1. Adam naEva oya kanitha shike, noshizemo oshini?

MBELA sho to dhiladhila, olye e na okutula po omithikampango dhaashoka shi li mondjila naashoka sha puka? Sho Adam naEva ya li oshiyimati shokomuti gwokutseya uuwanawa nuuwinayi, oye shi ulike sha yela kutya inayi inekela Jehova nomithikampango dhe. Oya hogolola okwiitulila po omithikampango dhawo yene dhaashoka oshiwanawa noshiwinayi. (Gen. 3:22) Ihe dhiladhila kwaashoka ya kanitha. Oya kanitha ekwatathano lyawo naJehova. Oya kanitha wo ompito yokukala nomwenyo sigo aluhe, noya etele oluvalo lwawo uulunde neso. (Rom. 5:12) Etokolo lyaAdam naEva, olya fala aantu muupyakadhi.

2-3. (a) Elenga lyokuEtiopia oli inyenge ngiini, sho Filippus e li uvithile? (b) Omayambeko geni hatu mono, uuna twa ninginithwa, notatu ka kundathana omapulo geni?

² Natu tale eyooloko ndyoka li li pokati kankene Adam naEva yi inyenge nankene elenga lyokuEtiopia lya li li inyenge, sho lya uvithilwa kuFilippus. Elenga ndyoka olya ninginithwa meendelelo, oshoka olya li lya pandula lela shoka Jehova naJesus ye li ningila. (Iil. 8:34-38) Ngele otwi iyapulile Kalunga e tatu ninginithwa ngaashi elenga ndyoka, otatu ulike kutya otwa pandula shoka Jehova naJesus ye tu ningila. Otatu ka ulika wo kutya otwi inekela Jehova, notu shi shi kutya oye awike e na oku tu tulila po omithikampango dhaashoka shi li mondjila naashoka sha puka.

³ Dhiladhila owala komayambeko ngoka hatu mono, uuna tatu longele Jehova! Eyambeko limwe olyo ndyoka kutya Jehova ote ke tu pa ashihe shoka Adam naEva ya kanitha, mwa  kwatelwa omwenyo gwaaluhe. Molwaashoka otu na eitaalo muJesus Kristus, Jehova ohe tu dhimine po nohe tu kwathele tu kale tu na eiyuvo lya yela. (Mat. 20:28; Iil. 10:43) Ohatu ningi wo oshitopolwa shuukwanegumbo waJehova, mboka wu na etegameno ewanawa lyonakuyiwa. (Joh. 10:14-16; Rom. 8:20, 21) Nonando opu na omayambeko ngoka, yamwe mboka ya tseya Jehova, onkee ngaa taya kakadhala okulandula oshiholelwa shelenga lyokuEtiopia. Oshike tashi vulika tashi ya imbi ya ninginithwe? Ongiini taya vulu okusinda omashongo ngoka?

4-5. Omashongo geni omumati omugundjuka, Avery nosho wo omukadhona Hannah ya li ya taalela?

⁴ Okwaa na omukumo. Aavali yomumati Avery, Oonzapo dhaJehova. He ngoka omunahole noku li omukuluntugongalo, oku li lela oshiholelwa oshiwanawa. Ihe Avery okwa li ta kakadhala okuninginithwa. Omolwashike? Okwa ti: “Kanda li ndi wete ngele otandi ka kala oshiholelwa oshiwanawa nda fa tate.” Avery ka li wo e na einekelo kutya ota ka vula okugwanitha po iinakugwanithwa mbyoka tashi vulika a ka pewe monakuyiwa. Okwa ti wo: “Onda li handi ipula kombinga yokugalikana montaneho, okugandja iipopiwa nokukwatela komeho ongundu yomomapya.”

⁵ Hannah, omukadhona gwomimvo 18, okwa li ha kala kee na omukumo. Okwa putudhwa kaavali mboka haya longele Jehova. Nonando ongawo, okwa li a limbililwa ngele ota vulu ngaa okukala metsokumwe nomithikampango dhaJehova. Omolwashike? Hannah okwa li ha kala i idhina. Omathimbo gamwe, okwa li ha kala e uvite nayi noonkondo, e ta tameke okwiiyehameka, shoka sha li owala hashi nayipaleke onkalo. Okwa ti: “Kanda li handi shi lombwele nando omuntu kutya nduno aavali yandje. Onda li handi dhiladhila kutya Jehova ke na esiku a kale e hole ndje, omolwokwiiyehameka kwandje.”

