1. Wat häwe Adam un Eva forspeelt un wat is dårmit passijrt?

 WEE mainst duu hät dai recht taum oos säge wat richtig urer forkërd is? Adam un Eva häwe sich ni mër upforlåte an Jehovaa un sai selwst häwe uutsöcht wat richtig urer forkërd for eer wäir. Sai häwe weese wat sai forneeme däire doir dat wat sai måkt häwe, as sai geete häwe fon dem boom wat sai ni eete schule. (Gên 3:22) Åwer denk an dat wat sai forspeelt häwe, een ümgang mit Jehovaa un dat sai up ümer leewe küüne. Wat is dårmit passijrt? Hät dai süün un dood een ganse kiner angreepe. (Rom 5:12) Dat wat Adam un Eva uutsöcht häwe, hät bloos nood bröcht.

2-3. (a) Wat hät dai kërl fon Etiópia måkt as Filipe taum em preegt hät? (b) Wat fon gaure daile krijge wij wen wij oos tauwe låte? (c) Wat fon frågen ware in dës lëren antwoord?

² Dai kërl fon Etiópia hät gans aners måkt as Adam un Eva. As Filipe taum em preegt hät, hät dës kërl sich soo dankbår befuune oiwer ales wat Jehovaa un Jësus for em måkt hare dat hai sich glijk tauwe låte hät. (Atos 8:34 bet 38) Wen wij oos taum God anbaire daue soo as dës kërl fon Etiópia måkt hät, daue wij wijse dat wij dankbår sin for ales wat Jehovaa un Jësus for oos måkt häwe. Un ni bloos dat, wij wijse uk dat wij oos upforlåte dat Jehovaa dai recht hät taum oos säge wat richtig urer forkërd is.

³ Denk man’s an al gaure daile wat wij krijge daue nå dat wij oos tauwe låte. Wij koine ales wat Adam un Eva forspeelt häwe krijge, sogår dat ëwig leewend. Dat wij gloobe häwe an Jësus Kristus, däit Jehovaa oos süün forgeewe un däit oos uk ain rëgen forstand geewe. (Mat 20:28 un Atos 10:43) Wij koine uk taum Jehovaa sijn familg tauhööre un ain gaur hofnung häwe taum dai tijd wat nog kümt. (João 10:14 bet 16 un Rom 8:20, 21) Dai kërl fon Etiópia hät sich glijk tauwe låte, åwer wek lüür wat Jehovaa kene, häwe angst taum sich tauwe låte, lijkerst wen sai klår saie daue dat Jehovaa seegne däit dai wat sich tauwe låte. Wat däit dës lüür forstööre sich tauwe låte? Woo koine sai een angst oiwerståe? Dës daile daue wij in dës lëren saie?

4-5. Wat fon slimhët häwe Avery un Hannah doirset?

⁴ Ni sicher sin of duu trecht büst. Sai man’s wat mit Avery passijrt is. Avery sij papa un mama sin Tüüge fon Jehovaa, un em sij papa is bekand soo as air lijb papa un air gaur ülst. Nog soo har Avery angst taum sich tauwe låte. Woweegen? Hai sägt: “Ik däir maine dat nij ais soo gaud küün sin as mij papa.” Avery däir uk maine dat ni trecht wäir taum mër dai bruirers un swesters ine gemaind mithelpe. Hai sägt uk: “Ik däir unruig blijwe bloos im denke dat ik beere küün foir andrer lüür, ain preeg måke urer ain forsamlung taum dat preegarbëd lenke.”

⁵ Hannah wat 18 jår hät, däir maine dat sai nog ni trecht wäir. Een familg wäir Tüüge fon Jehovaa, åwer Hannah däir maine dat sai ni air ware küün. Woweegen? Sai har wënig lijb up sich selwst. Öftens däir sai sich soo slecht befijne, dat sich alaine stööte däir. Åwer dårmit däir Hannah sich slechte befijne. Sai sägt: “Ik häw kair sägt wat ik måke däir, nå ni måls mij papa un mama. Ik däir maine dat Jehovaa nij ais mij anneeme däir weegen dat wat ik måke däir.”

