1. Duzu a bɔle Adam nee Yive a, na duzu a vile nu rale a?

NWANE a ɛsuzu kɛ ɔwɔ kɛ ɔkile mɔɔ le kpalɛ nee ɛtane a? Mɔɔ Adam nee Yive lile kpalɛ nee ɛtane ɛnwunlɛ baka ne ma ne bie la, bɛmaanle ɔlale ali kɛ, bɛnlɛ Gyihova nee ye ngyinlazo ne mɔ anu anwodozo. Bɛkpale kɛ bɛbahile mɔɔ le kpalɛ nee ɛtane la. (Mɔl. 3:22) Noko nea mɔɔ ɔbɔle bɛ a. Bɛ nee Gyihova agɔnwolɛvalɛ ne zɛkyele. Eza nwolɛ adenle mɔɔ bamaa bɛadɛnla aze dahuu la bɔle bɛ na bɛvale ɛtane nee ewule bɛwole bɛ mra. (Wlo. 5:12) Adam nee Yive kpɔkɛzilɛ ne hɔwiele munzule nu.

2-3. (a) Mɔɔ Felepe hanle edwɛkɛ ne hilele Yiteyopeanli abɔlɔba ne la, kɛzi ɔyɛle ye nyɛleɛ ɛ? (b) Saa yɛmaa bɛsɔne yɛ a, nyilalɛ boni mɔ a yɛbanyia a, na kpuya boni mɔ a yɛbazuzu nwo a?

² Fa kɛzi Adam nee Yive yɛle bɛ nyɛleɛ la toto kɛzi Yiteyopeanli abɔlɔba ne yɛle ye nyɛleɛ wɔ mekɛ mɔɔ Felepe lile ye daselɛ la anwo nea. Yiteyopeanli ne anye zɔle mɔɔ Gyihova nee Gyisɛse yɛle maanle ye la kpalɛ, ɔti ɔmaanle bɛzɔnenle ye ndɛndɛ. (Gyi. 8:34-38) Saa yɛyila yɛ nwo zo yɛmaa Nyamenle na yɛmaa bɛsɔne yɛ kɛ mɔɔ Yiteyopeanli ne yɛle la a, yɛmaa edwɛkɛ bie da ali wienyi. Yɛkile kɛ yɛ nye sɔ mɔɔ Gyihova nee Gyisɛse ɛyɛ ɛmaa yɛ la. Eza yɛkile kɛ yɛlɛ Gyihova anu anwodozo na yɛdie yɛto nu kɛ ɔdaye a ɔwɔ kɛ ɔkile mɔɔ le kpalɛ nee ɛtane a.

³ Dwenle nyilalɛ mɔɔ saa yɛsonle Gyihova a yɛnyia la anwo nea! Bie a le kɛ, ɔmaa yɛnyia anyelazo kɛ kenle bie yɛ sa baha mɔɔ bɔle Adam nee Yive la, na yɛadɛnla aze dahuu. Diedi mɔɔ yɛlɛ wɔ Gyisɛse Kelaese anu la ati, Gyihova  fa yɛ nvonleɛ kyɛ yɛ na ɔmaa yɛnyia adwenle mɔɔ anu te la. (Mat. 20:28; Gyi. 10:43) Eza yɛbaboka Gyihova azonvolɛ mɔɔ ɔdie bɛ ɔto nu mɔɔ bɛbanyia nyilalɛ kpole kenle bie la anwo. (Dwɔn 10:14-16; Wlo. 8:20, 21) Menli mɔɔ ɛranwu Gyihova la bie mɔ ze nyilalɛ ɛhye mɔ anwo edwɛkɛ, noko bɛtwenlehwenle bɛ bo aze kɛ bɛbazukoa Yiteyopeanli abɔlɔba ne neazo ne. Duzu a si bɛ adenle mɔɔ ɔti bɛmmaa bɛnzɔne bɛ a? Na kɛ ɔkɛyɛ na bɛali ngyegyelɛ zɔhane mɔ azo ɛ?