6. Oshike sha li shi imbi Vanessa kaa ninginithwe?

⁶ Enwethomo lyookuume. Vanessa, omukadhona gwomimvo 22, ota ti: “Onda li ndi na kuume ngoka nda kala ndi mu shi uule womimvo.” Ihe ka li ha ambidhidha Vanessa, a adhe elalakano lye lyokuninginithwa. Shoka osha li sha uvitha nayi Vanessa. Ota ti: “Ohandi shi mono oshidhigu okumona ookuume, nonda li tandi ipula kutya ngele onda hulitha po uukuume wetu, itandi ka mona we kuume kopothingo.”

7. Omugundjuka gwedhina Makayla okwa li a tila shike, nomolwashike?

⁷ Okutila okuyona. Omukadhona gwedhina Makayla okwa li e na omimvo ntano, sho omumwayinamati a kondwa. Sho ta  koko, okwa li ha mono nkene oonkantu dhomumwayina ngoka tadhi yemateke aavali ye. Makayla okwa ti: “Onda li handi kala nda tila kutya ngele onda ninginithwa, otandi ka ninga epuko e tandi kondwa, e tandi uvitha nayi noonkondo aavali yandje.”

8. Omulumentu omugundjuka, Miles, okwa li a tila shike?

⁸ Okutila omapataneko. He yaMiles nomukulukadhi gwe, ohaya longele Jehova, ihe yina yaMiles ke shi Onzapo yaJehova. Miles ota ti: “Onda kala nameme uule womimvo 18, nonda kala nda tila oku mu lombwela kutya onda hala okuninginithwa. Onda li nda mono nkene i ihumbatele tate, sho a ningi Onzapo. Onda li nda tila a pataneke ndje.”

9. Oshike tashi vulika shi ningwe po, ngele owi ilongo kombinga yankene Jehova omunahole nomwiidhidhimiki?

⁹ Adam naEva oya hogolola kaaya longele Jehova, oshoka kaya li ya kokeke ohole yoku mu hola. Nonando ongawo, Jehova okwe ya pitike ya kale ko ethimbo ele, sigo ya mono aanona noya tokole yo yene nkene taye ke ya putudha. Iizemo yetokolo lyaAdam naEva lyokukala mondiipangela, oya ulike kutya inaya katuka pandunge. Osheeli shawo osha dhipaga omumwayima kee na ondjo. Mokweendela ko kwethimbo, uukolokoshi nosho wo iikala yokwiihola mwene, oya taandele maantu. (Gen. 4:8; 6:11-13) Nonando ongawo, Jehova okwa li e na po omukalo gwokuhupitha oluvalo aluhe lwaAdam naEva, ndwoka lwa hala oku mu longela. (Joh. 6:38-40, 57, 58) Sho to ilongo oshindji kombinga yankene Jehova omwiidhidhimiki nomunahole, ohole yoye yoku mu hola otashi vulika yi koke. Ito ka kala wa hala okulandula oshiholelwa shaAdam naEva. Pehala lyaashono, oto ki iyapulila Jehova.

10. Omolwashike okutedhatedha kEpisalomi 19:7, taku vulu oku ku kwathela wu longele Jehova?

¹⁰ Tsikila okwiilonga kombinga yaJehova. Ngele owa kala ho ilongo kombinga yaJehova, oto ka kala lela wu na omukumo kutya oto ka pondola moku mu longela. Avery ngoka a popiwa metetekelo, ota ti: “Onda tameke okukala ndi na omukumo, sho nda lesha nokutedhatedha keuvaneko ndyoka li li mEpisalomi 19:7.” (Lesha.) Sho Avery a mono nkene  Jehova a gwanitha po euvaneko ndyoka, ohole ye yoku mu hola oya koko noonkondo. Ohole ihayi tu kwathele owala tu kale tu na omukumo, ihe ohayi tu kwathele wo tu gandje eitulomo kuJehova nokwaashoka a hala. Hannah ngoka a popiwa metetekelo, ota ti: “Okulesha Ombiimbeli paumwene noku yi konakona, okwa kwathela ndje ndi mone kutya uuna ndi iyehameka, onda ehameka wo Jehova.” (1 Pet. 5:7) Hannah okwa tameke ‘okutula miilonga oohapu dhaKalunga.’ (Jak. 1:22) Oshe mu etele iizemo yini? Okwa ti: “Sho nda mono nkene okuvulika kuJehova kwa etela ndje uuwanawa, osha koleke ohole yandje yoku mu hola. Ngashingeyi ondi na uushili kutya Jehova ota ka wilika ndje aluhe, uuna nda pumbwa ekwatho lye.” Hannah okwa li a vulu okusinda eshongo lyokwiiyehameka. Okwi iyapulile Jehova e ta ninginithwa.

