1. Ádam dóó Íiv haʼátʼíísh yóóʼayííłdéél, dóó haʼátʼíí bee nihá hojiiłʼaʼ?

HÁÍSH éí yáʼádaatʼéehii índa doo yáʼádaatʼéehii nihididooniiłgi bee bóhólnííh? Ádam dóó Íiv tsin bineestʼąʼ bitsʼą́ą́dóó yáʼátʼééhjí índa doo yáʼátʼééhjí bąąhdóó ajííyą́ą́ʼ, Jiihóvah dóó bibee éʼétʼéii doo baʼjózlíiʼ da bee ííshjání ájiilaa. Éí yáʼátʼéehii índa doo yáʼátʼéehii bee átʼéhígíí tʼáá hó íizhniizı̨́įʼgo biʼjiilaa. (Gen. 3:22) Ákondi Ádam dóó Íiv haʼátʼíísh yóóʼayííłdéél? Jiihóvah bikʼis jizlı̨́ı̨́ʼ yę́ę yóóʼajííłdéél. Áádóó iiná doo ninítʼiʼii yóóʼazhdííʼą́ dóó niʼiilzííh índa anoonééł haʼáłchíní baazhdiníʼą́. (Rom. 5:12) Ádam dóó Íiv áʼjiilaaígíí tiʼhoonííh bee hojiiłʼaʼ.

2. Yúnak nilínígíí éí Philip bił nahasneʼgo haa jiidzaa?

² Ádam dóó Íiv áátʼįįdígíí áádóó Iithiyópiyadę́ę́ʼ yúnak nilínígíí éí Philip bił nahasneʼii bił ałhąąh naaʼnilgo baa nitsídeikees doo. Yúnak yaa ahééh niizı̨́įʼgo Jiihóvah dóó Jesus bá áátʼįįdígíí binahjįʼ tsxı̨́įłgo baptize ábiʼdiilyaa. (Acts 8:​34-38) Yúnak nahalingo, Jiihóvah baa ádidíítʼááł dóó baptize ánihiʼdidoolnííł binahjįʼ Bí dóó Jesus nihá áyiilaaígíí baa ahééh daniidzin doo. Jiihóvah badaʼííníidlíigo, yáʼátʼéehii índa doo yáʼátʼéehii tʼáá Bí bee bóhólnííh baa ákodaniidzin.

3. Baptize ádanihiʼdiilyaaígíí haitʼéego bee nihikʼihojídlíi doo, dóó haʼátʼíísh baa nídadíitʼįįł?

³ Jiihóvah bá nideilʼaʼgo nihikʼihojídlíi doo! Ádam dóó Íiv yóóʼayííłdéél yę́ę Jiihóvah nihaa neidooléełgo  bee nihikʼihojídlíi doo. Iiná doo ninítʼiʼii ałdóʼ nihaidoolééł. Jesus beʼiinaʼ nihá ninéidiníʼánígíí baa ahééh daniidzingo éí ádeitʼįįłii bee ííshjání ádeiyíníilzin. Ákótʼéego Jiihóvah éí nidaʼayiilzihígíí nihá yóóʼanéidiyiiʼaah dóó nihíniʼ bee hashtʼedítʼéego áyósin. (Matt. 20:28; Acts 10:43) Áádóó Jiihóvah baʼáłchíní dadiidleeł. (John 10:​14-16; Rom. 8:​20, 21) Azhą́ díí nihá yáʼátʼéeh ndi, łaʼ Jiihóvah yéédahoosįįdígíí éí yúnak íʼiilaaígíí yichʼįʼ daastiʼ. Baptize ádabiʼdoolniiłgo haʼátʼíísh tʼą́ą́ʼ ádabósin? Áádóó haitʼéego bidínóołtłʼahígíí yikʼeh dadidoodleeł?

