1. ¿Tlenon opanok ika tlen okitlapejpenijkej Adán niman Eva?

¿AKINON tiknemilia noneki kitlapejpenis tlen kuajli niman tlen xkuajli? Ijkuak Adán niman Eva okikuajkej itech kojtli tlen tetlalnamiktia akinon kinamiki tlanauatis, okiteititijkej ika xtlaneltokayaj itech Jehová nion itech itlanauatiluan. Yejuamej okinejkej kitlapejpeniskej tlen kuajli noso tlen xkuajli (Gén. 3:22). San ika ¿tlenon opanok? Xok onouikakej iuan Jehová niman xok ouel onenkej nochipa. Noijki okinpanoltilijkej inkoneuan tlajtlakojli niman mikilistli (Rom. 5:12). San yotetlajyouilti tlen okitlapejpenijkej kichiuaskej.

2, 3. a) ¿Tlenon okichiuj eunuco etíope ijkuak okinojnots Felipe? b) ¿Tlen tlateochiualistli tikseliaj ijkuak toapolaktiaj? c) ¿Tlenon tiknankiliskej?

² Itech tlen Adán niman Eva okichiujkej melak sejneka tlen okichiuj eunuco etíope ijkuak okinojnots Felipe. Yejuin tlakatl melak okitlasojkamat tlen Jehová niman Jesús yokichiujkaj ipampa, kuakon, nimantsin onoapolakti (Hech. 8:34-38). Ijkuak tosentemakaj itech toTajtsin niman toapolaktiaj ijkon ken etíope, tikteititiaj ika tiktlasojkamatij tlen Jehová niman Jesús yokichiujkej topampa. Niman, tikteititiaj ika titlaneltokaj itech Jehová niman tikseliaj ika yejua akin kinamiki kijtos tlen kuajli niman tlen xkuajli.

³ Xtlanemili itech tlateochiualistli tlen tikseliaj ijkuak tiktekichiuiliaj Jehová. Tikchiaj matechmakakan tlen Adán niman Eva okipolojkej niman noijki uelis  tinemiskej nochipa. Pampa titlaneltokaj itech Jesús, toTajtsin techtlapopoluiya niman techmaka totlamachilis chipauak (Mat. 20:28; Hech. 10:43). Noijki, tinemij imiuan miyekej itekipanojkauan Jehová niman tikchiaj kualtsin tinemiskej ika tlayekapan (Juan 10:14-16; Rom. 8:20, 21). Maski nochi yejuin tikitstokej, sekimej akin ikixmatstokej Jehová ometlamatij kichiuaskej ken eunuco etíope. ¿Tlenon kintsakuilia manoapolaktikan? Niman ¿tlenon uelis kichiuaskej?

4, 5. ¿Tlenon kixnamikiyaj Avery niman Hannah?

⁴ Matoyolchikauakan. Itajuan Avery, iteixpantijkauan Jehová. Itaj melak kuajli noyekana niman se kuajli tlayekanketl, maski ijkon, Avery xkinekiya noapolaktis. Kijtoua: “Niknemiliaya ika xueliskia nikchiuas ijkon ken notaj”. Noijki, Avery kinemiliaya ika xueliskia kichiuas tekitl tlen kimakaskiaj ipan tlanechikojli. Yejua okijto: “Nechajmanaya manechijlikan maniktemaka se discurso noso nejua maniteyekana ijkuak tontenojnotsaj”.

⁵ Hannah akin kipiaya 18 xiuitl melak nomojtiaya. Maski itajuan iteixpantijkauan Jehová, nochipa kinemiliaya ika xueliskia kitlakamatis itlanauatiluan toTajtsin. Kemantika, melak xkuajli ken nomachiliaya hasta san yejua nokokouaya niman yejuin xkipaleuiaya. Kijtoua: “Xakaj onikijli tlen nikchiuaya, nion notajuan. Niknemiliaya ika Jehová xkeman nechseliskia ipampa tlen ninochiuiliaya”.

