1. Tiheeni Atamu ni Eva ayeleenlaaya, nave ni yookhumelela taani?

TAANI munamuupuwelaanyu wi onnaphwanela otikitherya malamulo wa yeeyo eri yaphaama ni yoonanara? Vaavaa Atamu ni Eva yaalyilaaya yawiima ya mwiri yoowo waasuweliha yaphaama ni yoonanara, awo yaahooniherya vanlakani moonelo aya vooloca sa Yehova ni malamulo awe. Awo yaahitikitherya malamulo aya wa yeeyo eri yaphaama ni yoonanara. (Map. 3:22) Nyenya nkuupuwelani vooloca sa yeeyo awo yaayelenlaaya. Yaahiyeleela onthamwene aya ni Yehova. Yaahiyeleela tho ekari ya okhala ni ekumi okhala wookhala, nave yaahaaraviha anamwane aya yoocheka ni okhwa. (Aro. 5:12) Yoothanla ya Atamu ni Eva yaahaakeriha woopahuwani.

2-3. (1) Mutiyope aakhulenle hai vaavaa Filipi aamulalenryeiye? (2) Mareeliho taani nnaakhelaahu elukuluku nnapatisiwaahu, nave makoho taani nnahaalaahu othokororya?

² Wookhalavo ohiyana variyari va mukhalelo Atamu ni Eva yaakhulenlaaya, ni mukhalelo Mutiyope aakhulenleiye vaavaa Filipi aamulalenryeiye. Mutiyope aahithamalela vancipale yeeyo Yehova ni Yesu yaamweerenlaaya ophiyerya wi aahipatisiwa vahilekenle. (Saw. 8:34-38) Elukuluku nniivelelaahu wa Muluku, nave moolikana ni Mutiyope, nipatisiwa, ninnooniherya vanlakani mukhalelo ahu. Ninnooniherya vanlakani wi ninnathamalela yeeyo Yehova ni Yesu apankaaya ntakhara hiyo. Navetho ninnooniherya wi ninnamuroromela Yehova wi tori oophwanelela otikitherya malamulo wa yeeyo eri yaphaama ni yoonanara.

³ Nkuupuwelani mareeliho yaawo nnaakhelaahu vaavaa nnamurumeelaahu Yehova! Mamoha a yaawo tawi Yehova onahaala onivaha ichu soothene seiyo Atamu ni Eva ayeleenlaaya ophitaanyerya okhala ni ekumi okhala wookhala. Nthowa na omuroromela wahu Yesu Kristu, Yehova onnalevelela soocheka sahu nave onnanivaha yawuupuxerya-ya-murima yaphaama. (Mat. 20:28; Saw. 10:43) Ninnapaka tho makupa a  emusi ya Yehova ya akapuro aweemereryiwa yaawo anahaala waakhela mareeliho muhoolo. (Yoh. 10:14-16; Aro. 8:20, 21) Moohiphwacha mareeliho yaala awooneya, akina yaawo amusuwenle Yehova annoovelela ochariha yootakiherya ya Mutiyope. Tiheeni enaahiiha opatisiwa? Nave eni evoothe hai makacamiho yaawo?

4-5. Makacamiho taani mmiravo oniichaniwa Avery ni mwali oniichaniwa Ana yaakumannaayano?

⁴ Ohiiroromela. Avery yoowo orino iyaakiha khumi nathanu nasese, asitiithi awe Anamoona a Yehova. Apaapa awe aakhalano makhalelo aphaama ntoko tiithi oopwacha nave tho mutokweene amavyakelo. Naamwiihiiha, Avery aanoova opatisiwa. Ntakhara heeni? Owo onnathariha: “Nkuupuwela wi kaahaala owerya okhalano makhalelo aphaama ntoko apapa.” Avery hiiroromela waakhanle wi owo aahaala ohoolela mirici seiyo aahaaleiye ovahiwa muhoolo. “Kaanoova ovekiwa wi kipake nivekelo vanlakani, operekha mwaha, naari ohoolela nikhuuru mmuteko woolaleerya.”

