1. Hadia zi taya khö Gadamo ba Khawa ba hadia lua-luania?

MOLOʼÖ yaʼugö, haniha zinangea motatugöi goi-goi sanandrösa ba zi sökhi hegöi si lö sökhi? Me laʼa mbua geu famotokhi ba dödö si sökhi hegöi si lö sökhi ira Adamo ba Khawa, no laforomaʼö moroi ba gamuatara wa: Lö faduhu dödöra khö Yehowa hegöi ba goi-goinia. Lafili goi-goira samösa ba wotatugöi hadia zi sökhi hegöi si lö sökhi. (1 Moz. 3:22) Angeragö hadia zi no taya khöra. Taya wahuwusara khö Yehowa. Taya göi waʼauri si lö aetu ba laröi ba ndraonora ondröita horö ba faʼamate. (Rom. 5:12) Angetula nihalö Gadamo ba Khawa iʼasogö gabula dödö.

2-3. (a) Hadia nifalua samösa niha salawa faka ba Gaitiofia me manuriaigö khönia Wilifo? (b) Hadia howu-howu nitemada na tabayagö ita idanö, ba hadia wanofu-nofu nitutunöda?

² Nifalua Gadamo ba Khawa no aröu faehu ba nifalua niha salawa faka ba Gaitiofia me manuriaigö khönia Wilifo. Iʼandrö sibai saohagölö khö Yehowa hegöi Yesu ba zi no lafalua khönia irege iʼanemaiʼö omasi ia tebayagö idanö. (Hal. 8:34-38) Ba ginötö talulu waʼaurida khö Lowalangi simane niha salawa faka ba Gaitiofia, no taforomaʼö wa taʼandrö sibai saohagölö khö Yehowa hegöi Yesu ba zi no lafalua khöda. Daʼö göi zangoromaʼö wa faduhu dödöda khö Yehowa ba no tafaduhuʼö wa yaʼia zinangea motatugöi goi-goi sanandrösa ba zi sökhi hegöi si lö sökhi.

³ Angeragö howu-howu nitemada na tafosumange Yehowa! Sambua howu-howunia yaʼia daʼö, ibeʼe khöda Yehowa ngawalö zi no itayaigö Adamo ba Khawa simane faʼauri si lö aetu. Börö me mamati ita khö Yesu Keriso, iʼefaʼö zalada Yehowa  ba ibeʼe khöda dödö side-ide si lö sinegu. (Mat. 20:28; Hal. 10:43) Tobali göi ita ösi nomo Yehowa, ono mbanua niʼomasiʼönia ba no ihenaigö khöda dötönafö sebua ba zi so miföna. (Yoh. 10:14-16; Rom. 8:20, 21) Hewaʼae no laʼila howu-howu daʼö, so ösa zangokhögö faʼaboto ba dödö khö Yehowa zaombö tödö ba woloʼö duma-duma niha salawa faka ba Gaitiofia. Hadia zanaha yaʼira irege lö labayagö ira idanö? Ba hewisa wangasiwaisira daʼö?

4-5. Hadia nitaögö nono matua sotöi Avery hegöi ono alawe sotöi Hannah?

⁴ Ambö waʼafaduhu dödö. Samaduhuʼö Yehowa zatua Avery. Iʼokhögö bapania döi si sökhi börö me niha soʼameʼegö tödö ba satua sokubaloi ia. Hizaʼi lö omasi ia nasa tebayagö idanö. Hadia mbörö? Imane, ”Lö irai uʼangeragö wa tola ufalua dania simane nifalua bapagu.” Ambö göi faduhu dödö Avery, hadia tola ifalua dania noro dödö nibeʼe khönia ba zi so miföna. ”Ataʼudo na laʼandrö khögu mangandrö föna niha sato, labeʼe khögu huhuo sebua, mazui ba wondröniaʼö angowuloa soguna ba wanuriaigö.”

⁵ Hannah, 18 fakhe ndröfinia, tefakao ia börö me lö ifaduhusi tödö ia samösa. Samaduhuʼö Yehowa zatuania. Ambö faduhu dödönia wa tola ifaudugö lala waʼaurinia ba goi-goi Yehowa. Hana wa simanö? Börö me ifatumbuʼö ba dödönia wa tenga sinangea ia. Itaria, abu sibai dödönia irege ifesokho ia samösa. Tenga itugu sökhi zalua. Imane, ”Lö irai ufatunö ba niha mendrua manö khö zatuagu sanandrösa ba nifaluagu. Ukhalaigö wa lö irai omasi khögu Yehowa ba zi no ufalua.”