4-5. Duzu a ɛnee le kpavolɛ bie mɔɔ bɛfɛlɛ ye Avery yɛɛ bɛlɛra bie mɔɔ bɛfɛlɛ ye Hannah la ngyegyelɛ a?

⁴ Bɛnlɛ anwodozo. Avery awovolɛ le Gyihova Alasevolɛ. Bɛze ye papa kɛ ɔle selɛ mɔɔ ɔlɛ ɛlɔlɛ yɛɛ asafo nu kpanyinli mɔɔ bɔ mɔdenle. Noko ɛnee Avery ɛngulo kɛ bɛsɔne ye. Duzu ati ɔ? Ɔka kɛ: “Ɛnee menlie menli kɛ mebahola meayɛ kɛ me papa la.” Ɛnee eza Avery ɛnlɛ anwodozo kɛ ɔbahola yeali ɛzonlelilɛ mɔɔ kenle bie ɔbanyia la anwo gyima. Ɔka kɛ: “Ɛnee mesulo kɛ bɛbaha kɛ menyɛ asɔne wɔ bagua nu, memaa ɛdendɛlɛ anzɛɛ menea daselɛlilɛ ayia zo.”

⁵ Ɛnee Hannah mɔɔ ɛnyia ɛvolɛ 18 la ɛnlɛ anwodozo fee. Awovolɛ mɔɔ bɛsonle Gyihova la a tetele ye a. Noko, ɛnee ɔnlie ɔnli kɛ ɔbahola yeava Gyihova ngyinlazo yeayɛ gyima. Duzu ati ɔ? Hannah nyianle adwenle kɛ ɔ nwo ɛngyia fee. Ɔyɛ a, nyane ngome maa ɔboda ɔ nwo, na ɛhye maanle edwɛkɛ ne zɛkyele bɔkɔɔ. Ɔka kɛ: “Meanga mɔɔ meyɛ la anwo edwɛkɛ meangile awie biala, bɔbɔ me awovolɛ, na menyianle adwenle kɛ Gyihova ɛngulo kɛ meyɛ ye sonvolɛ ɔlua mɔɔ mefa meyɛ me nwo la ati.”

6. Duzu a zile Vanessa adenle kɛ ɔbalie ɛzɔnenlɛ a?

⁶ Agɔnwolɛma. Vanessa mɔɔ ɛnyia ɛvolɛ 22 la ka kɛ, “Ɛnee melɛ agɔnwolɛ bie mɔɔ me nee ye ɛdu ɛhyɛ kpalɛ.” Noko, Vanessa agɔnwo ne anlie kpɔkɛ mɔɔ yezi kɛ ɔdie ɛzɔnenlɛ la yeando nu. Ɛhye gyegyele Vanessa kpalɛ, ɔka kɛ, “Ɔyɛ se kɛ mebava agɔnwolɛ, na ɛnee ɔgyegye me kɛ saa mepɛ agɔnwolɛvalɛ zɔhane anu a, menrɛnyia agɔnwolɛ bieko mɔɔ bikye me kpalɛ la.”

7. Duzu a ɛnee kakula raalɛ bie mɔɔ bɛfɛlɛ ye Makayla la sulo a, na duzu ati ɔ?

⁷ Bie mɔ sulo kɛ bɛbayɛ ɛtane kpole. Mɔɔ Makayla nyianle ɛvolɛ nnu la yɛɛ bɛdule ɔ diema nrenyia kpanyinli a. Mɔɔ ɔlɛnyi la, ɔnwunle kɛzi ɔ diema nrenyia ne nyɛleɛ hanle ye awovolɛ la. Makayla  ka kɛ: “Ɛnee mesulo kɛ saa bɛsɔne me a, mebayɛ ɛtane, bɛadu me na meamaa me awovolɛ ali nyane dɔɔnwo.”

