1. Anto ray abalang nen Adan tan Eva, tan antoy resulta?

PARAD sika, siopa so nepeg ya manggawa na saray estandarte ed no antoy maong tan no antoy mauges? Nen angan si Adan tan Eva ed samay bunga na kiew na pikakabat ed maong tan mauges, impanengneng da ya anggapoy talek da ed si Jehova tan ed saray estandarte to. Nanggawa ra na sarili dan estandarte ed no antoy maong tan mauges. (Gen. 3:22) Balet isip mo pay abalang da. Abalang da so pikakaaro da ed si Jehova. Abalang da met so pankanawnawan manbilay na andi-anggaan, tan impatawir day kasalanan tan patey ed saray ananak da. (Roma 5:12) Say desisyon nen Adan tan Eva et nanresulta ed kairapan.

2-3. (a) Antoy reaksion na Etiopen eunoko nen sikatoy pinulongan nen Felipe? (b) Anto ran bendisyon so awaten tayo no manpabautismo tayo, tan anto ran tepet so ebatan tayo?

² Ikompara so ginawa nen Adan tan Eva ed samay reaksion na Etiopen eunoko nen sikatoy pinulongan nen Felipe. Naapresyan maong na eunoko so ginawa nen Jehova tan Jesus parad sikato kanian tampol ya nampabautismo. (Gawa 8:34-38) No idedika tayoy bilay tayo ed Dios tan manpabautismo tayo ya singa ginawa na eunoko, ipapanengneng tayo ya aapresyaen tayo so ginawa nen Jehova tan Jesus parad sikatayo. Ipapanengneng tayo met ya manmamatalek tayo ed si Jehova tan bibidbiren tayo ya sikato so nepeg ya manggawa na estandarte ed no antoy maong tan mauges.

³ Isipen pa ray bendisyon ya awaten tayo no manlingkor tayo ed si Jehova! Say sakey et say ilalo tayo ya awaten so amin ya abalang nen Adan tan Eva, kaiba lay pankanawnawan manbilay na andi-anggaan. Lapud pananisia tayo ed si Jesu-Kristo,  perdonaen nen Jehova iray lingo tayo tan ikdan to tayoy malinis a konsiensia. (Mat. 20:28; Gawa 10:43) Magmaliw tayon kabiangan na pamilya nen Jehova ya tugyopen na saray naabobonan ya lingkor to ya ikdan to na alay abig ya arapen. (Juan 10:14-16; Roma 8:20, 21) Anggaman wala ray onian bendisyon, say arum ya akabat da lay Jehova et siansia nin manaalangan ya aligen so alimbawa na Etiopen eunoko. Anto ray nayarin makakasbel ed sikara ya manpabautismo? Tan panon dan nalampasan iratan?

4-5. Antoy makakasbel ed lakin kabataan ya si Avery tan say biin kabataan ya si Hannah?

⁴ Anggapoy kompiyansa ed sarili. Si Avery, sakey ya lakin kabataan, et Tasi nen Jehova iray atateng to. Say tatay to et kabkabat ya maasikason ama tan responsablin elder. Balet manaalangan si Avery ya manpabautismo. Akin? “Inisip ko ya agkon balot naparaan si tatay ko,” so kuan to. Anggapo met so kompiyansa nen Avery ya sarag ton gawaen iray responsabilidad ya nayarin iter ed sikato diad arapen. “Natatakot ak ta ompan agko sarag no kerewen dan manpikasi ak ed kongregasyon, manpaliwawa, odino mangidaulo na grupo ed panagpulong.”

⁵ Si Hannah, ya mantaon na 18, et talagan anggapoy kompiyansa tod sarili to. Sikatoy pinabaleg na atateng ya manlilingkor ed si Jehova. Balet panduaruwaan to no kasin sarag ton unoren iray estandarte nen Jehova. Akin? Abebbebay pakanengneng nen Hannah ed sarili to. Wala ray panaon ya no aliwliwan maong so liknaan to, gagagalaen ton sakitan so laman to, balet lalon onloloor so situasyon. “Agkon balot imbagad arum so gagawaen ko, anggan diad saray atateng ko,” so kuan to, “tan inisip ko ya agak lan balot labay nen Jehova ya magmaliw a lingkor to lapud gagawaen kod sarilik.”