4. Avery haʼátʼíísh há nantłʼa?

⁴ Doo ádaa hojídlíi da. Avery bizhéʼé dóó bimá éí Jiihóvah Yá Halneʼé nilı̨́. Bizhéʼé éí aa áhályą́ dóó elder nizhónígo éʼéłʼínígíí nilı̨́. Ákondi Avery baptize ábiʼdidoolníił ndi yichʼįʼ tʼą́ą́ʼ kótʼé. Haʼátʼíísh biniinaa? Avery ání: “Shizhéʼé yáʼátʼéehgo éʼéłʼínígíí doo shá bíighahgóó baa nitséskees. Áłah náʼádleehgi sodidiilzįįł dóó hodiilnih, doodaiiʼ nidahojilneʼgo bikʼi díníʼı̨́ı̨́ʼ shiʼdooʼniidgo baa shíniʼ.”

5. Hannah haʼátʼíísh há nantłʼa?

⁵ Hannah, 18 honááhaigo, éí doo ádaa ahójídlíi da. Hazhéʼé dóó hamá éí Jiihóvah yá naalʼaʼ, éí bee hoyaa hooʼaʼ. Ákótʼée ndi Jiihóvah bibee éʼétʼéii hweʼiinaʼ bee éʼélʼı̨́į dooleełígi tʼáá naaki hoł nilı̨́. Haʼátʼíísh biniinaa? Hannah tʼáá íiyisíí doo ádaa ahójídlíi da. Atíʼazhdílʼı̨́įgo ádaa tsízdeezkéez, tʼóó tséʼádin áde ájiilaa. Hannah ání: “Doo éí háiida bił hashneʼ da shizhéʼé dóó shimá ndi, ákótʼéego bee shąąh dahazʼánígíí binahjįʼ Jiihóvah doo shinízin da nisin.”

6. Vanessa baptize áhoʼdidoolníiłjįʼ haʼátʼíísh tʼą́ą́ʼ kóbísin?

⁶ Hakʼis nahalóʼ. Vanessa, 22 honááhaigo, ání: “Shikʼis tʼááłaʼí íinisin ńtʼééʼ.” Ákondi, Vanessa baptize áhoʼdidoolníiłjįʼ hakʼis doo há yíneedlı̨́į da. Vanessa díí biʼdiiłʼá dóó kójíní: “Shikʼis łaʼ ánáádeeshdlííł shá nantłʼa, doo shikʼis nilı̨́į da bidííniidgo, doo łaʼ ákótʼéégóó náás shikʼis doo, nisingo baa shíniʼ.”

7. Makayla haʼátʼíísh bééjíldzid, dóó haʼátʼíísh biniinaa?

⁷ Yéigo azhdoosihígíí bééjíldzid. Makayla ashdlaʼ binááhaigo hánaaí disfellowship ábiʼdiilyaa. Jineeyą́ągo, hánaaí disfellowship ábiʼdiilyaago hazhéʼé dóó hamá bijéí neezgaigo ájiilaa. Makayla ájíní: “Baptize áshiʼdidoolnííł,  shí ałdóʼ adeesihígíí dóó disfellowship áshiʼdidoolnííł binásdzid, éí shizhéʼé dóó shimá yínííł biih deeshnił niizı̨́ı̨́ʼ.”

8. Miles haʼátʼíísh bééjíldzid?

⁸ Akʼijįʼ ídlı̨́ bééjíldzid. Miles hazhéʼé dóó hamá ájíłʼínígíí Jiihóvah yá naalʼaʼ, ndi hamá doo Jiihóvah Yá Halneʼé nilı̨́į da. Miles ání: “18 nááhai shimá bił shighan, áko baptize áshiʼdidoolníiłgo bił hodeeshnihígíí binásdzid. Shizhéʼé éí Jiihóvah Yá Halneʼé silı̨́įʼgo, shimá doo bił yáʼátʼééhgóó baa ákonisin. Éí shichʼįʼ nahwiiłnáa dooígíí binásdzid.”