8. Duzu a ɛnee kpavolɛ bie mɔɔ bɛfɛlɛ ye Miles la sulo a?

⁸ Bie mɔ sulo dwazotia. Ɛnee Miles papa yɛɛ ye mame fofolɛ ne sonle Gyihova, noko ye mame mumua ne ɛnle Dasevolɛ. Miles ka kɛ, “Me nee me mame dɛnlanle ɛvolɛ 18, na ɛnee mesulo kɛ mebaha meahile ye kɛ mekulo kɛ bɛsɔne me. Menwunle kɛzi ɔyɛle ye nyɛleɛ wɔ mekɛ mɔɔ me papa rayɛle Dasevolɛ la. Ɛnee mesulo kɛ ɔbagyegye me.”

9. Saa ɛsukoa Gyihova abotane nee ye ɛlɔlɛ ne anwo debie a, duzu a bavi nu ara a?

⁹ Adam nee Yive angola anzonle Gyihova ɔluakɛ bɛannyia ɛlɔlɛ mɔɔ anu yɛ se la bɛammaa ye. Noko, Gyihova maanle bɛdɛnlanle aze bɛhyɛle na bɛwole mralɛ na bɛvale bɛ ngyinlazo bɛtetele bɛ. Yeangyɛ, Adam nee Yive nwunle kɛ bɛyɛ ngoaseade kpole kɛ bɛde Gyihova anwo atua la. Bɛ ra nrenyia kpanyinli ne hunle ɔ diema nrenyia kakula ne mɔɔ ɛnze nwolɛ bie la, akee angomedi subane yile alesama abusua ne tɔ. (Mɔl. 4:8; 6:11-13) Noko, ɛnee Gyihova ze adenle mɔɔ ɔbalua zo yealie Adam nee Yive abozoamra mɔɔ bɛkulo kɛ bɛsonle ye la. (Dwɔn 6:38-40, 57, 58) Mekɛ mɔɔ ɛlɛsukoa Gyihova abotane nee ye ɛlɔlɛ ne anwo ninyɛne dɔɔnwo la, ɛlɔlɛ mɔɔ ɛlɛ ɛmaa ye la bayɛ kpole. Ɔbamaa wɔakpo adenle ɛtane mɔɔ Adam nee Yive vale zo la na wɔayila ɛ nwo zo wɔamaa Gyihova.

10. Saa ɛdwenledwenle Edwɛndolɛ 19:7 anwo a, kɛzi ɔbaboa wɔ yeamaa wɔazonle Gyihova ɛ?

¹⁰ Kɔ zo sukoa Gyihova anwo debie. Mekɛ mɔɔ ɛlɛsukoa Gyihova anwo debie dɔɔnwo la, anwodozo mɔɔ ɛlɛ kɛ ɛbahola wɔazonle ye la bayɛ kpole. Avery mɔɔ yɛlimoa yɛha ɔ nwo edwɛkɛ la ka kɛ: “Mɔɔ mengengale ɛwɔkɛ mɔɔ wɔ Edwɛndolɛ 19:7 na mendwenledwenlenle nwolɛ la, ɔmaanle me anwodozo yɛle kpole.” (Kenga.) Mɔɔ Avery nwunle kɛzi Gyihova  lile ye ɛwɔkɛ zɔhane azo la, ɛlɔlɛ mɔɔ ɔlɛ ɔmaa ye la yɛle kpole. Ɛlɔlɛ ɛmmaa yɛnyia anwodozo ala, eza ɔmaa yɛfa yɛ adwenle yɛsie Gyihova nee mɔɔ ɔkpondɛ kɛ yɛyɛ la azo. Hannah mɔɔ yɛlimoa yɛha ɔ nwo edwɛkɛ la ka kɛ: “Ɔlua me ti anwo Baebolo ɛgengalɛ nee ye ɛzukoalɛ zo, menwunle kɛ saa meboda me nwo a, ɔmaa Gyihova di nyane.” (1 Pita 5:7) Hannah rayɛle awie mɔɔ ‘ɔdi Nyamenle edwɛkɛ ne azo.’ (Gye. 1:22) Duzu a vile nu rale a? Ɔka kɛ: “Menwunle kɛ Gyihova mɔɔ metie ye la boa me, ɔti menyianle ɛlɔlɛ kpole memaanle ye. Kɛkala, menyia anwodozo kɛ saa mehyia moalɛ a, Gyihova baboa me dahuu.” Hannah holale lile nganeɛ mɔɔ ɔte kɛ ɔboda ɔ nwo la azo. Ɔyilale ɔ nwo zo ɔmaanle Gyihova na bɛzɔnenle ye.