6. ¿Tleka xnoapolaktiaya Vanessa?

⁶ Amigos. Vanessa, akin kipiya 22 xiuitl kilnamiki: “Nikpiaya se noamiga akin kuajli toixmatstoyaj kanaj 10 xiuitl”. San ika, iamiga xkipaleuiaya manoapolakti niman yejon kajmanaya. Kijtoua: “Ouijtika nikitaya nikinnextis amigos niman ninomojtiaya ika tla xok iuan ninouikaya, xok niknextiskia se akin ijkon iuan maninouika”.

7. ¿Tlenon kimakasiya Makayla, niman tleka?

⁷ Timomojtis titlajtlakos. Makayla kipiaya makuijli xiuitl ijkuak ikniuj okikixtijkej ipan tlanechikojli. Sakin, okitak kenon okimijtlako itajuan. Kijtoua: “Ninomojtia ninoapolaktis, nitlajtlakos, niman manechkixtikan niman ijkon melak nikinyolkokos notajuan”.

8. ¿Tlenon kimakasiya Miles?

⁸ Mitsmojtis mamitstlaueltokakan. Matikitakan tlenon okixnamik telpochtli Miles. Itaj niman itlakpanan  iteixpantijkauan Jehová, san ika, inan ka. Miles kijtoua: “Iuan onichantik nonan 18 xiuitl. Xniknekiya nikijlis ika niknekiya ninoapolaktis. Nikilnamikiya ika melak okualan ijkuak notaj onoapolakti. Nechmojtiaya manechtlauelita”.

9. ¿Tlenon uelis panos ijkuak tikasikamatis ika Jehová teijyouiya niman tetlasojtla?

⁹ Adán niman Eva okitlapejpenijkej xkitekichiuiliskej Jehová pampa xkitlasojtlayaj. Maski ijkon, toTajtsin okinkauili mauejkauikan manemikan, makinpiyakan inkoneuan niman san yejuamej makinyekanakan. Pampa xokitlakamatkej Jehová, nimantsin ones ika Adán niman Eva xtlamachilisejkej katkaj ika tlen inpan onochiuj. Inkoneuj akin yenkuiyotl okimikti ikniuj, niman xouejkauj ika nochimej tlaltikpakchanejkej opeuj kichiuaj tlen xkuajli niman san intech tlanemiliayaj (Gén. 4:8; 6:11-13). San ika, Jehová ikimatstoya kenon kinpaleuis ikoneuan Adán niman Eva akin kinekiskiaj kitekichiuiliskej (Juan 6:38-40, 57, 58). Jehová melak teijyouiya niman tetlasojtla, ¿xmelak? Ijkuak más tikixmatstias, melak tiktlasojtlas. Xtiknekis titlajtlakos ijkon ken Adán niman Eva, tiknekis timosentemakas itech.

10. ¿Tleka tla titlanemilia ipan Salmo 19:7 uelis mitspaleuis xtekichiuili Jehová?

¹⁰ Maka xkajkaua xmomachti itech Jehová. Ijkuak más tikixmatis Jehová, tikasikamatis ika kema uelis tiktekichiuilis. Avery kijtoua ika okipaleui pampa kiamapouaya niman ipan tlanemiliaya tlen kijtoua Salmo 19:7 (xpoua). Ijkuak okitak kenon yejon tlaxelojli kipaleuijtoya, opeuj melak kitlasojtla Jehová. Yejuin tlasojtlalistli xsan techpaleuiya totech matitlaneltokakan, noijki techpaleuiya matikchiuakan tlen kineki Jehová. Hannah noijki kijtoua: “Pampa opeuj nikamapoua niman opeuj noselti ninomachtiaya Biblia, onikasikamat  ika ijkuak san nejua ninokokouaya noijki nikyolkokouaya Jehová” (1 Ped. 5:7). Hannah onokojtili kichiuas tlen nomachtiaya ipan iTlajtol toTajtsin (Sant. 1:22). ¿Kenon okipaleui? Yejua kijtoua: “Onikitak ika ijkuak niktlakamatiya Jehová melak nechpaleuiaya, kuakon opeuj melak niktlasojtla. Aman, nikmatstok ika yejua nochipa nechpaleuis ijkuak nonekis”. Hannah okikajkauj ika san yejua nokokouaya, onosentemakak itech Jehová niman onoapolakti.

