1. Adamu na Haawa bakafeerwa ki, kandi hakarugamu ki?

NOOTEEKATEEKA ngu n’oha ohikire kutaho emitindo y’ekirungi n’ekibi? Adamu na Haawa ku baariire aha muti gw’okumanya ekirungi n’ekibi, bakooreka butunu ngu tibarikwesiga Yehova n’emitindo ye. Bakacwamu kutaho emitindo eyaabo ey’ekirungi n’ekibi. (Kut. 3:22) Teekateeka aha bi baafeereirwe. Bakafeerwa omukago gwabo na Yehova. Bakafeerwa n’omugisha gw’okugumaho ebiro byona, kandi baahunguza abaana baabo ekibi n’okufa. (Rom. 5:12) Okucwamu kwa Adamu na Haawa kukarugamu obusaasi bwingi.

2-3. (a) Omwesiopia omukonwa akakora ki Filipo ku yaamubuuriire? (b) Twabatizibwa nitutunga migisha ki, kandi nituza kugarukamu bibuuzo ki?

² Gyeragyeranisa emitwarize ya Adamu na Haawa n’oku Omwesiopia omukonwa yaatwarize, Filipo ku yaamubuuriire. Omukonwa akasiima munonga eki Yehova na Yesu baamukoreire, kandi yaabatizibwa ahonaaho. (Byak. 8:34-38) Ku turikwehayo ahari Ruhanga nk’omukonwa ogwo kandi tukabatizibwa, naitwe haine eki turikuba nitworeka butunu. Nitworeka ngu nitusiima eki Yehova na Yesu baatukoreire. Ekindi, nitworeka ngu nitwesiga Yehova, kandi ngu niwe ahikire kutaho emitindo y’ekirungi n’ekibi.

³ Teekateeka aha migisha ei turikutunga twaheereza Yehova! Naija kutuha byona ebi Adamu na Haawa baafeereirwe, otwariiremu n’omugisha gw’okugumaho ebiro byona. Twikiririza omuri Yesu Kristo, Yehova naatusaasira enshobe zaitu, reero tugira omutima ogutarikweshinja. (Mat. 20:28; Byak.  10:43) Nitugira n’omugisha gw’okuba omu ka ya Yehova ey’abaheereza be abu arikusiima abaine amatsiko g’ebiro birungi by’omumaisho. (Yoh. 10:14-16; Rom. 8:20, 21) Kwonka n’obu turaabe nitutunga emigisha egi, abamwe nibeeziringa kutooreza Omwesiopia omukonwa. Niki ekirikubazibira kubatizibwa? Kandi nibabaasa kusingura bata oburemeezi obwo?

4-5. Avery na Hannah bakaba baine buremeezi ki?

⁴ Okwetiina. Abazaire ba Avery n’Abajurizi ba Yehova. Ishe naamanywa nk’omuzaire orikufayo kandi omureeberezi orikukora gye. Kwonka, Avery akaguma naayeziringa kubatizibwa. Ahabw’enki? Naagira ati: “Nkaba ninteekateeka ngu tindikubaasa kutwaza gye nka tata.” Kandi Avery akaba naatiina ngu tarikubaasa kuhikiiriza obujunaanizibwa obu araaheebwe omu biro by’omumaisho. “Nintiina ngu nibaija kungambira kushaba omu maisho g’abantu, kuha embazo, nari kwebeembera abarikuza kubuurira.”

⁵ Hannah, oine emyaka 18, akaba naayetiina. Akoororwa abazaire abarikuheereza Yehova. Kwonka nabwo, akaba naabangaanisa yaaba naabaasa kugyendera aha mitindo ya Yehova. Ahabw’enki? Hannah akaba atandikire kwereeba nk’otaine mugasho. Obumwe, akaba ayehurira kubi munonga atandika n’okwehutaaza akigyendereire, ekyabaire kyongyera kumureetera amaganya. Naagira ati: “Tindagambiire omuntu weena eki naabaire ninkora, n’obu baakuba abazaire bangye, kandi nkaba ninteekateeka ngu tihariho obu Yehova araikiriza ngu mbe omuheereza we ahabw’eki naabaire ninkora omubiri gwangye.”