11. Duzu a Vanessa yɛle amaa yeanyia agɔnwolɛma ɛ, na duzu a yɛbahola yɛazukoa yɛavi nu a?

¹¹ Kpa wɔ agɔnwolɛma nrɛlɛbɛ nu. Vanessa mɔɔ yɛlimoa yɛha ɔ nwo edwɛkɛ la nwunle kɛ, ɔ gɔnwo ne ɛngulo kɛ ɔbazonle Gyihova. Yemɔti ɔpɛle agɔnwolɛvalɛ ne anu. Noko Vanessa yɛle debie gyɛne bokale nwo. Ɔbɔle mɔdenle ɔkpondɛle agɔnwolɛma fofolɛ wɔ asafo ne anu. Ɔka kɛ, Nowa nee ye abusua ne neazo ne boale ye. “Ɛnee menli mɔɔ ɛngulo Gyihova la ɛbɔ bɛ nwo mgbɔlɔka ɛyia, noko bɛvale bɛ nwo agɔnwolɛ kpalɛ.” Wɔ Vanessa ɛzɔnenlɛ ne anzi, ɔyɛle adekpakyelɛ. Kɛkala ɔka kɛ: “Ɛhye ɛmaa menyia agɔnwolɛma kpalɛ wɔ me asafo ne nee asafo gyɛne nu.” Saa ɛdawɔ noko ɛfa ɛ nwo ɛwula gyima mɔɔ Gyihova ɛva ɛmaa yɛ la anu a, ɛbanyia agɔnwolɛma kpalɛ.​—Mat. 24:14.

12. Ɛzulolɛ boni a Adam nee Yive annyia ye a, na duzu a vile nu rale a?

¹² Nyia ɛzulolɛ nwo adwenle kpalɛ. Tɛ ɛzulolɛ ne amuala a le ɛtane a. Kɛ neazo la, ɔwɔ kɛ yɛsulo kɛ yɛbayɛ debie mɔɔ Gyihova anye ɛnlie nwo la. (Edw. 111:10) Saa Adam nee Yive nyianle ɛzulolɛ zɛhae a, anrɛɛ bɛande atua bɛantia Gyihova. Noko bɛdele atua. Wɔ ɛhye anzi, bɛ nye bukele na bɛnwunle kɛ bɛle ɛtanevolɛma. Mɔɔ bɛbahola bɛayɛ ala a le kɛ,  bɛbava ɛtane bɛawo bɛ mra. Kɛmɔ ɛnee bɛte bɛ tɛnlabelɛ ne abo kpalɛ la ati, bɛzele nyiane kɛ bɛ nwo la zo la, na bɛhɔveale.​—Mɔl. 3:7, 21.

13-14. (a) Kɛ mɔɔ 1 Pita 3:21 maa yɛnwu ye la, duzu ati a ɔnle kɛ yɛsulo ewule somasoma ɛ? (b) Ndelebɛbo boni ati a ɔwɔ kɛ yɛkulo Gyihova a?