6. Hadia zanaha Vanessa irege lö tebayagö ia idanö?

⁶ Fondrönisi moroi ba nawö. Imane Vanessa si 22 fakhe, ”So zi fahuwu khögu ba no arakhagö 10 fakhe fahuwu ndraʼaga.” Hizaʼi, si fahuwu khö Vanessa lö adöni dödönia ba wamati niʼokhögö Vanessa ba tenga samarou yaʼia enaʼö tebayagö idanö. Daʼa zameʼe khönia faʼabu dödö ba imane, ”Abua khögu ba wanöndra awö ba ataʼudo na uʼetuʼö wahuwusama, börö me lö hadöi dania si fahuwu khögu.”

7. Hadia niʼataʼufi nono alawe sotöi Makayla, ba hadia mbörö?

⁷ Ataʼu na lö mofozu. Lima fakhe ndröfi Makayla me laʼefasi gaʼania ono matua moroi ba mbanua niha Keriso. Me ebua-bua ia, iʼila hewisa waʼabu dödö zatuania börö nifalua gaʼania. Imane Makayla, ”Ataʼudo tebayagö idanö, tola manö ufalua dania zala irege laʼefasi ndraʼo moroi ba mbanua  niha Keriso, ba lua-luania itugu abu dödö zatuagu.”

8. Hadia niʼataʼufi nono matua sotöi Miles?

⁸ Ataʼu na göna folohi. Samosumange Yehowa bapa Miles hegöi mamania tiri, hizaʼi tenga Samaduhuʼö mamania sindruhu. Imane Miles, ”No 18 fakhe toröido khö mamagu ba ataʼudo wangumaʼö khönia wa omasido tebayagö idanö. No uʼila samösa hewisa gamuatania me tobali bapagu Samaduhuʼö. Ataʼudo na mofönu khögu mamagu.”

9. Hadia nirasoimö na öfahaʼö ndraʼugö ba waʼomasi Yehowa hegöi faʼebolo dödönia?

⁹ Lafili lö lafosumange Yehowa ira Adamo ba Khawa me lö ladouʼö ba wangomasiʼö yaʼia. Hewaʼae simanö, itehegö anau nosora Yehowa enaʼö laʼokhögö ndraono hegöi ba wotatugöi samösa goi-goi ba wangebuaʼö iraonora. Lö sökhi lua-lua moroi ba gangetulara, börö me lö laʼodaligö Yehowa. Onora siaʼa, ibunu dalifusönia si lö fasala, ba gafuriata afönu ba niha gamuata si lö sökhi hegöi fangalui tana khöra samösa. (1 Moz. 4:8; 6:11-13) Hewaʼae simanö, omasi Yehowa ba wangorifi fefu ngaʼötö Gadamo ba Khawa somasi mamosumange yaʼia. (Yoh. 6:38-40, 57, 58) Na itugu öfahaʼö ndraʼugö sanandrösa ba waʼebolo dödö Yehowa hegöi faʼomasinia, itugu tedou waʼomasiu khönia. Tatu lö omasiʼö ba wamalua simane nifalua Gadamo ba Khawa, ba öhalö gangetula ba wolulu waʼaurimö khö Yehowa.

10. Hadia mbörö wa tobali fanolo khöu na öʼangerönusi Zinunö 19:8?

¹⁰ Böi tebulö ba wamahaʼö sanandrösa khö Yehowa. Na itugu öfahaʼö ndraʼugö sanandrösa khö Yehowa, itugu faduhu dödöu wa tola mofozu ndraʼugö ba wamosumange yaʼia. Imane Avery nitutunö moroi yawa, ”Itugu tedou waʼafaduhu dödögu ba zi no ubaso hegöi ba woʼangerönusi mbuʼusa li si so ba Zinunö 19:8.” (Baso.) Me iʼila Avery hewisa Yehowa ba wamalua mbuʼusa linia, itugu tedou waʼomasinia khö Yehowa. Faʼomasi tenga ha ba  wangaʼasogö faʼafaduhu dödö, hizaʼi itolo ita göi enaʼö teʼosambuaʼö dödöda khö Yehowa hegöi ba zomasi ia. Imane Hannah nitutunö moroi yawa, ”Börö me ubaso Zura Niʼamoniʼö ba ufahaʼödo samösa, aboto ba dödögu wa na ufakao mbotogu samösa, no göi ubeʼe afökhö dödö Yehowa.” (1 Fet. 5:7) Ifalua Hannah hadia zi no ifahaʼö yaʼia ba Zura Niʼamoniʼö. (Yak. 1:22) Hadia mbuania? Imane, ”So mbuania khögu börö me uʼoʼö Yehowa, tedou waʼomasigu khönia. Iadaʼa itugu faduhu dödögu khö Yehowa wa lö aetu ibeʼe khögu wanolo ba ginötö moguna khögu. Tola itimbagö Hannah ba wamakao mbotonia samösa. Ilulu waʼaurinia khö Yehowa ba ibayagö ia idanö.