⁵ Ana yoowo orino iyaakha khumi nathanu nararu, aahihooseya ni makacamiho a ohiiroromela. Owo aaphuiwe ni asitiithi yaawo yaamurumeela Yehova. Naamwi hiiha, owo anakhwa minikwa waakhanle wi aahaala okhala mwawiiwanana ni malamulo a Yehova. Ntakhara heeni? Ana aahunnuwiha moonelo wookotakota vooloca sa yene mukhateiye. Mu ilukuluku ikina, owo aaniisoona moonanara ophiyerya wi aaniihoosa mukhateiye, ntoko wi opanke echu yoonanara. Owo ooloca: “Nkintonko omuleela muchu vooloca sa yeeyo kaapakaaka, naari asitiithi aka.” Owo onnaaceererya: “Nave kuupuwela wi Yehova haki akichune wi kikhale mmoha a akapuro awe nthowa na yeeyo kaapakaaka wa miyo mukhataaka.”

6. Tiheeni yaamukookiherya muculi Vanessa opatisiwa?

⁶ Ovolowela wa asinthamwene. Vanessa yoowo aarino iyaakha makhumi meeli napiili, ooloca: “Kaahikhalano nthamwene a vanikuthani yoowo kaamusuwenlaaka waacamela iyaakha khumi.” Mwawiihiiha, nthamwene a Vanessa haamukhaviherya okhwaaniherya yoolakelela awe ya opatisiwa. Eyo yaahimuukhula Vanessa, nave owo ooloca, “Kinnoona okhala woovila waapaka asinthamwene, nave kaanoova wi wakhala wi koomaliha onthamwene yoole, nkaahaala okhalano nthamwene a vanikuthani ntoko yoole.”

7. Mwali oniichaniwa Makayla tiheeni ooveiye nave ntakhara heeni?

⁷ Woova opaka yoocheka etokotoko. Makayla yoowo orino iyaakha makhumi meeli nammoha, aarino iyaakha thanu vaavaa munnawe iikariweiye mmulokoni. Vaavaa unnuweiye, owo aahoona mukhalelo asitiithi awe yaaryaaya awuukhuwa nthowa na meerelo a munnawe. Owo onnaloca: “Kaanoova wi wakhala wi koopatisiwa,  kaahaala opaka yoocheka, ophiyerya wiikariwa mmulokoni, nave kaaruuhele wuukhuwa asitiithi aka.”

8. Mwali oniichaniwa Miles tiheeni ooveiye?

⁸ Woova waakaahiwa. Miles yoowo orino iyaakiha makhumi meeli napiili, apapa awe ni amwaaraya annamurumeela Yehova, nyenya amama awe tahi Namoona. Miles ooloca: “Mu iyaakiha khumi nathanu nararu kaakhala ni amama, nave kaanoova waaleela wi kinachuna opatisiwa. Kaahoona mukhalelo awo yaakhulenlaaya vaavaa apapa yaakhanlaaya Namoona a Yehova. Kaanoova wi amama yaahaala okeerela echu yoonanara.”