9. Jiihóvah nízaadgóó haʼólníinii dóó ayóóʼóʼóʼníinii nilı̨́ bóhoołʼaahgo, haash díínííł?

⁹ Ádam dóó Íiv éí Jiihóvah doo yá naalʼaʼ da, háálá Diyin God ayóóʼájóʼnínę́ę doo hwiiʼ hólǫ́ǫ da. Ákótʼée ndi, haʼáłchíní hodooleeł biniyé nízaadgóó hijináago, dóó tʼáá hó haʼáłchíní jineesą́ Jiihóvah haidiníʼą́. Ádam dóó Íiv éí Jiihóvah bitsʼą́ą́jígo dashdiiʼáázh, tʼáá hó ajisihígíí bee ádaa ákozhniizı̨́ı̨́ʼ. Kéin éí bitsilí tʼáadoo biniyéhígóó yiyiisxı̨́, áko nihookáaʼgi tsiʼadeesdeeʼgo ájiilaa. (Gen. 4:8; 6:​11-13) Ákondi, tʼáá átʼé Ádam dóó Íiv baʼáłchíní Jiihóvah yá ndaalʼaʼ danízinii, éí yisdéidoonił. (John 6:​38-40, 57, 58) Jiihóvah nízaadgóó haʼólníinii dóó ayóóʼóʼóʼníinii nilı̨́ bóhoołʼaahgo, neʼayóóʼóʼóʼniʼ nooséeł doo. Ádam dóó Íiv áátʼįįdígíí doo biʼdíílíił da, dóó Jiihóvah baa ádidiitʼááł.

10. Jiihóvah bá nanilʼaʼgo, haʼátʼíísh biniinaa Psalm 19:7 baa nitsíníkeesgo níká adoolwoł?

¹⁰ Tʼáá náásgóó Jiihóvah baa íhoołʼaah doo. Jiihóvah átʼéiigi bíhoołʼaahgo, náásgóó nizhónígo bá nijilʼaʼ doo baʼíínílíi doo. Avery ání: “Psalm 19:7 * (Yíníłtaʼ.) góneʼ Jiihóvah yee haadzíʼígíí naashkaahgo dóó baa nitséskeesgo baʼííníshłíigo áshiilaa.” Jiihóvah yee haadzíiʼii bihoolyaago, Avery éí  ayóóʼájóʼníinii bidziilgo ájiilaa. Ayóóʼóʼóʼniʼ éí baʼjólíhígíí bidziilgo áyósin áádóó Jiihóvah dóó íinízinígíí áłtsé baa nitsídeikeesgo yee nihíká adoolwoł. Hannah ání: “Diyin Bizaad naashkaahgo, atídíshʼı̨́įgo éí Jiihóvah ałdóʼ atéshʼı̨́ı̨́ lágo baa ákoniizı̨́ı̨́ʼ.” (1 Pet. 5:7) Hannah éí Diyin Bizaad yikʼeh hółʼı̨́. (Jas. 1:22) Haʼátʼíí bitsʼą́ą́dóó bóhojiiłʼą́ą́ʼ? Hannah ánáádooʼniid: “Jiihóvah bikʼeh honishʼı̨́įgo shíká eelwodgo baa ákoniizı̨́ı̨́ʼ, Jiihóvah ayóóʼííníshʼní bidziilgo íishłaa. Kʼad shił bééhózin, Jiihóvah tʼáá áłahájįʼ shíká análwoʼ.” Hannah éí atízhdílʼínę́ę doo ájítʼı̨́į da jizlı̨́ı̨́ʼ. Jiihóvah baa ázhdeetʼą́ągo baptize áhoʼdiilyaa.

11. Haitʼéego Vanessa bikʼis yáʼádaatʼéhígíí áyiilaa, dóó haʼátʼíísh bitsʼą́ą́dóó bídahwiidiilʼááł?

¹¹ Nikʼis ádanileʼii hazhóʼó baa nitsíníkees. Vanessa éí Jiihóvah bá nijilʼaʼgo hakʼis tʼą́ą́ʼ kóhósin yę́ę baa ákozhniizı̨́ı̨́ʼ. Áko bił ałkʼis jílínę́ę nizhníłtʼiʼ. Ákondi áłah náʼádleehdi hakʼis yáʼádaatʼéhígíí ájiilaa. Nóah dóó bighan hazʼą́ą́dóó ádaatʼįįdígíí yee háká eelwod. Vanessa ání: “Diné hanaagóó bił hazʼánígíí Jiihóvah doo ayóóʼádeiyóʼníi da, ndi tʼáá bí bighan hazʼą́ą́dóó nizhónígo ahił nidaalnish.” Baptize áhoʼdiilyaa bikééʼdóó, Vanessa éí pioneer jizlı̨́ı̨́ʼ. Kʼad kójíní: “Daa Kingdom Hallgóó shikʼis yáʼádaatʼéhígíí íishłaa.” Ní ałdóʼ tʼáá bíninilʼą́ągo Jiihóvah bá nanilʼaʼ doo, nikʼis yáʼádaatʼéhígíí ádíílííł.—Matt. 24:14.