11. Vanessa okwa ningi po shike i imonene ookuume aawanawa, notatu ilongo ko shike?

¹¹ Hogolola ookuume pandunge. Vanessa ngoka a popiwa metetekelo, pehulilo okwe ke shi mona kutya kuume ke ote mu imbi a longele Jehova. Onkene uukuume wawo okwe wu fulile okalambo. Ihe Vanessa okwa ningi oshindji shi vulithe pwaashoka. Okwa kondjo a mana mo a pange uukuume nayalwe megongalo. Okwa popi kutya oshiholelwa shaNoa nuukwanegumbo we, oshe mu kwathela. Okwa ti: “Oya li ya kundukidhwa kaantu mboka kaaye hole Jehova, ihe yo oya li ye na ekwatathano ewanawa.” Konima sho Vanessa a ninginithwa, okwa ningi omukokolindjila. Ngashingeyi ota ti: “Oshiholelwa shoka osha kwathele ndje ndi mone ookuume aawanawa megongalo lyetu nokugalwe.” Nangoye oto vulu okumona ookuume aawanawa, ngele owa kala ho longo nuudhiginini miilonga mbyoka Jehova e tu pa. — Mat. 24:14.

12. Adam naEva kaya li ye na uumbanda wuni, naashoka oshe eta iizemo yini?

¹² Kala wu na uumbanda mboka uuwanawa. Uumbanda wumwe uuwanawa kutse. Pashiholelwa, otwa pumbwa okukala tu na uumbanda wokuyemateka Jehova. (Eps. 111:10) Ando Adam naEva oya li ya kokeke uumbanda mboka, ando inaya pilamena Jehova. Ihe mupyamunene inaye shi ninga. Konima yaashono, omeho gawo ayehe oga tonata meityo  ndyono kutya oya mono lela kutya yo aalunde. Oya taandeleke owala uulunde neso koluvalo lwawo. Sho ya dhimbulula mo onkalo yawo, oya mono kutya oye li omalutu gowala, e tayi isiikile. — Gen. 3:7, 21.

13-14. (a) Metsokumwe naPetrus gwotango 3:21, omolwashike inaatu pumbwa unene okukala twa tila eso? (b) Omatompelo geni tu na gokukala tu hole Jehova?

¹³ Manga twa pumbwa okukala tu na uumbanda wokuyemateka Jehova, inatu pumbwa okukala twa tila unene eso. Jehova okwe shi ninga tashi wapa, opo tu ka mone omwenyo gwaaluhe. Ngele otwa yono, e tatu iyele ombedhi tashi zi komutima, Jehova ote ke tu dhimina po. Ote ke shi ninga, omolweitaalo ndyoka tu na mekuliloyambo lyOmwana. Omukalo gumwe gwa simanenena hatu ulike eitaalo, omokwiiyapulila Kalunga, e tatu ninginithwa. — Lesha 1 Petrus 3:21.

¹⁴ Otu na omatompelo ogendji gokukala tu hole Jehova. Ihe tu pe owala iinima iiwanawa mbyoka hatu nyanyukilwa esiku kehe, ihe ohe tu longo wo oshili kombinga ye noyelalakano lye. (Joh. 8:31, 32) Okwe tu pa egongalo lyopaKriste li tu wilike noli tu ambidhidhe. Ohe tu kwathele tu idhidhimikile omaupyakadhi kunena, nokwe tu pa etegameno lyoku ka kala nomwenyo sigo aluhe muuyuni uupe. (Eps. 68:19; Eh. 21:3, 4) Uuna tatu tedhatedha kombinga yaashoka Jehova e tu ningila, opo e tu ulukile kutya oku tu hole, ohashi tu ningitha wo tu kale tu mu hole. Uuna tu mu hole, ohashi tu kwathele tu kale tu na uumbanda uuwanawa. Ohatu tila okuuvitha nayi Jehova ngoka tu hole noonkondo.