6. Wat däir Vanessa forstööre sich tauwe låte?

⁶ Ümgang. Vanessa wat 22 jår hät, sägt: “Ik har ain wat ümer t’hoop mit mij wäir, wij däire oos al lang kene, bijnå 10 jåre heer.” Åwer dës määke wat ümer t’hoop mit Vanessa wäir däir eer forstööre. Vanessa wüst dat wen sai sich tauwe låte wul, müst sai anhule mit dës määke gåe. Vanessa sägt: “Taum mij is ni licht ümgang måke, dårweegen däir mij ängste anhule mit eer gåe un den alaine blijwe.”

7. Fon wat har Makayla angst un woweegen?

⁷ Angst im wat forkërd måke. As Makayla 5 jår har, is eer braurer fone gemaind ruuterschikt woore. Sai hät saie woo traurig een papa un mama bleewe sin weegen dat wat een braurer måkt har. Makayla sägt: “Ik har angst mij tauwe låte weegen wen ik wat forkërdes måke däir, küün ik uute gemaind ruuterschikt ware un mij papa un mama nog traurige låte.”

8. Wat däir Miles ängste?

⁸ Angst dat air gëgen dij blijwt. Miles sij papa un dai wat mit em sij papa forfrijgt wäir, wäire Tüügen fon Jehovaa, åwer em sijn mama ni. Miles hät sägt: “Ik häw 18 jår mit mijn mama wånt un ik har angst eer säge dat ik mij tauwe låte wul. As mij papa Tüüge fon Jehovaa woore is, mijn mama hät dat ni sër gaud annåme. Dårweegen häw ik angst hat dat sai mij uk forstööre küün.”

9. Wat däit passijre wen’s duu mër lëre däist oiwer Jehovaa sij lijb un oiwer em sijn geduld?

⁹ Adam un Eva däire ni Jehovaa wirklig lijbe. Dårweegen häwe sai uutsöcht ni em sijne wile måke. Nog soo hät Jehovaa låte dat sai naug leewt häwe taum kiner häwe un hät eer uk uutsuike låte wosoo sai een kiner uptreke däire. Åwer glijk is saien wääst dat sai selwst uutsuike wat richtig urer forkërd is, ni wat gaures wäir. Adam un Eva sij airst jong hät dai jüngst doodmåkt, dun glijk wäir dai wild ful slechtigkët un dai lüür däire bloos an sich selwst denke. (Gên 4:8 un 6:11 bet 13) Åwer Jehovaa hät wat måkt taum rere Adam un Eva sijn ganse kiner wat em sijne wile måke wule. (João 6:38 bet 40 un 57, 58) Gans sicher Jehovaa is air lijb un geduldig God! Ji mër as duu lëre däist oiwer Jehovaa sij lijb un em sijn geduld, mër däist duu em lijbe. Dit däit måke dat’s duu aners as Adam un Eva ware wilst un nog mër, dat giwt dij lust dijn leewend taum Jehovaa anbaire.

10. Soo as stäit in Salmo 19:7 wat kan dij helpe sich anbaire tau Jehovaa?

¹⁰ Dau bijblijwe lëre oiwer Jehovaa. Ji mër as duu lëre däist oiwer Jehovaa, mër däist duu glööwe dat’s duu em sijne wile måke kast. Avery wat wij airst saie häwe, hät sägt: “Air dail wat mij hulpe hät glööwe dat ik dat måkt krijge däir, wäir leese un grüüwle an dat wat Jehovaa oos forspråke hät in Salmo 19:7.” (Lees.) As Avery saie hät wat God forspråke hät in dës spruch, is em sijn lijb up God stärke woore. Dat lijb däit oos uk mithelpe dai angst oiwerståe, oos hule up Jehovaa un måke wat hai for oos häwe wil. Dat passijrt is mit Hannah wat wij airst saie häwe. Sai hät sägt: “Dai Bijbel leese un alaine studijre hät mij mithulpe forståe dat ik mij alaine stööte, däir Jehovaa sër traurig låte.” (1 Ped 5:7) Nuu, däir Hannah “God sij Woord någåe”, dit bedüürt sai däir leewe soo as sai fone Bijbel lërt hät. (Tia 1:22) Wat hät dat ruutergeewt? Hannah hät sägt: “As ik fornåme häw dat Jehovaa horge gaud wääst is tau mij, is mij lijb up Jehovaa gröter woore”. Hannah hät anhule eer selwst stööte. Dun, sai hät sich anbåre tau Jehovaa un hät sich tauwe låte.

