1. Vika va Andama na Eva va zimbalesele kaha vika viezilemo?

MU KU MONA cenu iya na pande ku tumbika masiko a via cili na via vipi? Va Andama na Eva mu va lile ku vusuka vua ku muti ua via cili na via vipi, va muesele mutamba uavo: Ka va tsilielele muli Yehova na vitume vieni. Va hanguile ku litumbikila masiko a via cili na via vipi. (Njen. 3:22) Vunoni mua tantekeya vi va zimbalesa ni? Vusamba vuavo na Yehova na vukovelelo vua ku yoya miaka yose, kaha va tambuisa vupi na ku-tsa ku vana vavo. (Loma 5:12) Cihangula ca va Andama na Eva ca va nehelele ku vindama ca kama.

2-3. (a) Vati ua lingile muata ua ku Etiopia mu nima ya ku mu ambuluila kuli Filipu? (b) Vivezikiso vika tue ku tambula mu ve ku tu mbatiza, kaha vihula vika tu ka kumbulula?

² Setekesenu via hanguile Andama na Eva na vize via hanguile uze muata ua ku Etiopia mu nima ya ku mu ambuluila. Uze muata ua viukilile cikuma ku viose via mu lingilile Yehova na Yesu ngeci va mu mbatizile vuasi-vuasi. (Vili. 8:​34-38) Mu tue ku lihana kuli Njambi ngeci mua uze muata ua ku Etiopia, na ku tu mbatiza, tue ku muesa mutamba u tua hangula. Tue ku muesa ngecize tua haka seho ku viuma via tu lingila Yehova na Yesu. Tue ku muesa naua nguetu tua tsiliela Yehova ngecize ikeye na pande ku tumbika masiko a via cili na via vipi.

³ Singaniekenu ha vivezikiso vi tue ku tambula nga tu pangela Yehova! Cikuavo naua, tuli na vukovelelo vua ku ka tambula viose via zimbalesele Andama na Eva hamo na vuana vua ku ka yoya miaka yose. Omo lia lutsilielo luetu muli Yesu Kilistu, Yehova a ka tuecela ku visevuka vietu na ku tu hana mutima ua ku  lela. (Mat 20:28; Vili. 10:43) Tue ku kovela naua mu vusoko vua vangamba va Yehova va lavelela vivezikiso via ku lutue. (Yoa. 10:​14-16; Loma 8:​20, 21) Vutuhu tua lavelela evi vivezikiso via kama ngeci, kasi kuli vamo va tantekeya vuino Yehova vunoni ve ku kuata ku masinde linga va kave lungano lua uze muata ua ku Etiopia. Vika vie ku va tangula ku va mbatiza? Vika vi hasa ku va kuasa ku vula vitanga viaco?

4-5. Vitanga vika va luile navio va Avery na Hannah?

⁴ Liova. Visemi va Avery va pua Vakaleho va Yehova. Va ise va pua vantu va cili, va pua mukuluntu mu cikungulukilo kaha va pua lungano lua cili. Vunoni Avery, ua kele na liova vua ku mu Mbatiza. Omo lia vika? ua handekele ngueni: “Ka nja kele na vusunga nga nji ka pua ngue va tata,” Avery ua lisosomuene naua ngueni halumo ka ka hasa ku puisamo viteli via ka tambula mu cikungulukilo ku lutue. Ngueni: “Nja vuile mu vitsiha keke, ku singanieka ha ku nji lania linga nji vundile mu mbunga, ku hana vimpande, ni ku tuamenena civunga mu ku ambulula.”

⁵ Hannah mua kele na miaka 18 ua vuile liova. Va kolela ku ndzivo ya visemi va pua Vakaleho va Yehova. Vunoni ka kele na vusunga nga a hasa ku yoya mua ya vitume via Yehova. Omo lia vika? Hannah ua kele na ku lisinganiekela via ku pihia. Vintsimbu vimo ua kele na ku livua vungoco kaha ua hetele ha ku livulumuna vavenia. Ivene ngueni, “ka nja lekeleko na umo uahi, vi nja kele na ku linga, cipue visemi vange, kaha nja singaniekele nguange Yehova ka tava nji pue ngamba yeni omo lia vilinga viange.”

