1. Adama le Efa ba ile ba loba eng, gona mafelelo e bile afe?

O NAGANA gore ke mang yo a swanelegago go re beela melao ya seo se lokilego le se sebe? Ge Adama le Efa ba be ba eja seenywa sa sehlare sa go tseba botse le bobe, ba ile ba bontšha gabotse gore ga ba nyake go kwa Jehofa le melao ya gagwe. Ba ile ba kgetha go ipeela melao ya bona ya seo se lokilego le se sebe. (Gen. 3:22) Eupša nagana ka dilo tšeo ba ilego ba di loba. Ba ile ba loba segwera sa bona le Jehofa. Ba ile ba ba ba loba sebaka sa go tlo phela ka mo go sa felego gomme ba fetišetša bana ba bona sebe le lehu. (Baroma 5:12) Kgetho yeo Adama le Efa ba e dirilego e ba tlišeditše mathata feela.

2-3. (a) Molaki wa Moethiopia o ile a arabela bjang ge Filipi a be a mmotša ditaba tše dibotse? (b) Re hwetša ditšhegofatšo dife ge re kolobetšwa, gona re tlo araba dipotšišo dife?

² Tsela yeo Adama le Efa ba ilego ba arabela ka yona e fapana le yeo molaki wa Moethiopia a ilego a arabela ka yona ge Filipi a mmotša ditaba tše dibotse. Molaki yoo o ile a leboga kudu seo Jehofa le Jesu ba bego ba mo diretše sona moo a ilego a kolobetšwa. (Dit. 8:34-38) Go swana le molaki yo, ge re ineela go Modimo e bile re kolobetšwa re bontšha Jehofa le Jesu gore re leboga seo ba re diretšego sona. Le gona re bontšha gore re bota Jehofa e bile re a bona gore ke yena a swanelegago go re beela melao ya seo se lokilego le se sebe.

³ Nagana ka ditšhegofatšo tšeo re di hwetšago ge re hlankela Jehofa. E nngwe ya tšona ke gore Jehofa o tla re fa dilo ka moka tšeo Adama le Efa ba di lobilego, go akaretša le bophelo bjo bo sa felego. Ka ge re na le tumelo go Jesu Kriste, Jehofa  o re lebalela diphošo tša rena gomme a re nea letswalo le hlwekilego. (Mat. 20:28; Dit. 10:43) Le gona re ba karolo ya lapa la Jehofa la bahlanka ba gagwe bao a ba amogetšego, re dutše re lebeletše pele bokamosong bjo bo kgahlišago bjo bo sa tlago. (Joh. 10:14-16; Baroma 8:20, 21) Eupša gaešita le ge ba bangwe bao ba tsebago Jehofa ba tseba ditšhegofatšo tše, ba dikadika go latela mohlala wa molaki wa Moethiopia. Ke’ng seo se ka bago se ba thibela go kolobetšwa? Le gona ba ka fenya bjang ditlhohlo tšeo?

4-5. Lesogana leo le bitšwago Avery le kgarebe yeo e bitšwago Hannah ba ile ba lebeletšana le ditlhohlo dife?

⁴ Go se itshepe. Batswadi ba Avery ke Dihlatse tša Jehofa. Tatagwe o bea mohlala o mobotse tabeng ya go ba tate yo lerato le go ba mogolo yo a hlokomelago phuthego. Lega go le bjalo, Avery o ile a dikadika go kolobetšwa. Ka baka la’ng? O re: “Ke be ke nagana gore nka se tsoge ke kgonne go bea mohlala o mobotse go swana le tate.” Le gona Avery o be a sa itshepe, a nagana gore a ka se kgone go phethagatša dikabelo tšeo a bego a ka di newa ka morago ga gore a kolobetšwe. O re: “Ke be ke tšhošwa ke go tlo rapela pele ga batho, go nea dipolelo goba go etelela pele sehlopha sa tšhemo.”

⁵ Hannah, yo a nago le mengwaga e 18, le yena o be a na le bothata bjo bogolo bja go se itshepe. O godišitšwe ke batswadi bao ba hlankelago Jehofa. Eupša o ile a bona okare a ka se kgone go phela ka melao ya Jehofa. Ka baka la’ng? Hannah o be a inyatša kudu. Ka dinako tše dingwe o be a nyama kudu moo e lego gore o be a ikgobatša mmeleng, gomme seo se dira gore dilo di nape di senyege le go feta. O re: “Ga sa nka ka botša motho ka seo ke bego ke se dira, ke ra le batswadi ba ka. Ke be ke nagana gore Jehofa a ka se tsoge a amogetše motho wa go swana le nna.”