6. Antoy makakasbel ed si Vanessa ya manpabautismo?

⁶ Impluensya na kakaaro. Si Vanessa, ya mantaon na 22, et imbaga to: “Walay maapit a kaarok ya ngalngali samploran taon ko lan kabat.” Balet agmakakatulong so kaaro nen Vanessa ed kalat ton manpabautismo. Lapud satan et maermen si Vanessa, tan imbaga to: “Mairap koy mikaaro, tan natatakot ak ya no pultoten ko lay pikakaarok ed sikato, ompan agak lan balot makalmoy arum ya maapit a kaaro.”

7. Antoy tatakotan na biin kabataan ya si Makayla, tan akin?

⁷ Takot ya makagaway seryoson kasalanan. Si Makayla et limay taon to nen adispelo so kuya to. Legan ya sikatoy ombabaleg, anengneng toy ermen na saray atateng to lapud ginawa nen kuya to. “Natatakot ak ya no manpabautismo ak, ompan makagawa  ak na kasalanan tan nadispelo ak, tan lalon manermen iray atateng ko,” so kuan nen Makayla.

8. Antoy tatakotan na lakin kabataan ya si Miles?

⁸ Takot ed isusumpa. Say tatay tan say stepmother na lakin kabataan ya si Miles et manlilingkor ed si Jehova, balet say nanay to et aliwan Tasi. “Wala ak ed pudir nen nanay ko ed loob na 18 taon,” so imbaga nen Miles, “tan antakot kon ibagad sikato ya planok lay manpabautismo. Anengneng koy reaksion to nen nagmaliw a Tasi si tatay ko. Natatakot ak ya ompan manggaway paraan pian nairapan ak ed planok.”

9. Antoy seguradon nagawa legan ya nanaaruman so antam nipaakar ed kabaleg na panangaro tan inkamaanos nen Jehova?

⁹ Say sakey a rason no akin ya pinili nen Adan tan Eva so agmanlingkor ed si Jehova et lapud agda pinabiskeg so panangaro da ed sikato. Balet, siansia nin inabuloyan ira nen Jehova ya manbilay na andukey pian nawalaan ira na ananak tan manggawa na sarili dan estandarte ed no panon dan pabalegen iray ananak da. Ag-abayag, anengneng ed saray agawa ya talagan makulangkulang si Adan tan Eva ed desisyon dan agmanpasakop ed si Jehova. Pinatey na panguloan ya anak da so agi to, tan asabi panaon ya nagmaliw a maruksa tan makasarili so dakdakel a totoo. (Gen. 4:8; 6:11-13) Balet, nanggaway paraan si Jehova pian niliktar so amin ya ananak nen Adan tan Eva ya malabay a manlingkor ed sikato. (Juan 6:38-40, 57, 58) Legan ya nanaaruman so antam nipaakar ed kabaleg na panangaro tan inkamaanos nen Jehova, seguradon lalon ombiskeg so panangarom ed sikato. Diad ontan et agmo aligen so ginawa nen Adan tan Eva tan napakiwas kan idedika so sarilim ed si Jehova.

10. Akin ya say pandalepdep ed Salmo 19:7 et makatulong ed sika ya manlingkor ed si Jehova?

¹⁰ Itultuloy mon kabaten si Jehova. No mas kabaten moy Jehova, mas naaruman so kompiyansam ya sarag moy manlingkor ed sikato. Si Avery, ya abitla niman, et imbaga to: “Awalaan ak na kompiyansa nen inaral tan dinalepdep ko so sipan ya walad Salmo 19:7.” (Basaen.) Nen anengneng nen Avery no panon a tinoor nen Jehova itan ya sipan to, mas  binmiskeg so panangaro tod Dios. Say panangaro et aglabat makatulong pian nawalaan tayoy kompiyansa noagta makatulong met itan pian lanang tayon nonoten si Jehova tan saray panlabayan to. Si Hannah, ya abitla niman, et imbaga to: “Diad personal ya panagbasa tan panagaral koy Biblia, atalosan ko ya no sasakitan koy sarilik, nasasakitan ko met si Jehova.” (1 Ped. 5:7) Si Hannah et nagmaliw ya ‘mananumpal na salita na Dios.’ (Sant. 1:22) Antoy resulta? Imbaga to: “Nen anengneng ko ya maong so epektod siak na panguunor kod si Jehova, binmiskeg so panangarok ed sikato. Segurado ak la natan ya igiya ak nen Jehova kada no kaukolan koy tulong to.” Natan et agla sasakitan nen Hannah so sarili to. Indedika toy bilay to ed si Jehova tan nampabautismo.