¹³ Ɔwɔ kɛ yɛnyia ɛzulolɛ kpalɛ yɛmaa Gyihova, noko ɔnle kɛ yɛsulo ewule somasoma. Gyihova ɛyɛ ngyehyɛleɛ mɔɔ yɛbalua zo yɛanyia dahuu ngoane a. Saa yɛyɛ ɛtane na yɛfi yɛ ahonle nu yɛnu yɛ nwo a, Gyihova bava ahyɛ yɛ. Ɔbava yeahyɛ yɛ ɔlua diedi mɔɔ yɛlɛ ye wɔ ɔ Ra ne ɛkpɔnedeɛ ne anu la azo. Adenle titili ko mɔɔ yɛdua zo yɛkile kɛ yɛlɛ diedi la a le kɛ, yɛbayila yɛ nwo zo yɛamaa Nyamenle na bɛazɔne yɛ.​—Kenga 1 Pita 3:21.

¹⁴ Yɛlɛ ndelebɛbo dɔɔnwo mɔɔ ɔti ɔwɔ kɛ yɛkulo Gyihova a. Ɔfa mɔɔ yɛhyia nwo la ɔmaa yɛ alehyenlɛ biala, eza ɔmaa yɛnwu ɔ nwo nɔhalɛ ne nee ye bodane ngakyile ne mɔ. (Dwɔn 8:31, 32) Yeva Kilisiene asafo ne yemaa yɛ kɛ ɔboa yɛ na ɔhile yɛ adenle. Ɔboa yɛ ɔmaa yɛgyinla yɛ ngyegyelɛ nloa ɛnɛ yɛɛ ɔmaa yɛnyia kenle bie asetɛnla kpalɛ nwo anyelazo. (Edw. 68:19; Yek. 21:3, 4) Saa yɛdwenledwenle mɔɔ Gyihova ɛyɛ ɛhile kɛ ɔkulo yɛ la anwo a, ɔmaa yɛbikye ye kpalɛ. Na Gyihova anwo ɛlɔlɛ maa yɛnyia ɛzulolɛ nwo adwenle kpalɛ. Yɛsulo kɛ yɛbamaa Ahenle mɔɔ kulo yɛ kpalɛ la ali nyane.

15. Kɛzi Makayla lile ɛzulolɛ zo konim ɛ?

¹⁵ Makayla mɔɔ yɛlimoa yɛha ɔ nwo edwɛkɛ la holale lile ɛzulolɛ mɔɔ ɔlɛ kɛ ɔnrɛhola ɔnrɛli nɔhalɛ la azo wɔ mekɛ mɔɔ ɔnwunle kɛ fakyɛ wɔ Gyihova afoa la. Ɔka kɛ: “Menwunle kɛ yɛ muala yɛnli munli na yɛyɛ nvonleɛ. Noko eza mendele ɔ bo kɛ Gyihova kulo yɛ na ɔbalua ɛkpɔnedeɛ ne azo yeava yeahyɛ yɛ.” Gyihova anwo ɛlɔlɛ mɔɔ ɔnyianle la hanle ye maanle ɔyilale ɔ nwo zo ɔmaanle ye na bɛzɔnenle ye.