6. Ke’ng seo se bego se thibela Vanessa go kolobetšwa?

⁶ Bagwera ba babe. Vanessa yo a nago le mengwaga e 22 o re: “Ke be ke na le mogwera yo mogolo yo ke tsebanego le yena mengwaga e ka bago e lesome.” Eupša mogwera wa Vanessa o be a sa thuše Vanessa go fihlelela pakane ya gagwe ya go kolobetšwa. Seo se ile sa kweša Vanessa bohloko, o re: “Ke thatafalelwa ke go dira bagwera gomme ke be ke tshwenyegile ka gore ge nka kgaotša segwera seo, ke be nka se tsoge ke hweditše mogwera yo ke kwanago le yena go swana le mogwera yoo wa ka.”

7. Kgarebe yeo e bitšwago Makayla e be e tšhošwa ke’ng, gona ka baka la’ng?

⁷ Go boifa go dira sebe se segolo. Makayla o be a na le mengwaga e mehlano ge buti wa gagwe a kgaolwa ka phuthegong. Ge a dutše  a gola, o ile a bona kamoo dilo tšeo buti wa gagwe a bego a di dira di bego di nyamiša batswadi ba gagwe. Makayla o re: “Ke be ke tšhošwa ke gore ge nka dira sebe ka morago ga gore ke kolobetšwe ke be ke tlo kgaolwa, gomme ka kweša batswadi ba ka bohloko le go feta.”

8. Lesogana leo le bitšwago Miles le be le tšhošwa ke’ng?

⁸ Go boifa go ganetšwa. Tatago Miles le mmagwe yo e sego wa madi ke Dihlatse tša Jehofa, eupša mmagwe wa madi ga se Hlatse ya Jehofa. Miles o re: “Ke dutše le mma ka mengwaga e 18, gomme ke be ke tšhaba go mmotša gore ke nyaka go kolobetšwa. Ke be ke bone ka tsela yeo a ilego a galefa ka yona ge tate e be e eba Hlatse ya Jehofa. Ke be ke tšhošwa ke gore le nna a ka tla a ntlhafišetša bophelo.”

9. Ge o dutše o ithuta ka tsela yeo Jehofa a sa felego pelo ka yona le kamoo a nago le lerato ka gona, mafelelo e tla ba afe?

⁹ Adama le Efa ba ile ba kgetha go se hlankele Jehofa ka gobane ba be ba sa mo rate kudu. Lega go le bjalo, Jehofa o ile a ba dumelela go phela nako e telele gore ba be le bana le go ikgethela gore ba ka godiša bana bao bjang. Go se go ye kae, mafelelo a phetho ya Adama le Efa ya go se nyake go hlahlwa ke Jehofa a ile a bontšha gore ruri banyalani ba e be e le mašilo. Morwa wa bona yo mogolo o ile a bolaya ngwanabo yo a bego a se na molato, gomme ge nako e dutše e eya ditlogolo tša Adama le tšona di ile tša rata bošoro le go ba le boithati. (Gen. 4:8; 6:11-13) Eupša Jehofa ga se a ka a no tlogelela dilo, o ile a ba le mokgwa o itšego wa go phološa bana ka moka ba Adama le Efa bao ba nyakago go mo hlankela. (Joh. 6:38-40, 57, 58) Ge o dutše o ithuta ka mo go oketšegilego ka go se fele pelo ga Jehofa le kamoo a nago le lerato ka gona, ga go pelaelo gore o tlo mo rata le go feta. O tlo nyaka go gana tsela yeo Adama le Efa ba e kgethilego gomme wa ineela go Jehofa.

10. Ke ka baka la’ng go naganišiša ka Psalme 19:7 go ka go thuša go hlankela Jehofa?

¹⁰ Tšwela pele o ithuta ka Jehofa. Ge o dutše o ithuta ka Jehofa, o tlo kgodišega gore o ka kgona go dula o mo hlankela. Avery, yo re boletšego ka yena pejana o re: “Ke ile ka thoma go itshepa ge ke be ke bala le go naganišiša  ka kholofetšo e lego go Psalme 19:7.” (Bala.) Ge Avery a be a bona kamoo Jehofa a bego a phethagatša kholofetšo yeo, o ile a mo rata le go feta. Go rata Jehofa ga go dire feela gore re itshepe, eupša go re thuša le gore re dule re hlankela Jehofa ka go botega. Hannah, yo re boletšego ka yena pejana o re: “Ge ke be ke bala Beibele le go ithuta yona, ke ile ka lemoga gore ge ke ikweša bohloko, ke kweša le Jehofa bohloko.” (1 Pet. 5:7) Hannah o ile a thoma go ba ‘modiri wa lentšu la Modimo.’ (Jak. 1:22) Mafelelo e bile afe? O re: “Ge ke be ke bona kamoo go kwa Jehofa go bego go nkhola ka gona, ke ile ka mo rata le go feta. Ga bjale ke kgodišegile gore Jehofa o tla dula a ntlhahla ge ke mo kgopela thušo.” Hannah o ile a kgona go fenya mokgwa woo wa go ikgobatša. O ile a ineela go Jehofa gomme a kolobetšwa.