11. Hadia nifalua Vanessa ba wangokhögö fahuwusa si sökhi ba hadia wamahaʼö si tola tahalö?

¹¹ Atua-tua ba wamili awö. Vanessa nitutunö moroi yawa, aboto ba dödönia wa tobali daha-tahania zi fahuwu khönia ba wamosumange Yehowa. Andrö wa iʼetuʼö wahuwusara. Tenga ha daʼö manö nifaluania. Iʼodödögö ba wangalui si fahuwu khönia ba mbanua niha Keriso. Itutunö wa duma-duma moroi khö Noakhi hegöi ösi nomonia zanolo yaʼia. Imane, ”Niha ba zi fasuira tenga sangomasiʼö Yehowa, hizaʼi ba nösi nomora laʼokhögö wariawösa si möi fangabölöʼöra.” Me no aefa tebayagö idanö Vanessa, tobali ia perintis. Iadaʼa imane, ”Daʼa zi tobali fanolo khögu ba wangokhögö fahuwusa si sökhi tenga ha ba mbanua niha Keriso si farahu ndraʼo hizaʼi moroi ba mbanua niha Keriso tanö böʼö.” Tola göi öʼokhögö wahuwusa si sökhi ba niha na öfalua halöwö nibeʼe Yehowa.​—Mat. 24:14.

12. Hadia wangataʼufi si lö laʼokhögö ira Adamo ba Khawa?

¹² Okhögö wangataʼufi satulö. So ösa wangataʼufi soguna khöda. Duma-dumania, moguna so khöda waʼataʼu na tebai taʼomusoiʼö dödö Yehowa. (Zin. 111:10) Na so khö Gadamo ba Khawa wangataʼufi simane daʼö, tatu lö molawa ira khö Yehowa. Hizaʼi molawa ira. Me no aefa lafalua daʼö, teboka höröra ba aboto ba dödöra wa no lafalua horö. No laröi ba ngaʼötöra horö  ba faʼamate. Börö me teboka höröra mazui aboto ba dödöra hadia zalua khöra, tobali aila ira börö me lö balu-balura ba labalugö ira.​—1 Moz. 3:7, 21.

13-14. (a) Moloʼö 1 Fetero 3:21, hadia mbörö wa lö moguna taʼataʼufi sibai waʼamate? (b) Hadia zi tobali dane-dane khöda ba wangomasiʼö Yehowa?

¹³ Na so khöda wangataʼufi Yehowa soroi ba dödö, lö ataʼu sibai ita waʼamate hewaʼae no tatema ondröita horö ba faʼamate. No ibeʼe khöda Yehowa ginötö enaʼö tola tasöndra waʼauri si lö aetu. Na tafalua horö hizaʼi tafalalini gera-erada, iʼefaʼö zalada Yehowa. Iʼefaʼö zalada na mamati ita ba höli nibeʼe Nononia. Lala siföföna ba wangoromaʼö wa mamati ita, yaʼia daʼö talulu waʼaurida khö Lowalangi ba tabayagö ita idanö.​—Baso 1 Fetero 3:21.

¹⁴ Oya zi tobali dane-dane khöda ba wangomasiʼö Yehowa, tenga ha ibeʼe khöda ngawalö zi sökhi ero maʼökhö, hizaʼi ifahaʼö ita ba zindruhu sanandrösa khönia hegöi ohitö dödönia. (Yoh. 8:31, 32) Ibeʼe khöda mbanua niha Keriso si tobali sanuturu lalada ba sotuhini yaʼita. Itolo ita ba wolohe noro dödöda iadaʼa, ba ibeʼe khöda wanötöna ba zi so miföna yaʼia daʼö faʼauri si lö aetu. (Zin. 68:20; Fam. 21:3, 4) Na taʼangerönusi hewisa waʼomasinia khöda, tatu taʼomasiʼö ia. Ba ginötö taʼomasiʼö Yehowa taʼokhögö wangataʼufi satulö. Ataʼu ita na tabeʼe afökhö dödönia börö me taʼomasiʼö sibai ia.