6. Vika via lingisile Vanessa ku ivua liova lia ku mu mbatiza?

⁶ Ntsindiye ya vavusamba. Vanessa ua miaka 22 ua handekele ngueni: “Nja kele na umo kavusamba kange u nja tantekeyele mu miaka likumi.” Vunoni ou kavusamba ka Vanessa ka viukilile na vutumbe vuavo vua ku mu mbatiza. Kaha Vanessa ngueni, “Ca nji kaluilile ku kuata vavusamba, ngeci nja lisosomuene nguange nga nji tsiha vusamba vuaco ka nji ka uana ueka.”

7. Liova lika ua kele nalio Makayla kaha omo lia vika?

⁷ Liova lia ku sevuka. Makayla ua kele na miaka itanu mua uile muanaye mu cikungulukilo. Kaha mua kele na ku kola ua limuenenene vitanga via kele na ku neha muanaye ku visemi. Ngeci ua handekele ngueni: “Nja lisosomuene nguange nga nji hangula ku nji mbatiza, halumo nji ka sevuka na kuua mu cikungulukilo. Kaha nji ka vuezelela naua ku visoti vi ve ku pinda navio visemi vange.”

8. Vika via lingisile Miles ku ivua vuoma?

⁸ Liova lia ku tu luisa. Va Ise ya Miles na va naye va ku uanako vose va pua Vakaleho  va Yehova, vunoni va naye va ku mu sema kati Vakaleho. Ua handekele ngueni: “Nja kele hamo na vanana miaka 18 ngeci nja lisosomuene ku va leka nguange nji tonda ku nji mbatize. Muomu nja muene vi va lingile omo vatate va hanguile ku pua Mukaleho. Ngeci ka nja tondele ku likokela vimpande.”

9. Vika vi hasa ku mi solokela omo mu ka tantekeya ngozi ya Yehova na lukakatela?

⁹ Andama na Eva va hanguile ku seza ku pangela Yehova muomu va likelele ku kaniamesa cilemo cavo muli ikeye. Vutuhu ngoco, Yehova ua va tavesele ku yoya imo miaka na ku litumbikila vitume via vati va lela vana vavo. Viezile mu cihangula ca Andama na Eva ca ku tonda kuli imanena, via muesele ha toma vuheve vu va lingile. Ca ku muenako, munavo ua ku livanga ua tsihile ntsongo yeni, kaha mu ku hita ca ntsimbu mavu ose a sulile na luozi na vizindo. (Njen. 4:8; 6:​11-13) Vutuhu ngoco, Yehova ua uanene njila ya ku ovuelamo vana va Andama na Eva va tonda ku mu pangela. (Yoa. 6:​38-40, 57, 58) Omo mu lilongesa vati Yehova ua muesele cilemo na lukakatela lueni, cilemo cenu kuli ikeye ci ka livuezelela. Mu ka viana lungano lua ku pihia lua va Andama na Eva na ku hangula ku lihana kuli Yehova.

10. Vati ku hilula ha visamo 19:7 ci hasa ku mi kuasa ku pangela Yehova?

¹⁰ Tualelenuho ku lilongesa via Yehova. Omo mu tualelelaho ku lilongesa via Yehova, cizango cenu ca ku tonda ku mu pangela ci ka livuezelela. Avery, u tua tumbula ku vuputukilo ngueni: “Mezi a nja tandele ku Visamo 19:7. (Tandenu.) a nji kaniamesele na ku nji simpisa.” Omo Avery ua muene vati Yehova ua kele na ku puisamo via likuminia, cilemo ceni kuli Njambi ca kolele. Ku lema Njambi ka ce ku vuezelela lika ku mu tsiliela vunoni ce ku tu kuasa ku tuala mana kuli Yehova na viuma via tonda. Hannah, u tua tumbula ha katete ngueni: “Ku hitila mu cilongesa ca Mbimbiliya mu vulika nja lilongesele ngecize mu nje ku livulumuna nje ku vuisa Yehova ku vavala ha mutima.” (1 Pet. 5:7) Hannah ua puile honi ‘mukua ku linga lizi’ (Tia. 1:22) Vika viezilemo? Ua handekele ngueni: “Mu nja muene ku vezika ce ku iza mu ku ononoka Yehova, nja putukile ku mu  lema. Njili honi na vusunga ngecize a ka tualelelaho ku nji tuamena nga nji tonda vukuasi.” Hannah ua hasele ku likela ku livulumuna ivene. Ua lihanene kuli Yehova va mu Mbatize.