11. Antoy ginawa nen Vanessa pian nawalaan na maong iran kakaaro, tan antoy naaralan tayo ed saya?

¹¹ Pilim iray maong a kakaaro. Si Vanessa, ya abitla niman, et naisip to lanlamang ya samay kaaro to so makakasbel ed sikaton manlingkor ed si Jehova. Kanian pinultot to iman a pikakaaro to. Balet aliwan satan labat so ginawa nen Vanessa. Sikatoy nanggawa na paraan pian nawalaan na balon kakaaro balet dia lad loob na kongregasyon. Imbaga to ya say akatulong ed sikato et say alimbawa nen Noe tan say pamilya to. “Apaliberan ira na totoon agmangaaro ed si Jehova,” so imbaga to, “balet malikeliket ira ta balibali so ulopan da.” Kayarin nampabautismo si Vanessa, sikatoy nampayunir. Imbaga to: “Akatulong itan pian nawalaan ak na maong iran kakaaro aliwa labat ya diad kongregasyon mi noagta pati diad arum ya kongregasyon.” Nawalaan ka met na maong iran kakaaro no lanang kan mibiang ed kimey ya ipapagawa nen Jehova ed sikatayo.​—Mat. 24:14.

12. Anton klase na takot so anggapod si Adan tan Eva, tan antoy resulta?

¹² Nepeg ya walaan kay dugan klase na takot. Wala ray klase na takot ya parad pankaabigan tayo. Singa bilang, nepeg ya walay takot tayo ed si Jehova, salanti, say takot ya sikatoy napaermen tayo. (Sal. 111:10) No si Adan tan Eva et walaan na ontan ya klase na takot, inunor da komon si Jehova. Balet nanrebelde ira. Tan nen ginawa da itan, nibagan alukasan so mata ra ta naamtaan da ya nagmaliw iran makasalanan. Impatawir da  ed saray ananak da so kasalanan tan patey. Nen anengneng odino atalosan day kipapasen da, akalikna ira na kababaingan lapud labos-lakseb ira tan nanggawa ra na saray insakbong dad laman da.​—Gen. 3:7, 21.

13-14. (a) Base ed 1 Pedro 3:21, akin ya agtayo nepeg a sobran takotan so ipapatey? (b) Anto ray rason pian aroen tayoy Jehova?

¹³ Say agnepeg ya niwalad sikatayo et say sobran takot ed ipapatey. Nanggaway paraan si Jehova pian nawalaan itayoy bilay ya andi-anggaan. No makagawa tayoy kasalanan balet tuan magbabawi tayo, perdonaen nen Jehova iray lingo tayo. Perdonaen to tayo lapud pananisia tayo ed dondon bagat na Anak to. Tan say sakey ya manunan paraan ya nipanengneng tayoy pananisia et diad pangidedika tayoy bilay tayo ed Dios tan pampabautismo tayo.​—Basaen so 1 Pedro 3:21.

¹⁴ Dakel so rason pian aroen tayoy Jehova. Agto labat iiter iray maong ya bengatlan panliliketan tayo kada agew noagta ibabangat to met ed sikatayo so katuaan nipaakar ed sikato tan saray gagala to. (Juan 8:31, 32) Sakey ni, inter to so Kristianon kongregasyon ya mangigiya tan ontulong ed sikatayo. Tutulongan to tayo pian nasarag tayo iray problema natan, tan inikdan to tayoy ilalo ya manbilay na andi-anggaan ed perpekton kipapasen diad arapen. (Sal. 68:19; Apo. 21:3, 4) No dalepdepen tayo no panon la karakel so ginawa nen Jehova pian ipanengneng toy panangaro tod sikatayo, sikatoy naaro tayo. Tan no inaro tayoy Jehova, nawalaan itayo na dugan klase na takot. Antakot tayon sakitan so Dios ya inar-aro tayon maong.