11. Wat hät Vanessa måkt taum gaure ümgang häwe un wat koine wij dårmit lëre?

¹¹ Dau gaure ümgang häwe. Vanessa, woo oiwer wij al fortelt häwe hät saie dat ümgang häwe mit dere määke däir bloos eene gloobe forstööre. Dun, hät sai anhule t’hoopgåe mit dës määke, un hät sich sër anstrengt taum nijg ümgang måke åwer ine gemaind. Sai hät sägt dat an Noé sijn familg denke hät eer dårmit hulpe. Im Noé sijn familg wäire feel lüür wat ni Jehovaa lijbe däire, åwer air däir der anerd helpe. Vanessa hät sich tauwe låte un is pionijr woore. Sai sägt: Pionijr sin hät mij hulpe ümgang häwe ni bloos im mijn gemaind, åwer uk in andrer gemainde. Wat kan uk mit dij passijrt. Wen’s duu feel taum måke häst in Jehovaa sijne arbëd kast duu uk gaure ümgang häwe. (Mat 24:14)

12. Wat fon sort angst häwe Adam un Eva ni hat un wat is dårweegen passijrt?

¹² Angst. Öftens is gaud for oos angst forneeme. Soo as angst häwe im ni God gefale. (Sal 111:10) Adam un Eva häwe ni dës sort angst hat, dårweegen häwe sai Jehovaa ni horgt. Nå dit sin eer oogen upgåe un sai häwe saie dat süün måkt hare. Dai ainsig dail wat sai tau eer kiner geewe küüne wäir dai süün un dai dood. As sai forståe häwe wat sai måkt hare, häwe Adam un Eva sich schäämt dat sai nåkt wäire, un häwe sich taudekt. (Gên 3:7 un 21)

13-14. (a) Soo as in 1 Pedro 3:21 stäit, woweegen bruuke wij ni tau groot angst häwe im doodblijwe? (b) Woweegen koine wij Jehovaa lijbe?

¹³ Is wår dat angst häwe im ni God gefale groote wërd hät, åwer wij bruuke ni tau groot angst häwe im doodblijwe. Jehovaa hät oos dat ëwig leewend geewt. Dårweegen hät hai oos fraimåkt doir Jësus Kristus sijne dood. Wen wij air süün måke, åwer dat däit oos wirklig lëd daue un wij gloobe häwe an Jësus sijne dood, däit Jehovaa oos forgeewe. Wosoo koine wij dës gloobe wijse? Ain moor taum dat wijse is for oos leewend tau God anbaire un oos tauwe låte. (Lees 1 Pedro 3:21)

¹⁴ Woweegen koine wij Jehovaa lijbe? Jehovaa däit oos gaure daile jërer dag geewe. Däit oos inlëre wee hai is un wat hai im wile hät. (João 8:31 un 32) Jehovaa giwt oos uk dai gemaind taum oos lenke un oos bijståe. Hai däit oos mithelpe mit dai problems wat wij hüüt doirsete daue un däit oos forspreeke dat wij aine ëwig leewend ån fëgels in dai tijd wat nog kümt häwe daue. (Sal 68:19 un Apo 21:3, 4) Wen wij grüüwle daue an ales wat Jehovaa al måkt hät taum wijse dat oos lijbe däit, wile wij uk wijse dat wij em lijbe daue. Dës lijb däit oos helpe dai richtig sort angst häwe: Dai angst im ni God gefale, dai God wat wij sodul lijbe daue.