11. Vanessa o ile a dira’ng gore a be le bagwera ba babotse, gona re ka ithuta’ng go se?

¹¹ Kgetha bagwera ka bohlale. Vanessa, yo re boletšego ka yena pejana, o ile a lemoga gore mogwera wa gagwe ke kgale a mo šitiša go hlankela Jehofa. Ka gona o ile a kgaotša segwera sa bona. Eupša Vanessa o ile a ba a dira se se fetego seo. O ile a šoma ka thata go dira bagwera ba bafsa ka phuthegong. O re mohlala wo Noa le lapa la gagwe ba o beilego o ile wa mo thuša. O okeditše ka gore: “Ba be ba phela le batho bao ba bego ba sa rate Jehofa, eupša ga se ba ka ba gwerana le bona, go e na le moo ba ile ba gwerana e le lapa.” Ka morago ga gore Vanessa a kolobetšwe, o ile a thoma go bula madibogo. Ga bjale o re: “Go bula madibogo go nthušitše go dira bagwera ba babotse ka phuthegong ya gešo le diphuthegong tše dingwe.” Le wena o ka ba le bagwera ba babotse ka go dula o swaregile modirong wo Jehofa a re neilego wona.—Mat. 24:14.

12. Adama le Efa ba ile ba palelwa ke go ba le poifo ya mohuta mang, gona seo se ile sa ba le mafelelo afe?

¹² Eba le poifo e swanetšego. Ka dinako tše dingwe go a hlokagala gore re boife. Ka mohlala, re swanetše go boifa goba go tšhaba go nyamiša Jehofa. (Ps. 111:10) Ge nkabe Adama le Efa ba ile ba ba le poifo e bjalo, nkabe ba ile ba kwa Jehofa. Eupša ba ile ba se mo kwe. Ka morago ga gore ba je seenywa sa sehlare sa gare ga tšhemo, mahlo a bona a ile a bulega moo e lego gore ba ile ba bona gore ke badiradibe. Ba ile ba fetišetša sebe sa bona le lehu go bana ba bona. Ka ge ba be ba bona gore ga bjale ba  tseba botse le bobe, ba ile ba thoma go lewa ke dihlong ge ba bona ba se ba apara. Ba ile ba nyaka seo ba ka se aparago.—Gen. 3:7, 21.

13-14. (a) Go ya ka 1 Petro 3:21, ke ka baka la’ng re sa swanela go boifa lehu ka mo go feteletšego? (b) Re na le mabaka afe a go rata Jehofa?

¹³ Gaešita le ge re swanetše go boifa Jehofa, ga se ra swanela go boifa lehu ka mo go feteletšego. Jehofa o re diretše tsela ya go tlo phela ka mo go sa felego. Ge e ba re dira sebe eupša re itshola e le ka kgonthe, Jehofa o tla re lebalela. O tla re lebalela ka baka la tumelo yeo re nago le yona sehlabelong sa topollo sa Morwa wa gagwe. Tsela e bohlokwahlokwa yeo re ka bontšhago gore re na le tumelo ke ka go ineela go Modimo le go kolobetšwa.—Bala 1 Petro 3:21.

¹⁴ Re na le mabaka a mantši a go rata Jehofa. Ga se feela gore o re nea dilo tše dibotse tšeo re di thabelago letšatši le letšatši, eupša e bile o re ruta therešo ka yena le ka merero ya gagwe. (Joh. 8:31, 32) O re neile phuthego ya Bokriste gore e re hlahle le go re thekga. O re thuša gore re kgotlelele mathata a rena gona bjale, le gona o re nea kholofelo ya go tlo phela ka mo go sa felego lefaseng leo le se nago mathata. (Ps. 68:19; Kut. 21:3, 4) Ge re naganišiša ka dilo tšeo Jehofa a šetšego a re diretše tšona go bontšha gore o a re rata, seo se re dira gore re mo rate le go feta. Le gona ge re rata Jehofa, re ithuta go ba le poifo e swanetšego, e lego go boifa go mo kweša bohloko.