9. Tiheeni eni yeereye vaavaa muneeraanyu muhuserye mukhalelo Yehova oreiye oosivela ni oopisa murima?

⁹ Atamu ni Eva yaathanlile ohimurumeela Yehova nthowa nawi hiyaannuwinhe nsivelo noolipa ntakhara yoowo. Naamwiihiiha, Yehova aahiweemererya okhala mu elukuluku yoophwanelela wi ekhaleno anamwane ni otikitherya malamulo aya vooloca sa mukhalelo yaahaalaaya waaphuwa anamwane aya. Sookhumelela sa yoothanla ya Atamu ni Eva sa omurukunuwela Yehova sohooniherya mookwakwaleya mukhalelo yaaryaaya apuruthu. Mwanaya mutokotoko aahimwiipha munneeni, moovira wa elukuluku nlala ni nrima saahivolowela emusi ya achu. (Map. 4:8; 6:11-13) Nyenya, Yehova aahikhalano mukhalelo wa waavulusa anamwane oothene a Atamu ni Eva yaawo yaachuna omurumeelaka yoowo. (Yoh. 6:38-40, 57, 58) Vaavaa munahuseryaanyu sincipale vooloca sa mukhalelo osivela ni opisa murima Yehova oreiyeno, osivela wanyu ntakhara yoowo onamukhala woolipa. Nyuwo munahaala okhooca meerelo yaawo Atamu ni Eva yaathanlilaaya, nave mwiiveleele wa Yehova.

10. Ntakhara heeni omuupuwelela Salumu 19:7 ennookhaviheryaani omurumeela Yehova?

¹⁰ Mutitelele ohuserya vooloca sa Yehova. Elukuluku munahaalaanyu ohuserya sincipale vooloca sa Yehova, munahaala okhumelela phaama mu omurumeela yoowo. Avery yoowo oromoliwe wuupaceryani wa mwaha ola, ooloca: “Kaaniiroromela moorweela wa waalakhanya ni wuupuwelela vooloca sa yoororomeliha enaphwanyeya mu Salumu 19:7.” (Mwaalakhanye.) Vaavaa Avery oonneiye mukhalelo Yehova aakhwanihenryeiye yoororomeliha yeela, omusivela wawe Yehova waahilipiheya  vancipale. Tahi wi osivela pahiru onateka nroromelo nyenyatho onnanikhaviherya otikitheryeya mwa Yehova ni yeeyo onachuneiye. Ana, yoowo oromoliwe wuupaceryani, ooloca: Moorweela mwa omuhuserya ni omwaalakhanya waka Piipiliya, koophiyerya osuwela wi vaavaa kiniihoosaaka mukhataaka, kinnamuhoosatho Yehova.” (1 Ped. 5:7) Ana aahikhala ‘aweerano masu a Muluku.’ (Tiy. 1:22) Ni yookhumelela taani? Owo ooloca: “Vaavaa koonaaka mukhalelo kaaphuraaka orweela wa omwiiwelela Yehova, kaahunnuwiha osivela woolipa ntakhara Yoowo. Vano kinnaroromela wi Yehova onahaala okihoolela vaavaa kinakhwelaaka nikhaviheryo nawe.” Ana aahiwerya ovootha nikacamiho na wiihoosa mukhateiye. Owo aahiiveleela wa Yehova nave apatisiwa.

11. Tiheeni Vanessa eenreiye wi aapake asinthamwene aphaama, nave tiheeni nnahuseryaahu orweela wa yeela?

¹¹ Mwaathanle asinthamwene anyu mwa miruku. Vanessa yoowo oromoliwe wuupaceryani, ohoolo waya aahisuwela wi nthamwene awe aanamukookiherya muculi ntakhara omurumeela Yehova. Mwa yeeyo owo aahimaliha onthamwene. Nyenya Vanessa aahipaka sincipale. Owo aahiilipiserya waapaka asinthamwene avyaani, mpuwa mwa muloko. Owo olonce wi yootakiherya yeeyo etikitheryiwe ni Nowa vamoha ni emusi awe, yoomukhaviherya. Owo oriye: “Awo yaarukureryiwe ni achu yaawo yaahaamusivela Yehova, nyenya yaahikhalano onthamwene waphaama mukina ni mukhwaawe.” Vanessa amanle opatisiwa, aahikhala piyoneera. Vano owo oriye: “Opiyoneera wookikhaviherya waapaka asinthamwene aphaama ohiya pahiru a mmulokoni mwaka nyenya a miloko mikina.” Nyuwotho munanwerya waapaka asinthamwene aphaama moorweela mwa okhala ooweiwa mmuteko yoowo Yehova onivanheiye wi nipake.—Mat. 24:14.