15. Hewisa Makayla ba wangasiwaisi faʼataʼunia na lö mofozu?

¹⁵ Makayla nitutunö moroi yawa, tola iʼasiwai daha-tahania sanandrösa ba waʼataʼunia na lö mofozu, börö me aboto ba dödönia wa lö tebulö Yehowa ba wangefaʼö sala. ”Aboto ba dödögu wa fefu ita lö moʼahonoa ba hasambalö tafalua zala. Hizaʼi uʼila göi wa iʼomasiʼö ita Yehowa ba iʼefaʼö zalada börö höli.” Faʼomasinia khö Yehowa zamarou yaʼia ba wolulu faʼaurinia ba ibayagö ia idanö.

16. Hewisa Miles ba wangasiwai faʼataʼunia me göna ia folohi?

¹⁶ Miles, so khönia waʼataʼu na lö itehegö mamania tebayagö ia idanö. Tobali, iʼandrö wanolo khö zatua samasui. Imane Miles, ”Samösa moroi ba gotalua zatuania tenga Samaduhuʼö. Itolo ndraʼo ba woʼangeragö hadia zinangea uwaʼö enaʼö lö aombö dödö mamagu ba gangetulagu tebayagö idanö ba tenga börö bapagu wa ufalua daʼa.” Lö omuso dödö mama Miles ba gangetula nihalönia. Lua-luania, findra ia moroi ba nomo, hizaʼi lö maniasa ia ba gangetulania. Imane, ”Tofakha ba dödögu me ufahaʼö ndraʼo ba ngawalö zi sökhi si no ifalua Yehowa khögu. Ba ginötö udouʼö wamahaʼö yaʼo sanandrösa ba höli nibeʼe Yesu, aboto ba dödögu wa iʼomasiʼö sibai ndraʼo Yehowa. Daʼö zamarou yaʼo ba wolulu faʼaurigu khö Yehowa ba ubayagö ndraʼo idanö.”

17. Hadia ginötö si no tebeʼe khöda?

¹⁷ Me iʼa Khawa mbua geu si so ba Kabu Edena, itimbagö Namania. Me fao göi Gadamo ba wemanga mbua andrö, no iforomaʼö wa lö iʼandrö saohagölö ba ngawalö zi sökhi si no ifalua Yehowa khönia. Fefu ita no tebeʼe khöda ginötö ba wangoromaʼö wa yaʼita tenga simane Adamo ba Khawa. Taʼandrö sibai saohagölö ba zi no ifalua Yehowa khöda. Na tebayagö ita idanö, no taforomaʼö khö Yehowa wa faduhu dödöda wa yaʼia zinangea zotatugöi goi-goi hadia zatulö hegöi si lö atulö. No taforomaʼö wa taʼomasiʼö Namada ba tafaduhusi tödö ia.

18. Hewisa enaʼö mofozu ndraʼugö wamosumange Yehowa?

¹⁸ Me no aefa tebayagö ita idanö, moguna lö tebulö ita ba wamalua somasi Yehowa, tenga ba zomasi ita. Zuta nono mbanua Lowalangi samalua simane daʼö. Tola öfalua simane yaʼira, na lö tebulö ödouʼö waʼaboto ba dödöu ba Daromali Lowalangi, Sura Niʼamoniʼö. Aefa daʼö, böi tebulö fariawö khö ndra talifusö ba böi böhöli wanuriaigö si fao faʼaterou dödö, ba wamatunö ba niha böʼö hadia zi no öfahaʼö yaʼugö sanandrösa ba waʼomasi Namada. (Heb. 10:24, 25) Ba ginötö öhalö gangetula, fondrondrongo mene-mene nibeʼe Yehowa khöu si so ba Daromalinia hegöi ba organisasinia. (Yes. 30:21) Fefu daʼö zanolo yaʼugö enaʼö mofozu.​—Gamd. 16:3, 20.

19. Hadia zinangea öʼangeragö ba hadia mbörö?

¹⁹ Na lö tebulö öʼangeragö wa oya gunania khöu ba woloʼö fanuturu lala moroi khö Yehowa, tola itugu tedou waʼomasiu khönia hegöi goi-goinia. Na öfalua daʼö, tebai idönisi ndraʼugö Satana ba wondröi famosumange Yehowa. Khalaigö iadaʼa, hewisa dania waʼaurimö ba zi ngahönö fakhe mifönada. Na ifuli itörö tödöu, öʼandrö saohagölö börö me no angetula si sökhi me tebayagö ndraʼugö idanö!