16. Kɛzi bɛboale Miles bɛmaanle ɔlile ɛzulolɛ mɔɔ ɔlɛ kɛ bɛbadwazo bɛatia ye la azo konim ɛ?

¹⁶ Miles, mɔɔ ɛnee sulo kɛ ye mame bazi ye ɛzɔnenlɛ nwo adenle la maanle maangyebakyi zo neavolɛ bie boale ye. Ɔka kɛ: “Maangyebakyi zo neavolɛ ne noko nyinle wɔ abusua mɔɔ bɛnle ɛzonlenlɛ ko anu la anu. Ɔboale me ɔmaanle menwunle kɛzi mebamaa me mame anwu ye kɛ medame a mezi zɔhane kpɔkɛ ne a, na tɛ me papa a ɛlɛtinlitinli me nwo zo kɛ memmaa bɛzɔne me a.” Miles mame anye anlie ye kpɔkɛzilɛ ne anwo. Awieleɛ bɔkɔɔ ne, ɔvile ye sua nu ɛkɛ na ɔlile ye kpɔkɛzilɛ ne anwo gyima. Ɔka kɛ: “Ninyɛne mgbalɛ mɔɔ Gyihova ɛyɛ ɛmaa me mɔɔ menzukoale nwolɛ debie la hanle me ahonle kpole. Saa medwenle Gyisɛse ɛkpɔnelɛ afɔlebɔlɛ ne anwo kpalɛ a,  ɔmaa menwu kɛzi Gyihova kulo me la. Ɛhye maanle menyilale me nwo zo memaanle Gyihova na bɛzɔnenle me.”

17. Nwolɛ adenle boni a yɛlɛ a?

¹⁷ Mɔɔ Yive lile bakama ne wɔ Yidɛn tola ne anu la, ɔkpole ɔ Ze ne. Mɔɔ Adam noko lile bie la, ɔlale ye ali kɛ, ɔ nye ɛnzɔ ninyɛne mgbalɛ mɔɔ Gyihova ɛyɛ ɛmaa ye la. Yɛ muala yɛlɛ adenle yɛkile kɛ yɛ nye ɛnlie mɔɔ Adam nee Yive yɛle la anwo. Saa yɛsɔne a, yɛmaa Gyihova nwu ye kɛ, yɛdie ye tumililɛ nee ye ngyinlazo mɔɔ fale kpalɛ nee ɛtane nwo la yɛto nu. Yɛkile kɛ yɛkulo yɛ Ze ne yɛɛ yɛlɛ ye nu anwodozo.

18. Kɛ ɔkɛyɛ na wɔahola wɔazonle Gyihova ɛ?

¹⁸ Wɔ yɛ ɛzɔnenlɛ nzi, ɔwɔ kɛ yɛkɔ zo yɛyɛ Gyihova ɛhulolɛdeɛ na tɛ yɛdayɛ ɛdeɛ. Menli mgbe dɔɔnwo mɔɔ wɔ ewiade la yɛ zɔ ɛvolɛ biala. Saa ɛbahola wɔayɛ zɔ a, ɔwɔ kɛ ɛmaa ndelebɛbo mɔɔ ɛlɛ wɔ Nyamenle Edwɛkɛ Baebolo ne anu la yɛ kpole; ɛ nee ɛ mediema diedima bɔ dahuu na ɛka mɔɔ wɔzukoa ye wɔ wɔ ɛlɔlɛ Selɛ ne anwo la ɛkile awie mɔ. (Hib. 10:24, 25) Saa ɛlɛsi kpɔkɛ a, tie folɛ mɔɔ Gyihova dua ye Edwɛkɛ nee ye ahyehyɛdeɛ ne azo tu wɔ la. (Aye. 30:21) Ɛhye bamaa mɔɔ ɛbayɛ biala la ayɛ boɛ.​—Mrɛ. 16:3, 20.

19. Duzu a ɔwɔ kɛ ɛkakye ye dahuu a, na duzu ati ɔ?

¹⁹ Saa ɛkɔ zo ɛdwenle kɛzi Gyihova adehilelɛ boa wɔ la anwo a, ɛhulolɛ mɔɔ ɛlɛ ɛmaa Gyihova nee ye ngyinlazo ne mɔ la bayɛ kpole. Akee debie biala mɔɔ Seetan bayɛ la ɛnrɛhwe wɔ ɛnrɛvi Gyihova anwo. Fa ye kɛ ɛde aze wɔ ɛvolɛ apenle ko bieko mɔɔ la ɛ nyunlu la anu. Ɛbado ɛ nye ɛ nzi wɔanwu kɛ, kpɔkɛ mɔɔ ɛzile ɛzɔnenle la ɛnee le kpalɛ tɛla biala.