15. Oshike sha kwathele Makayla kaa kale we a tila kutya ota ka yona?

¹⁵ Makayla ngoka a popiwa metetekelo, okwa sindi uumbanda wokutila kutya ota ka yona, sho e shi uvu ko kutya Jehova oha dhimine po aantu. Okwa ti: “Onde shi mona mo kutya atuhe inatu gwanenena nohatu ningi omapuko. Onde shi uvu ko wo kutya Jehova oku tu hole note ke tu dhimina po, omolwekuliloyambo.” Ohole ye yokuhola Jehova, oye mu inyengitha e mu iyapulile noku ninginithwe.

16. Miles okwa li a kwathelwa ngiini, opo kaa kale we a tila okupatanekwa?

¹⁶ Miles ngoka a li a tila kutya yina ote ke mu pataneka, ngele a tokola oku ka ninginithwa, okwa pula omayele komutonatelishikandjo. Miles okwa ti: “Omutonatelishikandjo naye okwa putukila wo muukwanegumbo wa topoka palongelokalunga. Okwa kwathele ndje ndi dhiladhile kombinga yaashoka tandi ka lombwela meme, opo a uve ko kutya ongame mwene nda tokola ndi ka ninginithwe, ihe tate haye ta kondjitha ndje.” Nonando ongawo, yina yaMiles ka li e shi nyanyukilwa. Pehulilo, Miles okwa tembuka mo megumbo, ihe okwa kala a dhiginina etokolo lye. Okwa ti: “Okudhiladhila kombinga yiinima iiwanawa mbyoka Jehova a ningila ndje, osha gumu ndje komutima. Sho nda dhiladhila muule kombinga yekuliloyambo lyaJesus, onde shi mono mo kutya Jehova oku hole ndje noonkondo. Shoka  oshi inyengitha ndje ndi iyapulile Jehova nokuninginithwa.”

17. Atuheni otu na ompito yokuninga shike?

¹⁷ Sho Eva a li oshiyimati shokomuti muEden, okwa ulike kutya okwa tindi okuvulika kuHe. Sho Adam naye e shi ningi, okwa ulike kutya ina pandula iinima ayihe iiwanawa mbyoka Jehova e mu ningila. Atuheni otu na ompito yokuulika kutya ita tsu kumwe netokolo ndyoka ya ningi. Uuna twa ninginithwa, ohatu ulukile Jehova kutya otwi itaala kutya oye owala e na uuthemba wokutula po omithikampango dhaashoka shi li mondjila naashoka sha puka. Ohatu ulike wo kutya otu hole Tate gwetu notwe mu inekela.

18. Ongiini to vulu okupondola mokulongela Jehova?

¹⁸ Eshongo ndyoka hatu kala tu na konima yeninginitho, okukala metsokumwe nomithikampango dhaJehova esiku kehe, ihe hadhetu. Aantu omamiliyona muuyuni ohaya kala metsokumwe nomithikampango dhaJehova esiku kehe. Oto vulu okukala we ya fa, ngele owa tsikile okuuva ko muule Oohapu dhaKalunga, Ombiimbeli; okweendathana aluhe naamwatate naamwameme; nosho wo okulombwela yalwe nuulaadhi shoka wi ilongo kombinga yaTate gwetu omunahole. (Heb. 10:24, 25) Uuna to ningi omatokolo, pulakena komayele gaJehova ngoka te ku pe okupitila mOohapu dhe nomehangano lye. (Jes. 30:21) Opo ihe, oto ka pondola mwaayihe mbyoka to ka ninga. — Omayel. 16:3, 20.

19. Owu na okutsikila okudhiladhila kombinga yashike, nomolwashike?

¹⁹ Ngele owa tsikile okudhiladhila kunkene ewiliko lyaJehova hali ku etele uuwanawa, ohole yoye yoku mu hola noyokuhola omithikampango dhe, otayi ka koka. Na kapu na shoka Satana ta ka longitha, tashi ke ku ethitha po okulongela Jehova. Dhiladhila owala kutya oto ka kala wu uvite ngiini konima yomimvo eyovi. Oto ka mona kutya etokolo ndyoka wa ninga lyokuninginithwa, olya dhenga mbanda!