12. Ádam dóó Íiv haʼátʼíísh tʼáadoo ííshjání áyiilaa da, dóó haa jiidzaa?

¹² Hoł ílı̨́įgo ájósin doo. Jiihóvah yéigo nihił nilı̨́įgo, doo bił yáʼátʼéehii doo ádadiilníił da. (Ps. 111:10) Ádam dóó Íiv éí Jiihóvah bił ílı̨́įgo, doo bitsʼą́ą́jígo nijiizhʼaazh da ńtʼééʼ. Ákondi Jiihóvah doo bikʼeh hojííłʼįįd da. Bikééʼdóó, hanááʼ ąą ádzaa áko ajisiihgo hoł bééhoozin. Ajisiih dóó anoonééł tʼéiyá haʼáłchíní baazhdiníʼą́. Jiihóvah bibee hazʼáanii doo yikʼeh hóółʼįįd da yaa ákonízingo, tʼáá jilchíʼígo ádaa yázhniizı̨́įʼgo akʼijistiʼ.—Gen. 3:​7, 21.

13. 1 Peter 3:21 bikʼehgo, haʼátʼíísh biniyé anoonééł tʼáadoo binéiildzid da doo?

 ¹³ Anoonééł tʼáadoo binéiildzid da doo. Jiihóvah éí iiná doo ninítʼiʼii nihá yee hoołʼaʼ. Nidaʼayiilzíih baa danihíniʼgo, Jesus beʼiinaʼ nihá ninéidiníʼánígíí baa ahééh daniidzingo binahjįʼ Jiihóvah nihaa neidiiyiiʼaah. Niheʼoodląʼ ííshjání ádeilʼı̨́įgo Jiihóvah baa ádidiitʼááł dóó baptize ánihiʼdidoolnííł.—1 Peter 3:21 * yíníłtaʼ.

14. Haʼátʼíísh biniyé Jiihóvah ayóóʼádeíníiʼní?

¹⁴ Ląʼígóó biniyé Jiihóvah ayóóʼádeíníiʼní. Tʼáá ákwíí jı̨́ nihá yáʼádaatʼéhígíí nihichʼįʼ kwííłʼı̨́. Tʼáá aaníinii ádaatʼéii dóó íinízinígíí yee nanihinitin. (John 8:​31, 32) Bił áłah nídeidleehígíí nihidziilgo ádanihósin dóó nihíká anídaalwoʼ, díí ałdóʼ Jiihóvah nihainílá. Nihichʼįʼ nidahwiiʼnáago hadaʼííníilníigo yee nihíká análwoʼ. Iiná doo ninítʼiʼii nihił chohooʼı̨́įgo nizhónígo kéédahoniitʼı̨́į doo nihá yinízin. (Ps. 68:19; Rev. 21:​3, 4) Jiihóvah nihá áyiilaaígíí beʼayóóʼóʼóʼniʼ nihichʼįʼ ííshjání áyiilaa. Díí baa nitsídeikeesgo binahjįʼ áhą́dígo ayóóʼííníiʼníi doo. Jiihóvah yéigo nihił nilı̨́įgo índa doo bił yáʼátʼéehii doo ádadiilníił da, ákótʼéego Jiihóvah ayóóʼádeíníiʼníi doo.

15. Makayla haitʼéego náldzid yę́ę yikʼeh deesdlı̨́ı̨́ʼ?

¹⁵ Jiihóvah aa náhiditʼaahígíí Makayla bił bééhoozįįdgo náldzid yę́ę yikʼeh deesdlı̨́ı̨́ʼ. Makayla ání: “Tʼáá áníiltso nidaʼayiilzííh baa ákoniizı̨́ı̨́ʼ. Jiihóvah ayóóʼánihóʼní dóó Jesus beʼiinaʼ nihá ninéidiníʼánígíí binahjįʼ Jiihóvah nihaa náhidíʼaah shił bééhoozin.” Jiihóvah ayóóʼáyóʼníigo hweʼiinaʼ baa ázhdeetʼą́ągo baptize áhoʼdiilyaa.