6. Ahabw’enki Vanessa yaabaire naayeziringa kubatizibwa?

⁶ Okugyemeserezibwa abanywani. Vanessa ow’emyaka 22, naagira ati: “Nkaba nyine omunywani murungi ou naabaire mmazire nawe emyaka nk’ikumi.” Kwonka, munywani wa Vanessa akaba atarikumuhwera kuhika aha kigyendererwa kye eky’okubatizibwa. Ekyo kikareetera Vanessa obusaasi, kandi naagira ati: “Nikiingumira kutunga abanywani, kandi nkaba ninyerarikirira ngu naahendera omukago gwangye nawe nimbaasa kutagaruka kutunga omunywani ondiijo.”

7. Omwishiki orikwetwa Makayla akaba naatiina ki, kandi n’ahabw’enki?

⁷ Okutiina kukora enshobe. Makayla akaba aine emyaka etaano obu munyaanya yaabingwa omu kibiina. Omu kukura kwe, akareeba oku okubingwa kwa munyaanya kwateganiise abazaire be. Makayla naagira  ati: “Nkatiina ngu naabatizibwa nimbaasa kukora enshobe mbingwe omu kibiina kandi nyongyesereze aha busaasi obu abazaire bangye baine.”

8. Ow’eishe-emwe muto orikwetwa Miles akaba naatiina ki?

⁸ Okutiina kuhiiganisibwa. Ishe wa Miles na mukaishe nibaheereza Yehova kwonka nyina ti Mujurizi wa Yehova. Miles naagira ati: “Nkatuura na maawe kumara emyaka 18, kandi nkaba nintiina kumugambira ngu niinyenda kubatizibwa. Nkareeba oku yaatwarize obu tata yaaba Omujurizi wa Yehova. Nkaba nintiina ngu naija kumpiiganisa.”

9. Niki ekirikubaasa kubaho waamanya ngu Yehova aine rukundo kandi ngu naagumisiriza?

⁹ Adamu na Haawa ahabw’okutagira rukundo ehamire bakacwamu kutaheereza Yehova. N’obu kiraabe kiri kityo, Yehova akabaikiriza baazaara abaana, kandi yaabareka baayeteeraho n’emitindo y’okuboorora. Adamu na Haawa ku baarugire ahari Yehova, ebyarugiremu bikooreka butunu ngu okucwamu kwabo n’okw’obushema. Omutabani omukuru akaita omurumuna, bwanyima obushaarizi n’okweyendeza byayeyongyera kukanya. (Kut. 4:8; 6:11-13) Kwonka Yehova akaba aine entebeekanisa y’okucungura abaana ba Adamu na Haawa abarikwenda kumuheereza. (Yoh. 6:38-40, 57, 58) Waayongyera kwega aha kugumisiriza kwa Yehova na rukundo ye, noija kwongyera kumukunda. Noija kwanga kukuratira eky’okureeberaho kya Adamu na Haawa reero oyeheyo ahari Yehova.

10. Okuteekateeka aha biri omu Zaaburi 19:7 nikibaasa kukuhwera kita kuheereza Yehova?

¹⁰ Gumizamu nooyega ebirikukwata ahari Yehova. Waayongyera kwega ebirikukwata ahari Yehova, noija kwongyera kweyikiririzamu ngu noobaasa kuba omusinguzi omu kumuheereza. Avery, owaaba yaagambirweho, naagira ati: “Nkagira obumanzi ku naashomire Zaaburi 19:7, kandi nkateekateeka aha birimu.” (Kishome.) Avery ku yaareebire oku Yehova arikuhikiiriza okuraganisa  kwe okwo, akongyera kumukunda. Rukundo terikukuhwera kugira obumanzi kyonka, beitu neekuhwera n’okwesiga Yehova okakora eki arikwenda. Hannah, owaaba yaagambirweho naagira ati: “Kurabira omu kweshomesa n’okwegyesa Baibuli nketegyereza ngu naayehuutaaza, nindeetera Yehova obusaasi.” (1 Pet. 5:7) Hannah akatandika kworobera ebiri omu ‘kigambo’ kya Ruhanga. (Yak. 1:22) Niki ekyarugiremu? Naagira ati: “Ku naareebire oku ndikugasirwa naayorobera Yehova, nkeeyongyera kumukundira kimwe. Hati nimmanya ngu Yehova naija kuguma naampa obuhabuzi naaba niinyenda obuhwezi bwe.” Hannah akabaasa kusingura omuze gw’okwehuutaaza. Akeehayo ahari Yehova kandi yaabatizibwa.