11. Vika ua lingile Vanessa linga va kuate vavusamba va cili, kaha vika tu hasa ku lilongesako?

¹¹ Hangulenu vavusamba na mana. Vanessa, u tua tumbula laza, neni ua nonguenene ngecize kavusamba keni ua kele na ku mu tangula ku pangela Yehova. Ngeci ua tsihile vusamba vuaco. Vunoni Vanessa ua lingile naua vikuavo. Ua lihakele kapandi ka ku tonda vavusamba veka mu cikungulukilo. Ua handekele ngueni, lungano lua Noa na vusoko vueni lua mu kuasele. Ngueni: “Vutuhu va tungile ha kati ka vantu ka va lemene Yehova, vunoni va puile vavusamba va cili ku umo na mukuavo.” Vanessa mu nima ya ku mu Mbatiza ua puile pioneiro. Ua handekele ngueni: “Ku lingamo ca nji kuasele ku kala na vavusamba va vaha kati mu cikungulukilo cetu lika, vunoni na vikuavo.” Nenu mu hasa ku kala na vavusamba va cili mu ku panga na ndzili yenu yose, mu cipanga ca mi hana Yehova.​—Mat. 24:14.

12. Liova lia cifua cika va Andama na Eva ka va kele nalio, kaha vika via va solokelele?

¹² Kalenu na liova lia cili. Kua kala limo liova lia cili. Ca ku muenako tua pande ku kala na limo liova lia ku viana ku luvalesa Yehova (Visa. 111:10) Va Andama na Eva ka va kele na liova liaco ngeci va alulukilile Yehova, na ku mu seza. Mu nima ya ku lingamo meso avo emukile kaha va limuenene mpundu ngecize vakua vupi. Ve ku hasele lika ku tambuisa vana vavo vupi na ku-tsa. Mu ku linga va hasele ku mona ni ku ivuisisa cifua cavo, va vuile ntsoni ya vuntselentsele vuavo ngeci va lifuikile.​—Njen. 3:​7, 21.

13-14. (a) Kuliya na 1 Petulu 3:​21, omo lia vika ka tua pandele ku hianesamo ku kala na liova lia ku-tsa? (b) Vusunga vuka tuli navuo vua pande ku tu lingisa ku lema Yehova?

¹³ Vutuhu tua pande ku vuila Yehova liova lize lia mu pande, vunoni ka tua pandele ku hianesamo ku ivua liova lia ku-tsa. Muomu Yehova ua sungamesa viose linga tu ka tambule muono ua yaye. Nga tu vulumuna vupi vua kama vunoni tu aluluka na mutima uose, Yehova a hasa ku ecela ku sevuka cetu. A ka tu  ecela ku hitila mu lutsilielo luetu mu nkombelo ya Muaneni. Cinanga ca katete ci tua pande ku muesa ku tsiliela caco ca pua ku lihana kuli Njambi linga va tu mbatize.​—Tandenu 1 Petulu 3:21.

¹⁴ Kua kala vusunga vua vuingi vu tu lingisa ku lema Yehova. Kati lika muomu ue ku tu hana viuma via cili, vi tue kulia nkala litangua vunoni ue ku tu longesa vusunga ku tuala hali ikeye na vutumbe vueni. (Yoa. 8:​31, 32) Ua tu hana cikungulukilo ca Vakua Kilistu ci tu kuase na ku tu tuamena. Ue ku tu kuasa ku ambata viteli vietu ntsimbu ino kaha na tu hana lulavelelo lua ku ka yoya miaka yose mu vutantuluke ku lutue.(Visa. 68:19; Ku-So. 21:​3, 4) Mu tue ku singanieka ha viose via tu lingila laza Yehova mu ku tu muesa cilemo ceni, tue ku livua mu hiehi neni na ku mu lema. Kaha mu tue ku lema Yehova, tue ku mu vuila liova lia cili. Tue ku ivua liova lia ku luvalesa muntu u tua lema cikuma.