12. Mukhalelo taani wa woova Atamu ni Eva yaahiryaayano, nave ni yookhumelela taani?

¹² Mukhaleno moonelo woophimelela wa woova. Mikhalelo mikina sa woova ti saphaama wa hiyo. Ntoko yootakiherya, nnaphwanela okhalano woova wa ohimuthananiha Yehova. (Sal. 111:10) Waakhanle wi Atamu ni Eva yaahunnuwiha mukhalelo yoola wa woova, awo heki emmwaryeele Yehova. Nyenya awo yaahimmwareela. Emanle ommwareela, miitho aya yaahihuleya ophiyerya wi yaahisuwela phaameene wi yaahicheka. Awo pahiru yaahaala waaraviha anaaya yoocheka ni  okhwa. Woona wi yaahiiwexexa wi hiyiiwelenle nlamulo na Muluku, awo yaahuuliwa muru ni epwitikiri aya nave yaahiikhuneela mukhataaya.—Map. 3:7, 21.

13-14. (1) Mwawiiwanana ni 1 Pedro 3:21, ntakhara heeni hannaphwanela okhalano woova woopwahererya ntakhara okhwa? (2) Mathowa taani nryaahuno a omusivela Yehova?

¹³ Elukuluku nnoovaahu omuthananiha Yehova, hannaphwanela okhalano woova woopwahererya wa okhwa. Yehova oopaka echu wa hiyo wi niphwanye ekumi yoohimala. Wakhala wi noopaka yoocheka nave ncharuwa ni murima woothene, Yehova onahaala olevelela soocheka sahu. Owo onahaala onilevelela moorweela wa nroromelo nahu mu mukucho wa woopola wa Mwanawe. Mukhalelo mmoha woochuneyaxa nnooniheryaahu wi ninnamoova Yehova, ori moorweela wa oveleela okumi ahu wa Muluku ni opatisiwa.—Mwaalakhanye 1 Pedro 3:21.

¹⁴ Nookhalano mathowa mancipale a omusivela Yehova. Ohiya pahiru nthowa nawi onnanivaha ichu saphaama seiyo nnapuhaahu, nyenya onnanihusiha eparipari vooloca sa yene mukhateiye ni yoolakelela awe. (Yoh. 8:31, 32) Owo oonivaha muloko Weekristu wi onihooleleke ni onikhaviherya. Owo onnanikhaviherya ovilela ni makacamiho ahu hiihaano, nave onnanivaha ewehereryo ya okhala ni ekumi okhala wookhala mu elapo yoophaameya muhoolo. (Sal. 68:19; Wup. 21:3, 4) Vaavaa nnuupuwelelaahu ophiyerya mweeryo taani Yehova oonihenryeiye wi onnanisivela, ninnaceenyeryeya omwaacamela yoowo. Nave vaavaa nnamusivelaahu Yehova, ninnakhalano moonelo woophimelela wa woova. Ninnoova omuthananiha Mmoha yoowo nnamusivelaahu vancipale.

15. Makayla aavoonthe hai woova wawe ntakhara opaka yoocheka?

¹⁵ Makayla, yoowo oromoliwe wuupaceryani, aahivootha woova wawe opaka yoocheka vaavaa iiwexenxeiye mukhalelo Yehova oreiye oolevelela. Owo ooloca: “Kaahisuwela wi oothene ahu naachu oohiphaameya nave nnahaala opaka soocheka. Navetho kaahisuwela wi Yehova onnanisivela nave onahaala onilevelela mmathipelo a yawoopola.” Omusivela wawe Yehova waahimweeriha wiiveleela wa yoowo nave aapatisiwa.

16. 16. Miles aakhaviheryen’ye hai ovootha woova wawe waakaahiwa?