11. Vanessa akakora ki kutunga abanywani barungi, kandi ekyo nitukyegyeraho ki?

¹¹ Toorana abanywani n’obwegyendesereza. Vanessa, owaaba yaagambirweho akeetegyereza ngu munywani we akaba naamuremesa kuheereza Yehova. N’ahabw’ekyo akarekyera aho kumunywana. Kwonka Vanessa taragarukiire aho. Akakora n’amaani kutunga abanywani basya omu kibiina. Naagira ngu eky’okureeberaho kya Noa n’eka ye kikamuhwera. “Bakaba beetooroirwe abantu abatarikukunda Yehova, kwonka bo bakaba nibakwatanisa.” Vanessa ku yaaherize kubatizibwa, akaba payoniya. Hati naagira ati: “Eki kimpwereire kugira abanywani barungi ti omu kibiina kyangye honka kureka n’omu bibiina ebindi.” Naiwe noobaasa kugira abanywani barungi waayejumbira kimwe omu murimo ogu Yehova atuhaire.​—Mat. 24:14.

12. Adamu na Haawa bakagira kutiina ki, kandi niki ekyarugiremu?

¹² Gira okutiina okuhikire. Okutiina okumwe ni kurungi ahariitwe. Nk’eky’okureeberaho, tushemereire kugira okutiina kurungi okw’okutenda kugwisa kubi Yehova. (Zab. 111:10) Ku ogire ngu Adamu na Haawa bakagira okutiina nk’okwo, bakaba batarikwija kugomera Yehova. Kwonka bakaba abagomi. Bwanyima y’okugoma, amaisho gaabo gakaiguka ekirikumanyisa bakeetegyereza ngu baaba abasiisi. Kandi bakahunguza abaana  baabo ekibi n’okufa. Ahabw’okugira ngu bakaba nibabaasa kureeba, nari kwetegyereza embeera ei barimu, bakagira enshoni baamanya ngu bajwaire busha bayekoorera eby’okwekingaho.​—Kut. 3:7, 21.

13-14. (a) Okuhikaana n’ebiri omu 1 Petero 3:21, ahabw’enki tutashemereire kutiina munonga okufa? (b) Ni nshonga ki ezirikutureetera kukunda Yehova?

¹³ N’obu turaabe twine kutiina kugwisa kubi Yehova, kwonka titwine kutiina rufu ekirenga. Yehova atuteeraireho omuhanda gw’okutunga amagara agatahwaho. Twakora ekibi, tukeeteisiza kimwe twihire aha mutima, Yehova naatusaasira enshobe zaitu. Naatusaasira ahabw’okwikiririza omu kitambo ky’Omwana we. Omuringo mukuru ogu turikworekamu ngu nitwikiririza omu kitambo n’okwehayo ahari Yehova kandi tukabatizibwa.​—Shoma 1 Petero 3:21.

¹⁴ Twine enshonga nyingi ezirikutureetera kukunda Yehova. Naatuha ebintu birungi ebirikutubaisaho buri izooba, kandi naatwegyesa n’amazima agarikumukwataho n’ebigyendererwa bye. (Yoh. 8:31, 32) Atuhaire ekibiina Ekikristaayo kutuhabura n’okutuha obuhwezi. Naatuhwera kwemera embeera mbi hati, kandi naatuha amatsiko g’okugumaho ebiro byona omu mbeera nungi omu biro by’omumaisho. (Zab. 68:19; Kush. 21:3, 4) Twateekateeka aha bi Yehova yaaherize kukora kworeka ngu naatukunda, nikituhiga kumukunda. Kandi twakunda Yehova, nitwega kumutiina omu muringo oguhikire. Nitutiina kugwisa kubi Ogwo ou turikukunda munonga.

