab tsîn xas tsîna ra ǁkhāǁkhā da. (Johaneb 8:31, 32) ǁÎb ge Xristeǁî ǀhaohâga ge mā da hui da tsî ǂkhâǃnâdas ǃaroma. ǁÎb ge nēsi sada ǃgomsiga ra tani hui da tsî ǀamose ǂkhîb ǃnâ ûis aiǂhanuba ǃgoaxa ǁaeb ǃaroma ge mîmâiba da. (Psa. 68:19; J.ǂHa. 21:3, 4) Jehovab ge ǀnai dība da ǂgui xūn ǁîb ǀnamma ǁgaus ǃaroman xa da ga ǂâiǃgâ o, o da ge ǀnambi tsî ǁîb ǀgūse nî tsâ. Tsî Jehovaba da ga ǀnam o, o da ge ǀnōsa ǃaoba ǁîb ǃoa-ai ra hō. ǁÎb hîna da kaise a ǀnamma tsûtsûsa da ge ra ǃao.

15. Makaylasa mati ǁîs dīsās ǃaoba ǀamsa ge hōba?

¹⁵ Makaylas hîna da goro ǃhoaǃgaos ge ǁîs di ǃaob dīsās diba ǀamsa ge hōba ǁnâuǃās ge o Jehovab a ǀûbaǀnamxa ǃkhaisa. “Tita ge ge mûǂan ǀoasa kurusa ta ūhâ tama hâsa tsî da hoa da ra dīsāsa. Mûǂan ta ge ge Jehovab a ǀnam da sa tsî xoremarib ǃnâ da ūhâ ǂgoms ǃaroma nî ǀûba dasa.” ǁÎs ge Jehovaba a omkhâiba ǀnammi ge ge ǁgarisi is ǁîs ûiba māǁnâ tsî ǁāǁnâhe.

16. Milsa mati ge hui-e ǁîb ǃaoba ǀamsa hōbasa?

¹⁶ Milsi hîna ǁāǁnâheb ga o ǁîb ǁgûs xa mâǃoahesa gere ǃaob ge huiba ǃnarimâra mûǂam-aoba xu ge hō. “ǃNarimâra mûǂam-aob tsîn ge ǃkharagagu ǂgomdi omaris ǃnâ ge kaikhâi” tib ge Milsa ra mî. “ǁÎb ge ge hui te mati ta ti ǁgûsa nî ǁnâuǃā kaisa nēs a ti mîǁguisa ǁāǁnâ kaisens disa tsîb ti ǁgûba nēs ǃnâ ǃâ-e ūhâ tama hâsa.” Milsi ǁgûs ge nēs xa kaise ge ǃgâibahe tama hâ i. ǀAms aib ge ǁîs omsa xu nî ǂoa ge is ge xaweb ge ǁîb mîǁguiba ge ūhâ ǀgara. “Jehovab ge dība te ǃgâi xūn xa ta ra ǁkhāǁkhāsen o, ob ge ti ǂgaoba ra tsâǀkhāhe” tib ge ra mî. “Jesub di ǁōb xa ta ga ǂâiǃgâ o, o  ta ge ra mûǂan matikōseb Jehovaba a ǀnam te sa. Nēs ge ge ǃaroma i ta Jehovab ai māǁnâsen tsî ǁāǁnâhe.”

17. Mâ aiǂhanuba da ūhâ?

¹⁷ Evas ge Edenni ǃnâ hais ti ǂûsa xu a ǂû o, os ge ǁîs ǁgûba ge ǂkhābē. Adammi ge nēs ǃnâb ge ǁhao o, o ǀnamoǃnâ ǁnâuǀnamoǃnâsiba ge ǁgau Jehovab ge dība bi ǃgâi xūn hoan ǃoa-ai. Hoa da ge aiǂhanuba ūhâ ǁgausa Adammi tsî Evas tsîra di mîǁguiba da ūǃoa tama hâsa. ǁĀǁnâ kaisens ǃnâ-ū da ge Jehovaba ra mîba ǁîb aiǂhanuba ūhâsa mîǁguis diba tae-i a tsūs tsî tae-i a ǃgâis tsîna. Tsî da ge sada ǁGûba da a ǀnam tsî ǁîb ǃnâ ra ǂgomǃgâsa ra ǁgau.

18. Mati da Jehovaba ǃoabas ǃnâ nî ǃgâiǃō?

¹⁸ ǃGomsib hîna da ǁāǁnâs khaoǃgâ ra hōǃâb ge tsēkorobe Jehovab ǁgaraga saos diba sada ǁgaragu ose. ǂGui khoen ge nē ûi ǀgauba mâ kurib hoaba ra sao. Sada tsîn ge nē khoen khami a dī ǁkhā sada di ǁnâuǃāba da ga Elobmîs ǃnâ ǀāǀā, ǃgâsan ǀkha hâǀhao tsî sada ǀnamxa ǁGûb xa da ra ǁkhāǁkhāsen xūna nau khoen ǀkha ǀgoragu o. (Heb. 10:24, 25) Mîǁguiga da ga dī o, o da ge Jehovab ǁîb mîs tsî ǀapeǂhomis ǃnâ-ū ra mā daoǁgaude nî sao. (Jes. 30:21) Nēsa da ga dī o, o da ge nî ǃgâiǃō.—ǂKhm. 16:3, 20.

19. Tae-e da hoaǁae ǂâis ǃnâ nî ūhâ tsî tae-i ǃaroma?

¹⁹ Mû da ga o Jehovab daoǁgaude xu da mati nî ǀamasa, o i ge ǁîb tsî ǁîb ǁgaragu tsîna da ūba hâ ǀnamma nî ǀgai. Nēs xa ǃaroma-e hâse î ge ǁGâuab ǃâitsâde tsâǀkhā da tide. ǂÂi re mati da nî īsa duisend kuriga nēsisa xu. Sada mîǁguib ǁāǁnâhes dib ge nî ǃgâi mîǁgui i hîna da ge dība.