11. a) ¿Tlenon okipaleui Vanessa kuajli makintlapejpeni iamigos? b) ¿Tlenon tiuelij itech Vanessa?

¹¹ Kuajli xkintlapejpeni moamigos. Vanessa okitak ika iamiga xkipaleuijtoya kuajli makitekichiuili Jehová. Kuakon, xok iuan onouikak. Yejua onokojtili kintejtemos iamigos ipan tlanechikojli. Noijki, kijtoua ika okipaleui tlen okichiujkej Noé niman ichanejkauan: “Ochantikej kampa miyekej xkitekichiuiliayaj Jehová, kuakon san yejuamej kuajli onouikakej”. Sakin ika Vanessa onoapolakti, opeuj tekiti ken precursora. Aman kijtoua: “Yejuin yonechpaleui kuajli manikintlapejpeni noamigos, niman xsan ipan notlanechikol, noijki ipan okseki tlanechikoltin”. Tejua noijki uelis tikinpiyas amigos, tla timochikaua tikchiua tekitl tlen Jehová yotechnauatij (Mat. 24:14).

12. ¿Tlenon xokichiujkej Adán niman Eva, niman tlenon inpan opanok?

¹² Tlen kinamiki mitsmojtis. Seki tlen techmojtia, techpaleuiya. Pampa melak kuajli tla tomojtiaj xtikchiuaskej tlen xkuelita Jehová (Sal. 111:10). Tla Adán niman Eva nomojtiskiaj kichiuaskej tlen xkuajli, kitlakamatiskiaj Jehová. San ika, pampa xokichiujkej, oixtlapojkej, kijtosneki, kuajli okasikamatkej ika tlajtlakolejkej katkaj niman ika kinpanoltiliskiaj inkoneuan tlajtlakojli niman mikilistli. Pampa okitakej noso okasikamatkej ika tlen okichiujkej xkuajli katka, opinaujkej pampa xkipiayaj intlaken niman onotlapachojkej (Gén. 3:7, 21).

13, 14. a) Ken kijtoua 1 Pedro 3:21, ¿tleka noneki maka matikmakasikan mikilistli? b) ¿Tleka noneki matiktlasojtlakan Jehová?

 ¹³ Melak kuajli tla techmojtia tikyolkokoskej Jehová. San ika, maka matikmakasikan mikilistli. ¿Tleka? Pampa toTajtsin yotechmakak itlaj tlen techpaleuis matinemikan nochipa. Tla titlajtlakouaj niman toyolkuepaj ika nochi toyojlo, yejua techtlapopoluis pampa titlaneltokaj ika ikoneuj omik topampa. Tikititiskej ika titlaneltokaj itech, tla tosentemakaj niman toapolaktiaj (xpoua 1 Pedro 3:21).

¹⁴ Tiktlasojtlaj Jehová pampa miyek tlen techmaka, techmachtia itech niman techijlia tlen kineki kichiuas (Juan 8:31, 32). Yotechmakak tlanechikojli niman ijkon ika techyekana niman techpaleuiya. Techpaleuiya matikixnamikikan nochi tlauejli tlen tikpiyaj niman yotechijli ika nochipa kuajli tinemiskej ika tlayekapan (Sal. 68:19; Apoc. 21:3, 4). Ijkuak titlanemiliaj kenon yotechititi ika melak techtlasojtla itech nochi tlen yokichiuj topampa, tipeuaj noijki melak tiktlasojtlaj niman tomojtiaj tikyolkokoskej. Yejon tlen noneki matechmojti.