15. Vati Makayla ua hasele ku vula liova lia ku sevuka?

¹⁵ Makayla, u tua tumbula ku vuputukilo, ua vulile liova lia ku sevuka mua hetele ha ku ivuisisa cifua ce ku konekelamo Yehova. Ua handekele ngueni: “Nja nonguenene nguange nkuma tu vose ka tua tantulukile kaha tue ku sevuka. Njevuisisile naua ngecize Yehova ua tu lema kaha a ka tuecela ku hitila mu nkombelo.” Cilemo ceni kuli Yehova ca mu sindiyele ku lihana kuli ikeye na ku mu mbatiza.

16. Vati Miles ua hasele ku vula liova lia ku mu luisa?

¹⁶ Miles, ua lisosomuene ngueni va naye amba va mu luisa nga va mu mbatiza, ua vundilile vukuasi kuli kaniungi ua ku zinguluka. Miles ngueni: “Mu ku linga neni ua kolele mu vusoko vua ku litepa malombelo, ua nji kuasele ku singanieka vi nja pandele ku ka leka vanana ngecize nji tonda ku nji mbatiza kati omo lia sindiye ya vatata vunoni ku cizango cange mpundu.” Va naye ya Miles, va tenukile cikuma. Ngeci va mu sekuile ha ndzivo, vunoni ka aluluile vutumbe vueni. Ua handekele ngueni: “Ku tantekeya viuma via cili via nji lingila Yehova via nji kuatele ku mutima. Mu nja singaniekele vuino ha nkombelo ya Yesu, njevuisisile vukama vua cilemo ca Yehova hali yange. Evi viose via nji lingisile ku lihana kuli Yehova na ku nji mbatiza.”

17. Vukovelelo vuka tua kala navuo?

¹⁷ Eva mua lile ku vusuka vua uze muti mu citungu, ua hanguile ku viana Ise. Andama mua lipandakanene kuli ikeye, va muesele kasahuntu ka kama ku viose via cili via va hele Yehova. Lelo lino, tu vose tuli na vukovelelo, vua ku muesa ngecize vi va hanguile va Andama na Eva kati via cili. Mu tue ku lihana va tu mbatize, tue ku muesa Yehova ngecize tua tsiliela mpoko yeni ya ku tu tumbikila masiko a via cili na via vipi. Tue ku muesa nguetu tua lema Yehova na ku tsiliela muli ikeye.

18. Vati mu hasa ku puisamo ku pangela vuino Yehova?

¹⁸ Vitanga vi tue ku mona mu nima ya mbatizimu vie ku soloka muomu tu tonda ku yoya mua ya vitume via Yehova kati vietu. Makulukazi  a vantu ve ku hasa ku mu ononoka nkala litangua. Nenu mu hasa ku pua ngue vakevo ca kama ku tualelelaho ku lilongesa Lizi lia Njambi, Mbimbiliya, na ku livuisisa ku kala hamo na vamuanoko mu lutsilielo; na ku ambulula na ntuima yose vi mua lilongesa hali Isuenu ua cilemo. (VaHe. 10:​24, 25) Ntsimbu kanda mu linge vihangula, puenu na ku halakana ku vimamuna via Yehova ku hitila mu Lizi lieni na lukungulukilo lueni. (Isaya 30:21) Kaha viose vi mu ka linga vi ka mi vuaha.​—Visi. 16:​3, 20.

19. Vika tua pande ku tualelelaho ku nongonona kaha omo lia vika?

¹⁹ Omo mu tualelelaho ku nongonona vivezikiso via kala ha ku tava Yehova a mi tuamenene, mu ka mu lema cikuma na vitume vieni. Kaha Satana ka ka hasa ku mi hungumuna kuli Yehova. Aci singaniekenu vati u ka fua muono uenu mu nima ya miaka 1000. Tangua mu ka tala ku nima na ku zolela via cihangula ca seho ci mua lingile ku mi mbatiza!