¹⁶ Miles, yoowo oova waakaahiwa ni amamaawe ntakhara yoolakelelaawe ya opatisiwa, aahiveka nikhaviheryo ni ooweherya ekulucu. Miles onnaloca: “Ooweherya ekulucu aphuiwaletho mu emusi yeeyo tiithi mmoha aareiye Namoona. Owo aahikikhaviherya wuupuwela yeeyo kaahaalaaka oloca wi kaakhaviherye amama wiiwexexa wi eyo yaari yoolakelela aka opatisiwa nave wi hiyaari apapa yaawo yaakeeriha opaka yeeyo.” Amamaawe Miles hiyaahakalanle ni yoolakelela awe. Mwa yeeyo, owo aahipwahavo vaate va amamaawe, nyenya haakookenle muculi ni yoolakelelaawe. Owo ooloca: “Ohuserya vooloca sa ichu sincipale seiyo Yehova opankeiye ntakhara miyo, eyo yaahitannya murima aka. Vaavaa kuupuwelaaka mwawiiseela vooloca sa mukucho wa yawoopola  wa Yesu, kaahisuwela mwawaakhwanela ophiyerya mweeryo taani Yehova onakisiveleiye. Muupuwelo yoowo waahikeeriha wiiveleela wa Yehova nave kipatisiwa.”

17. Ekari taani nryaahuno?

¹⁷ Elukuluku Eva aalyileiye yawiima ya mwiri yoole mu emaca ya Eteni, owo aahimukhooca Tiithi awe. Vaavaa Atamu aapankeiye emohamoha, owotho aahooniherya wi haathamalenle ichu soothene saphaama Yehova aapankeiye ntakhara yoowo. Oothene ahu nookhalano ekari ya wooniherya mwawaakhwanela ophiyerya mweeryo taani nnaakhulelaahu moohiyana ni Atamu ni Eva. Moorweela wa opatisiwa, ninnamooniherya Yehova wi ninneemererya wi owo ookhalano olamulelo wa otikitherya malamulo wa yeeyo eri yawookololowa ni yeeyo eri yooheseya wa hiyo. Ninnooniherya wi ninnamusivela Tiithi ahu nave ninnamuroromela.

18. Muni mukhumelele hai phaama mu omurumeela wanyu Yehova?

¹⁸ Nikacamiho nnahoolelaahu nimanle opatisiwa ori weeca mwawiiwanana ni malamulo a Yehova ohiya awihu. Amilyawu a akapuro a Muluku anneeca mmukhalelo yoowo. Nyuwotho munanwerya okhala oolikana ni yaawo wakhala wi munnatitelela wiiwexexa Masu a Muluku, Piipiliya; okhala vamoha ni anna ni arokora anyu moohihiyererya, nave mwamvai waaleela akina yeeyo muhusenryaanyu vooloca sa Tiithi anyu oosivela. (Ahe. 10:24, 25) Elukuluku munapakaanyu soolakelela, muwiriyane miruku seiyo Yehova onoovaheiyeeni moorweela wa Masu ni marehereryo awe. (Isa. 30:21) Voocharela soothene muneeraanyu mpake munahaala okhumelela phaama.—Masi. 16:3, 20.

19. Tiheeni munaphwanelaanyu otitelela wuupuwela nave ntakhara heeni?

¹⁹ Vaavaa munatitelelaanyu osuwela ophiyerya mweeryo taani munaphuraanyu orweela mwa ohoolela wa Yehova, osivela wanyu ntakhara yoowo ni malamulo awe onahaala wunnuwa. Voocharela hiyaavo echu Satana oneereiye oovaheeni eni yoohuweliheeni mu omurumeela Yehova. Mwiisaanyiherye mukhatiinyu ovinyerya hiihaano iyaakha ncikhwi nimoha. Munahaala wuupuwela muculi wi yoolakelela anyu ya opatisiwa yaari echu yoophwanelela mwaaphwanelaanyu opaka!