15. Makayla akasingura ata okutiina ngu naaza kuremwa?

¹⁵ Makayla, owaaba yaagambirweho, akasingura okutiina ku yaayetegyereize ngu Yehova naasaasira. Naagira ati: “Nketegyereza ngu twena tituhikiriire kandi nitukora enshobe. Kwonka nkagaruka naayetegyereza ngu Yehova naatukunda kandi naaza kutusaasira arikwihirira aha kitambo.” Rukundo ei yaabaire ainiire Yehova ekamuhiga kwehayo ahariwe kandi akabatizibwa.

16. Miles akahwerwa ata kusingura oburemeezi bw’okutiina okuhiiganisibwa?

¹⁶ Miles, owaabaire naatiina ngu nyina naaza kumuhiiganisa yaacwamu kubatizibwa, akashaba obuhabuzi omureeberezi orikutaayaayira ebibiina. Miles naagira ngu omureeberezi ogwo “nawe akaba okuriire omu ka erimu omuzaire omwe otari mu mazima. Akampwera kuteekateeka aha ku ndikubaasa kuhamiza maawe ngu niinye nyecwereiremu kubatizibwa kandi ngu tata tiwe angyemesereize.” Nyina tarashemereirwe ahabw’okucwamu kwe. Akaba aine kuruga omuka, kwonka akahamira aha kucwamu kwe. Naagira ati: “Okwega aha birungi ebi Yehova akozire kikankwataho munonga. Ku naateekateekire munonga aha kitambo kya Yesu, nketegyereza rukundo mpango ei Yehova  anyiniire. Ekyo kikampiga kwehayo ahari Yehova kandi nkabatizibwa.”

17. Twena twine mugisha ki?

¹⁷ Haawa ku yaaraire aha kijuma ky’omuti gw’omuri Edeni, akeehakana Ishe. Kandi Adamu ku yaamwegaitsireho, akooreka ngu tarikusiima ebi Yehova yaabaire amukoreire. Twena twine omugisha gw’okworeka ngu titurikwikirizana n’omuringo ogu Adamu na Haawa baacwiremu. Ku turikubatizibwa, nitworeka ngu Yehova niwe aine obushoboorozi bw’okututeeraho emitindo y’ekirungi n’ekibi. Nitworeka ngu nitukunda Tataitwe kandi nitumwesiga.

18. Noobaasa kuba omusinguzi ota omu kuheereza Yehova?

¹⁸ Twaheza kubatizibwa nituba twine kugumizamu nitugyendera aha mitindo ya Yehova buri izooba, beitu etari eyaitu. Obukaikuru bw’abaheereza ba Ruhanga nibatwaza batyo buri mwaka. Noobaasa kutwaza nkabo waayongyera kwetegyereza Ekigambo kya Ruhanga, Baibuli, waaba hamwe n’ab’eishe-emwe omu nteerane, kandi okaba omweziriki omu kubagana n’abandi ebi oyegire ebirikukwata ahari Tataitwe oine rukundo. (Heb. 10:24, 25) Waaba noocwamu, hurikiza obuhabuzi obu Yehova arikukuha kurabira omu Kigambo kye n’ekibiina kye. (Isa. 30:21) Obwo noija kuba omusinguzi omuri byona ebi oraakore.​—Enf. 16:3, 20.

19. Niki eki oshemereire kuguma noijuka, kandi ahabw’enki?

¹⁹ Waagumizamu kwetegyereza oku orikugasirwa omu buhabuzi bwa Yehova, rukundo ei omwiniire n’emitindo ye neija kuhama. Waakora otyo, tihaine eki Sitaane arikwija kukubeihabeisa kukureetera kurekyera aho kuheereza Yehova. Teekateeka aha ku embeera yaawe eraabe neeshusha omu myaka rukumi kuruga hati. Noija kureeba enyima omanye ngu obu waacwamu kubatizibwa, buzima okacwamu gye munonga!