15. Panon ya alabanan nen Makayla so takot ya ompan makagawa na seryoson kasalanan?

¹⁵ Si Makayla, ya abitla niman, et alabanan toy takot ya ompan makagawa na seryoson kasalanan nen naaralan to ya agaylay kabaleg na panamerdona nen Jehova. “Atalosan ko ya amin tayo et aliwan perpekto tan makagawa tayo na saray lingo. Balet atalosan ko met ya inaro itayo nen Jehova tan perdonaen to tayo panamegley na dondon.” Say panangaro tod si Jehova so amakiwas ed sikaton idedika so bilay to tan manpabautismo.

16. Panon ya atulongan si Miles pian nalabanan toy takot ed isusumpa?

¹⁶ Si Miles, ya abitla niman, et nampatulong ed manangasikaso na sirkito lapud natatakot ya ompan kontraen nen nanay to so desisyon ton manpabautismo. “Pareho kami ya aliwan Tasi so sakey ya ateng mi,” so imbaga nen Miles. “Tinulongan to ak ya mannonot no antoy nayarin ibagak ed si nanay ko pian nakombinsik ya say pampabautismok et sarilik ya desisyon tan agak pipiliten nen tatay ko.” Aliwliway reaksion na nanay nen Miles. Asabi panaon, kaukolan toy ontaynan ed abung nen nanay to, balet agto inuman so desisyon to. “Nen inaral ko ray maong ya ginawa nen Jehova parad siak, balbaleg so epekto tod siak,” so kuan to. “Nen ninonot kon maong so dondon bagat nen Jesus, diman ko atalosan ya talagan inar-aro ak nen Jehova. Atan so amakiwas  ed siak ya idedika so bilay kod si Jehova tan manpabautismo.”

17. Antoy pankanawnawa tayon amin?

¹⁷ Nen angan si Eva ed samay bunga na kiew ed Eden, sikatoy nanrebelde ed Ama to. Nen angan met si Adan, impanengneng to ya anggapon balot so apresasyon to ed amin ya maong a ginawa nen Jehova parad sikato. Walay pankanawnawa tayon amin ya ipanengneng ya agtayo labay ya aligen so ginawa nen Adan tan Eva. No manpabautismo tayo, ipapanengneng tayod si Jehova ya manisia tayon sikato so walaan na autoridad ya manggawa na estandarte ed no antoy duga tan no antoy aliwa. Papaneknekan tayo ya inaro tayoy Ama tayo tan manmamatalek tayod sikato.

18. Panon kan ontalona ed panaglingkor mod si Jehova?

¹⁸ Kayari na bautismo, kaukolan tayon pansagpotan ya inagew-agew ya unoren iray estandarte nen Jehova, aliwan say estandarte tayo. Minilyon ya totoo so manggagawa na ontan. Nagawaan mo met itan no itultuloy mon paaralemen so pakatalos mod Salita na Dios, say Biblia; regular kan milimog ed saray agagi; tan maseseg mon ipulong iray naaralan mo nipaakar ed maaron Ama tayo. (Heb. 10:24, 25) No mandedesisyon ka, dengel moy bilin nen Jehova ed sika ya iiter to panamegley na Salita to tan say organisasyon to. (Isa. 30:21) Diad ontan, ontalona ka ed amin ya gawaen mo.​—Pro. 16:3, 20.

19. Antoy nepeg ya lanang mon sankanonot, tan akin?

¹⁹ No lanang mon sankanonot no panon kan nagugunggonaan ed panangigiya nen Jehova, lalon ombiskeg so panangarom ed sikato tan ed saray estandarte to. Kanian agkan balot natukso ed antokaman ya iyopresi nen Satanas ya mangiyarawi ed sika ed panaglingkor mo ed si Jehova. Imadyin moy sarilim sanlibon taon manlapud natan. No nonoten mo may ginawam ya desisyon a manpabautismo, seguradon nibagam ya saman la so sankaabigan ya desisyon mo!