15. Wat hät Makayla hulpe dai angst im ain süün måke oiwerståe?

¹⁵ Makayla woo oiwer al fortelt woore is, hät dai angst wat sai har im ain süün måke oiwerståe kreege. Wosoo? Sai hät forståe dat Jehovaa forgeewig is. Sai sägt: “Ik häw forståe dat wij ale fëgels häwe un daue forkërde daile måke, åwer ik häw uk forståe dat Jehovaa oos lijbe däit un däit oos forgeewe doir Jësus sijne dood.” Dai lijb up Jehovaa hät Makayla lust geewt taum sich anbaire un sich tauwe låte.

16. Wat hät Miles hulpe dai angst oiwerståe?

¹⁶ Miles, wäir air jong wat angst har im sich tauwe låte, weegen em sijn mama. Hai hät formånen forlangt taum dai ülst wat dai gemaind besöcht. Soo as Miles, dës braurer sijn papa wäir Tüüge fon Jehovaa, åwer em sijn mama ni. Miles hät sägt: “Dai ülst wat dai gemaind besöcht hät mij hulpe denke an wat ik säge küün tau mijn mama. Ik müst taum eer wijse dat ik mij selwst tauwe låte wul, ni dat ik dat måke däir weegen mijn papa dat mit gewald wul.” Miles sijn mama hät dat ni sër gaud annåme. Mitm tijd hät müst Miles fon t’huus weggåe, nog soo hät hai ni nålåte. Miles sägt: “Ik häw lërt dat Jehovaa sër feel gaure daile for mij måkt hät un dat hät mijn härts anstöt. As ik dacht häw an Jësus sijne dood, häw ik saie wodul Jehovaa mij lijbe däit. Dårweegen häw ik uutsöcht mij tau Jehovaa anbaire un mij tauwe låte.”

17. Wat kan jërer ainsig for oos måke?

¹⁷ As Eva fon dat boom ine Eden gåre geete hät, hät sai sich gëgen eer Fåter stelt. As Adam eer bijståe hät, hät hai weese dat hai ni dankbår wäir up dai ganse gaure daile wat Jehovaa for em måkt har. Jërer ainsig for oos kan wijse dat wij ni soo sin as Adam un Eva, wij sin dankbår up ales wat Jehovaa for oos måke däit. Wosoo? For oos tauwe låte! Wen wij oos tauwe låte wijse wij dat wij glööwe dat bloos Jehovaa dai rechten hät taum oos sägen wat richtig urer forkërd is. Soo wijse wij, dat wij oos Fåter Jehovaa lijbe daue un dat wij oos up em forlåte daue.

18. Wat däit dij helpe dat’s duu Jehovaa horgt krijgst?

¹⁸ Nå oos tauwe låte, muite wij bijblijwe måke dat wat Jehovaa wil, ni dat wat wij wile. Miljone lüür ine ganse wild daue dat måke. Duu krijgst dat uk måkt! Den, dau ni anhule dai Bijbel studijre, dau ümer upe forsamlunge sin t’hoop mit dijn bruirers un swesters un dau uk tau andrer fortele dat wat’s duu oiwer dijn lijb Fåter, Jehovaa, lërt häst. (Heb 10:24 un 25) Wen’s duu uutsuiken måke must, dau doir dai Bijbel un dai gemaind Jehovaa sijn formånen suike. (Isa 30:21) Soo ales wat’s duu måke däist däit gaud gåe. (Prov 16:3 un 20)

19. Wat dörst duu nij ais forgeete un woweegen?

¹⁹ Dau nij ais forgeete: Jehovaa sijn formånen någåe is gaud for dij! Wen’s duu soo måke däist, däist duu jërer mål mër Jehovaa lijbe un uk dat wat hai richtig urer forkërd maint. Den, gårnischt wat Satan måke däit, däit dij fon Jehovaa aflenke. Dau forsuike andenke dat’s duu al duusend jåre leewe däist. Wen’s duu trööguut kijke däist, däist duu sicherhët häwe dat dai best uutsuiken wat’s duu måkt häst, is dat’s duu dij tauwe låte häst!