16. Miles haitʼéego náldzid yę́ę yikʼeh deesdlı̨́ı̨́ʼ?

¹⁶ Miles baptize ábiʼdidoolníiłgi éí hamá ájidooníłígíí bééjíldzid, áko circuit overseer bíká eelwod. Miles ání: “Circuit overseer ‘Shí ałdóʼ ákótʼéego shiyaa hooʼaʼ,’ shiłní. Tʼáá shí íínísingo baptize áshidiʼdoolnííł, shizhéʼé doo yishiníłchéeh da. Díí shimá yikʼididootı̨́įłgo biniyé, circuit overseer yee shíká eelwod.” Miles bimá éí doo yaa bił hózhǫ́ǫ da. Hamá bighandę́ę́ʼ chʼíhodiʼneelchą́ą́ʼ, ndi tʼáá bee bizhdiilkaal. Miles ání: “Jiihóvah yáʼátʼéehgo shá íʼiilaaígíí shijéí yidiisnááʼ. Jesus beʼiinaʼ nihá ninéidiníʼánígíí baa nitséskeesgo, Jiihóvah ayóóʼáshóʼníigo baa ákoniizı̨́ı̨́ʼ. Éí binahjįʼ Jiihóvah baa ádaa ádinishtʼą́ągo baptize áshiʼdiilyaa.”

17. Haʼátʼíísh nihá bohónéedzą́?

¹⁷ Íídendi, Íiv tsin bineestʼąʼ bąąhdóó ajííyą́ąʼgo, Hazhéʼé doo bikʼeh hojííłʼįįd  da. Ádam ałdóʼ éí ajííyą́ąʼgo, Jiihóvah yáʼádaatʼéehii há áyiilaa yę́ę doo baa ahééh jiniizı̨́įʼ da. Tʼáá áníiltso Ádam dóó Íiv áátʼįįdígíí doo nihił yáʼádaatʼéeh da ííshjání ádadiilníiłgo nihá bohónéedzą́. Baptize ánihiʼdidoolníiłgi, Jiihóvah éí yáʼádaatʼéehii índa doo yáʼádaatʼéehii nihididooniiłgi bee bóhólnííh bichʼįʼ ííshjání ádadiilnííł. Nihizhéʼé ayóóʼádeíníiʼní dóó badaʼííníidlí ííshjání ádeíníilzin.

18. Jiihóvah bá nanilʼaʼgo haitʼéego yáʼátʼéehgo ná ádoonííł?

¹⁸ Baptize ánihiʼdiilyaago, tʼáá ákwíí jı̨́ Jiihóvah bibee éʼétʼéii bikʼeh honiilʼı̨́įgo łahda nihá nantłʼa. Ndi ląʼí damííl ánéelą́ą́ʼ ákótʼéego diné kéédahatʼı̨́. Diyin Bizaad tʼáá áłahájįʼ naniłkaah, dóó nibrothers índa nisisters bił hónílǫ́, áádóó náhólneʼgo Jiihóvah átʼéiigi baa yáníłtiʼ. (Heb. 10:​24, 25) Ádaa dinítʼą́ągo, Jiihóvah Bizaad dóó biorganization bikʼeh honíłʼı̨́. (Isa. 30:21) Áko tʼáá ałtso áníłʼínígíí yáʼátʼéehgo ná ádoonííł.—Prov. 16:​3, 20.

19. Haʼátʼíísh baa ákonínízin doo, dóó haʼátʼíísh biniinaa?

¹⁹ Jiihóvah bibee naʼnitin yee níká análwoʼ baa ákonínízingo, Jiihóvah dóó bibee éʼétʼéii ayóóʼííníʼníinii nooséeł doo. Séítan yíʼoolkąąhígíí éí Jiihóvah bá nanilʼaʼgo doo yitsʼą́ąjįʼ kónídoolíił da. One thousand nááhaijįʼ hoolzhiizhgo, áadi nanináago baa nitsíníkees. Baptize ániʼdiilyaa yę́ędą́ą́ʼ, nátʼą́ą́ʼ baa nitsínááníkeesgo, éí aláahdi ílı̨́įgo baa ákonínízin doo!