15. ¿Kenon Makayla xok onomojti tlajtlakos?

¹⁵ Makayla xok onomojti tlajtlakos ijkuak okasikamat ika Jehová nochipa kinektika techtlapopoluis. Yejua kijtoua: “Onikasikamat ika tinochimej titlajtlakolejkej niman ika tinochimej topopolouaj. San ika, noijki onikasikamat ika Jehová techtlasojtla niman techtlapopoluiya pampa okitemakak iKoneuj”. Pampa okitlasojtlak Jehová, Makayla onosentemakak niman onoapolakti.

16. ¿Tlenon okipaleui Miles maka makimojti tlen ouijtika kixnamikis?

¹⁶ Miles, akin xnoapolaktiaya pampa kimojtiaya makualani inan, okijli superintendente de circuito makipaleui. Yejua kijtoua: “Yejua noijki onoskalti ijkon ken nejua, pampa inan noijki xnomachtiaya. Onechpaleui manikmati kenon uelis nikijlis nonan ika notaj xnexchiualtijtoya maninoapolakti, nejua yoniknemilijka ninoapolaktis”. Inan Miles xokuelkak. Sakin, Miles okis ichan, san ika, kema onoapolakti. Niman okijto: “Onikitak kenon Jehová melak yonechpaleui. Ijkuak onitlanemili ika Jesús onotemakak topampa, onikasikamat kenon Jehová melak nechtlasojtla. Yejon onechpaleui itech maninosentemaka niman maninoapolakti”.

17. ¿Tlenon uelis tikchiuaskej tinochimej?

¹⁷ Ijkuak Eva okikua tlakilyotl ipan jardín de Edén, okimapeuj iTajtsin. Niman, ijkuak Adán noijki okikua, okiteititi ika xokitlasojkamat tlen Jehová okichiujka ipampa. Tinochimej uelis tikteititiskej  ika xtikuelitaj tlen Adán niman Eva okitlapejpenijkej kichiuaskej. Ijkuak toapolaktiaj, tikititiaj Jehová ika tikneltokaj ika yejua kinamiki kijtos tlen kuajli niman tlen xkuajli. Noijki tikititiaj ika tiktlasojtlaj niman itech titlaneltokaj.

18. ¿Tlenon noneki tikchiuas niman ijkon kuajli tiktekichiuilis Jehová?

¹⁸ Sakin ijkuak yotoapolaktijkej, mojmostla noneki matikchiuakan tlen Jehová kineki niman maka tlen tejuamej tiknekij. Tikmatstokej ika ouijtika, san ika, miyekej tlaltikpakchanejkej nochi xiujtin kichiuaj tlen Jehová kineki. Tejua noijki uelis ijkon tikchiuas, tla timomachtia Biblia, imiuan timosentlalia tokniuan niman tla tikinnojnotsa oksekimej tlen yotiuel itech moTajtsin iluikakchane (Heb. 10:24, 25). Ijkuak tiktlapejpenis tlen tikchiuas, xkaki tlen Jehová mitsijlia ipan iTlajtol niman itech ikalpan (Is. 30:21). Kuakon, kuajli tinemis (Prov. 16:3, 20).

19. ¿Tlenon noneki nochipa xkilnamiki, niman tleka?

¹⁹ Tla nochipa tikilnamiki kenon mitspaleuiya itlayekanalis Jehová, mitspaleuis melak xtlasojtla niman noijki nochipa tiknektos tikintlakamatis itlanauatiluan. Kuakon, maski san tlenon mitstekiuiltis Satanás, xkichiuas maka sa xtekichiuili Jehová. Ijkuak tinemis mil xiuitl niman tiknemilis ijkuak otimoapolakti, uelis tikijtos: “Melak kuajli tlen oniktlapejpeni”.