15. Makayla o ile a fenya bjang poifo yeo a bego a na le yona ya go tšhaba go dira sebe se segolo?

¹⁵ Makayla, yo re boletšego ka yena pejana, o ile a fenya poifo yeo a bego a na le yona ya go tšhaba gore a ka direla Jehofa sebe. O kgonne se ka morago ga gore a kwešiše gore ruri Jehofa ke Modimo yo a lebalelago. O re: “Ke ile ka kwešiša gore ka moka ga rena ga se ra phethagala gomme re fela re dira diphošo. Eupša ke ile ka kwešiša le gore Jehofa o a re rata le gona o tla re lebalela a diriša sehlabelo sa Morwa wa gagwe.” Go rata Jehofa go ile gwa mo tutueletša gore a ineele go yena gomme a kolobetšwe.

16. Miles o ile a thušwa bjang gore a se sa boifa kganetšo?

¹⁶ Miles, yoo a bego a tšhaba gore mmagwe o tla mo ganetša go kolobetšwa, o ile a nyaka thušo go molebeledi wa tikologo. Miles o re: “Molebeledi wa tikologo le yena o be a goletše ka lapeng leo tatagwe e bego e le Hlatse ya Jehofa gomme mmagwe e se Hlatse ya Jehofa. O ile a nthuša go naganišiša ka seo ke bego ke tla se botša mma go mmontšha gore ke nna ke itiretšego phetho ya go kolobetšwa eupša e be e se tate yo a nkgapeletšago go dira bjalo.” Phetho ya Miles ga se ya ka ya thabiša mmagwe. Mafelelong, Miles o ile a swanelwa ke go tloga ka gae e le gore a kgone go fihlelela pakane ya gagwe ya go kolobetšwa. O re: “Go ithuta ka dilo tše dibotse tšeo Jehofa a ntiretšego tšona go ile gwa nkgoma pelo. Ge ke be ke naganišiša ka sehlabelo sa Jesu sa topollo, ke ile ka lemoga gore ruri Jehofa o a nthata. Seo se ile sa ntira gore ke ineele go Jehofa gomme ke kolobetšwe.”

17. Re na le sebaka sa go bontšha’ng?

¹⁷ Ge Efa a be a eja seenywa sa sehlare seo se bego se le serapeng sa Edene, o ile a bontšha gore o gana go kwa Tatagwe. Ge Adama le yena a be a eja seenywa seo, o ile a bontšha gore ga a leboge Jehofa ka dilo ka moka tše dibotse tšeo a mo diretšego tšona. Ka moka ga rena re na le sebaka sa go bontšha gore ga re swane le Adama le Efa. Go e na le moo, re swanetše go bontšha gore re leboga dilo ka moka tšeo Jehofa a re diretšego tšona. Ge re kolobetšwa, re bontšha Jehofa gore re dumela gore o na le tshwanelo ya go re beela melao ya seo se lokilego le se sebe. Re bontšha gore re rata Tatago rena le gore re a mmota.

18. Ke’ng seo se tlago go go thuša gore o atlege ge o hlankela Jehofa?

¹⁸ Ka morago ga go kolobetšwa re swanetše go dula re dira seo Jehofa a se nyakago, e sego seo rena re se nyakago. Batho ba bantši bao ba hlankelago Modimo lehono ba dira seo a se nyakago. O ka swana le bona ge e ba o tšwela pele o ithuta Lentšu la Modimo, o dula o bokana gotee le bana beno le dikgaetšedi e bile ka mafolofolo o botša ba bangwe seo o ithutilego sona ka Tatago yo lerato. (Baheb. 10:24, 25) Ge o dira diphetho, theetša keletšo yeo Jehofa a go neago yona a diriša Lentšu la gagwe le mokgatlo wa gagwe. (Jes. 30:21) Ge e ba o dira bjalo, dilo ka moka tšeo o di dirago di tla atlega.—Die. 16:3, 20.

19. Ke’ng seo o swanetšego go dula o nagana ka sona, gona ka baka la’ng?

¹⁹ Ge o dutše o bona tsela yeo o holegago ka yona ge o latela tlhahlo ya Jehofa, o tlo mo rata kudu e bile wa rata melao ya gagwe. Ka gona ga go na selo le ge e le sefe seo Sathane a ka go goketšago ka sona seo se ka go thibelago go hlankela Jehofa. Ipone o phela mengwaga e sekete go tloga gona bjale. Ka nako yeo, ruri o ka se itshole gore o ile wa dira phetho ya go kolobetšwa!